NUPA KIKAL KIZOPNA LEH INNKUAN NUNTAKNA

NUPA KIKAL KIZOPNA LEH INNKUAN NUNTAKNA
By Pastor PL Thlenga

"Note khat leh khat kilungkim lo na om uh ciangin, na mawhna uh kimai sakin na kihuh ciat un. Topa in note na mawhna uh hong maisak mah bang in note zong kimai sak un." ( Kolose 3:13)
Nupa kikal kizopna leh innkuan nuntakna pen a bei theilo a ki sin den ding a hi hi. Nupa kop te lak ah a etteh huai pen hikei mah leng laisim mimal ten ih phat tuam na ding in, nupa kizopna leh ka sin leh ka sim khak thu pan in hong hawmsawn nuam ingh.
Nupa kizopna leh innkuan nuntakna a poimawh mah mah pawlkhat te pen..

1. Ki Sansiam tuakna ( Acceptance)

Nupa te in ih mizia a hi bang bang a ih ki san theih ding thupi mah mah hi. Pasian in mikhempeuh a mizia tuam tuam in hong bawl a, leitung mipil te in mhing mizia (temparament) pen nam (5) in na khen uh hi. I mizia pen eite deihtel hilo a, ih tel zong a hi kei hi. Ih suah tung pan in Pasian hong bawl ih mizia a hi hi. Nupa kibuaina a lian pen pen khat in ih mizia bang bang in ki sang lo in, ih zia leh tong khek / laih ding a ih ki sawlna hang a hi hi.
Ka laisinna University a Counselling nasem a hi Mrs. Dr. Song in hi bangin gen hi. Ka pasal tawh ka mizia uh ki lehbulh mah mah hi. Kei pen kampau nuam a sa mah mah, a kam tam mah mah ka hi a, ka pasal a hih leh kamtawm mah mah a kisap mah mah na lo a kam pau mawk mawk lo mi khat a hi hi. Tua ban ah kei pen Lasak lam nuam a sa mah mah, choir ah zong conductor kum tampi a sem ngei khat ka hi a, ka palal a hih leh la uk lo ban ah a sa ngei kil kel kei hi. Tuin ka kiten zawh uh kum 32 pha khin in, a beisa kum 25 sung in a mizia khel ding ka sawm mah mah hi. Tu-a sang a kam tam zaw deuh ding leh la lam ah tu-a sang in hong uuk zaw leh hong panpih zaw ding in huhna ka ngen ngen hi. A hih hang in tuni ciang dong a mizia ki bang bang lai hi. Tua a hih man in a mizia khel ding a ka ngetna leh ka ki kamselna khempeuh te a mawkna a hih lam ka phawk hi. Tua bangin a mizia khel sak ding sangin a hihna bang nang in ka sansiam a ka it ding a hoihzawk lam ka phawk pan san hi. Tua bang in ka lungsim ka khel khit a kipan ka lungnuam leh ka maitak zaw tham hi. Eite mizia pan in a hoihzaw mizia leh khangto ding ih deih tek a, a hih hangin mizia a veka kikhel ding pen a hi theilo khat a hi hi. Tua a hih man in ka kiten ma a, ka hih na bang bang uh ka kisan siam mah bang un, kiten khit ciang a mizia kikhel sak ding i sawm sng in, i hihna i mizia bang bangin kisansiam, kitelsiamna in nupa nuntakna nuamsak zaw hi.

2. Ki Zahtak tuakna(Respect):

Nupa a kibuai sak den leh buaina a neiden nupa khat om hi. A papi in Counsellor kiang va pai in huhna ngen a, " Ka zi pen tel zo lo hi ing, Ka it mah mah a, a ma ding na khempeuh ka hih sak khit ciang zong lungkim zo nailo hi. Ka zi pen phun hat mah mah, atawn tungin phun den den hi. Zing thawh ciangin niangtui ka bawl sak a, moh tawh ka pia hi. Zii pai meh lei, vanlei ding ten ka sep sak khin a, an huan in puan zong ka sawp hi. Khat vei vei ciangin a lungdma na ding ci in pusuah pih in ansai ah an ka nek pih hi. Tua bangin hih mah leng ka tung ah lungdam ding cih thadah hong phun san den lai hi. Tua a hih manin ka zi omzia pen hoih lo hi. Ka innveng paamte zong dong in, kong gen pen a maan mah hi. Hehpihna tawh ka lawmnu hong thuhilh sak in. Counselli ng hong piak sak in ci in va ngen hi. Counsellor in zong ' aw hi maw' ci in, a lungsim sung ah, 'a pasal gen mah bangin a zi pen thuman lo khat hi kha mahding hi' ci in a ngaih sun hi. A hih hanin a zi kamgen ka ngaih masak loh in hihpa kamgen up pah ding a hih loh lam ka thei hi.
Tua bangin a zi pen counselling piak kipan a, a pasal gen teng khempeuh genkik in hih thute a maan takpi hiam ci in dong hi. A zi in, " Maan mah hi, a hih hangin zingsang in moh hong piak ciangin ka moh duh namte hong pia ngei lo pi, an huan in meh a bawl ciang zong lim ka sak nam meh bawl ngei lo hi. Zii a pai ciang zong ka duh namte lei ngei lo in, ama duh namte bek lei den hi. Khuazung a ansai ah an hongnek pih ciang zong kei duhte hong order sak ngei lo in, a ma' duh ante bek order den hi. A ma a ding bek ngaihsun a, kei ading bangmah hong ngaihsut sak hong sep sak ngei lo hi" na ci hi. A pasal in a zii a ding bek mah sem leh bawl in kingaihsun mah leh a ma ading bek a na sem hi zaw mawk hi. Ama limsak bek ngaihsun in meh na bawl a, a ma deihnam te bek na sem mawk hi. A zi duh dan leh deih dan te na dong ngei lo a, a zi ngaihsutna leh muhna te thusim lo in zong dong ngei beek lo hi. A lim sak nam te leh hoih a sak namte theih pih in zahtak leh tusim sak ding a hih thu na ngaihsunkha ngei lo hi. Tua a hih manin, nupa te in i duh namte leh hoih i sak dan te ki theihpih in ki zahtak thusim sak ding thuipi mah mah hi.

3. Mawh ki maisak tuakna (Forgiveness)

Tangval kum 18 a pha khat pen gilo mah mah in, a sang kahna kehmpeuh ah mite tawh kisia den a hih man in a sanginn pan in na hawlkhia den uh hi. A nu leh a pa te in bangci pattah ding cih thei nawnlo lungkia in, ka University uh AIIAS sanpi ah hong kah sak uh hi. AIIAS pen pawlpi sang khat a hih manin, ka tapa in lawm hoih leh muanhuai nei in hong ki puah pha ding hi cih lamen in a innkuan un tua tangvalpa ka sang uah hong kha uh hi. A hih haing in hoih tuan lo in, sang dang a aom lai sangin gilo zaw hiam cih phial inhong sehuai zaw hi. Apa in a tapa pen tam veipi thuhilh khin hi. Apa in, " Pastor khat ka hi a, hoih takin na om ding kisam hi, na nuntakzia a hoih loh ciangin kei nong mindai sak hi. Tua a hih main napa pen Pastor khat ka hih manin hoih takin na nungta ding hi. Na khat peuh peuh hih sawm leh , ' hih bangte Pastor tapa hih dingin kilawm lo hi, ci uh hi. A gitloh sim in sat uh a, tai dne uh hi. Tua Pastor pen a pua lam ah Pastor hoih mah mah khat bang in kilangt mah leh, a innsung ah a hih leh migilo kuamah a dawmlo khat bang in ki lang hi. Tua a hih manin a tapa in apa pen muh zong mu nuamlo a, apa inn ah a om ciangin nuih mai ngeilo in innsung nuamsakna bangmah om lo hi. A nu pen lungkham mangbang mah mah a, a pata kikal kilem lohna hangin a lungsim gim lua in nat pih pah pah hi.
Nikhat ciang in a innkuan un family counsellor( Innkuan vai thudop pi) kiangah va pai uh a, a tapa omzia leh a pa'n a thuhilh dan khempeuh hilh khin hi. Counsellor in a tapa leh apa pen sam in counselling na pia hi. A tapa pen thugen masa sak a, " Bawi aw, bang hangin hi bangin gilo in na pa thu manglo na hiam? Napa tung a na lung kilohna khempeuh hong gen in " ci in thu dong hi. A tapa in, " Kapa in ka neu lai a kipan in na khat zong hong hih sak ngei nai lo hi. Ka nopsak leh ka lungkimna lam hih ding zong cikmah hun in hong phal ngei lo hi. Ka lawmte tawh nuamtak a ka kikholh lai te, a mau tawh ka vakkhiat ding zong hong phal ngei lo hi. Na khempeuh pen keima nopsak na ding hilo in, ama nopsak leh min phat na ding bek bek in hong pattah hi. Na khat peuh peuh sepkhialh nei leng, na pa pen Pastor ka hi a, hong min sia sak hi teh, Pastor ka hih main nang hoih tak in na nungta ding hi. Hoih taka na om loh ciangin hong minsia sak in milak ah hong maizum sak hiteh. Na nengno khat sem khial leng hong tai in hong hansan gawp hi. Ka lawmte gamtat bang hih sawm leng zong kapa in, hihte Pastor tapa hih ding hilo hi ci in hong khak tan den den hi.
Pastor tapa hih ninhuai ka sa lua ta hi. Pastor tapa himah leng mihing mah hi ing a, Pastor tapa bangin hong pattah lo in , mihing bang in hong pattah leh ka lungnuam zaw ding hi. Tua a hih manin kapa pen ka mudah hi. A gei a om zong ka ut kei hi. Tu in a hih leh kum 18 phakhin ka hih manin thu khensatna ka nei a, inn pan paikhia in kapa tawh a kigamla thei pen pen ah ka om ding hi, ka pa te muh batloh na mun ah ka om ding hi" ci in hong gen hi. Tua banga a gen lai in, a pa a khitui luang in na ki nul nul hi. Amah leh a mah hong kitel cian ta hi.
Tua khit ciangin Counsellor in apa thugen na ding hun hong pia a, apa in thu zong gen theilo in hong kap khia ta hi. " Bawi aw, hong mai sak in maw, napa pen pa ding in ka kicing kei hi, na lungnop leh nopsak na ding in kong pattah kei a, kei ma nopsak nang leh min phat nang bek in kong pattah kha hi. Nang a ding hilo in kei a ding bek en in thu ka hong hilh kha den ka hih ki phawk ing , hong mai sak in Bawi aw" ci in hong kap hi. Tua bang in kap kawm in apa in atap amawhmaina a nget pen atapa in zong thuak zo lo in a lungsim hong tuisuak ta a hih manin a pata un kikawi in mawhmaina hong ngen tuak uh hi. Tua bangin innkuan nuam hong suak ta uh hi.
Hih bangin PA tampi leh NU tampi te in , ih zite ih pasal te leh ih tate tung ah khilhna tampi kibawl thei hi. Amau te lungdamna ding leh nopsakna sangin eima lungdamna ding leh nopsakna ding, hoih na dingte ngaihsun in angsung khual thei hi hang.Tuate bek ngaihsun in ih zi, ih pasal leh ih tate thuhilh in pattah sawm i hiam?
Bang bang hi taleh mawhna kimai sak tuak na leh kitelsiam tuak na in na khempeuh bawlpha khin thei hi.. Nupa , Nu leh Pa leh tate ki-it kitelsiam ding in Topan thupha hon gpia ta hen.. Amen..
" Innsung nuam pen Vangam nai pen hi a, Tate a ding in Lungnopna pen hi"