LUNGKIMNA DIKTAK NA NGAH THEIHNA DING LAMPI

Dr. Kham Khan Khai, Ed.D

Leitungah "lungkim" cih kammal koibangin khiatna guan thei ding? A bangci te lungkim uh a, bangteng a neih uh ciangin lungkimna ngah thei uh hiam? Na nuntakna ah lungkimna na bangci ngah thei ding cih ngaihsun in na lung a buai ngei hiam? A buai ngei khak leh hih lai in nang aa ding hi! Lungkimna diktak na ngahna dingin hih a nuai aa sepding leh nusiat dingte hanciam in zui in. Tua in lungkimna hong ngahsak ding hi.

1. MIDANGTE TAWH KITEHKAAK NAWN KEI IN

Midang tawh neihsa, pilna, leh siamna tehkaak in na cinlahna leh siamlohna te in na lungsim hong vuknelh kha ding hi. Midangte nuntakna en in nangma aa tawh na tehkaak ciangin enna, huaihamna leh lunggimna ngah kha ding hi teh. Mihing khatciat in pilna le siamna a tuamciat kinei a, khat le khat ki-en, ki-hazat theih hilo hi. Pasian in tua dingin hong bawl hi a, na pilna leh siammun ahoih pen dingin hanciam in. Lasiam khat thugen siam khollo thei a, kimawl siam khat zong laisiam hetlo thei hi. Mi khempeuh thugen siamkhin leh thungai om nawnlo dinga, i vekpi in lasiam khin le hang, lakhui kizuak thei nawnlo ding hi. Singkung ateh leh a paak ameel kibang leh etlawm hetlo dinga, paak khempeuh unok-paak hikhin leh mellawmna omlo ding hi. Leitungah nang bang a dang omlo aa, na mun ah nahihna leh nasepna a sem ding nang bekmah hi teh. Pasian lungtang sungah nang aa ding mun tuam om den a, na mun kuamah in luah theilo ding hi. Tua ahih manin "NANG" pen nang na hih manpha kisa inla, Pasian hong piak pilna, siamna, leh na hi bangbang tawh Pasian min phat le cin lungkimna diktak na ngah ding hi.

2. NANG LE NANG KITELTHEIHSAWM IN
Na siamna le siamlohna, na thahatna le thanemna te ciantak in kitheih sawm in. Na kivakna (siamnel) lopi hunbei thabei in hanciam teta kei in, na lunggim iin lungkiatna leh nang le nane kimawhpaihna hong tun ding hi. Na thanemna na puahsawm sangin, na thahatna phungvuh zaw le cin damdam in na thanemna hong kiamkiam lel ding hi. Na uuk khat na siamna ahih theihna dingin hanciam in. Midang te hong pahtawi pakna leh kamsiam te tawh na hihna diktak mansuah kei inla, hong gensiatna le muanlohna te sungah a kiselcip na siamna le kivakna te mangthangsak kei in. Nang mahmah na kitheihtelna in lungkimna diktak na ngahna ding lampi maan hong tun ding hi.

3. MIDANGTE PANPIH DING TUANTUAL KEI IN
Lungkimna diktak in ngahna sangin sepkhiatna ah om zaw cih mangngilh kei in. Ngahna ding na ngaihsut le deih beh semsem ding cin a, sepkhiat, piakkhiat ding ngaihsun le cin na meel nosuah tektek ding hi. Lai Siangtho in, "ngahna sangin piakna ah thupha om zaw hi" [Sawltak 20:35, ZIV] na ci hi. Sir Winston Churchill in, "Ih ngahna tungtawn in i nungta aa, i piakkhiatna tungtawn in nuntakna bucing i nei hi" ci hi. Piakkhiatna leh midangte panpihna in neihna pan hong pai hilo a, lungsim pan pusuak ahih manin manpha in namtui hi. Midangte na panpihna panin lungnopna leh lungkimna na ngah pelmawh ding hi.

4. PASIAN' GEELNA MUANG IN
A thupi pen ah, Pasian' geelna in nang' aa dingin ahoih pen. hi den cih muangkhial kei in. Pasian nang hong Bawlpa leh hong Tanpa hi aa, na siatna ding a geel ding hi leh hong bawllo in zong hong tan hetlo ding hi. Ama hong itna leh a geelna in uphuailo zah dongin kicing aa, muanhuai mahmah hi. Na tuahkhak thu haksa, gimna, leh buaina te in ama hong tunpihna ding mun le zaa adingin hong sekna leh pattahna hi a, pattahna leh sekna lo tawh munhoih, zaahoih, leh nuntak hoih tungin na siatlawh, nabuai ding Pasian in hong deihsak hetlo hi. A haksa na tuah hun ah, na zawh theihna dingin Pasian in hong ompih den cih zong mangngilh kei in.

PASIAN' GEELNA SUNGAH UPMAWHLOH THU, A PIANGVAT CIH OM NGEILO HI.