Nakpi-a Pattahna Lauhuai by Khup Khen Thang

Nakpi-a Pattahna Lauhuai
**************
Hilh pilna hun sunga hoih taka a kipantah a hi ding tawh a kibang naupangte a omna innkuan tampi om hi. A hi zongin amaute a len, ngeina paiziate a kisiat ciangin, amaute in a ngaihsutna ding uh, a gamtatna ding uh thei nawn lo in, amau’ thutawmin khensatna nei thei lo thei uh hi. 

Amau’ hih theih zah leh a lungsim un a zawh zah uh tawh kizui-a amau’ thutawma ngaihsutna leh gamtatna a nei thei dinga hoih taka lam lahna lo tawh khangnote nakpi-a pattahna in lungsim leh gamtat thanem mi piangsak ding hi. Amau’ hih theih zah leh a lungsim un a zawh zah tawh kizui-a amau’ thutawma ngaihsutna leh gamtatna a nei thei dinga hoih taka lam lahna panin amaute a ngaihsutna uh khangin, amau leh amau zong kithupi muh thei-in, a siamna uh a zangkhia dingin kimuang thei bek ding uh hi. Amau’ thutawma a gamta dinga mite’ mai ah a hong om uh ciangin, amaute a pil dingin kipantah lo in ganhing bangin kipantah a hih lam hong kilang ding hi. Amau’ utna lungsim pen kimakaih zaw lo in nute pate leh siate’ hilh gamgamna a mang dingin kizawhthawh bawl zaw hi.

Amau’ khut nuai-a om naupangte’ utna leh lungsimte uk zo gawp ing, ci-a a kisial nute pate leh siate in, zawhthawhna leh lau sakna tawh thu a man sakna pan uha a hong khangkhia naupangte' mailam nuntak zia kankhia thei uh hi leh, kisial ngam nawn lo ding uh hi. Tua bang naupangte, nuntak nasep haksate a sem dingin a kiging khol mahmah lo uh hi zaw phial hi. A sangnaupangte uh’ lungsim uk zo gawp ing ci-a a lungkim siate pen tawl khat sung pahtak-huai a bat hangin, nasep a zo mahmah siate hi lo zaw uh hi. [218,219] Amau leh amau kiliansak gemgamin, a thuneihna uh hehpihna om lo in zang guapguap uha, tua bangin a tanote uh leh a sangnaupangte uh’ lungsim la zo lo uh hi. Amaute in a kiang nai uah a tanote uh kaikhawm-in, amaute a itna uh lak hen la, amaute’ hanciamna khempeuh leh a kimawlnate nangawn uah a lawpna uh lakin, naupangte’ lakah naupang bangin khat veivei va om leh, naupangte a lung uh dam mahmah dinga, amaute’ itna leh muanna ngah zaw ding uh hi. Tua hi leh naupangte in a nute a pate uh leh a siate uh’ thuneihna zahtakin, thu hong mang baih zaw ding uh hi. 

Lam khat panin, a nute a pate uh leh a siate uh’ khensatna lo tawh amaute’ thutawm a a gamta dingin khangnote koih khong ding hi lo hi. Thu theisate’ khensatna zahtaka, a nute a pate uh leh a siate uh’ makaihna a mang dingin naupangte hilh ding kisam hi. A nute a pate uh leh a siate uh’ lungsim tawh amaute’ lungsim a kihual dingin hilh ding kisama, amaute’ kuppihna man ding a hoih a hihna zong a muh theihna dingun tua bang mahin hilh kul hi. Tua hi leh a nute a pate uh leh a siate uh’ makaihna khut nuai panin a pai khiat uh ciangin, amaute’ zia-le-tong pen huih muta kivuang pumpeng tawh kibang nawn lo ding hi. 3 T, laimai 132-135.

Biakinn Khak Ngeilo Ding by Sia Khup Khen Thang

Biakinn Khak Ngeilo Ding

(Bangbang apiang zongin biakinn atawntung in kihong thei hi.)

******************

By Sia Khup Khen Thang | March 31, 2020 | Yangon

Tu laitak zavat-pulnatna (covid-19) hangin biakinn, kha’ak ngeiloh ding ahihi. Banghang in maw? Ahangin biakinn ii cih pen innpi hilo in thu um mite ahihi. “Ahizongin note pen Pasian in ahong teelkhiat minam, kumpi siampi pawl, asiangtho minam, Pasian’ mite na hi uh a, khuamial sung panin alamdang mahmah ama khuavak sungah ahong samkhia pa’ nasepna alamdangte agenkhia dingin Pasian in ahong teel mite na hi uh hi”(Peter Masa 2:9). Tua ahih manin Pasian mite aom laisiah, biakinn om a hihi.

Khut tawh kilam innpi or biakinn pi (church building) te pen mun khat ah Pasian biakkhop theihna ding bek ahihi. Tua biakinnpi pen Pasian mite in, munkhat ah Nipi (Sabbath)ni sial in Pasian abiak khop theih den na ding in, Pasian tungah ki-ap ahihi. Tua biakinnpi(church building) bel ki khak thei mah ding hi, ahihangin biakinn taktak ahi, Pasian thu um mite om lai veve in Pasian um in abiak laisiah uh, biakinn ki khak ngeilo ding hi.

Gal leh sa hang, khua hun siatna hang leh lamet loh pi in hong piang lau huaina tuamtuam hangin biakinn pi ( church building) kikhak thei mah ding hi.  February 2020 kim pan in leitung bup ah Pasian biakna dingin kilam, biakinn( church building) tampi kikhak hi.

Nipi(Sabbath) ni in biakinn(church building) ah bang hih I hiam? I lawm te tawh kimu, khat leh khat ki mel theih, la kisa te ngai, lasa, Pasian phat, Pasian thusin na nei, Pasian thu genna ngai, naupang te Lasiangtho tangthu hilh, cih bang dan teng pen biakinn (church building) ah I sep ahihi. Tua ahih leh hih atung aa teng pen natna ki lawh loh nang cih ngimna hangin hong uk kumpi te hong sawlna ahi,  ei guak bek om ding cih sawlna I zuihna, I thu man na in ei bek or I innkuan pih teng tawh hih atung aa biakinn (church building) a isep teng I inn ah I hih theih diam? Hih thei mah hang.

Pawlpi masa lai in Tapidaw te pen a mau inn ciat ah kikhawm den a hih na uh,i tel kul hi. Innkuan pawl khat bel mun khat, inn khat ah ki khawm khawm uh, ahih na zongh, ki mu thei hi. (Rom 16;5; Korin Masa 16:19; Kol.4;15). Tua ahih manin Saul(Paul in a min kikhel) in Tapidaw te bawlsiat dingin azon lai in  “inn khat khit inn khat” ah pai kawikawi in thu um mi, tapidaw te kaikhia in thong sungah koih hi cih kimu thei hi. Bang hangin Saul pen “inn khat khit inn khat” ah pai kawikawi hiam? Ahangin tua teng ah biakinn( thu um mite) om a hih man a hihi.  

Hih thu I genna in biakinn (church building) neihna ahang, I teltheihna ding hi a, tua zong Laisiangtho’ hong hilh mah a hihi. Hih biakinn leh a mun pen Amite in hih mun ah abiak theihna dingun Pasian kiangah ki-ap ngiat mah a hihi. Tua ahih manin Biakinn pi (temple) pen “Pasian’ inn (the house of the Lord) zong ki ci hi. Kammal zatzia kikhel thei hi (Eze. 8:16, Zech 8:9).

Nipi(Sabbath)ni in thu-um mite biakinn (church building) ah pai in kikhawm in Pasian  biak ciang, inn ah om in ei innkuan bek kikhawm, live ki khah te et sangin bel na tampi kisem zo zaw thei hi. Hih biakinn (church building) ah kimuh khopna hangin ki pawl khopna, Pasian nasep nang geel khopna, khat leh khat kitha piakna, Pasianna sep khopna, ki mai ngapna, ki mel theihna, mimal ngiat in bakinn ah kikhop pen Pasian biakna ah ahoihpen ahihi.

Ahizongin lamet hetloh, pelhtheih loh mun leh hun ah hong om takciangin hih covid-19 dan, zavat-pulnatna hong kizelh vat takciangin Pasian’ thu um mite pen ei guak or ih innkuan tek tawh inn ah kikhop akisam a hihi. Nipi(Sabbath) thupha pen Pasian in hong pia veve ding hi. Pasian ei te tawh hong om hi. Pasian in bang ci bangin hong kamciam hiam cih leh Isaiah 58:13,14 ah “Note in Sabbath siangtho sakin, Keima ni sianghto ni-in, na nasepna pan-un khawlin Sabbath ni pen deihhuai sa in, Topa’ ni sianghto pen pahtawihuai na cih uh a, note in pahtawi-in note’ deih bang zui loin, note’ ut bang hilo in motpau loin na om uh leh, Kei mah biakna hangin lungdamna na ngah ding uh a, leitung khempeuhah pahtawina kong ngahsak ding hi. Na pu uh Jakob tungah ka piak leitang luahin nuam nasa ding uh hi. Topa ahi, Keimah in hih thu ka gen khin hi” aci hi.  

Bek tham lo in Zeisu in bang ci bangin hong kamciam hiam cih leh “Keima minin mi nih le thum bek nangawn akikhopna peuhpeuh ah kei ka om hi” (Matt.18:20) ci hi. Hih Covid-19 hangin nang bek na hi a, innkuan tawh na hi phial zongin Pasian na biakna ah Amah hong om hi. Amah pen Tuucing hoih pa (John 10:11) hi a, nang tawh hong om khawm ding hi. Nungzui Johan zong, patmos tuikhulh (Mangmuhna 1;10)ah om pih hi. Tua a hih manin biakinn ( thu um mite) kikhak ngei lo leh ki khak theilo hi. Bang hang  hiam cih leh nang Pasian biakinn na hi a, Khazih in tua biakinn lutang ahihi ( Efesa 5:23; Kol.1:18).

(Hih pen Dr. Richard Sabuin, Education Director, Northern Asia-Pacific Division at hi a, NSD te’ website la in lai at pa deihna manglo ding leh ei tawh kituak dingin kam kilet a hihi)

Pastor Installation leh Elder Ordained Tawh Kisai by Sia Khup Khen Thang

Pastor Installation leh Elder Ordained Tawh Kisai

By Sia Khup Khen Thang

Thukong honna

Hih atung athu lutawh kisai in Zomi SDA sungah nasep dan leh pawlpi sung, kivai puakzia tawh kisai in I tel beh ding leh nasep dan atang zaizawkna ding, lunggulh na tawh kong at khiat ahihi. Laisiangtho tungtawn leh church manual dap-phah in mimal muhdan kong at khiat hi a, I lungsim leh deihdan tawh aki tuak lo aom leh zong, pawlpi ai tangin kong at hilo in, mimal in pawlpi khantohna ding lunggulhna tawh kong at ahih manin hong ngai dam unla, adik loh a om te Laisiangtho leh Church manual tawh hong hilh beh un ci in hong thum masa ingh. I pawlpi sungah Upa (Elder) te’ tungah khut ngakna tawh kisai in mipi in isan zawh loh tampi om leh I tel nailoh tampi om a hih manin hanciam in hong at ka hihi. Tua upa(elder) khutngak vai igen ma in ki-ukzia kimakaih zia tawmcik gen suk masa phot ni.

Pawlpi kem Sia leh Pawlpi Upa te

Mi pawlkhat te in pawldang te ah pawlpi upa te-in sia te sangin thu nei zaw leh sai zaw in a-om-na uh, mu tek ahih manin upa te-in sia te asai nuam, sia te a ut bangin ahei-nuam pawl-khat ki om leuleu hi. Tua bang pen SDA pawlpi sungah om lo leh kizangh lo ahih na pen itheih ding thupi leh akisam mahmah khat ahihi.

Khuatual sia(Local church pastor) te in pen Circle leader te thu man kul a, Circle leader te in section makai te thu man kul hi. Tua bangin vai kipua suk diudeu hi. Circle leader (akl) church pastor te in section ulian te sangin thunei zaw lo hi. Tua mah bangin khuatual church pastor te ahuh dingin khuatual upa(elder) te hia, khuatual upa (elder) te in khuatual sia (church pastor)sangin thu nei zaw lo in uk ding, sai ding cih hilo hi, cih itheih tek ding kisam hi. Ahizongin khat leh khat nasep na ah kitelsiam nang in kipulak ki theihsakna pen mipi cing khat I sepna ahihi. Khuatual pastor in ngimna, geelna te khempeuh mailam kalsuan zia ding te tawh kisai in upate leh pawlpi upa, makai te tawh ki thutuak in geel khawm, sem khawm ding uh hi (19^th Edition of Seventh-day Adventist Church Manual p. 32, 2005). Khuatual Pastor  in Church Board chairman sem man lo, thu khat peuhpeuh hangin a hih theih kei leh bek, khuatual upa (elder) in Church Board Chairman sem thei bek ding hi (19^th Edition of Seventh-day Adventist Church Manual p. 74, 2005).

Lasiangtho sungah Upa

Upa khut ngakna tawh kisai in Laisiangtho sungah Peter te Paul te, Pasian nasepna, thu genna tawh buai lua uh a hih manun pawlpi te a kem dingin upa dingin mipi ii muan, khalam vai, pilna vai, innkuan sung vai, nek leh dawn vai, akipan pau bang lo te teelsak in pawlpi makaih dingin Peter te, Paul te in khutnga in mipi mai ah thu ngetsak uh hi. Amau sangin lian zaw, a mau asai kik ding in thu ngetsak leh a tel uh hilo a, amau om loh kal in pawlpi mite, athelthang lohna dingin akem ding in akoih uh a hihi. Tuhun ciangin Peter te, Paul te bangin sia khempeuh evangelist Pasian thu gen vak-kawn sia in kipai theilo leh ki pai zolo a, Peter te, Paul te hun lai a, pawlpi upa (elder) te dinmun ah tulaitak sia te ki om zaw hi. (1 Timothy 3:1-7; Titus 1:5, 7; Acts 20:17, 28 1 Peter 5:1-2; 1 Tim. 5:17, James 5:14,  1 Peter 5:1–2; Acts 15:22; 1 Tim. 4:14)

Africa Gam Lamah Upa kizatzia

Ei SDA pawlpi sungah upa(elder) tawh kisai in atam zaw in buaina aom loh hangin aom na om zeuhzeuh ta hi. Tua manin hih upa tawh kisai in Africa gam lam ah pen pawlpi tam in pawlpi khat ah pawlpi kemsia khat ta, I pawlpi in koih zo lo a hih manin, peter te, paul te hun lai bang mah in hih Laisiangtho tawh a kituak(1 Timothy 3:1-7; Titus 1:5, 7; Acts 20:17, 28 1 Peter 5:1-2; 1 Tim. 5:17, James 5:14,  1 Peter 5:1–2; Acts 15:22; 1 Tim. 4:14) upa tel uh a, tua upa te pen khutngakna pia in khuatual pawlpi sung bek ah, nau ap ding, sih vui ding, nek khawm piak ding, tuiphum ding cih te akisap na mun ah Circle pa leh tungsiah I makaihna, phalna, sawlna zui in nasem dingin khutngakna (ordained) kipia  ahihi.

Church Manual License tawh kisai

I pawlpi in licese nam 5 kinei in tua license te pen hunbit sia (regular worker) te bek kipia in anuai a bang a hihi.

1.                       Missionary License

2.                       Ministerial License

3.                      Missionary Credential

4.                      Ministerial Credential

5.                      Honary or Merit

Hih License nam 5 tawh kisai a nuai ah akitel zaw deuh dingin hong at beh nuam ingh.

1)   Missionary license pen regular ngahsa sia te bek mah kipia in tua sia te pen sangsia, zum nasem sia te leh pawlpi apanpih kipawlna ah nasem te kipia hi.

2)   Ministerial License zong pen regular ngahsa sia te bek mah kipia bek in tua sia te pen  aphadiak in church pastor sem te, Lasiangtho lam a hilh diak te, evangelist lam a sem diak sia te kipia bek hi.

3)   Missionary Credential license pen Missionary license lensa sia te pen ana sep uh a kum tam toh ciangin akipia license a hihi.

4)   Ministerial Credential pen Ordained ngah Pastor te I tawi, license ahihi.

5)   Honary or Merit license pen Ordained Pastor (Ministerial Credential) ngahsa sia te a pension lak khit uh ciangin hih license kipia hi.

Missionary License leh Missionary Credential

Tua a hih manin Missionary license len te in pen nasep laih in a license uh, Ministerial License ah a kilaih masiah, Ordained pastor kipia thei lo in nasep a kum tam ciangin License numbat 3 na ahi, Missionary Credential kipia  hi. Tua hi a, Church pastor sem lo sia te pen kum tampi sem in pension ala phial uh zongin Ordained Pastor (Ministerial Credential)  kipia theilo in Missionary Credential tawh pension la uh hi. Tua hi a, numbat 1 pan in nambat 3 na, Missionary License pan Missionary Credential kilaih to thei bek in amau ki unau uh hi. (19^th Edition of Seventh-day Adventist Church Manual p. 34-35, 2005).

Ministerial License leh Ministerial Credential

Tua khit ciangin Ministerial License ngah khit ciangin nasep na leh lawhcin na ki-apna tawh kizui in Ordained ngah na ding, lampi om zaw diak a, Ordained Pastor te tawi license pen atung ah number 4 na, Ministerial Credential ahihi. Tua ciangin Numbat 2 na pan in Numbat 4 na kipia thei bek a hih manin Ordained ngah nuam te in Numbat 2 na tawh kisai diak nasep te sep kul hi. Missionary License leh Missionary Credential tawi a, Ordained ngah nuam te in pen a nasep uh laih in Numbat 2 na Ministerial License tawi kul a, tua khit teh ki apna, lawhcin na, tungtawn in Ordained Pastor (Ministerial Credential) kipia thei pan hi. (19^th Edition of Seventh-day Adventist Church Manual p. 34-35, 2005).

Honary or Merit

Hih Honary or Merit license pen Ordained Pastor (Ministerial Credential) ngahsa sia te a pension lak khit uh ciangin hih license akipiakna pen pawlpi khasum sawm ah khat mah ne in pawlpi khantohna dingin kipia hi bek hi a, tungsiah pan in tungsiah pan phalna, sawlna leh active pastor te in huhna ngen a hih kei leh amau thu in siampia nasep kisem sak lo hi. (19^th Edition of Seventh-day Adventist Church Manual p. 34-35, 2005).

Upa Khutngakna (Elder Ordained)

Tua hi a, I pawlpi in License pastor te pen khuatual pawlpi kem (church pastor) dingin ahun zui in kisawl leh kisem sak a hih manin tua bang license pastor te adingin lampi honsak na dingin amau te pen local elder in telloh pha mawh in tua akitel khit ciangin Ordained pastor  (circle leader) te in khut ngakna nei in khuatual pawlpi sung bek ah, nau ap ding, sih vui ding, nek khawm pia thei in  tuiphum ding pen tungsiah te in phalna ngen in ahal uh leh tuiphum thei a, Circle leader pa leh tungsiah I makaihna, phalna, sawlna zui in na asem dingin khutngakna (ordained) kipia ding hi. Ahizongin hi bang a khut kinga sia te in nupa kiteng sak (let-that) theilo uh uh hi. A tung a, licensed pastor te khuatual elder in tel a, khut ngak thu ngetsak khit teh asep theih teng uh pen tua khuatual pawlpi bek mah ah sem thei uh a, upa in a kitel hun sung bek mah in sem thei a, mundang pawlpi tuamtuam ah sem thei lo uh hi. Hih khuatual elder dingin license tawi church pastor te akitel mah bangin ahuh ding khuatual pawlpi mi te lak pan in upa nihna ding kitel beh thei hi. Tua manin hi bang azangh pawlpi te in upa khat na, upa nih na cih bang  nei uh hi. (19^th Edition of Seventh-day Adventist Church Manual p. 33, 74, 2005).

Tungsiah phalna kisam

Hih atung a, licensed pastor te khuatual upa dingin tel in asepna khua tual ah siampi nasep asep theih ding tawh ki sai pen Section  (Mission) in phal kul a, section khit teh Union level in phal kul a, Union khit ah Division in zong phal kul hi. (19^th Edition of Seventh-day Adventist Church Manual p. 33,74, 2005).  Ahizongin hih tawh kisai in ei Division ahi, Southern Asia Pacific Division (SSD) in phal a, kawlgam union sim loh union dang te in zangh uh hi. Kawl gam union  leh section level in hih policy koi ci ciangin adopted hiam cih o cih pen  kei mimal in kakan beh lai tak a hihi.

North American Division (NAD) Te in Zangh

USA a om Zomi SDA pastor te pen hunbit sia (regular worker) ahi, khat leh nih bek om uh a, a tam zaw pen cialtawm (contract worker) hi uh in atung aa, I gen, license tuamtuam zong atawi, aom phial zongin khat leh nih val om nai lo ding uh hi. Ahi zong hih policy tungtawn in pau kibat lohna, ngeina kibat loh na hangin North American Division(NAD) nuai a om, union level, secion (Mission/conference) level in atuam ngaihsut sak in amau local ciat ah hih Elder Ordained din mun tawh group Makai, company Makai sia te pen pawlpi mite mai ah pastor installation ci in khut nga in thu ngetsak uh a, no hong makaih ding, na siapa ding uh hi ci in mipi mai ah pulakna nei uh ahih manin pawlpi mite in sang thei kim lel uh hi. Tua sia te zong Pastor mah kici pah lel uh hi. Amau sep theih na in amau khuatual pawlpi bek mah ah sem thei bek uh a, mudang pawlpi te leh kawlgam cih te aki pan ah tuiphum thei nek khawm pia thei lo uh hi. Mikang te khut nuai ah om in I ngeina ki bang dek lo a hih manin tungsiah te in a hih theih nak leh hun pai man lo, ong buai pih man lo uh a hih manin septheihna apiak thieh teng uh pia lel uh hi. Amau pen atung a, license numbat 1 pan 5 kikal avek un nei mang uh cihna hi tuan lo hi. Hih  bangin siampi nasep (pastoral work) apiak na hang un, siate in nasep hanciam zaw tham pah uh in nek khawm pia pah, tuiphum pah, nau ap, cih te hih theih pah uh a hih manin ki ap zaw hanciam zaw uh hi ci in ka mu hi.  

Thukhupna

Hih tawh kisai in kawlgam in limtak in ki zangh nai lo ahih manin  Mipi in a sansiam nang zong baih pah lo ding hi. Ahizongin siapi te in khut nga in na pastor pa un hi teng hong sem ding hi ci-in pastor installation mipi mai ah nei hileng, ki sang siam pah lel dingin lamen ingh. Church Manual in zong phal in hongsawl zaw lai hi cih I ki thei sak hi.  Hih dan in zangh thei leng pen neek khawm ne kha lo, Circle leader te khut tung bek ngak in neek khawm nek ding, ngak ngeungau kul lo in nasep nuam tuam ding a, cirlcle leader te zong, vanzaang tuam in licensed pastor te zong, Ordained Pastor lunggulh ngeungau in lungkia thanem, kha tem in om lo zaw deuh ding a, amau kha mat te tuiphum thei, nek khawm pia thei pah ding uh ahih manin thalawp tuam in nasep na ki lawh cing zaw dingin ka lamen hi. Bek tham lo in Ordained Pastor ngah na dingin zong kisin khol leh sem khol to to a hih manin hih licensed Pastor te pen Ordained asawt lo in piak loh pha mawh zah dong dingin hong lawhcing leh hong hanciam ding uh hi cih kei mimal muhna ahihi. Tua ciangin zongh, i church manual i et takciangin "upa te ngiat te in hi dan siampi za sem ding cih sawlna hi lo zaw in i sia te kizat theih na dingin azaizaw in lampi honsakna hi" ci ahih manin zat pah huai leh aki zatna mun te ah khangto zaw hi cih zong kei mimal in ka mu sawn hi.

 

Khazih Sungah,

Sia Khup Khen Thang

Yangon.

Dated: March 29, 2020