Covid-19 Khit Ciang…? By Pastor Kap Lian Thang

Covid-19 Khit Ciang…?

By Pastor Kap Lian Thang

April 3, 2020 ni in Covid-19 lungno gam 204 ah kizel in mi 55,170 valhtum hi cih thutang te ah ki at hi. Hih natna pen Sen gam Wuhan khuapi pan in 2019 November 17 pan, hong ki pan ahihi. Sen kumpi te in ahih leh 2020 January kha, ni 21 ni in hih natna vai thupulakna nei uh hi. Mi awn 11 bang, atenna, Wuhan khuapi pen 2020 January kha 23 ni in kikhak cip hi. Leitungbup cidamna lam asai (WHO) te in Covid-19 ci in min pia uh a, tua I deihna pen “Co” cih pen Coro hia, “Vi” pen Virus hi in, “D” pen  natna (disease) cih hi a, asau in  “2019 kum aa piangkhia corana virus natna” cihna a hihi.

Mite in hih pulnatna koici bangin hong piang hiam cih, atuamtuan gen ziazua uh hi. Tuipi sung ganhing sa, baak sa, guul sa, zusa sa, te nekna pan hong piang hi aci zong pawlkhat om hi. Kaaivui or Bomb-vui  khahsuahna hang hi aci zong pawl khat om hi. Sen gam pan hong piang ahih manin Sente amawhsak zong ki om hi.  American te’ kumpi Donlad Trump in zongh, “Sen Lungno” na ci hi. Ken ka hih leh bel, zatui lam pilnanei lah hilo ka hih manin ngawhtheih ding, ahang kagen thei tuankei hi. Ahi zongin Pasian geelna atantung na dingin na khempeuh in amun tek pan in ahuhciat hiding hi ci in ka um hi.

Mi tampi tak te in, hih Covid-19 koi bangin hong piang a hi tam ci in alunglut mah mah laitak in, ken kahih leh, hih natna khit ciang…? Bang hong piangtam ci[ ka lunglut zaw hi. Kawl gam ah hih natna lungno hangin nasep lianpi anei mihau khat taisim in nasem te’n nasep neinawn lo in beidong in om uh hi.  Sen gam pan in puan setzung te’ bawl ding, van kipuak nawnlo ahih manin mi atul-lom in nasep neilo in om uh hi. US gam ah Mi Awn 6.6 te in nasep neilo hi ungh ci uh hi. Hih natna hangin gam tuamtuam te ah nasep neilo hong khang semsemlai ding hi. Sumlei, sumzuakna ahoi kik theihna dingin mihaute leh kumpite in honghanciam ding uh hi. Tua bang ahanciam laitak mah un, gimna adang hongpiang beh lai dinghi. Sumlei, sumzuakna zong, sia semsem ding hi. Hih bangin khua hunte hong siat semsem takciangin gam Makaite leh biakna Makai-te in Nipi namnih akizatna hongphawk ding uh hi. Nipi  khat bek zangh lehang, nasephun tamzaw dinga, sumlei sumzuakna hoihzaw ding hi, ci ding uh hi. Hih bang natna gilo gimna-te zongh, kiamzaw dinghi cih, hong ngaihsun ding uh hi. Hih thu teng paulap in Sunday Nipi, tanloh phamawh cih thukham hongbawl ding uh hi. Tu nipi in I lungngaih khop dingin kong at khiat ahihi. Topa’n mimal kim tungah Sabbath thupha hong buak suk tek tahen!Amen.

Khazih Sungah,

Pastor Kap Lian Thang,

Pyin Oo Lwin

Dated: April 03, 2020