Pasian Tanu Honghawh by Sia Daniel Shoute (ZAC-Malaysia)

Sia Daniel Shoute

Lungdambawl hong naikuan ta, Lungdambawl a dingin sum ki zong tek in kibuai mah mah hi.

Nupi kum 30 bang a pha ding khat in Bazar a kahlei gei khat ah tukawm in azuak ding vaimim em in buai mah mah hi. A vaimim zuakna gei khat ah sumbuk sai lian khat, nik hoih puanhoih no no kizuakna om a, tua a sai mai ah nupinu' tapa kum 8 apha naupangno in polythene (saphuklai ip van tunna) a zuak hi.
Tua nik leh puan sai mai a limlangte zut zut in a om kum 5 apha..tua nupinu'tanu numei naupang khat in tua puan sai sung en en in na om niloh hi.
Nupi nu in, a tapa king ah, " Bawi aw, na nau na cing kawm in, mi sumbuk sai nin sak kha ding hi" ci in a kam vaikhakna a za nungak khat in tua nutate dinmun hong mu in, paisan zo lo in, hong dinkhawl hi.
Tua nungak in , sumbuk sunglam a en en naupang numeino leh a u pasal pen sumbuk sungah lut pih a, tua pen a nu in a muh hangin bangmah cih ngam loin en hit hiat hi.

A vaimim em kawmkawm in tua sumbuk lam en in, a ngaihsutna hong buai mah mah hi. Ka tanu in sumbuk sai neite na khat peuh suksiat sak ai tam??Siat sakna khat peuh nei leh, ken bang ci loh kik ding??? ci in hong lunghimawh mah mah hi.
Tua bangin a hoihlo lam bek bek ngaih sun in, sumbuk sung va lut in va thumsak ding ka hiam?? aikeh hi takpan in hong pusuah hun uh ngak ding cih lungiangin a om lai takin, a tate gel in plastic ip golpi tawh vantunpi tawi in maitai takin sumbuk pan hong pusuak uh a muh ciangin lamdang sa semsem hi.
Tua nungak nu in, nupinu kiang ah, " Pi aw, na vaimim em khat ong pia in, hong lei sak ning" ci a, Nupi nu in zong lamdang sa kawm kawm in pau lo in vaimim pia ziau hi.

A mantak in cileng, nupi Nu in, a thupai zia, bang mah thei lo in, bang cih kampau ding cih zong thei lo hi. Tua nungak nu in Nupinu' vaimim piak a san khit ciangin , nupi nu khut sung ah Rs. 1000 lai dal 10 pia a, nupi nu in zong sang pongmawk in, mit bem liang in lamdang sa, lungdam na hangin a mit pan in khitui hong luang ngelh ngelh hi.

Nupinu' ta pasalno in van lompi a tawi kawmin nungaknu kiang ah, " Siamah aw.. Pasian na hiam? Pasian mi bang in hong kineih in leitung ah hong kumsuk na hi hiam?" ci in dong hi. Nungaknu in nui kawm in, " Hi lo e, Kei pen Pasian tanu lak pan khat hi ing" ci in dawng hi. Naupang no in, " Aw, Pasian innkuan lak pan khat na hih um mah ingh. Tuzan in Pasian kiang ah, Topa aw kapa' han (grave) puah na ding leh ka nau tawh ka Lungdam bawl puan ding hong pia ding in thu ka ngen hi" cih gen hi.

Tua nungak nu in, naupang pasal kiang ah, a omna a veng min uh leh a pa' min a dot khit ciangin paisan ding in hong ding khia hi. Tua tak ciangin nupi nu zong a ngaihsutna pan Hong khanglo in, a sumsante pen nungaknu kiang ah piakkik sawm a, nungaknu in, " Na vaimim ka leina hi" ci in sang nuam lo a, nupi nu in, khitui mualtuang kawm in, " Sum hih zah hong sang zolo ding hing, ka vaimim hih zah man peuh mah lo hi, tua ban ah ka tate amau silh zawhloh ding puan tampi nong leisak lai lai, hih sum bel la thei lo ding hi ing" a cih ciangin, nungaknu in nupinu leh a tate gel kawi kawmin, " Eite khem peuh Pasian tate hi hang, Pasian tate in nakhempeuh a neikhawm hi hang, Lungdam bawl 'Merry Christmas' ci in hong nohset ing ei" ci in tua nupinu leh a tate hong maitai takin nohset in paisan hi.

Nupinu in a vaimim em teng sunkhua inzuak in, a zuak kawm kawm in tua ni a thupiang teng lamdang sa in, a mang lah bang, a lunglah dam in tuani nitom sa mah mah hi. A vaimimte khawng khin, khua mui kuan hita, a vante sengin, a tategel tawh Inn lam zuanin hong ciah uh hi.
Inn lam a zuatna lampi pen hanmual akan tan uh kul khat hi a, tua bangin han (grave) te kan tan in a nuta thum ua a pai lai un, nung kha mah a hong nusia nupinu' pasal han pen hanmual dang sang in hoihzaw pek in na kizem a gal muh ciangin ki ip zo nawnlo in a tate kawi in a kah kawm in, " Topa aw, Lungdam lua ung" a cih kawm in, a pasal hanmual lam hong zuan phei uh hi.
A tapa in, " Nu aw, tuzan a ka thunget Pasian in a tanu zangh in hong dawng hi, lungdam lua ing" ci hi.

Lungdam bawl pen ki ngaklah tek in, innkuan tampi te in deih bang bang lei Ni, innkuan Kim a kimuh khopna Ni leh a nuam thei bang pen a omna ni in kizangh mah leh, inkuan pawlkhat a dingin, phamsa ngaihna lunglenna Ni leh mizawng pawlkhat Nu lehpa te a ding in lungsim natni peuh in na zangh thei uh hi.
Mi tampite phawk loh mi genthei lunglengte a phawk a huh Pasian tate in Lungdam bawl tak tak a zangh na hi zaw gige hi.

*_"Pia in, na kisik kei ding hi"Jesu in hong lohkik pelmawh ding hi."_*

Jesu in, " Note kiangah kong gen in ah, hih ka sanggamte a neu pen khat nangawn na limbawl uh ciangin kei tung ah a hong bawl na hi uh hi" ci in a dawng hi. Matthew 25:40..

Hoih na sak leh na share in maw..mi tampi in na share na hangin Thupha ngah ding hi..Amen.

Topa Thupha..maw..

Khazih Sungah,

Daniel Shoute

Senior Pastor

ZAC-Malaysia