Khekhap

Dr. Kham Khan Khai, Ed.D 

"Topa' mit ah amah aman in gamta in, a pu David' khekhap zui tinten aa, them khat zong pial lo hi."

Kumpi nihna 22:2

"Na hihna khempeuh uh, nekna dawn-na ah a hi zongin Pasian' minthan-na dingin na hih un"

Corin Masa 10:31

"Khekhap" in ih paina sa, ih lampi tot leh ih gamtatzia ong lak kik ei le ei ki et kikna, sit telna (self -introspection) hoih mahmah khat hi. Tua hi aa a tung aa Lai Siangtho mun te et-kak kik leng Khekhap ih cih ciang in ih sepna, hihna, gamtat zia ong ki muh kikna, mite in ei ong muhna leh ei le ei ki et kikna hi. 

 Mi hoih tampi tak a sih khit uh hangin amin uh si nai deklo in tu dong mite' kam ah ging-ging lai hi. Tua te in bang hang hiam? A mau a sih uh hangin mite in amau te khekhapte uh en kik uh aa tua khekhap te tung tawn in a tangthu uh kan kik thei uhhi. Mi pawl khat te leuleu ami si nailo pi in, amin uh a si tampi tak om hi. Mi te in a gamtatzia leh a nunzia en uh aa, mi muanhuai a hih leh hihloh thei pah lel uh aa, a khekhap tawh ki zui a tot lampi uh a mong a tun ma un a min uh si khin ta hi. 

Mikang te paunak ah "Gamtatna in pau sang in ngaih zaw hi" (Action speaks louder than words) na ci hi. Na gamtatna in na khekhap ong hi pah aa, tua khekhap in na tangthu a at hi pah hi. Tua ahih main ih gamtat ih luheek ih kampauna bek na ngawn hoihtak in ki dop huai aa, tangthu a at-at ih hihlam tak ih tel mahmah ding thupi hi.

            Ni sim in na gamtatna, na kampau te in na khekhap hi pahpah aa, na nung aa ong pai na sanggam, na tu na ta, na lawmte in na khekhap ong muh uh caing in, a bangci mi na hiam cih ong thei pah lel ding uhhi. 

Paul in Christ gamtat zia ka zuih mah bang in no te in kei ma khekhap hong zui ta un (I Cor. 11:1) na ci hi. Na nau na lawm te kiang ah ka khekhap ong zui un na ci ngam ding hiam? Na gamtatna leh na kampau, na luheek hoih tak ki ngaih sun kik inla, na tangthu ding hoihtak geel pha kik dih ve lawm...... Na Khekhap ong ki zui ding hi leh na phal ding hiam????

Na kalsuanna sa, na totsa lampi na et kik ciang, na khekhap na muhteh na lung a kim hiam? Hih in kei totna lampi mah ahiam? Hih bang sem kha ngei mah ka maw le..? na cih hun a om hiam? Mun khatkhat te na khekhap ki dawk kei leh na ut hun om kha lua ding hi. Mun khatkhat te ah nang le nang na ki paak hun zong om tham ding hi. A beisa aa na kalsuanna, na totsa lampi, na khekhap phiat thei lo kha mah ding hi teh. A hi zongin na paina ding lampi saupi tak om lai hi. Tua te ah lungkim tak leh ki siik om lo tak in, na khekhap na et kik teh lungdamna leh kipahna a hi thei ding lampi na tot ding hoihtak ngaihsun inla na sepna, na nek na dawn-na te ah Pasian' minthanna a hi ding leh mite' et-teh taak ahi ding in David' khekhap te zui tinten in themcik zong ih pialloh ding thupi mahmah hi.