DAWIMANGPA HI LENG! By Dr. George R. Knight (Kamlet: Dr. Kham Khan Khai, Ed.D)

Dr. George R. Knight

 Dawimangpa hi leng Seventh-day Adventist Pawlpi sungah geelna hoih mahmah tawh ka lut ding a, pawlpi nasepna tawh kisai in buaina lianpi ka tungsak ding hi.

Dawimangpa hi leng, a masa pen in, khangthak te ngaihsutna leh geelna te pawlpi in a awlmawh lohna dingin ka hanciam ding hi. Khangthak te leh uham te silh le teen, lasak zia, leh ngaihsut kibanglo ahih manin haksa hetlo ding hi. Adventist pawlpi hong pankhia te a tam zaw athak ngaihsun siam khangno vive ahihna zong ka mangngilh sak ding hi.

Dawimangpa hi leng, pawlpi in ngaihsutna/ngimna neu/niam mahmah ka neisak ding hi. A hoih ding aa kigeel khat peuh piangthei ke’n teh ci in paulap tampi ka neisak ding hi. Amau kinialna te Lai Siangtho munte leh a mun le hun tawh kituak seloh hangin Ellen White lai-at te matlap in ka neisak den ding hi. Tua bang a sia-muh nasem te in Testimonies for the Church vol. 6, laimai 476 aa, “Sepzia thak leh geelna thak te mun thak pan in hong luangkhia ding hi. Nasepna dingin a kipia khia nasem thak te tung panin ngaihsutna thakte hong paikhia ding hi . . . Topa mahmah in a geelna te amaute in ngah ding uh hi.” Nasem thak te khangno nasem te hi zaw den hamtang hi.

Dawimangpa hi leng, nasepzia nam khat bek om aa, tua dan bek in mi khempeuh in sepkul hi cih mite ka umsak ding hi. Minam leh ngeina kibanglo te lak ah biakpiak zia leh lungdamna thu tangko zia namkhat bek ka zangsak lel ding hi.

Dawimangpa hi leng, pawlpi nasepna mazang zawkna dingin setvan thak nono te (new technologies) te a thupina ka neuseh sak ding hi.

Dawimangpa hi leng, pastor te leh makai te bek pawlpi nasepna ah ma ka pangsak ding hi. Pawlpi mite nasepna a thupina ka neu ngaihsutsak ding a, mipi te daitak in ka omsak hithiat lel ding hi.

Dawimangpa hi leng, ki-ukna makai tuamtuam ka bawl dinga, zum sungah a tu sia tampi ka koih ding hi. Pawlpi sia tampi te computer mai, sabuai mai ah tu in laidal te tawh amai uh laihcip in committee tampipi ka tu saksak ding hi.

Dawimangpa hi leng, Kha Siangtho ka kihta sak ding hi. Kha Siangtho min a kilawh nak leh Pentecostal vai ci in Kha khanlawhna cih limlim ka zadah sak ding hi.

Dawimangpa hi leng, pawlpi mi phazah (number) tawh ka lungkim sak mahmah lel ding a, pawlpi phazah, sang neihzah, sum neihzah leh a kisim thei numbat tuamtuam te simna tawh lungkim in a hun uh ka beisak ding hi.

Dawimangpa hi leng, a upna-guipi khempeuh uh a kikim in thupi hi cih ka umsak ding hi. Jesu tawh kizopna leh voksa neklohna a kikim in ka umsak ding a, sanek lohna leh khat le khat ki-itna te a kibangin ka ngaihsun sak ding hi.

Dawimangpa hi leng, Adventist te khat le khat ka kitawng saksak ding hi. Biakpiakzia, theology vai, puansilh nikten, nek le dawn cihte tawh a kinial saksak ding hi. Policy leh manual te vai kikupna leh kinialna tawh a hun uh ka beisak ding hi.
Dawimangpa hi leng, ahi thei zah in Adventist te lak ah beh le phung leh minam vai ka ngaihsun saksak ding hi. Za le mun ngaihsutna in minam leh beh tawh thu ka vaihawm sak den ding hi.

Dawimangpa hi leng, a tawpna ah, Sabbath ni in mangbangin ka omsak ding hi. Sabbath nitak nitum ngaklah mahmah in ka omsak ding hi. Sabbath ni pen Adventist te aa ding gawtbawl ka suak sak ding a, gupna ngahna dingin a seploh uh phamawh khat in ka ngaihsun sak ding hi.


Kamlet:
Dr. Kham Khan Khai, Ed.D,
Associate Professor,
Asia Pacific International University,
Thailand.

(2000 kum a Toronto aa kibawl General Conference Session ah Dr. George R. Knight thugenna pan ka tomlak hi. A kicing zaw in a simnuam i om leh http://archives.adventistreview.org/2000-1544/devil.html ah kisim thei hi.)

N.B. Kawlgam Adventist te dinmun tawh kituak in pawlkhat kei mimal in kammal ka behlap leh ka puah om hi. Pawlpi khantohna ding deihsakna ahih manin ahoih lamin kipuah siamtek ni.