“Leitung i a kitangsap pen mihing”

Pastor Kap Lian Thang, President, UMM of SDAs

Khat vei ka khualzinna u’ah, ka motorcycle a pei sia in ka tunna dinguh khua tungzo lo-in khua khat ah tam ungh. Ka zin te’un tanu tapa 6 nei uh hi. A u pen pa’ un a nau te na a sawl hangin a nau ten awlmawh het lo uh hi. Ka lungsim in a u pa uh heh in kiu kha thei in teh ka cih leh ka theihtheih ciangin a u pa u’n na a hah sawl ngam lo zaw na hi zaw hi. Amah pen u pen ahih hangin guih theih kham theih zu le za a suk theih ban-ah numei gina lo te kiangah hawh zelzel thei e maw. A tua tengtawh a nau te tungah hu le vang a neizo nawn pha lo na hi.

Hi bang a gamtat hoihlohna pen thu-um mite’ hu le vang kiamsak, a muhthadah huai lua himawk ai ve maw ka cih leh na hihet lo, thu-um lo mite’n zong zadah mahmah uh hi. Arsenal club bawhlung siam minthang Ashley Cole in za a tep sim leh ₤ 20,000.00 liau sak uh hi. England leh Chelsea captain John Tarry zong a lawmpa Wayne Britch i a zi mawhpih kha ahih manin Chelsea captain pan a khawlsak loh uh hangin England captain pan hemkhia uh hi. Manchester club leh England captain bawhlung siam minthang Wayne Rooney zong a zi nausuah sungin nungak dang khat tawh gamtat a khialh leh a zi tawh a kikhen loh uh hangin a bawhlung siamna leh hatna kiam in Everton ah zuak uh hi. Tutung World-cup ah zong helzo nawn lo in a minthanna man suah hi.

Gamtat hoihna lo tawh vantung leh leitung thu ah lungnuam in kikalsuan thei lo hi. Gamtat hoihna leh pianthakna pen a kikhen theilo nupa tawh kibang hi cileng khial lo ding hi. A kiza mun mahmah thu khat om in, tua thu in: “Siapa pen hoih mahmah napi sianu pen piangthak het kei” cih thu hi. Kei zong ka zaaklohna ah mi’n hi dan mahin kigen kha in um ing. A taktakin cileng siapa a hoih loh manin sia nu a piangthak lo hi zaw hi. Siapa hoih leh sianu zong a pianthak loh phamawh ding hi. Khanglui te’ thu bulphuh in a let uh “Sakhi a pi san a no san, Aisa a pi siikpai a no siikpai” cih a paisuak hi zaw hi. Hu le vang nei zo lo, mi’n zahtak lo, mi’n hong it kei, hong ngai kei uh i cih leh i kisap na khat om hi zaw hi.

Leitungah mi tampi a om hangin leitung i a ki tangsap pen mihing in: a kizuak thei lo, a ki leithei lo mi, a dik a maan in a gamta mi, tavuan a neih lam telsiamna lungsim a nei mi, omdan hoih tawh a nungta mi, khensatna man a bawl thei mi, panmun hanga a manin na a sem mi a hilo, thuman a nuntakpih manin na pha a sem mi ki taangsam hi. Thu a man in sepna ah ling sut ding lau om lo hi. Ei le ei mawhsak ding zong om lo hi. Ei le ei mawhsa in lungsim kisuanna a om loh ban-ah thumuhna leh pilna hong khangsak zaw lai hi. Hi thu te nuntak pih leng mi’n hong it pah loh hang hunkhat ciangin hong zahtak in, hong it, hong ngai ding uh hi. Hi bangin khatlawhna leh kipuah phatna hong piangin kilemna leh ki pumkhatna om ding hi.

By Pastor Kap Lian Thang

Ref: 1. Ellen G. White, Education (Mountain View, CA: Pacific Press Publishing Association,

1902), 57

2. Ellen G. White, An Appeal to the Youth (Newport, N.H., October 4, 1859)