ADVENTIST PAWLPI LEH MASUAN

 ADVENTIST PAWLPI LEH MASUAN

**********************************

(The Church, Remnant & It's Mission, SDA 28 belief chapter 12, 13)

Thupatna

SDA Pawlpi le a Masuan cih SDA Believe . . . . bu sunga khawkpi 12, le 13 bulphuhin, atomin anuai-a bangin kong hawmsawn nuam hi. Tua sungah pawlpi i cih bang hiam, a A cianlai pawlpi i cih kua te hiam? Tua te i masuan in bang hiam cih thupi thum i ngaihsut diak dingin ka tel hi. Tua thu i teltheih deuh nadingin tangthu khat tawh ipan ding hi.

Galngam tangthu: ah, a omna peuhah a tonpih Uital khat le Zawhngeu khat nei hi, ci uh hi. Galngam in Kumpinu kici khat tungah ciamnuih kam azat pen kumpinu lungkimloin, ciamnuih gal suak acih danin ong om hi. Tua hangin kumpinu in Galngam bum hi. Tuaciangin Galngam' lutang suangtumpi nih in tep  hi. A ai omleh, tua suangtumpite tamkham sakin beisak thei ding hi. Tua laitakin Galngam in a Ai kengloin inn ah nusia kha hi. Tua a ai ladingin amuanbel a Uital le Zawhngeu sawlin, hibangin vaikhak hi: “Nong paikik ciangun Ai pen zawhngeu in akamsungah ong kem hen. Ui in kemleh lampi ah mi mu leh tawngkha hamtang dinga akamsung pan kiatsuah ding hi,” cin limtakin vaikhak hi. Anih un “Lung himawh ken, vala nung e, Pu,” ci-in ai la dingin innlam ah va ciah uh hi. A  pu Ai va la in ong paikik uh ciangin, Uital in zawhthawhin ken kem ning ci-in akamsungah tua Ai kem hi. Ong pai uha kipan Galngam lu atep suangpi pen abekbekin kitam a lengkhia ziahziahta hi.

Ahizong luino khat tunga singluang kidawh azuih laitakun, khualzin mi honkhat tawh kituak uh hi.  Uital in a Ai keplam mangngilhin tawng kha mawk hi. Tua ciangin, akamsung pan ai kia in tui in taisuksuk hi—tua kawmin Ai in “Kapu Galngam, Van Suangpi in tep e,. . .” cin mau suksuk hi, ci hi. Apu Galngam pen a ai tawh kigamlata ahihmanin a suang zong kiam nawnlo hi, cin tangthu om ngei hi. Pu Galngam' uital in a ma nasep ding athupi pen mangngilh aih manin a pu'n gimthuak hi.

 Adventists te  in zong Pawlpi le Sepding Amasuan cih tawh kisai in pomdan thupi khat nei a, a nuai a bangin I en ding hi.

I.     Pawlpi

Pawlpi cih ciangin, SDA Pioneerte in SDA pen Pawlpi cinuam ngeilo zaw uh hi. Pawlpi kici leh, Doctrines/Creeds bawl kul a, tua creeds/doctrines a zuilo te sittel na le pua koihna in zui ding ahihman in Europe a biakna vai tawh bawlsiatna a omzia ngeina in ong zuikik ding hi ci uh hi.

Tua manin Pawlpi cih kammal sangin, “Movement” " ki pan khia" cih kammal zang zaw uh hi. Ahangpen, SDA pioneer-te in Christian dangte neihloh, muhloh, tulai thuman tangko khiat ding atuam vilvel khat nei uha, tua tangko khia dingin kipankhia (movement), cin amau le amau ki minvawh uh hi.

 Tulai Thuman  (Present Truth)acih nei uh a tua "Tulai Thuman" i cih in bang hiam? cih leh :

  1.Jesus hong kumkik baih ding,

  2.Misite in khua phawkna neilo,

  3. Saturday ni pen Sabbath hi,

  4. 1844 a kipan vantungah thukhenna kipan

 5. Sasiang le sanin khennate ahi hi.

Hih thumante a sang dingin lampial a cih uh Khristian (Sunday tang Protestants) te pen Babylon a cih uh upna manlote hi a, tua sungpan sapkhiat ding pen a masuan lianbel  in seh uh hi. Hih thuteng pen Vantungmi thum tangkona ci uha, Mang 18:4 zui-in Babylon pan sapkhiat nading tangkona hi, ci-in pom uh hi. Babylon pen a puksa Sunday tang Christiante cihna hi, ci-in um uh ahihmanin, tuate sung panin SDA ah a lut dingin tangko belin nei uh hi. SDA pen atuamvilvel mihon khatin kiseh uh a; Pawldangte tawh kizop le kisawhpawina pen Babylon tawh kizopna bangin lipkhap uh a hih manin SDA te'n  pawldang te pulpit luah ding phal lo uh hi. Upna tawh ki tuak lo; Doctrine tawh ki tuak lo thute pulpit tungah gen ding phal lo uh a; a gen a om leh zong encik or hemkhia ; pua koih uh hi.

 Hun ong kikheeltoh ciangin, muhbeh le theihbeh tampi ong neito zel uha, tuni ciangin Movement cih kammal sangin Church kammal ong zangzaw uh hi. Movement akicih lai un nasep masuan(Mission statement) mitsuan a kilawhna hi-a, Church ong kicih uh ciangin, damdamin, Kipawlna(institution) bulphuha kilawhna ahi hi.( Dr. George Knight, Search For Identity, 2000 Chapter 1.)

 1) Pawlpi icih bang hiam?

 Mikang  pau in “Church” cih pen German pau pan hia, “Kerche” ahi hi. German in hihkammal pen “Kuriokon” pan alak ahi hi. Lai siangtho sunga “Church” acih ciangin abulpi MIHING ahihi. Thu um mite pen OT in Qahal cia, saptuamte cihna ahi hi. Tua in vai khat peuhpeuh a ding; a kikaikhawm mihon khat peuh a genna ahi hi. Tua kammal Israel-te cihna in zong OT in zang hi. NT sungah Hebrews pau in Qahal Latin pau in  Septuagint  ci'n Greek pauin Ekklesia(Ecclesias) cin na leta, tua zong kizang hi. Thamloin, “Kuriokon” cih Pawlpi cihna kammal khat omlai hi. Tua kammal khiatna pen “Kurios” cih pen “Topa” cihna hi. Tua manin “Kuriokon” cih ciangin “Topa neihsate,” “Topa ate” “Topa tawh kipawlte” cihna ahi hi. Tua hia, NT sungah Topa pen Jesus hia, tua Jesus tawh akipawlte in, “Jesus nungzuite ahi hi—tuate in honpa le gumpa ; Topa' in Jesus asangte ahi uh hi”(John 14:1-3; Sawl 4:12; )

 2) Pawlpi omzia:

 Pawlpi pen pang(facet) nih pan ki en theia, 1.Muthei pawlpi(visible Church) le 2.Mutheihloh pawlpi (invisible church) ahi hi.

A khat na Muhthei pawlpi pen hih leitunga nasepna kipawlna (organized for service, Adventists Believe. . . .  No 12, Section 7:1) cih ahi hi. Kipawlna, Signboard, zum, minciaptehna sunga kihel mimalte ahi hi. Tua in leitungah lungdamna thu tangko' ding masuan nei-kipawlna ahi hi(Matt 28:19-20).

 A nihna  Mutheihloh pawlpi hi-a, akhangkhanga leitungbupa om, SDA te bek hilo, lungsim le thuman tawh Pasian abia khempeuh ahi hi(John 4:22-24).Hih thu tawh kisai-in A Hand book of SDA Theology sungah kisim thei hi.

 Hihciangah pawlpi kipawlkhopna pen, thu um mimalte nuntakna le kalsuanna ah, Pasian tawh kizopna(upward), kiphungvuhna(inward nurtured), le sepkhiatna(outreach) teng akikimin akhantoh khop nading ngimna ahi hi. (Seventh-day Adventist Belief. . . ., 1988. No. 12, Sv. “Organization of the Church: The major function of church organization”).

 Tua ahihmanin Pawlpi cih ciangin, kipawlna, biakna, biakinn cihte himasa loin, thu-um mite Jesus' sapkhiat mite ahi uh hi. (Theological Handbook of SDA, Bible Comentary Series, Vol 12, Sv. Doctine of the Church; Seventh-day Adventist Belief. . . ., 1988. Sv. The Church).

 Atomin gen le’ng, Pasian' pawlpi i cih in Jesus pen honpa le Topa in apom thu-uma; a ki baptised leitunga om mimalte ahi uh hi. Tuate lakah SDA te in midang' neihloh Thupuak (message) nei-in ki um uha, tua masuan upbek tawh phalo-in a puak khia ding; a tangko khia dingin Pasian in ong sawl hi, cih um uh hi.(SDA Believe . . . . No. 12:2 Organization of the Church 1. a. Membership Qualifications.)

II.  A Cian lai pawlpi(Remnant Church)

LST a at nunung pen Mangmu pa John in hun nunung ciang; a hong piang ding thu te ki teltak in hong lak hi. Bek tham lo in Paul le Peter te in zong tam vei pi ong hilh in ong phawng den uh hi. Mite in koi lai ah Zeisu hong pai kik ding cih na omhiam ci ding uh a; a mau ut2 ci le sa' deih na nung zui ding uh hi ci hi. Satan in tua Pawlpi lok gawp in " Galsim dingin kuan khia hi" (Rev. 12:17).

Mangmu pa John in tua A Cian Lai Pawlpi (Remanat Church)te a bang ci mite hi ding hiam cih pen a nuai a bang in gen hi.

1. Pasian thukham a zui mite (Rev 12:17)

2. Zeisu teci pan na a nei te

3. Khasiangtho hilh na /silpiak a nei a um te hi ding hi ci hi. ( Rev. 19:10)

Tua leh en hih a tung a thu nih or thum  te i nei hiam? Tua bang a nei te (Remnant Church) A Cian Lai Pawlpi a hi hi. A zen2 in hi tak a om mite in i neih kei leh A cian lai pawlpi hilo ding hi hang!

Sawltak Paul in tua mite in Zeisu hong pai kik ding a ngak tinten te hi ding a KST' piak thupha ngah te a hi uh hi( I Corin. 1:7-8)(Counsel for the Church.; P 10.1)

1) Pawlpi' Masuan

 Masuan cih ciangin sepdinga ibulphuh alian pen cihna ahi hi. Pawlpi kim le kipawlna kim in masuan khatciat bulphuh uh hi. Tua lakah SDAte' masuan pen “SDA Mission Statement” sungah kimtakin kigelh hi. Tua in ithumantelna tungtawna kikoih ngimna ahi hi. Tua Statement pen;

 Jesus in anungzuite tungah “Note pai kawikawi unla, mikhempeuh nungzui suak sakun. Pa min, Tapa min, Kha Siangtho min tawh na baptize un. Kei mah in note kong piak thukham khempeuh azuih nadingun na hilh un.”(Matt 28:18-19). Hih pen Mission Statement' i thubulpi khatna ahi hi. Pawl dangte in zong thubulphuh in nei uh hi. Hih bulphuhin Christian pawlpi khempeuh in lungdamna thu tangko ciat uh hi. Hih dawl ciang asem Christian khempeuh SDA in pompih ahihna GC Bylaws and Working Policy sungah, “Relationship to Other Christians” cih thulu kiguan hi.( SSD/GC Working Policy bu sungah akicianzaw in ki sim thei hi.)

 Tua behlapin SDA-te in Mang 14:6-12 bulphuh-in, vantungmi thum thupuak pen “pau khempeuh, nam khempeuh, pawl khempeuh” tungah puak dingin ngimna nei hi. Tua in SDA kiphuhna abulpi ahihi. Tua thu EG White in anuai abangin na gelh hi: “The church is organized for . . . missionary purpose” ci hi. Hih message agelh laitakin pawlpi pioneers-te in ki organized ding pen tha ngahlo uh hi. Ahangin pawlpi ki organized le Upna Thuguilet Creeds dan bawl kul dinga, tua ong sanpihlote' puakoihna kisam zel ding aih manin, Europe gama biakna bawlsiatna nam mah ah kitungkik mawk ding hi, ci-in khalau uh hi. Tua laitakin EGWhite in “Pasian nasep nading ngimna tawh kipawlkhop/kilomkhop(organize) ding pen lunghiang kei un .  .” cin han thawn hi. Tua ciangin 1863 in ong ki organized uh hi.

 Tua ahihmanin, SDA te pen Christian lakah khat ahi hi. Adangte' neihloh Vantungmi Thum Thupuak acih uh tangkonate leitungbup akizelh nading ngimna tawh leitung bup tuam in kipawlna nei uh hi. Tua ki pawlna in bang ci bangin ki zop na nei hiam cih leh: A masa pen in Mimal; Group/Company; Pawlpi; District/Circle;  local Mission/conference ; Union Mission/ Conference; Division; GC cih bang in ki zom to diudeu hi.  Tua masuan a mainawt nadingin pilna ; sanglam, zato lam, TV le Radio; Internet; Media Laihawm tuam2 cih te le ADRA kici Dongtuak Huhna le Domkangna lam cihbangin atuamtuam ki zom diu deu in  nasem khawm uh hi. Tua in SDA Pawlpi te ngeina; pom zia hi a; pawlpi khat tuam din’ tuam om mawk2 Pawldang te bang in a mau le a mau sum zek zang, ei leh ei ki uk(self goverment)cih bang om thei ngiat lo in mompi bu (web) bangin a ki zom diudeu hi cih pen i phawk tawntung ding thupi mah2 hi.

  Thukhupna:

1.     SDA te in pawlpi cih sangin “movement” cih deih masa zaw hi. Ahang in Pawlpi kip khat hih sangin Tuhun ading thuman tangko khiat ding thupizaw hi ci-in ngaihsun uh ahihman ahi hi.

2.     Pawlpi cih pen Kipawlna(organization) hilo-a, thu um mimalte  hizaw hi. Tua manin, thu um mimalte kikholhna pen PAWLPI  kipawlna ong suak hibek hi.

3.     Thu um mimalte kikholh na sunga a kihelte in nasep nadingin athatang le a neihsa uh gawmkhawm in nasem ding uh hi. Tua sunga a omlo, akhangkhanga thuman azui Pasian abia khempeuh zong, thu umte hia pawlpite ahi hi.

4.     Muhtheih pawlpi in a masuan ding na dangte sangin, thumasain, a ngimna pen SDA Mission Statement cin koih uh hi. Tua a mangngilh leh a kamsung a' Galngam ai kep lam a mang ngilh  Galngam' uital tawh kibang ding hi. Tanglai Israelte in zong amasuan dinguh mangngilhin thudangte a pikoih zawk manun, inn tanlawh liang saltan lawh liang in om uh hi. Agahlo kung khempeuh kiphukin, agahsak mite tungah kipia hi.

Ei SDA amimal le kipawlna in zong imasuan ahi SDA ihihna abulpi pen ahi, vantungmi thum tangkona i kin kei leh, agahlo singkung bang ihi hi. GC president lui, Elder Folkenberg in ihnasepna pen “motor buanlak awk bangin, apei akinawh pei mah2 hang letmat khat zong akinlo” bangin nasep i manlah hangin lungdamna thupuak adingin masuan letmat khat zong kinlo thei hi cin gen hi.

     Tua manin ei SDA te in zong i thuman neih kisaktheih le angtan pih ding hilo-a mite i hawp sawn ding masuan thupi pen in i nei hi. Tua adinga Pasian in pawlpi ong piak mimal talente le sum le pai, pilna, ciimnate khempeuh tua ading bekin i zat ding ahi hi.

References:

1.     Seventh-day Adventists Believe . . .  . An exposition of the Fundamental beliefs of the Seventh-day Adventist Church. Chapter 12, 13.

2.     A Theological Handbook of SDA.  Commentary Series vol. 12. Review and Herald Publishing,  2000.  SV.  “Doctrine of the Church.”

3.     Dr. George Knights, Search for Identity, 2000?.

4.     GC of SDA Bylaws and Working Policy.

5.     Counsel for the Church P 10.1

 By Sia Thang Neu