KHENPI 26
SIHNA LEH THAWHKIKNA
(SDA 28 Belief Chapter 26)
(Zomi version: Tg Thawng Mun Lian @ Lianneu, USA)
(Zomi Version Editor: Sia Khup Khen Thang, Yangon)
Philistine galkapte kikhawmin Shunem ah
giahphual sat uh a, tua pan in Israel do dingin kigingsa in om uh hi. Tua hun
mahin Kumpi Saul in Israel galkapte khawmin Gilboa Mual kiimteng ah giahphual
sat hi. Saul in Philistine galkapte amuh ciangin kihta a, a lungsim lauthawng
mahmah hi. Abeisa hunin Pasian ompihna tawh Saul in Israel mite hangsantakin
makaih hi. Ahih hangin Pasian kiang pan Saul lampial khin ahih manin, galdo
nading tawh kisai a dot hangin Pasian in a dawng kei hi.
A hoihlo lam a kihilna tawh zingciang thu
ding theilo ahih manin Saul lungsim gik mahmah hi. Samuel nungtalai le ut hi.
Ahi hangin Samuel sikhin ahih amin bangmah thu a dong thei nawn kei hi.
Saul in, “Sikha kamsang khat tawh kimu leng
hoih ding hi cih ngaihsun hi.” A tuungin, Saul in Pasian naih a, Israel-te
kiang pan dawi-ai siam le miphialsiamte khempeuh a hawlkhiatsa ahi hi.
Tu’n Saul tektek mahin galdo leh zo ding maw
lel ding cih a dot theih ding sikha kamsang khat zong dingin a hanciam hi. Amah
in Endor ah numei khat mu a, zingciang kidona ah bang suak ding hiam cih a dong
hi. Amah in numei kiangah, “Samuel hong sapsak in” a ci hi. Tua hun laitakin
numei in, “Lei pana hong pusuak-khia kha khat kamu hi,” a ci hi. Tua kha in
theisaka Israel in gal lel bek tham lo ama leh a tapate zong a sih nading thu
agen hi (1 Sam. 28).
Hih genkholhna tung takpi hi. Ahih hangin tua
genkholna a pia Samuel ii kha ahi takpi ding hiam? Bangci bangin sikha kamsang
khat in Pasian kamsang Samuel tungah thu nei thei ding ahi hiam? Koi pan Samuel
hong pai a, bang hangin hih kha lei pan hong suak thei hiam? Bang daan in
Samuel tungah sihna tung hiam? Saul kianga thu gen Samuel ii kha ahih kei leh,
bang hi ding hiam? (391[L1] ) Lai Siangtho in sihna tawh kisai hong
bangci hilh a, sihna leh thawhkikna bang daan in kizom hiam en dih ni.
SIHNA LEH SIH-THEIHLOHNA
Sihtheihlohna in a gen pen sihna thu hilo hi.
Lai Siangtho kamlette in “Sihtheihlohna” kammal pen Greek kamin anthanasia, “nungta
tawntung,” leh aphtharsia, “muat theihlohna.” ci uh hi. Hih
ngaihsutna ah mihing leh Pasian’ aa bangci kizop hiam?
Sihtheihlohna. Lai Siangtho in tawntung
Pasian pen a si theilo ahihna hong lak hi (1Tim. 1:17). Amah bek in
“Sihtheihlohna” nei hi (1 Tim.6:16). Amah kipiangsak lo, Ama thu a piang, leh
kipatna neilo leh tawpna neilo ahi hi (hih laibu khenpi 2 en in).
“Lai Siangtho in koimapeuh ah sihtheihlohna a
gen teh pasal ahikeh numei in a pianpih ‘kha’ ci hi. Kha cih kammal pen Lai
Siangtho sungah 1,600 vei saang tamzaw kimu aa, ahih hangin ‘sitheilo’ ahikeh
‘sihtheihlohna’” kammal tawh kizom lo hi (hih laibu khenpi 7 en in).
Pasian tawh kilamdanna in, mihingte pen a si
thei pumpi ahi hi. Lai Siangtho in nuntakna pen “Meiilum tawlkhat sung kaii-in
a mangthang pak tawh kibang lel hi” ci hi (James 4:14). Amaute mihing hi lel a,
a kileh kik nawn lo huihdam nung bang ahihlam uh phawk hi (Late. 78:39). Amah
“pak bangin palh a, a vulmang hi; niliim pai tawh kibanga, a kip kei hi” (Job
14:2).
Kiteltakin Pasian le mihing kilamdang hi.
Pasian pen mong neilo hi a, eite pen ciangtan nei ih hi hi. Pasian pen a si
theilo hi a, eite pen a si thei ih hi hi. Pasian pen a tawntung hi a, eite pen
huntom khat sung bek ih nungta thei hi.
Sihtheihlohna Dinmun Hi Nai
Lo.
Piansakna ah “Pasian in leitang vui panin mi bawla a nakvang sungah nuntakna
huu muamin mi pen a nungta khat suak hi” (Pian. 2:7). Pasian kiang panin mihing
nuntakna hong pai hi (cf. Act 17:25, 28; Col. 1:16, 17). Hih sihtheihlohna in
agen bulpi ahih leh mihingte pianpih hi lo a, Pasian ii piak letsong ahi hi.
Pasian in Adam le Eve a piansak ciangin, Amah
in deih bangin teel theihna amaute pia hi. Amaute in thumang ding leh thu
mangloh ding teel thei uh a, Pasian ii deih bang zuihna ah kinga hi. Tua ahih
manin amaute ading a kipia sihtheihlohna letsong pen kilaih kawikawi thei hi.
Pasian in kician takin “Sia le pha theihna
singkung a nekloh nadingun hilh hi.” Pasian in “tua na nek hunhunin na si
pelmawh ding hi,” ci hi (Pian 2:17).
Sihna: Mawhna Thaman. Pasian’ vauhilhna zuihlohna
in sihna piangsak a, Santan in, “Na si peuhmah kei ding uh hi” ci hi (Pian.
3:4). (392) Ahih hangin Pasian ii thupiak a palsat khit
uh ciangin, Adam le Eve in mawhna thaman in sihna ahih lam mukhia uh hi (Rom.
6:23). Amau mawhna in hih laigual piangsak hi: Nang pen “Leivui pan
nang hongkila ahih manin lei ah na ciak kik ding hi; ahang in leivui na hi a,
leivui ah na ciah kik ding hi (Pian. 3:19). Hih kammalte in nuntakna kizom nawn
lo cih hi loin tawlnga phot cihna hi.
Hih thu a kipiak khit ciangin, Pasian in
mawhna tawh kidim nupate in nuntakna singgah “ne-in a hin tawntung khak loh
nadingin a dal hi (Pian. 3:22). Ama sepna in a siangin hong laka, thumanna tawh
sihtheihlohna kamciam pen mawhna hangin beimang hi. Tu-inah amaute sihtheihna
dinmun tungta uh hi. Tua bang ahih manin Adam in ama’ neih nawn loh khat pia
sawn thei lo a, “mi khempeuh mawh khin zo ahih manin, mi khempeuh tungah sihna
a tung hi” (Rom. 5:12).
Thatkhat thu-in sihna ding pan Adam le Eve a
om laina hang pen Pasian ii hehpihna hang bek ahi hi. Amaute in nuntakna a ngah
kik theih nadingin Pasian Tapa in Ama nuntkana hong pia khia hi. Amah pen
“Leitung kipiansaka kipan a kigo Tuuno” hi (Mang. 13:8).
Mihingte Ading
Lametna. Mihingte
sitheihna tawh a suah uh hangin, Lai Siangtho in sitheih nawnlohna a zong
dingin hong hansuah hi (Rom. 2:7). Jesu Christ in nuntakna bulpi ahi hi:
“Pasian letsong ahih leh Topa Jesu Christ sunga nuntak tawntungna ahi hi” (Rom.
6:23; cf. 1 John 5:11). Amah in “sihna susia a, nuntakna le sihtheihlohna hong
puak hi (2 Tim. 1:10). “Ahang in, Adam sungah mi khempeuh a sih bangin Christ
sungah mi khempeuh a kinungtasak ding hi” (1 Cor.15:22). Christ in, han sunga
omte in Ama aw za in, sihna pan hong thokik ding hi (John 5:28, 29).
Christ hong pai lo hileh, mihingte adingin
lametna omlo dinga, mi khempeh a tawntungin kisia paisuak ding hi. “Pasian in
leitung it lua ahih manin, a Tapa a um khempeuh mangthang lo a nuntak
tawntungna a neih nadingin a Tapa khat neihsun a pia hi (John 3:16). Tua ahih
manin Christ upna tawh mawhna dan hong paihkhiat sak bek tham loin manpiak
zawhloh ding sihtheihlohna letsong hong pia hi.
Christ in lungdamna thu tungtawnin
sihtheihlohna khuavak hong puak hi (2 Tim. 1:10). Paul in eite hong gen inah,
“Christ Jesu sunga upna tungtawnin hotkhiatna ngah nadingin hong pilsak thei
Lai Siangtho” ci hi (2 Tim. 3:15). Lungdamna thu a sang lo khempeuh in nuntak
tawntungna ngah lo ding uh hi.
Sihtheihlohna Kipia. Paul in “Ngai un, thuthuk
khat kong gen ding hi: Eite khempeuh ih ihmu kim kei ding hi. Ahih hangin a
nunung pengkul a mut ciangin thakhat thu mitphial khat sungin ih vekpi-in ih
kikhel ding hi. Ahang in, pengkul hong ging dinga, misite a sia thei lo dingin
kithosak dinga eite ih kikhel ding hi. Ahang in, a siatheite in siattheihlohna
silhin, a si theite in sihtheihlohna a silh ding hi. (393) A
sia theite in siat theihlohna silh-a a si theite in sihtheihlohna a silh
ciangin: “Gualzawhna in sihna valhtum ding hi” (1 Cor. 15:51-54). Pasian in
Amah um aa sihna thuak mite sihtheihlohna a piakpah loh lam kician mahmah a,
ahih hangin a nunung pengkul aging ciangin thokik ding hi. Tua ciangin, “sih
theihna panin sihtheihlohna ah koih ding hi.” Jesu Christ mimal Honpa in ih
saang ciang, eite in nuntak tawntungna letsong ih ngah hi (1 John 5:11-13),
ataktak hih letsong pen Christ hong paikik ciangin hong pia ding hi.
Siattheihna pan siattheihlohna, sih theihna pan sihtheihlohna ah ih kikhel hun
hi ding hi.
SIHNA THU
Sihna pen tawlngakna ahileh, mihing sihna
tawh kisai Lai Siangtho in bangci gen hiam? Christian-te in Lai Siangtho hong
hilh zia theih ding bangzah in thupi hiam?
Sihna in Ihmutna. Sihna pen beisiangna hi
lo-a, thawhkik ding ngakna tawh tomno sung ihmutna ahi hi. Lai Siangtho in
sihna pen ihmutna ahih lam hong gen phapha hi.
Lai Siangtho Lui sungah David, Solomon, leh
adang Israel le Judah kumpite zong taanglai pu leh pate tawh tawlnga khawm uh
hi (1 King 2:10; 11:43; 14:20, 31; 15: 8; 2 Khang. 21:1; 26:23; etc.). Job in
sihna pen ihmutna ci hi (Job 14: 10-12), David in zong ci hi (Late. 13:3),
Jeremiah in zong ci hi (Jer. 51:39, 57), leh Daniel in zong ci hi (Dan. 12:2).
Tua bangmah in Lai Siangtho Thak in zong gen
hi. Jairus tanu sihna thu ah Christ in numeino a si hilo a, a ihmu ci hi (Matt.
9:24; Mark 5:39). Tua mah bangin Lazarus zong ihmu ci hi (John 11:11-14).
Christ a thawhkik khit ciangin “a sisa misiangthote tampi thokik hi” ci-in
Matthew in gen hi (Matt. 27:52), Luke in misiangtho Stephen zong “amah ihmu” ci
hi (Sawl 7:60). Paul le Peter in zong sihna pen ihmutna ci hi ((1 Cor. 15:51,
52; 1Thess. 4:13-17; 2 Peter 3:4).
Lai Sianghto in sihna pen ihmutna tawh hong
genkhiatna kician aa, anuai abangin tehkakin hong lakkhia hi: 1. A ihmu mite in
khuaphawk lo uh hi. “a site in bangmah theilo” uh hi (Thuhilhna. 9:5). 2. Ihmut
sungin, khua phawk theihna khawl hi. “Ama husanna a bei ciangin lei-ah ciahkik
a, tua ni mahmahin a ngaihsutnate beita hi” (Late. 146:4 NKJV). 3. Ihmut
ciangin gamtatnate khempeuh pan khawl cihna hi. “Na pai nading hankhuk ah sep
ding om lo, geel ding om lo, theihna pilna lah om tuan lo” hi (Thuhhilhna.
9:10). 4. Ihmutna in a khangh lo a gamtaang mite tawh hong kizom sak lo hi.
“Sunni nuai-a piang peuhmah bangmah a theikha nawn kei ding uh hi” (Thuhilhna.
9:6). 5. Angeina banga ihmutna in lungsim ngaihsutnate tawlnga sak hi. “Amaute
itna, amaute muhdahna le amaute hazatna beimang khin hi (Thuhilhna. 9:6). 6. A
ihmu mite in Pasian phat thei lo uh hi. “Misite in Topa phat lo uh hi (Late.
115:17). 7. (394) A ihmu khat kiphong kik ding hi. “Han
sunga, omte in Ama aw za in, hong paikhiat hun hong tung ding hi (John 5:28,
29).
Leivui ah Ciahkik. Mi khat sihna ah bang piang
hiam cih theihcian nadingin, ama nunzia tel kul hi. Lai Siangtho in
amah aa khangtawm thei nakhat bangin mi khat omdaan hong lak hi (Hih laibu
khenpi 7 en in). Hih munah “kha” cih kammal in a kawknop pen mihing khat pumpi
agenna leh lungsim ngaihsutnate zong ahi hi. Ahih hangin a kigawm mihing pumpi
pen khen nih pha daan in hong hilh hilo hi. Pumpi leh kha a kigawm khawm khat
hi a, a kikhen theilo dinga kibawl ahi hi.
Mihing hong kipiansakna ah, a kigawm leivui
leh nuntakna huu muamin mi pen a nungta khat suak hi. Adam a nungta khat a suah
nadingin a tuam in kha ngah lo hi (Pian. 2:7, hih laibu khenpi 7 en in). Sihna
thu ah kilehbulh hi: A husanna a bei ciangin lei-ah ciahkik a, a ngaihsutnate
beita hi (Late. 146:4). Leivui na hih manin lei-ah na ciahkik ding hi (Pian.
3:19). Kha in pumpi pan a paikhiat tuam nading theina neilo a, Lai Siangtho in
zong sihna ah kha a tuamin a paikhiat lam hong lak lo hi. “Mawhna a bawlpa si
ding hi (Eze. 18:20).
Sihna Mun. Lai Siangtho Lui in mite a
sih ciang a pai nading mun pen sheol (Hebrew), leh Lai
Siangtho Thak in hades (Greek) ci hi. Lai Sianghto
sungah sheol cih kammal pen a huam in hankhuk cihna hi. Hades
cih kammal ii deihna zong sheol tawh kibang hi.
A si mikhempeuh hankhuk ah pai ding hi (Late.
89:48), midikte leh migilote a si mite zong hankhuk ah paikhawm ding uh hi.
Jacob in, “Han (sheol) lam zuan in kapai ding hi (Pian. 37:35). Lei
kamka in a gilo Korah le a neihsa khempeuh, leh amaute “a hing tangun hankhuk (sheol)
sung a tung uh hi (Gam.16:20).
Sheol cih kammal in pumpi bupin si cihna hi.
Christ a sih ciangin, Amah hunkhuk (hades) ah pai a, ahih hangin Ama thawhkikna
hankhuk (hades) ah Amah kinusia lo hi (Sawl. 2:27, 31; Late.16:10). David in,
“Topa aw hankhuk (sheol) panin kei nong lakhia-to-a, dum sunga kia ding
kimlai kei nong hawi lai hi ci-in lungdam ko hi (Late. 30:3).
Hankhuk pen khuaphawkna mun hi lo hi. Sihna
pen ihmutna ahih manin, thawkikna om matengin misite khuaphawk loin hankhuk
(hades) sungah om dinga, hankhuk in amau sunga om misite hong puakkhia ding hi
(Mang. 20:13).
Pasian Kiangah Kha
Ciahkik. Lei-ah
pumpi a ciahkik bangin, Pasian kiangah kha ciahkik hi. “Leivui pan hong kibawl
ahih manin lei-ah ih ciahkik dinga, ih kha hongpia Pasian kiangah ciahkik ding
hi” (Thuhilhna. 12:7). Midik le migilote adingin hi thu thutak ahi hi.
Ahih hangin, hi thu ah mi khat a sih khit
ciang nungta suak ding cih hong hilh hilo hiam? (395) Lai
Siangtho sungah Greek ahikeh Hebrew pau in “kha” (ruah leh pneuma) cih
kammal in pumpi sung pan phawk theihna khat om ahih lam hong lak hi. Tua sangin
mimal nuntak nadinga kisam ahi “husanna” pen mihing le ganhingte adingin a
bulpi nuntakna hizaw hi (hih laibu khenpi 7 en in).
Solomon in, “Mihingte tuah leh ganhingte tuah
a kibang hi-in, a nih un atuah ding ngak uh a: Khat a sih bangin a khat zong a
si hi. A vekpi in huu sang (ruach) ciat uh a; ganhing sangin mihing
a tungnun zawkna a om kei hi. A vekpi-in a mun kibangah pai uh hi; a vekin
leivui pan pianga, leivui mah ah ciah kik hi (Thuhilhna. 3:19-21
ZIV). Solomon gen mah bangin, sihna thu ah mihing kha leh ganhingte
kikaal ah kilamdanna a om kei hi.
Solomon ii genna ah “kha” (ruach) pen
a piapa Pasian kiangah ciahkik sak a, tua a ciahkik pen Ama kiang pan a paikhia
nuntakna hi lel hi. Kha ahikeh husanna pumpi pan a tuam in paikhia hi cihna a
om kei hi. Hih kha (ruach) cih kammal pen Pasian in “nuntakna huu”
muamin mi a nungta khat suak sak hi (cf. Pian. 2:7).
Lai Siangtho Tawh
Ki-thuhualna. Thawhkikna matengin sihna pen ihmutna bang ahih lam Lai
Siangtho hong hilhna avekpi a sim lo Christian tampi om hi. Amaute in sih khit
nungah kha in phawktheihna nei lai bangin ngaihsutna tuamtuam nei uh hi.
Kiciantakin Lai Sianghtho hilhna kisim hi leh sih khit ciangin khuaphawktheihna
beita ahi lam hong lak hi.
Sikhahopihna. Sih khit ciangin bangmah
phawkna omlo ahih leh, sikha kamsangte kua tawh kiho hi mawk ding hiam?
Thuman tawh a nungta mikhempeuh in hih
zaukhemna tuakkha dinga, ahih hangin pawlkhatte in thudik lo ahilam gen theilo
ding uh hi. Mihing theihloh na lamdang pawlkhat pen sikhahopihna tawh kizom hi.
Hih thu ah Lai Siangtho in hong bangci hilh hiam?
1. Sikhahopih
Kipatcilna. Amasa
in Satan in Eve kiangah zuau gena “Na si peuhmah kei ding” ci hi (Pian. 3:4).
Ama kammalte pen a sitheilo kha thu a gen masakna mun ahi hi. Tuni-in leitung
khempeuh theih ding inah, Pasian in “mawhna a bawlpa si ding” ci hi (Eze.
18:20) “mawhna na bawl hangin, na si kei ding hi” cih tawh kilehbulh hi.
Hibang thuzuau upna in sihna sungah
phawktheihna om lai hi cih upna piang sak hi. Eite in ih muh mah bangin, hi
bang upna pen Lai Siaingtho hong hilhna tawh kilehbulh hi. (396) Upna
pan lampial mipil Plato hun pan Christian upna tawh kigawm thei lo hi (hih
laibu khenpi 13 en in). Hih upna pen tuni dongin Christian sungah a laang
mahmah thu khat ahi hi. Misite’ kha nungta lai hi cih Christian tampite in a
sanpih theih nading upna hi. Misite’ kha nungta lai-in Pasian mai-ah om ahih
leh, bang hangin khate nasep sem dingin leitungah hong paikik thei lo ding uh
hiam? Tua bangin sem thei ahi uh leh, bang hangin tuahsiatna thuakte akipelh
theih nading lamlakin, dahna thuakte hehnem thei lo ding uh hiam?
Tua
dawimangpa ahikeh Satan kici leitung buppi lampialsakpa leh ama vansawltakte
lei-ah kilawn khia suk hi (Mang. 12:4, 9). Tua ahih manin, a si khinsa mi khat
bangin kibawlkhem in, a nungta lai mite uptheih dingin nasem uh hi. Mi tampite
uptheih dingin mailam a thungpiang dingte genkhol uh hi. Pasian ii thukham leh
Lai Siangtho tawh a kituahloh hangin, amute in thuman thutak khuhnelh in a
lauhuai upkhialhna ah pai uh hi. Gitlohna pan hong daltante hemkhia in, Satan
in mite Pasian tawh hong kigamlat sak nading leh siatna ah hongtun theih nangin
suaktatakin makaih hi.
2. Sikhahopihna Tawh Kisai
Vauhilhna. Kuamah
sikhahopihna tawh khem ding kisam lo hi. Lai Siangtho in tua bang gamtatna pen
khemna ahih lam kiteltakin hong lak hi. Lai Siangtho tungtawnin misite in a sih
khit uh ciang bangmah phawk thei lo in, sem thei nawnlo ahih lam ih theihsa hi,
“leivui pen leivui mah” ahi hi.
Leitung in misi kha a cihte
tawh tawmkhat zong kiho khak loh ding khauhtakin Lai Siangtho in hong khaam hi.
Misi tawh kizopna a nei mipeuh mah, aisiam ahikeh dawi lawm neite tawh kizom uh
hi a, tua in “dawite’ khate hi.” Tuate tawh na kibuahsak khading uh hi,
amaute’n na hoih lo sem gitlohna bawl ahih manin gimpiakna in sihna thuak uh
ahi hi (Siam. 19:31; 20:27; cf. Thkna. 18:10, 11).
Sikhahopihna a haihuai zia
Isaiah in limtakin gen hi: “Mite in note kiangah a phun sausau, a humham daldal
sikha hopihte le vankhate thu dong un. Mite in a Pasian uh thu a dot mah uh hi
lo hiam? A hingte tangin misi dot ding ahi hiam? Thukham le tecipannate bek
ngai un. Amaute in hih kammalte tawh kizui-in a pau kei uh leh amau sungah
khuavak aom kei hi” (Isa. 8:19, 20). Christiante in khemna ih do zawh nadingin
Lai Siangtho hong hilhna mah muanhuai pen hi.
3. Sikhahopih Kilatnate. Lai Siangtho in mun tampi
ah sikhahopihna tawh kisai gamtatnate ciamteh hi – Pharaoh hun lai-a
mitphialsiamte leh vanlam mitphialsiamte, Nineveh a dawi-ai siamte leh Babylon
a numei dawisiamte leh Israel gam a sikha kamsangte khempeuh ahi hi. Saul in
Endor a sikha kamsang khat tawh a kimuhna pen gentehna khat hipah hi. (397)
Amah in Topa a dot hangin Topa in a mang sung
ahi a, Urim ahi a, kamsangte pan ahi zongin a dawng kei hi” (1 Sam.
28:6). Pasian in Endor a thupiang ah bangmah sem lo hi. A sisa
Samuel tawh kibang a kibawlkhem dawi khat hangin Sual in khemna thuak hi; amah
in Samuel taktak mulo hi. Amah in, “Amah bang tawh kibang hiam?” ci-in a dong
hi. Tuanu in, “Puteek puantual silh khat mu hi” (1 Sam. 28:14). Misite kha
kineih Samuel taktak banga ih up leh, numei dawisiamte, mitphialsiamte,
phuisamsiamte, dawi-ai siamte, sikha kamsangte, adik misite in a sih uh ciangin
sam thei ding uh hi. Tua bang ahi leh Samuel banga kineih thei phawk theihna a
nei “lei pana pusuak khia puteek puantual silhpa ih thukimpih kul ding hi (1
Sam. 28:13). Lai Siangtho in sih khit nungah nuntakna nei khat omlai hi cih
genna neilo hi. Satan leh a lawmte in mite a khem zawh nadingun, a sikhin a it
khat uh tawh kibangin kineih kheem in amuate tawh kihona a nei uh hi. Tua bang
sikha hopihna pen Saul hih ngei bang ahi hi.
Hibang
sikhahopihna in Saull lametna bei sak hi. A zingciangin amah leh amh kithat hi
(1 Sam. 31:4). Samuel a kicipa genkholh bangin tua ni-in Saul le a tapate tawh
amah om khawm ding ci hi (1 Sam. 28:19). Ama gen bang adik ahi leh, thumanglo
Saul le midik Samuel kimuhkhop bangin eite zong sihkhit nungah tua bang ih hi
ding hi. Eite in dawi gilo khat hong khemna hangin misi khat thudongin ih hun
beisak huai ding hiam?
4. A tawpkhak Upkhialh-sakna. Abeisa hun in sikhahopihna
pen thusim khat bang hi a, ahih hangin tuhun ciang sikhahopihna in leitung a
Christiante khem theih nading khat hong suak ta hi. Christ leh Lai Siangtho
theihcian nading ah, sikhahopihna in thu-um mite aa dingin a lauhuai mahmah gal
khat hong suak hi. Tua thute in khemna leh ngaihsut hak khat hong suak hi.
Sikhahopihna huzap tungtawnin, “Thuman thutak a kitheih loh nadingin, a
thaksuak lo lungtang ii deihhuai dingin Lai Siangtho kiletkhia hi. Itna in a
lianpen Pasian pianzia hi a, ahih hangin sia leh a kiteloh nadingin itna pen
kineu ngaihsut hi. Pasian ii thumanna, mawhna A pulakkhiatna, a siangtho Ama
thukham a kisapnate a kimu lo dingin kihemkhia hi. Thukhaam Sawm abei khin
laikhak khat bangin mite kihilh hi. Lai Siangtho amaute upna bulpi ahihna pan
mite in a nial theih nadingin phuahtawm tangthu bangin a ngaihsutna uh kibum
sak hi.”
Thuman leh thumanlo kizopna tungtawnin, mimal
ahikeh ngeina ah thuman khat hong suak hi. Tua na nek hun uh ciangin na mit uh
hong kihong dinga, pasian tawh kibangin, Satan gen bangin “pasiante na suak
ding uh hi” (Pian. 3:5 ZIV). (398)
Leitung
tunga tengte zia-etna dingin leitung bupah bawlsiatna hong tung ding hi (Mang.
3:10). Leitung hun bei kuan ahih manin, Satan in lim le nalamdangte zangin mite
hong khemna ta ding hi. Satan in ama siamtawp tawh mite hong khem ding hi. John
in “Uiphuk tawh kibang kha gilo thum kamu hi. Amaute, nalamdang limte alak thei
dawite khate hi uh a, leitung bupa kumpite kiangah pai-in, Thahat Pasian ni
lian ni a do dingin amaute kikhawm in a kuan khia uh ahi hi” (Mang. 16:13, 14;
cf. Mang. 13, 14).
Lai Siangtho thuman thutak tawh a lungsim a
khauhsakte bek suakta ding hi. Tua bang kidalna a neilo khempeuhte kheemna in
phiat khia ding hi.
Amasa leh Sihna
Nihna. Sihna
nihna pen a kisiik kik nuamlo mawhneite ading a nunung pen thukhenna hi dinga,
nuntakna laibu sunga min kigelh lo khempeuh vantungah kum tul khat (1,000) mang
khit ciangin sihna nihna tawh thukikhen ding hi (hih laibu khenpi 27 en in).
Hih sihna ah thawhkikna om nawn lo hi. Satan leh a diklo mite kisusia khawm
dinga, mawhna kiphiatmai dinga, sihna mahmah zong beimang ta ding hi (1 Cor.
15:26; Mang. 20:14; 21:8). Christ in kamciam pia a, “A gualzo mi, a nihna sihna
in a nasak lo ding hi” (Mang. 2:11).
Lai Siangtho in sihna nihna a genna tungtawn
in, sihna masa a si mikhempeuh zong Adam khialhna hang hi dingin kingaihsun hi.
Hite khempeh mawhna hanga mihingte tungah hong piang khia ahi hi.
THAWHKIKNA
Thawhkikna pen nuntakna ngahkikna hi a,
mihing hihna a kipatna pan a dimin ngahkikna ahi hi.” Bang hang hiam cih leh
mihing pen a si thei pumpi hi a, hankhuk galkhat ah thawhkikna a om kul hi. Lai
Siangtho Lui sung khempeuh ah, Pasian kamsangte in thawhkik ding lametna aom
lam gen uh hi (Job 14:13-15; 19:25-29; Late. 49:15; 73:24; Isa. 26:19;
1Cor.15).
Thawkikna lamenin, ahangin Lai Siangtho
tungtawnin kiciantakin ih thei hi, hih leitung sihna galkhat ah a hoihzaw
lametna a nei dingin hong hansuah hi.
Christ Thawhkikna. Sihna pan midikte tawhkikna
pen sih theihlohna pan Christ thawhkikna tawh kibang mahmah ding hi, bang hang
hiam cih leh Christ zong sihna pan a nungta dinga hong thokik ahi hi (John
5:28,29).
1. A Thupina. Christ a thokik lo hileh
bang thu piang ding hiam? Paul in a huamin gen hi: a. Lungdamna thu cih bang
omlo ding hi: “Christ thokik lo hileh kote thuhilhna a mawkna suak ding hi” (1
Cor. 15:14). b. Mawhnate hangin maisakna om lo ding hi: “Christ thokik lo hileh
na mawhnate uh sungah a om lai na hi ding uh hi” (1 Cor. 15:16). c. Jesu upna
ding thu om lo hi: “Christ thokik lo hileh na upna uh a mawkna hi” (1 Cor.
15:17). d. Sihna pan a taangpi a thawhkikna om lo ding hi: “Sihna pan in Christ
thokik hi, cihna thu ahih manin, bang hangin note pawlkhat in, miste thokik lo
ding hi, ci thei na hi uh hiam?” (1 Cor. 15:12). e. Hankhuk galkhat ah lametna
om lo ding hi: “Christ a thokik lo hileh, note upna a mawkna hi; na mawhnate
sung uh ah na om lai ding uh hi. Tua ciangin Jesu sunga a ihmu masate zong a
mangthang ahi ding uh hi (1 Cor.15:17, 18). 11
2. Pumpi tawh
Thawhkikna. Hankhuk
pan thokik Christ pen ci-le-sa tawh a nungta Christ mah ahi hi. Tun Aman
minthana pumpi nei a, ahih hangin tua pen pumpi taktak hilai hi. Amah taktak
ahih lam midangte in a kilamdanna thei zo lo uh hi (Luka. 24:13-27; John
20:14-18).
Jesu in Amah le Amah kha-niin ahih loh lam a
nungzuite kiangah kigen hi, “Ka khutte le ka khepekte en un. Kei mahmah hibuang
ing! Hong lawng unla en un; sikha in tu-a na muh uh kei neih bangin satak le
guh a nei kei hi,” a ci hi (Luka. 24: 39). Amaute in Amah ngasa haikeu khat a
piak uh leh la-a amaute muh in a ne hi (Luka. 24:43).
3. Christ Thawhkikna in
Huzap. Christ
ii thawhkikna in a nungzuite huzap in thaguan hi. Christ le Ama thawhkikna
vangliatna le a thuaknate thuakpihna, a sihna ah Amah tawh kibatna ka thei nuam
hi. Tua pen misi pana thawkikna ka ngah theih nading ahi hi (Phil. 3:10, 11;
Sawl. 4:33). Amaute in lungdamna thu a genna uh hangin leitung khempeuh kikhel
sak zo uh hi (Sawl. 17: 6).
Christ le Ama thawhkikna vanglian leh a
thuaknate in lungdamna thu genkhiatna ah muibun hi (Phil. 3: 10, 11). Peter in
thu gen a, misi pana Jesu Christ thawhkikna in amah a um mite tungah ‘a nungta
lametna’ hong pia ci hi (1Peter. 1:3). Sawltakpite in tuiphum John a kipan eite
kiang pana Jesu a kilaktoh hun dong ei tawh a om khawmsa mite lakah khat ih
teel ding kisam hi (Sawl. 1:22), hong tung ding mukhol ahih manin hankhuk
sungah kinusia lo-a, a pumpi zong muat lo ding, ci-in Christ thawkikna thu a
genkhol uh hi (Sawl. 2:31). Sawltakpite in, vanliatna lianpi tawh Topa Jesu
thawhkikna teci pang uh a amaute khempeuh tungah hehpihna tampitak a tung hi
(Sawl. 4:33). Sawltakpite in Jesu ah misite a thawhkikna mipite tungah hilhin a
tangkona un, Jewish makaite a lungzing sak mahmah hi (Sawl. 4:2)…Tua ciangin
Paul in amaute pawlkhat Sadducee hi-in, adangte Pharisee ahilam uh thei a,
Sanhedrin mai-ah ‘misite thawhkikna ka lamet manin thukhenna a thuak ka hi’ ci
khia hi (Sawl. 23:6; cf. Sawl. 24:21). Paul in Roman-te kiangah “Jesu Christ in
sihna pan vangliatna tawh a thokik Pasian Tapa” ci hi (Rom. 1:4). Eite zong
nuntakna thak sungah ih nuntak theih nadingin Ama sihna sungah ih kituipphumna
tungtawnin Amah tawh ih sikhawm hi (Rom. 6: 4, 5).”
Thawhkikna Namnih. Thawhkikna namnih om hi
ci-in Chirst in hong hilh hi: “midikte nuntakna ngah dingin thawhkikna” leh
“midiklote mawhsakna thuak dinga thawhkikna” hi ding hi (John 5:28, 29; Sawl.
24:15). Mimawhte thawhkikna pen kum tulkhat (1,000) khit ciang hi ding hi
(Mang. 20:4, 5). (400)
1. Nuntakna Ngah Dinga
Thawhkikna. Amasa
tawhkikna sunga kihelte a siangtho le thupha ngahte ahi uh hi” (Mang. 20:6).
Amaute in kum tul khat (1,000) khit cianga piang ding tua meili sungah sihna
nihna thei kha nawn lo ding uh hi (Mang. 20:14). Anungta tawntung dinga
thawhkikna hi (John 5:29; 1 Cor. 15:52, 53) tua in Topa hong pai ding lametna
ahi hi (1 Cor. 15:22; 1 Thess. 4:15-18). Amaute a si thei nawn kei ding uh hi
(Luke 20:36). Christ tawh a tawntungin mangkhawm ta ding uh hi.
Tua sihna pan a thokik
pumpi bang tawh kibang ding hiam? Christ tawh kibangin, a thokik misiangthote
in pumpi tatak mah nei ding uh hi. Christ minthanna tawh a thawhkik bangin,
amaute zong midikte hi ding hi. “Ama pumpi minthanna tawh a thawhkik mah
bangin” a minthang pumpi tawh hong khelsak ding hi (Phil. 3:21). Pianpih pumpi
om a, minthanna tawh kha pumpi zong a om hi. Ahangin, a siatheite in siat
theihlohna silh in, a si theite in sih theihlohna a silh ding hi. A sitheite in
sih theihlohna a silh ciangin gualzawhna sungah sihna kivalhtum zo hi (1 Cor.
15:42-54).
2. Mawhsakna Thuak Dinga
Thawhkikna. Midiklote
a nihna thawhkikna tawh tho ding uh a, tua pen kum tul khat (1,000) bei khit
ciang hi ding hi (hih laibu khenpi 27 en in). A gamtatsiate ahileh mawhsak
thukhenna a thuak dingin hong thokik ding uh hi (John 5:29). “Nuntakna laibu
sunga min kigelh lo peuhmah meili sungah kilawn hi,”tua pen sihna nihna ahi hi
(Mang. 20:14, 15).
Amaute in tua alipkhaphuai
sihna pelh thei lo hi. Tua a lipkhaphuai sihna pan na suahtak theih nadingin
Lai Siangtho in: na langdonate nusia inla kisik in, tua hileh mawhna pen nang
aa dingin na kiatsukna hi lo ding hi. Na gamtatna khempeuh panun kikhel unla,
lungsim thak le kha thak nei un. Bang hang si ding na hiam…? Ahangin mikhempeuh
sihna ah ka lungdam kei hi. Kisik in nungta un!” (Eze. 18:30-32).
Christ in hong kamciam hi
“A gualzo mi, a nihna sihna in a nasak kei ding hi” (Mang. 2:11). Jesu a um
mikhempeuh a dingin ama hotkhiatna hong puak dinga, genzawh loh lungdamna tawh
hong kumkik ding hi. Lungdamna bei ngei nawn lo dinga, amaute Honpa le Topa
tawh a tawntungin mangkhawm ta ding uh hi.
NGAIHSUT DING DOTNATE
1. Sih theihohna ih cih in
bang hiam? Lai Siangtho tungtawnin, kua bek sitheilo hiam? Nang sihtheihlohna
tawh kisai bangci theih na hiam? (401)
2. Paincil 2:7 in mihingte
pianzia hong koi ci gen hiam? Sihna a tun ciang bang suak ding hiam? Thuhilhna.
12:7 in leivui pen leitang mah ah ciah kik dinga, a husanna pen a pia Pasian
kiangah ciah kik ding ci hi lo hiam?
3. Lai Siangtho in sihna thu
hong bangci hilh hiam? Mi khat a sih ciangin bang suak dinga, amaute ngah ding
pahtakman ahikeh mawhsakna bang hun ciang hi ding hiam?
4. Lai Siangtho in sihna pen
ihmutna ci hi (Job 14:10-12; John 11:11-14). Hi mun panin sihna thu ih tel thei
hiam?
5. Mihaupa le Lazarus tangthu
in sihna khit ciangin nuntakna om ahi lam hong hilh hilo ahi hiam?
6. Sikkhahopihna ih cih in
bang hiam? Bang hangin Christian-te in tua bang hilhna teng nial huai hiam?
7. Sihna masa leh sihna nihna
in bang a gen nuam hiam? Lai Siangtho mun tawh lakkhia in. Christ nih veina
hong pai ciang, anungta lai tatkhiatte a si thei dinmun ah a om laitakun, kuate
si ding hiam? Kuate a gennuam hi ding hiam?
8. Lai Siangtho in thawhkikna
namnih gen hi. Lai Siangtho hong hilhna tungtawnin, sihna nihte bnagci dan hi
a, bang hun ciang piang dinga, kuate kihel dinga, bangci pian ding hiam?
9. Thuman thutak tungtawnin
Christiante in thawhkikna bangci up uh hiam? Thawhkikna masa a thokik dingte in
bangdan in khamuanna nei uh hiam? Thawkikna masa ah a thokik dingte kuate hi
ding hiam?
HILHCIANNATE
1. “Immortality,” SDA
Bible Encyclopedia (1996), vol. 10, p.743. (402-406)
2. Kumzalom tampi sunga
Christian upna tampite: Lutheran, Reformed, Anglican, Baptist,
Cogregationalist, Presbyterian, Methodist, etc. – Kumzalom16 sunga mi minthang
zaw deuhte: Martin Luther, William Tyndale, John Frith, George Wishart;
kumzalom 17: Robert Overton, Samuel Richardson, John Milton, George Wither,
John Jackson, John Canne, Archbishop John Tillotson, Dr. Isaac Barrow; kumzalom
18: Dr. William Coward, Henry Layton, Joseph N. Scott, M.D., Dr. Joseph
Priestly, Peter Pecard, Archedeacon Francis Blackburne, Bishop William
Warburton, Samuel Bourn, Dr. William Whiston, Dr. John Tottie, Prof. Henry
Dodwell; Kumzalom 19: Bishop Timothy Kendrick, Dr. William Thomson, Dr. Edward
White, Dr. John Thomas, H. H. Dobney, Archbishop Richard Whately, Dean Henry Alford,
James Panton Ham, Charles F. Hudson, Dr. Robert W. Dale, Dean Frederick W.
Farrar, Hermann Olshausen, canon Henry Constable, William Gladstone, Joseph
Parker, Bishop John J. S. Perowne, Sir George G. Stokes, Dr. W. A. Brown, Dr.
J. Agar Beet, Dr. R. F. Weymouth, Dr. Lyman Abbott, Dr. Eward Beecher, Dr.
Emmanuel Petavel-Olliff, Dr. Franz Delitzsch, Bishop Charles J. Ellicott, Dr.
Geroge Dana Boardman, J. H. Pettingell; kumzalom 20: Canon William H. M. Hay
Aitken, Eric Lewis, Dr. William Temple, Dr. Gerardus van der Leeuw, Dr. Aubrey
R. Vine, Dr. Martin J. Heinecken, David R. Davies, Dr. Basil F. C. Atkinson,
Dr. Emil Brunner, Dr. Reinhold Niebuhr, Dr. T. A. Kantonnen, Dr. D.R.G. Owen.
See Questions on Doctrine, pp. 571-609; LeRoy E. Froom, The
Conditionalist Faith of Our Fathers (Washington, D.C.: Review and
Herald, 1965, 1966), vols. 1 and 2.
3. See “Death” The SDA
Bible Dictionary, rev. ed., pp. 277-278.
4. R. L. Harris, “The Meaning
of the Word Sheol as Shown by Parallels in Poetic Texts,” Journal of
the Evangelical theological Society, December 1961, pp. 129-135; see
also the SDA Bible Commentary, rev. ed., vol. 3, p. 999.
5. See, e.g., The SDA
Bible Commentary, rev. ed., vol. 5, p. 387.
6. Shoel occurs more than 60
times in the Old Testament. See also The SDA Bible commentary, rev.
ed., vol. p. 999.
7. a. Rachel’s death (Gen.
35:18).
b. Elijah and the dead boy. (1
King. 17:21, 22).
c. Moses’ appearance on the
mountain. (Matt. 16:28-17:3; 2 Kings 2:11, Deu. 34:5, 6, Jude 9).
d. Parable of the rich man and
Lazarus. (Matt. 25:31-1; Rev. 22:12).
e. Christ’s promise to the thief. (Luke
23:43, 2 Cor. 12:4; Rev. 2:7).
f. To depart and be with
Christ. (Phil. 1:21, 23; 1 Thess. 4:14, 17).
8. E. G. White, The Great
Controversy, p. 558.
9. “Death” SDA Bible Dictionary, rev.
ed., p. 278; cf. Questions on Doctrine, p. 524.
10. “Resurrection,” SDA Bible
Dictionary, rev. ed., p. 935.
11. Questions on Doctrine, pp.
67, 68.
12. “Resurrection” SDA Bible
Dictionary, rev. ed., p. 936.
[L1]Bracket sunga nambat pen laibu ii original
page genna hi. Ex. (391)…
No comments:
Post a Comment