 |
| Sia Khup Khen Thang |
Leitungah pawlpi
tam mah mah in koi pawlpi ah lut ding le suak ding cih pen mi khempeuh phial ii
ngaihsut khat a hihi. Tua ahih leh I ngaihsut beh ding khat hong om a, Tapidaw
I cih kua te hiam? Tapidaw i cih in Zeisu Khazih nungzui cihna a hihi. Tua hi
leh “Zeisu in bang pawlpi ahi diam” cih a hihi. Tuhun in Zeisu hongpai hi leh bang
pawlpi azuan diam? cih ngaihsut huai mahmah thu a hihi. Leitungah amau leh amau
Tapidaw a kici pawlpi bekbek 47,000 val bang om hi. Tua a hih mawk leh akhial
khat om cih i phawk hong kul hi. Zeisu Khazih khat bek hi napi, Ama’ min suang
bekbek pawlpi 47,000 val cihmawk pen hong ngaihsut huai mahmah ta hi. Tua ahih leh
tua pawlpi khempeuh a maan uh diam? Maan thei khial thei hi.
Tu in hih tawh
kisai thupi leh theih huai a hih manin mipi in I tel zawk theih nang in ikikup
dingin hong telkhia ka ahihi. Gentehna in ken gutui thawl khat nei in tua pen,
“gutui hi, na dawn leh si ding” hong ci leng, kua ma’n dawn hetlo ding hi. Ahizongin,
tua gutui tawmcik la in singgahtui tawh hel in hong pia leng, dawn in si ding
hi uh teh. Lai Siangtho
sungah Dawimangpa pen mikhempa ci in gen hi. Khemna i cih pen ahoih leh asia
tawmtawm kigawm ahi hi. Zeisu in thumaan leh Lai Siangtho a zat teh Dawimangpa
in zong, asia leh apha hel in zangh hi. Tua bangin ahelzau ciangin mite akhemzo
pan ahihi. Ahizongin “To nih na, kuamah in sem theilo hi. Pasian na
leh Dawimangpa na kisem khawm theilo hi. Khat it in khat na mudah kul hi” ci-in
Zeisu’n gen hi. Zeisu in “Kei hong pawlpih lote kei hong langpangte hi” ci hi.
Tu-in kong genbeh nop lai ah a
kipatcil in Zeisu in pawlpi neilo hi. Matthai 16:18 ah Zeisu in Peter kiangah,
“Nang Peter (petros),” na hi aa (Greek lai in petros hi a, masculine
singular, suangneu cih na ahihi), hih Suangpi tungah ka pawlpi ka phut ding
hi ci hi.” Pawlkhat te in Peter tungah pawlpi phut ding hi ci-in ngaihsun uh
hi. Hilo deuh hi. Peter pen suangneu hi a, Suangpi pen Zeisu bek a hihi. Tua ahih
manin Peter in “Nang, Zeisu Khazih, anung ta Pasian tapa na hihi,” ci in pulak
hi. “Suang tungah ka pawlpi ka phut ding” Khazih
in ci hi. Ka Pawlpi a cih ciangin (singular possessive pronoun) hi a, Amah a kigen
ahihi. Tua ahih manin a pawlpi a cih ciangin inn leh lo kilam te gen hilo a,
khuamial sung pan khuavak ah kisam khia mimalte a gen a hihi. Mawhna pan
hotkhiatna ah a kisamkhiate a hihi. Thuma’nlohna pan in thumangte Zeisu pawl a
hihi. Efesa 4:5 ah
“Pasian khat” “Upna khat” “Tuiphumna khat” ci hi. Johan 10:16 ah “Tuu huang
sungah omlo, tuu dang ka nei lai hi. Tua te zong tuu huang sungah khum in amaute
in ka thu hong ngai in tuu a omsate tawh honkhat suakkhawm ding uh hi” ci hi.
Tuucing khat bek om ahihna kimu thei hi. Filipi 2:2 ah “Kei
tawh ngaihsutna kibangin note khat le khat ki-it in khat le khat lungsim kituak
in na omna uh tawh keima lungdamna na hong cingtaaksak na ding un” ci hi. Tua ahih
manin Zeisu um Tapidawte in hidan i hih a kul ahihi. Sawltak 2:1 ah
pawlpi masate “Pentecost hong tun ciangin munkhat ah kigawm in lungsim kikhat”
ci hi. Kong gennop lai khat in, kawl gam bekbek ah akibanglo pawl tuamtuam 5000
val bang om hi. Tuate in khat le khat kibang lo in, Lai Siangtho bulphuh ci
napi in Lai Siangtho tungah kinga taktak lo ahih man tampi in khen a hihi. Lai
Siangtho ah kinga uh hi leh avek in zuihna leh upna ah kibang ding uhhi. Tua
kikhenna ahang in Pasian Kammal Lai Siangtho a vek in sang taktak lo in san nei
in, sanloh i neih man a hihi. Lai Siangtho in eite hong kipawlsak in hong khenlo
ding hi.
Tu in i genbehnop
in ah, thu i zak khat peuhpeuh pen maan hiam maanlo hiam cih Lai Siangtho tawh
sittel pahpah ni. Sia khat ii gen manin um kei unla, Pasian in a kammal Lai
Sianghto sungah a gen manin um zaw un. Hi mahlo a hia leh? Tuhun thugen
minthangte dan in Lai Siangtho munkhat lian man in ut bang a gen i hi kei hi.
Isaiah 28:10 ah a gen bangin “Malkhat khit malkhat, gualkhat khit gualkhat,
thukhat khit thukhat” sim in sit tel in tua khit teh um pan ding hi hang. Tua a
hih manin Pasian kammal Lai Siangtho tawh a kituak lo a gen a om leh tua bang
mite i khemna pan in kikem pah ding hi hang. Rom 16:17 ah “Note
hong kikhensak thute pel un” ci hi. Korin Masa 1:10 ah Paul in “Note lakah
kikhenna a omloh nadingin ka hong gennuam hi.” Kong it lawmte aw…Zeisu Khazih
in upna khat bek tawh pawlpi khat bek, Lai Siangtho bulphuh nei a, ngeina
tungah kinga loin Pasian thukham tungah kinga hi. Mite thukham tungah kinga lo
hi. Na thukim uh hia? Zeisu Khazih hi dan pawlpi bek ah hong kikhawm ding hi.
Koi maan pen hiam
cih nakan nuam ding hi. Pawlpi tampi om a hih manin a vek a pai in sit ding bel
baihlo ding hi. Tua pawlpi tampi i haihkhiat theih nadingin Matthai 7:20 ah “A
maute agah tawh na thei ding uh hi” ci hi. A min uh tawh hilo, a pawlpi golna
tawh zong hilo, thugenpa siam man tawh hilo, music tum te siam man tawh hilo,
pawlpi a hauh man tawh hilo, na mipih na nampih te a hihman zong hilo in a mau
te i gah tawh et ding a hihi. Lai Siangtho in agah tawh koi ci bang in thukhen
ding cih hong gen hi. Ken ka pa mipi
lakah a om lam hong gen in, na kimu un hong ci hileng, a puan silh, a necktie
mel pen a eng, a sam zong a vom hi, cih dan in hong gen hileng zon nop tuam mah
mah din ghi. Tua loin nang tua pa maw ci-in mi i muh peuh kiban dot theilo hi.
Tua mah bangin Pasian in a pawlpi pen koidan pawlpi hi ding hiam cih hong hilh
manin Topa tungah lungdam hang. Tua manin pawlpi aza atul aa sim ah pai
kawikawi in koi man pen hiam cih va zon ding hilo a, Pasian pawlpi in koi dan
pawlpi te hiam cih Lai Siangtho hong hilhna i et ding ahihi. Mangmuhna 12:17 ah,
mite i sittel dan ding hong gen hi. “Gulpi” kua hiam? Mangmuhna 12:9 ah “gulpi
pen” “Dawimang pa, Satan” ci hi. Tua leh “Tua gulpi heh hi” ci hi, kua tung ah?
Numei tungah heh hi ci. Genkholhna ah Numei in pen pawlpi limla hi. Pawlpi pen
monu hi a, Zeisu pen mopa a hihi. Numei hoih in pen pawlpimaan limla a, numei
hoihlo, numei kizuak in pawlpi limla mah hi aa, ahizongin apai khial pawlpi, a
maanlo pawlpi limla leh tua bnag pawlpi a genna ahihi.
Tu in Lai Siangtho
ah, “Gulpi, numei tung heh mah mah hi” cihnopna ah Dawimangpa pawlpi maan
tungah hehpih mahmah hi cih ahihi. Tua acianlai pawlpi do dingin kuankhia hi ci
hi. Acianlai cihciangin puan kizuak tawh genteh leng, a dangteng beita in khat
om lai cihna hi a, tua a omlai pen a beisa a te mah tawh kibang cihna a hihi.
Tua ahih manin Acianlai pawlpi cih pen Zeisu hong hilhna tawh kibang a kiphut
pawlpi cihna a hihi. Tua banah Gulpi a
hi, Dawimangpa in acianlai pawlpi do dingin kuankhia hi ci hi. Tua leh, “tua
acianlai pawlpi te a koi ci pawlpi hiam” cih ki kan leh I theih hong kul hi. Tua
acianlai pawlpi in Pasian thukham zui-in
Zeisu teci panna a neite ahihi.” Mangmuhna 19:10 ah Zeisu teci panna cih in Kamsanna
kha (khasiangtho humop lai) hi cih hong hilh hi. Tua kha hilhkholhna acih in
kamsangte lai-atte a cihna ahihi. Acianlai pawlpi in Pasian thukham bek hiloin
Kamsangte lai-at leh thuhilhte a umte hi ding hi ci hi.
Tua ahih leh
Acianlai Pasian pawlpi koi ci zon ding i hi hiam? Amasa in Sabbath nipi ta’ang
in, kaalkhat sunga ni masa nipi in zatna thukim pih lo ding hi. Lai Siangtho pen
i deihlohte paikhia, i deihteng la ziau loding hi. Acianlai Pasian pawlpi in Thuciam
Lui le Thak paihkhiat neilo uhhi. Lai Siangtho khempeuh Kha Sianghto humop hi
cih a umte ahihi. Tua ahih manin Acianlai Pasian pawlpi I zonna ah James 2:10
ii a gen bangin Pasian thukham zuihnei in paihnei cih bang hilo ding hi. “Khat i
palsat le avek a palsat mah a hihi” ci hi. Tua ahih manin ngeinate nusia in
Pasian thukhamte zui a, tu a dan upna le
zuihna a nei Lai Siangtho tawh kituak pawlpi na muh leh tua pen nial kha het
kenla hih in Acianlai Pasian pawlpi hi ci-in sangpah in. Tu in ah Isaiah
8:20 in bangci hiam cih leh “Thukham ahi a, teci panna a hizongin Pasian kammal
Lai Siangtho tawh a kituah kei leh amau sungah khuavak omlo hi” ci hi. Tua ahih
manin hih mun tawh limtak i etcian kul hi. Lai Siangtho avek in sim in. Mi hong
nialna mawk, hong zawhthawhna mawk tawh a nung zui kha ken. Lai Siangtho sim in
etkak in. Bekthamloin, Lai Siangtho in Pasian pawlpi bang ci gen hiam cih leh
Thukham Sawm akem leh azui-te hiding hi ci. Giat hilo , sagih hilo, a vek a
sawm ci hi.
Pasian in apawlpi aciaptehna adang omlai hi. Leitungah a lianpen a hau pen Tapidaw gam om kha mah ding hi. Tua bang pawlpi lian, pawlpi hau te in Pasian pawlpi, acianlai pawlpi hi cih lahna ding omlo hi. Tua dan pawlpi lian, pawlpi hau-te ah a utte pen bang tawh kibang hiam cih leh biakinn ngai, music ngai, thugenpa ngai hi lel a, Pasian ngai in thumaan deih a, thumang nuam te hilo hi. Pawlkhatte in thugenpa ngai uh ahih manin a kikhopna hang uh pen siapa hang bek hilel hi. Ka lawmpa khat kiangah banghang in biakinn ah kikhawm na hiam ka cih leh, “thei khang e, ka zi kikhawm ahihmanin a kikhawm hi mai ning” ci in hong dawng hi. Peter Masa 3:15 ah bang gen hiam cih leh, “Note’ lametna thu hong dong mi khempeuh kiangah lungnemna tawh, thusimna lungsim tawh na genkik theih na dingun akigingsa in om tawntung un” ci in hong gen hi. Tua ahih manin banghang zudawn lo, zatep lo, banghang ni sagih Sabbath nipi in zangh in tawlnga, a hih kei leh bang hang Sunday ni tawlnga in nipi in zangh cih hong ki dong leh Lai Siangtho tawh I lak thei diam? Ki ngiah sun ni. Lai Siangtho lem in ka zu kadawn lohna, ka za katep loh, Ni sagih Nipi ka zuihna ahang kiciantak in kong hilh thei ding hi. Tua bangin Lai Siangtho gamtat luhekna a neite khempeuh in na upna uh kisit pha un. Banghang aa Sunday nipi in zangh ka hiam? Sabbath nipi in zangh ka hiam, I zatna a hang te Lai Siangtho ah a om mah ahi hiam cih te kanpha, sit pha ding hihang.
Pasian kammal
limtak in kan lecin, lamdang sa ding hi teh. Tapidaw pawlpi sungah bangci bang
in paikhialhna hong lut hiam cih en lehang, kumzalom 4 hunlai in Rome kumpi
Constantine pen piangthak hong ki neihna pan in Tapidaw te ong thangvangvang
hi. Abuai huai penpen ah tua dawibiakna, ni pasian biakna pan zia-le-tong
ngeina khempeuh Tapidaw biakna ah hong tonpihna uh a hihi. A.D 321 kum in Kumpi
Constantine in Sabbath nipi pan in Sunday nipi thukham hong bawl hi. A hangin
ni pasian a bia, amite a khualna a hihi. Tua khit a sawtlo A.D 336 ciangin
Council of Laodicea ah Pasian nisiangtho, ni sagih Sabbath ni pan in Ni masa ni
Sunday nipi zat dingin hong khensat uh hi. Lai Siangtho hong lem uh a, Khangtangthu
Masa 17:27 ah “Topa aw nangmahin thupha na piaksate a tawntungin thupha ngah
ahihi” cih deih kaih mawk mawk in paulap dingin nei uh hi. Pasian in “Akikhel
lo Topa ka hihi” ci ta leh pawlpi in “ikhel ding hi” ci uh hi. Tua dawibiakna i
hong zawhna hangin tuni in hi bang ni pasian biakna pan hong pai nipi kizangh
ziahziah ahihi. Pawlpi pen hong
paikhial semsem a, ahizongin mi pawlkhat ahih leh Pasian thumaan ah kip takin
ding uhhi. Pasian in acianlai nei den hi. Tuate dawimangpa in zunglot sawm in
pawlpi sung mah pan zangh ta leh Pasian in ka mite ka kem ding ci hi. Hunbei
kuan ciangin mihingte thukham zuilo a, Pasian thukham zui in Zeisu teci panna a
nei, Acianlai Pasian mite om lai veve ding hi. I gensa mah
bangin, Acianlai pawlpite in Pasian thukham zui in Zeisu teci panna a lente hi
ding hi. Zeisu teci panna i cih ciangin Kamsanna kha (Kha hilhkholhna) alen te
hi ding a, mihing thukham a zui te hilo ding hi. Bekthamlo in, tua acianlai
Pasian mite pen mitam le gol in, a minthang pen te hi tuanlo ding hi.
Lai Siangtho
thumaan igen hangin, pawlpi a lian pen hipah ding, mi tampi in hong zui ding,
minthang pen pah ding, hilo cih i telsiam ding kisam hi. Matthai 7:14 ah
“Nuntakna mun tunna dingin kong kawiciik in, lamneu a, mi tawmcik a lut hi” ci
hi. Bang hang in maw? Kong kawciik, lamneu hiven, tua manin mi a tawm hi. Tawm
cih ciang a, leitung milip tawh teh leng mitawm mah mah cihna hi. Acianlai cih
pen tamlo ding cihna zong hipah hi. Pasian in mitampi a hon nuamlo hilo hi.
Pasian in mitampi hon nuam ta leh mitampi te hotkhiat ding a ut lohman uh hi
zaw hi. Khuavak nate sangin khuamial sunga nate it zaw uh a, tua leitungna, a
it te uh, nusia nuamlo uh ahih man ahihi. Thu maan sangin
thuzuau ki deih zaw hi. Tua ahihmanin thumaan na gen hangin mi a tul lompi in,
hong ngai loin pawl sungah zong hong lutlo ding hi. Thuzuau tawmtawm hel in
mitawh kiholem lecin bel, milompi na ngah ding a, a hizongin thumaan tangtak in
na gen leh mi tawmcik bek in hong ngai ding hi. Tua atawmcik acianlai Pasian
mite in lamtawn tungah kei tawh ton ding uh hi. Mipi in Pasian
nasep ding teel ngeilo hi. Thuhilkikna 7:7 ah “Topa in note hong teelna pen
midang te lakah na tam man uh hilo hi. Mi lak ah a tawm pen te na hi uh hi” ci
in gen hi. Noah hun lai en le hang, mipi in Topa nasep ding teel lo uh hi. Mi-giat
bek in teel in hotkhiatna ngah hi. Sodom le Gomorrah a ki-hal in zong, mi-li
bek a taikhia lak nangawn ah khat nunghei in cikhuam suak lai hi. Thu gensiam
pen Zeisu in kum thum le lang sung a thu genna ah mi 120 bek ngah hi. Mipi in
thumaan thudik deihlo uh hi. Mipi in Pasian thu manglo in, a langdo te Zeisu
hong kumkik te vantungah lato in na um uh hiam? Pasian in vantung ah lungnopna
sinnopna hong pia nuam hi a, migilo guta buluh te tawh hong koih khawm nuam
hilo hi.
Khuasungah awngin
zuu va dawn dih ning ei, ci lecin hong kham om in ka um kei hi. A hizongin Lai
Siangtho thumaan va ngai dih ning ci le cin na innkuan pih, na beh na phung na khuapih
na tuipih te in hong kham hong kho ding uh hi. Paunak 14:9 ah “Mihai te in a
khialh uh hangin phamawhsa lo uh a, mipil te in akhialh ciangun mawh maisak
ding deih uh hi.” Tua thumaan vangai kei in, vapai dah in cihna tampi na za
ding hi. A hizongin Pasian in ka tuu honpite aw lau kei un cilo a, “Ka tuuno te
aw, lau kei un” ci in Zeisu in Luka 12:32 ah hong gen hi. Tuni in, thusia le
thumaan helhzuau in kiholem a, mitampi tuikiphum ding ka lung gulh kei hi.
Numei pasal te in Pasian kammal azakna hang un Khasianghto tawsawnna tawh Topa
a itna uh lak a, Pasian deihna bangin hong kikhel ding bek uh ka lunggulh hi. Acianlai Pasian
mite ii kiciaptehna pen Mathai 24:14 ah “Mi namkimte tungah teci a pan na
dingin leitung khempeuh ah lungdamna thu kihilh ding hi. Tua khit ciangin beina
hong tung ding hi” ci hi. Acianlai Pasian mite in cidamna thu zong hilh ding uh
hi. Pasian pawlpi maan taktak, na pumpi, I ut bnagin ki bawl thei lo hi. Na ut
banggin bawl thei teh ci in hong hilh aom zen zen leh kihilh te ngaihsun pha
in. Tua bang pawlpi pen Acianlai pawlpi hilo ding hi. Pasian in kiptak in a
ding ding pawlpi nei hi. Korin Masa 6:19, “Na pumpi Pasian Khasiangtho te’n na
biakinn a hih lam thei lo na hi hiam? Pasian aa, hi a, ei neih pumpi hilo hi”
ci-in Paul in gen hi. Tua manin i pumpi tawh Pasian minthansak ding, vangliatna
piak ding a hihi.
Tapidawte in i nek huai lo pawlkhat om hi. Uite duhlo pawl khat mihing a ne om a, tua pen Pasian khialhna hilo a, ei khialhna a hihi. Gulsa, toktol, innhiksa,cih te nangawn ki ne hi. Acianlai Pasian pawlpi in Korin Masa 10:31, “Na ne a, na dawn a, bangbang nahih zongin Pasian minthan na hisak in” cih kammal um te a hi hi. Tua hi leh zudawnna tawh Pasian minthang sak kua om? Lawmte aw ei leh ei kisiat bawl sawm kei ni. Khrih hangin ei te a gualzo te i hihi. Acianlai Pasian pawlpi in Khrih hong kumkikna thu gen ding uh hi. Paul in Titu 2:13 ah, “Lametna thupha” ci in gen hi. Zeisu hong kumkik ding poimawh tak in hilh leh a gen lo pawlpi in a bang ci pawlpi hiam cih leh tawlngakna, mite lungkim sakna, pawlpi, pawibawl tawh a kibang pawlpi hi a, acianlai Pasian pawlpi hilo hi. Sanggam u leh nau te, Pasian in pawlpi nei hi. Tua pen Lai Siangtho in acianlai pawlpi ci hi. Tua pawlpi in Pasian thukham leh Zeisus teci panna a hi, kamsanna nei in Kha Siangtho humopna tawh ki-at kamsang te laite um ding hi ci hi. Mipuan silh bang silh lo, mi dawn bangin dawnlo in tuam pha diak uh hi. Mi tamtam cih bang hilo, Pasian it in, Pasian deihna bangin kalsuan a, Pasian thu mang in Pasian deihna bangin a dingtang te hi ding hi. Tua bang hihna in kicing hi hang cihna hilo hi. Thumaan lam a manawhte i hihi. Ka tuu huang sung a om nailo tuu zong ka nei a, tua te kong paipih ding hi ci hi.
Tua ahih manin
Mangmuhna 18:2 ah “Kahna aw tawh kiko in aw lian mahmah khat in Babylon kicim”
ci hi. Mangmuhna 18:2 “Tua Babylon pan hong paikhia un, Babylon pan hong pai
khia un” ci hi. Tua leh tua Babylon in bang hiam? Tua Babylon in Pasian kammal bang a nungta lo
pawlpi maanlo te hi a, tua bang pawlpi pan hong paikhia un ci in sapna aw ahihi.
Pasian in ka tuu huang sungah a om nailo tuu ka nei lai a, mawhna khempeuh tawh
a ki pelhna ding un tua te kasam ding hi, ci hi. Tua leh mawhna i cih in bang
hiam? Mawhna i cih in Pasian thukham palsatna ahihi. Tua Pasian thukam zui
nuamlo, a thusim lo, awlmawh lo in palsatna hi. Rom 6:23. Tua bang mite, pawlpite
lak pan hong pai khia un. No mahmah tua te tawh kikhenkhia un. Na paikhiat leh
tua te thuak ding gimna tawh na kipelh ding hi. Korin Nihna 6:14,
17 ah bang ci hiam cih leh “hakkol ki banglo puakhawm lo ding, upna ki banglo
omkhawm lo ding hi” ci hi. Thumaan lo te leh thumaan te a omkhawm thei diam?
Tua bang mite lakpan hong paikhia un, hong kikhenkhia un, ci in Pasian hong
sapna a hihi. Tua in hunbei kuan aa Pasian hong sapna a hihi. Pasian in atuu
huang sungah hong sam a hihi. Tua ahih leh a tuu huang leh a pawlpi bang ci
theih ding? Tua atuu honte leh a pawlpi te in Lai Siangtho um ding uh a, mite
bawltawm thukham sangin Pasian thukham zui zaw ding uh hi. Matthai 15:9 “Mite
thukham a hilh uh a, a mawkna in kei hong bia uh hi” ci in gen hi. Mangmuhna 14
sungah Sapi ciaptehna teng a genkhiat ciangin acianlai Pasian mite bang ci ding
hiam cih leh “Pasian thukham zui in Zeisu tungah acitak, misiangtho te in
thuakzawhna kisam hi” ci in gen hi (Mangmuhna 14:12). Zeisu hih leitungah hong
pai leh Pasian thukham a zui, Khasiangtho humop kamsang lai te um in Zeisu teci
pan na a nei a pawlpi hong zong leh nang le kei tua pawlpi ah i om kha diam? Ki
ngaihsun in. Zeisu leitungah a om lai in a pa i thupiak teng zui in kem cing
hi. John 15:10 ah kua (9) bek hilo sawm (10) azui te ci hi. Luke 4:16 ah “Zeisu
a ngeina bangin Sabbath ni sial in biakinn ah pai hi” ci hi. Tua a hih manin Zeisu
in acianlai Pasian mite omna ah hong pai ding hi. Dawimangpa, gilopa ii suksiatnop
tua acianlai, Pasian tungah citak in a thupiak te zui a, Zeisu teci panna
lenkip in Khasiangtho humop Kamsang te lai at te anei, pawlpi mite hu ding hi.
Tua a hih manin leitungah hong pailai mah bangin, Zeisu pen zanni, tuni leh
zingciang, a tawntung in a kikhel ngeilo pa ahihi.
Tua bang mite lak
ah no teng kong omsak nuam hi. Tua bang mite kong suaksak nuam hi. Pasian mite
tawh tuni in na kituahkhawm nuam uh hiam? Zeisu na it hiam? Zeisu in kei hong
it te in ka thupiak zui ding hi. Ka thu hong mang ding hi ci hi (Johan Masa
5:1-5). Nang na it taktak hiam? Tuni in Pasian na itna bang tawh na lak ding
hiam? Pasian I itna kisit tel ni. A it taktak ka hi hiam? Kampi bek tawh a it
ka hi hiam? Ki sitel ni. Zeisu aw nong nget bang, nong gen bang in semnuam mah
ingh” a ci ngam, a ci nuam i om diam? Tuni in khensat in.
Khazih Sungah,
Sia Khup Khen Thang
Yangon, Myanmar.
Date: December 18, 2019
*Adopted source from “the Breath of Life”
by Dr. C. D. Brooks.
*Edited by: Dr. Kham Khan Khai, Ed.D
(Professor, AIU, Thailand)
No comments:
Post a Comment