HUN NUNUNG A DING KIGINKHOLNA

Hun Nunung a ding Kiginkholhna
 
Gimna hun hong tun ciangin, eite khuapi leh khuaneu pan in ih tai khia ding hi. Mi siangtho'te inn sung ah lut in, namsau tawh a thahsawm mi gilote in eite hong delh ding uh hi. A hih hangin, amau te in a namsaute uh dok khia in eite hong sat sawm ciang in, a namsaute uh ki ciak in bangmah kimang lo buhtu bang lel ding hi. Tua ciangin eite sun leh zan in Pasian kiang ah hong hotkhiatna ding in ih kiko ding a, i kahna te Pasian kiang tung ding hi. Ni hong suak in khapi hong khawlcip ding hi. Luitui luangte zong khawl ding a, meii sah pi leh khuazing hong tung in, khuazin luat manin khat leh khat ki nawk kha gawp ding hi.
Lei leh van aling sak Pasian aw, luitui tampi luang aw tawh a ki bang hong tun ciangin a vangliatna tawh a tang silsial mun khat om ding hi. Vantung hong ki hong zel kikhak zel ding a, buaina lianpi hong om ding hi. Mualpite pen singkung no huih in a nawk bangin ling ding uh a, suakpite zong hong kilawm mang ding uh hi. Tuipi pen bel sung a tui bangin hong so dinga, tuipi sung a suangpi te leitung ah hong lawnkhia ding hi.Pasian in Zeisu hong kumkik ding a ni leh a hun hong gen mah bangin , thuciamna a bawpih Amite hon khia in , a kammal khat pau bek zong leitung bup thawn mang ding hi.
Pasian' mi a hi Isarael te in, amit uh tunglam suan in Jehovah kammalte a ngai ding uh a, tua aw in khuapi gin ngaih pen bangin leitung bup thawn mang ding hi. Hih in mulkim huai mah mah leh zahtak baang mah mah ding hi.
Pasian kammal khat a pau khit sim in, misiangtho te in , " Topa Vanglian hi, Haleluijah" ci in awng ding uh hi. Amaute thukim pih na in Pasian Vangliatna hong tang pem pem ding a, tua khuavak taang pen Moses in Sinai maultung pan hong tuahsuk tung bangin tang ding hi. Mi gilote in tua vangliatna taang en ngam lo ding uh hi. Pasian min a thangsak leh Topa' ni siangtho a hi, Sabbath ni siangtho tak a tangte tung ah a bei theilo thupha tangkona a om lai tak in , Sapi leh a lim tung ah gualzawhna aw ngaihpi zong hong ki tangko hi. ( Early Writings 34.1)

PAWLPI THU LAMLAK (BU NIHNA ) by Ellen G White

PAWLPI THU LAMLAK (BU NIHNA )

KHAWKPI 35
KHANGNOTE HANTHOTNA

            Kong it khangnote aw, na vawh bangbang uh na at kik ding uh hi. Tu laitak na vawh hun uh ahi hi. Bang at kik ding na hi uh hiam? Bang khaici vawh na hi uh hiam? Na pau khiat khempeuh uh, na sep khiat khempeuh uh, khaici hi paha, a sia a hih kei leh a pha hong gahkhia-in, a vawhte’a dingin dahna a hih kei leh nuamna hong piangsak ding hi. Khaici a kivawh bangbang a gah hong piang ding hi. Pasian in khawvak lianpi leh hamphatna tampi note hong pia hi. Tua khawvak hong kipiak khiata, na mai uh ah a lauhuaite hong kilah tel khit nungsang no’ tavuan hong suak hi. Pasian in note a hong piak khawvak na bawldan uh tawh kizui-in lunggimna a hih kei leh lungnopna na ngah ding uh hi. Nomau mah in na masuan ding uh a khuat ding na hi uh hi.         
            Na vekpi un midangte’ lungsim leh zia-le-tong tungah a sialam a hih kei leh a phalamin huzap na nei uh hi. Tua na huzapna bangbang uh vantung laibu sungah kiciamteh hi. Vantungmi in hong vila, na kampau na gamtatte uh ciamteh hi. Zingsang na thawh ciangin, na cimawhna leh Pasian kiang pan hatna kisam na hih lam na phawk hiam? Kiniam khiatin, lungsim tak tawh na kisapnate vana na Pa’ kiangah na ko hiam? Na koh leh  vantungmi in na thungetnate na ciamteh ding hi. Tua na thungetnate zuau pipi a hih kei nak leh, khialhna a hih lam thei lo-a na bawl khak ding, midangte a khialsak dinga huzap na neihkhak ding ciangin, ong cing vantungmi na kiangah hong omin, a hoih zaw ding hong hilhin, na kampau ding hong teelsakin, na gamtat ding hong bawlsak ding hi.
            Lauhuaina na phawk kei-a, mawhzolnate na dona ding huhna leh hatna na nget kei leh, lam na pial takpi ding hi. Na tavuan na awlmawh lohna vantunga Pasian’ laibu sungah kiciamteh dinga, sittelna ni ciangin cing lo in na om ding hi.     
            Biaknalam-a kipantah ngeisa mi pawl khat na kiimah oma, a nuntakna taktak uh a kisiat gawp dong a noptat, a zualzang, a kiphat leh a kipahtawi mi pawl khat zong CC-16 [209] om hi. A mi ka theih tektekte’ thu hong gen ka hi hi. A gamtatnate uh noptatna, kiphatna Ieh thadahna tawh kisia gawp a hih manin a kimanna uh om lo hi. Tu-a a nuntakna mahmah uh a kimanna om kei leh, mi khempeuh siangtho—a a kiciatna, mi khempeuh zia-le-tong a kibatna mun ah nuntak ding lamen thei mawk ding i hiam? Tun mite’a dingin thu ka ngen hi. Amaute’ kiangah zong ka gen hi. Kiphatsakna, kizep nopna leh tawntung nopsakna dingte don lohna lamah midangte a tunpih dingin a maute in huzap nei uh a hih lam ka mu hi. A  gamtatnate uh kidawma, a kiphatsakna lungsim uh panin Pasian’ mai ah kiniam khiata, a mawhnate uh pulaaka, a kikhel  uh leh bek, amaute’a dingin lametna om hi. 3 T, Iaimai 363,364.

Khalam Nate Lawpna Khangsak Un

            Vil gige-a  kiniamkhiatna tawh  thungetna bek ah Khangnote’a dingin lungmuan om hi. Tua lopi—in Khristian a hi thei dingin kingaihsun mawkmawk kei uh hen. Gamlaka Khris a khem lai-a a hihdan mah bangin Satan in a mi zolna leh a mi khemnate khawvak nuai ah seel hi. Tua ciangin amah vantungmi bangin hong kilang  hi. Vantung pana lengla bangin i kha’ galpa hong  pai ding a hih manin, pilvanga navak taka omna bek mah muanhuai hi ci-in sawltakpa in hong gen hi. Kidawm lo in mawk gamtata, a Khristian tavuan a don lote, Khris a gualzawh banga a gualzawh uh sangsikin, galpa’ khemna sungah puk den zaw uh hi. 3 T, laimai 374.  
            Mi tampi Topa’ lamah a omin kigen uha, a hih hangin om lo uh hi.  A gamtatna khempeuh uh Satan’ lamah kai zaw hi. Kua lamah om zaw cih bang tawh theithei ding i hiam? I lungsim ah kua om hiam? Kua ngaihsut belin nei i hiam? Kua’ thu gengen nuam i hiam? Kua ngai bela, kua’a  dingin i thatang zang  i hiam? Topa’ lamah a om i hi leh, i lungsim ah Amah bek om in, Amah bek ngaihsutin i nei ding hi.  Leitung tawh kilawmtatna i nei kei ding hi. Ei mahmah leh i neihsa khempeuh Topa’ tuangah i ap ding hi. Ama [209,210]  lim pua nuamin, Ama Kha nei nuamin, Ama deihbang sem nuamin, na khempeuh ah Amah i lungdamsak nuam ding hi.  
            Pilna maan in, phattuamna a piangsak dinga i siamnate zat khiatna ahi hi. Leitunglamah i khuak hatna, i guh’ hatna leh i tha’ hatnate zang  napi-in bang hangin biaknalam thudon lo mawk i hiam?  I pum bup-i hatna teng tualamah a kai zawk man ahi hi. Leitung tawh kipawl nate ah i hatna khempeuh  a zang dingin kipantah khin i hih man in lungsim in zong tualam mah zuih nopsa zaw pah hi. Tua a hih manin Khristiante in  biakna nuntak haksa-sa-in,  leitung tawh kipawl nuntakna baihlamsa uh hi. A  siamnate uh tualama zat dingin kipantah khin uh hi. Biaknalam nuntakna ah Pasian’ Thu a maanna a phawk teei uh hangin, a nuntakna sung uah zangkhia lo uh hi.      
            Pil sin-na ah biaknalam ngaihsutna leh Pasian biak nopnate kihel lo mawk hi. Tuate in pumpi bup a uk ding hi zaw hi. A hoih gamtatna kingeina seh ding kisam hi. Ut hun khat ciangin  hoih tat pak bek in, Pasian  tawh kisai nate ngaihsut gige ding pen ngeina-in kinei lo hi.        
            Sianthona a deih dingin lungsim pantaha kiseksak kul hi. Khalam nate a deih dingin kihanthot kul hi. Hehpihna leh thumaan theihna ah na khantoh nop leh na kihansuah kul hi. Hoih ding leh siantho ding utna pen a hoih ahi hi. A hi zongin utna bek tawh a khawl leh a phattuamna om lo hi. Ngimna hoih zong a hoih a hih hangin, a kisep khiat kei leh a phattuamna om lo hi. Mi tampite Khristian a hi dinga a kilamet uh hangin mangthang ding uh hi. Hanciamna nei lo uh a hih man in tawikhaina tawh kikhai dinga, leek zo lo ding uh hi. Utna pen a hoih lamah zat kul hi. Lungsim taktak tawh Khristian ka hi nuam hi. Kicing itna a dung leh a vai, a sanna leh a thuukna ka thei nuam hi. Jesu kammal ngai in: "Dik tatna a duh a deihte hampha hi, amaute kivak kham ding hi." Matthai 5:6. Diktatna a duh a deihmite a lungkim sakna ding vaihawmna Khris in nei zo hi. 2 T, laimai 262-266. [210 211]

Khalam Dinmun Sang Zaw Zam In

            Itna siangtho in dinmun a sang zaw hong puakin, Pasian’ thute theihtheihna hong khangsak dinga, a kicing lopi-in hong lungkimsak mawk lo ding hi. Khristian hi’ng a ci mi a tam zaw in, a kisia thei leitung nate a ngahna ding uha a hanciam zahun Pasian’ thute a theihtheihna dingun lawpin, kinin hanciam uh hi leh a ngah ding uh khalam hatna pen phawk kha lo uh hi. Khristian hi’ng a ci mihonpite khalam ah a tun tom ding mahin lungkim uh hi. Pasian’ Gam leh Ama dikna zon masak dingin ngaihsun lo uh hi. Tua a hih manin Pasian biaknalamah nopsakna pen amau’a dingin thu thukpi khat suaka, amaute in tel zo lo uh hi. Amaute in theihna kician tak tawh Khris theikha lo uh hi.                  
            Pasian’ thute ah tun tom-a khelbai banga a omna uh tawh a lungkim mite a numei a pasalin thakhatin vantung kipuak to hen la, tua lai-a a om a sang a siangtho kicinna — mi khempeuh a ki-itna, mai suah khempeuh a lungdamna, Pasian leh Tuuno pahtawina a ngaih a kilem mahmah late a kisakna, tokhom tunga tu Pa’ maitang leh Tuuno kiang pana mi siangthote’ tungah khawvak a taan denna mun kimusak vat leh, a sang zaw leh a lian zaw lungdamna a ngah ding uh om lai a hih lam kitheisak leh, Pasian’ nopsakna amau zong hong ngah zaw dinga, gen zawh loha a bei thei lo thupina leh nopsakna panin nopsakna a thak leh a lian zaw hong ngah thei ding uh a hihteh tua bang mite zong vantungmite lakah omin, a la uh sakpihin, Pasian leh Tuuno’ kiang pana hong tangkhia a siangtho vangliatna amaute in a thuak zo ding uh hiam? ci-in ka dong hi. Hi thei lo ding hi. Vantung kampau a theihtheihna ding un, “leitung lunggulhna kihhuaite tawh kipelha, Pasian’ pianzia” a puak theihna dingun amaute’a ding hunpha kum tampi kikhan to zo hi (2 Peter 1:4). A lungsim uh leh a pumpi uh’ hatna a zatna ding un amaute in duhhop nasepna nei uh hi. Sit nei lo-a Pasian’ na sep ding hanciam nuam lo uha, tua pen masuanin nei lo uh hi. Leitung vaite thu masa—in koihin, a hatna khempeuh uh zang uha, Pasian’ thu [211,212] a ngaihsut hun uh tawm mahmah hi. “A siangthote siangtho lai ta hen, a kihhuaite kihhuai lai ta hen,” cih khensatna nunung khit ciangin tua bangte kikhel thei nawn se ding hiam? Tua hun hong tung ding hi. Khalam thute ah nuam a sa dinga a lungsim a pantah mite, laak tohna a ngah dingte hi uha, van pana a tang sesa vanglianpi tawh a kisusia dingte hi lo uh hi. Lai siamna zong na neikha ding hi. Lasak siamin, laigelh zong na siam kha ding hi. Na tatzia in na lawmte lungkimsak kha ding hi. A hi zongin tuate in vantung a dingin hong kiging kholsak hiam? Pasian’ thukhenna lianpi ah na din theina dingin, tuate in bang hong huh thei hiam? 2T, laimai 266,267.

Vantung Zia-le-tong Leitung Ah Ngah Kul

Theikhial kei un. Pasian a kikhem thei ding hi lo hi. Sianthona longal bangmah dangin vantung a dingin hong kiging khol theisak lo ding hi. A siangtho gamtat hoih hong nei saka, a kineh thei lo khuavak sunga a om Pasian’ omna sung a hong tumsak thei ding pen cihtakna tawh Pasian zahtakna bek ahi hi. Vantung zia-le-tong leitung ah ngah kula, tua lo in cikmaha kingah ngei ding hi lo hi. Tu laitak sanga a baih zawa na hanciam thei ding hun a hong tung dingin ngaihsun khakei in. Pasian tawh na kigamlatna nisimin khangkhang hi. Na hanciam ngei zah sanga a kan zawin a tawntung’a ding kiging khol in. Lai Siangtho a kin ding, thunget kikhop a lawp ding, Pasian’ thu lungngaih hun nuam a sa ding leh, Pasian tawh kikholh hun nuam a sa zaw kan lai dingin na lungsim pantah in. Vantunga om lapawl sungah na kihel nop leh vantung thu bek ngaihsutin nei in. 2T, laimai 267,268.

Pasian’ Hong Itna Sang In

            Beersheba-a a mangmuhna sunga a kisawlna thu manga Izak tawh khual a zin a citak Abraham ka phawk kik hi. Biakpiakna mun ding kong lak ding hi ci-a Pasian in amah a gensa mual ama’n hong galmuh hi. Pasian in sawl a hih manin, hehpihna a nei a pa in khut ling kawmsa-in Izak hen hi. A pa’ cihtakna mu[212] a hih manin a tapa zong a kithah ding ut hi. Na khempeuh kisa khol khina, a pa’ upna leh a tapa’ kipiakna, a kisittel khit ciangin, a tapa a thahna dinga Abraham in a liik toh khut pen Pasian’  vantungmi in khawl sakin, pha zo hi ci hi. “Tu-in, tapa khat na neihsun hong haza lo na hih manin, Pasian zahtak takpi na hih lam ka thei hi.” Piancilna 22:12.   
            Eite’ phattuamna dingin hih Abraham’ upna a kilat khiatna na kiciamteh hi. Bang zahta-in haksa-in dahhuai ta se leh, Pasian‘ hong sawlnate ah lungmuanna i neih ding hih thu in hong hilh hi. Tate in a nute a pate uh leh Pasian’ thu a manna ding uh zong hong hilh lai hi. Pasian’ tungah i piak ding bangmah a pammaih om lo a hih lam zong tua Abraham’ thumanna in eite hong hilh hi.             
            Simmawhna, bawlsiatna, zawnna, gimna, kosiatna  leh singlamteh tunga sihna a thuak dingin Pasian in a Tapa phal hi. A hi zongin tua mun ah: ‘Pha zo hi, Ka Tapa aw, Nang’ sih kul nawn kei,” ci-a lungdam thu a puak ding  vantungmi om lo hi. Izak tungtang mah bangin Ama zumhuai sihna ding panin a tawp khakna ah Pasian in a dal ding, vantungmi honpite in lamenin dahna tawh ngak uh hi. Pasian’ Tapa’ kiangah tua bang thu a puak dingin vantungmite kipaisak lo hi. Thukhenna zum panin Kalvari mual dong mah kisimmawhbawl lai hi. Kizahko-in, kikhelbawlin, kicilphih hi. Sianglamteh tungah a lu kuunna a sih dong mah Amah a mudahte’ nuihsatna, nehpikna leh kosiatnate thuak hi.                   
            Hi bang gimna a thuak dinga A Tapa a hong piakna sanga  a nasia zawin Pasian in hong itna hong lak thei nawn ding hiam? Pasian in mihing a hong piak pen a khawnkhong a kicing Ama hong itna a hih mah bangin, Amah in ei’ tung pan in i muanna, i thumanna, i lungsim buppi leh i lawpna khempeuh zong a kicing mah hong ngen hi. Mihingin i piak theih ding khempeuh Ama’n hong ngen hi. Ei’ kipiakna pen Ama hong silpiak tawh a kikhaikim a hih kul hi. Kim takin a kisam omsak lo ding hi hang. Pasian’ tungah leibate i hi hi. Ei mahmah a kima utna tawh i kipiakna lo tawh a hi thei lo ding thu Ama’n ei’ tung pan hong kal hi. [213] Utna tawh thuman lianlianna hong kal hi. Tua hi kei leh Ama’n hong sang lo ding hi. Tu mahmahin Pasian’ hong itna leh pahtakna i ngah thei ding hi. Hi lai a sim mi kimkhatte’a dingin tu kum pen kum nunung hi thei ding hi. Lungsim takpi tawh zonga Ama deihna lungdam taka a sem mite Khris in a piak lungnopna sanga leitung gualnopna a teel zaw, hih hanthotna a sim khangnote’ lakah khat peuh na om kha uh hiam? 3 T, laimai 368-370.

Hong Kitawikhai Hi

            Pasian in i zia i tongte, i gamtatnate leh i lungsimte, biakinn-a tawikhaina tawh hong khai hi. I lungsimte Ama lamah hong kaina dinga singlamteh tunga a si, hong Tanpa in ki-itna leh thumanna ah na leek zo kei uh hi, a hong cih ding lauhuai mahmah hi. A lian a manpha silpiakte Pasian in ei hong pia hi. Lam khiala khawmial sungah i pai lohna dingin khawvak leh Ama deihna theihtheihna ei hong pia hi. A nunung thukhensatna ah hong kitawikhai-a, leek zo lo-a, a lauhuai thaman i ngah ding pen, a kibawl kik thei ngei lo ding a kihtak-huai khialhna  ahi hi. Khangnote aw, Pasian’ laibu sungah na minte uh muh zawh lohin a om kha diam?                              
            Amah tawh nasemkhawm na suahna dingin Pasian in Ama a ding nasep khat nang hong guan hi. Na kim na pamah hot khiat ding mite om hi. Na hansuah theih ding, hanciama na sepna tawh thupha na ngahsak theih ding mi tampi om hi. Mawhna panin dikna lamah mite na hei thei ding hi. Pasian in thu hong sit ding a hih lam na theih ciangin, thungetna ah cihtakna a kisaplam leh, Satan’ khemnate do dinga vil cinten ding a kisapna na phawk ding hi. Khristian taktak na hih leh, thadah zualzanga kizepna tawh kiphasaka na om sangin, leitung khawmial gamtatnate’ hangin na tau nuam zaw ding hi. Gam sunga a kibawl kihhuainate’ hanga khuisa-a a kapte’ lakah na kihel ding hi. Kihihsaka, kizuuna, mi’ muh ding bek-a kizem dinga Satan hong zolnate na nial ding hi. A thupi masuante don lo-a hih a gina [213,214]  lo nate a kin dingin lungsimte kawcikin pilna zong tawm hi.          
            Ut hi le uh tu huna khangnote Khris tawh nasemte hi ding uh hi. Tua banga sepna tawh a upna uh khauh-in Pasian’ thu a theihna uh khang ding hi. Tupna hoih khempeuh leh a hoiha gamtatna khempeuh nuntakna laibu sungah kiciamteh hi. Amau lungkimna ding beka a nuntakna uh leh, tulai nuntak gina lo tawh a pilna uh a hai sakna uh pen mawhna lian a hih lam khangnote ka mu theisak, ka phawk theisak nuam mahmah hi. A ngaihsutnate uh leh a kampaunate uh, hi leitunga a gina lo a a lawphuaite' tungah amaute in laam to nuam uh hen la, Pasian’ min than sakna ding tupin nei le-uh, thu theihna khempeuh a pailet Ama lungnopna pen a-mau’a ding ahi hi. 3 T, laimai 370,371.    
            Pasian in khangnote, lawpna lungsim a nei mite a hih ding, Ama na sepna ah a diang pah lianlian ding leh sep ding a om peuh a sem dingin deih hi. Pasian’ minthang saka mihingte’ tungah thupha a tunsak theihna dingun, amaute’ mai-a om kidona hang taka a do ngam ding, a tangzang a galhang, lungsim siangtho a nei khangnote Pasian in cial hi. Khangnote in Lai Siangtho bek mah sinin nei nuamin, a lunggulhna hoih lote uh beisak nuam uh hen la, amau a Piangsakpa leh a Tan-pa uh’ thu ngai uh hi leh amaute Pisian tawh kilem bek tham lo in, amau mahmah mi-thupisuak ding uh hi.   
            Na paina khempeuh ah khawvak keng in. Khensatna mel a nei lo na hih loh lam, kholhpih hoihlote’ zolna a zui pahpah lo na hih lam, tupna kician a nei na hih lam kilangsak in. Pasian‘ min a daisak mite’ thugenna a mang pahpah dingin om ke’n la, siatna panin mite a puahpha, a samkhia leh a honkhia dingin hanciam zaw in.
            Thungetna muang in. Amau leh amau a kilangpan mite, lungnemna leh kiniamkhiatna tawh zol in. Khialhna pana mi khat honkhia-a, Khris’ dialkhai nuai tun-pihna in, vantung ah lungdamna piangsakin, na lungdamna lukhu ah aksi khat hong hi ding hi. Hotkhiatna[214, 215] a ngah mi khat in, Pasian’ deihna banga a gamtatna  hangin huzap nei-in, midangte hotkhiatna thu thei sawnsak dinga, tua bangin nasepna tangzai ding hi. Thukhen-na ni ciangin tua nasepna bang zahin tangzai cih hong kilang phing ding hi.    
            Ka sep theih bang mah om kei ci-a na ngaihsut manin Pasian’ na na sep ding uaikai kei in. Na sep theih  sunsun thumaan takin sem in. Na hanciamna tawh kizui-in Pasian in hong sem ding hi. Topa lungdamna sungah a tum dinga a kilawm mi hi ci-in nuntakna laibu sungah na min hong khum ding hi. MYP, laimai 21-23.

KHAWKPI 36
I TANOTE HILH PILNA

            Khangnote amau’ lungsim phut bang ciata gamtatsak ding pen tulai leitung paizia hi mai hi. A neu lai-in a ginat kei phial leh zong, mailamah hong hoih nading hi, kum sawm leh kum guk, kum sawm leh kum giat bang hong phak uh ciangin, thu hong ngaihsun thei ding uha, a zongsatna hoih lote uh nusia-in, a nung ciangin mi-hoih hong suak nading uh hi, nute pate in ci uh hi. Khial mahmah uh hi! Kum tampi sung lungsim huan sungah galpa khaici vawhsak uh hi. A maan lo thuguite khangtosak uha, a khawnung cianga tua huan sunga kisem khempeuh phial pen a mawkna suak lel ta hi.     
            Satan pen a tei mahmah, nasep a kuhkal, sihna tawh kipawl galpa ahi hi. Khangnote a sukha dinga ngaihsun khol lo-a kammal khat peuh a kipau khiat pak ciangin, phat bawlna a hi-a mawhna kimkhat a kihhuai lua khol lo dinga a ngaihsut theihna ding uh ahi zongin, tua pen mah Satan in ai-in man pahin, zung kha-a gah tampi a gah theina dingin tua khaici hoih lo pen khangsak pah hi. Nute pate kimkhat in a tate uh zongsatna hoih lo tawh khangkhiasak uha, a khantawnun sia paisuak pah uh hi. Tua mawhna pen nute pate’ tung tu ding hi. Tua tanote Khristian a suak phial uh zongin, a lung sung uah hehpihna in nakpi-in na sema a nuntakna uh a kibit khelsak kei ngal leh, a khantawnun a zongsatna lui uh kidawkdawk dinga, amaute’ khanpih dinga a nute a pate un a phal zia-le-tong mah kimu-mu ding hi. 1 T, laimai 403.  
            Nute pate in a tate uh a uk uh kula, a lunggulhnate uh puah sakin, a thuzawh uh kul hi. Tua hi kei leh Pasian in Ama thangpaihna ni ciangin tua tanote susia takpi dinga, a tate uh a uk lo nute pate pen mawhsakna tawh kipelh lo ding uh hi. A zawdiakin Pasian’ nasemte in a innkuan sung uh uk ding uha, thumangsak diamdiam ding uh hi. Amau’ innkuan sung hoih taka a uk theih kei uh leh pawlpi vaite ah vai a hawm ding leh thu a khen dingin amaute a kiging nai lo a hih [216] lam ka mu hi. Amaute in a innkuan sung uh a hoihsak masak phot uh kula, tua khit ciangin amaute’ thukhenna leh huzapte in pawlpi sungah thu hong nei pan ding hi. 1 T, laimai 119.            
            Tanu leh tapa khatpeuh nitakin inn ah a om kei leh sittel ding kisam hi. A tate uh kua tawh kikhawla, kua’ inn ah nitakin hawh hiam cih nute pate in a theih ding uh kisam hi. 4 T, laimai 651.             
            Pasian’ theihna zah sangin mihing’ pilna in tam mu zaw tuan lo hi. Tate makaihdan zong Pasian’ hong hilh na zah sangin a hoih zaw geel thei tuan lo hi. Amaute a Piangsakpa sangin tanote’ kitangsapna kua’n thei zaw mah ding hiam? Ama sisan tawh amaute a lei-Pa sangin kua in amaute’ nopsakna ding kin zaw mah ding hiam? Pasian’ thu lim takin kisim hen la, pha takin kizui hi leh, ta gilote’ gamtatna hoih lo hanga lungkhamna tawm zaw ding hi.        
            Nute pate in a tate uh’a ding a theih ding uh leh a ngaihsutsak ding uh om hi. Hi leitung ah amaute kimanna a nei, a kizahtak, a ki-it mite suaksaka, nung ciangin a siangtho vantunga om mite tawh a kikholh theihna dingun gamtat hoih a neisak ding pilna leh pattahna a ngah ding uh kisam hi. Khangnote in tu leh nung cianga nop sakna a ngahna ding uh pen a neu lai a moi lai uha a zongsatna uh tawh kisai pha mahmah a hihna amaute hilh ding kisam hi. AH, laimai 306.            
            Lai Siangtho ka zahtaka a thute ka zui a ci numei pasal tampi in mun tampi ah Lai Siangtho’ deihna zui lo veve uh hi. Tate pattahna bangah Pasian’ deihna zui lo in amau’ hoihsak bang zuizaw uh hi. Tua hang mahin mi a tultulin mangthang uh hi. Tate hilhpildan ding Lai Siangtho in hong lak hi. Tua bangin Pasian’ deihnate nute pate in mang uh hi leh, leitung ah khangno a tumdang honpi khat tu ni-in i mu ding hi. Lai Siangtho ka sim hi, Lai Siaugtho ka zui hi a ci nute pate mah tua Lai Siangtho’ hilhna tawh a kilehbulhin gamta mawk uh hi. A tate uh’ gamtatna hanga a kap nute pate’ dahna leh mauna aw i za hi. Tua dahna leh [216,217] maunate amau leh amau’ kibawl a hih lam zong phawk mel lo uh hi. A itnadan uh maan lo a hih manin a tate un siat lawh hi. A tate uh a neu tung uha kipan zongsatna hoih a neihsak ding uh Pasian’ piak tavuan amaute in don lo uh hi. 4T, laimai 313.        Khristian a hi tanote in, leitung thupha khempeuh sangin Pasian a zahtak nute pate’ itna leh pahtakna deihzaw ding uh hi. A nute a pate uh itin pahtawi ding uh hi. A nute a pate uh bangci lungdamsak ding cih a nuntak sung uha a kisin pipen khat uh a hih ding kisam hi. Langpanna tawh kidim tu lai hunin a maana pattahna leh hilh pilna a ngah lo tanote in a nute a pate tung uha a tavuan uh thei lo uh hi. A nute a pate un amaute limbawl semsem leh amaute lungdam lo zaw semsem uha, zahtak lo zaw semsem thei uh hi.                        
            Mailama a tate uh’ nopsakna ding pen nute pate‘ khut sungah a tam penin om hi. Tua tanote’ zia-le-tong a hoihna ding a thupi nasepna pen amau’ sep ding ahi hi. A neu tung uha hilhna in a khantawnun amaute zui ding hi. A sialam a hih kei leh a phalam gah a gah dinga a hong po khia dingin nute pate in khaici a vawh ahi hi. A tanute a tapate uh’ nopsakna ding a hih kei leh lungkhamna ding pen amaute in bawl thei uh hi. 1 T, laimai 392,393.

Nu Leh Pa Kithuhual Ding

            "Tanote in phawk theihna leh it theihna nei uh hi. A lungdamna ding uh baih a a dahna ding uh zong baih hi.  Itna kam khum leh bawldante tawh dam taka hilh pilna panin nute in a tanote uh amau’ lungsim tawh hen khawm thei hi. Tate’ tunga thukhauhna leh hih-ciltelna in khialhna lianpi ahi hi. Thukip thukho tawh heh gamgamna om lo-a kithuhilh ding pen innkuan khempeuh ah kisam hi. Na cih nop pen dam takin gen in. Ngaihsutna tawh gamtang in. Na cih bangbang peel lo in semkhia in. 3 T, laimai 532.   
            Nute pate in zong amau’ neu lai-in hehpihna leh itna bang zahta-in deiha, kimawh saka a kitai gawpgawp ciangin bang zahta-in a lungsim uh na hiam cih a mangngilh [211-218] loh ding uh kisam hi. A tate uh’ deihnate a theihtheihna dingun a lungsimte uh khia sukin, a ngaihsutna uah a moi kik ding uh kisam hi. A hi zongin, itna tawh a kithuah thukip thukho tawh amaute in a tate uh’ tung panin thu manna a nget ding uh kisam hi. Nute Pate thu man lianlian ding ahi hi. 1 T, laimai 388. 
            Innkuan ki-ukna ah thukip thukho a om kei leh siatna lianpi piang paha, ki-ukna a om vet lo zah mahin siahuai hi. Bang hangin biakna a kin mite’ tate uk hakin, khel tatin, langpan hat deuh se uh hiam, ci-in dotna om thei zel hi. Innkuan sung kipattahdan panin a thu kimu ding hi.   
            Nute pate a kilem kei-a kitotna ding peuh a om leh a kilem theih masiah uh a tate uh’ muhna ah tua bangin om kei zaw uh hen. Hilh pilna ah nute pate kipumkhat le-uh, bang a hih ding uh kideih hiam cih tate in hong theithei ding uh hi. Nu in a tate a taaina hoih a sak Iohna, pa in a kampau hiam a ^mit-hah hiam tawh a kilat sak leh; nu pen khauh lua-a, tua ngawh bawlna teng zolna leh a nop uh zuihna tawh bawl phat kul hi ci-a pa in a ngaihsut leh a tate kisia ding hi. A ut bang peuh uh a hih thei ding a hih lam hong thei pah ding uh hi. A tate uh’ tunga hi bang mawhna abawl kha nute pate in a tate uh’ kisiatna hangin thusitna thuak ding uh hi. AH, laimai 310-315.             
            Nute pate amau leh amau a ki-uk zawh masak ding uh kisam hi. Tua hi leh a tate uh hoih takin uk thei zaw ding uh hi. Amau leh amau a ki-uk zawh loh sial, lungduai zo lo-a a pau khiat a tat khiat sialun, amaute Pasian’ tungah a mawh uh ahi hi.  A tate  uh tawh kikum masa-a, a khialhnate uh laka, a mawhna uh hilha, nute pate’ tungah a mawh bek hi lo-a Pasian’ tungah zong a mawh a hih lam uh theihsak ding kisam hi. Na lungsim uh niam khiatin, a khial na tate uh hehpihna leh dah pihna tawh, amaute na taai ma-un thungen khawm un. Tua hi leh na taaina hangin na tate in hong mudah lo ding uh hi. Hong it zaw ding uh hi. Hong lungkimsak lo a hih mana amaute dan pia na hih loh [218] lam, amaute’ tunga na hehna a tusak nuam na hih loh lam hong mu ding uh hi. Mawhna sungah a khangkhia dinga amaute a kikoih khong hi lo-a, amaute’ hoihna ding tavuan na neihna na phawkna hanga a taai na hih lam amaute in hong thei ding uh hi. 1 T, laimai 398.

Nakpi-a Pattahna Lauhuai

            Hilh pilna hun sunga hoih taka a kipantah a hi ding tawh a kibang naupangte a omna innkuan tampi om hi. A hi zongin amaute a len, ngeina paiziate a kisiat ciangin, amaute in a ngaihsutna ding uh, a gamtatna ding uh thei nawn lo in, amau’ thutawmin khensatna nei thei lo thei uh hi.    
            Amau’ hih theih zah leh a lungsim un a zawh zah uh tawh kizui-a amau’ thutawma ngaihsutna leh gamtatna a nei thei dinga hoih taka lam lahna lo tawh khangnote nakpi-a pattahna in lungsim leh gamtat thanem mi piangsak ding hi. Amau’ hih theih zah leh a lungsim un a zawh zah tawh kizui-a amau’ thutawma ngaihsutna leh gamtatna a nei thei dinga hoih taka lam lahna panin amaute a ngaihsutna uh khangin, amau leh amau zong kithupi muh thei-in, a siamna uh a zangkhia dingin kimuang thei bek ding uh hi. Amau’ thutawma a gamta dinga mite’ mai ah a hong om uh ciangin, amaute a pil dingin kipantah lo in ganhing bangin kipantah a hih lam hong kilang ding hi. Amau’ utna lungsim pen kimakaih zaw lo in nute pate leh siate’ hilh gamgamna a mang dingin kizawhthawh bawl zaw hi.

            Amau’ khut nuai-a om naupangte’ utna leh lungsimte uk zo gawp ing, ci-a a kisial nute pate leh siate in, zawhthawhna leh lau sakna tawh thu a man sakna pan uha a hong khangkhia naupangte' mailam nuntak zia kankhia thei uh hi leh, kisial ngam nawn lo ding uh hi. Tua  bang naupangte, nuntak nasep haksate a sem dingin a kiging khol mahmah lo uh hi zaw phial hi. A sangnaupangte uh’ lungsim uk zo gawp ing ci-a a lungkim siate pen tawl khat sung pahtak-huai a bat hangin, nasep a zo mahmah siate hi lo zaw uh hi. [218,219]                        Amau leh amau kiliansak gemgamin, a thuneihna uh hehpihna om lo in zang guapguap uha, tua bangin a tanote uh leh a sangnaupangte uh’ lungsim la zo lo uh hi. Amaute in a kiang nai uah a tanote uh kaikhawm-in, amaute a itna uh lak hen la, amaute’ hanciamna khempeuh leh a kimawlnate nangawn uah a lawpna uh lakin, naupangte’ lakah naupang bangin khat veivei va om leh, naupangte a lung uh dam mahmah dinga, amaute’ itna leh muanna ngah zaw ding uh hi. Tua hi leh naupangte in a nute a pate uh leh a siate uh’ thuneihna zahtakin, thu hong mang baih zaw ding uh hi. 
            Lam khat panin, a nute a pate uh leh a siate uh’ khensatna lo tawh amaute’ thutawm a a gamta dingin khangnote koih khong ding hi lo hi. Thu theisate’ khensatna zahtaka, a nute a pate uh leh a siate uh’ makaihna a mang dingin naupangte hilh ding kisam hi. A nute a pate uh leh a siate uh’ lungsim tawh amaute’ lungsim a kihual dingin hilh ding kisama, amaute’ kuppihna man ding a hoih a hihna zong a muh theihna dingun tua bang mahin hilh kul hi. Tua hi leh a nute a pate uh leh a siate uh’ makaihna khut nuai panin a pai khiat uh ciangin, amaute’ zia-le-tong pen huih muta kivuang pumpeng tawh kibang nawn lo ding hi. 3 T, laimai 132-135.

Naupangte Hilh Lo-a Khantoh Sakna In Mawhna Hi

            Nute pate kimkhat in a tate uh biaknalam pilna sinsak lo uha, sanglam pilna zong donsak lo uh hi. Tuate don loh ding hi lo hi. Naupangte’ lungsim pen phevela, thatang tawh na a sem hiam, lai a sim hiam khat a hih kei leh, amaute siatna huzap sung tung ding hi. Tua a hih manin naupangte hilh lo-a khantohsak ding pen nute pate’a dingin mawhna ahi hi. Kimanna nei-a a lawphuai laibute a guat ding uh, nasep a hilh ding uh, thatang nasep hun a neihsak ding uh leh, lai sin hun leh lai sim hun a neihsak ding uh ahi hi. Nute pate in a tate uh’ lungsim a laptohsak ding uh leh, a ngaihsut siamna uh a khantohsak na’ng uh a hanciam ding uh ahi hi. Kikoih dapa a kihah lo lungsim pen [219 220] niam hamtangin, zualzangin, kisia hi. Satan in a hun hoih zang pahin, a thadah lungsimte zol pah hi. 1 T, laimai 398,399.     Nu’ nasep pen naungek tawh kipan pah hi. A tano’ lungsim leh utna a uk zawh ding, thu a mansak zawh ding leh thu a mang dinga a hilh ding kisam hi. Naupang hong gol zawk deuh ciangin, a khut om khongsak kei un. Nu khempeuh in a tate uh tawh thu kikup ding, a khialhnate uh hilh ding leh lungduai taka amaute lam maan hilh ding hun a zat ding uh ahi hi. Khristian nute pate in a tate uh Pasian’ ta a suak dingin hilhin puah uh a hih lam a kitheih ding uh kisam hi. Naupangte a biakna nuntak buppi uh pen a neutung uha kipan a kihilhdan leh zia-le-tong a kipuahdan tawh kisai hi. A neutung uha kipan a kithu zawh kei-a, nute pate’ thu a mang dingin a kibawl kei leh a khawnung ciangin hilh ding hong haksa ta ding hi. A kithu zawh ngei nai lo lungsim pen Pasian’ thu a mang ding a bawl ding haksa mahmah hi! Hi nasep thupi, a awlmawh lo nute pate in khialhna lianpi a bawl uh hi-a, a tanote uh’ tung leh Pasian’ tungah a mawh uh ahi hi. 1T, laimai 390,391.       
            Nute pate aw, na tate uh na hilh ding uha Pasian in a hong sawl pilna na hilh kei uh leh a piang bangbang thusitna na thuak ding uh hi. Tua hanga a piangte na tate uh’ tung bek ah a bei ding hi lo hi. Lo lai-a a kikhokhia lo, ling kung khat tampi a hong phak mah bangin nangma ginat lohna hanga a piang mawhnate in amaute’ kikholhpih khempeuh zong siasak lai ding hi. CG, laimai 115.  
            A citak lo nute pate’ tungah Pasian’ samsiatna tung takpi ding hi. Amaute in hih leitung ah amaute a sun ding  ling kung a suan bek hi lo in, thukhenna hun ciangin amau’ ginat lohna hangin thuak kik lai ding uh hi. Thukhenna ah mi tampite hong dingin, amaute a khaam lohna hangin a nute a pate uh mawh sakin, suksiatna a thuakna uh amau’ hang hi, hong ci ding uh hi. Nute pate in a maan lo hehpihna leh itna tawh a tate uh’ khialhnate mai saksak uha, hilh loh taai lohin koih [220] khong uh a hih manin, a tate un siat lawh zaw uh hi. Amaute’ sisan pen a citak lo a nute a pate uh’ tung mah tu ding hi. 1 T, laimai 219.

Thadahna A Siathuaina

            Thadahna hangin mawhna tampi tak piang a hihna kei hong kilak ngei hi. A thanuam khutte leh lungsimte in galpa’ mawh zolna donin nei man lo-a, a thadah khutte leh khuakte pen Satan’ uk dinga a baihsa hi pah hi. Lungsim hoih taka a ki-uk loh ciangin, ahoih lo nate hong ngaihsun pah hi. Thadahna pen mawhna a hih lam nute pate in a tate uh a hilh ding uh ahi hi. 1T, laimai 395.      
            Naupangte’ tung pana vangik khempeuh dom khiat sakna, thadaha tup mel nei lo-a om khong sakna, bangmah sem lo-a a ut peuh uha tat sakna sanga siatna lam a tun zaw na dang bangmah om lo hi. Naupangte’ lungsim pen phevela, kimanna a nei a hoihlam ngaihsutna tawh a kidim kei leh a sialam mah hong ngaihsun pah ding hi. Amaute a tawlngak ding uh a kitangsam a hih zah khatin, na a sep ding uh, thatang nasepna, lai simna leh sinna hunte zong manmana a neih ding uh hilh ding zong kisam hi. Amau’ kum tawh kizui-in nasep neisak un la, kimanna a nei a lawphuai laibute zong guan un. AH, laimai 284.        Naupangte in nasep khat peuh lawp takin hong sep uh hangin, hong cimtak pah uha, a dang khat peuh khelin matut mel nei lo thei uh hi. A tate un nasep a khel themthum ding uh nute pate in a phal ding uh hi lo hi. A khangto ding lungsimte lungduai taka hilh pilna hun a om lo ding zahin na a tuamtuam tawh hun a beisak ding uh hi lo- hi. Hansuahna kam tawm khat peuh, a hun liana huh pakna khat peuh in, amaute’ buaina leh lungkiatna beisak thei hi. Nasep masuan khat a zawhna uh pana a ngah uh lungkimna in nasep a haksa zaw amaute sem nuamsak ding hi. 3 T, laimai 147,148.               
            A kizolbawl a kidonbawl diak naupangte in a tua bang ding lamen den uha, a lametna bangun a kibawl [220,221] loh ciangin, lungkim lo in heh thei uh hi. A khantawn-un tua bangin om thei hi. Amaute cimawhin, a huh ding deihin, amau a maiet ding leh a zolbawl ding mi lamen den uh hi. Amaute’ thu kinial kha leh, nupi papi a suah khit nangawnun zong, amaute a kikhelbawlin ngaihsun uh hi. Tua bangin amaute in a masuan khempeuh uh bing sakin, amau' thutawmin phu zo lo in, na khempeuh amau’ deih bangin piang lo a hih manin phunphunin hanghang uh hi. 1 T, laimai 392,393.                 
            Nupi in ama sep ding tawh a innkuan pihte’ sep ding tawh a vekpi-in sema, a pasal leh a tate mei kiang-ah tu hithiata a om lai takin, amahmah in sing la-in, tui tawi-in, sing ehna ding hei nangawn a lak ciangin, amahmah tung leh a innkuan pite’ tung ah khialhna lianpi a bawl ahi hi. Zite leh nute pen a innkuan pihte’ sila dinga Pasian’ seh hi lo hi. Inn sung vangikte a puakpih dingin a tate pantah se lo in, nupi tampi in lungkhamna vangik lelin om uh hi. Tua hang mahin teek baihin, a hun nai lopi-in si-in, bangmah thei nai lo a tate makaih ding a kisap pen lai takin a nu in sih san hi. Kua’ mawhna hiam?       
            Pasalte in a zite uh a buai luat lohna ding leh a lungnop theina dingin a hih thei zahun a hanciam ding uh ahi hi. Hong zongsang pah ding uh a hih man-in naupangte thadaha omsak mawk ding hi lo hi. 5 T, Iaimai 180,181.

Na Tate Uh Khris Kiangah Kha Un

            Naupangte in a maan gamta nuamin, a nute a pate uh leh a kemte’ tungah migi-in thuman nopna lungsim zong neikha ding uh hi. A hi zongin amaute, huh ding hansuah ding kisam lai hi. Lungsim khensatna a hoih zong nei uh hi. A hi zongin tuate pen biaknalam tawh tha pia-a, Pasian’ hehpihna tawh a nuntakna uh a thak suah kei leh a tupna zah uh tung zo lo ding uh hi.    
            A tate un hotkhiatna a ngahna dingin nute pate a hanciam thuahthuah ding kisam hi. Amau’ pilna ding amau’ thu-in zong tawmsak lo in, lim takin a hilh ding uh kisam hi. Mailam hun khat ciangin a pha [221,222] hong gual zo-in, a sia hong maimang nading hi ci-a ngaihsutna tawh, a sia leh a pha khen tel siam lopi-in khangnote koih khong ding hi lo hi. A hoihlam sangin a sialam ah hong khangto baih zaw ding hi.            
            Nute pate aw, Khristian hong suah theih Matengun a neutung lai mahun na tate uh’ lungsim na hilh pil pah ding uh ahi hi. Na hanciamna khempeuh uh amaute, in hotkhiatna a ngahna ding hisak un. Pasian’ Gam sunga a taang ding suang manpha a suahtheina dingun, na khut sung uha hong kikoih a hihna tawh kizui-in sem un. Amaute taai tham dingin khangham nai kei, a mawhnate uh kisika Khris a saang dingin khangham nai kei ci-a ngaihsut khialhna tawh siatna dum sungah a ihmu dingin amaute na awihdan uh kidawm un.    
            A moi lai lungsimte in a tel theih khom dingin a tate uh’ tungah nute pate in hotkhiatna thu siang taka a gen ding uh ahi hi. Mimal in biakna neih kul a hihna hilhna dingin naupang kum giat, kum sawm, leh kum sawm leh nih gualte a hun hi ta hi. Mailam a khangham zawk deuh uh ciangin mawhna kisikin thumaan um thei ding cih bangin na tate uh hilh kha kei un. Limtakin kihilh peuh leh a moi lai mahmahte in zong mawhnei a hihna uh leh Khris pan bekin hotkhiatna kingah a hih lam mu thei veve uh hi. Naupangte in hotkhiatna a ngahna ding thuhilh siate in thupi ngaihsut khol lo thei uha, a hanciam ding zah un hanciam lo uh hi. Naupangte’ lungsim a kizawhna ding kham hun pha pen zat loh in bei pahpah hi. IT, laimai 396-400.            
            Nute leh pate aw, note hong kiguan nasep a thupi-na na phawk uh hiam? Zongsatna hoih lote panin na tate uh na kep ding uh a kisaplam na phawk uh hiam? Amaute’ tunga huzap hoih a nei thei ding mite bek tawh na tate uh kikhawlsak un. Koi ah om dinga bang hih ding uh cih na theih kei ngal leh nitakin amaute vakkhiasak kei un. Gamtat siangtho a neihna dingun hilh un. Amaute gual khat tung gual khat, thu khat tung thu khat, hiah tawm khat, huah tawm khat cih banga na hilh nai kei leh tu mahmahin hilh ding kipan pah in. [222,223] Na masuan kipan in la tu leh a tawntung’a ding sem in. Na tate’ tunga na masuan na sep loh mawhna pulaak lo in ni dang khat tumsak nawn kei in. Pasian’ hong piak, na masuan a sem ta ding na hih lam amaute gen in. Kipuahphatna ah nang tawh a pang khawm dingin amaute cial in. A beisa hunte a loh kik dingin hanciam in. Loadikia pawlpi dinmun ah omom nawn kei in. Innkuan khempeuh in na meel taktak ciat uh a hong lak dingin Topa’ min tawh kong cial hi. Na inn sung ciat panun pawlpi hong puahpha un. 7 T, laimai 66,67.

Lungsim’ Deihnate Don Lo Kei In

            Pasian a zahtaka kinei nute pate in a tate uh don lo thei a hih lam kei hong kilak ngei hi. Amaute in a tate uh’ lungsim omziate kanin, a deihnate uh a piak ding uh ahi hi. Nute pate kim khat in a tate uh’ deih nate limtakin pia uh hi. A dammawh uh ciangin limtakin donin khoi uha tua pen a masuan khinin kingai- sun uh hi. Tua mun ah khial uh hi. A nasep uh a kipan hi pan hi. A lungsim uh’ deihnate zong a don ding uh ahi hi. Lungsim liamsate a damsak dingin zatui a kituak zat siam ding kisam hi.     
            Khanghamte’ thuak mah bangin naupangte in zong amau’ thuak dinga a haksa khop, zia-etna haksa pipite thuak uh hi. Nute pate mahmah in amaute zahin phawk den lo thei lai uh hi. A lungsim uh buai zelzel hi. Muhna leh phawkna a maan lopi tawh na sem uh hi. Satan in amaute vaata, amaute in mawh zolna mang pah uh hi. A tate uh a hehna dingin hang gawp ngiengei thei uha, khat veivei lung tomin ngongtat thei uh hi. Naupangte in tua bang lungsim mah hong pua pah uha, tua buaina a piangsak amau mah hi lel a hih manin, nute pate in a tate uh bawl pha thei tuan nawn lo uh hi. Khat veivei na khempeuh a sialam ngentangin a piang tawh kibang thei hi. Hehna ding vive hi-in, innkuan bup a lungkhamhuai a, dahhuai-in ki-om thei hi. Nute pate in lah a tate uh mawh sakin, buaina a piangsak amau mahmah hi zaw napi-in, a tate uh leitung ah a gi-lo bel, a thumang lo bel leh a uk hak belin ngaihsun uh hi. [223]   
            Nute pate kim khat amau’ ki-uk zawh lohna hangin hang kek gawp thei uh hi. Na khat peuh a sem dingin a tate uh awnem tawh sawl zaw lo in, hanna aw tawh thu pia-in, a hi lopipi-in a tate uh mawh sakin phunphun thei uh hi. Nute pate aw, tua banga na hihna un na tate uh’ lungdamna leh thanopna susia zaw hi. Na sawlna uh a sep hangin deihsakna tawh sem lo in, sem lo-a om ngam lo a hih manun a sem hi bek uh hi. Tua lai ah a lungsim uh om lo hi. Nuamsa lo in gimhuaisa zaw uh hi. Tua in na sawlna khempeuh uh mang zo lo sak zaw hi. Tua ciangin na hehna uh so semsema, naupangte’a dingin thusia zawkan lai hi. Mawh sakna hong kithuap toto-in, a gamtat hoih lote uh hong kiselpho semsem hi.           
            Na tal uh na zinsaklam uh na tate uh musak kei un. Mawh zolna a zuih khak uha; a nung ciangin a khialhna uh kimu-in a kisik uh leh vantunga om na Pa un note hong maisak ding na deihzahun amaute maisak un. Awnem tawh amaute hilh un la, na lungsim uh tawh amaute hen khawm un. Tua hun pen tate’a dingin thupi mahmah hi. Nang’ kiang panin amaute hong sut khia dingin thu tuamtuam in amaute hong bawm dinga, tuate nang’ na do kul ding hi. Hong muanna dingin amaute hilh in. A haksatnate uh leh a lungdamnate uh na bil ah kihuausak in. Tua bangin hong gen ngam le uh Satan in amaute a siahna thang tampi panin amaute na honkhia thei ding hi. Nangma neu lai mangngilhin, amaute zong naupang a hih lam uh mangngilhin na tate ngawhbawl den kei in. Amaute a picing pah dingin lamen ke’n la, a gamtatnate uah nupi papi a bang pah dingin hanciam kei in. Tua bangin hihkha lecin, amaute tawh na kikawmna kongvang a khak na hi dinga, a lauhuai huzapte hong lutna ding, a lauhuailam na phawk ma-a midangte in amaute‘ lungsim moi laite gu a buahna dingin kong a hongsak na suak ding hi. 1 T. laimai 384-387.

Heh Laitak Tate Taai Lo Ding

            Na tate in thu a man kei leh taai ding ahi hi. Amaute na taai ma-in nang kia pai in la, na tate’ lungsim [223,224] nip saka thu a mangsak ding Ieh amaute na taaina ah siamna hong piakna dingin Topa’ kiangah ngen in. Hih banga hihna kikhial lo a hih lam khat vei bek tham lo ka thei khin hi. Hehna tawh na lung a so laitakin khalam thute na tate na theisak zo kei ding hi.            
            Na tate itna tawh na taai ding ahi hi. Na heh suaka amaute na gawtbawl dong amau' utthu-in gamtasak kei in. Tua banga taaina in siasak zaw-a puahpha zaw lo hi.        
            A khial naupang tunga hehna kilat sakna in siatna khan sakna ahi hi. Tua in naupang’ hehna suuksak zaw dinga, amah a don lo hi ci-in nang hong ngaihsun zaw ding hi. Don hi lecin tua bangin amah bawl lo ding na hih lam ama’n ngaihsun hi.   
            Tua naupangte a kitaaidan Pasian in a thei lo ding sakha na hiam? Ama’n thei hi, taanna ding lam sangin ngahna ding lamin kitaai zaw hi Ieh bang thupha piang zaw ding cih zong Ama’n thei hi. CG, 244,245.

Tate’ Tunga Cihtakna A Thupina

            Citakna ah nute pate pen etteh tham a cin ding uh ahi hi. Tua in naupangte’ lungsima a teeng ding a nisim pilsin uh ahi hi. Nuntak vai hawmna khempeuh ah, a diakdiakin a tate uh a hilhna leh a pattahna uah nute pate in ngeina kip a neih ding uh ahi hi. "Naupang khat nangawn ama nasepna kician ding maw kician lo ding, maan ding maw maan lo ding cih ama gamtatna panin kithei thei hi.”         
            Khen tel siamna a nei lo, Topa’ makaihna a zui lo nupi in, mi-khem thei leh mi-simtat thei a hi dingin a tate hilh thei hi. Tua banga a gamtatnate uh hong kingeina seh to-in, husan ding mah bangin zuau ding zong pianpih ngeina-in hong nei ding uh hi. Kineih khemna pen cihtakna leh a hi taktak bangin hong ngaihsun ding uh hi.       
            Nute pate aw, hi lah bang hi lo lah bangin thu gen kei un. Na lim na lai uh tawh thumaan lo khat peuh gen kei un. Na tate uh a thumaan ding na deih uh Ieh [224,225] no mahmah thumaan pah un. Thutang gen un la khel themthum kei un. A hi lo ciau khat nangawn zong gen kei un. Nupite in a hi lo ciau khat gen ding Ieh thumaan loh ding ngeina-in a neih uh Ieh naupangte in zong ama lim mah zui pah uh hi.        
            Nu’ nuntakna buppi ah cihtakna a-om ding kisam hi. Nungaknote hi ta Ieh tangvalnote hi ta Ieh, thu hi lo ciau khat peuh a gen lo ding, thu neuno khat ah zong zuau a gen lo dingin hilh ding pen tate pattahna ah thupi mahmah hi. CG, laimai 151,152.

Zia-Ie-tong Khantohna A Thupina

            Pasian in nute pate tungah nasep pia hi. Pasian’ lim-le-lai a suun dinga a tate uh’ zia-Ie-tong a puah ding uh ahi hi. Ama hehpihna tawh tua nasep amaute in sem zo ding uh hi. Amaute’ utna makaihna a lung-gulhna uh a uk zawhna dingun, lungduaina, hanciamna banah thukhona leh khensatna kisam hi. A kikho lo, lo sungah ling Ieh lopa bek po ding hi. Kimanna Ieh hoihna an a la nuam mi in, a leitang hahin khaici a vawh kula, an kungno phung teng to-in, kiakte khokhia-in a phungvuh kul hi. Tua hi leh an kung hoihin a puah a sepna thaman tampi ngah ding hi.   
            Mihing’ tunga a kipia ngei nasep khempeuh Iakah zia-le-tong puah tohna a thupi bel hi-a, ni dang sang-in tu hunin hanciam mahmah zawk ding kisam lai hi. Khang masate’ hun lai-in tu-a zaha a thupi nasep ding kisawl ngei nai lo hi. Tu lai nungak tangvalte in a phuut khak uh lauhuainate zaha a lian ni dangin kiphu kha ngei lo hi. CG, laimai 169.            
            Zia-Ie-tong thakhauhna ah thu nih kihela, utna-i hatna Ieh pumpi ki-ukna-i hatna ahi hi. Khangno tampi in a ki-uk lo lunggulhna-i hatna pen zia-le-tong hatna sakha uh hi. A taktakin a lunggulhna in a uk zawhmi pen a thanem mi ahi hi. Mihing’ liatna leh thupina taktak pen amah a uk zo lawpna-i hatna tawh hi zaw lo in, ama uk zawh zawk lawpna-i hatna tawh kiteh zaw hi. Mi thahat i cihte in a kikhelbawl lam thei gige napi-a, a hehna iip zo-a a galte a maisak zote ahi hi. Tua bang mite galhang taktak ahi hi. [225]           
            Pasian in amaute a piak hatnate zang uh hi leh a-maute in zia-le-tong hoih nei ding uha, Khris lamah mi tampi ngah theihna ding huzap nei ding uh hi napi-in, mi tampi in a piandan ding uh neu ngaihsut uh a hih manin, amaute khangto lo in giautau den ding uh hi. Thu theihna in hatna ahi hi; a hi zongin pilna tawh kisai siamna in, lungsim hoihna a om kei leh siatna lamah hatna ahi hi.            
            Pasian in eite, pilna leh gamtat hatnate hong pia-a, a hi zongin mi-kim in eima zia-le-tong ciat a lam ding i hi zaw hi. Ni sima a kilam toto ding i hi hi. Bangci lam i hiam cih i kingaihsut ding, tawntung Suangpi tungah a lam i hih ding Pasian’ Thu in eite hong hilh hi. I nasepna a hi bang liana hong kidawk hun hong tung ding hi. Tu mahmaha kimanna a nei ding leh nung cianga a sang zaw nuntakna’a ding zia-le-tong i neih theihna dingin, mi khempeuh in Pasian’ hong piak hatnate i puah ding hun pen tu laitak ahi hi.                   
            Nuntak gamtat khempeuh in bang zahta-in a thupi kei zongin zia-le-tong zuunna ah huzap nei veve hi. Zia-le-tong hoih pen leitung neih-le-lamte sangin manpha zaw-a, tua zia-le-tong zuunna nasep in mihing' sep theih khempeuh lak panin a thupi bel ahi hi.      
            Thu khat peuh tawh kizuun zia-le-tongte pen kikhel thei-in kithuhual lo-a, teknek nianua hi. Tua bang zia-le-tong a neite in nuntakna ah ngimna leh tupna a sang nei lo hi. Mi dangte’ zia-le-tong tungah zong huzap hoih nei zo lo uh hi. Amaute tupna nei lo, hatna nei lo in om lel uh hi.  
            Tu-a hong kipia tom kal i nuntakna pen hoih taka i puah toh ding ahi hi. Pasian in A pawlpi pen a hing, a ki-ap, na a sem pawlpi a hi ding deih hi. A hi zongin i mite, pawlpi khat hihna tawh tu laitakin tua bang dinmun tawh kigamla lai hi. Pasian in, etteh tham cing Pa’ nung a zui ding, Pasian leh thumaan’ading kician taka huzap a nei ding — a hat, a hang mite, a thanuam, a hing Khristiante hong sam hi. Thupi-a a siangtho bel thumante Topa in eite hong kemsak a [226] hi mah bangin, eite in i nuntakna leh i zia i tong ah tuate’ huzap i kilatsak ding ahi hi. 4 T, laimai 656 ,657.

Tate Hilhna Ah Ka Thu Theih Khat

            Nupi kim khatte in a tate uh a bawldan kibang kim lo hi. Khat veivei a lauhuai zah dong dingin a nop uh zui napi-in, khat veivei lah a naupang lungsim uh a lungdamsak mahmah thei ding siatna a om lo gualnopnate ah khaam thei zel uh hi. Hi mun ah amaute in Khris et-teh lo uh hi. Khris in naupangnote it hi. A lungsim ding uh zong thei saka, nuam a saknate uh leh haksa a saknate uh zong theihpih hi. MH, 389,390.  
            Naupangte in kikholhpih a tuah peuh tawh, vaak ding a hi-a, pawi a tuah peuh ah pai ding a hi zongin a hong nget ciangin, “Tate aw, hong paisak zo kei ning; tu dih un, a hang hong gen ning. A tawntung’a ding leh Pasian’a dinga na a sem hi’ng. Pasian in kei’ kep dingin note ka khut sungah hong pia hi. Ka tate aw, note’a dingin Pasian’ taanga a om hi’ng; Pasian’ thukhen ni ciangin thusitna thuak ding ka hih mah bangin note kong vil kul hi. A tate’ tunga a masuan a zo lo khat, kei’ luah ding mun pen galpa a luah masasak khata vantung laibu sungah na nu uh’ min a kiciapteh ding deih na hi uh hiam? Tate aw, lam maan koih hiam cih kong gen ding hi. Tua ciangin na nu uh’ kiang panin paikhia-a siatna lampi tot ding na teel zawk uh leh na nu uh ka peng dinga, no na hih uh leh na mawhna uh hangin na thuak ding uh hi,” ci un.            
            Hi bang danin ka tate ka hih hi. Gen dingteng ka khit ma-in amaute kapin, “Thu hong ngetsak lo ding na hiam?” hong ci uh hi. Amaute thu ka ngetsak ding ka nial ngei kei hi. A kiang uah khuk dinin amaute tawh thu ka ngen hi. Tua ciangin kei paikhia-in, zingsang ni suah dong zan thapai-in, galpa’ hong bum na a kileh zawhna dingin thu ka ngena, gual zawhna ka ngah hi. Zan khawvakin gimna ka thuak hangin, ka tate in hong ngawng kawi-a, “Nu aw, ka pai nopna mun uha nong paisak loh lungdam mahmah ung. Pai hi le [226,227] ung kikhial mahmah ding cih ka thei uh hi,” a hong cih uh ciangin kimeet ka sa peuhmah hi.           Nute pate aw, deihna taktak na neih uh leh hi bang dana na hih ding uh ahi hi. Pasian’ gam sungah na tate uh na tunsak nop uh leh hi nasep pen masuan-a na neih ding uh ahi hi. AH, laimai 528,529.          
            Hih gam ah a hi-a, gam dang khat peuh ah a hi zongin, khuapi liante panin agamla zek ah amaute a kikhen khiat kei uh leh, khangnote tungah pilna hoih kipia thei ngei lo ding hi. Khawpi lian sunga ngeinate leh gamtatnate in khangnote’ lungsim ah thumaan lutsak thei lo hi. FE, laimai 312.

Pasian’ Makaihna Tam Zaw Kisam

            Na tate lim taka pattah ding don kei lecin gawtna thuak lo in na om kei ding hi. Amaute’ ginat lohna in nang’ cihtak lohna hong selpho ding hi. Taai lo-a na khahkhong tatsiatnate, ngongtatnate, zahtak lohna Ieh thuman lohnate, thadahna leh awlmawh mel neih lohnate in na min uh hong daisak dinga, na nuntakna uah dahna hong tun ding hi. Na tate uh’ masuan ding a tam pen no’ khut sungah om hi. Na sep ding uh na sep kei uh leh galpa’ khut sungah amaute na tungkhasak ding uha, mi dangte a susia dingin ama khutzat na suak-khasak ding uh hi. A hi zongin lim takin amaute na hilh uha, na nuntakna mahmah uh tawh amaute’ mai ah lim hoih na lah uh leh, amaute Khris kiang na tun thei ding uha, amaute in zong mi dangte’ tungah huzap nei sawnin, tua bangin nangma hangin mi tampi in hotkhiatna a ngah thei ding uh hi. 7 T, laimai 66.  
            I tate tawh a ol theithei-a i kizop ding Pasian in deih hi. Khangham sate in kum tampi a na sinkhak sate uh naupangte in sinkha nai lo uh a hih lam i mangngilh-kha thei hi. Na khempeuh ah ei’ ngaihsutna banga naupangte hong tat kei uh leh amaute han gawp dingin i seh thei zel hi. A hi zongin tua in phattuamna piangsak lo ding hi. Honpa’ kiangah amaute paipih in la, a thu khempeuh Ama kiangah gen in. Tua ciangin amaute’ tungah Ama thupha tung ding hi ci’n um in. CG, laimai 287. [227,228]          
            Naupangte in thunget hun zahtaka a pibawlna dingun hilh ding ahi hi. Na sem dingin inn pan kuan khiat ma-in, innkuan bup kikaikhawmin, pa in, pa a om loh ciangin nu in, sun tawntung amaute a kepna dingin Pasian’ kiangah deihna tak tawh thu ngen ding hi. Lungnemna a dim lungsim leh, no mahmah leh na tate uh’ mai-a om mawh zolna leh lauhuainate phawk kawmsa-in kiniam khiatin zuan un. Upna tawh biaknatau ah amaute hen un la, Topa in amaute a kepna dingin thum un. Topa’ tungah tua banga a ki-ap naupangte, nasem vantungmite in cing ding uh hi. Zingsang leh nitak, deihtaka thungetna leh upna kho tawh a tate uh’ kimkot ah dai a kaih ding uh pen Khristian nute pate’ nasep ahi hi. Pasian’ lungkimna dingin bangci nuntak ding cih lungduai takin amaute hilha, cimtak het lo in, migi takin amaute a hilh ding uh ahi hi. 1T, laimai 397,398.            
            Kha Siangtho baptisna ni sima a ngah ding uh hamphatna khat a hih lam na tate uh hilh un. Ama deihnate a semkhia dinga Ama khutzat na hih lam uh Khris musak un. Na tate’a dinga na na sepna na zawh theihna ding siamna pen thungetna tawh na ngah thei ding hi. CT, laimai 131.  
            Nu’ thungetna-i phattuamna pen ciangtan theih hi lo hi. A neutung uha kipan nupi-papi a suah dong uh, lauhuaina a tuamtuam lakah a tanu a tapate uh’ kianga a khukdin nupi in, a tate’a ding thu a ngetsakna a phattuamna pen thukhenna ni masiah theikha lo ding hi. Upna tawh Pasian’ Tapa tawh a kizop leh, nu’ khut neem in mawh zolna lak panin a tapa kaikhia thei dinga, mawhna sung a tun khak lohna dingin a tanu khaam thei ding hi. Leitung lunggulhna in zawhna a ngahna dingin a do ciangin, nu-i itna, khaamna, hanciamna leh cihtakna huzap in thumaan lamah a tate tunpih thei ding hi. AH, laimai 266.      
            Na tate tunga na sep ding teng hoih taka na sep khit ciangin, amaute Pasian’ kiangah paipih in la, Ama hong huh na’ng ngen in. Nang’ sep dingteng sem na hihna gen in la, nang’ hih thei loh a hi, Ama hong [228] sepsak dingteng hong sepna dingin upna tawh Pasian’ kiangah ngen in. A lungsim uh a nipsak ding, A Kha Siangtho tawh a neemsak a migit sakna dingin Ama kiangah ngen in. Na thunget hong za ding hi. Na thungetnate Ama’n hong pia nuam hi. Na tate na taai ding a hihna, “a kah uh hangin awi-am loh ding” a hihna leh, hi thute ah Ama Thu man ding a hihna, Ama Thu panin Ama’n nang hong han thawn hi. CG, laimai 256,257.

Zahtak-siamna Leh Thusiamna Hilh In

            Khanghamsate zahtakbawl ding Pasian in deih mahmah hi. “Thumaan lampi ah a om nak leh sam a kang lu in minthanna lukhu ahi hi.” ci hi. Paunak 16: 31. Tua in gal a donate, a gual zawhnate hong gen hi; vangik a puaknate leh mawh zolna a nialnate hong gen hi. A tawlnga baih ding a gim khete’ thu hong gen-in, mun awng om ding a hih lam zong hong gen hi. Hi thu naupangte ngaihsunsak un. Tua hi leh amaute in thusiamna leh zahtakbawlna tawh khanghamte‘ lampi a nuamsak suak dinga, “sam kang biaibuaite‘ mai ah ding un la, khanghamte’ maitang zahtak un,” Siam.19:32 cih thupiak a zui uh leh a khang moi lai mah un hoihna leh etlawmna a nei ding uh hi. Ed, laimai 244.          
            Thusiamna zong Kha Siangtho thupha khat mah hi-a, mi khempeuh in a neih ding uh ahi hi. Tua in pianziate nunnemsak zo-a, tua om kei leh ngongtatin hiamgam ding hi. Khris’ nung a zui hi’ng ci napi-a, a ngongtat, a gi lo, a thusiam lote in Jesu a thei nai lo ahi hi. Amau’ cihtaknate muanlahhuai lo kha ding, amau’ thumaannate kawk baang lo kha ding a hih hangin, cihtakna leh thumaanna in migit lohna leh thusiam lohna maisak thei lo ding hi. PK, laimai 237. [228—229]

KHAWKPI 37
KHRISTIAN PILSINNA

            Leitung tangthu sunga a thupi hun nunung i naih hanhan ta hi. Tua a hih manin ei’ sangte pana kipia pilsinnalam hamphatnate pen mun dang sangte in a piak tawh kilamdang ding a hihna zong i theih ding thupi hi. CT, Iaimai 56.        
            Pilsinna tawh kisai-a i ngaihsutdan pen toi lua-in niam lua lai hi. A zai zaw muhna leh a sang zaw ngimna i neih ding kisam hi. Pilsinna maan in lai sinna nam khat bek hi lo hi. Tu-a nuntakna ding kigin kholhna bek zong hi lo hi. Tua in mihing pumpi bup, mihing’ nuntakna hun bup huam hi. Thatang, lungsim leh khalam hatnate kituak taka khantoh sakna ahi hi. Tua in a sin mite, hi leitung nasepna ah nuam a sa ding, hong tung ding leitunga nasepna zai zaw ah zong nuam a sa zaw dingin kiging kholsak hi. Ed, laimai 13.           
            Pilsinna nasep leh tatkhiatna nasep pen pumkhat hi kici thei hi. Pilsinna leh tatkhiatna ah “Jesu Khris a hi bulpi lo ngal kuamah in bulpi dang a phah kei hi.” Ed, laimai 30.      
            Pasian tawh kilem dinga mihing bawl kikna, Piangsakpa’ Iim a kilangsak kik thei dinga mihing’ pianzia a hoih dinga domkangna in, pilsinna leh hilh pilna khempeuh-i ngimnapi ahi hi. Tua nasep thupi mahmah a hih manin, Honpa in vantung munpi nusia-in, nuntakna a sang zaw tawh kilawmna a ngah theihna dingun mihingte a hilh theina dingin, hi leitung ah Amah mah a hong pai ahi hi. CT, laimai 49.         
            Leitung tawh kipawl ngimnate, hihdante leh ngeinate zuih khak ding baih mahmaha, Noah hun lai-a mite sangin eite in, i nuntak hun tawh kisai hi ta leh, i sep ding nasep lianpi tawh kisai hi ta leh ngaihsutna i nei zaw tuan kei hi. I sangsiate in Judah mite’ totna mun mah tawnin, Pasian’ piak a hi lo ngeinate, gamtatnate leh khanglui thuciinte a zuih khak ding uh patauhhuai den hi. Kim khatte in zongsatna luite len kenkon uha, a kisam lo thusinna a tuamtuamte khenglah tentanin, tuate’ hanga hotkhiatna a ngah kisa lai uh [230] hi. Tua banga a hihna uh tawh Pasian’ nasep a thupi amaute in semkha lo uha, sangnaupangte’ tungah pilsinna a kicing lopi, a maan lopi piakha uh hi. 6 T, laimai 150,151.           Pawlpi sungah na a sem ding, mite in Jesu a muh theina dingin nasepnalam tuamtuam ah i khangnote a pantah ding siamna a nei numei pasal i kisam hi. Eite’ phuh sangte in hih ngimna a neih ding uh hi-a, pawl dangte’ phuh pawlpi sangte’ paizia, leitung tawh kipawl sangpite’ paizia a zuih ding uh hi lo hi. Paizia a sang zaw thamin pai dinga, upna maan lo themkha zong a lut lohna, a kideihlohna mun hisak ding hi. Sangnaupangte pen Khristian taktak hihna hilh dinga, Lai Siangtho pen a sang  bel, a thupi bel laisimbu-in ngaihsun ding hi. FE, laimai 231.

Pawlpi’ Nasep Ding

            Zana ka mangmuhna ah a kikhawm khempeuh’ Iungsim a phawng pilsinnalam kikuma om mi honpi khat lakah ka om hi. Kum tampi i sangsia a semkhat in thu gen-a: “Pilsinna thu in Seventh-day Adventist buppi a phawn ding kisam hi," ci hi. 6 T, laimai 162. 
            Sang a kahna uah a hi-a, a kikholhna dangte uah a hi zongin, zongsatna hoih lote in amaute a huzap thei lohna dingin, i naupangte i pattah ding Ieh pilna i sinsak ding nasep thupi khat pawlpi in i nei hi. Leitung in mawhna leh Pasian’ deihna awlmawh lohna tawh kidim hi. Khuapite Sodom bang hi uha, i naupangte in ni simin siatna tampi mu uh hi. Mipi sangte-a a kahte pen amaute’ sanga aki-awlmawh lo zaw mite, sang sung a om hun sung longal uha konglak pilna a ngah dinga kizankhahte tawh kikhawl pahpah uh hi. Khangnote’ lungsim pen zawh nop mahmah hi. Zia-le-tong a maan in amaute a kikiim-uum kei leh lim taka kipantah zawte a zol zawhna dingin Satan in tua a kizan khah naupangte hong zang ding hi. Tua bangin, Sabbath a tang nute pate in bang teng piang cih a theih ma-un, gamtat sia teng kihihkhina, a tanote uh’ nuntakna kisia khin hi. [230,231]            
            Innkuan tampi in a tate uh’ pilsinna ding a ngaihsutna-un i sang golte a omna mun ah peem uh hi. Amaute a teenna mun mah uah om suak hi le-uh Topa’a dingin na hoih sem thei zaw ding uh hi. Amaute in pawlpi sang a phut dingin a min uh a omna pawlpi hansuah thei ding uha, khua sunga om naupangte in Khristian pilna namkim sin thei ding uh hi. Amaute a kisap lohna mun ah khalam thadahna sung a tung dingin mawh zolna om pah a hih manin, pawlpi golte’ kiangah a pai uh sangin amau’ huhna a kisapna pawlpi neute ah om suak zaw le-uh a tate uh’a ding amau mahmah’a ding leh Pasian’ nasepna’a dingin hoih zaw tham pek ding hi.       
            Sabbath tang mi hon khat a omna peuh ah, nute pate in a tate uh leh khangnote a kihilh theihna ding sang khat kipawla a vaihawm ding uh ahi hi. Amaute in Khristian sia khat a cial ding uh ahi hi. Amah in a hanciam thuhilhsia bangin, naupangte zong thuhilhsia a suahsak theina dingin amaute a hilh ding ahi hi. CT, laimai 173,174.          
            Eite in i tate, leitung’a ding hi lo, Pasian’a dinga a khoi dingin; a khutte uh leitung-i khut sungah koih lo-a, Pasian ita a zahtak ding, Ama thupiakte a zui dingin, amaute a hilh dingin Pasian’ tungah kiciamna siangtho a nei i hi hi. Amaute a Piangsakpa’ lim suuna amaute a kibawl a hihna leh, Khris in amaute’ etteh ding lim a hihna phawk detsak ding kisam hi. Hotkhiatna thu a theisak ding leh Pasian’ lim suuna a nuntakna uh leh a zia a tong uh a zuun ding pilsinna neihsak ding pen ngaihsut bela neih ding ahi hi. 6 T, laimai 127.                      A kisam nasemte a kingahna dingin, a muanhuai khangnote in pilna a tuamtuam leh Lai Siangtho thumaan a sin theihna ding uh pilsinna phualpite gam tuamtuam ah a kiphuh ding Pasian in deih hi. Tua mite in na hong sep uh ciangin, mun thakte-a tulai thumaan tangkona ah hong madawk ding uh hi.    
            I munpi luite panin thuhilhsia dinga i sawl khiat dingte’ pilsinna banah, amau’ gam mite leh amau’ vengte’a [231,232] dinga na a sem dingin, leitung mun tuamtuam ah mite pattah ding kisam hi. A hih theih liai nak leh amau’ nasepna ding mun mah ah pilsinna nei le-uh amaute’a dingin hoih zawin muanhuai zaw hi. A nasempa’a ding a hi-a, nasep mainawtna dingin a hi zongin, khual gamlapi-a pilna va zon pen a hoih bel hi khol lo hi. 6 T, laimai 137.       
            A pawlpi-in a hi-a a mimalin i hi zongin, thukhenna ah i pen nop leh, i khut sungah hong kipia nasep lianpipen lam tuamtuam tawh a sem siam dingin i khangnote i pattahna ding ah i hanciam mahmah lai kul ding hi. A masuan uh cihtakna leh hanciamna tawh a sem ding nasem siamte a kisap manin Khris’ nasepna a nuakai lohna dingin, kivakna (talent) a nei lungsim siangthote tha pia-a a kihilh theihna ding, a sang bel paizia dung zila a kipuah theina dingin vai hawmna hoih i neih ding kisam hi. CT, laimai 43.

I Sangte A hoih Na’nga Panpihna

Nute pate in a tate uh a pianthakna dingin sangsiate tawh kikopin hanciamin a sep ding uh ahi hi. I inn uah khalam lawpna thaksuaha a cidam denna ding leh, a tate uh Topa’ deihna bangin pantaha a hilhna dingun hanciam uh hen. A tate uh tawh nisimin Lai Siangtho sin khopna hun khatta zang uh hen. Tua hi leh pilsinna hun pen a nuam leh phattuamna a neikhat suaksak thei ding uha, a tate uh hotkhiatna a ngahsak theihna ding uha a hanciamna uah a tate un amaute a muanna uh hong khang ding hi. 6 T, lainai 199.                 Sangnaupang kimkhatte a phunsa leh a lungkim losa-in inn hong ciah uha, nute pate leh pawlpi mite in amau’ thu-uanggen leh thu-langgente na ngai uh hi. Amaute in a thu a lang nih tuaka a ngaihsut siam ding uh kisam hi. Tua hi Io in amaute in tua deihkaih thu zak saknate pen, sangpi tawh amaute kikal ah kidalna suaksak zaw uh hi. Tua tak ciangin amaute in sangpi a paiziate a lauthawngna uh, a lungkim lohnate uh leh a muanmawhnate uh hong pulaak ta uh hi. Tua banga hihna in siatna lianpi piangsak hi. Lungkim lohna [232,233] kammalte a kilawh thei natna bangin kizelin, mite’ lungsim sung a tun khit ciangin phiat kik ding haksa ta hi. Limtakin kikantel hi leh siate leh siapite’ tung- ah khialhna a kimu lo ding kim lai, a thu a kigengen ciangin behlapna hong tam semsemin, a sawtna ciangin thusiapi khat hong suak hi. Siate in sang ki-ukna zanga a sep ding uh a sem na hi lel a, tua bangin sem kei leh lah sang pen a gina lo ding na hi zaw hi.            
            Siate mun ah a om dingin nute pate kiseh uh hen la, lai tan khempeuha lungsim tuamtuam tawh a om sangnaupang a zalomte’ omna sang uka; hilh ding pen bang zahta-in haksa ding cih mu le-uh, a ngaihsutna uh hong kilamdang pah ding hi. Naupang kimkhatte a inn uah kihilh ngei lo a hih lam zong a ngaihsut ding uh ahi hi. A citak lo nute pate in a don loh uh naupangte’a dingin bang hiam khata a kihih kei leh Jesu in amaute sang zo lo ding hi. Amaute lim taka a ki-uk zawh kei leh tu-a amaute’ nuntakna in man nei lo dinga,  tawntung nuntakna zong ngahkha lo ding uh hi.  4 T, laimai 4.   
            A citak siate’ hanciamna a thukimpih lohna uah nute pate tampi in khial uh hi. Theihna lah a kicing nai lo, khen tel siamna lah a nei nai lo khangnote leh naupangte in, siate’ ngimna leh sepziate a vekin thei khin zo den lo uh hi. Hi napi sang ah a kihilh a kigente inn ah a hong gen uh ciangin nute pate in innkuan bup kikup pihin, siate’ sepzia pen gensiat talai ciam thei uh hi. Hih mun ah naupangte in a mangngilh kik pak thei loh ding uh thute sinkha uh hi. Amaute in a kingeina-seh nai loh uh ukna a thuak-khak uha, nakpi-a lai sim ding khawnga a kisawl ciangin, khen tel siamna a nei lo a nute a pate uh kiangah hehpihna leh noptatna ngen uh hi. Tua bangin lunghaamna leh lungkim lohnate tha kipia a hih manin sang buppi in ginat lohna huzap thuak lawha, siate’ van puak hong gik semsem hi. A hi zongin supna lian a thuak pen nute pate in a uk siam loh tanote hi zaw hi. Maan taka pattahna tawh a kibawl pha thei ding ginat lohnate pen kum tampi ki-awi-am a hih manin, a mite’ kiman theihna kisia mang khinsak hi. FE, laimai 64,65. CC-18 [233]

Pasian’ Khut Nuai-a Siate

            Topa in a ki-ap sia khempeuh tawh na sem hi; tua thu siate in a theih ding lawphuai mahmah hi. Pasian’ hilhna nuai-a om siate in, naupangte’ tunga a piak sawn ding uh hehpihna, thumaan leh khawvakte, Kha Siangtho tung tawnin ngah uh hi. Leitung in a theih ngei Sia Lianbelpa’ (Christ) khut nuai ah amaute a om hi-a, amaute in lungsim gi lo khawng, awtol khawng leh hehna khawng a neih ding uh pen kilawm het lo ding hi. Tua bangin amaute in naupangte’ sungah amau’ ginat lohna a teengsak ding uh ahi hi.           
            Pasian in A Kha Siangtho tawh mite hong hopih hi. Lai Siangtho na sim kawmin, “Na thukham panin a lamdang nate ka muh theina dingin, ka mitte hong honsak in,” ci-in thu ngen in. Psalm 119:18. Siate in thungetna tawh Pasian a belh uh leh amaute’ tungah Khris’ Kha hong kum dinga, Pasian in Kha Siangtho zangin ama tung tawnin sangnaupangte’ lungsim ah nasem ding hi. Kha Siangtho in sangnaupangte’ lungsim leh ngaihsutna ah nasemin, lametna, hanna leh Lai Siangtho theihtheihna guan ding hi. Thumaan kammalte thupisa semsem dinga, ni danga a theih ngei loh pen a khiatna a zai leh a kicingin hong mu ding hi. Pasian’ Thu a hoihna leh a thupina in lungsim leh zia-le-tong kikhelna piangsak hi. Naupangte’ lungtang tungah vantung ki-itna mei-amte va tu-in, lawpna piangsak ding hi. Naupang’a dingin na i sep nak leh amaute a zalom a tul-lomin Khris kiang i tun thei ding hi. CT,laimai 171,172.                 
            Mite a pil taktakna dingin Pasian’ hang beka nungta a hih lam uh a kiphawk uh kula, tua hi leh Ama pilna tawh kidim thei pan ding uh hi. Theih siamna leh khalam hatna pen Pasian’ kiang pan bekin kingah hi. Pilna lamah a sang mahmah a, mite in a ngaihsut uh mi lianbelte nangawn pahtak John leh sawltak Paul-te tawh teh ding hi nai lo hi. Theih siamna leh khalam hatna a kigawm ciangin mihing dinmun sang bel a kitung thei hi pan hi. Tua bang mite mihing lungsim pattahna ah Amah tawh nasemkhawm dingin Pasian in zang hi. CT, Iaimai 66.  [233,234]           
            Tu huna i pil sinna sangpite’ nasep thupi bel in, mite’ mai ah Pasian’ min a thangsak ding lim hoih lahna ahi hi. Mihing mah zangin vantungmite in tua nasep hong vaan ding uha, sepna bawlna khempeuh ah Pasian’ hoihna lim kilangsak ding hi. CT, laimai 57.

Sangsiate' Neih Ding Siamnate

            Na sang uah siapi a sem dingin mi-thahatte teel un. Mite a hilh-pilna ah limtaka a sep zawhna dingin thatang a hat mi, sangnaupangte hi-sinsena, siangtho-a, hanciama a, a om theihna ding uh a pantah thei ding mi hi ding hi. Na sep ding khempeuh limtakin sem in, nasepna tuamtuamte lim taka na hilh nak leh na sangnaupangte pen thugen-siamte, laibu-zuak-siamte leh thuhilh-siamte suak thei pah ding uh hi. Nasem khempeuhin pilna-sang neih kul hi cih, ngaihsutna i neih ding hi lo hi. CT, Iaimai 213,214.             
            Sangsia dingte teelna ah, thuhilhsia dingte teelna zah mahin a thupi a hih lam phawkin, ngaihsut kholh mahmah ding kisam hi. Zia-le-tong a theithei mipilte in a teel ding uh kisam hi. Khangnote’ lungsim puahpha-a a hilh thei, i pawlpi sangte-a siate in a sep ding uha a phamawh, nasep tuamtuamte hoih taka a sem zo ding talent nei mahmahte teel ding kisam hi. Uk-siamna a nei lo, theihna a nei nai lo a khangno lai siate’ khut sungah na tate uh koih kei un. Amaute’ hanciamna in buaina piangsak zaw ding hi. CT, Iaimai 174,175.                         Pasian ita, Pasian’ tungah a khialh ding lau a hih lam sittelna leh zia-etna tawh na theih cian lohpi uh sia khat peuh na cial ding uh hi lo hi. Sangsiate pen Pasian’ hilh a hia, Khris’ sang ah amaute in ni simin pilna a sin nak uh leh, amaute in Khris’ deihna bangin na hong sem ding uh hi. Amaute in Khris tawh pawl leh gual huai ding uh hi; bang hang hiam cih leh naupang khempeuh leh khangnote khempeuh manpha hi. FE, Iaimai 260.                      Sangsiate pen amau’ lai-siamnate sangin amau’ zongsatnate leh lungsim puakziate a thupi zaw thama i ngaihsut ding ahi hi. Amaute in huzap maan a neih [234,235] theihna dingun, amau mahmah hoih takin ki-uk zo dinga, amau’ lungtang pen a sangnaupangte a itna uh tawh kidim phitphet ding hi; tua pen a mit-hek, a kampau leh a gamtatna uah kilangkhia ding hi. FE, laimai 19.             
            Siate pen Khristian hoih khat bangin gamta den ding hi. A sangnaupangte’ tungah lawm lungsim leh sia lungsim neikhawm ding hi. I mite khempeuh- sangsiate, thuhilhsiate leh pawlpi mite-in Khristian thusiamna lungsim nei uh hi leh, amaute in mite’ lungsim neh zo khin tham ding uha, mi a tam zaw in thumaan kan telin hong sang khin ta ding uh hi. Sia khempeuh in amau’angsung mangngilh hen la, a sangnaupangte zong Pasian' neihsa mah a hih lam phawkin, amaute’ lungsim leh zia-le-tong tungah amau’ huzap tawh kisai-in thusitna thuak ding a hih lam uh thei-in, a khantoh a mainawt ding uh deihsakna taktak nei le-uh, i sangte ah vantungmite hong khawl den nuam ding uh hi. CT, laimai 93,94.          
            I pawlpi sangte in gamtat hoih mahmah a nei siate kiphamawh hi; a muanhuai mite, upna ah a khote, navakna leh lungduaina a neite, Pasian tawh a ton khawmte leh a sia ding lamsang khempeuh a pelhte kiphamawh hi.                 
            Kiphasaka ki-itna a nei lo mite, khangnote’ sia dinga koih ding pen gitlohna ahi hi. Zia-le-tong a nawh khan mahmah khangnote’a dingin hi bang siate in siatna lianpi piangsak ding hi. Siate in Pasian’ thu a man kei uha, a khut nuai uha om naupangte itna a neih kei uh leh; amau a lungdamsakte (mai-et-te) pakta tuama, a pahtak lohte uh leh a meidawi leh a ommawh khawngte a don kei uh leh amaute sia dingin cial ding hi lo hi; amau’ nasepna hangin Khris’a ding mi kitaan zaw ding hi.            
            Sangsia i kisam hi; a diakdiakin naupangte’a ding, a hi-hithiat, a migi, itna leh thuak zawhna a kisam phadiakte’ tungah itna leh thuakzawhna a nei siate i kisam hi. CT, laimai 175,176. [235]            
            Siate in thungetna a kisaplam a phawk kei uha, Pasian’ mai ah a lungsim uh a niam khiat kei uh leh, amaute in pil sinna-i deihna bulpi siasak ding uh hi. CT, laimai 213.                 Siate’ thatang zong thupi a hih lam gengen kul lo hi; bang hang hiam cih leh a ci dam semsem leh a nasep zong zo zawsem ding hi. Thatang hatna in zawng khalna leh natna khawng a thuak ciangin Iungsim zong siangtho lo in hat zo lo hi. Lungtang pen lungsim in gimsak hi; thatang a hat kei leh lungsim hatna zong kiama, a sang zaw ngaihsutnate leh ngimnate zong kisia a hih manin, tua bang siate in a maan leh  a maan lo khen tel thei lo zawsem uh hi. Dammawhna hanga gimna i thuak ciangin, lungduai ding a hi-a maitai ding a hi zongin, cihtak ding a hi a, thutan ding a hi zongin hong thu baih nawn lo hi. CT, laimai 177.

Khristian Pilsinna Ah Lai Siangtho

            Pilsinna-a zat dingin Lai Siangtho pen laibu dang khat peuh, a hih kei leh laibu dang khempeuh kigawm sangin muibun zaw hi. A thu-i thupina, a kammalte-i hoihna leh a genkhiatdan-i kilawmnate in na dang khat peuh sangin ngaihsutna hong phawngin hong dom to zaw hi. Lai Siangtho thumaante theihtheihna ding hanciamna zaha lungsim hatna hong pia zo zaw laisim ding dang om lo hi. Pasian’ ngaihsutna tawh tua banga a kizom lungsim pen tanzau lo, thahat lo in om lo ding hi.     
            Khalam omzia khantoh sakna ah Lai Siangtho in nakpi-in sem zo zaw hi. Pasian tawh a kikhawl dinga kipiangsak mihing in, tua pan mah bekin ama nuntakna leh khantohna ding ngah thei hi. A sang bel lungdamna Pasian’ kiang pan beka a ngah dinga a kipiangsak a hih mah bangin, a lungtang-i deihgawhna a kamsak thei, a kha-i duhna leh deihna a lungkimsak thei ding pen mun dang ah mu zo lo ding hi. Lungsim takpi leh zuih nopna tawh Pasian’ Thu sinna, a thumaante a theihna dinga a hanciam mi pen a Thuphuanpa tawh hong kimu ding hi; a khantoh nop nak leh ama khahtoh theihna ding ciangtan om lo hi.  Ed, laimai 124,125.[235] [236]          
            Lai sinna tawh a kizom Lai Siangtho mun a thupi zawdiakte, gimhuai-in ngaihsun lo in hamphatna bangin ngaisunin lotngah ding hanciam in.  A masa-in limtakin na ngah zo kei zongin, hanciamin kisinsin lecin, a sawtna ciangin thumaan kammalte tua banga na khol ding nuam na sa ding hi. Tua bangin zongsang lecin khalam khantohna ah hong manpha mahmah ding hi. CT, laimai 137,138.

A Moi Lua-a Sang Kahsak A Lauhuaina

            Eden huana omte in nate panin pilna a muhna, Moses in Arabia gam a mual a zang ah, naupang Jesu in zong Nazaret gam mual pang khawng ah, Pasian’ laigelhte a sin mah bangin, tu huna naupangte in zong Ama thu, sin thei ding uh hi. A kimu thei lo pen a kimu theite ah hong kilang hi.                  
            A hi thei zahzahin, hih a lamdang laisim bupi amaute’ mai-ah a kilem theihna ding mun ah a neutung uha kipan naupangte omsak un. Ed, laimai 100,101.               
            Na tanote uh a neu (moi) lua laipi-in  sang  ah kha kei un. Midangte’ khut sungah a moi lai lungsimte a kipuahphat ding a muan pen nu in limtaka a ngaihsut ding kisam hi. A tanote uh kum giat hiam, kum sawm hiam bang a phak masiah nute pate pen amau’ sia hoih bel ahi hi.  Amau’ sanginn pen inn pua khawng, paak leh vasate a omna mun khawng hi dinga, a laisim bu ding uh pen a piang nate hi ding hi. A lungsim un a theih zawh ding a hih nak leh nute pate in a tate uh’ mai ah Pasian’ nate-laibupi a Iem pah ding uh ahi hi. Tua bang muna a kihilh, pilna pen kimangngilh kik pak lo hi. FE, laimai 156,157.    
            Naupangte sang kahsak baih luat pen a thatang uh leh a lungsim cidamna uh a lauhuai bek hi lo in, gamtat hoihna pan-in zong supna ngah uh hi. A omzia uh a kipuah lo naupangte tawh amaute hong kikhawl kha uh hi. Zuau a gen, a tomlo, a guta, a khem hat mi, a maute sanga a moi zawte’ tungah gamtat hoih lo a hilh nuam mite, a awtol, a ngongtat mihon lak amaute a tung uh ahi hi. [236,237] Naupang neute amau’ thu-in khahkhong lehang, a hoih lam sangin a sialam hong thei pah uh hi. Pianpih Iungsim leh zongsatna hoih lote kilem mahmaha, a neu lai, a naupan lai uha a muh a zakte uh pen amaute’ lungsim sungah  teeng cip den pah hi. A moi lai lungsim sunga a kivawh khaici hoih lo in zung hong kha dinga, nute pate‘ lungtang a sun ding ling hiam mahmah hong suak ding hi. CG, laimai 302.

Nuntak Nasepte Hilh Ding Thupi

            Israel mite’ hun lai mah bangin tu-in zong khangno khempeuh, nuntak nasepte a kihilh ding kisam hi. Amaute in khut tawh nasep pawl khat peuh mah a theih ciat ding uh kisam hi; a kisap leh zong tua pen a kivaakna ding uh hi pah hi. Tua pen nuntak kikhualna-a kimang ding bek hi lo in, thatang, lungsim leh gamtat khantohna ah zong a kitangsam ahi hi.      I sangte ah khut leh kol(set) tawh nasepna a tuamtuam i omsak ding kisam hi. Tua siamsinnate sungah sazian bawldan, sing lep siamna, lo khawhdan leh gan khawidan cih khawngte hi ding hi. Sik seekdan, za zutdan, khedap khuidan cihte-a kipan an huandan, moh bawldan, puan sawpdan, puan phopdan, sik tawh lai khetdan, set tawh lai khetdan cihte a kihilh thehna dingin zong mapat ding hi. Sangnaupangte in nuntak nasepte a sep theih pah lianna dingun hi bang nasep pattahnate ah i hih theih zaha i hanciam ding ahi hi.                     Sangnaupang numeite in zong a kicing a zat theih pah ding uh pilna a ngah theihna dingun nasep ding tampi vaihawmsak ding kisam hi. Puan khuidan leh huan bawldan khawng hilh ding ahi hi. Paakte ciingin stawbery (thankik tangmai) khawng suan ding ahi hi. Tua bangin kimanna nei pilna a sin kawmun, amaute in cidamna ding inn pua thasaanna a nei uh ahi hi. CT, laimai 307-312.    
            Lungsim in pumpi a huzapna, pumpi in zong lungsim a huzap kikna pen theih ding kisam hi. Lungsim thasaanna tawh tha a ngah khuak’ hatna in pumpi bup [237,238] gamtang saka, tua bangin natna dalna ding a manpha mahmah huhna piang hi.     
            Lai Siangtho sungah, i ngaihsut dinga a kisam, pumpi tawh kisai thumaan khat oma, tua in: “Lungnopna in zatui bangin a pha bawl hi,” cih ahi hi. Ed, laimai 197.                          Naupangte leh khangnote in cidamna, maitaina, tangzanna leh, thatang leh khuak hoih a neih theihna dingun, inn pualamah hun tam a om ding, hun maana nasepna leh kimawlna a neih ding uh kisam hi. Sang sung bek ah oma lai a sim niloh naupangte leh khangnote in a cidam thatang hoih nei thei lo uh hi. Thatang saanna om lo-a lai bek simna tawh khuak zatna in, khuak lamah sisan tungsak khin a hih manin, pumpi sung tenga sisan paidan kikimsak nawn lo hi. Khuak in sisan tam ngah lua-in, mun dangteng ah tawm lua leuleu hi. Naupangte leh khangnote in manmaana lai a sim hun ding uh sehsak dinga, a hun khat uh pen thatang nasepna in zangsak ding hi. An nekna, puan silhna leh ihmutnate a hun maanin nei thei peuh le-uh, lungsim leh pumpi cidamna sukha lo in pilna hong ngah thei ding uh hi. CG, laimai 83.

Nasep A Manphatna

            Nasep a manphatna khangnote theihsak ding kisam hi. Pasian in na sem den a hih lam amaute theisak un. Na khempeuh in amau’ sep ding ciat sem uh hi. A kipiangsak na khempeuh a gamtang hi-a, ei zong i masuan i zawhna dingin i gamtat kul hi. Ed, laimai 214.         Lungsim ngaihsutna tawh kop khawma kimanna a nei ding thatang nasepna in, nuntakna ah kisekna hoih khat hi-a, lam tuamtuam tawh mite in a sep ding uha Pasian in a sawl nasepte a sep siam zawkna dingun, lungsim leh pumpi kisin sakna leh, hilh pilna hi ci-a ngaihsutna in thanuamsak tawntung hi. FE, laimai 229.       
            Za-neuhuai-in sila nasep a bang phial zongin, nasep khat peuh pen kuamah in maizumpih ding hi lo hi. Nasep in mi-manpha hong suaksak hi. Lu tawh a hi-a [238] khut tawh a hi zongin na a sem khempeuh in, na a sem numei, na a sem pasal ahi hi. Kikhawm dinga a pai uh mah tawh kibangin, puan a sawp laitak, kuang a sil laitak mah-un zong a masuan uh a sem, a biakna uh a zahtak hi veve uh hi. Khutte in nasep thupi lo bel khat a sep laitak mahin zong, a siangtho ngaihsutnate in lungsim pen dom to-in pisuaksak hi. 4 T, laimai 590.   
            Thatang nasep a ki-et neuna pen, a hoih theithei ding ngaihsun lo-a zulhtat sepna hang hi pipen hi. Sep nopna tawh hi lo in sep loh a phamawh a hih man peuh tawh kisem hi mai hi. A semte in zong lungsim tak tawh sem lo in, amahmah in zong thupi ngaihsut lo a hih manin, midangte in zong thupi ngaihsutsak lo pah hi. Khut tawh nasep kipattahna in tua khialhna hong puahpha ding hi. Tua in kiciatna leh belna zong hong guan ding hi. Sangnaupangte in sianthona leh navakna a sin ding uh kisam hi; hun zat siam ding leh gamtatna khempeuh man nei a suah sakna ding uh a sin ding uh ahi hi. Sep zia a hoih pente bek hilh lo in, siam zawk sem nopna lungsim a neihna dingun hansuah ding hi. Mihing’ khuak leh khut in a sep theih zah a hoih pen a suahna ding dong tupna neisak un. Ed, laimai 222.            
            Naupangte thadahna tawh khansakna in mawhna ahi hi. Tawl a kisa phial uh zongin a khut, a khe a sazangte uh saansak un. A khengvala sem hi kei peuh le-uh, tawlna in nang hong gimsak sangin amaute bangci gimsak zaw thei ding hiam? Tawlna leh tha kiamna kilamdang mahmah hi. Naupangte in khangham sate sangin nasep khel kawikawina leh a kallaka tawlngakna kitam sap zaw uh hi; a hi zongin a neu mahmah lai mahun nasep kisinsak dinga, amaute in kimanna nei a hih lam uh hong ngaihsun thei le-uh hong lungdam ding uh hi. Cidamhuai nate a sep uh ciangin a ihmut uh hong lim dinga, a zing cianga sep kikna ding thathak hong ngah ding uh hi. AH, laimai 289.

Minam Pau Simmawh Lo Ding

            Pilsinna khempeuh lakah khut siamna bek tawh a kingah pilna sanga a thupi zaw pilna om lai hi. Gentehna-in [238,239] kampau ahi hi. Minam dangte’ pau  va sinna sangin, a kizang lai-a a kizang nawn kei zongin, eima minam pau ciat hoih tak leh kician taka gelh theih pau theih ding thupi zaw tham hi. Kammal gualhzia a maan theih ding sinna sangin, kampau thupi sakna tawh sinna pen thupi zaw lai hi. Tua banga sinna in a tam penin nuntak nopsakna hiam, dahna hiam khat tawh zong kisai hi. Ed, laimai 234.

Thu-um Lote’ Nasep Pasian In Deih Lo

            I khangnote leh i naupangte’ ngaihsut khak dingin thugui maan lote, paulap maan lote leh Satan’ zuau seelnate i omsak den ding pen Topa’ deihna hi ding hiam? Amau’ thu theihna behlapna dingin lawkite leh Pasian’ thu um lote’ ngaihsutnate, i sangnaupangte’ tungah hilh ding i hi hiam? Thu um lo, a ngian siamte’ nasep pen, galpa’ na a sem dinga lungsimte hei khiat sakna ahi hi. Puahphatna a sem hi’ng a cihte, naupangte leh khangnote lam maan ah puak ding a hanciamte, Topa’ tatsate’ paina ding lampi a sial hi’ng a cihte in, khangnote’ tungah Ama zia-le-tong a hi lolo in a kidawksak, Amah a maan lo khawvak sungah a kimusak ding thute a hilh dingin Pasian in a phal ding hiam? Phal peuhmah lo ding hi. CT, laimai 25,26.

Khristian Pil-Sinna A Meetna

            Naupangte in biakinn tual ah, “Hosanna, Topa’ min tawh hong pai Pa in thupha ngah ta hen,” (Marku 11:9) ci-a la a sak mah bangin, a kisia ding mite’ kiangah hilhna thupuak nunung a gen dingin tu hun nununga naupangte zong a kiko ding uh ahi hi. Thumaan tangko dingin papite a kiphal nawn lohna vantungmite in a muh uh ciangin, naupangte’ tungah Pasian’ Kha hong tung dinga, a khanghamsa nasemte in kiphal lo a hih mana a sep theih loh uh thumaan tangkona pen amaute in hong sem ding uh hi.                        
            I pawlpi sangte pen naupangte in, hih nasep lianpi a sep theihna ding uha a kigin kholhna dingin Pasian’ seh ahi hi. Tua lai ah tu lai’a ding thumaante leh, thupha puak khiatna nasepdante naupangte a kihilh ding [239,240] ahi hi. Cinate leh gentheite a huh ding nasemte’ lakah amaute zong a kihel ding uh ahi hi. Zatui-zaha tawh kopa thupha puakna ah naupangte zong kihel thei ding hi. Amaute’ sep theih sunsun tawh nasepna mainawt ding hi. Amaute’ sep theih tawm kha ding a hih hangin, amaute’ sep thei sun leh amaute’ hanciamna in thumaan lamah mi tampi ngah ding hi. Amaute hangin Pasian’ thupuak kizel dinga, Ama hotkhiat damsakna minam khempeuh kiang tung ding hi. Tua a hih ciangin tuu-no honte’a dingin pawlpi in na sem ta uh hen. Pasian’a ding na a sem dingin naupangte hilh pil un la pantah un. Amaute zong Topa’ neihgil mah ahi hi.                        
            Lim takin kihih peuh leh, pawlpi sangte in a kiphuhna munmun ah thumaan dial sang khai ding uh hi. Bang hang hiam cih leh Khristian pilna a ngah naupangte in Khris’a dingin teci-pangte ahi hi. Siampite leh ukpite in a theih zawh loh uh thuthukte Jesu in biakinn sungah a hilhtel mah bangin, hi leitung nasep mahialna ding ah, lim taka a kihilhsa naupangte in, tu-a “pilna sang zaw” khawng a gengen papite in lamdang a sak mahmah ding uh thute, olno takin genkhia ziau lel ding uh hi. 6 T, laimai 202,203.                      
            l sangpite zong mite hotkhiatna ding nasep lianpi a kizawhna dinga Pasian’ geel a hihna kei hong kilak hi. Pasian’ Kha in a ukna nuai a kibil-om  ciang bekin, mite’ siamnate a kicingin kizangkhia thei bek hi. Thu theihna zonna ah biakna thuguipite leh ngeinate a thu masa hi-a, tuate in pilsinna maan-i bulpi ahi hi. Thu theihna leh pilna in ngimna hoihte a sep theihna dingin Pasian’ Kha-i panpihna kisam hi. Khristian bek mahin thu theihna a maanin zang thei hi. Science pilna zong a maan taka a kitheihtheihna dingin biaknalam dinmun tawh et kul hi. Pasian’ hehpihna tawh a pisuah lungsim in pilsinna taktak thei zo bek hi. Ama piansak nasepte pana a kimu thei Pasian’ hoihnate zong Piangsakpa i theih ciang bek mahin a maanin kithei thei pan hi. Thumaan tuinak lam, leitung mite’ mawhna a puakhia Pasian’ Tuuno lamah khangnote i tunpih nop leh, sangsiate in thumaante a thu-in thei bek lo in, Sianthona [240—241] lampi zong a pum a tak uh tawh a theih uh kul hi. Pasian ki-apna taktak tawh a kikop ciangin thu theihna in vaang (hatna) nei hi. 4 T, laimai 427.

Sangnaupangte In Amau’ Sang Pahtawi Ding

            Pasian ka ita, thumaan ka zui hi a ci sangnaupangte in, mawh zolna lakah liing lo-a, a kip suak zawhna ding uh leh, sangpi ah a hi-a, hostel ah a hi zongin, a omna peuhpeuh uah Jesu’a dinga a din zawhna dingun, amaute in pumpi kiukna leh biaknalam thuzuihna khauh a neih ding uh kisam hi. Biakna pen Pasian’ inn sunga puan tungsilh bang beka silh ding hi lo in, nuntakna buppi in biakna thu zuihna  a neih ding ahi hi.                     
            Nuutakna tuinak pana tui a dawn mi in leitung mite bangin thu kip lo leh nop tatna khawng lunggulh lo ding uh hi. Jesu’ khe phung ah a nisim Iungkhamnate uh leh a vangikte uh a ngakna uh tawh amaute in Ama sunga a ngah uh tawldamna, lungnopna leh lungdamnate, amaute’ gamtatna leh zia-le-tong ah hong kimu ding hi. Thumanna leh sep dingte sepna lampi ah lungkimna leh lungdamna om a hih lam amaute in kilangsak ding uh hi. Tua in a sangnaupang pihte uh’ tungah huzap nei dinga, tua panin a sang buppi ah kilawh ding hi.          
            Hih a thumaan mihon sungah a kihel mite in, cihtak lohna, kilem lohna, sang ngeina leh thukhamte zuih nop lohna thu tuamtuamte tha a piak lohna uh tawh siate leh siapite’ hanciamna thakhauhsak tuam ding uh hi. Amaute’ huzap in a honkhia lam hi dinga, amaute’ nasepte in Pasian’ ni lian ni ciangin kisia lo in, hong tung ding leitung ah amau’ nung zui ding hi. Tu-aa nuntakna uh’ huzap in a bei thei lo khang tawntung ah thu gen den ding hi.             Sanga a hanciam, a thukhual, a citak khangno pen a manpha mahmah sumgil ahi hi. Vantungmite in pahtakna tawh amah en uh hi. Ama Honpa in pakta-in, vantung laibu sungah ama diktatna khempeuh, mawh zolna a nial zawhna khempeuh leh siatna a do zawhna khempeuh kiciamteh ding hi. Amah in nuntak tawntungna [241] a letcip theina dingin, hong tung ding hun’a ding amah in bul kip a phut suak ding hi.                
            Ama nasepna a mainawtna ding khata Pasian in a seh a hi sangte a kip a khona ding pen Khristian khangnote  tawh kisai pha mahmah hi. Pawi lahna tau tung a hong tung ding a hi tu ni-a khangnote’ tungah tua tavuan lianpi kinga hi. Kuamah ta’ khangin tua zah a thupi nasep a kipiak hun om ngei nai lo hi; Pasian in khangnote Ama khutzata a neih theina dingin, tua nasep lianpi a sem thei khangnote a hihna ding uh bang zahta-in thupi hiam! Amaute a Bawlpa in na dang khempeuh laka a thupi belte, amaute’ tung panin deih(ngen) hi.          
            Amaute’ tunga om nuntakna, thatang leh lungsim khempeuh Pasian’ piak ahi hi. Khang tawntunga kimang ding nasep amaute a piak theina dingin amaute in a khantohsak ding uh siamnate Pasian in amaute pia hi. Tua Ama thuphate amaute in a thuh kikna-in amau’ pilna leh thatang siamnate a puah ding uh leh a zat ding uh Ama’n deih (ngen) hi. Tua siamnate amaute in noptatna beka a zat ding uh, Ama deihna leh Ama makaihna tawh a kilehbulh nasepna-a a zat ding uha A piak hi lo in, leitung ah thumaan theihna leh sianthona a khan sakna ding uha A piak ahi hi. Ama migit lailaina leh a kicing hehpihna hangin amaute’ Iungdamna, zahtakna leh itna Ama’n ngen hi. Satan’ ngian siamna panin khangnote kemin cinga lungnopna Iampi ah amaute a kha ding ahi Ama thukhamte leh ngeina hoihte a zuih ding uh Ama’n deih hi.           
            Khangnote in i sangte-a thukhamte leh ngeinate a zuihna uah, mite lakah amau omzia a khangtosak ding, a zia a tong uh a tawi to ding, a lungsim uh a pisuaksak ding leh a lungdamna uh a khangsak dinga a gamta uh a hih lam kimu thei uh hi leh, amaute in tua thukhamte leh ngeina hoihte hong do nuam nawn lo ding uha, i sangte muanmawhna leh gensiatna zong hong nei nawn lo ding uh hi. I khangnote in amaute' tunga kingente a hih zawhna ding uh hatna leh cihtakna lungsim a neih ding uh kisama, tua in amau’ mainawtna ding [241,242] taktak ahi hi. Tu lai huna khangno tampite’ zia-le-tong phangphangte in i lungtang hong nasak mahmah hi. Tuate pen inn-a nute pate’ khialhna hi pha pen hi. Pasian zahtakna a om kei leh kuamah in lungdamna taktak nei thei lo hi. 4 T, laimai 432-435.

KHAWKPI 38
KIDEK KIDAM DING SAWLNA

            Cidamna in gen zawh loh thupha khat hi-a, mi tampite’ phawk theih zah sangin biakna leh ngaihsutna tawh a kizom pha mahmah khat ahi hi. Nasep siamna ding tawh zong kisai mahmah a hih manin, zia-le-tong zah maha lim taka kep ding ahi hi. Bang hang hiam cih leh kicidam zaw leh Pasian’ nasepna a mainawtna ding leh mite’ phattuamna ding hanciamna, kinei zo zaw ding hi. CT, laimai 294. 
            Cidamnalam kipuahphatna in Topa a dawn dingin mite a kigingsak ding nasep lianpi-i hiang khat a hih lam 1871 kum December 10 ni-in kei hong kilak  kik hi. Pumpi tawh khut a kizop mah bangin tua thu pen  vantungmi thumna thupuak tawh kizom hi. Mite in Thupiak Sawmte zangkhai ngaihsut uh a hih hangin, amaute hilhna thu puak masa lo in, tua thukham a palsatte a gawt dingin Topa hong pai lo ding hi. Thumna  vantungmi in tua thu gen hi. Mite in Thupiak Sawmte zui uh hen la, tua thukham-i thuguipite a nuntakna uah zang uh hi leh, tu-a leitung bup a tuam, natna hong piang lo ding hi.                             
            Numei pasalte in a duh a deihuh a nek a dawnna uh tawh pianpih thukham palsat uha, Pasian’ thukham zong palsat uh hi. Tua a hih manin Pasian in, i pumpi sunga a koihsa thukhamte i palsatna hanga i mawhna i muh theihna dingin, eite’ tungah cidamnalam kipuahphat na’ng khawvak a hong taangsak ahi hi. Nopsakna leh thuaksiatna khempeuh pen pianpih thukham zuihna leh zui lohna tawh kisai hi. Hehpihna tawh a dim vana Pa in, Ama phuhsa thukhamte a palsatna uh hanga mite’ omzia a dahhuaina mu hi. Kim khatte in a theihpipi maha palsat hi-a, a tam zaw in a hih leh thei lo-a a palsat uh ahi hi. Mite hong itna leh hong hehpihna tawh Amah in cidamnalam kipuahphatna khawvak hong taangsak hi. Mi khempeuh in thei-a pianpih thukham tawh kituaka a nuntak theihna dingun Ama thukham leh tua thukham a palsat-te’ thuak dingteng Ama’n hong zasak hi. Amah in a thukham kician [243] takin tangko-a, theih baih dingin bawl a hih manin, mual tunga kisat khuapi tawh kibang hi. A pilvang lote zong peng thei tuan lo ding hi. Pianpih thukham kitheikhawk saka, zuih dinga hanthotna in, Topa a dawn dinga mite a kigingkholsak ding thumna vantungmi’ thupuak tawh kipawl nasep ahi hi. 3 T, laimai 161.

“No Pumpi No Aa Hi Lo”

            Khris hong pai baih ding cih thu lung hiang lo in i um hi. Tua in phuahtawm thu hi lo hi; thu taktak ahi hi. Hong pai ciangin Amah in i mawhnate hong sawp siang ding; i zia i tong a hoih lote hong hepkhiatsak ding , i lungsim i sinlai zawngkhalnate hong damsak ding hi lo hi. Sep ding a om khempeuh tua hun ma-a zawh khit ding ahi hi.       
            Topa hong pai ciangin a siangtho mite a siangtho-in om ding hi. A pumpi a lungsim uh a kician, a siangtho a pahtak-huai-a a omsak mite in tua hun ciangin sih theih lohna ngah ding uh hi. A thutang lote, a siangtho lote leh a kihhuaite a hih leh tua bang mahin om pai suak ding uh hi. Tua hun ciangin amau’a ding bang mah kihih nawn lo ding hi; a hoih lohnate uh kipaih khiatsak nawn lo dinga, zia-le-tong siangtho zong kipia nawn lo ding hi. Tuateng khempeuh tu lai hun hoih sunga hih kholh khit ding ahi hi. Ei’a dingin tua nasep a kisep hun ding pen tu laitak ahi hi.           
            Diktatna, zia-le-tong sianthona leh hehpihna sungah khantohna ding a kilangpanna hun sungah eite i om hi. I khawdakna khempeuh ah kisiatna, poina hemna leh mawhna vive i mu hi. Sih theih lohna i ngah ma-deuhin hi leitung ah eite in bang sem ding i hi hiam? Hih hun nunung sungah i kimkota om siatnate tawh kisawh kha lo-a i om zawhna dingin i pumpi siangthosaka, i lungsim i kiciatsak ding ahi hi.   
            “Note’ pumpi in Pasian’ kiang pana na ngah uh na sung uha a om Kha Siangtho’ innpi hi-a, nomau’aa a hih loh lam thei lo na hi uh hiam? Man tawh a kileisa [243,244] na hi uh hi: tua a hih ciangin Pasian'aa a hi na pumpi uh leh na lungsim uh tawh Pasian’ min thangsak un.” I Korintu 6:19,20.       
            I pumpi ei’aa hi lo hi. Pasian’ Tapa’ thuakna leh sihna a hi, man tawh kileisa i hi hi. Hi thu theithei hi lehang, Pasian’ na hoih taka i sep theihna dingin, a cidam thei bel dinga i pumpi i kep ding tavuan lian khat nei i hih lam i kiphawk ding hi. I guhtui a kangsak, i hatna a kiamsak leh i pilna a mialsak khat peuh i bawl khak ciangin Pasian’ tungah a mawh i hi hi. Tua banga i om ciangin Ama aa a hi, i pumpi leh i lungsimte tawh Ama min a thangsak hi lo in, Ama muhna ah khialhna lianpi a bawl i hi hi. 2 T, laimai 354,356.

Thumanna In Mimal Tavuan Hi

            Mihing Piangsakpa in i pumpi nate na buptuah hi. I pumpi nate a lamdang mahmahin kibawl hi. Mihing in Ama thukhamte zui-a Amah tawh a pan khop nak leh tua mihing pumpi cidam taka a kem dingin Pasian hong kiciam hi. Mihing pumpi a uk thukham khempeuh zong, a kipatna leh a pianzia mahmah Pasian' kiang pan hi-a, Pasian' Kammal zah mahin thupi hi ci-a i ngaihsut ding ahi hi. Kidawm lo-a lungngai lo-a gamtatna khempeuh, Topa' bawlsa a lamdang pumpi khelbawlna khat peuh, mihing’ sunga om Ama thukham tuamte awlmawh lohna in, Pasian’ thukham paIsatna mah ahi hi. Leitunga Pasian’ piansak nate enin, i pakta kha ding hi; a hi zongin mihing pumpipen lamdang zawkan lai hi. CD, laimai 17. Nate’ thukham zong Pasian’ thukham mah hi veve a hih manin, tuate limtaka i ngaihsut ding i tavuan ahi hi. I pumpi tawh kisai tua thukhamte’ deihna ngaihsunin i zui ding hi. Tuate awlmawh lohna in mawhna ahi hi.         
            Numei leh pasalte hong pian thak taktak uh ciangin amau’ pumpi sunga Pasian’ guansa nuntakna thukhamte hong thupi ngaihsut ding uh a thatang, lungsim leh gamtat gina lote pelh ding hong hanciam ding uh hi. Tua CC-19 [244,245] thukhamte zuih ding pen mimal’ tavuan ahi hi. Thukham palsatna hanga a piang gimna pen eimau ciat in i thuak ding ahi hi. I zongsatnate leh i gamtatnate tawh kisai-in Pasian’ thusitna i thuak ding hi. Tua a hih manin, “Mite’n bang hong ci tam,” cih hi lo in, Khristian khat hi buang ka hih teh Pasian’ hong piak ka pumpi koi cih leng hoih ding hiam? Kha Siangthotenna innpi a hi ka pumpi hoih taka kepna tawh ka kivaakna ding leh ka kha’a ding sem zaw ding ka hiam, a hih kei leh leitung mite’ ngaihsutnate leh gamtatnate mah zui zaw mai ding ka hiam?" cih thu lung himawh ding hi zaw hi. 6T, laimai 369, 370.

Mihing’ Sunga Pasian’ Hinna Bek Mihing' Lametna

            Lai Siangtho bang a zui biakna in pumpi leh lungsim cidamna siasak lo hi. Pasian’ Kha’ huzap in natna dam na’ng zatui hoih bel ahi hi. Vantung in cidamna ahi hi; vantung thute phawk semsem leh a dammawh thu-um mi a damna ding lamet om zawsem hi. Khristian biakna-i thuguipite in mi khempeuh mai ah gen zawh loh lungdamna piangsak a hihna hong lak hi. Biakna in a phul den tuinak hi-a, Khristian in a duh zah dawn thei in, kan hun cih nei lo hi. 
            Lungsim omzia in pumpi cidamna sukha hi. Gamtat pha hang leh midangte’ lungdamna ding a bawlna hanga lungsim-i vanzanna leh lungkimna in, pumpi buppi lungdamsak sawn a hih manin, sisan hoih takin luang sakin’ pumpi bup hatna piangsak hi. Pasian’ thupha in cidamna hi-a, midangte’ phattuamna ding a bawl den mite in lungsim leh pumpi thupha a lamdangin ngah ding uh hi.                        
            Zongsatna hoih lo leh mawhna tawh kipawl gamtatna a nei mite in Pasian' thumaan hong zuih uh ciangin, lungtang sunga a lut thumaan in a zaw gawpsa tawh a kibang gamtat hoihte hing kiksak hi. Tua bang a ngah mite in tawntung Suangpi tawh a kikilh khop ma uh sang a nasia zaw, a kician zaw thu-theihna hong nei uh hi; Khris sungah khamuanna a ngah tak ciangin ama pumpi cidamna zong hong hoih zaw pah hi.CH,laimai 28[245,246]                  
            Mite in Khris’ hehpihna a saan uh ciang bekin, a kicing thumanna-i thuphate ngah thei ding uh a hih lam a theih ding uh kisam hi. Pasian’ thuphate zuih zawhna a piangsak pen Ama hehpihna ahi hi. Tua bek mah in zongsatna hoih lo kol panin hong suaktasak thei hi. Lam maan ah a hong kipsak ding zong tua hehpihna-i hatna bek mah ahi hi.                  Lungdamna thu zong a sianthona leh a vangliatna tawha kisaan ciangin, mawhna pana a piang natnate zong damsak hi. “A kha nuai ah dam sakna tawh” dikna Ni hong suakkhia hi. Hi leitung ah bang mahin lungtang kitamkhamte damsak thei lo-a, lungnopna zong pia thei lo-a, lungkhamna zong nilkhia thei lo in, natna zong beisak thei lo hi. Minthanna, pilna leh siamnate in zong a dah lungtangte lungdamsak zo tuan lo-a, a mawk beisa nuntakna zong din kik thei tuan lo hi. Mihing’ sunga Pasian’ hinna bek mah in mihing’ lametna ahi hi.    
            Mihing’ pumpi sung tenga Khris in a kizelhsak ki-itna in hinna piangsak hi. Pumpi tunga nuntakna ding a phamawh zaw diak a hi khuak, lungtang, phawk theihna sazang cihte zong tua in cidamsak hi. Pumpi tungaa thupi bel hatnate zong tua mah in gamtangsak zo hi. Nuntakna tha a zawmsak kisuantakna leh dahna, lungkhamna leh lunghihmawhnate panin zong, ki-itna in mihing suaktasak hi. Ki-itna in lungsim sianthona leh daihna zong piangsak hi. Leitung tawh kisai na khat beek in a suksiat theih loh lungdamna a hi Kha Siangtho sunga lungdamna-cidamna a piangsak, nuntakna a piangsak lungdamna pen ki-itna in lung sungah hong guan hi.     
            “Ka kiangah hong pai un, tawldamna kong pia ding hi.” cih hong Honpa’ kammal in, thatang, lungsim leh khalam natnate dam sakna ding thu ahi hi. Amau’ khialhna mah tawh mite in amau leh amau gimna a ki-tut uh hangin, Honpa in amaute hehpih hi. Ama kiang pan amaute in huhna ngah thei ding uh hi. Amah a muangte’a dingin Amah in na lian pipi hong sem ding hi. MH, laimai 115. [246]

Cidamnalam Kipuahphatna Thu Gen Un

            I nasepna ah kidek kidamnalam i nak ngaihsut ding kisam hi. Kipuahphatna ding a kisapna mun khempeuh ah kisikna, upna leh thumanna zong kihel hi. I nuntakna a thak zaw leh a thupi zawin laam to ding cihna ahi hi. Tua a hih manin kipuahphatna khempeuh pen thumna vantungmi’ thupuak tangkona in huam khin hi. Kidek kidamna lamah kipuahphat ding pen nakpi-a i ngaihsut ding leh i panpih ding kisam hi. I kikhoppite ah tua thu bul phuhin nei-a i lim gen ding kisam hi. Kidek kidamna thu guipite mite’ kiangah genin, kiciamna lai tungah zong a min uh a gelh ding i hanthawn ding hi. Zongsatna hoih lo-i sila a hite lim taka i don ding ahi hi. Khris’ singlamteh phung ah amaute i puak ding hi.                        Hun bei ding tawh kinai semsem i hih mah bangin, cidamnalam kipuahphatna leh Khristian kidek kidamna thu ah a sang zaw semsemin i kahto ding hi. A kician zawsem, a phamawh zawsemin i gen ding hi. I kampi bek tawh hi lo in, i gamtatna mahmah tawh mite hilh pil ding i hanciam den ding hi. 6 T, laimai 110, 112.  [246,247]                            

xXx

KHAWKPI 39
SIANTHONA  A THUPINA

            Cidamna hoih i neihna dingin, sisan hoih i neih ding kisam hi; bang hang  hiam cih leh sisan in nuntakna ahi hi. Pumpi sunga kimanna a nei nawn lote hawlkhia-in a thak piangsak zel hi. An hoih tawh kikhoi-a, huih siangtho tawh kihaha tha a kipiak ciangin sisan in pumpi tung khempeuh ah hinna leh hatna tun kawikawi hi. Sisan luan a hoih leh tua nasep a hoih zawsemin piang ding hi. MH, laimai 271.     
            Pumpi pualama tui zatna in sisan luan a maanna dinga a baihlam bel leh a lungkimhuai bel khat ahi hi. Tui vot tawh kipum-silna in a hoih bel cidamna piangsak hi. Tui lum tawh kipum-silna in khua-ul pusuahna vangte honga, cininte pusuaksak hi. Tui lum leh a lum milmial tawh kipum-silna in phawk theihna sazangte cidamsak-in, sisan luan mansak hi.    Thasaanna in zong sisan kiphawngsakin a luan mansak hi. Thadaha om khongna ah sisan hoih takin luang thei-lo-a, hinna ding leh cidamna dinga a kisam sisan siangtho zong kizel kim thei lo hi. Vun in zong na sem lo pah hi. Cininte zong pusuak thei nawn lo pah hi. Nakpi-a thasaanna tawh manlangin sisan luang hi leh vun in zong nasem dinga, tuap sung zong huih siangtho dim ding hi. MH, laimai 237,238.           
            Tuap pen a nuam theithei-a omsak ding ahi hi. Nuam takin taang thei leh a hatna khang hi. Kigak gawpin kinencip leh a hatna kiam pah hi. Tua bangin ki-omsak mun mahmah hi. Nasep cianga kuunna, tutciil denna khawng pan hi pha pen hi. Tua banga i om ciangin huih tampi kidik thei lo hi. A tung tham bek ah kinaaknaak a hih manin, tua pen a puak (khang) ding zahin puak thei lo hi.      
            Tua a hih manin oxygen a kicing kingah lo hi. Sisan zong tuantual pah hi. Tuap pana husanna tawh a kipaaikhia ding gu a suaksa huih ninte kibilh cip a hih manin sisan zong nin pah hi. Tuap bek hi lo in gilpi, sin leh khuakte zong sukha lai hi. Vun zong hong sidaangin, an gawi zong hong hat lo hi. Lungtang zong [348] hong gim hi. Khuak zong hong navak lo hi. Ngaihsutnate zong hong buai gawp hi, Lungsim zong hon ziing gawp hi. Pumpi bup hong thanem hong zawngkhalin, natna in bop nop hong sa pah hi.
            Tuap in a ninte a paaikhia den a hih manin huih siangtho a ngah den ding kisam hi. A siangtho lo huih in a kitangsam oxygen nei lo a hih manin, sisan in hin sakna tha thak nei lopi-in khuak leh pumpi sung tengah luang pong hi. Tua a hih manin huih kicing taka ngah ding kisam hi. Inn a kineh tettut, huih a kingah lohna, huih a nun Iohna muna teenna in pumpi bup zawngkhalsak hi. Tua bang mun ah khuavot kituak baiha, tawm khat khuavot tuak leh natna dangin zong bawm pah hi. Tua banga inn sunga kibilhcipna hangin nupi tampite cidaangin thazaw uh hi. Huih a diik sasa mah uh diik kikkik uha, a sawtna ciangin tua huihte, tuap leh vun vang pana pusuak gu tawh hong kidim ta hi. Tua bangin huih ninte sisan sung tung kik zel hi. MH, laimai 272-274.    
            Zana huih siangtho a inn sung uah a tum ding phal lo uh a hih manin mi tampi in natna thuak uh hi. Van-a om a khawnkhonga kingah huih siangtho pen nuam i sakpih ding thupha lian mahmah khat ahi hi. 2 T, laimai 528. 
            Siantho ding hanciamna in pumpi Ieh lungsim cidamna dinga a phamawh ahi hi. Vun tung tawnin pumpi sung pana ci-ninte kihemkhia den hi. Kipum sil zelzelna tawh i sianthosak kei leh vun vang awn tampite bingcip pahpah hi. Tua bangin cininte a pusuah pahpah kei leh nin pusuahna dangte’a dingin van-gikpisuak zel hi.  
            Zingsang a hih kei Ieh nitak sima, tuivot miilmial a hih kei leh tui lum miilmial tawh kisil denna panin mi tampi in phattuamna ngah ding uh hi. Khuavot tuak theithei dinga om sangin, maanmaanin kipumsil lecin khuavot na do zo zaw ding hi, bang hang hiam cih leh kipumsilna in sisan luan maansak hi. Sisan pen pumpi pua tham lam tung leh a luandan zong baih zawin man thei zaw hi. Lungsim leh pumpi in zong tua mah bangin tha thak ngah thei hi. Sahualte zong hoih takin [248,249] taang thei zawin, lungsim zong ciimsak zaw hi. Kipum-silna in phawkna sazangte cidamsak hi. Kipum-silna in ngoipi, gilpi leh sinte cidamna leh thahatna piangsaka, an gawi zong hatsak hi.     
            Puante zong sianthosak ding thupi hi. Puante in vun vang pana paikhia ninte na huup hi. Tua a hih manin puante khek zela a kisawp zel kei leh tua a ninte na kilehhuup kik ding hi.                  
            Siantho lohna khat peuhpeuh in natna piangsak hi. Sihna a piangsak lungnote pen mial-a a kihah lo kawm-bu lak khawng, a uih a muat nin lak khawng leh a kawt a ap buan lak khawng ah tam hi. Muatin uiha huih lak ah gu a piangsak dingin anteh theipuam hoih lote leh nahteh kiate, inn kiim nai ah omsak den kei un. Inn sungah zong a nin a muat a uih thei peuhmah omsak kei un.            
            Innkuante’ hatna, maitaina leh cidamna dingin, siantho sinsenna, nitang kicing leh innkuan nuntakna khempeuh ah sianthonalam kizenna kiphamawh hi. MH, laimai 276.                    Pumpi siangtho lo leh nin-a a kikek nemnum puante tawh Pasian in amaute mu nuam lo a hihna naupang note hilh un. Puante siangtho-a a hi linliana silhna in ngaihsutna a siangtho leh a hoih piangsak hi. A diakdiakin vun tawh a kisawh kha na khempeuh sianthosak ding ahi hi.     
            Thumaan in ama khe hoihte a nin a siang lo lampi ah nga ngei lo hi. Israel’ tate in sianthona lamah zongsatna a neih ding uh a deihciltel Pa in tu huna A mite’ inn sungah zong a nin khat beek a om ding phal lo ding hi. Pasian in a siangtho lo peuhmah pen lungkimna tawh en ngei lo hi.                     
            A nin, a kihah lo inn sung kiu khat in, a nin a kiah lo lungsim (kha) kiu khat a piangsak ding ahi hi.            
            Vantung pen siangtho-in kician hi. Pasian’ khawpi kongpi pana a tum dingte in hih leitung ah a sung a pua uh sianthona tawh a kituam ding kisam hi. ML, laimai 129. [249, 250]

KHAWK 40
ANNEK TUIDAWN

            I annek i tuidawn panin i pumpi kilam hi. I pumpi ci-le-sate kisia-in beibei hi. I pumpi tung nate a tat sialin a bei om dena, tua a bei teng i nek i dawnte in din kik zel hi. Pumpi tunga om na khempeuh vaak kim a kul ahi hi. Khuak zong ama a khop ding tawh vaak kul hi. Guhte, sahualte leh phawkna sazangte zong vaak kul hi. I nek i dawnte sisan-a a pianna, tua sisante pumpi tung nate kilamtohna-a a kizatna, cihte pen lamdang mahmah hi. A hi zongin tua pen tatsat lo-a a piang hi-a, phawkna sazang, sahual leh ci-le-sate pen hinna leh hatna kiguan den hi.        
            Pumpi lamtohna dinga a kitangsamte a kingah theihna dingin annek tuidawn teel siam ding kisam hi. Tua banga teelna ah lim i sak bek a hoih hi lo hi. An nekdan a maan lohna hangin gongthahna piang hi. Khat veivei cidamna a susia ante hong duhsaka, tua in hatna sangin zawmna piangsak zaw hi. Minam ngeina annek tui dawndan zong zuih ding a hoih pen hi khol lo thei hi. Mun citenga a om natna leh satnate pen zantaak an tawh kisai-a mi tampi in i zat khialhna tawh kisai mahmah hi.   
            An hoih a kici khempeuh zong a tawntungin ei’ kisapna tawh kituak kim khol lo hi. Annek tuidawn teelna ah kidop mahmah ding kisam hi. I zantaak an pen a hun zui, i omna khuahun tawh kituak leh i nasep tawh kizui a hih ding kisam hi. Hun khata nek dinga a hoih ante pen a khuahun dang khat ciangin kituak lo thei zel hi. Nasepna tuamtuam tawh kizui-a a mimal tawh kituak ding an hoih a tuamtuam om hi. Thatang tawh na a semte’a dinga phattuamna a piangsak ante pen, lungsim tawh na a sem, tutsa tawh na a semte’a dingin hoih khol lo zel hi. Cidamna tawh kituak ding an a nam tuamtuam Pasian in hong pia a hih manin, mimal in eima kisapna tawh kituak bel ding i sinkhak leh i theina dan tawh kizui-in i teel siam ding kisam hi. MH, laimai 295-297. [251]

Mihing’ Zantaak An Ding Pasian’ Sehsa

            Annek tuidawn a hoih pente i theih na dingin, mihing’ zantaak an dinga Pasian’ sehsa i kan kul ding hi. Mihing piangsaka, ama phatmawh teng zong a thei Pa in, Adam’ an ding na sehsak hi. “En in, tang a nei ankung khempeuh leh, … gah nei-a a gah sunga tang a nei singkung khempeuh nang kong pia hi; tua in na an ding ahi hi,” ci hi. Piancilna 1:29. ARV. Eden nusia-a samsiatna nuai ah lo khawhna tawh a kivaak ciangin mihing in lo sunga khai gahte,” nek theihna zong ngah hi. Piancilna 3:18.       
            Hong piangsak Pa in eite’a dinga hong teelsak zantaak an sungah khai gah, sing gah, leh anteh thei-puamte kihel hi. Tua ante ama pian bang lel a baihlam theithei-in bawla nekna in cidamhuai-in thangahhuai pen hi. Nam tampi kigawma a hong lawpsak zantaak an in a hong piak theih loh, thahatna, thuakzawhna leh lungsim navaknate, tuate in hong pia hi. MH, laimai 295,296.      
            Cidamna a kipna dingin hoiha tha a piangsak an tampi i ngah ding kisam hi.  
            Hoih takin geel peuh lehang, cidamna dinga a hoih pente gam khempeuh phial ah kingah thei hi. Nam tuamtuama kibawl buh, mangbuh, vaimim, mangbuh hamte mun khempueh kipuak hi; begap, betang leh besan khawng zong tua bangmah ahi hi. Tuate leh gam dang pana hong tung singgahte leh, a munmuna a po anteh theipuamte in, ganhing sa nek kul lo in zantaak an a kicing hong ngahsak thei hi.       
            Lenggah, ling-suaklu, apple, pear, meitei, li-chi kici sen-suak lu cih bangin singgah keute a kimana a kingahna khepeuh ah nek ngei zel ante sangin tuate kine leh nasem mihing tuamtuamte’a dingin cidamna leh thahatna a hoih pente piangsak ding hi. MH, laimai 299.

An Huan Siamna

            An huan pen a thuneu pilna hi lo hi. Nuntakna ah a phamawh bel khat ahi hi. Numei khempeuh in a theih (251,252) dinga kilawm pilna ahi hi. A zawng zaw deuhte’ phat-tuampih theih dingin hilh ding zong kisam hi. An a lim ding, a baihlam leh tha-a a piang dinga bawlna dingin siamna kisam hi. Tua ding pen hih mawh hi lo hi. Anhuante in a baihlam theithei leh a cidamhuai theithei-a an huandan a theih ding uh kisam hi. Baihlam dinga, cidamhuai dinga, zong lim veve ding hi. MH, laimai 302,303.     
            I zantaak ante a baihlam theithei-a bawl theih ding i hanciam ding hi. Pasian’ hehpihna tawh, pumpi lam-tohna dinga kitangsam, tha a piangsak an nam tuamtuamte gam khempuh ah om hi. Tuate cidam a huai leh a lim theithei a bawl ding ahi hi. CD, laimai 94.             Mi tampite in hi thu a phamawhin ngaihsun lo uh a hih manin, hoih taka bawl ding hanciam lo uh hi. Vokthau, gui (butter) leh ganhingsa zang se lo in, an pen a baihlam, a cidamhuai leh a ol theithei-in kibawl thei hi. Siamna pen a baihlama bawl theihna tawh kopsak kul hi. Tua bang hih theina dingin numeite in lai a sim uh kula, a simna uh bangin lungduai takin a zat khiat ding uh kisam hi. 1 T, laimai 681. 
            A thak thei leh ganhing thau a tuamtuam kihel se lo in singgahte leh anteh theipuamte, bawngnawi leh bawngnawi-khal tawh a baih lamin kibawl leh a cidam huai bel zantaak an suak hi. CH, laimai 115.      
            Ganhing thau kihel lo-a khaigahte leh singgahte ama pian bangbanga kibawl pen vantung ah laaktohna a ngah dinga kiging khol hi’ng a cihte’ kuanga kilui ding an ahi hi. 2T, laimai 352.        
            Annek tuidawn lakah cikhum kinak zat thei lua hi. Cikhum tam pipi a kihel cake, pudding, pastry, jelly, jam khawng a kici moh a tuamtuamte in gong sasak hi. Bawngnawi, aktui leh cikhum a kitam hel mohte (custard, pudding) siahuai phadiak hi. Bawngnawi leh cikhum nek khop ziahziahna pen pelh ding ahi hi. MH, laimai 302.    
            Annek bawlna ah cikhum tawm semsem leh nisatna hanga natnate hong tawm zawsem ding hi. CD, laimai 95. (252,253)       
            Bawngnawi a kizat leh lim taka huan min ding kisam hi; tua hi leh bawngnawi pana kingah thei natnate lauhuai lo zaw deuh ding hi. MH, laimai 302.           
            Bawngnawi a kinek ngam nawn loh hun hong tung ding hi. A hi zongin bawngpi a cidamin a nawi lim takin kihuan peuh leh a hun lopi-in patauh masak kul lo hi. CD, laimai 358.

Mui Nam Lua Ante

            Leitung mite in a zat pahpah uh mui namsak lua (masala cih bangte) in gilpi an gawi susia hi. CD, laimai 339.      
            Tu hun ciangin lungsim a phawng lo theithei annek tuidawn a hoih bel ahi hi. Mui namsak theite pen a pian lim himhima lauhuai ahi hi. Ankam tang, mui-za-san (pepper), masala leh tuate leh citui tawh kidiah gah-le-tehte in gilpi sasakin, sisan mualsak-in ninsak hi. Zuhaite’ gil sung, a sat lialuana in zuhang’ nasepna a hong lak ahi hi. A sat suah thei mui namte in zong tua bang mahin na sem hi. A sawt ciangin an mawkmawk tawh lungkim nawn lo hi. A gawl in a phawng thei zawsem ding ante deihin duhgawh semsem hi. MA, laimai 325.    
            Mi kimkhatte in an lim theithei duh uha, lim a sakte uh a nek khak kei uh leh a an kam uh lim nawn lo hi. Mui nama a thak ante a kilui tak ciangin, mei-am a bang ante a nekna uh tawh a gilpi uh na semsak uh hi. Tua bangin bawl den uh a  hi manin, a sat suah zo lo ante limsa nawn lo uh hi. CD, laimai 340.      
            Mui nama a thakte in gilpi uum sung sat suah masa phota, a sawtna ciangin, a khawphawk theinate dong susia hi. Sisan hong mualin, ganhing lungsim hong vomin, pilna leh gamtat hoih zawhnate zawngkhalin, kihhuai lunggulhnate’ sila suak hiau hi. Nu in innkuan sungah baihlama tha a piangsak zantaak an a lui theihna dingin a hanciam ding kisam hi. CH, laimai 114. (253,254)

Annek Hun Maanna

            An nek khit ciangin nai nga sung bang gilpi a tawl ngak ding kisam hi. An nek hun kik masiah gilpi sungah an kam khat zong a lut loh ding kisam hi. Tua hun awng sung teng gilpi in ama na sem dinga an a tam zaw a guang thei dingin om ding hi. CD, laimai 179.                 Hun maana an nek ding lim takin zuihhuai hi. An nek hun kikal ah moh khawng singgah khawnga kipan nek theih a tuamtuam bangmah nek ding hi lo hi. An nek hun maan lohna in gilpi an gawi cidamna susia-a, pumpi cidamna leh maitaina zong sukha hi. Naupangte in ankuang hong um uh ciangin, an hoihte hong duh nawn lo uh hi. Amau’a dinga a lauhuaite hong lung gulh uh hi. MH, laimai 384.           
            Tawlnga dinga i lup tak ciangin, gilpi in zong ama nasep a zawh khit ding kisam hi; pumpi tung na dangte a tawlngak mah bangin amah zong a tawlngak ding ahi hi. A tu cip dente’a dingin nitak an nek hak luat bang lauhuai phadiak hi.        
            Sun sung tengin gilpi an gawi pen na kinak sepsak lua a hih manin, gil kial lua-in an kiduh mahmah thei hi. Khat vei an a kinek khit ciangin an gawite zong a tawl ngak ding uh kisam hi. An nek khat-le-khat kikal a tawm belin nai nga hiam nai guk hiam peuhmah a kihal ding ahi hi. Hi banga a kisin nuam mi a tam zawte in, ni khatin thum vei sangin nih vei an nek a hoih zawkna hong mu ding uh hi. MH, laimai 304.  
            Ni khata nih vei an nek pen cidamna dingin hoih hi cih kimu hi. A hi zongin thu tuamtuamte’ hangin thum vei nek ding a kisam mi zong om ding hi. Tua banga a nete in nitak an pen tawm nek dinga, a gawi nop mahmah ante zong hi ding hi. MH, laimai 321.                     Sangnaupangte in lungsim leh thatang a zat khop uh ciangin, an nek a thum veina pen kham ding hi lo hi. Sangnaupangte an a thum veina nesak un. Anteh theipuam kihel lo, an baihlam, a cidamhuai, singgah leh moh khawng hi ding hi. CD, laumai 178. (254)                     
            An a sa lua a hih kei leh a vot lua nek ding hi lo hi. An a vot-a leh gilpi in a gawi theih ciang dong a lumsak dingin a hatna teng zang phot hi. Tui vot lua dawnna zong tua mah bangin lauhuai hi; tua mah bangin a sa lua dawnna in zong tha kiamsak hi. An nek lai takin an tui tam a kidawn luat leh, gilpi in an gawi theina dingin tua a tui teng a huup gaih phot kul a hih manin, an gawina haksasak tuam hi. Ci tam (al) lua zang kei in. Masala tawh kidiah anteh leh singgah-a kipan mui nam lua ante ne kei in. Singgah tampipi ne in. Tua hi leh an nek lai taka tui a hong duhsak a hong sat suah teng hong bei ding hi. An pen dam takin ne dinga, hai zan dikdek ding hi. Ciltui pen an tawh hoih taka a kihel zauna ding leh an a zansak tuite in na a sep pah theihna dingin tua pen a kisam ahi hi. MH, laimai 305,306.

Cidamnalam Kipuahphatna Thute Zatdan Ding

            Annek tuidawn kipuahphatna ah ngaihsut siamna taktak om hi. A zai mahmah leh a thuk mahmahin kankhiat kula, na khempeuh ah ama zatdan tawh kibang lo midangte’ zatdan kuamah in a gen siatsak ding hi lo hi. Mi khempeuh’ zatdan kilamdang lo-a a kibang ding ngeina khat bawl ding hi thei lo hi. Tua tham lo in kuamah in amah leh amah mi khempeuh’ etteh a hi dingin kingaihsun kei hen. Mi khempeuh in an a kibang ne thei lo hi. Mi khat’a dinga a cidamhuai a lim ante pen a dang khat’a dingin lim khol lo in, zong siahuai zaw kha ding hi. Mi kimkhat in bawngnawi ne thei lo hi, kimkhatte in lah nuntakpih zel hi. Kimkhatte begap leh betang khawng tawh a kilem loh hangin, kimkhatte in cidampih mahmah zel hi. Kimkhatte’a dingin an hamhawi hoih mahmaha, kimkhatte in ne thei lo zel hi. MH, laimai 319,320.      
            Annek tuidawn zongsatna hoih lo a kineihkhak nak leh ziakai lo in kipuahphat ding kisam hi. Gilpi khelbawlna hanga gilpuak natna a pian ciangin, tua banga gim a pia thei khempeuh hep khiatna tawh tha hatna a om lai sun teng a bei thuah lohna dingin limtakin hanciam ding kisam hi. Sauvei a kikhelbawl khinsa gilpi [254,255] pen dam siang kik ngei nawn lo kha ding hi; ahi zongin annek tuidawn kidawm peuh leh a siat thuah ding phatuam dinga, tampi mah in zong damna a tawm a tam ngah ding uh hi.     
            Thatang tawh nakpi-a na a sem mi-thahatte in, tut khongsa-a na sem dente bangin annek tuidawn a tawm a tam leh a hoihna zah kidop luat dingin kisawl lo hi; a hi zongin nekna leh dawnna ah amaute kidawm siam le-uh a cidamna uh hoih zaw veve ding hi. Kimkhatte in a nek a dawn ding uh ngeina kician kibawl thei leh deihuh hi. Mi khat in mi dang khat’a dingin ngeina kician bawlsak thei lo hi. Mikim in ngaihsutna tawh gamta-a, kidawm siama, thu guipi banga a gamtat ding uh hi lel hi. MH, laimai 308-310.           
            Annek tuidawn kipuahphatna neih toh den ding ahi hi. Ganhing tungah zong natna tam semsem a hih manin, bawngnawi leh aktui nekna zong hong lauhuai semsem ding hi. Tuate’ taang dingin a cidamhuai, a man ol nate ngahna ding hanciam ding ahi hi. Mun cihtenga om mite in bawngnawi leh aktui kihel lo theithei, a hi zongin cidamhuai-a a lim veve ante a huan theih na’ng uh hilh ding kisam hi.                  
            I pumpi don lo-a i khelbawl ciangin, Pasian a zahtak lo kisuaka, Ama nasem dinga zong a kilawm lo kisuak hi. Lim lah lima tha lah a piangsak ding an tawh pumpi vaakna ding pen inn sung vaihawmte’ masuan khatna ahi hi. Annek tuidawn ding leina ah ciil luat sangin, puansilh nikten leh inn sung vanzat a tawm man zawte neih ding hoih zaw hi.                     
            Inn sung vaihawm kim khatte in zin-le-leng  lim taka a vaak theihna ding un amau’ innkuan ankuang ciilbawl thei uh hi. Tua ding hi lo hi. Zin-le-leng vaakna ah a baihlam theithei hi zaw ding hi. Innkuan sung kisapnate don masakin nei zaw un.                   
            Sum zat siam lohna leh bawl tawm ngeinate in, kiphamawha thupha zong ahi ding zin-le-leng vaakna mai dal thei hi. Theih kholh loh zin-le-leng hong om zongin inn nupi a buai thuah lohna dingin i nek ngei zah sanga a val zaw zeka huan ding ahi hi. [255,256]            Na zantaak an lim takin ngaihsun in. A sia a pha kan tel in. Kidop siam hanciam in. Na duhna pen a thu tawh uk in. Tam lua nekna tawh na gilpi khelbawl ngei ke’n. Cidamna dinga a phamawh a lim a hoih ante lah tang se ke’n.                      
            Cidamna thute tela, thu guipi tawh a ki-uk mite in a tam lua a hi-a a tawm lua a hi zongin, a lua peuhmah pelh ding hi. A duhgawh uh a phatna ding bek hi lo in, a pumpi uh a kilamna dingin annek tuidawn teel ding uh hi. Pasian’a ding leh mihing’a ding a hoih thei bela na a sep theihna dingun a hatna khempeuh uh kem siam ding uh hi. A sia a pha ngaihsutna tawh a duhna uh uk uh hi. Tua manin amaute in pumpi leh lungsim cidamna ngah uh hi. Midangte’ tungah amau’ muhdan a gen thapaih loh uh hangin, thugui maan tawh gamta uh a hihna a lim a lai uh tawh lak uh hi. Tua bang mite in a hoih lamah huzap zau tak nei uh hi. MH, laimai 310-323.                   
            Sabbath ni’a ding an pen ni danga sanga a tam zaw leh a nam tam zawin bawl tuan ding hi lo hi. Tua sangin an pen a baihlam hi zaw dinga, khalam thute tel thei-a, lungsim siangtho-a a navakna dingin tawm nek zawk ding kisam hi.                   
            Sabbath ni-a an huan loh ding a hoih ahi hi; a hi zongin an a vota nek ding hoih lo hi. Khuadam hun ciangin a zana an kihuansa pen lumsak kik ding ahi hi. An pen a baihlam mahmah ta zoingin lim dinga duhhuai ding hi. A diakdiakin naupang a omna innkuante in Sabbath ni-in, ni sima a innkuan uha a nek ngei loh uh an pawl khat vaihawm le-uh a hoih ding ahi hi. MH, laimai 307.

Duhna Leh Lunggulhna Uk Ding

            Mihing in a tuah khak ding zia-etna a lian bel khat in duhna tawh kisai ahi hi. Lungsim leh pumpi kikal ah a lamdang mahmah kizopna om hi. Khat-le-khat kithuk kik uh hi. Pumpi tunga om na khempeuh kituak taka a tat theihna dingin pumpi cidama a hatna ding pen i nuntakna ah i kan masak ding ahi hi. Pumpi don lohna in lungsim don lohna hi pah hi. Pasian’ tate in [256,257] pumpi dammawh leh lungsim zawngkhal tawh a om uh leh Pasian’ minthanna piang thei lo ding hi. Dammawh lawh lianga duh peuh balmal pen khua-phawk theihna khelbawl gawpna ahi hi. Nekna ah a hi-a dawnna ah ahi zongin, kidop lohna neng khat peuh a nei mite in a thatang hatna uh a mawk beisak hi-a, gamtat hoihna zong a kiamsak uh ahi hi. Pumpi thukham palsatna pana thuh kikna amaute in thuak ding uh hi. 3T, laimai 485,486.        
            An tam nekna leh lunggulhna banga a gamtatna uh tawh mi tampi in lungsim tawh ahi-a thatang tawh ahi zongin sep zawh mel nei lo uh hi. A ganhing lungsim uh thahatin, gamtat hoihna leh khalam om zia thakiam pah hi. A lian a kang tokhom kiimah i din ciangin, mi tampite’ nuntak zia a kiciaptehna ah bang a ci zen tam! Pasian in amaute a piaksa a hatnate uh susia lo uh hi leh amaute in bang teng hih zo ding cih tua ni tak ciangin hong mu ding uh hi. Pasian in amaute a piak a thatang uh leh a lungsim hatna khempeuh uh Pasian’a dingin zang uh hi leh bang zahta-a asang siamna ngah thei ding uh cih amaute in hong phawk phing ding uh hi. Amaute dahna tawh kisik ding uha, khat vei nungta kikin kipanpha nuam ding uh hi. 5T, laimai 135.    
            Khristian taktak ahi peuhmah in a duhna uh leh a lunggulhnate uh uk ding uh hi. Duhna sila kol panin a suahtak kei leh amah a thumang Khris’ nasem taktak hi thei lo ding hi. Duhna leh lunggulhna nung zuihna hangin thumaan in lung sungah nasem thei lo hi. Duhna leh lunggulhna in mi khat a uk ciangin, ama nuntakna, a pumpi leh a lungsim pen thumaan-i vangliatna in siangthosak thei lo hi. 3 T, laimai 569, 570.  
            Gamlaka Khris in sau veipi an a tan a deihna bulpipen, eite in angsung nialna leh kidek kidamna i neih ding a phatmawhna a hong hilhna ahi hi. Tua nasep pen i ankuang panin kipan dinga, nuntakna vai khempeuh ah khauh taka zat khiat lai ding ahi hi. Leitung Tanpa in mihing a thanemna pana a huh dingin [257] van panin hong kum suk ahi hi. Jesu in a puak vangliatna tawh mihing in duhgawhna leh lunggulhna a zawhzawhna ding hatna ngaha, na khempeuh ah zong gual zawhna a ngahna ding ahi hi. 3 T, laimai 488.

KHAWKPI 41
ZANTAAK AN-A SA NEKNA

            Pasian in mihing’ nek dinga a sehsa ante i nu i pa masate na pia hi. Sinhing khat peuh thah ding pen Ama ngimna tawh kilehbulh hi. Eden huan ah sihna a om ding hi lo hi. Huan sunga om singkungte’ gahte in mihing’a dinga kisam ante ahi hi. Tuiciin tun masiah ganhing sa nek ding Pasian in phal lo hi. Mihing’ kinamtaak theihna ding khempeuh kisusia khin hi. Tua ahi manin Topa in tembaw sunga Noah in a tumpih a siangtho ganhingte’ sa a nek dingin phal hi. A hi zongin ganhing sa pen mihing’ an dinga a cidamhuai bel hi lo hi.             Tuiciin tun khit ciangin mite in ganhing sa nak nek mahmah uh hi. Mihing a paizia kisia-in, amah a paingsak Pa’ lang khat ah kiliansak gawp ngingei-in, ama thuthu-in tat sawm ahihna Pasian in mu hi. Tua a hih manin Amah in mawhna tawh a dim amaute’ nuntakna a tomsak dingin ganhing sa a nek ding uh tua khansau mite phal hi. Tuiciin tun zawh a sawt lo in mihingte a pum uh lah hong neu suk pahin, a khan uh lah hong tom suk pah hi. CD, laimai 373.                  
            Eden huana mihing’an ding a teelsakna ah Topa in zantaak an a hoih bel hong lak hi. Israel mite’a dinga teelsakna ah zong tua bang mah hong hilh hi. Amaute’ tungtawnin Topa in leitung mite hilhin thupha pia nuam hi. Tua dinga a hoih bel an amaute a pia ahi hi. Sa pia lo in, “vantung an” a hi manna pia hi. Egypt gama sa amaute a kipia hi beka, tua nangawn tawl khat sung bek ahi hi. Tua in tul tampite’ tungah natna leh sihna tun hi. Hi napi, sa kihel lo an a kipiak pen lungkim zo ngei lo hi. A simtham a hi-a a kilangin ahi zongin amaute a phunphunna uh leh a tautauna uh a hang pen tua hi dena, a tawntungin lah kinesak lo hi.        Kanaan gam a tun uh ciangin Israel mite’n sa a nek ding uh kiphal a hih hangin siatna piang ding a tawmna dingin limtakin na kiciangtansak hi. Voksa nek ding kikham hi; tua mah bangin siang lo a kici ganhingte, [258] vasate leh ngasate zong kikham hi. A kiphal ganhingte panin zong a sisan leh a thau nek ding nakpi-in kikham hi.   
            A cidam ganhingte’ sa bek nek theih ding ahi hi. A kilai gawp a hi-a, ama thu-a a si a hi zongin, a sisan limtaka a luangkhia lo peuhmah nek ding hi lo hi.          
            A zantaak an ding uha Pasian’ sehsa bangbang a zuih loh uh ciangin Israel mite in nakpi-in gimna thuak uh hi. Sa an lunggulh uha, siatna tuak pah uh hi. Amaute in Pasian’ deih zia-le-tong cin zo lo uha, A ngim sakna tung zo lo uh hi. Topa in “amaute’ ngetna pia-a, a hi zongin a kha un gawn lawh hi.” Late 106:15. Amaute in khalam nate sangin leitung nate manpha sazaw uh hi. Amaute’a dinga Pasian’ ngimsak a siangtho dinmun amaute’n ngah zo lo uh hi.      
            Sa a nete in khaigah leh anteh theipuamte a dawl nihna ah a ne pan uh ahi hi. Bang hang hiam cih leh ganhingte in a khanna (nuntakna) dingun tuate na ne uh hi. Khaigah leh anteh theipuam sunga om nuntakna pen a nete’ sung tung hi. Ganhingsa nekna panin eite in i ngah sawn hi. I nek dinga Pasian’ sehsa ante mah ne pah lel lehang bang zahta in hoih zaw ding hiam! MH, laimai 311-313.

Natna Leh Satna Tampi Hong Pianna

            Sa pen an hoih bel hi ngei lo hi; ganhing sungah natna khang semsem a hih manin, tu-in sa nek ding nakpi-in khamhuai ta hi. Amaute in a sa a nek uh ganhingte a hin lai-in mu thei uh hen la a bangci cih theithei uh hi leh sungnim (luaksuak) in ne lo ding uh hi. Mite in TB leh cancer natna lungnote tawh a kidim sate a ne den uh ahi hi. TB cancer leh sih zawhna ding natnate tua bangin kingah hi. MH, laimai 313.                    
            Natna a kingah theihna pen sa nekna panin a zah sawmin khang hi. 2 T, laimai 64.              Ganhingte in natna vei uh hi. A sa uh i nekna panin eite in i si i sa sungah natna khaici a tuh i hi hi. Malaria (nattun) a tamna mun bang va tungkha (258,259) lehang, kithuak zo lo zaw pah hi. A kilawh thei natna a tamna bang va tungkha lehang zong i pumpi in tua natnate a dal zo lo ding hi pah hi.          
            Cancer leh meima-tum banga natna hoih lote a tamna pen a sisa ganhing sa nekna pan hi pipen a hihna Pasian in kei hong lak hi. CD, laimai 386-388.       
            Mun tampi ah ngasate in a nek uh a kihhuai ante panin natna ngah uha, tua panin natna hong piang sawn hi. Khuapite pana kibua ninte a nekha ngasate tua bang hi phadiak hi. Nin kibua tawh a kivak ngasate gamlapi tung thei uha, tui sianna munte panin kiman thei zel hi. Tua bang ngasate a kinek ciangin upmawh lohpi-in natna leh sihna hong piang hi.                    Sa nekna pana a piang pen thakhatin kiphawk lo kha ding hi; a hi zongin lauhuai kei cih theihna om lo hi. A sisan uh gu sawha natna a piangsak pen a sa nek uh a hih lam mi tawm khat bek ki-umsak zo ding hi. Sa nekna pan beka a piang natna tawh mi tampi si uh hi. Hi napi, amau mahmah leh midangte in tua bang a hi dingin um mawh lo lai uh hi. MH, 314,315.

“No’a Dingin Vok Siang Lo”

            Vok-i si-le-sa sungah lungno tampi om hi. Vok tawh kisai-in Pasian in, “Note’a dingin siang lo hi; a sa na ne kei ding uha, a sisa a luang zong na lawng kei ding uh hi,” ci hi. Thuhilh-kikna 14:8. Voksa nek ding hoih lo a hih manin hi thu a kipia ahi hi. Vok pen nin luakte hi a, tua sem ding bek maha a kimang hi. Bang hun bang hunin mihing in voksa nek ding hi lo hi. A pian lim himhim kihhuai-a, a kihhuai na khempeuh tawh a kivaak ganhing peuhmah pen a sa cidamhuai thei ngei ding hi lo hi. MH, laimai 313,314.        
            Voksa pen zantaak ana kizang pha pen khat a hih hangin a lauhuai bel khat ahi hi. Pasian in a thuneihna a lah nop man beka Hebrai mite voksa nek ding kham hi lo hi. Mihing’an dinga a hoih loh man hi zaw hi. Pumpi tung teng TB bawk (scrofula) hong dimsak dinga, khualumna munte ah phak natna piangsakin, (259,260) natna namkim hong piangsak ding hi. Pumpi tunga natna a piansakna pen khuadamna munte sangin khualumna munte ah nasia zaw tham ding hi. Sa dang khempeuh sangin voksa in sisan ninsak pen hi. Voksa ngentang a nete in natna vei hamtang ding hi. CD, laimai 392,393.    
            A diakdiakin khuak-i khuaphawk theihna sazangte thakiamsakin, haisak a hih manin, a siangtho nate theithei nawn lo in, a mawkmawkte tawh kikimin ngaihsun hi. 2 T, laimai 96.

            Voksa nekna a siatna pen inn pualama thasaanna tampi a neite in, inn sung vive ah oma, tutsa nasepte sema, khuak tawh na a semte zahin thuak-kha lo ding uh hi. CD, laimai 393.

Lungsim Leh Kha A Sukkhakna

            Sa nekna hanga a piang gamtat hoih lohnate pen pumpi cinatna sangin tawm zaw tuan lo hi. Sa nekna in cidamna susia-a, pumpi a susia peuhmah in lah lungsim leh kha zong sukha hi. MH, laimai 315.             
            Sa nekna in lungsim puakzia kikhel saka, ganhing lungsim hong guan hi. I nek bangbang tawh a khuasa i hi hi. Sa tam nekna in thu theihna kiamsak hi. Sangnaupangte in sa ciam het kei le-uh a lai sinna uah hat zawkan lai ding uh hi. Sa nekna hangin mihing’ sunga ganhing lungsim pen thahat a hih manin, theih siamna zong a cialcialin kiam hi. CD, laimai 389.     
            I zantaak an a baihlam theithei a hih ding hun pen tu hun ahi hi. I tate’ mai ah sa kuang lui ding hi lo hi. Sa nekna in lunggulhna hoih lote khanglo sakin thahatsak hi. Gamtat hoihnate kiamlam manawhsak hi. 2 T, laimai 352.       
            Khris hong pai baih ding hi ci-a a lamen mite’ lakah kipuahphatna a nasia zaw kimu ding hi. I mite’ lakah cidamnalam kipuahphatna a om ding ahi hi. Tua pen tu-in om nai lo hi. Ganhing sa a nekna uh tawh a pumpi, a lungsim uh leh a kha uh’ cidamna a (260,261) susia mite in sa nekna a lauhuaina a phawk ding uh kisam hi. Sa nekna tawh kisai-a tu-a a lang ciang bang bek a kikhelte, Pasian’ mite tawh a ton khawm nawn lo dingin, amaute’ kiang pan paikhia ding uh hi. CH, laimai 575.  
            Thumaan ka um hi a cite in, a kampau uh leh a gamtat uh tawh Pasian leh Ama nasepna a min siat khaksak lohna dingun a pumpi uh leh a lungsim hatnate uh limtaka a kep ding uh ahi hi. I zongsatna leh i gamtatnate Ama deihna bangbang a mang dinga i koih ding ahi hi. I nek i dawnte limtaka i ngaihsut ding ahi hi. Pasian’ mite sa nek loh ding lamah kip taka a din ding uh a hihna kei’ tungah siang takin hong kilak hi. Pasian’ mite in sisan siangtho leh lungsim navak a deihuh leh sa a nek nawn loh uh kul ding hi cih thu, amaute in a man ding deih kei leh kum sawmthum tawntung Pasian in hong gen ding a hi hiam? Sa nekna hangin ganhing lungsim thahatin, khalam lungsim thakiam hi. CD, laimai 383.

Zantaak An Khelna Ding Hilhna

            Tha hatna dingin sa nek kul hi ci-a ngaihsutna maan lo hi. Sa nek lohna tawh pumpi tunga kisamte kingah thei zawsema, cidamna zong kingah zaw hi. Khaigahte, singgahte leh anteh theipuamte zong sisan a hoihsak ding, thu-a a lut veve ahi hi. Tua zaha tha a piangsak thei ding pen sa nekna in hong pia zo lo hi. Sa nekna pen damna leh hatna dinga a phamawh hi leh, a cil a pata mihing’a dinga kisehsak an lakah ganhing sa kihel ding hi.

            Sa nek a kikhawl ciangin tha zawin hatna a bei tawh kibang kisa hi. Mi tampi in hi pen sa nek lohin phamawh hi cih paulapin nei uh hi. Sa neekna in sat suaha, sisan mual sakin, phawk theihna sazangte phawng a hih manin, nek loh ciangin a kihongh ahi hi. Zuhaite in a zuthawl uh a khen zawh loh mah bangin, sa nete in zong a tan ding uh haksa sakha ding uh hi. A hi zongin kheel le-uh hoih zaw tham ding hi. (261)    
            Sa a kinek nawn loh ciangin a taang dingin a lim ding leh tha-a a piang ding khaigah, singgah leh anteh theipuam a tuamtuam nek ding ahi hi. A zawdiakin a thahat lote leh thatang tawh na a sem dente’a dingin kisam zaw hi. MH, laimai 316. 
            A zawdiakin anpi-a sa a kinek lohna mun ah an huan siam ding kisam kha ding hi. Sa taang ding bang khat teitei bawl kul hi. Tua banga sa taanga a kizangte pen sa a kilunggulh nawn lohna dingin lim takin bawl kul hi. CG, laimai 384.  
            Sa nekna pana an gina lo nekna ah a kikhel innkuan pawl khat tawh ka kithei hi. Lim takin bawl lo uh a hih manin a gilpi un deihlo hi. Tua ciangin cidamnalam kipuahphatna pen ko tawh kituak kei, ka tha uh zong kiam gawp hi, ci-in hong gen uh hi. An pen a baihlam theithei-in bawl dinga, a hi zongin a duhhuai theithei dingin bawl ding hi. 2 T, laimai 63.                     Sa nekna, niangteh leh kawphi dawnna leh a dang a lauhuaite nekna a beibang pawlpi in a pelh (tan) ding uh Topa’n a hong hilh pen amau’ phat tuamna ding ahi hi. Cidamhuai-a a hoih, kinamtaak theihna ding an dang tampi om hi.                     
            Topa hong pai ding ngaka om mite lakah a sawt ciangin sa nekna hong bei ding hi. A zantaak an lak uah sa hong kihel nawn lo ding hi. Tua ding pen lametin nei den dinga, tua ciang i tuna dingin i hanciam ding hi. CD, laimai 380,381.                      
            Theih siamna, gamtat hoihna leh thatang hatnate, sa nek ngitngetna panin kiam hi. Sa nekna in pumpi nate teknek sakin, theih siamna mial sakin, gamtat hoih ding theihtheihna mawlsak hi. Ute naute aw, sa na khoih vet loh ding uh no’a dinga a hoih bel a hih lam hong gen ka hi hi. 2 T, laimai 64. (261,262)

KHAWKPI 42
CIDAMNALAM KIPUAHPHATNA AH CIHTAKNA

            (Ciapteh ding: Cidamnalam kipuahphatna ah a kisam phadiak teng 1909 kum General Conference session-a Mrs. White in a gen ahi hi. Thu Kaikhawmte)

            Cidamnalam kipuahphatna thu i mite’ kiangah a gen dingin kei hong kisawl hi. Bang hang hiam cih leh cidamnalam kipuahphatna thu guipite a zuihna uh panin mi tampi nung tolh khin uh hi.      
            Pasian in A tate Khris’ sungah a tun cing numei pasal a hih dinga a khan toh ding uh ngimna nei hi. Tua bang a hih theih na dingin amaute in a lungsim, a nuntakna uh leh a pumpi uh a maana a zat uh kul hi. A lungsim leh a thatang hatna uh khat beek a mawk beisak ding uh hi lo hi.          
            Ci a dam denna dingin bang hih ding cih a thupi masa bel ahi hi. Pasian zahtakna tawh hi thu i kan leh, i pumpi leh i khalam mainawtna dingin annek tuidawn ah kidop ding a hoih bel a hihna i mu ding hi. Hih thu lungduai takin kan ni. Hih thu ah hoih taka i kalsuan theina dingin theihna leh ngaihsut siamna i kisam hi. Pianpih thukhamte i nial ding a hi kei-a i zuih ding ahi hi.          
            Sa nekna, niangteh leh kawphi hawpna leh a lim lua leh a cidamhuai lo an bawlnate a hoih lohna thu theikha-a, tuate a zang lo dinga Pasian tawh a kiciamsa mite in, cidamhuai lo ci-a a theih uh ante a duh bangun hong ne nawn lo ding uh hi. Duhnate siangthosaka, a hoih lo ante khempeuh i tan ding Pasian in hong deih hi. Ama mai ah mi-kicingtaak khata A mite a din theihna dingun tua na pen a kisem ding ahi hi.
            Pasian’ mi a om laisunte pen a piangthak mite hi ding hi. Pianthakna leh sianthona a pian theihna dingin hih thu a kipuak ding ahi hi. Hi nasepna ah Pasian’ Kha’ nasepna i phawk ding hi. Hih thu pen a lamdang a kician thupuak ahi hi; a sang thei mite’a dingin thupi mahmaha, nakpi-a kikona tawh gen khiat ding ahi hi. Hun kikhak dong thupi takin hi thupuak mainawt ding a hihna, eite in upna taktak i neih kul hi. (263) 
            Thu-um a kici mi kimkhat in “Testimonies” (tecipannate) kim khat bek Pasian’ thupuak hi ci-in sang uh hi. Amau’ nop tat nopna a kikhamna munte nial uh hi. Tua bang mite in amau’ phattuamna ding leh pawlpi’ phattuamna ding tawh kileh bulha na a sem ahi hi. Khuavak i ngah lai-in khuavak sungah i gamtat ding kisam hi. Cidamnalam kipuahphatna ka um hi ci napi-a a nisim nuntakna uah tua thu guipite tawh kilehbulha a gamtate in, amau’ kha mahmah a susia uh a hih banah thu-umte leh thu-um lote’ lungsim sungah ngaihsutna maan lo a guan uh ahi hi.

Thumanna Pana Thahatna

            Thumaan a thei mite’ tungah tavuan thupi mahmah kisuan hi. A kampau khempeuh uh a upna uh tawh kizui dinga a nuntakna uh zong kikhel kihah siangin, hih hun bei kuana manlang taka kizo ding thupuak nasep sem ding uh hi. A duh peuh uh balmalna-a a zat dingin hun leh tha nei lo uh hi. “Tua a hih ciangin note kisik un la, Topa’ kiang panin tha thak ngahna hun a hong tun ciangin na mawhnate uh a kiphiat theina dingin kikhel un,” cih thu lungsim tak tawh eite in i saan ding ahi hi. Sawltak 3:19. Eite’ lakah khalama a zawngkhal mi tampi om hi. Amaute a kikhel siang kei uh leh mangthang takpi ding uh hi. Tua mite’a dingin hanciamin na sem zo ding hiam?          
            A mite in mai i nawt den ding Pasian in hong deih hi. Lungsim khan tohna ding leh kha sianthona ding a dongkholh pipen in duh peuh balmal nopna a hih lam i theih ding kisam hi. Cidamnalam kipuahphatna thu gengen napi-in hoih taka an a ne lo tampi i om lai hi. Duh peuh balmal nopna in pumpi leh lungsim a zawngkhalsak pipen khat hi-a, thakiamna leh hun lo phat lo-a sihna a pianna bulpi ahi hi. Lungsim siangtho a neih ding a hanciam mi khempeuh in, duhna uk zawhna ding hatna Khris’ sungah om a hih lam phawk den ta uh hen.
            Sa duh banga nekna tawh phattuamna ngah ding hi lehang hih bangin thu kong gen kei ding hi; phat (263,264) tuamna ngah lo ding i hih lam ka thei hi. Sa nekna in pumpi cidamna susia a hih manin, sa lo-a an nek ding i kisin ding ahi hi. Anteh theipuam kicing taka ngah theihna ding mun ah om napi-a, a duh peuhpeuh nek ding teel zawa, a ut banga a ne a dawn mite in, tu lai thumaan a dangdangte tawh kisai-a Topa’ hong hilhnate hong awlmawh lo semsem ding uha, thumaan bang hiam cih nangawn zong hong thei nawn lo ding uh hi; amaute in a vawh bangun at takpi ding uh hi.      
            I sangte-a sangnaupangte, sa tawh vaak loh ding, cidamhuai lopi-a kibawl ante tawh vaak loh ding a hihna kei hong kilak ngei hi. Ankuang luina ah a sat suah thei ding lunggulhna a piangsak thei ding peuhmah lui ding hi lo hi. A teek a khang, a kuamah peuh kong hansuah hi. Siatna hong pia ding nate na duhna uh nial un. Kipumpiakna tawh Topa’ na sem un.        
            Sa ne kei leh a nungta zo lo dinga a kingaihsun mi tampi om hi. A hi zongin Topa’ lamah amaute pang uh hen la, Ama makaihna bangbang a zui dingin a lungsim uh khensat hi leh, Daniel leh a lawmte mah bangin amaute in hatna leh ciimna ngah ding uh hi. Topa in amaute ngaihsut siamna zong pia nuam a hih lam mu ding uh hi. Angsung nialna tawh Pasian’na sepna dingin bang zahta kikhol thei cih mi tampi in mu-in lamdang hongsa ding uh hi. Angsung nialna a om lo sumpi tam pipi in a sep zawh zah sangin, kipumpiakna tawh a kikhol sum tawm khat in Pasian nasepna a khan tohna dingin tam sem zo zaw ding hi.

Kip Taka Din Ding Hanthotna

            Seventh-day Adventist-te in a thupi mahmah thumaante len uh hi. Tu ma kum sawmli val lai-in (1863) cidamnalam kipuahphatna tawh kisai a thupi mahmah khuavak Topa in ei hong pia hi. A hi zongin tua khuavak sungah eite i gamta hiam? Pasian’ hilhna tawh kituaka nuntak ding mi bang zah in i nial zen tam! Khuavak i ngah zah tawh kizui-in eite in mai i nawt ding ahi hi. Cidamnalam kipuahphatna thu thei-a i zuih ding pen i tavuan ahi hi. Kidek kidamna thu ah (264,265) mi dang khempeuh sangin eite i madawk zawk ding ahi hi. Hi napi eite’ lakah hi thu tawh kisai-a Pasian in a hong piak khawvak a zahtak het lo, lim taka kihilhsa pawlpi mite leh thuhilh siate nangawn om lai hi. A duh bangun ne uha, a ut bangun na sem uh hi.  
            I nasepna ah sia leh makai a hite in cidamnalam kipuahphatna tawh kisai-in Lai Siangtho bangin kip takin ding uh hen la, hi leitung khang thu tawp khakna ah eite a om hi hang cih a um mite’ kiangah tang takin teci pang ta uh hen. Pasian’ na a semte leh amau’ na a semte’ kikal ah kilamdanna kigi khat khun kul ding hi.           
            Thupuak a kingah cil hun lai-a thupi a kisak zah mah bangin, tu hunin zong thupi i sak ding a phatmawhna kei hong kilak hi. Zantaak an tawh kisai-a hong kipia khawvak a zui ngei peuhmah lo mi pawl khat om hi. Seu nuai panin khawvak lakhia-a a tang thei zahzaha i taan khiatsak ding a hun hi ta hi. 
            Cidamna ding thu guipite, a mimalin i hi-a, a mihonin i hi zongin, eite’a dingin thupi mahmah hi. Cidamnalam kipuahphatna thupuak ka ngah cil lai-in, kei pen zawngkhalin tha nei lo in ka sibup thei zel hi. Pasian’ kiangah huhna ka ngena, Amah in cidamnalam kipuahphatna thu ka mai ah hong lak hi. Ama thupiakte a zui mite in Amah tawh a siangtho kizopna nei dinga, a nek a dawn uh kidek kidamna tawh Ama nasem dinga a deihhuai bela a om theihna dingun a lungsim uh leh a pumpi uh a kep uh kul a hihna kei hong hilh hi. Tua khuavak in kei’a dingin thupha lianpi khat ahi hi. Topa in kei hong thahatsak ding a hih lam thei-in, cidamnalam a puahpha khatin ka pang hi. Ka khan lai hun sangin, ka kum tawh kituak lopi-in tu-in ka ci a dam zaw hi.                  
            Laikung tawh gelha ka gen khiat zahin cidamnalam kipuahphatna a zui lo in hong kigen hi; a hi zongin cidamnalam kipuahphatna ah a citak khat hi’ng ka kici ngam hi. Ka innkuanpih a hi ngei mite in tua thu a maan lam thei ding uh hi. (265,266)

“Pasian’ Minthanna Ding Ngenin Hih In”

            Annek tuidawn tawh kisai-a zuih ding thu a khong a khia-a khen cianna kinei lo hi; a hi zongin singgah, khaigah leh anteh theipuam a tamna gam ah sa pen Pasian’ mite’a ding an hoih pen hi lo hi ci-in i gen hi. Sa nekna in ganhing lungsim hong nei saka, mi khempeuh tunga i neih ding itna leh hehpihna hong suh khiat sakin, pianzia a hoih zaw a uk cip dingin lunggulhna hoih lo hong neisak a hihna kei hong kihilh hi. Sa nek pen a cidamhuai ngei a hi phial zongin, tu-in muanhuai nawn lo hi. Cancer, TB ci-bawk leh tuap natnate sa nekna in tampi tak piangsak hi.    
            Sa nekna pen pawlpi mi hihna sittelna-a zat ding hi lo hi. A hi zongin sa a ne thu-um mite in midangte’ tungah a neih uh huzap i ngaihsut ding ahi hi. Pasian’ kamtaite i hih mah bangin mite’ kiangah, “Na ne uh a hi-a na dawn uh a hi zongin, na hihna khempueh uh Pasian’ minthanna ding ngenin hih un” 1 Korithu 10:31, ci lo ding i hi hiam? A si thei mihingte’ tunga kipia ngei a thupi bel thumaan a tangko gospel nasemkhat peuh in, Egypt gama sa beel lam a zuan kik dingin lim lak ding i hi hiam? Pasian’ sum kholna pana kaih tawh a kivaakte in, duh peuh nekna tawh a sihui sung uha a luang nuntakna a pia sisante gu a kisawh ding phal ding uh hiam? Pasian in amaute a piak khawvak leh hilhnate awlmawh lo in om ding uh hiam? Pumpi cidamna pen hehpihna sunga khan tohna leh lungsim maan ngahna dinga a phamawh khata i ngaihsut ding ahi hi. Gilpipen lim taka a kidon kei leh a maan a hoih zia-le-tong lam tohna hong dongkholh ding hi. Khuak leh phawk theihna sazangte in zong gilpi mah tawh thuak-khawm uh hi. A maan lo nekna dawnna in a maan lo ngaihsutna leh gamtatna mah piangsak hi.           
            I vekpi-in a hong kisit tel laitak ahi hi. Khris sungah i kibaptize khina, hong suk kaiha i hih loh nadingpi khata a hong koih thei khempeuh tawh kikhena ei’ hih dingteng i hih leh, i nuntakna lutang a hi Khris sungah khan tohna ding tha thak hong kipia dinga, Pasian’ hotkhiatna i mu ding hi. (266)       
            Cidama nuntakna ding thu guipite eite in i theih ciang bekin, an hoih lo nekna pana piang siatnate i mu thei pan ding hi. A khialhna uh a muh khit uh cianga a zongsatnate uh a khel zo phingte in, kipuahphatna ah hanciamna leh thuak zawhna kisam a hih lam hong mu ding uh hi; a hi zongin an hoih a hong nek phot uh ciangin ni danga lauhuai a sak loh uh ante a nekna un damdamin gil puak natna leh natna dangte piangsak a hih lam hong phawk ding uh hi.                
            Nute pate aw, thu ngenin vil un. Kidek kidam lohna lam tuamtuam tawh hong om loh na dingin limtakin kikem un. Cidamnalam kipuahphatna thu guipite na tate uh hilh un. A ci uh a dam suak theina dingin a pelh dingte uh zong hilh un. Thumang lo tate tungah Pasian’ hehna hong tung hi ta hi. Mun khempeuh ah tat siatna, mawhna leh git lohnate kilang ta hi. Mipawl khat i hihna tawh i tanote gamtat hoih lo lawm leh gual tawh a kikholh lohna dingun lim takin i kep ding ahi hi.

Mite Hilh Un

            Cidamnalam kipuahphatna thu guipite mite a hilh dingin hanciamna a nisia zaw i neih ding ahi hi. An huandan sinna sangte phuanin inn khat khit inn khat ah a cidamhuai ante huandan i hilh ding ahi hi. A teek a khang in a baihlam theithei-a an huandan ding a theih ding uh ahi hi. Thumaan a kigenna mun khempeuh ah a lim veve ding a baihlama an bawldan mite i hilh ding ahi hi. Sa nek kul lo-a tha-a piang ding an a kingah theihna ding amaute i lah ding ahi hi.    
            Natna koici damsak ding cih sangin, cidamna koici kep ding cih a theih ding uh a hoih zawkna mite kiangah hilh un. I zato mangte pen mi a hilh pil theite hi dinga, duh peuh balmalna a lauhuaina hilhin, Pasian’ khaamte nek lohna bek mah in pumpi leh lungsim a kisia ding dalna a hih lam a  lah ding uh ahi hi. 
            Cidamnalam kipuahphatna a nei nuamte in ni danga a nek ngei den ante a laihna ding uh, tha-a piang ding ante a bawlna uah siamna leh belna a neih ding uh kisam hi. Pasian muanna, tupna ah cihtakna, khat leh (266,267) khat kihuh nopna cihte zong kisam ding hi. Tha-a piang ding nate a kihel lo zantaak an in cidamnalam kipuahphat na’ng nasepna min siasak hi. A si thei mihing i hi mah bangin i pumpi cidam-thahatna a pia ding ante tawh i kivaak a kul ahi hi.

Uat Luatna In Cidamnalam Kipuahphatna Susia

            I mite kim khat in lim taka ngaihsutna tawh an hoih lote tang napi uh, pumpi tha a kiam lohna dinga a kisam ante tawh kivaak lo mawk uh hi. Cidamnalam kipuahphatna thu a uang lua-a a sang khate in a an uh tam dedasak uha, lim lo lua a hih manin amau zong lungkim zo lo uh hi. Lim lah lim, tha-a lah a piang dingin annek tuidawn i bawl ding ahi hi. Pumpi’a ding a kisamte nek loh mawk ding hi lo hi. Ke’n zong ci ka zanga, zong ka kem den hi, bang hang hiam cih leh ci in siatna piangsak lo zawa, sisan’a dingin kiphamawh zaw hi. Anteh theipuam zong bawngnawi a hih kei leh sathau tawm khat tawh a lim dinga bawl ding ahi hi.                    
            Giu (butter-sathau khal) pana natna lauhuaite leh naupangte in aktui a tam nek luat ding uh a hoih lohna thu i kihilh lai takin, lim taka a kikem, hoih taka a kivaak akte pana a kingah aktuite nekna pen thu guipi palsatna-a i ngaihsut loh ding ahi hi. Aktui in gu kim khat leh kik zo-a, damsak zawhna zong nei hi.         
            Kimkhat-te in bawngnawi, aktui leh giu kidek uha, tha-a piang ding an tawh a pumpi uh vaak lo a hih manin a tha uh kiamin na sem zo lo uh hi. Tua bangin cidamnalam kipuahphatna thu in gensiatna ngah hi. Khauh taka kal suan i sawm a hi hih nasep pen Pasian deihloh thute tawh hong kihel zau a hih manin i pawlpi’ thahatna hong kiam hi. A hi zongin Pasian in tua a uang lua ngaihsutnate pana a piang dingte a dalna ding hong sem ding hi. Gospel thupha in mawhnei mite a kikimin hong bawl ding hi. A zawng a hau a kibangin Jesu’ khe phung hong tunpih ding hi.         
            Tu-a i annek laka kihel bawngnawi, bawngnawi khal leh aktui khawngte i hep khiat ding hun hong tung ding hi; a hi zongin a hun lopi leh a uang lua-a (267,268) kihel ding i lungkhampih liang ding hi sam lo hi. A hun leh a thu in a hong sawl dong ngak in, Topa in tua tang ding, lam hong bawl nading hi.      
            Cidamnalam kipuahphatna thu guipite tangkona ah mai a nawt nuamte in, Pasian’ Kammal pen a makai uh leh a lamhilh uh hisak ding hi. Cidamnalam kipuahphatna thu guipite a hilhte in tua banga a hih uh ciang bekin zawhna ngah ding uh hi. I zat loh khitsa an pawlte’ taang dingin a cidamhuai leh a lim ante zat tohna tawh cidamnalam kipuahphatna a hi lo lamin lak-kha kei un. Hong sat suah thei ante duhna lamsang peuhmah tha piakha kei un; A kician, a baihlam, a cidamhuai ante bek ne un la, cidamnalam kipuahphatna thu guipite hangin Pasian’ tungah lungdam den un. Na khempeuh ah thumaanin dik tat un; tua hi leh a manpha zawhnate na ngah ding uh hi.

A Mun A Gam Ngaihsut Kul

            Duh peuh balmalna leh kidek kidam lohna i do lai takin, mihingte a bangci mun ah om uh hiam cih i phawk ding kisam hi. Leitung mun tuamtuam ah teeng mite’a dingin Pasian in vaihawm sakna nei hi. Pasian tawh na a semkhawm nuamte in, bang ante nek tuaka, bang ante nek tuak lo cih a khenma-un lim taka a ngaihsut phot ding uh kisam hi. Eite pen mihonpi tawh a kizom ding i hi hi. Cidamnalam kipuahphatna a zuih ding uh a mun leh a hun in a piak loh mite’ kiangah cidamnalam kipuahphatna va uang gen lua kha lehang hoihna sangin siatna hong piang zaw ding hi. Mizawngte kiangah gospel thu ka hilh ciangin, amau’a ding tha a piangsak bel ante a nek ding uh ka hilh ding, kei hong kihilh hi. Amaute’ kiangah “Aktui khawng, bawngnawi khawng leh bawngnawi khal khawng ne kei un. An bawlna ah gui(butter-sathau khal) zang kei un,” ka ci kei hi. Mizawngte’ kiangah gospel thu pen hilh ding mah hi-a, a hi zongin zantaak an zatdan khauh taka hilh ding hun tung nai lo hi.

Pasian In Thupha Pia Thei

            A duh bangbang uh nek ding a ngaihsun thuhilh siate pen tupna mun tawh kigamla mahmah lai hi. Cidamna (268,269) lam a puahphate a hih ding uh amaute Pasian in deih hi. Hi thu tawh kisai-a hong kipia khuavak banga amaute a nuntak ding uh zong deih hi. I cidamna thu guipite a lim zuih mahmah dinga kilawm mite, nuntakna lam maan ah a kikhel nai lohna ka muh ciangin ka dah mahmah hi. Supna lian mahmah a tuak uh a hih lam amaute a theih sakna dingin Topa’ kiangah thu ka ngen hi. I pawlpi mi a hi innkuante, a hi dinga kilawm zah ciangin hong om hi le-uh, Topa’a ding nasep a zah nih i sem zo ding hi.                        Sianthosakna ngaha a siangtho-a a om suak theihna dingun, Seventh-day Adventist-te in a lung sung uh leh a inn sung uah Kha Siangtho a neih ding uh kisam hi. Tu ni-a Israel mite Ama mai ah kiniamkhiat uh hen la, a kihhuai khempeuh panin a kha-innpi uh hah siang hi le-uh cinate’a dinga a thungetnate uh Ama’n za dinga natna dam sakna ding a kizang Ama zatuite Ama’n thupha pia ding a hihna thu Topa in kei hong lak hi. Mihing in upna tawh a hih theih zahin natna do-a, Pasian vaihawmsa zatui baihlamte a zat ciangin, ama hancaimna Pasian in thupha pia ding hi.        
            Khuavak tampi hong kipiak khit nungsang Pasian’ mite in zongsatna hoih lo mah kheng lah lai in, duh peuh malin kipuahphat ding a ut kei uh leh, amaute in a thu palna uh hangin thuak taktak ding uh hi. Bangbang hi ta leh a duh peuh uh mal ding mah a khensat zawk uh leh, amau’ nop tatna hanga a thuakna uh panin Pasian in amaute a lamdangin honkhia lo ding hi. Amaute “dahna tawh kual suk ding uh hi.” Isaiah 50:11.                
            Pasian in amaute a piak dinga a koih cidamna leh khalam thupha tampite, mi bang zah takin a taan zen tam maw! Na lian pipi a sep theihna ding uha gual zawhna leh thupha a tuam mahmah a ngahna ding uh nakpi-a a hanciam mi tampi tak om hi. Tua banga a hih theina dingin khitui luanga thungetna tawh kipeh zawh talai ciam kul hi ci-in amaute in ngaihsun den uh hi. Tua bang mite in Pasian’ deihna a theihtheihna dingun thungetna tawh Lai Siangtho kan uh hen la, siit nei lo, nop tat nopna om lo in lungsim takpi tawh Ama (269) deihna zui le-uh, amaute a tawl uh dam zaw ding hi. A hanciamna khempeuh uh, a kipehna uh leh a khitui luanna khempeuh un amau’ deih thupha ngahsak zo lo ding hi. Angsung cih peuhmah paih khiat khit ding ahi hi. Upna tawh a ngen mi khempeuh piak dinga a kiseh Pasian’ hehpihna a tawm a tam tawh kizui-in, amaute in a sep ding bangbang uh a sep uh kul hi.                   
            Jesu in; “Mi khat peuh in Ka nung a hong zuih nop leh, ama angsung nialin, ama singlamteh pua hen la, Ka nung hong zui hen,” ci hi. Luka 9:23. Ama angsung niala Ama paina lampi ah eite in zong Honpa’ nung zui ni. I kampauna leh i nuntak sianthona tawh Kalvari Mi-pa laam to ni. Amau mahmah Pasian’ tunga a ki-ap mite’ kiang nai ah Honpa pai hi. I lungsim leh i nuntakna ah Pasian’ Kha in na a sep ding a kisapna hun a om leh, tu lai tak mahmah hi pah hi. A siangtho nuntakna leh angsung nialna i neih zawhna dingin Pasian’ vangliatna len cinten ni. 9 T, laimai 153-166. (269,270)

KHAWKPI 43
LEITUNGA OM PAWLPI

            Pasian in hih leitung ah Ama teel tuam mipawl, Ama thupiakte a zui pawlpi khat nei hi. Amah in a lampial, a lengkhia, hih lai ah khat, hua lai ah khat cih banga a om zelzulte hi lo in mipawl khat a makaih ahi hi. Thumaan in a siangtho gualzawhna nei hi; a hi zongin gal a do pawlpi in a gual zo pawlpi hi lo hi. Taang lakah tahum om hi. Nasemte in, “Tahumte ka bawh ding uh na deih hiam?” ci uh hi; a hi zongin a pu un, “Bot kei un; tahum na bawh uh ciangin, taang tawh na bot khawmkha ding uh hi;” ci hi. Matthai 13:28,29. Gospel ngeen in ngasa a hoihte bek khuhkha lo-a a hoih lote zong khuhkha hi; Topa in Ama mite thei hi.

            Pasian tawh kiniam khiat taka i ton khop ding mi-mal ciat in i tavuan ahi hi. Thu thak, thu lamdang khat peuh i zon ding hi lo hi. Khuavak sunga lam pai dinga a hanciam Pasian’ mite pen Babulon banga i ngaihsut ding hi lo hi. 2 TT, laimai 362.

            Pawlpi sungah thusia a om hangin, thusia pen leitung bei dong om ding a hih hangin, hi hun nununga a om pawlpi in, mawhna tawh buahbaanga a tatsia leitung ah khuavak ahi hi. Pawlpi in thakiamin, gina lo hi ta leh, taai ding, hilh ding, gen ding kisam hi ta se leh, Khris in leitung bupa a thupi ngaihsut pen ahi hi. Leitung in nasepna phual ahi hi. Pasian’ sawltak mihingte tawh pang khawma, mihing’ lungsim sungah Ama hehpihna tawh Khris in na sem hi. 2 TT, laimai 355.

            Pasian in leitung ah A pawlpi a hi mipawl tumdang khat nei hi. Tua sanga a thupi zaw om lo hi. Thumaan a hilh ding leh Pasian’ thukham a hoihna a gen khia dingin amaute’ siamnate kicing hi. Pasian in leitung ah Khris Gam a zaisak dinga vantungmite tawh a pang khawm, sun a nisa thuaka na a sem, Ama makaih mite a hi, sawltakte nei hi. Tua teeltuam sawltakte tawh i vekpi-in kipumkhatin, a tawpna ah mi siangthote’ thuak zawhna a nei, Jesu’ upna nei-a Pasian’ thupiakte a zui mite lakah kihel ciat ni. 2 TT, laimai 361, 362. (271)

Tunglama Pawlpi Tawh Kipawl Ding

            Leitunga Pasian’ pawlpi in vantunga Ama pawlpi tawh pawl khat ahi uh hi. Leitunga thu-umte leh vantunga a puuk ngei lote, pawlpi khat ahi uh hi. Pasian bia dinga leitunga om mi siangthote a kikhopna uah  vantungmi khempeuh lawp kim uh hi. Vantung panin amaute in, leitunga Khris’ thu a gente’ thugennate ngai uh hi. Leitunga Pasian a biate’ phatna leh lungdam kohnate vantunga la sakna sungah kisa hi. A puuksa Adam’ tate’a dingin a mawkna-in Khris a si a suah loh manin vantung zumpi panin phatna leh lungdamna gingkhia hi. Vantungmite in tuinak pan tui a dawn uh hi-a, leitunga om mi siangthote in i Pasian’ khuapi a lungdamsak, tokhompi pana luangkhia gun siangthote panin a dawn uh ahi hi.                Leitung tawh vantung hong kinaidan i vekpi-in phawk thei hi le’ng maw! Leitunga a piang mite in a theih loh hangin, kikholhpih dingin amaute in khuavak tawh kipawl  vantungmi nei uh hi. Vantungmite in mihingte cingin, Khris lamah kai tawntung hi. Lametna a om laiteng, mihingte in tawntung siatna a tun lawh ding uha Kha Siangtho a nial mateng uh, vantungmite in amaute cing uh hi. Leitunga mi siangthote a kikhopna khempeuh ah Pasian’ vantungmite oma, amaute’ thugente, lasakte leh thungetnate ngai gige uh ahihna i lungsimin phawk den ni. Phatna la i sakte vantunga  vantungmi lapawlte in hong sakpih uh a hih lam mangngilh kei ni.            
            Sabbath khat pan Sabbath khat na kikhop uh ciangin, khuamial sung pana Ama lamdang khuavak sungah a hong samkhia Pa phatna late sa un. “Eite hong it a, Ama sisan sungah i mawhnate a hong sil khiatsak Pa” i lungsim takpi tawh phat ni. Thugente in zong Khris hong itna mah gen penin nei uh hen. Phatna la na sakna khempeuh uah kammal siangtak-teltakin sa un. Nathungetnate uh zong Pasian Kha in hong mop thute hisak un. Nuntakna thu a kigen ciangin van pana hong pai thu banga a sang na hihna uh na lungsim takpi uh tawh kilangsak un. (271,272)             
            Kicing itna lungsimte i neih theih na dingin Ama inn sungah i kikhop ding Pasian in hong hilh hi. Tua in leitunga teeng mite, Amah a it khempeuhte’a ding Khris in a vabawl innpi tawh hong kilawmsak ding hi. Tua lai ah a maute Sabbath khat pan Sabbath khat, kha thak khat pan kha thak khat, tokhom tunga a tu Tuuno tungah phatna leh lungdamna late, aw hoih pente tawh a tawntunga a sa dingin kikhawm ding uh hi. 6 T, laimai 366-368.

Pawlpi Sungah Thuneihna

            Khris in pawlpi tungah thuneihna pia hi. “A maan taka kong cih in ah, leitunga na hen peuhpeuh uh vantung ah zong kihen ding hi. Leitunga na phel peuhpeuh uh vantung ah zong kiphel ding hi.” Matthai 18:18. Pawlpi’ khensatna don lo in mi khat peuh in ama hoihsak bek gena, ama ut thu-a a sep khiat ding pen kiphal lo a hihna kilang hi. Van kikhupsin nuai-a om A pawlpi tungah Pasian in a sang bel thuneihna pia hi. Pawlpi sunga Ama mipawl khat ahite’ sungah Pasian’ thu bek mah man ding ahi hi. 3 T, laimai 450,451.

            Mi khat peuh in pawlpi’ khensatna tawh a kilehbulh thu-vatsatna a neih ding Pasian’ Kammal in phal lo hi. Pawlpi’ ngaihsutna tawh a kipelh ama ngaihsutnate ultunsak ding zong kiphal tuan lo hi. Pawlpi’ kikhalna leh ki-ukna om kei leh pawlpi kitamkham ding hi; pumpi bangin ki-awh khawm thei lo ding hi. Ko ka maan uh hi, Pasian in ko a tuam mahmahin hong hilh, hong sawl, hong makaih hi ci-a lungsim tuam nei mi kim khat om ngei zo hi. Amau in ngaihsutna tuam ciat nei uha, thupi zong sa ciat uha, Pasian’ Kammal tawh zong kituak hi, ci ciat uh hi. A ngaihsutna uh leh a upna uh a tuam ciat hi napi-in, Pasian’ kiang pana hong pai khuavak hi, ci ciat uh hi. Pawlpi panin amaute lengkhia ciat uha, pawlpi tuam ciatin om uh hi. A vekpi-un maan thei lo ding hi napi-in, Topa’ makaih mah ahi dingin kigen ciat lai uh hi.

            Hong Honpa in Ama thuhilhnate, mi nih leh thum kithutuaka na khat peuh Pasian’ kiangah a nget uh leh (272,273) a ngah ding uh hi, cih kamciam tawh na zom to hi. Na khat peuh deihna i neih ciangin zong, midangte tawh kithu hual kul a hihna, hi thu panin Khris in hong lak hi. Kithutuaka thungetna, ngimna kikhatna pen thupi mahmah hi. Mimal thungetna zong Pasian in za a hih hangin, hih mun ah Jesu in, leitunga Ama phuh thak pawlpi’a ding phattuamna lian a pia ding thuhilhna thupi mahmah nei hi. Amaute in a nget ding uha a deihte uh a kibat kul ding hi. Mi khat-i ngaihsutnate leh sepna bek khemna a hi thei hi lo hi. A hi zongin thu a kibang khat bul phuha mi tampi in deihna taktak tawh a ngetna uh hi ding hi. 3 T, laimai 428,429.        

            Pawlpi in mite hotkhiatna dinga Pasian in a seh sawltak ahi hi. Na a sem dinga kipawl khawm hi-a a sep ding uh pen leitung mite kiangah gospel thu vapuak ding ahi hi. A pawlpi tungtawnin leitung mite kiangah Ama kicinna leh Ama kidimna a kilat khiat ding a cil a pat a Pasian’ ngaimna ahi hi. Khuamial sung pana Ama lamdang khuavak sungah a sap khiat mite a hi pawlpi mite in Ama thupina a lah khiat ding uh ahi hi. Pawlpi in Khris hehpihna thuphate a kikholna mun ahi hi; pawlpi tung tawnin “van muna om miliante” kiang dongin Pasian’ itna kicing taka a kilangkhia ding ahi hi. AA,laimai 9.

Pawlpi’ Hilhna Mang Dingin Paul Kisawl

            Mi tampi in, khuavak leh thutheihna a ngahna ding uh pen Khris tung pan bek hi-a, leitunga om Ama nungzuite muan kul lo hi, cih ngaihsutna nei uh hi. Jesu in Ama thuhilhna leh lim-le-melte tawh hi bang ngaihsutnate na nial hi. Tua thu eite in zong i theih ding ahi hi. Paul zong Khris in nasep thupi mahmah khat a sem dinga a sawl pa, Ama a dingin teeltuam um-le-beel, Khris mahmah tawh a kital-sik pa hi napi-in, Khris in thumaante amah na hilh pah lo hi. Amah na lammatin upna guan hi. “Bang ka sep ding hong deihna hiam?” ci-a Paul in a dot ciangin, Honpa in zong na gen pah lo in, A pawlpi tawh a kizom dingin sawl hi. Amaute in na nasep ding hong gen ding uh hi, (273,274) ci hi. Jesu pen mimawhte’ lawmpa hi-a, A lungsim a tawntungin kihongin, mihing’ thuaknate hong phawkpih hi. Amah in leitung leh vantung ah vangliatna nei hi. A hi zongin Amah in, mihingte’ khuavak ding leh hotkhiatna dinga a seh pawlpi’ thuneihna pen zahtak hi. Pawlpi’ omna ah Saul paisak hi. Leitung mite’a ding khuavak a hi dinga Amah in a koihsa pawlpi thuneihna Amah in theihpih hi. Pawlpi in leitunga Khris’ phuhsa hi-a, Ama ngeinate zong zahtak piak ding a kisam ahi hi. Paul’ tungtang ah Anania in Khris’ taanga nasem hia, Khris’ taanga nasem dinga kisawl, hi leitunga Khris’ nasemte’ taanga a ding zong hi lai hi.

            Paul a pian thakna ah eite in i phawk tawntung ding a thupi thu guipite hong kipia hi. Leitung mite hong Tanpa in A pawlpi a omna mun ah A phuh a din saksa pawlpi’ thu lo-a, biakna tawh kisai thute ah kuamah a gamtat ding phal lo hi.

            Pasian’ Tapa in Ama phuhsa pawlpi’ panmun leh thuneihna tawh Amah a kibangin kikoih hi. Ama phuhsa pawlpite panin thupha hong pai ding ahi hi. Tua bangin mihing pen Ama thupha a luanna pawlpi tawh kizomsak hi. Paisan’ Kha in Paul’ gitloh nasepna a phawk khiatsak tak ciangin, mi siangthote a bawlsiatna-a a kuhkalna in amah mawh nei lo suaksak tuan lo hi. Amah zong nungzuite lakah a kisin tawm khat mah a hih kul hi. 3T, laimai 432,433.

            Pawlpi mi khempeuh in Pasian’ tanu leh tapate a hih nak uh leh leitung mite’ laka khuavak a suah ma-un, hilh pilna a ngah loh un phamawh hi. Pasian in, khuamial sung mah ah a om lai, om lai ding mah sawma, Khuavak bulpi tawh kizop ding hanciamna bangmah a nei lo numei leh pasalte Ama khuavak taanna suaksak thei lo hi. Amau’ kitaangsapna mah thei-a, ngaihsutna thuk bel, deihna lian bel leh hanciamna tawh thu ngena na a sem mite in Pasian’ huhna ngah ding uh hi. Mikim in eimah ciat tawh kisai i mangngilh ding a om mah bangin i theih ding zong tampi mah om hi. Zongsatna leh ngeina luite i sin khiat kula, deih taka hanciamna leh thumaan thutak a kicingin sanga zuihna bek tawh tua khialhnate kibawl pha thei-a, Pasian’ hehpihna tawh zawhna kingah thei bek hi. 4T, laimai 485,486.

Khialhna A Kizel Sakte Hilhna

            Ama ngaihsut tawm thu khat peuh tangko dinga a kipan mi, Pasian in hong hilhin lam hong lak hi ci napi-in Pasian in kum tampi sung a lam tohsana (pawlpi) phel sia dinga a hanciam lai mite in, Paisan’ deihna a zui lo ahi hi. Tua mite, khem hatpa’ lama a pang a hih lam thei ta un. Amaute’ thu um kei un.

            Neihsa leh siamna a kemte hi napi uh cin, khialhna na kizelhsakna uh tawh na Topa uh’ neihsa a hi lo lama a zang na hi uh hi. Pasian’ thukham zuihkul a hihna a tangko mite, leitung buppi in hong mudah uh a hih manin, Yahweh tunga a citak pawlpi in gal lianpi i do kul ding hi. “Si-le-sa tawh eite a kido i hi kei hi. Mangliante, thuneite, leitung khuamialna a ukte leh sangna muna khalam gitlohnate tawh a kido i hi zaw hi.” Ephesis 6:12. Hih galdona bang hiam cih theihtheihna khat peuh a nei peuhmah in, gal a do pawlpi lamah a hiamte uh ngat lo dinga, Pasian’ mite tawh kipawlin siatna pawlpi pen a tha neih zah uh tawh do ding uh hi. 2 TT, laimai 356,357. (274,275)

KHAWKPI 44

PAWLPI KIPHUHZIA

Khris hong cial nasep a sem hong om ding hi; leitung ah Ama’n a mapatsa nasep a sem hong om ding hi; tua hamphatna pawlpi hong kipia hi. Tua dinga pawlpi a kiphut ahi hi. 6 T, laimai 295.

Thuhilh siate in kiciatna a deih ding uh hi-a, amau mahmah a kikhal ding uh ahi hi. Tua hi leh amaute in Pasian’ pawlpi hoih takin khal zo bek ding uh hi. Hoih taka kisinsa galkap hon khat banga kituak taka na a sep ding uh zong a hilh ding uh ahi hi. Gal phual ah gal a kizawhna dingin kiciatna leh kikhalna kiphamawh a hih leh, eite’ gal dona sungah zong kiphamawh zawkan lai ding hi. Bang hang hiam cih leh gal dona-a gal zote’ ngah sangin eite’ ngah ding pen thupi zawin zong manpha zaw lai ding hi. Eite’ kihelna gal kidona pen tawntung sihna leh hinna tawh kisai hi.

Vantungmite in kituak diamdiamin na sem uh hi. A tatna khempeuh uah kiciatna leh kithutuahna kilang hi. Vantungmite’ kithutuahna leh kiciatna mite’ hanciamnate mainawt zawsem ding hi. Tunglam pana sawlna a ngahte in a hanciamna khempeuh uah kiciatna, kithuhualna leh kikhalna nei dinga, tua ciangin amaute tawh Pasian’ vantungmite mapangkhawm thei ding uh hi. A hi zongin tua van-kamtaite in cik mah hunin kithuhual lohna, kipawl theih lohna leh kiciat lohnate panpih ngei peuhmah lo ding hi. Tua siatnate khempeuh in, i tha a hong kiamsak ding, i hanna hong susia ding leh i nasep hong zo lahsak dinga Satan’ hanciamnate ahi hi.

Nasepna ah kiciatna leh kithutuahna pan bekin zawhna kingah cih pen Satan in thei mahmah hi. Vantung tawh a kizom peuhmah kician takin oma, thumanna leh kikhalna pen vantungmite’ gamtat a hihna zong Satan in thei mahmah hi. Khristian hi’ng a kicite, vantung’ vaihawmna tawh a kigamla thei zahzaha a pialpih ding pen Satan’ hanciam pipen ahi hi. Tua a hih manin amah in Pasian mi hin’g a cite nangawn khemin, kiciatna leh kikhalna pen kha thu-i galte hi ci-in amaute (276) umsak hi. Amau’ ut bang teka a om ding uh, kipumkhata, gamtat kikhalna leh kithutuahna a om ding a hanciam Khristian pawlpite lak pana a tang-om ding mah uh hoih zaw hi, ci uh hi. Kiciatna a omna ding hanciamna khempeuh a lauhuai-in ngaihsun uha, ut bang teka gamtat ding kikhamna pen ukpi vai lua ci uh hi. Tua bang khemna a thuak mite in amau’ ut bang teka ngaihsuna a gamtatnate uh kisialhpih zawlai uh hi. Amaute in kuama thu mang lo ding uh hi. Kuamah in amaute puah thei lo hi. Pawlpi u leh nau tawh kikhena amau’ ut bang tekin hanciama, amau’ ut bang teka gamtatna pen Pasian’ diehna hi ci-a mite in a ngaihsut ding uh pen Satan’ nasep lian mahmah khat a hih lam kei hong kilak hi. 1 T, laimai 649,650.

            Pasian in leitunga A pawlpipen khuavak taan khiat na dinga a bawl hi-a, tua panin Ama deihna leh ngimnate genkhia hi. Pawlpi’ gamtatna tawh kituak lo-a a tangkai gamtatna, A nasemte khat beek tungah Pasian in pia lo hi. Khirs’ pumpi a hi pawlpi bup khuamial sungah om sakin, pawlpi bup’a ding Ama deihna theihtheihna, mi khat guak tungah Pasian in pia lo hi. Pasian in Ama nasemte amau guak kipum muan lo-a, Ama nasepna a mainawtna dinga Ama makaih midangte’ tungah muanna a neih zawk na dingin, A pawlpi tawh a kizom cinten dingin koih hi. AA, laimai 163.

           

Kamsangte’ Phuh Pawlpite

            Jerusalem khua-a pawlpi kiphuh zia pen, thumaan kamtaite in gospel lamah mi a ngahna uh mun dangdang ah zong pawlpi a kiphuh cianga etteh ding ahi hi. Pawlpi a kem dinga tavuan piakna a ngahte in, Pasian’ goluah tungah to a sep ding uh hi lo hi. Tuu-cing siamte bangin, “Pasian’ tuuhonte vaak dinga,…tuute’ etteh dingin om ding hi;” upate zong “a citak ci-a kigen mite, Kha Siangtho leh ciimna tawh a kidim mite” hi ding hi. Tua mite in thumaan lamah kipumkhatin pang khawm ding uha, tua kipumkhatna pen kip takin len suak ding uh hi. Tua hi leh amaute in tuuhon buppi tungah kipumkhatna huzap nei thei ding uh hi. AA, laimai 91. (276,277)

            Hong piangthak tungte khalam a khan tohna ding uh a thupi-in ngaihsunin, sawltakte in amaute, gospel ngeina tawh um cihin a cin ding uh ahi hi. Pawlpi kim ah makai kiseha, thu-um mite’ khalam khantohna ding tawh kisai thu khempeuh ah a sep zia ding uh zong ngeina hoih tak leh kician tak kikoih khin hi.

            Tua pen Khris a um khempeuh pumpi khat banga a kipumkhatna ding uh gospel vaihawmna tawh a kituak ahi hi. Tua pen Paul in a nasep hun sung khempeuh ah lim takin zui hi. Koi mun koi mun ah hi ta leh ama nasepna pana Honpa-a Jesu Khris a sangte, a kilawm hun ciangin pawlpi khatin phut hi. Thu-um mite tawm phial ta leh zong, tua bang mahin hih hi. “Ka min tawh nih leh thum a om khopna peuh ah, amaute’ lai zang ah kei ka om hi,” cih kamciam phawkin, Khristiante tua bangin khat-le-khat a kihuh ding uh kihilh hi. AA, laimai 185,186.

Pawlpi Sung Kilem Lohna

            Jerusalem khuapi ah Antiok khua pana hong pai palaite, kikhoppi-a hong pai pawlpi tuamtuam pan-a ute naute tawh kimu uh hi. Namdangte’ laka a nasepna uh a mainawtna thu amaute’ kiangah gen uh hi. Antiok khua ah a piangthak Pharisai pawl khat pai-in hotkhiatna a ngahna dingun a piangthak Namdagte in a vun uh at-in Moses’ thukham a zuih uh kul ding hi, ci-a a genna uh hanga a piang buaina thu amaute in hong suut uh hi. Kikhoppi ah tua thu lim takin kikum uh hi.

            Hong piangthak Namdangte, zehtan thukham zuihsak loh ding hoih zaw a hihna Kha Siangtho in mu hi. Hih thu tawh kisai sawltakte’ ngaihsutna pen Pasian’ Kha-i ngaihsutna mah tawh kibang hi. Tua council ah James in hun uka, ama thu khensatna in, “Namdangte lak pana Pasian’ lama hong kiheite subuai kei ni,” cih ahi hi. Tua tawh a thu kikupna uh man hi.     
            Hih mun ah council’ khensatna a pulak dingin James a kiteel hih tuak hi. Namdang piangthakte in a hih leh Khristian upna thuguipite tawh a kituak lo (277,278) ngeinate a nusiat ding uh ahi hi. Milim biakna sate, paktatnate, gawl meeka kithat sate leh sisan a tang dingin Namdangte lai khaka a hilh ding uh sawltakte leh upate thukim uh hi. Amaute in thupiakte a zuih ding uh leh nuntak siangtho a neihna ding uh hanthot ding ahi hi. Vun a at loh uh phamawh hi, ci-a a va gen mite in sawltakte’ thupiakna tawh a sem uh a hih lohna zong amaute theihsak ding ahi hi. AA, laimai 190,195.

            Hih thu a vatsat council sungah Juda leh Namdang Khristian pawlpite a phut a minthang sawltakte leh thuhilh siate-a kipan mun tuamtuam pana palaite kihel hi. Jerusalem khua-a upate leh Antiok khua pana palaite zong om uha, pawlpi thupite panin zong palai a pai uh ahi hi. Khuavak ngahna tawh thu vatsatna leh Pasian’ deihna bang kiphut pawlpi’ thupina tawh kizui-in council a gamta ahi hi. Amaute in limtakin thu ngaihsun uha, Namdangte’ tungah Kha Siantho a buahna tawh Pasian in tua thubuai siangsak zo a hihna zong amaute in mu uh hi; tua ciangin Kha’ makaihna bangbang a zuih ding uh amau’ tavuan a hihna zong phawk uh hi.

            Hih thu a khensat dingin Khristian vannuai kikaikhawm lo hi. Huzap leh ngaihsut siamna a nei “sawltakte leh upate” in khensatin thu zasak uha, tua khensatna bangbang Khristian pawlpite in zong sang uh hi. Ahi zongin a mi vannuai lungkim khin cih om sam lo hi; min deiha amau’ cih khat a ci teltal, amau leh amau a kipum muan pawlpi mi hon khat thukim lo uh hi. Tua mite in amau’ thu tawh nasep ding hong hanciam uh hi. Amaute phunphunin, mawh sakna ding zongin, ngimna thakte pulaakin, gospel thupha a hilh dinga Pasian in a sehsa mite’ nasepna susia uh hi. A cil a patin pawlpi in tua bang nopkhakna na tuak uha, hun bei dong mah tua bangin kituak ding hi. AA, laimai 196,197.

Khat’ Ngaihsutna Bek Thupisak Ding Lauhuai

            Amau guak’ ngaihsutna a thupi seh mahmahte, a lauhuai mahmah mun ah a om ahi hi. Tua bang mite, Pasian in leitunga A nasepna kiphuta a zai sakna dinga (278,279) a zat khuavak phualpite’ kiang pana a kaih khiatna dinga Satan’ hanciamnapi khat ahi hi. Thumaan a mainawtna ding tawh kisai-a Pasian’ sehsa makaihna tavuan neite awlmawh lohna, simmawhna in, Ama mite in huhna hanthotna leh thahatna a ngahna dinga Pasian’ sehsa pawlpi’ thu nialna ahi hi. Topa’ nasepna sunga nasem khat peuhin hih thute awlmawh lo-a Pasian’ kiang pana hong pai hi, ci-a a ngaihsut leh, amah leh amah galpa’n khema a zawh na ding mun ah a kikoih ahi hi.

            Khristian khat-le-khat, pawlpi khat-le-khat kipumkhata, thu-um khempeuh in kizop cintenna a neih ding pen Pasian in ciimna tawh a geelsa ahi hi. Tua bangin mihing in Pasian tawh mapang khawm thei ding hi. Pawlpi khempeuh in Kha Siangtho’ thu mang dinga, Pasian’ hong hehpihna lungdamna thu leitung mite’ kiangah a puak dingin, kipawlna leh hanciamna khat sungah thu-um khempeuh kipumkhat ding hi. AA. Laimai 164.

            Mihing’ pumpi sung na a tuamtuamte kigawmin pumpi bup khat suaka, tua pumpi bup a uk khuak’ thu mangin pumpi nate in amau’ sep ding ciat a sep uh mah bangin, Khris’ pawlpi sunga pawpi mite in duang kikhai kim pumpi khat bang a suah na dingin kipumkhata, pawlpi bup a uk Kha Siangtho’ thu a man ding ahi hi. 1 T, lawmai 443.

Pawlpi Upate Teelna Leh Khut Ngakna

            Sawltak Paul in Titu kiangah, “Kong gensa mah bangin a kisam laite bawl pha-in, khua khempeuh ah upa na koih in. Mawh sakna ding a om lo, zi khat bek a neite, git lohna leh khel tatna a nei lo a citak tate a neite hi ding hi. Bang hang hiam cih leh upa i cih in Pasian’ neihsa a kem a hih mah bangin mawh sakna ding a  om lo mi hi ding hi.” Titu 1: 5-7. “Kuama tungah khut nga pakpak kei in.” 1 Timothy 5:22.

            I pawlpi kimkhat-te ah pawlpi phuhna leh upa khut ngaknate hun nai lopi-in kihih hi. Lai Siangtho’ ngeina kidon lo a hih manin, pawlpi sungah buaina lian (279)  pipi hong piang hi. Nasep thupite a sem dinga a kilawm lopipite’ tungah a manlanga khut ngak ding a hih loh mah bangin, makai teelna ah zong manlan luat ding hi lo hi. Mun khat peuh ah Pasian’ na a sep theihna dinga, a piangthak nai lo, lungsim thupi a nei nai lo leh a kipuahpha nai lote teel ding hi lo hi.

Pawlpi’ Vante

            Khua khat peuh ah a lawp hong om ciangin, va zuih pah ding ahi hi. Biak kikhop nading inn khat, Pasian’ Sabbat mual suang khat, gamtatna khuamial lakah khuavak khat, cih bang peuhmah hong din masiah kician takin tua mun ah sem pah ding hi. Thumaan teci a hi dingin mun tampi ah tua bang mual suangte a din ding ahi hi. 8 T, laimai 100.

            Pawlpi tawh kisai na khat peuh lim takin seng lo-a mawk koih ding hi lo hi. Nasepna a mainawtna ding a khak a hal a suah loh na dingin, Pasian’ nasepna dinga mite in a piak nop nate, galpa’ khut sung a tun khak loh na dingin, Pasian’na sepna-a kizang pawlpi vante limtaka kep ding ahi hi.

            Pasian’ mite in hoih takin na sema, Pasian’  na asepna peuhmah uh masuan tut loha a mawk nusiat ding uh a hih loh lam kei hong kilak hi. Amau’ hih theih zah ciang hoih taka a hih khit uh ciangin, Pasian’ mite’ tung pan Satan in hamphatna a na ngah loh na dingin, Topa in amaute a na kep ding amaute in a muan ding uh ahi hi. Tu hun pen Satan’ nasep hun ahi hi. I mailamah huihpi hong nung lai ding hi; Satan’ ngimnate i dal zawh na dingin pawlpi pen khanglo-a mai i nawt ding ahi hi. Na khat teitei sep khiat ding hun ahi hi. A mite in pawlpi tawh kisai nate thang koiha, galpa in ama deih bang leh ut banga a na zat gawp ngingei ding pen Pasian’ deihna hi lo hi. 1 T, laimai 210, 211.

Kum Sim Kikhopte

            Pasian mite a kikhopna ah na pai ding hanciam in. Ute naute aw, note’a ding Pasian’ thupuak za kha lo-a na om uh sangin, na nasep masuan uh kipelh leh (279,280) hoih zaw tham lai ding hi. Khalam phat tuamna na ngah theih zah ding uh a hong taansak dingin paulap zong se kei un. Khuavak hong taang zahzah na ngah ding uh kisam hi. Na sunga om lametna thu kiniam khiatna leh launa tawh siang taka a genkhia thei mi na hih ding kisam hi. Tua bang hamphatna khat nangawn na taan ding hi lo hi.

            Kikhoppipen nang’a dinga thupha ngahna a suah na dingin thuhilh siate leh Lai Siangtho nasemte’ tungah kinga-a na pai ding hi lo hi. Pasian in A mite, thuhilh siate’ tungah a kingak ding deih lo hi. Mihing’ tung pana huhna a lametna uh tawh amaute a thanem ding zong deih lo hi. Belh ding nei lo naupangte bangin, mi khat peuh muan leh suanin nei-a a belh ding uh hi lo hi. Pasian’ hehpihna a kemte a hih uh mah bangin, pawlpi mi khempeuh in, amau’ sung ciat ah nuntakna leh zungpi a neih ding uh amau ciat tavuan ahi hi.

            Kikhoppi a nopcitna ding pen Kha Siangtho’ tha leh om pihna tawh kisai hi. Thumaan a it mi peuhmah in Kha a kibuah na dingin thu a nget ding uh ahi hi. Ama nasepna a dongkholhsak peuhmah i hih theih zah ciangciang i nil khiat ding ahi hi. Pawlpi mite khat-le-khat kilem lohna leh ki-elna a om giugiau laiteng Kha hong kibua ngei lo ding hi. Kihazatna, ki-elna, kisiat muhna leh kigensiatnate Satan’ahi-a, tuate in Kha Siangtho’ nasepna ding khak tan pha mahmah hi.

            Pasian in A pawlpi zaha a ngaih, na dang bangmah leitung ah om lo hi. A pawlpi a kep zahin na dang a kep om lo hi. Pasian’ na a sem mite’ huzap a susia gamtatna zaha Pasian’ tungah khialhna a dang om lo hi. Satan’ nasep a hi mawh sakna leh lungkiat sakna nasep a huhte khempeuh Pasian in thusit dingin sam ding hi. 6 T, laimai 39-42. (280,281)

KHAWKPI 45
PASIAN’ INN

            A kiniamkhiat thu-um mi’a dingin leitunga Pasian’ inn in vantung kongvang ahi hi. Phatna la sakna, thungetna leh Khris’ ai-awha thugente’ kammalte in, a kihhuai na khat beek a lut theih lohna, a nopci zaw biakna a kibawlna mun vantung pawlpi mi dinga mite kigin kholh sakna ding Pasian’ sehsa nasepna ahi hi.

            Inn in innkuan’a ding mun siangtho hi-a, inn dei sung a hih kei leh sing nuai khawng in mimal biakpiakna dinga mun hoih bel ahi hi; a hi zongin biakinn in mi honpi’a ding mun siangtho ahi hi. A hun, a mun leh biakpiakdan tawh kisai-in ngeina neih ding ahi hi. A siangtho na khat peuh, Pasian’ biakna-a a kizang na khat peuh kidop lohna leh neu ngaihsutna tawh hih ding hi lo hi. Pasian phatna ah mite in a hoih thei bela a hih theihna dingun amaute’ lungsim sunga a ngaihsut nate un a mawkmawk nate leh a siangtho nate khen tel siam ding hi. Theihna a zai, ngaihsutna leh tupna a hoih a neite in, Pasian tawh kisai nate a ngaihsutna uh a khauh dingin theih siamna a neite ahi hi. A liana a neu zongin, khuapi sung a hi-a mual kawm lak a hi zongin, buk sung a hi-a gam lak a hi zongin mun siangtho a neite a hampha ahi hi. Topa’a dinga a neih theih uh a hoih bel a hih nak leh Topa in A om pihna tawh tua mun nopci sakin, mipite’ Topa’a dingin tua mun in a siangtho ahi hi.

Pasian’ Inn Sungah Thungetna

            Kikhopna mun ah biakna pia dingte a lut uh ciangin omdan kilawm takin pai-in, a tutna ding mun uh dai takin zuan ding uh hi. Mei phual bang a om leh zong thadahin, kidopna mel nei lo in tua mei phual va um pelpal den lo ding hi. Kikhopna inn ah hun kipat ma a hi a, hun man khit ciangin a hi zongin, thucin thutang genna, kihuau supsupna leh nuihna cih khawngte omsak lo ding hi. Pasian zahtakna taktak tawh om ding uh hi.

            Kikhop kipat ma zeka a tung khol a om leh gamdai thungetna tawh lungsim ki-apna taktak nei uh hen la, (282) hun zatna pen amau’a dinga phattuamna lianpi a pian theihna ding leh midangte in upna leh pianthakna a neih theihna ding hun a hih theihna dingin thungetna tawh a lungsim uh Pasian’ lam ah laam to uh hen. Inn sungah van-kamtaite om a hih lam amaute in a phawk ding uh ahi hi. I om khong thei lohna, thute lungngaihna leh thungetna hun i neih theih loh manin Pasian tawh kikholhna hun nuam tampi eite in i taan hi. Khalama i omziate i ngaihsut kik zel ding leh i lungsim leh i lungtangte Dikna Nitang lamah i kaih den ding kisam hi.

            Biakna inn sungah mite hong tun uh ciangin Topa zahtakna taktak nei-a, Pasian’ mai ah a om hi hang cih a kiphawk theih uh leh amaute hong dai khikhep ding uh hi. Kihuah supsupna, nuina leh kihonate, mun dang nasepna khawng ah mawhna a hih loh hangin, Pasian a kibiakna inn ah zat ding hi lo hi. Phattuamna hong pia-a, lungsim sungah zong a teen theihna ding, Pasian’ Kammal a ngai dingin lungsim kigingsa-in om ding hi.

            A thupisuah leh a zahtak kai theithei-in siapa zong hong lut ding hi. Pulpit a tun phetin dai takin khuk din dinga, deihna tak tawh Pasian’ huhna ngen ding hi. Tua in lungsim sukha mahmah ding hi! Mite zong zahtakna leh ciliapna tawh om ding uh hi. A siapa uh Pasian tawh kiho hi; mite’ mai ah a din ma-in Pasian’ tungah amah ki-ap hi. Mi khempeuh zahtak kai taka a om uh ciangin Pasian vantungmite hong nai om mahmah uh hi. Pasian in Ama hong om pihna tawh tua kikhopna hong uapa, mihing’ kam pana kigenkhia Ama thumaante vangliatna a piakna dingin Pasian a zahtak mihonte’ laka mi khempeuh in zong siapa tawh kunin lungsim thungetna a neih khop ding uh ahi hi. 5T, laimai 491-493.

            Thu kikupna leh thunget kikhopte a cimtak-huai dinga bawl ding hi lo hi. A hi thei zahin, a kisehsa hun lap kim ding hi; nai lang a hi-a minit sawm leh nga a hi phial zongin a ziakai khat peuh ngak niloh lo ding hi. Nih bek a om uh zongin kamciam ngen thei veve ding uh hi. Mi tam ta leh tawm ta leh a hi thei zahzahin (282,283) a kisehsa hun liana kikhop kipat ding ahi hi. 2T, laimai 577,578.

Pasian In Hong Mu Gige

            Pasian’ liatna theihna leh Ama hong om lam phawkna in Amah zahtakna taktak hong neisak hi. Tua banga muh thei loh Pa theihtheihna tawh lungsim khempeuh a kiphawn ding kisam hi. Thungetna hun leh a mun zong siangtho hi; bang hang hiam cih leh tua lai ah Pasian om hi. Lungsim leh omzia ah zahtakna kilangkhia leh ngaihsutna zong hong thahat zawsem ding hi. “Laphuakpa in, Ama min in siangtho-in zahtak kai hi.” ci hi. Psalm 111:9. GW, laimai 176-178.

            Thugetna tawh hun a kipat ciangin, Siangtho Pa’ mai ah khuk khempeuh khuk din dinga, lungsim khempeuh zong ki-apin Pasian’ lamah kahtosak ding hi. Cihtakna tawh a biate’ thungetna kiza dinga, thugenna in zong muibun ding hi. Thugenna in phat tuamna a piansak  lohna a hang pen, Pasian’ inn sunga a bia mite’ lungsim a sihna hang hi pipen hi. Lungsim tampite pana siangtak teltaka pusuak la sakna in mite hotkhiatna dinga Pasian’ khutzat khat ahi hi. Kikhopna a Ukpipa om takpi hi cih ngaihsutna tawh hun khempeuh zahtakna leh ciliapna tawh zat ding ahi hi.

            Thu hong kigen tak ciangin, ute naute aw, Ama sawltakte’ tung tawna Pasian’ Kammal a ngai na hih lam uh mangngilh kei un limtakin ngai un. Themkhat zong ihmu kha kei un; ihmu kha le-uh cin na kisap mahmah uh kammalte na za kha kei ding uh hi. Tua kammalte lim takin ngai hi le-uh cin khialhna lampi ah na pai khak lohna ding uha na khe uh hong kem ding kammal hi thei ding hi. Genna, hilhna leh taainate a za lo dingin, zamah leh zong lungsim sungah teeng lo-a nuntakna zong a puahpha tuan lo dingin, phawk theihnate hai sakna ding semin Satan leh a nungzuite manlah mahmah uh hi. Khat veivei thungaite in naupangno khat peuh buaipih uh ahih manin khaici hoihte lei hoih ah kia lo in, gah-le-pak zong nei lo hi. Khat veivei nungak tangvalte in Pasian’ (283,284) inn leh biakna a zahtakna uh neu a hih manin thuhilh hun sung khempeuh a kiho-in nitum uh hi. Pasian’ vantungmite in a maute en gige-in, a gamtatnate uh ciamteh a hih lam a maute in mu thei uh hi leh amau zong kisuangtaakin maizum mahmah ding uh hi. Pasian in thungaite deih hi. Satan in tahum a vawh hun pen mite a ihmut lai tak ahi hi.

            Hun kiman-a thupha a kipiak ciangin, Khris’ lungnopna a ngahkhak loh ding uh lau-in mi khempeuh gamdai ding uh ahi hi. Amaute Pasian’ mai ah oma, Ama mit in amaute en gige-a, Ama muhna ah a kilawm dinga a gamtat ding uh zong phawkin, kiphu henhan se lo, pau sesu se lo in pusuak diamdiam uh hen. Midangte’ pusuahna ding dongkholhin, din khawla kihopihna khawng omsak kei un. Biakinn sunglam peuhmah zahtakbawl mahmah ding kisam hi. Lawmte tawh kimuhna leh kihona, thucin thutang kikupna, nasep silbawl kikupna muna zat ding hi lo hi. Tuate biakinn pualamah koih (nusia) un. Kidop lohna, gamlumna, nuihna leh khe khawng ginsaknate tawh Pasian leh vantungmite kisimmawh bawl kha zel hi.

Naupangte’n Zong Zahtak Ding

            Nute pate aw, na tate uh’ lungsim sungah Khristian hihna dinmun sangsak un; a nuntakna sung uah Jesu a guanna dingun huh un; Pasian’ inn a zahtak mahmahna ding uh leh Topa’ inn sungah a tum uh ciangin, “Pasian hiah om hi; hi inn Ama inn hi. Lungsim siangtho leh ngaihsut siangtho ka neih kul hi. A siangtho Pasian’ omna mun ah a pai ka hih ciangin ka lungsim sungah kiphatsakna, hazatna, elna, a sialam beka ngaihsutna, muhdahna leh khemnate ka neih ding hi kei. Hih mun pen Pasian A mite tawh kimu-a thupha a piakna mun hi. Tawntunga a om a sang a siangtho Pasian in kei hong ena, ka lungsim zong hong thei-a, ka nuntakna sunga ka ngaihsut ka gamtat a simtham belte zong hong mu hi,” cih ngaihsutna tawh a nip a thumang lungsim a neihna ding un hilh un. (284,285)

            A nute a pate uh’ hih dan tawh a nip lai leh a um baih naupangte’ lungsim in Pasian’ nasemte’ sepziate sansat thei uh hi. Innkuan lutang tampite in inn a tun uh ciangin hun zatna pen gensia uha, thu neuno khat tawh midangte mawhsak uh hi. Tua bangin mite’ tunga Pasian’ thupiak kigensia-in, kineu sehin, thu mawkmawk bangin kiseh ta hi. Tua bangin kidawm lo-a mawk pau na tawh khangnote’ tunga a kiguan kha, ngaihsutna hoih lote pen vantung laibute bek mah in hong lak kik thei ding hi. Nute pate’ ngaihsut theih zah sangin tanote in tua thute naphawk thei baih zaw uh hi. A gamtatnate uh a lehlamin pai ta ahi manin a kikhel ding uh haksa ta ding hi. A tate uh’ lungtang a khauhna leh Pasian’ deihna banga a gamtat ding uh a hansuahna uah a haksatnate hangin nute pate tau uh hi. 5 T, laimai 493,497.

            Pasian’ min zong zahtak ding a hihna lak ding hi. Ngaihsun mel lo in, zangkhai zata lawh khiat ziauziau ding hi lo hi. Thungetna nangawn ah zong kisam lopi-a mawk lawh den keei ding hi lo hi. “Ama min in siangtho-in zahtak kai hi.” Psalm 111:9. Vantungmite in a lawh uh ciangin a mai uh sel hi. Mawhna tawh kidim a puuk mite in i lawh ciangin bang zahta-in i zahtak ding kilawm ding hiam!

            Pasian’ min siangtho, zahtakna leh ciliapna tawh zat ding a hih lam ka mu hi. Vanglian Pasian, cih kammal pen a thuapthuapin kilo in, thungetna sung khawng ah kidawm lo, ngaihsun mel lo in kicici-a, tua in Topa lungkimsak lo hi. Tua bang mite in Pasian’ leh a thumaan a phawk tel taktak lo ahi hi; phawk tel taktak hi leh tua zaha a lian a kihtak-huai Pasian, ni nunung cianga amaute’ tunga thu a khen ding Pa’ min mawk lawh lo ding uh hi. Vantungmi in, “Tuate lo thuahthuah kei un; bang hang hiam cih leh Ama min zahtak-huai lua hi,” ci hi. Pasian’ liatna leh thupina a telte in ciliapna takpi tawh Ama min lo ding uh hi. A kineh thei lo khuavak sungah Amah om hi; Amah mu-a a hing zo lai kua mah om lo hi. Pawlpi a khantohna dingin hi thute thei-a i kibawl phat ding kisam a hih lam ka mu hi. EW, laimai 122. (285)

            Pasian’ Kammal zong i zahtak ding ahi hi. A laibu mahmah zong zahtakbawl ding hanga, na dang mawkmawkte zat bangin zang lo in, lopthop tawi lo ding hi hang. Ciamnui bawlna-in Lai Saingtho zat(mat) ngei ding hi lo hi, deihkaiha paulapa zat ding zong hi lo hi. “Leitunga meikuang sungah ngun kihalin, sagih vei a kisian suah mah bangin; Pasian’ kammal khempeuh siangtho hi.” Psalm 12:6 Paunak 30:5.

            Tuateng banah, zahtakna taktak pen thumanna tawh kilang a hih lam zong na tate uh hilh un. Pasian in a kul lopi-in bangmah hong sawl lo hi. Ama gensa thute zuihna zaha Amah a lungkimsak zahtakna lah khiat theihna dang om lo hi.

            Ama tanga thu gena na a sem dinga kisawl Pasian’ai-awhte a hi-thuhilh siate, lai hilh siate leh nute pate zong i zahtakbawl ding ahi hi. Amaute i zahtakbawl ciangin Pasian a pahtawi i hi hi. Ed, laimai 236, 243, 244.

            Pasian’ omna tuam mahmah dinga a kisehna munte koici bawl ding cih a hong lak Lai Siangtho kammalte a teek a khang in lim taka ngaihsut ding ahi hi. “Nakhete panin na khedapte suahkhia in, bang hang hiam cih leh na dinna lei lak in a siangtho ahi hi,” ci-in sawlbawk kuang lak panin Pasian in Mosess sawl hi. Paikhiatna 3:5. Jakob in vantungmite a muh khit ciangin “Hi san ah Topa om hi; a theikha lo kahi hi….Hi san in a dang hi lo in Pasian’ inn leh, vantung kongpi ahi hi,” ci hi. Piancilna 28:16,17. GW, laimai 178,179.

            Lim-le-lai tawh na upna na zahtak lam na lah khiat kula, a siangtho thute zong zahtakna tawh na gen khiat kul hi. Lai Siangtho na gen ciangin na kam panin neu sehna leh zangkhai ngaihsutna kammal lengkhiasak ngei kei in. Na khut sungah Lai Siangtho bu na tawi lai takin a siangtho leitang tunga om na hih lam mangngilh kei in. Vantungmite na kimkot ah om hi; na mitte kihong thei hi leh amaute na mu ding hi. Na gamtat ziate, na kikholhpih khempeuh in na kim na pam siangtho-in kician a hih lam hong phawk theihna ding hisak in. A mawkna kammal khat, a zumhuai nuihna (285,286) khat peuh in zong mi khat peuh a sialamah paipih thei hi. Pasian tawh kizop cintenna a om kei leh a kihtak-huai thute hong piang hi. FE, laimai 194,195.

Ngaihsut Bela Pasian Neih Na’ng Kizepna

            Mi khempeuh in kicianin, siangtho-in, hi linlianin puan a silh na’ng uh leh mun siangtho(biakinn) tawh a kilawm het lo ding puatham kizepnate a zat lohna dingun hilh ding kisam hi. Zahtak lohna khangsak ahi manin puatham kizepnate zat loh ding ahi hi. Mite in kizepna leh puansilh nikten hoihte mah et penin nei thei zel uh a hih manin, a bia mite’ lungsim sungah a om dinga kilawm lo ngaihsutnate tuate panin hong kipan hi. Pasian bek mah ngaihsut ding leh biak ding ahi hi; a thupi leh a siangtho biakpiakna pana lungsim a heikhia nate khat peuh hihna in Pasian’ tungah khialhna ahi hi.

            Lai Saingtho’ deihna(ngeina) bek mah zui-in puansilh nikten tawh kisai peuhmah nakpi-a kidop ding ahi hi. A pualam mite pen kezep nopna lungsim-pasian in uka, tua pen pawlpi sungah zong hong lut sim khian zel hi. Pawlpi in Pasian’ Kammal bek mah dinmuna neih ding hi-a, nute pate in zong hih thu pen lim taka a ngaihsut ding uh ahi hi. A tate un leitung mite’ kizepdan hong zuih nop tak uh ciangin, Abraham mah bangin nute pate in, amau’ thu a mang zaw dingin a innkuan pihte thu pia ding hi. Leitung tawh amaute a kipawl uh sangin, Pasian tawh kizomsak zaw un. A puatham kizep laitluatna uh tawh kuamah in Pasian’ mun siangtho simmawh kei hen. Pasian leh vantungmite tua lai-ah om hi. Israel mite’ Mi Saingtho Pa in a sawltak pa’ tungtawnin, “Note” kizepna in a puatham kizepna, sam phekna, kham tawh kizepna, puatham kizep liatluatna hisak kei un la Pasian’ muhna ah a manpha mahmah, a kiniamkhiat leh a khindai lungsim tawh kizepna a hi, a kisia thei lo lungsim sung kizepna hisak zaw un,” ci-in hong gen hi. 1 Peter 3:3, 4. 5T, laimai 499,500. (286,287)

KHAWKPI 46

A KHIAL MITE BAWL PHATNA

            Mi khempeuh’ bat zawh dingin Khris in hotkhiatna hong puak hi. Kalvari singlamteh tungah Amah in a mangthang leitung tatkhiatna kicing takin pia zo hi. Ama angsung nialna leh hong kipumpiakna, deihsakna tawh na a sepna, hong kiniamkhiatna leh A nuntakna hong piak khiatnate in a puuksa mihing hong itna a liat zia hong lak hi. A mangthang mite a zong ding leh a honkhia dinga leitung ah Amah hong pai ahi hi. Amah a hong paina a hangin, mawhnei khempeuh’a ding, pau khempeuh leh gam khempeuh, nam khempeuh pana mawhneite’a ding ahi hi. Mi khempeuh a tatna ding leh, amaute Amah tawh akipawl theihna dingin a man ding uh pia zo hi. A khial belte, a mawh belte kipai san lo hi; Ama nasepna in Ama hotkhiatna a kisam belte’a ding hi phadiak hi. A kibawlphat ding uh a kisam belte Ama’n kin zawsema, Ama khasiat pihna lian zawsem leh Ama nasepna nasia zawsem hi. Lamet a bei phadiakte leh Ama bawlphatna a kisam phadiakte’a dingin Ama itna lungsim kiphawng phadiak hi.

            A hi zongin mipawl khat a hi eite’ lakah khemna a thuakte leh a khialte, laina veuveu-a khasiat pihna leh itna om khol lo hi. Mi tampite in huhna a kisam bel mite don lo in awlmawh lo uha, a gamla theithei ah pelhin, Khris in a gen, lam nawla mi cimawh a paisante bangin om uh hi. Hong piangthak cilte bang a zongsatna luite uh leh mawh zolna tuam mahmah khawng tawh nakpi-in kido thei zel uha, lunggulh luatna hang leh thuak lahna hang peuh tawh na do zo lo thei-in, sawm lohpi a hih kei leh, a sawm giugiau mahin na khial thei uh hi. Amaute Khalamah cidama hong om kik theih na dingin pawlpi u leh naute in ciimna, siamna leh hanciamna a neih ding uh kisam hi. Hi bang hun ciangin Pasian’ Thu in hong hilhna bangin zuih ding ahi hi: “Ute naute aw, mi khat peuh in mawhna khat peuh a bawl khak leh, khalam silpiak a ngah note in lung nemna tawh tua bang mite na phong kik un: no mahmah in zong mawh zolna na thuak loh nading uh kingaihsun un.” Galatia 6:1. “Tua a hih ciangin ei (288) a thahat-te in i ut bangin om lo in, a thanem mite’ hat lohnate i thuak ding hi.” Roma 15:1, laimai 603-605.

            Ngawh bawlna leh kam khauhte sangin, dam ngaihsutna, aw-nem tawh dawn kikna kamkhumte in, puahphatna leh hotkhiatna dingin kimang thei zaw tham hi. Migit lohna zek khat in na bat phak  lohna ah mite koih ding hi. Thuumna lungsim in amaute nang tawh khihkhawm zaw dinga, amaute lampi maan ah na tun thei zaw ding hi. Mawh mai sakna lungsim taktak zong na neih ding kisama, na kim na pama omte’ ngimna leh gamtat hoihte khempeuh zong na pahtak ding kisam hi. 4T, laimai 65.

           

“Note Kong It Bangin Khat-le-khat Ki-it Un”

            Pasian in mite hotkhiatna ding Ama sep ding teng sem khina, tu-in pawlpi in i seppih ding hong cial hi. A lang khat ah Khris’ sisan, thumaan thutak leh Kha Siangtho oma, a lang khat ah a kisia ding mite om hi. Vantungin a piak thuphate mite in a san theihna dingin Khris’ nungzuite in i sep ding om hi. Tua i sep ding pen i sem hiam cih ei leh ei lim takin kisittel ni. I lungsim puakzia leh i gamtatna khempeuh zong kidong tel ni.

            I lungsim sungah nuam i sak khol loh, i mangngilh theih loh thu tampi om hi lo hiam? Nang zong Jesu’ mawh maisakna na kisam zel hi. Ama hehpihna leh itna mah na muan na suan hi tawntung hi. Hi napi-in, Khris in nang’ tungah a hong neih lungsim bang midangte’ tungah kilangsak lo hi lo na hiam? A kiphal lo lampi-a a pai na muh mite’a dingin lung hihmawhna nei lo na hiam? Amaute’a dingin kapin, amaute tawh a maute’a dingin thu na ngen hiam? Amaute ita na hotkhiat noplam kamkhumte leh migit gamtatnate tawh na lak khin hiam?

            Amau’ zia-le-tong thanemnate leh amau’ zongsatna hoih lo vangikte lela a hoi dangdang mite tawh na kimuh ciangin, amaute huhna pia thei ding hi napi cin, gal a do dingin amau guak mah na nusia hiam? Tua banga nakpi-a khemna a thuakte leitung mite in Khasiat (288,289) piha, Satan’ ngeen sungah kaih a sawm lai takun nang in amaute pelhin na paisan hiam? Kain mah bangin, “Ka nau cing, kei ka hiam?” a ci dingin kigingsa-in om hi lo na hiam? (Piancilna 4:9)

            Pawlpi lutangpipa in na khan sunga na nasepna bangci a sa diam? A sisan tawh a leisa a hih zah khata mi khempeuh manpha a sa pa in, lam maan pana a pial mite na awlmawh lohna a koici muh diam? Amaute na nusiat mah bangin nang zong Ama’n hong nusiat ding lau lo na hiam? Topa’ inn a Cingpa in awlmawh lohna khempeuh ciamteh a hih lam thei gige in.

            A beisa huna awlmawh loh nate bawl phat ding ziakai lua nai lo hi. Na neih ngeisa ki-itna, na neih ngeisa thanuamnate hingkik sak in. Na nawh khiatsa mite zongkhia in la, amaute na liamsak khaknate thuum kikna tawh tuam in. Hehpih-itna Lungtang zuan in la, na lung sungah Ama hehpihna luangsak in, tua ciangin nang’ tung panin midangte’ lung sungah luang sawnsak in. Jesu in Ama nuntakna sunga a kilat khiatsak migitna leh hehpihnate, eite in i mihingpihte, a zaw diakin Khris’ sunga i sanggamte i bawldan dinga i etteh ding hisak ni.

            Nuntak gal dona ah mi tampite gimin lung kia uha, phatna leh hansuahna kammal khat in amaute tha ngahsakin gualzosak ding hi. Cikmah hunin khual lohna, awlmawh lohna, hehpih lohna leh mawh saknate nei ngei kei in. Hansuahna leh lawpsakna kammal khat na pau theih ding hun pha khat zong khah suah kei in. Vangik khat zansak nadinga migitna kam neem khat peuh, i pauna, Khris a sun dinga i hanciamnate bang zah ciang tung ding cih i gen thei kei hi. Kiniamkhiatna, migitna leh itna lungsim i neihna sanga a khial khat a phong kik thei zaw ding na dang om lo hi. 5T, laimai 610-613.

Khris’ Zatdan Pawlpi Kikhalna

            A khial pawlpi mite bawl phatna  ah, Matthai a lian sawm leh giatna sunga Honpa’ hong hilhna, Pasian’ mite in lim taka i zuih ding ahi hi. (289,290)

            Mihingte pen Khris in man tawh a leisa, Ama neihsa hi-a, Amah leh A Pa in amaute’ tunga a lah khiat ki-itna tawh amaute khih hi. Tua a hih ciangin eite khat-le-khat i kibawldan kidop mahmah ding ahi hi. Mihing in a mihingpihte tawh kisai-in a sialam a ngaihsut ding hi lo hi. A khial pawlpi mite tawh kisai-in a dangte in amau’ hoihsak leh amau’ lungsim’ phut bang peuha a hih ding uh hi lo hi. A khialte tawh kisai-in ama ngaihsutna zong a ma-gen ding hi lo hi, tua banga ma-genna tawh midangte’ lungsim ah siatna silngo a sawh ahi hi. Pawlpi sunga i sanggam numei a hih kei leh pasal khat hoih lohna pen pawlpi mi khat tung pan khat a banbanin kigen sawn hi. Khat peuh in Topa Jesu’ hong hilhna bang a zuih nop lohna hangin, thu a tang lopi-in kikhenin khialhnate kibawl hi.

            Khris in, “Na sanggam khat in na tungah hong khialh leh pai in la, ama khialhna nogel guak’ zakin va gen in,” ci hi. Matthai 18:15. Tua khialhna midangte’ kiangah gen kei in. Mi khat kiangah a kigen nak leh, tua in a dang khat, tua in zong a dang khat na gena, a banbanin thu na kibeh laplapin, pawlpi buppi in a thuak lawh zah dongin siatna hong khang hi. “Nang leh amah guak” in a thu siangsak un, cih pen Pasian deihna ahi hi. “Mi tawh kitawng pahpah kei in. Na lawm in hong maizumsak khit ciangin a tawpna ah na cih nading na thei kei ding hi. Na lawm guak tawh na thu uh kikum un. Thusim khat peuh kuama tungah pulaak kei in.” Paunak 15:8,9. Na sanggam tunga om mawhna koih khong kei in; a hi zongin thanggen khia kei in; tua banga na gen khiat leh haksatna khang dinga, hilhna pen thuphulna bangin hong ngaihsun ding hi. Pasian’ thu sunga thu a om bangin amah puahpha in.

            Thuhkik nopna a pian dongin na hehna sosak kei in. Gu a suak kammalte a pusuak dingin liamma naiphualsak kei in. Tua bang kammalte in a za mite’ lungsim kisiasak hi. Nang leh ama lungsim a dim ding thusiate ngaihsunsun kei in. Na sanggam’ kiangah pai in la, kiniamkhiatna leh lungsim takpi tawh tua thu genpih in. (290)

            A khial mi’ zia-le-tong, bangbang hi ta leh khat-le-khat kitel khialhnate leh mimal kisukkhaknate siansak nadinga Pasian’ geelna pen kikheel tuan lo hi. Khialhna a nei mi Khris’ lungsim puak zia tawh hopihna bek in zong haksatna nilkhia thei hi. Khris’ itna leh khasiat pihna tawh a kidim lungsim tawh a khial mi’ kiangah pai in la, thu a hoihna ding hanciam in. Dam tak leh neem takin amah tawh kikum un. Na kam panin hehna kammal khat zong lengkhiasak kei in. Khensatna hoih zaw a nei theisak dingin pau in. “Mawhneite ama khialhna lampi pana a kikhel sakte in, sihna panin kha khat a honkhia hi-a, mawhna tampi a khuh ahi hi,” cih kammalte mangngilh kei in. James 5:20.

            Lungkim lohna natna a damsak ding zatui na sang-gam kiangah paipih in. Amah na huh thei zahin huh in. Pawlpi kilem nading leh kipumkhatna ding ngaihsunin, hih nasep pen na masuan leh na hamphatna bangin ngaihsun in. Na thu hong san theih leh amah lawma a ngah na hi hi.

            A khial pa leh a thuak-kha pa a kihona uh vantung buppi in lawptakin ngai hi. A khial mi in Khris’ itna tawh amah a kihilhna sang thei-a, a khialhna pulaakin, Pasian’ kiang leh a sanggampa’ kiang pan mawh mai sakna a nget ciangin ama lung sungah vantung nitang hong dim hi. Kiseelna bei ta hi; kingaihna leh kimuanna hong om kik hi. Ki-itna sathau in khialhna in a piansak meima dam kiksak hi, Pasian’ Kha in lungtang khat-le-khat hen khawma, tua kipawl theihna hangin vantung ah la kisa hi.

            Tua banga Khristian lawmta kipawl theite in Pasian’ kiangah thu ngena, maan takin gamta-a, hehpihna nei-a, Pasian tawh kiniamkhiata lam a pai khawm dingin a kiciam uh leh amaute’ tungah thupha tampi tung ding hi. Midangte’ tungah a khialh uh leh zong amaute kisik kikin, thuumin, kilemna bawl uha, khat-le-khat a pha kituh ding bek lungsimin nei uh hi. Tua in Khris’ thukham kicin sakna ahi hi. (291)

            “A hi zongin ama’n na thu hong san theih kei leh hong theihpih mi nih leh thum’ kam tawh na thu a kip theih na dingin mi dang khat leh nih paipih in.” Matt. 18:16. Kha lungsim a neite paipih in la, a khial pa ama khialhna tawh kisai genpih in. Nih leh thum kipawla na hanthotna uh ama’n sang theikha ding hi. Tua thu ah note’ kithutuahna a muh ciangin, ama lungsim hong kihong kha ding hi.

            “Amah in amaute’ thu a san nop kei leh,” bang cih ta ding? Upa kikhopna ah mi tawm khat in a khial pa pawlpi pua ah koih pah ding uh hiam? “Amah in amaute’ thu a san nop kei leh tua thu pawlpi ah gen in.” Taang 17. Pawlpi in ama mite tawh kisai thu khen sat ta hen.

            “Amah in pawlpi’ thu a san nop kei leh, no’a dingin amah lawki leh siahdong bang hisak ta un.” Taang 17. Amah in pawlpi’ thu a ngaih nop kei-a, amah a kingahkik nadinga hanciamna khempeuh ama’n a nial leh, pawlpi mi hihna pana laakkhiat ding pen pawlpi’ tavuan ahi hi. Tua ciangin ama min laibu panin kiphiat ding hi. 7 T, laimai 260-262.

Pawlpi’ Hilhna A Mang Nuam Lote

            Khris’ hilhna banga limtaka a kihih masiah pawlpi laibu pana a khial mi khat peuh min a kiphiat ding, kua pawlpi upa mah in gen thei lo ding, koi committee mah in sawl thei lo dinga, koi pawlpi mah in khensat thei lo ding hi. Hih hilhna banga a kihih khit ciangin Pasian’ mai ah pawlpi a peng hi ta hi. Siatna pen a hi bang lian mahin kidawksak dinga, a kizelh semsem theih loh na dingin hep khiat kul hi. Pawlpi in Khris’ dikna puantual silha Pasian’ mai ah buah bang lo-a a din theih na dingin, pawlpi’ cidamna leh sianthona kep kul hi.

            A khial mi kisik kikal Khris’ hilhna hong man leh hunpha khat pia kik ding hi. Amah a kisik kei phiala, pawlpi pua mah ah a om phial leh zong Pasian’ nasemte in ama a ding a sep ding uh om lai hi. A kisikkiksak zawhna ding uh nakpi-a a hanciam ding uh ahi hi. (291,292) Ama khialhna bang zahta-in a lian zongin, Kha Siangtho’ zolna ama’n hong manga, a mawhna pulaakin nusia a, kisikna taktak hong kilat khiatsak leh amah kimai sakdinga tuu huang sungah sang kik ding hi. Pawlpi u leh naute in zong khemna a thuak-khak ding uh ngaihsunin, lam man ah amah hansuahin, ama mun ah a om hi le-uh amau a kibawldan ding a deihna bangun amah a bawl ding uh ahi hi.

            Khris in, “A maan taka kong cihin ah, leitunga na hen peuhpeuh uh vantung ah zong kihen dinga, leitunga na phel peuhpeuh uh vantung ah zong kiphel ding hi.” ci hi. Taang 18.

            A khang a khangin hih thu a kip ahi hi. Khris’ taanga sep theihna ding thu neihna pawlpi kipia hi. Pawlpi in Ama mite sungah kithutuahna leh kikhalna a omna dinga Pasian’ khutzat ahi hi. Khantohna, sianthona leh kithutuahna a om na dingin thusia khempeuh siansak theih nading thuneihna Pasian in pawlpi pia hi. Khris’ deihna banga a gamtat lohna uh tawh thumaan a min siasak, pawlpi mi dinga a cing lote, a pua-a koih ding tavuan pawlpi tungah kinga hi. Pasian’ Thu sunga hong kimakaihna banga pawlpi in a sep khempuh vantung in zong na kipsak hi.

            Pawlpi in a khensat ding vai thupi mahmah khawng hong om thei hi. Pasian’ mite a makai a hi Ama sehsa, Ama nasemte in amau’ hih ding teng a hih khit uh ciangin, khensatna ah kithutuahna a om theih na dingin, a thu a vannuai-in pawlpi ap ding hi.

            A nungzuite khat-le-khat a kibawldan uh a kidop mahmah ding Pasian in deih hi. Amaute in a laam to ding, a phong kik ding leh a dam kiksak ding ahi uh hi. A hi zongin pawlpi sungah hoih taka kikhalna, awlmawh loh ding hi lo hi. Pawlpi mite in amau a kisapna tawh a kizui zia-le-tong a neih theihna ding uha a kisin, sanga sangnaupangte banga amau leh amau a kingaihsut ding uh ahi hi. Hi leitunga om pawlpi sunga Pasian’ mite in tunglama om pawlpi tawh a kigawm khop theihna dingun kiging khol ding uh hi. Hi lai-a Khris tawh kilem taka a nungta mite in tat khiat innkuan (292,293) sungah tawntung nuntakna a ngah dingin kilamen thei ding uh hi. 7 T, laimai 262-264.

           

Kua’ tungah Mawhna Pulaak Ding

            A mawhnate paulap zon ding leh ipcip ding hanciama, kipulaak lo leh kimaisak lo-a vantung laibu sungah a om suak ding a phal mi khempueh Satan in zo ding hi. Amau’ nasep thupi semsemin, amau’ panmun zong sang semsem leh Pasian’ muhna ah amau’ gamtatna sia semsema, a galpa un zawh nopsa semsem hi. Pasian’ ni’a dinga kiging khol nai lote in, lungkham hun ciang a hi-a, khuanung hun khat peuh ciang a hi zongin kiging khol thei tuan lo ding uh hi. Tua bang mi khempeuh’a ding lamet om lo hi. GC, laimai 620.

            Na mawhna leh na khialhnate a thei lo mite’ kiangah na pulaak ding kisam lo hi. Thu-um lo mite a kipahna dingin pulaaka na tangko ding zong hi lo hi. A hi zongin na pulaakna dingte’ kiang, na khialhna ai man a kisa lo dingte’ kiangah, Pasian’ Thu tawh kizui-in na pulaak ding hi-a, amaute thu kingensak lecin, Pasian in na thuumna hong sangin, damna hong pia ding hi. Na kha’a ding ngaihsunin a tawntunga kigin kholhna hoih takin hih in. Na kiphatsakna, na kisaktheinate paaikhia in la, a hoih a maanin gamta in. Tuucingpa in hong sang dingin hong ngak hi. Kisik kik in la, a masa-a na om bangin om in; Pasian’ pahtakna a ngah dingin hong om kik in. 2 T, laimai 296.

            Khris in nang hong Tanpa hi; kiniamkhiata na thuumnate ah Ama’n a meet hong dok lo ding hi. Kuama hong theihpih loh mawhna na neih leh Pasian leh mihing kikala khat bek a om Palai a hi Khris’ kiangah pulaak in. “Mi khat peuh in mawhna a bawl leh midik Jesu Khris a hi palai khat Pa’ kiangah i nei hi.” 1 John 2:1. Pasian’ neihsa a hi sehsuah leh sumpite koih cip khakna mawhna na neih leh pawlpi tung leh Pasian’ tungah tua na khialhna pulaak in la, “van kholna ah seh sawm suah seh khat khempeuh hong koih un,” (Malakhi 3:10) ci-a Ama hong hilhna mang in. CH, laimai 374.  (293)

            Pasian’ mite kitel siamna tawh gamta ding hi. A kithei khia mawhna peuhmah a pulaak mateng uh lungkim lo ding uh hi; tua khit ciangin amaute Jesu in sang a hih lam a up ding uh amau’ hamphatna leh tavuan ahi hi. Amaute gual zo-a lungdamna a ngahsak dingin khuamial sung a nawk ding mite a ngak ding uh hi lo hi. Tua bang lungdamna pen kikhop man ciang dong bek mah kimang ding hi. Pasian pen lungsim seh tawh biak ding hi lo-a thuguipi siksana biak ding ahi hi. Zingsang leh nitakin na innkuanun no’a ding zawhna ngah un. Na nisim nasepte uh tawh kibuaisak kei un. Thunget hun  zang un; thu na nget uh ciangin Pasian in hong za hi cih um un. Na thungetna uh upna tawh kopsak un. Na thungetna uh hong kidawng lianlian den khol lo ding hi; a hi zongin tua pen upna hong kizia-etna ahi hi. 1 T, laimai 167.

           

Khris Bek In Thu Khen Thei

            Mihing’ lutanga a ding ding, mihing’ tuah khak mawh zolnate a tuak ding leh haksatnate a thuak dingin Khris hong kiniam khiat hi. Mawh zolna a thuakte a huhna dingdan a theihna dingin, mihing in a kia suk galpa’ kiang pan bang tuak ding cih Ama’n a theih kul hi.

            Thukhen dingin Khris kikoih hi. Thukhen ding pen Pa Pasian hi lo hi. Vantungmite zong hi lo hi. Mihing’ pianzia pua-a hih leitung ah nuntak kicing tawh hong nungta Pa teekteek mah bek eite’ thukhen ding hi thei hi. Hih thu na ciamteh ding uh hiam, ute naute aw? Hi thu na ciamteh ding uh hiam, thuhilh siate aw? Hi thu na ciamteh ding uh hiam, nute pate aw? I Thukhen a hih theih na dingin Khris in mihing hihna hong la hi. Mihingte’ thu a khen dingin note kuamah hong kiseh lo hi. Hih thu khempeuh in no leh no na kihilh pil theihna ding uh ahi hi. Thukhenna tokhom tungah no leh no kitusak tawm mawkmawk kei un, cih Ama thupiakna na manna dingun Khris min tawh kong thuum hi. Ni khat khit ni khat ka bil sungah hi thu ging den hi: “Thukhenna tokhom panin hong kum suk in. Kiniamkhiatin hong kum suk in.” 9 T, laimai 185,186. (293,294)

            Pasian in mawhna khempeuh a kikim gualin seh lo hi; mite’ seh mah bangin Ama sehna ah zong mawhna a dawldawlin om hi. A hi zongin mihing’ muhna ah mawhna a neu a lian a om hangin, Pasian’ muhna ah mawhna a neu om lo hi. Mihing in thuneu banga a muh zong na hi thei hi. Zuhaite mawh nei hi ci-in kisim mawhin, vantung tung lo ding hi, kici napi-in, kiphatsakna, huaihamna  leh hazatnate kikhah khong zel hi. Tuate zong Pasian in a zakdah mahmah mawhna mah hi veve hi. Pasian in kiphatsakna do hi. Paul in zong, huaihamna in milim biakna hi ci-in hong gen hi. Pasian’ Thu sungah milim biakna kigensia mahmah a hih lam a theite in, huaihamna pen bang zaha a lian mawhna hiam cih hong mu pah ding uh hi. 5 T, laimai 337. (294)

KHAWKPI 47

PAISAN’ SABBATH SIANGTHO TANNA

            Sabbath tanna ah thupha tampi kingah hi. Tua a hih minin Sabbath ni pen ei’a dinga ni-nuam khat a hih ding Pasian in deih hi. Sabbath hong omna hangin lungdamna om hi. Pasian in Ama khut tawh a sepnate lungkimna tawh en hi. A bawlsa na khempeuhte Amah in “hoih mahmah hi” ci hi. (Piancilna 1:31). Van leh lei lungdamna tawh kidim hi. “Zingsang aksite in la sakhawm uha, Pasian’ tate khempeuh kiko uh hi.” Job 38:7. Hih a kicing nasepna a susia dingin leitung ah mawhna a hong lut hangin, Vanglianpa in Ama dikna leh hehpihna tawh na khempeuh piangsak a hihna teci dingin Pasian in eite Sabbath hong pia lai hi. Sabbath tanna panin mihingte’ lakah Amah theihtheihna a om den ding vana i Pa in deih hi. Amah a nungta Pasian taktak a hih lam theihtheihna i lungsim sungah Sabbath in hong guana, tua banga Amah i theihna panin eite in nuntakna leh lungnopna i neih ding Pasian’ in deih hi.

            Egypt gam panin Topa in A mipawl Israelte honkhia-a, Ama thukham a piak ciangin, a maute in Sabbath a tanna uh tawh milim biate tawh a kilamdang ding a hihna amaute hilh hi. Pasian’ vangliatna a sangte leh, Amah Piangsakpa leh Kumpipa-a a sang nuam lote a kilamdangsak hih mah ahi hi. “Tua in Kei leh Israel’ tate kikal ah lim khat hi den ding hi,” Topa’n ci hi. “Tua a hih ciangin Israel’ tate in Sabbath tang ding uha, a kip thuciamna a hi dingin a khang a khangun Sabbath tang ding uh hi,” Paikhiatna 31:17,19.

            Leitung Kanaan a zuan dingin Egypt gam pan Israel mite hong pai khiat uh ciangin, Sabbath in amaute mi tumdang a hihna a lak lim a hih mah bangin, tu-in zong  vantung tawldamna a zuan dinga leitung pana a hong paikhia Pasian’ mite a tuamdangsak lim mah hi lai hi. Sabbath in Pasian leh A mipawlte akinaina lim khat hi-a, Ama thukham pahtawi uh a hihna lim khat zong ahi hi. Tua in Ama mi taktak leh Ama thunialte kilamdangsak hi.

            Meii khuam panin Khris in Sabbath tawh kisai thu na gena, “Ka Sabbathte na tang takpi ding uh hi; bang (295) hang hiam cih leh tua in, note hong siangthosak Topa in Keimah ka hih lam na theihtheihna dingun, Kei leh note’ kikal ah na khang na khangun lim khat hi ding hi,” ci hi. Paikhiatna 31:13. Pasian pen Piangsakpa a hihna a hong lak ding lima leitung mite hong kipia Sabbath in, Amah hong Siangthosakpa a hihna a hong lak lim zong ahi hi. Na khempeuh a piangsak vangliatna in, Ama lim suuna mihing a bawl pha kik vangliatna mah ahi hi. Sabbath a siangthosak mite’a dingin Sabbath in sianthosakna lim ahi hi. Sianthona taktak in Pasian tawh ki-aihualna hi-a, Amah tawh zia-le-tong kibatna ahi hi. Ama zia-le-tong a kilah khiatna a hi thu guipite zuihna panin tua sianthosakna kingah hi. Tua banah Sabbath in thumanna lim ahi hi. Lungsim takpi tawh thupiak lina a zui mi in thukham buppi zong zui ding hi. Thumanna panin amah in sianthona a ngah ahi hi.

            “A kip thuciamna” khatin Israel mite’ tungah Sabbath a kipiak mah bangin eite’ tungah zong hong kipia hi. Ama ni siangtho a zahtak mite’a dingin Sabbath in, Pasian in amaute Ama teel tuam mipawlin ciamteh a hihna lim khat ahi hi. Ama thuciamna amaute’ tungah Amah in tangtungsak ding a hih lam kiciamna zong ahi hi. Pasian’ gam ki-ukna lim a sang mi khempeuh, Pasian’ tawntung thuciamna sung a tung ahi hi. Thumanna a hi kham khaukual tawh amah leh amah a kikhih hi-a, kual khat ciat in kamciam khat ciat hi pah hi. 6 T, laimai 349,350.

“Sabbath Ni Phawk Un”

            Thupiak lina a kipatna lian ah Topa in, “Phawk un,” ci hi. Lung hihmawhna leh lung khamna tampi lakah mite in thukham’ deihna a kicinga a zuih lohna dingun paulap zong ding uh a hihna leh siangtho-a, a thupina kimangngilh ding a hihna Ama’n thei hi. Tua a hih manin Amah in, “Sabbath ni na sianthosak ding uh phawkun,” ci hi. Paikhiatna 20:8.

            Ni guk sung tawntung eite in ngaihsutin Sabbath i neih ding hi a, thupiakna banga a tang dingin i kigin kholh ding ahi hi. Thukham a hih mana Sabbath a tang lel bek ding i hi kei hi. Nuntak khuasakna khempeuh (295,296) ah tua in khalam thu tawh kisai a hih lam i theih ding ahi hi. Pasian leh amaute’ kikala kiciaptehna lim khata Sabbath ngaihsuna, amaute a siangthosak pa in Pasian hi a ci mite khempeuh in, Ama gam ki-ukna thuguipite kilangkhiasak ding uh hi. Ama gam thukhamte nisimin zui ding uh hi. Sabbath-i sianthona amaute’ tungah a om theihna ding pen amaute’ nisim thungetna hi ding hi. Nisimin amaute in Khris kikholh pihna ngah ding uha, Ama zia-le-tong kicinna zong a nuntakna uah kilangkhiasak ding uh hi. Nisimin a gamtat hoihte uh panin midangte’ tungah a khuavak uh taangkhia ding hi.

            Pasian’ nasepna a mainawt nadinga sep ding a om khempeuh lakah innkuan nuntakna ah kizawhna ngah masak phot ding ahi hi. Innkuan panin Sabbath’a ding kigin kholhna a kipat kul hi. Ni guk sung tawntung nute pate in, a inn uh pen, tunglam zumpi’a dinga a tate uh a kigin kholh nading sang khat a hih lam phawk ta uh hen. A kammalte uh kammal maan hisak ta uh hen. A tate uh’ zak dinga a kilawm lo kammalte a kam uh panin pusuaksak kei uh hen. Lung sona a om lo lungsim nei uh hen. Nute pate aw, Ama-a dinga na pattah ding uha tanote a hong pia, a siangtho Pasian’ muhna ah a om mah bangin ni guk sung tawntung gamta un. Sabbath ni ciangin na vekpi-un Topa’ inn siangtho sungah biakna  pia dinga kiging khol khin na hihna dingun, na inn sung uah biakinn no khat bangin na tanote uh pantah un. Ama sisan tawh a leisa na tanote, zingsang leh nitak simin Pasian’ kiangah puak un. Pasian ita a biak ding uh amaute’ tavuan leh hamphatna lian bel a hih lam amaute hilh un.

            Tua banga Sabbath a kiphawk ciangin, khalam thute a tuh dingin leitung thute kiphal nawn lo ding hi. Ni guk sung na sepna tawh kisai tavuan khat peuh Sabbath ni’a dingin siit lo ding hi. Topa a tawlngak a thalak kik ni ciangin Amah biakna hun sungah kihel dingin gim lua-a i om loh na dingin ni guk sunga leitung nate i sepna ah i thate beisak luat ding hi lo hi.

            Ni guk sung khempeuh Sabbath’a ding kigin kholhna ah Friday pen kigin kholh phat diak ni ding ahi hi. (296,297) Moses tung tawnin Topa in Israel’ tate’ kiangah, “Zing ciangin Topa’a ding a siangtho Sabbath tawlngakna ahi hi; na em dingte uh tu ni-in em un la, na huan dingte uh zong huan un; a om lai teng zingsang ciang’a dingin koih un.” “Mite pai uha manna tawm uh hi; an gawina tawh gawi-in, sum ah zong su-in, dal peek sungah em uha, anlumin bawl uh hi,” ci hi. Paikhiatna 16:23; Gamlakvakna 11:8. Israel’ tate’a dinga van pana kia an pen nek theih dingin bawl ding kisam lai hi. Tua pen kigin ni a hi Friday ni-a sep ding a hih lam Topa in amaute gen hi.

            Friday ni-in Sabbath’a ding kigin kholhna man siang ding hi. Puan silh ding teng a baihsa-in om dinga, nek ding khempeuh zong bawlsa in om ding hi. Khedap zong za zut dinga, pumpi zong sil ding hi. Hih theih ding vive ahi hi. Ngeina khatin bawl peuh lecin na hih thei ding hi. Sabbath pen puan phopna ding, an huanna ding, gualnop bawl nading leh, leitung tawh kipawl nasep dangte sepna hun ding hi lo hi. Ni a tum ma-in leitung tawh kipawl nasep khempueh khawl san dinga, leitung tawh kipawl lai khempeuh zong muh lohna mun ah koih ding hi. Nute pate aw, na nasep uh leh na nasep uh’ deihna na tate uh gen un; thupiakna banga Sabbath na tan theih nading uha na kigin kholhna uah amaute kihuhsak un.

            Sabbath mong tegel zong ngentel taka i kep ding ahi hi. Hun khempeuh a saingtho dinga a ki-apsa a hih lam mangngilh kei un. A hi thei zahzahin Friday sunkim pan kipan Sabbath a kipat hun dong thacialte in nasemte hun awng pia ding hi. Lung nuam taka Topa ni a dawn theihna dingun kigin kholhna ding hun amaute pia un. Tua banga na hihna uh tawh leitung nate-a kipan supna bang mah na tuak kei ding uh hi.

            Kigin ni-a ngaihsut ding nasep dang khat om hi. Innkuan sung a hi-a pawlpi sung a hi zongin khat-le-khat kikala om kitel khialhna khempeuh paih khiat ding ahi hi. Lungsim sung panin ki-elna, hehna leh kimuhdahna khempeuh hawlkhia un. Kiniamkhiatna tawh “khat-le-khat na khialhna uh kithuum un la, na ci-damna (297) dingun khat-le-khat thu kingetsak un.” Jeims 5:16. 6 T, laimai 353-356.

            Sabbath siangtho palsatna banga Vantung in a ngaihsut theih ding na khat peuh, Sabbath ni-a gen ding a hi-a, hih ding a hi zongin, kigin ni-in gen loh a hih kei leh hih lohin koih kei un. Sabbath ni-a thatang nasepna pana i khawl ding bek hi lo in, lungsim in zong a siangtho nate a ngaihsut theih nadinga a kikhal ding Pasian in hong ngen hi. Thu gina loteng leh leitung thute kikupna tawh thupiak lina a kipalsat ahi hi. Lungsim sunga hong lut thei thu khat peuhpeuh kikuma kihona in, utpeuh pauna ahi hi. Thumaan pana pialna khempeuh in sila leh mawhsakna sung hong tun hi. 2 T, laimai 703.

Nitum Kikhopna

            Sabbath ka tang hi a ci mi tampite in Sabbath a sianthosak ding zahun siangthosak lo uh hi. Thupiak-i cihna leh deihna bangin Sabbath a tang lo mite’ hangin Topa nakpi-in ki-minsiasak hi. Tua a hih manin Amah in Sabbath tanna ah kipuahphat ding hong sawl hi.

            Ni a tum suk ma-in innkuanin kikaikhawmin, Pasian’ Thu simin, la sa-in thu na ngen ding uh hi. Hi thu mi tampi in awlmawh lo uh a hih manin kipuahphat ding kisam hi. Pasian’ tung leh khat-le-khat tungah mawhna kithuum ding kisam hi. Pasian in thupha a piaksa leh a sianthosaksa ni a pahtawi dingin innkuan mimal khempeuh a kigin kholh theihna ding geel kholhna tuam mahmah khat neih thak ding kisam hi.

            Innukuan biak kikhopna ah zong naupangte kihelsak un. Lai Siangtho bu tawisak ciat un la, taang nih taang thum bang tek simsak un. Tua ciangin a kithei kim la khat sa un la, thungetna tawh zom un. Tua banga hih ding Khris in lim hong lak zo hi. Topa’ thungetna pen a tuateng lian lawh kikkik dinga kingaihsun hi lo-a, i thungetnate koi bangdan ding cih a hong lak ahi hi. I thungetna baihlam dinga, lungsim takpi hi dinga, tel nop ding hi. Na kitangsapnate kammal baihlam tawh Topa’ kiangah gen in la, Ama hong hehpihnate lungdam ko in. Tua bangin na inn sung uh leh na lung sung uah (297,298) deihhuai lengla bangin Jesus sam un. Innkuan sungah a kisai khol lo thu tampi pulaaka thu saupi nget ding hi lo hi. Hamphatna leh thupha banga a kingaihsun ding kimlai, thu sau ngetna in thungetna hun a cimtak-huai suaksak hi. Lawpna leh lungdamna hun khat suaksak un.

            Ni hong tum suk ciangin (Sabbath hun a bei ciangin) hun siangtho a beina pen thungetna leh la sakna tawh lak un la, nasepna ni guk sung tawntung Pasian’ hong ompih nading ngen un.

                        Topa’a dinga Sabbath sianthosakna in tawntung hotkhiatna ahi hi. Pasian in, “Kei hong zahtakte Ken zong Ka zahtak ding hi,” ci hi. 1 Samuel 2:30. 6 T, laimai 353-359.

Innkuan’a Ding Siangtho Bel Hun

            Sabbath School leh biakna hunpi in Sabbath hun  khen khat bek ahi hi. Hun om laiteng pen Sabbath hun khempeuh laka a siangtho bel leh a manpha bela innkuante in a zat ding uh ahi hi. Tua hunte nute pate in a tate uh tawh zang khawm ding hi. Innkuan tampite ah naupang lamte pen amau’ ut bangbanga a ta dingin kikoih khong hi. Kikhoih khong leh naupangte om khong thei lo in, hong kimawl pahin, huat-huai khat peuh zong hong hih ding uh hi. Tua bangin Sabbath in amau’a dingin sianthona nei nawn lo hi.

            Khuahun nop ciangin nute pate in a tate uh lo sung khawng leh sing nuai khawng ah vakpih uh hen. Singkung lopa hoih nono lak ah pai-in, Pasian in Sabbath a omsakna thu khawng amaute genpih un. Pasian’ piansak nasepna lianpi zong amaute gen un. Pasian’ khut pana leitung hong om khiat laitakin siangtho-in hoih mahmah a hih lam zong gen un. Paak khempeuh sawlbawk khempeuh leh singkung khempeuh in Piangsakpa’ ngimna bangin piang hi. Mit in a et khak khempeuh pahtak-huai a, Pasian’ hong itna thu lungsim sung teng ah hong vung hi. Awging khempeuh zong Pasian’aw tawh kihualin la sakna vive ahi hi. Pasian’ nasepna a kicing a susia pen mawhna a hih lam lak un; ling leh kiakte, dahna, natna leh sihnate, Pasian’ thu man lohna (298,299) hanga piang a hih lam gen un. Mawhna in bang zahta in leitung susia hi ta mah leh Pasian’ hoihna kilang veve lai a hihna zong musak un. Lopa hing ngingeite, singkung sang pipite, nitang nuamte, meiite, daituite, zan lai gamdaihnate, vana aksi ziaizuaite leh a etlawm khapi in Piangsakpa’ thu hong gen uh hi. Pasian’ hong itna leh hong thuakna hong lak lo hi leh, a lungdam thei lo leitung ah guah mal khat zong hong kia lo in, nizang khat zong hong tang lo hi.

            Hotkhiatna lampi zong amaute hilh un; “Pasiang in leitung mite it mahmaha, Amah a um mi khempeuh in kisia lo-a tawntung nuntakna a ngah na dingin A Tapa khattang hong pia” a hihna thu zong gen un. John 3:16. Bethlehem khua-a tangthu zaknophuai zong gen kikkik un. Jesu, naupang a hih lai-a a nu a pa’ thu a manna, khangno a hih lai-a a cihtakna leh na a sepna, innkuan kivaakna ding a huhna cihte, tanote’ kiangah gen un. Honpa in khangnote’ haksatnate, lungkhamnate, zia-etna a thuaknate, a lamentnate uh leh lungdamnate, uh theihpih-a, amaute khasiatpihin huhna zong pia thei a hihnate zong tua bangin amaute hilh un. Lai Siangtho sung panin a lawphuai tangthute amaute tawh sim khawm zelzel un. Sabbath School huna a sinsate uh dong kik un la, mai-a a sin ding uh zong amaute tawh sim khawm un. 6 T, laimai 358,359.

            Sabbath ni ciangin innkuan bupin Pasian’ tungah hoih taka ki-apna neih ding ahi hi. Thupiakna in i huang sunga om khempeuh huamsak hi; inn-a i ompih khempeuh in zong a leitung  nasepna uh koih phot dinga, hun siangtho sung pen ki-apna in zang ding hi. Ama ni siangtho ni-in lungdam taka biakpiakna tawh na vekpi-un Pasian pahtawi khawm un. 2 TT, laimai 185.

“Hong Pai Un Topa Bia Ni”

            Khris in, “Ka min tawh nih leh thum a om khopna ah, amaute’ laizang ah Kei ka om hi,” ci hi. Matthai 18:20. Thu-um mi nih leh thum bek a hi zongin a omna mun peuhpeuh ah Topa’ kamciam a ngen dingin amaute kikhawmkhawm uh hen. (299)

            Ama ni siangtho ni-a Pasian bia dinga a kikhawm mihon tawmnote in zong Yahweh’ thupha tampi ngen thei ding uh hi. Amau’ kikhopna ah lengla thupi-a Jesu pai a hih lam a up ding uh ahi hi. Sabbath siangthosaka lungsim tak tawh biakna a piate in, “Note a hong siangthosak Topa Pasian in Keimah ka hih lam na theihna dingun,” cih kamciam a nget ding uh ahi hi. (Paikhiatna 31:13) 6 T, laimai 360, 361.

            Leitung nasepnate panin a lungsim heikhia-a, Pasian’ hoihna leh thupina a ngaihsutna tawh mihing’a dinga thupha a hi dingin, Sabbath a kibawl ahi hi. Ama thu a gen ding, Ama Thu sunga om thumaante a kikumkhawm ding leh thungetna hun hoih khat a zang dingin Pasian’ mite a kikhop khawm ding uh kisam hi. A hi zongin hi bang hunte, Sabbath ni nangawnin zong a kicimtaak loh na dingin sausak lua lo dinga, lawphuaisak ding hi. 2 T, laimai 583.

            Pawlpi in thuhilh sia a neih kei leh kikhop makai dingin mi khat seh ding hi. A hi zongin amah in thu a hilh ding hi tuan lo-a, biakpiakna hun zong a tam zaw a-ma’n a zang ding hi tuan lo hi. Thuhilhna sangin a tom, a lawphuai Lai Siangtho mun khat simna in phat tuamna lian zaw thei hi, tua pen thungetna leh tecipanna tawh zop ding ahi hi.

            Sabbath ni-a kikhopnate a lawphuai theih na dingin mi khempeuh in tavuan nei uh a hih lam a phawk ding uh ahi hi. Kingeina seha kikhawm dinga pai pong mawk ding hi lo in, Pasian leh A hong sawl’ Pa Jesu Khris na theih nading uha, ngaihsutnate kikum ding, nisima na sinkhakte uh kitheisak ding, lungdamna thu gen ding, Pasian’ makaihna deihtakpi na hihna uh a gen ding na hi uh hi. Khris’ thu na kikup khopna uh panin nuntak haksatnate leh galdonate ah thakhauhna na ngah ding uh hi. Nang guak tanglenna leh tuam tatna tawh Khristian a hi veve dingin kingaihsun ngei kei in. A kuamah tek mihing hihna tawh a kizom khawm diamdiam kihi-a, khat ciat in a sinkhak uh thu pen a dangte’ sinkhak thute tawh saikaka sittel ding ahi hi. 6 T, laimai 361. (299,300)

           

Sabbath School

            Sabbath school nasepna-i ngimna in mite kaihkhop nading ahi hi. Sepdan zong gen bang lo in hoih kha dinga, a deihhuai vanzat-te zong kim phial ding a hi ta zong in, Khris kiangah naupangte leh khangnote a kitut kei leh, tua sang a mawkna ahi hi. Khris lamah mite a kikaih kei leh biakna pen ngeina bang beka neihna in amaute’ lungsim la zo lo zawsem ding hi. Huhna a kisam mi’ lungsim kongkhak Khris in a kiuh lai takin, Lai Saingtho a hilh siate in zong a huh kul hi. Naupangte in Kha-i zolna a man uha, Jesu a lut theih nadinga a lungsim khongkhak uh a hon uh leh Jesu in amaute’ thutheihna honsak dinga, amaute in Pasian’ thute hong tel ding uh hi. Siate’ nasep pen a haksa hi lo hi; Jesu’ lungsim tawh sem peuh le-uh Pasian’ Kha-i nasepna tawh siamna hong kibehlap ding hi.

            Nute pate aw, na tate uh tawh Sabbath school lesson na sinna ding uh, nisimin huntawm khatta sehkhia un. A manpha tangthu siangtho sinna ding hun thupi na mawk beisak uh sangin meltheih kikawmna khawngte zong pelh zaw un. Nute pate leh tate in a kibangin, tua thusinna panin phat tuamna ngah ding uh hi. Lesson tawh a kizom Lai Siangtho mun thupi zawdiakte, a phamawh hi lo in hamphatna bangin ngaihsunin lotngah ding hanciam un. A masa-in lim takin na ngah zo kei uh zongin, hanciamin kisinsin le-uh cin, a sawtna cingin thumaan kammalte tua banga na khol ding nuam na sa ding uh hi. Tua bangin zongsang le-uh cin khalam khantohna ah hong manpha mahmah ding hi.

            Na innkuan sung uah Lai Saingtho sinna hun maan-maanin omsak un. Leitung tawh kipawl nate don kei phot un. A kul lo puan khuina khawng leh a kisam lo annek bawlna khawngte koih phot un la, nuntakna an tawh na kha uh vaak phot un. Lungdam maitai taka Pasian’ Thu ni sima nai khat hiam nai lang hiam peuhmah simna pan a piang thupha pen seh khit theih ding hi lo hi. Lai Siangtho amah leh amah kikhiasak un la, thu khat peuh tawh kisai pen hun tuamtuam leh mun thuamtuam panin kaikhawm un. Lenglate hangin na inn (300,301) uha thusinna hun kipelhsak kei un. Hun zat lai taka hong pai a om leh zong sam un la kihelsak un. Leitung tawh kipawl meetna leh gualnopnate sangin Pasian’ Thu theihtheihna thupisa zaw na hih lam uh kimukhiasak un.

            Sabbath school kimkhat-te ah lesson sung panin a thute sim suk lel peuh ngeina-a neih uh ka gen ding zong ka thadah hi. Tua bang hi lo ding hi. Hunte a kisam lopi leh mawhna tawh kidim thute genna-in kimawk zat kei hen la, Lai Siangtho sinna hunin kizang hi leh tua bangin om lo ding hi. Sanga lai sinnate sangin siate leh naupangte in Sabbath school lesson limtaka a sin zawk lohna ding uh a thu om lo hi. A thupi zaw lua mahmah thute a hih manin, lim taka sin zawk ding ahi hi. Hi thu ah awlmawh lohna in Pasian lungkimsak lo hi.

            Sabbath school lesson a hilhte in Pasian’ Thu tawh lawpna leh thangahna a neih uh kula, thu a zate bek hi lo in thu bang a gamtate a hih ding uh kisam hi. Lenggah hiang in a guipi panin tha a ngah mah bangin amaute in zong Khris panin tha a ngah ding uh ahi hi. Pasian’ huana paakte mah bangin amaute’ lungtangte zong paak kung mah bangin, a ngumte palhkhia-a a gim namtui mun khempeuh a kizelhsak theihna dingun, vantung hehpihna daitui amaute’ tung a tuk ding kisam hi. Siate in Pasian’ Thu lim taka a sin sangnaupangte hi dinga, Khris’ sang ah ni sima lesson a sin a hihna uh kilangsak denin, leitung Khuavak leh Siapipa a hi Ama kiang pana a ngah uh khuavak, midangte’ kiangah a tang sawnsak theite hi ding uh hi.

            A hunhunin makai dingte na teel uh ciangin, mai-tang zahtak tuam nei peuhmah lo dinga Pasian ita zahtak nasak uh, Pasian pen dot leh koha a nei dingte bek mah tua bang a thupi mun ah na teel ding uh ahi hi. 2 TT, laimai 557-566.

“Sabbath Ni-in A Pha Bawl Ding Siang Hi”

            Innkuan sung leh pawlpi sungah mi huhnopna lungsim a kilat khiat ding ahi hi. Leitung nate sepna dinga (301,302) ni guk sung hun hong pia pa-in, a ni sagih ni siangthosakin thupha pia-a, Ama a dingin seh tuam hi. Tua ni-in Ama na a sem dinga a ki-ap khempueh a tuam mahmahin Amah in thupha pia ding hi.

            Vantung buppi in Sabbath tang uh a hih hangin kin mel nei lo-a bangmah sem lo-a om uh hi lo hi. Tua ni-in kha-i hatna khempueh a khanlawh ding kisam hi, bang hang hiam cih leh eite pen Pasian leh hong Honpa Khris tawh a kimu ding hi lo i hiam? Upna tawh Amah i mu thei hi. Amah in kha khempeuh thupha pia-in tha thak guan nuam hi. 6 T, laimai 361, 362.

            Pasian’ hehpihna thu in cinate leh gim thuakte a don dingin hong sawl hi; amau’ nop tuamna ding a kisam nasepna pen a phamawh hi-a, Sabbath palsatna hi lo hi. A hi zongin a phamawh taktak lote peuhmah pelh ding ahi hi. Kigin ni-a sep khit theih ding bang lo nengte mi tampi in Sabbath kipat hun dong awlmawh lo in koih thei uh hi. Tua bang hi lo ding hi. Hun siangtho a kipat ciang dong sep loh a, a om na khat peuh pen Sabbath hun a bei dongin sep lohin koih suak ding ahi hi. 2 TT, laimai 184,185.

            Sabbath ni-a an huan loh a hoih a hih hangin, an a khing (vot) nek ding hi lo hi. Khuavot hun ciangin a zana a kihuansa an pen lumsak kik ding hi. An pen baihlam dinga a hi zong in limin duhhuai ding hi. Ni sima innkuana na nek ngei loh uh an pawl khat a lawphuai ding vaihawm un.

            Thumang mite’ tunga kikham thupha, eite’n zong i deih leh ei zong Sabbath lim taka i tan ding ahi hi. A kipelh thei ding hi napi-in tua ni-in khual i zin thei zel hi. Sabbath tanna tawh kisai-a Topa’ hong piak khuavak tawh kizui-in, tua ni-a gunkuang (tembaw) leh mawtaw khawng tawh khual zin pen i kidop mahmah ding ahi hi. I tate leh i khangnote’ mai ah hih thu tawh kisai-in lim hoih i lah ding ahi hi. I huhna a kiphamawh pawlpite va pha-a, Pasian in amaute’ zak (302) dinga a deihthute a puak dingin, Sabbath ni-a khualzin ding phamawh theikha ding hi; a hi zongin tua ni ma-in i ticket ding lei khola, a kisam khempeuh i kigin kholh khit ding kisam hi. Khual i zin khiat ding ciangin zong Sabbath ni i paina ding mun i tun loh theina dingin a hi thei zahzaha i geel kholh ding kisam hi.

            “Sabbath ni-a khual zin loha a phamawh hun hong tun ciangin leitung thute lamah hong kai nuam thei ding mite tawh i kikholh ding hi lo hi. I lungsim Pasian tawh kizom sakin, Amah bek tawh i kiho ding ahi hi. Midangte’ kiangah thumaan genna ding hun hoih hong om nak leh i khahsuah kei ding hi. Gimna a thuak mite a noptuamsak ding leh a cimawhte a hun dingin kigingsa-in i om den ding hi. Tua bang munte ah Ama hong piaksa theihna leh siamnate i zat ding Pasian in hong deih hi. Sum bawlna vai khawng i gen kei dinga, leitung tawh kipawl thucin thutang genna ah i kihel kei ding hi. Hun khempeuh leh mun khempeuh ah Sabbath pahtawina tawh Ama tungah i cihtakna i lah ding Pasian in deih hi. 6 T, laimai 357-360.

Sabbath Ni-a Sang Kahna

            Thupiak lina a zui peuhmah in amah leh leitung kikal ah kikhenna kigi kikhung a hih lam mu ding hi. Sabbath in sit-telna khat hi-a, mihing leh mihing kisit-telna hi lo in, Pasian in mite hong sit-telna ahi hi. Tua in Pasian a biate leh a bia lote kilamdangsak hi. Hih thu panin thumaan leh thukhial kikala a nunung kidona lianpi hong piang ding ahi hi.

            I mite kim khat in Sabbath ni-in a tate uh sang kahsak uh hi. A peelmawh hial dinga kisawl hi lo hi. Sanga thuneite in ni guk sung sang a kah lote kisang lo ding a cih man uh ahi hi. Tua sangte ah lai sin ngeina teng bek kisinsak lo hi. Nasep tuamtuam zong kihilh lai hi. Tua munte ah thupiak ka zui uh hi a cihte’ tate Sabbath ni-in sang kikalhsak hi. Nute pate kim (302,303) khat in Khris’ kammal manin a gamtatna uh kipanghang uh hi. Sabbath ni-in a pha bawl ding siang hi, ci uh hi. Tua pen mah Sabbath ni-in na kisem thei hi, cih paulapin hong kinei ding hi. Tate vaakna ding kisam hi, hong ci ding uh hi. Bang hih dinga, bang hih lo ding cih ciangtanna, gi khenna bangmah om lo hi.

            Thupiak lina a kizuih theih lohna mun ah a tate uh a puak laiteng uh i sanggamte in Pasian’ maipha mu lo ding uh hi. Ni sagih ni-in a tate uh sang a kah loh na dingin thuneite tawh kihona a neih ding uh kisam hi. A ngah zawh mahmah kei uh leh zong a hih ding uh kician mahmah lel hi. Bang zahta a sum zaw uh zongin Pasian’ deihna a zuih ding uh ahi hi.

            Kimkhat-te in, Topa’ hong sawlna tua zah liang hi teltal kei, hong ci ding uh hi. Tua zahta sup lawh lianga Sabbath tan kenkon ding hi kei, gam thukham tawh kilehbulha tua zaha om ding hi kei, hong ci ding uh hi. Mihing’ sawlna sangin Pasian’ thukham pahtawi zaw lo ding maw, cih zia-etna hiah hong tung pah hi. Pasian a pahtawite leh a pahtawi lote a kilamdangsak, hi mah hi pah hi. I cihtakna i lahna ding hih mun mah hi pah hi. Pasian in ngentel taka thumanna hong kal (ngen) a hih lam a khang a khanga Ama mipawlte tawh Pasian a kizopdan in hong lak hi.

            Nute pate in leitung mite tawh kibanga a tate uh pilna a sinsak uh leh, Sabbath ni zong ni dangte mah banga a bawl uh leh, Pasian’ ciaptehna amaute’ tungah kikhen thei lo ding hi. Leitung mite tawh amaute kisusia khawm ding hi. A nu a pate uh’ tungah amaute’ sisan tu lo ding a hiam? Pasian’ thupiakte i tate limtak in hilha, nute pate’ thu i mansak zawh leh, tua ciangin upna leh thungetna tawh amaute Pasian’ tungah ap lehang, ei’ hanciamna tawh kizui-in Ama’n na hong sem ding hi; bang hang hiam cih leh Amah’n kamciam hong pia zo hi. Gam sung tengah gimna lianpi a hong tun ciangin Topa’ buk sung mun khat ah amaute tawh i bu khawm thei ding hi. 2 TT,  laimai 180-184. (303,304)

           

Leitung Masuante Pana Tawlngakna Ni

            A thupi lo leitung phat tuamnate ngahna dinga a si thei mihing in ama deihna Pasian in a lehzuih dinga a hanciam ngam pen a nasia mahmah upmawhna ahi hi. Leitung nasepna dinga Sabbath zat zelzelna pen Sabbath nial vilvelna mah bangin thukham palsatna taktak mah hi veve hi. Bang hang hiam cih leh tua in Pasian’ thupiakte ut bang peuha bawlna ahi hi. “Keimah Topa na Pasian un note hong muangmawh baih Pasian ka hi hi,” ci-in Sihnai mual pan ging hi. Amah a mudahte’ tate khang thum khang lina dong a pate uh’ mawhna amaute’ tungah kithuk dinga, Amah ita Ama thupiakte a zui mi a khang tul tampite’ tungah hehpihna kilak ding hi, a ci Pa in, thumanna phel khat, lawpna bek khatkhat, cih khawng deih lo hi. Midangte’ neihsa gukna cih khawng pen a thuneu hi lo-a, tua banga a guta mi a min dai mahmah hi. Midangte a khem thei mi in, vantung Pasian in deihna tuam tawh sehkhia-a thupha a piaksa hun pen a guk ding a maizum lo ding hi. 4 T, laimai 249,250.

            Kampaute leh ngaihsutnate zong kikep ding ahi hi. Sabbath ni-a, mailam nasep dingte kikupna a neite, nasem taktak zah mahin Pasian in amaute ngaihsun hi. Sabbath i sianthosak na dingin leitung tawh kipawl thute a ngaihsun dingin i lungsim i phal loh ding ahi hi. 2 TT, laimai 185.

            Pasian in gen khin zo-a, A gen banga mite in a man ding uh ahi hi. Mihing in hih nuam ding maw hih nuam lo ding cih Ama’n kan lo hi. Nuntakna leh thupina Topa in, dahna mi-pa  suak ding leh lungkhamna a thuak dinga Ama panmun sangpi nusia-a, ama thuman lohna thaman pana mihing a hot khiat theihna dinga zumhuaina leh sihna a teel ciangin Ama utthu leh nopsak kan tuan lo hi. Mihing a mawhna tawh hi lo in, a mawhnate pan a honkhia dingin Jesu si hi. Mihing in ama khialhna lampite a nusiat ding, Khris’ lim-le-lai a zuih ding, ama singlamteh pua-a Ama nung a zui ding, ama angsung niala bangbang hi ta leh Pasian’ thu a man ding ahi hi. (304)

            Leitung tawh kipawl meetna khat peuh ngahna dinga Sabbath ni-a nasepna ah, bang thu bang la mah in kuamah gum thei lo ding hi. Pasian in mi khat a map leh mi khempeuh a map kul ding hi. Mizawng khat in Sabbath ni-a nasepna tawh a innkuan hoih takin vaak zo zaw ding a hih leh sum ngah na dingin amah in sem lo thei mah ding hiam? Ei a dang khempeuh in zong i hih theih ni ciang bek mahin Sabbath tang thei lo ding i hiam? Sihnai mual pana awging in, “Ni guk sung na na sem dinga, na sep ding khempeuh na sem ding hi; a hi zongin a ni sagih ni in TOPA na Pasian’ Sabbath ahi hi,” ci hi. Paikhiatna 20:9,10.

            Pasian’ thupiakte na zuih ding na kum in hong pengsak tuan lo ding hi. Abraham a teek nung mahin nakpi-in kiziaet hi. TOPA’ kammalte teeksiapa’a dingin deihhuai lo in lipkhaphuai phial a hih hangin, amah kam tam tuan se lo in, a man ding zong uaikai tuan lo hi. Teek khin guai khina, a nuntak a nuamsak ding tapa khat a neihsun biakna-a a piak ding hi thei kei, ci leh kilawm hi. Tua tapa tawh kisai-a a kipiasa kamciamte tawh tua thupiakna kituak kei, ci-in Topa’ tungah gen leh kilawm hi. A hi zongin Abraham phun loin paulap zongzong lo in thu mang hi. Amah in Pasian muan cih takin muang hi. 4 T, laimai 250-253.

            Jesu’ nasemte in Sabbath sianthosak ding a phawk lo mite a hilh ding uh ahi hi. Sabbath tang mahin kigen napi-a Sabbath ni-a leitung vaite kikuma a om mite, migitna leh cihtakna tawh amaute in a taai ding uh ahi hi. Pasian’ ni siangtho ni-a Ama tungah a ki-ap ding uh a hanthot ding uh ahi hi.

            A kisiangtho saksa hunte kimanna nei lopi-a a mawk zat bei thei dingin kuamah kingaihsun kei hen. Sabbath tangte, Sabbath hun a tamzaw a ihmut ding uh Pasian in deih lo hi. Tua bang a hihna uh tawh amaute in Piangsakpa a mindaisak uh ahi hi; tua banah ni guk sung teng pen tawlngakna huna zat dingin pammaih lua a ci uh a hihna a lim a lai uh tawh a lak ahi hi. A kisam mahmah ihmut hun dingte uh sum zonna hunin (304,305) beisak uha, tuaten hun siangtho sunga a ihmutna uh tawh kidin kiksak uh hi. Tua ciangin amaute in, “Tawlngakna ni dinga Sabbath hong kipia hi. Ka tawlngak ding kisam a hih manin kikhopna tawh ka tawl ngak hun ding kipelhsak kei ning,” ci-in paulap zong uh hi. Tua bang mite in a kisiangtho saksa ni pen a leh-lama a zang uh ahi hi. A diakdiakin amaute in tua ni-in a innkuan pihte uh tawh mi tawm ta leh tam ta se leh Sabbath tanga thungetna inn ah a kikhop ding uh ahi hi. Sabbath ni-a kingah Pasian’ thupha in ni guk tawntung amaute a ompih theihna dingin amaute in a hun uh leh a hatnate uh khalam thasaanna-a a zat ding uh ahi hi. Ni sagih kaal khat sungah om ni khempeuh lakah Sabbath ni zaha Pasian’ thu ngaihsutna dinga a hoih ni dang om lo hi. 2 T, laimai 704.

            Siangtho takin Sabbath na kitang paisuak hi leh lawki khawng leh milim bia khawng a om thei ngei ding hi lo hi. Sabbath tanna pen Eden huana hong kipan hia, leitung mahmah tawh a khang khawm ahi hi. Piancil pan kipanin tulpite (mi thupite) khempueh in na tang uh hi. Egypt gam ah sila-a a om sungun a tote un Israel mite Sabbath palsatsak hamtang uha, a sianthona mangngilh zo zah dong ciang hong tung uh hi. Sihnai mual ah thukham a kitang ko ciangin, thupiak lina kammal kipatna ah, “Sabbath na sianthosak ding uh phawk un,” ci hi; tua kammal in tua huna Sabbath a kiphut tawm a hih loh lam hong lak hi. Piancil pana hong kipan a hih lam hong kilak kik hi. Mite’ lungsim sung panin Pasian a beisak theih na dingin Satan in tua mualsuang phel siat ding ngim pah hi. Mite in amaute a Piangsakpa mangngilh thei leh, siatna a do dingin hanciam nawn lo ding uha, amaute Satan’ aikhupsa hi pah ding hi. PP, laimai 336.

           

Sabbath Tanna Pana Thuphate

            Thupiak lina-i deihna thei-a Sabbath a tang mite vantung buppi in Sabbath ni-in enin vil uh a hihna kei hong kimusak hi. Vantungmite in tua Pasian’ phuhsa Sabbath, thupi ngaihsutin, lawpbawl mahmah uh hi. Ki-apna lungsim taktak tawh a lung sung uah Topa (305,306) Pasian teeng saka, a siam theih zah uh tawh Sabbath ni a sianthosak theih ding uh hanciama, Sabbath ni nuamsa-a Pasian a pahtawite’ tungah tua vantungmite in khuavak leh cidamna a tuamin pia uha, hatna zong amaute guan tuam uh hi. 2 T, laimai 704,705.

            Vantung’ deihnate hoih taka zuihna in leitung leh vantung (pumpi leh khalam) thuphate akibangin hong puak hi. PK, laimai 546.

            “Hi thu a zui mi leh, hi thu kip taka a len mi hampha hi; Sabbath palsat lo-a a tang mi, siatna khat peuh bawlna ding pana a khut a kem mi zong hampha hi.” “TOPA  bia ding, TOPA’ lama hong kihei namdangte’ tate, Sabbath palsat lo-a Ka thuciamna a len khempeuh, ka mual siangtho ah ka paipih dinga, Ka thungetna inn sungah amaute Ka lungdamsak ding hi.” Isaiah 56:2,6,7. GC, laimai 451.

            Lei leh vante a kip laiteng, Piangsakpa’ vangliatna lim a hi dingin Sabbath om den ding hi. Leitung ah Eden huan hong nopcit kik ciangin, ni’ nuai-a om khempeuh in Pasian’ tawlngak ni siangtho ni hong pahtawi ding uh hi. A nopci mahmah lei thaka a teeng mite, “Sabbath khat pan Sabbath khat, Ka mai ah hong bia dingin hong pai ding hi, TOPA in a ci hi.” DA, laimai 283. (306)

KHAWKPI 48
NEIHSA KEP SIAM DING HILHNA

            Citna lungsim in vantung lungsim ahi hi. Ama angsung niala Khris in hong itna singlamteh tungah hong kilang hi. Mihing a suahtak theihna dingin, Amah in a neih khempeuh hong pia-in Amah mah zong hong kipia hi. Khris’ singlamteh in, Honpa’ nung a zui khempeuh a cit a siamna ding uh hong sawl hi. Tua lai a hong kilak thu guipi in, pia un, pia un cih ahi hi. Tua pen citna siamna takpi leh a pha bawlna tawh i zat khiat leh Khristian nuntakna i gah taktak suak ding hi. Leitung mite’ thu guipipen ngah ding, ngah ding, cih hi-a, tua tawh amaute in lungnopna zong uh hi; a hi zongin tua banga hong sep khiat tak uh ciangin, lungkhamna leh sihna gah hong gah lel hi.

            Khris’ singlamteh pana a taangkhia gospel khuavak in huaihamna mawh saka, citna leh siamnate hansuah hi. Piakna ding lam bekbek hong kigen ciangin daha thuum zawsop ding hi lo hi. Sep khiatna neucik panin nasepna a lian zaw sungah a lut dinga Pasian in A mite diehsakna tawh hong sapna hi zaw hi. Khuamial gamtat in leitung buppi a tuam laitakin, ciangtan om lo-a hanciamna hong kisam hi. Pasian’ mi tampi takte, leitung’ omzia leh duhhopna thang sungah a awk dingin om uh hi. A neihsa uh tampi a piakhia dinga a ngen pen Pasian’ hehpihna a hih lam amaute in a phawk ding uh kilawm hi. Amaute’ mai ah a niehsa uh a piak khiat loh uh a pahmawhsak nate lah kul hi; tua hi kei leh amaute in Etteh Cingpipa’ zia-le-tong zil zo lo ding uh hi.

            Leitung mun khempeuh ah pai-a mi khempeuh kiang-ah gospel thu a hilh dinga Khris in A nungzuite a sawlna ah, Ama hehpihna a kitheihkhawk sakna ding nasep mite a pia ahi hi. Kim khatte thuhilh dinga a kuan khiat lai takun, leitunga Ama nasepna a kipanpihna ding sumpite Amah in adangte’ tungah ngen hi. I mihingpihte hotkhiatna dinga Ama hong sawlte i sepna ah mihing tungtawna Ama thuphate a luan theina dingin, mihingte’ khut sungah Amah in neih-le-lam pia hi. Tua zong Pasian in mite a pahtawina lampi khat ahi hi. Tua (307) zong mite’ kitangsap nasep khat hi pah hi, bang hang hiam cih leh tua in ama lung sungah khualna khangsak dinga, a lungsim sunga siamna a sang belte zangkhiasak ding hi. 9 T, laimai 254,255.

            Lam maan taka citna leh siamna tawh piakkhiatna in mihing’ lungsim leh gamtat hoihte khangsaka, micimawhte’ tungah thupha a tun sakna uh leh Pasian’ nasepna a mainawt sakna uh ah, sep khiatna a hoih belte neisak hi. 3 T, laimai 401.

            A cimawh mi khat huh theihna, thumaan tangkona ah Pasian’ nasep panpinate in a muanhuai vantung sum kholna ah keppi a koih khol na hi hi. 3 T, laimai 249.

“Deihsakna Tawh Hong Pia Khempeuh”

            Ama nasepna a mainawtna dinga Pasian in a geel lampi khat bek oma, tua in neih-le-lam tawh mite thupha a piakna ahi hi. Nitang leh guahtui pia hi; anteh theipuamte khangsak hi; sum-le-paai zon theihna ding siamna leh cidamna pia hi. Thupha i ngah khempeuh a cingh Ama khut panin hong pai hi. A numei a pasal in kaih leh sumpite … lungdam kohna sumpite, deihsakna sumpite, mawh phelna sumpite… a piak kikna uh tawh lungdamna a koh kik ding uh ahi hi. 5 T, laimai 150.

            Biakbuk lamna ding leh biakinnpi lamna dinga Judah mite’ piak khiatna in citna leh siamna lungsim kilangkhia saka, tua nung siaha Khristiante in tua pen tuk zo ngei lo uh hi. Amaute Egypt gama kum sawt sila kaina pana a suakta tuung uh hi-a, gamlaka a vakthapte ahi hi. “Sumpi hong puakna dingun Israel’ tate’ kiangah gen in, deihsakna takpi tawh hong pia mi khempeuh tung panin Ka sumpi na la ding hi,” (Paikhiatna 25:2) ci-a Moses’ kiangah Topa’ thu a tun lai-in, Egypt galkapte in amaute a nung delhna pana amaute a suakta liailiai uh ahi hi.

            A mite a neihsa uh tawm khat bek hi-a, a khanna ding zong lamet om lo hi; a hi zongin Pasian’ biakbuk lam ding masuan khat nei uh hi. Topa in gen zo-a, (307,308) amaute in a man ding uh ahi hi. Amaute in bangmah haza lo uh hi. Piak nopna takpi tawh pia ciat uh hi; a meet a khang sung pan hi lo hi; a neihsa sung pan mahuh ahi hi. Amaute in lungdamna leh lungsim takpi tawh pia uha, tua banga a piakna un Topa lungdamsak mahmah hi. A vekpi-in Ama a mah hi lo hiam? Amau neihsa khempeuh zong Ama piaksa mah hi lo hiam? Ama’n a nget kik mah leh zong Ama neihsa a kawmsak Pa’ tungah a piak kik ding uh a tavuan mah uh hi lo hiam?

            Hanthot tangtang kul lo hi. Mite in a kisam zah sanga a kaan zawin hong puak uh hi. Zat khop ding zah val khin a hih manin, nolh keei kul ta hi. Khat vei, biakinnpi lam a kisawm tak ciangin zong a kingen huhna pen lungsim takpi tawh pia ciat uh hi. Piak khiat ding lungton peuhmah lo uh hi. Pasian a biakna ding uh inn lam ding pen lawp mahmah uh a hih manin, a kisam zah sanga a tam zaw thamin pia uh hi.

            Hebrai mite sangin khawvak lian zaw a ngaha a kigen Khristiante in amaute sangin tawm pia zaw ding i hiam? Hun bei kuana a nungta Khristiante, Judah mite’ piak zah lang zong a hi zo lo a sumpite uh tawh lungkim ding uh hiam? 4 T, laimai 77-79.

            Vantung silpiakte a ngah mite’ hanciamna leh sumpite tawh Topa in thumaan leh khuavak a kizel dingin na sem hi. Thuhilh sia leh thupha puak sia dingin mi pawl khat a kuan khiat uh bangin mihonpite zong thumaan a kizelhna dingin a neihsa uh tawh a pan ding uh ahi hi.

            Mi khat in, nasepna dingin piak ding bekbek hong kigen hi; piak khiat niloh zong cimta ing, ci hi. Cimtaak takpi mah na hiam? Ke’n hong dong ning: Pasian khut sung pana thupha na saan ding na cimtaak hiam? Amah in nang hong piak nawn loh dong Ama hong nget-te Amah pia lo in om ding na hiam? Midangte’ tungah thupha na piak theina dingin Amah in nang thupha hong pia hi. Ngahna lam na cimtaak tak ciangin, piak khiat ding vive hong kigengen zong cimtaak ta’ng, na ci thei pan ding hi. I ngah zahzah lak panin (308,309) Pasian in Ama a ding seh khat siit hi. Tua teng Amah i piak kik ciangin, a dangteng Ama’n thupha hong piaksak hi; a hi zongin tua pen i piak kei leh a vekpi-in samsiatna ngah hi, a manlang leh a ziakai hi bek hi. Pasian’ hong nget pen hih masa bel dinga, a dang khempeuh nunun ding hi. 5 T, laimai 148, 150.

Kaih Piakna Pasian’ Vaihawm

            Citpiak sumpite leh kaih pen gospel siah ahi hi. Pasian in mihing a piak khempeuh lak panin kaih kici sawm ah khat ngen kik hi. 5 T, laimai 149.

            Pasian in ei’ tunga hong nget-te pen hong kingen dang khempeuh-i bulpi a hih lam mi khempueh in a phawk ding kilawm hi. Pasian in tampi tak hong pia hi. Tuate sung panin sawm-ah-khat Ama tungah piak kik dingin Pasian in mihing tawh thuciamna bawl hi. Topa in Ama neihsa a kemte’ tungah Ama neihsate ap a hih hangin, tua sung pana sawm ah khat tawh kisai-in Amah in, Kei’a hi ci hi. Pasian in Ama neihsa mihing a piaksa seh suahin, mihing in ama ngah khempeuh lak panin thumaan takin Pasian’ tungah kaih a piak kik ding ahi hi. Tua a kician vaihawmna pen Jesu Khris mahmah in a bawl ahi hi. 6 T, laimai 384.

            Leitung khuamialna munte ah tu hun’a ding thumaan a kipuak ding hi-a, tua nasep pen inn sung panin kipan ding hi. Khris’ nungzuite a huaihampi-a a nuntak ding uh hi lo hi; Khris’ Kha tawh kituamin Amah tawh kituak taka na a sep khop ding uh ahi hi. 3 T, laimai 381.

            Jesu in, nasep lianpi a sem dinga hong pai hi’ng ci-a a gen pen a sem dingin leitunga om Ama nungzuite sawl hi. Tua nasep a kisep zawhna ding a kicing sum ngahna ding ngimna khat Amah in a nungzuite pia hi. Pasiah’ geelsa kaih piakna pen baihlam mahmahin zong kikhaikim mahmah hi. Pasian’ hong phuat khiat a hih mah bangin, mi khempeuh in upna leh hanna tawh i zuih ding ahi hi. Baihlamin zong kizang thei mahmah hi, tua ngeina thei-a zat khiatna dingin pilna thukpi a kisam hi lo hi. Hotkhiatna nasep manpha a mainawtna dingin (309) kimapang thei ciat a hih lam mi khempeuhin theih huai hi. Nupi, papi leh khangno khempeuh Pasian’ sum kem suak thei gai hi. A kepsa sumte sung panin a kisam banga a zangkhia thei ding uh zong hi pah hi. Sawltak Paul in, “Pasian in a piakna tawh kizui-in a kuamah peuh in na koih tuam ta uh hen,”ci hi. 1 Korintu 16:2.

            Hi banga piakna tawh nasep lian pipi kizo hi. Mi khempeuh in hih thu sang thei kim hi leh a vekpi-un a navak leh a citak Pasian’ sumkemte hi ding uh hi. Tua hi leh leitung mite hilhna thupuak nunung tangkona a mainawtna dingin sum-le-paai kitasam thei lo ding hi. Mi khempeuhin hih ngeina zui uh hi leh sumkholna ah a dimin om dinga, a pia khiate zong zawngzaw tuan lo ding uh hi. Tua banga amaute a kihelna uh panin tu lai thumaan tangkona ah amaute ki-aihual zawsem ding uh hi. Amaute in tawntung nuntakna a khahsuah lohna dingun, a hong tung lai ding hun’a ding bulpi hoih khat a phut khol uh suak ding hi. (1 Timothy 6:19)

            Hanciam-a maan taka na a semte in, deihsakna tawh amau’ piak khiatnate in Pasian itna leh midangte itna khangsak a hihna leh, tua a hanciamna un amaute’ kiman theihna zong khangsak a hihna a muh uh ciangin, Khris tawh nasem-khawmte hihna in thupha lianpi khuamial gamtatna galdona panpihna dinga Pasian in amaute’ neihsa sung pana a nget pen Khristian pawlpi ciam nasemte a suah mateng uh Pasian’ nasepna a mainawt ding zahin mainawt thei ngei lo ding hi. 3 T, laimai 388,389.

Pasian Tawh Nasep Khop A Manphatna

            Pasian in Ama nasep a panpih dingin mihing a muang hi lo hi. Mihing’a dingin hoih bel a sak a hih nak leh Ama sumkholna ah van panin Pasian in thupha hong buak suk thei hi. Leitung ah thumaan a tangko dingin Pasian in leitung mite zang lo in vantungmite zang nuam leh zang thei hi. Amah in van kimlai ah thumaan gelhin laimal tawh Ama deihnate leitung ah (309,310) thangsak thei hi. Kuama ngun-le-kham tawh Pasian a khuasa hi lo hi. “Gamlaka om ganhing khempeuh zong kei’a ahi hi.” “Ka gilkial mah leh zong nang kong ko kei ding hi, bang hang hiam cih leh leitung in Kei’a hi-a, a sunga om khempeuh zong Kei’a ahi hi,” ci hi. Psalm 50:10,12. Pasian’ nasep a mainawtna dinga a kisapna mun tengah eite hong kizatna pen Amah in eite’ phattuamna dinga a geel ahi hi. Amah tawh nasemkhawm hong suah sakna tawh Amah in eite hong pahtawi hi. Mihingte in piak-khiatna a neih den theih na dingin, mihingte’ seppih ding a phamawh nasep Amah in a omsak mah ahi hi.

            Pasian’ thukham in Sabbath tan ding hong sawl hi. Kipalsat kei peuh leh tua thukham in vangik hi lo hi. Kipalsat leh lah gawtna in amaute khih pah hi. Kaih piakna zong maana a pia nuamte’a dingin vangik hi lo hi. Hebrai mite’ tunga kipia tua ngeina pen a phuangkhia Pa in khel ngei lo hi. Tua ngeina pen tu-in dausak ding cih thadah, zuih zawkkan ding, piak zawkkan ding ahi hi. Tua mah bangin tu Khristian khang hunin Khris bek hanga hotkhiatna kingah a hihna a thu kicing taka i gen zawkkan ding ahi hi.

            Gospel tangkona zai semsema, Khris a sih khit nungsang galdona panpihna ding a tam zaw kisam a hih manin, sumpi piakna thu in Hebrai kumpite’ hun lai sangin, nakpi-in hong kisam zaw hi. Leitung khanghun dang khat peuh sangin tu-in Pasian in piakkhiatna a tawm zaw lo, a tam zaw tham hong ngen hi. Khuavak leh thupha a kingah zah tawh kizui-a sumpi leh silpiakte i piak ding Khris in thu a na khunsa ahi hi. “Tam a kipiate’ tung panin tam mah kingen kik ding,” ci hi. Luka 12:48. 3 T, laimai 390-392.

            Pasian’ Thu panin khuavak nakpi-in hong taang a hih manin, i hih lohte a hih dinga khanlawh ding hi ta hi. Mi khempeuh in Pasian’ neihsa kaihte leh sumpite thumaan taka Amah i piak kik ciangin, leitung mite in tu hun’a ding thupuak a zak theihna ding uh lampi hong kihong ding hi. Pasian’ mipawlte a lungtang uh Khris itna tawh a kidima, pawlpi mi khempeuh (310,311) angsung nialna lungsim in a tuama, mi khempeuh in deihsakna takpi a neih uh leh, khual leh tual ah nasepna ding sum kitasam cih om thei lo ding hi. I neihsate hong pung ding hi; kongkhakte a tultulin hong kihong dinga, a lut dingin eite hong kisam ding hi. Pasian’ mipawlte in Ama ngimna semkhia-in, hehpihna thupuak leitung ah tangko uh hi leh, leitung ah Khris hong pai khin ta dinga, misiangthote Pasian’ khuapi sungah kidawn khin ta ding hi. 6 T, laimai 449, 450.

Seh Sawm Suah Seh Khat Pasian In Hong Ngen

            Moses’ hun ma pekin kaih piakna ngeina om khin hi. Moses’ tunga ngeina kician a kipiak ma, Adam’ hun lai pek mahin, biakna nasepna dingin mite in Pasian’ tungah silpiakte a piak ding uh kingen hi. Amaute in Pasian’ ngetna bang zui-in, Ama hehpihna leh thuphate a pahtakna uh sumpi piakna tawh na lak uh hi. A khang a khangin hong kizom to hi. Abraham in zong na zanga, Sang Bel Pasian’ Siampi a hi Melkhizedek tungah kaih na pia hi. Job hun lai-in zong tua bang thu mah na om hi. Jakob zong sum-le-paai nei lo, vaak thapa Bethel a tun ciangin, gam simtham ah amah guak, zan ciangin suang khat lukhama a lupna mun ah, Topa kamciam na pia-a, “Nong piak ding khempeuh sung panin, a seh sawmna nang kong pia takpi ding hi,” ci hi. Piancilna 28:22. A piakhia dingin Pasian in mite hamtang sawl lo hi. A piak khempeuh uh piak nopna tawh hi ding hi. Piak nop loh pi-a kipia sumpite tawh A sumkholna dim sak nuam tuan lo hi.

            Ama hong nget zah pen a pung khang lak pana seh sawm suah seh khat ahi hi. Hi pen mihing’ ngaihsut theihna leh piak nopna tawh kisai hi. Kaih piakna ah mihing in ama khensatna bangbang hi ding hi. Mihing’ ngaihsut siamna bangbang a hitei ta zongin, mi khempeuh’a dingin vaihawmna kician khat om khin zo hi. Hamtangpi-a kingen bel hi lo hi.

            Moses’ hun lai-in amau’ neihsa a pung a khang lak panin mite in a seh sawmna a piak ding uh Pasian in na sawl hi. Leitung nuntak neih-le-lamte amaute na (311) pia-a, tuate khangsaka Ama tungah a piak kik ding uh ahi hi. Amah in sawm ah khat na ngen hi. Mihing in Ama tungah a piak kik ding a tawmkhia pen Pasian in na ngen hi. Seh sawm suah seh kua note kong pia-a, sawm ah khat bek kong ngen hi; tua in Kei’a ahi hi, ci hi. Mihing in seh sawm suah seh khat a piak loh ciangin Pasian a buluh ahi hi. Sawm ah khat banah mawh phelna sumpi, kilemna sumpi leh lungdam-kohna sumpite zong hong kinget beh lai hi.

            Pasian’ hong nget sawm ah khat a kipia lo zahzah pen, a pia lote guta buluh ci-in vantung laibu sungah kiciamteh hi. Tua bang mite in amaute a Piangsakpa a khem uh ahi hi. Amaute in tua a mawhna uh a muh ciangin, kikhela tua huna kipan a maana a gamtatna bek uh tawh a kicing hi nai lo hi. Makaipa’ tungah piak kik dinga amaute’ tunga kipia nate a zat khialhna uh vantunga ciaptehna pen tua bang ziau-in bawl pha thei lo ding uh hi. Pasian’ tunga a cihtak lohna uh leh, lungdamna mel a neih lohna uh a kisik ding uh kisam hi.

            Bang hun bang hun hi ta leh Pasian’ mite in lungdam tak leh lawp takin Ama ngimna semkhia-in, Ama sawlnate sema, a neihsa uh tawh Amah a pahtawi uh ciangin a saal uh dim tawntung hi. A hi zongin amaute in kaih leh sumpi ah Pasian a buluh uh ciangin, Pasian bek a buluh uh hi lo in amau leh amau a kibuluh uh a hih lam kiphawk uh hi, bang hang hiam cih leh Ama tunga a piak uh sumpite amaute in a khiap zah mahun, Ama’n zong amaute’ tunga a piak thuphate khiam pah hi. 3 T, laimai 393-395.

            Kamsia-a leiba a nei mi in, a lawmte’ tunga a leibat a lohna dingin Topa’ tan pen a lak ding hi lo hi. Tua san takah amah a kizia-et hi-a, ama deih bang Topa’ tan a zat sakna tawh a Piapa a buluh a hih lam a ngaihsut theih ding kisam hi. Ama neihsa khempeuh ah Pasian’ tungah leiba hi khina, Topa’ sehtan zanga mihing’ tunga leiba a lohna tawh amah a zahnihin leiba suak to lai hi. Vantung laibu sunga ama min mai ah, “Pasian’ tungah a cihtak lohna,” ci-in kiciamteh hi. (311,312) Ama hoih sak bang Topa’ neihsa a zeekna hangin Pasian tawh sian sak ding thu khat ama’n nei hi. Pasian’ neihsa a hi lopi-a a zatna pana hong kilangkhia ama ginat lohna pen, thudangte ah zong hong kilang ding hi. Ama nasepna tawh kisai mun khempeuh ah zong tua bang mahin kimu ding hi. Pasian a buluh mi in tunglama Pasian’ innkuan sungah a lut theihna ding a khak tan ding zia-le-tong a tawm ahi hi. 6 T, laimai 391.

Piakkhiatnate Pasian In A Sehdan

            Biakbuk tawikhaina ah, mizawngte in Khris a itna uh tawh a piak silpiakte pen, a piak zah uh tawh kituat lo zawin, piak khiat nopna a guan ki-itna tawh kituat zaw hi. Tawm cik bek nei napi, tua tawm cik bek mah deihsak taka a pia mizawngpa in, ama neihsa tampi sung pana a pia mihaupa mah bangin, Jesu’ kamciamte ngah veve ding hi. Mizawngpa in a neih sunsun tawmcik mah lungsim takpi tawh piakhia hi. Ama noptuamna dinga a kisam na kimkhat don lo in ama deihna nial hi. Mihaupa in a neihsa tampi sung panin a pia hi-a, kisapna nei lo a hih manin, ama kisapna don lo lianga ama deihna a nial ding zong om lo pah hi. Tua a hih manin mizawngpa’ sumpi sungah sianthona oma, mihaupa’ sumpi sungah om lo hi, bang hang hiam cih leh ama neihsa a tampi sung pana a piak hi lel hi. Mihing’ phattuamna ding mahin, maanmaana piakkhiatna ngeina pen Pasian in a hong geel sak ahi hi. Pasian’ geelna kitatsat ngei lo hi. Pasian’ nasemte in Pasian geelna bangin zui hi le-uh, a vekpi-un a tangzang nasemte hi ding uh hi. 3 T, laimai 398, 399.

            Naupangnote’ sumpi piak pahtak-huai-in Pasian lungdamsak hi. Piaknopna lungsim tawh kizui-in sumpi a manphatna om hi. Mizawngte in sawltakte’ ngeina zui-a, nipi kaal sima a neih sunsun uh a piakna uh tawh sumpi khangsaka, Pasian in zong amaute’ piakna lungkim takin sang hi; bang hang hiam cih leh amaute in mihaute sangin kipiakna a nasia zaw tham nei uh hi. Maanmaana piakkhiatna ngeina in, a kisam lopi-a a neihsa uh a mawk zat dinga zolna panin innkuan khempeuh (312,313) kem dinga, mihaute in zong noptatna-a a mawk zat lohna ding uh amaute a kem thupha khat suak ding hi. 3 T, laimai 412.

            Lungsim buppi tawh citna leh siamna thaman in, Khatawh a kinai zaw sem ding lungsim leh lungtang a tunna ahi hi. 6 T, laimai 390.

            Pasian’ nasepna ding piak khiatna tawh kisai ngeina khat Paul in na zang hi. Ei mahmah leh Pasian’a dingin bang phattuamna piang ding cih zong hong gen hi. “Mikim in amau’ lungsim sunga om bangbangin pia uh hen. Hazatna tawh pia lo dinga, lungtonpi-a zong pia lo ding hi. Lungdam taka a pia mi Pasian in pakta hi.” “Khaici tawm bek a vawhte in an tawm bek mah la ding uh hi.” “Na khempeuh kicinga na neih uh mah bangin, gamtat hoih khempeuh zong na neih theihna dingun, Pasian in hehpihna tampi tak note hong pia hi. (….Khaici a vawhte tungah khaici a pia pa in, nek dingin an zong pia-a, a khaici vawh uh zong pung sakin, na diktatna gah uh zong hong khangsak ding hi;) hauh theihna khempeuh uh note hong hau saka, tua in Pasian’ tungah lungdamna kote hong ko sak hi.” 2 Korintu 9:6-11. 5 T, laimai 735.

Neihsa Zeekdan

            Lungsim hoih leh ngaihsutna maan nei-in nute pate in, thungetna tawh lim taka ngaihsutna leh, thumaan leh Pasian’ deihna theihtheihna a nei khinsate’ vaihawm pihna tawh a neihsate uh a zeek ding uh ahi hi.

            Amaute in a cimawh a genthei tate a neih uha, tuate in hoih taka zang ding uh a hih nak leh amau’a ding ngaihsut sak ding kisam hi. Amaute in thu-um lo tate nei-a, amaute cithei-in, leitung’a ding beka na a sep uh leh, a tate uh a hih manin a neihsa uh amau’ khut sungah a piak uh leh, amaute Ama neihsa-kem a suaksak Topa’ tungah mawhna a bawl uh ahi hi. Pasian’ hong ngetnate zangkhai ngaihsut ding hi lo hi.

            A neihsa khempeuh uh a sih khit ciang uha khat’ tan dingin lai bawl khin uh a hih manin, a nuntak lai (313,314) uh hangin Pasian’ nasepna dingin huhna piak kul nawn kei, ci-a nute pate in a ngaihsut ding uh a hih loh lam a theih ding uh kisam hi. A piak ding mah uh ahi hi. A nuntak lai uha a neihsate uh a zeekna uh tawh kisai-in tu-in zong lungkimna ngaha, a nung ciangin zong thaman a ngah ding uh kisam hi. Pasian’ nasepna a mainawtna dingin amau’ tavuan a sep ding uh ahi hi. Ama lo sunga sep ding a kisam nate a kisepna dinga Topa in amaute a piak a neihsate uh amaute in a zat ding uh ahi hi. 3 T, laimai 121.

            A neihsa uh Pasian’ sumkholna ah puak lo-a a tate uh’a dinga a kholte in, a tate uh’ khalam nuntakna a lauhuai sak suak hi. Amau mahmah in a suih khak thei ding uh suang a hi a neihsa uh, amaute in a tate uh’ lampi ah koih uha, tua pen a tate un sui kha leh siat lawh ding uh hi. Mi tampi in a neihsa uh tawh kisai-in khialhna lian pipi bawl uh hi. Pasian in amaute a piak nate a maana a zatna pan uha a ngah uh neih-le-lamte, amaute in amau mahmah leh midangte’a dingin zang lo in ciil lua uh a hih manin, amaute a duhhop a huaiham suak uh hi. Khalam thute don nawn lo uh a hih manin biakna lamah thakiam uh hi. Tuate khempeuh in a neihsa uh a zeek siam lohna hang uh ahi hi. Amaute in a neihsa uh a tate uh’a dingin seh sawm suah seh kua in samsiatna suaksak hi. Nute pate’ lamsa tawh a ngaihmuang tate in amau’ masuan ding khuat zo nawn lo uha, hong tung lai ding nuntakna zong a ngah ding uh lamet-huai lo mi tampi om uh hi.

            Nute pate in a tate uh luah dinga a nusiat ding uh go hoih pen in, kimanna a nei nasep sep theihna leh, angsung khual lo-a citna leh siamna a nei thei zia-le-tong ahi hi. Tua bang nuntakna tawh amaute in sum-i manphatna lakkhia uh hi. Tua in amaute’ kitangsapnate leh midangte’ cihmawhnate a huutna uah a hi zongin, Pasian’ nasepna a mainawtna ding a hi zongin phattuamna piangsak a hih manin a pahtak-huai mahmah khat ahi hi. 3 T, laimai 399. (314).

Hauhna Ngaihsun Ke’n

            Kaih piakna ngeina pen Pasian’ thukham tawh a kipna a kibang thuguipi tungah kinga hi. Kaih piakna ngeina in Judah mite’a dingin thupha khat ahi hi. Hi lo hi leh Pasian in amaute sawl lo ding hi. Hi thu a zui mite’a dingin hun bei dong mah thupha khat hi lai ding hi.

            Pasian’ nasepna dinga maanmaan leh cingh taka a pia pawlpite in khalama a khangtote ahi hi. Citna siamna taktak a nei Khris’ thuzuite in a Topa uh’ kin pen mah kin pah uh hi. Sum haute in a sum zatna khempeuh uh Pasian in sittel ding a hih lam phawk thei le-uh, amaute in kitangsapna-a a ngaihsut-te uh hong tawm tuam mahmah ding hi. Phawk theihna khanglo hen la hi leh, tua phawk theihna in gongthak thoihna khawng, kiphat-satna khawng, kisaktheina khawng leh noptatna khawnga a kisam lopi-a kizangte hong genkhia dinga, Topa’ nasepna-a a kizang ding Ama sumte a mawkna-a a kizat mangna thu khawng hong pulaak ding hi. A Topa uh’ neihsa a thang zat-te in a sawt lo in a gamtatna uah Topa’ thusitna thuak ding uh hi.

            Khristian hi’ng a kicite in a pumpi tung uh zepna-in, a inn uh zepna-in a hauhna uh tawm zat zaw uh hen la, a ankuang uah cidamna a susia ding zahin a uang lua-in a duhduh uh lui kei zaw deuh le-uh, amaute in Pasian’ sumkholna ah tam khol zo zaw ding uh hi. Ama teenna vantung, Ama hauhna, Ama thupinate nusia-a, eite in tawntung hauhna i neih theihna dinga, eite’ hanga mizawng a hong suak a Tanpa uh, amaute in tua bangin zil nuam ding uh hi.

            A hi zongin mi tampi in leitung hauhna a zon tak uh ciangin, a deihzah uh a ngahna dingin bang tan vei khol ding cih ngaihsun masa pah phot uh hi. Amaute in amau’a ding khol eu-au nuam uh a hih manin, Pasian’ lamah a hau suak zo lo hi. A muhna zah uh leh a piakna zah uh kituak zo nawn lo hi. A hauh nopna uh hong khan semsem mah bangin a lungsim uh zong a neihsa tung bek mah uah hong om pah hi. A neihsa uh (314,315) a tam semsemna in a tam zawsem a lunggulhna uh khangsak a hih manin, Topa’ tunga sawm ah khat a piak ding uh zong nasia lua-in tam lua hi, hong ci ta uh hi.

            Lai Siangtho in, “Na hauhna a hong khan leh tuate bek ngaihsutin nei kei in,” ci hi. Psalm 62:10. Mi tampi in, “Mite bangin hau hi leng, Pasian’ sumkholna ah tampi ka pia ding hi. Pasian’ nasepna a mainawtna ding lo ngal bangmah dangah ka neihsa ka zang kei ding hi,” ci uh hi. Tua mite kim khat Pasian in hauhna tawh zia-et hi; hong hauh semsem uh ciangin zia-etna zong nasia semsema, a piak khiatna uh pen a zawn lai uh sangin hong tawm zaw ta hi. Hauh semsem nopna in lungsim uh leh a lungtang uh huup a hih manin, amaute milim bia hong hi ta uh hi. 3 T, laimai 401-405.

           

Pasian’ Tunga Kamciam

            Mi khempeuh in eima’a ciat i seh ding hi-a i lungsima i sehna bang i piak ciat ding ahi hi. A hi zongin mi kimkhat in kaih piakna ah Pasian’ hong nget zah a kimin pia ta kei lehang kuama’n hong thei kei na’n teh ci-in, Anania leh Sapphire-te’ mawhna namte mah bawl uh hi. Tua a khial nupate’ thu eite hong kihilhna a hih lam ngaihsun in. Pasian in lungsim sung kankhia a hih lam hih thu ah hong kilang hi. Mihing’ lungsim leh ngimnate Ama theih loh dingin kiseel thei lo hi. Mihing’ lungsim a zol ngitnget tua mawhna i hih khak lohna dingin Pasian in tua thuhilhna a khang a khanga Khristiante’a dingin hong koih sak hi.

            I sanggamte’ mai ah i piak ding zah kam tawh a hi-a lai tawh a hi zongin kamciam i bawl leh, amaute in Pasian leh ei’ kikala i bawl kamciam a hong theih-pihte suak uh hi. Mi dang khat tawh lai i bawl bang mahin tua kiciamna pen mihing’ tung hi lo in Pasian’ tunga a bawl i hi hi. Pasian’ tungah piak dinga i ciam zah sanga a thupi zaw kiciamna Khristiante’a dingin om lo hi.

            Tua bangin mihingte’ tungah kamciam a neite in, tua kamciam pana a pen ding uh nget ding a ngaihsun om khol lo hi. Thupha khempeuh a hong pia pa Pasian’ (315,316) tunga kiciamna pen thupi zawkan lai hi. Tua a hih ciangin Pasian’ tunga i kamciamte pana i suahtak ding bang hangin hanciam ding i hiam? Mihing in Pasian’ tunga a kamciam a thupi lo zawin ngaihsun ding a hiam? Tua kamciam tawh kisai-in thukhen zum kitun lo ding a hih manin a thuneu zaw hi ding hiam? Jesu Khris’ kipumpiakna sisan tawh hotkhiatna a ngah hi’ng a cite in “Pasian buluh” ding hiam? Ama kamciamte leh ama gamtatnate vantung zumpi ah tawikhai a maan tawh kikhai hi lo a hiam?

            Pawlpi mite’ kamciamte tawh kisai-in pawlpi in tavuan nei hi. A kamciam a tawntun lo sanggam khat peuh a om lam amaute in a theih uh leh thudam tak leh kician takin amah genpih ding hi. Ama kamciam a piak theina dingin a pian zawh lohna thu a oma, amah pawlpi mi kician khat leh a pia nuam takpi a hih leh pawlpi in amah hehpihin huh ta hen. Tua bangin amaute in haksatna nawk zo ding uha, thupha zong amaute in sang ding uh hi. 4 T, laimai 469-476.

           

Lungdam Kohna Sumpite Mizawngte’a Ding

            Pawlpi khempeuh ah mizawngte’a ding sumkholna khat koih ding hi. Pawlpi mikim in nipi kaal khatsim a hih kei leh khasimin lungdam kohna sumpi pia ta uh hen. Tua in cidamna khawng, annek ding khawng leh puansilh ding khawnga i ngah thuphate hanga i lungdamna i lah khiatna hi ding hi. Pasian in tua thuphate hong piakna tawh kizui-in eite in mizawngte, mi cimawhte i pia ding hi. I sanggamte in hih thu lim taka a ngaihsut ding uh ka deih hi. Mizawngte phawk un. Na noptatnate tham lo na zat khop ciangte nangawn eu in la annek tuidawn leh puansilh nikten a zong tawmte pia in. Amau’ tunga na bawl bangbang Jesu’ tungah a bawl na hi hi. Genthei tuak mihingte tawh a kibangin Amah hong kiseh hi. Nang’a ding kisam dinga na upmawhte na ngah khit dong ngak kei in. Na utna suang kei in. Na ut hun khat ciangin pia-a, na ut loh hun khat ciangin pia lo cih bang hi kei in. Maanmaan in pia in,….. Pasian’ ni lian ni cianga vantung ciaptehna sung-ah (316) na muh dinga na deihbang lianlian pia in. 5 T, laimai 150,151.

           

I Neihsa Tawh Pasian’ Nasep Panpihna

            Pasian lah it takpi-a, zong a cithei zekte kong ci nuam hi. Topa’ nasepna panpihna dingin na neihsate na piak ding a hun hi ta hi. A kisia ding khate hotkhiatna ah kipia-a a hanciam nasemte’ khut dom toh sak ding a hun hi ta hi. Vantung zumpi ah nangma huhna hang tawh hotkhiatna a ngah mite na muh ciangin, thaman lianpi a ngah ding hi lo na hiam?

            Kuamah in a sum uh haza kei hen. A kisia thei lo ding sum vantung ah a khol thei ding uh a hih manin, a haute lungdam uh hen. Topa’ nasepna dinga i piak loh sumte kisia ding hi. Vantung sumkholna ah tua tung panin a khang kingah lo ding hi.

            Mun khempeuha om Seventh-day Adventist-te, Ama tunga kipia-a, a hih theih tawpun, amau’ neihna zah ciat uh tawh kizui-in Ama nasepna a panpih ding uh tu-in Topa in cial hi. Cingh taka huhna leh sumpite a piakna uh tawh Ama thuphate ah nuamsa-a, Ama hehpihna lungdam uh a hih lam amaute in a lah khiat ding uh Ama’n deih hi. 9 T, laimai 131,132.

            Gimna hong tun cianga ding ci-a leitung tawh kipawl kikhual kholhnate, Lai Siangtho tawh kilehbulh hi ci-in Topa in kei hong lak zelzel hi. Misiangthote in gimna hun cianga dingin inn khawng leh lo khawng ah an a khol uh leh, gam sungah namsau, kialpi leh pulnatna hong tun ciangin, migilote in amaute’ khut sung panin sut ding uha, melmakte in lo panin puakhia ding uh a hihna ka mu hi. Pasian bek mah i muan ding hun hong tung ding hi. Amah in eite hong vak ding hi. Tua hun ciangin i an ding leh i tui ding hong om ding a hih lam ka mu hi. Gilkial dang takin eite i om kei ding hi. Pasian in gamlak ah ei’a dingin ankuang hong hi ding hi. A kisap leh zong Elijah a vaak mah bangin ei hong vaak dingin va-akte hong sawl ding hi. Israelte a vaak mah bangin van panin manna zong hong khiat thei ding hi. (316,317)       

            Gimna hong tun ciangin misiangthote’a dingin inn leh lote bang mahin kimang lo ding hi. Bang hang hiam cih mihon ngoltolte’ mai ah amaute taai ding uh hi. Tua hun ciangin tulai thumaan tangkona dingin a neih a lamte uh kizuakkhia thei nawn lo ding hi. Misiangthote in gimna hun hong tun ma-in vangik khempeuh suahkhia-a, kipumpiakin Pasian tawh kiciamna a bawl ding uh Pasian’ deihna a hih lam kei hong kilak hi. Amaute in a neihsa uh biakna tau ah ap-a, a sep ding uh lungsim tak tawh Pasian a dot uh leh, tua nate a zuak khiat ding hun uh Ama’n hilh ding hi. Tua hi leh gimna hong tun ciangin amaute van zang ding uha, a gik a luai bangmah om nawn lo ding hi. EW, laimai 56,57.

Angsung Nialna Leh Kipumpiakna

            Pasian’ Tapa hong kipumpiakna tawh hotkhiatna ding vai hong kihawm hi. Khris’ singlamteh pana hong taang khia gospel khuavak in huaihamna mawh saka, citna leh siamnate hansuah hi. Piakna ding lam bekbek hong kigen ciangin daha thuum zawsop ding hi lo hi. Sep khiatna neucik panin nasepna a lian zaw sungah a lut dinga Pasian in A mite deihsakna tawh hong sapna hi zaw hi. Khuamial gamtat in leitung buppi a tuam laitakin, ciangtan om lo-a hanciamna hong kisam hi. Leitung lungsim leh deihgawhna lungsim in Pasian’ mite’ nuntakna thate ne tum khin hi. A neihsa uh tampi piakhia dinga a ngen pen Pasian’ hehpihna a hih lam amaute in a phawk ding uh kilawm hi. Ngetna leh piakna pen Pasian’  vantungmi in kinai takin koih khawm hi. Amah in Korneli tungah, “Na thungetna leh na piak-khiatnate Pasian’ mai ah phawk den dingin kah to khin hi,” ci hi. Sawltak 10:4. 3 T, laimai 405.

            Na inn uah ciil ding kisin un. Mi tampi in milimte pakta-in bia uh hi. Na milimte uh paaikhia un. Na huaihamna lungsimte uh nusia un. Na innte uh na zepna un na neihsa uh tam zat kei un, ci-in kong thuum hi, bang hang hiam cih leh tuate Pasian’ sum hi-a, note’ tung panin hong kingen kik ding hi. Nute pate aw, na tate uh’ deihpeuh na lei sakna dingun Topa’ sumte (317,318) zang kei un, ci-in Khris’ min tawh kong thuum hi. Leitung ah a minthanna dingun khang thakdan leh kisialhnate a zuih ding uh hilh kei un. Khris in a sih lawh mite gupkhiat nopna lungsim tuate in amaute nei sak ding hiam? Nei sak lo ding hi. Hazatna, enna leh elna piangsak zaw ding hi. Na tate un leitung kisialh nopna leh kidem nopna hong nei ding uha, cidamna leh nopsakna ding a hi lopipi ah Topa’ sum hong mawk zat ding uh hi.

            Amaute kiphatsakna, kisialhna leh lahkhiatna a neih theihna dingte uh na piakna uh tawh na itna uh amaute a lak dinga hong ngaihsun dingin na tate uh pantah kha kei un. Sumte zatmangna ding lampi geelgeel nading hun tu-in om lo hi. Ciil tat ding kisinna-in na siamnate uh zang un. Ngaihsut siamnate a susia thei nate lei-na-in na sumte uh zanga, huaihamna lungsim na thoih uh sangin, gam thak ah thumaan dial a kikhai zawhna ding na piak khiat zawhna dingun, nomau’ angsung bangci nial ding cih kisin zaw un. Ngaihsut siamna in talent khat hi-a, kha mangthangte hotkhiatna dingin na sumte uh a hoih bela na zat theihna ding uh ngaihsutna-in tua na siamna uh zang zaw un. 6 T, laimai 450,451.

            Midangte’ noptuamna dinga amau’angsung a nialte, amau mahmah leh a neihsa uh Khris’ na sepna dinga a zangte in, a huaihamte in zonga a muh zawh loh uh nopsakna mu ding uh hi. Hong Honpa in, “Note’ lakah a neihsa khempeuh a nusia lo peuhmah in Ka nungzui hi thei lo ding hi,” ci hi. Luka 14:33. Ki-itna in “ama aituam ding zong lo hi.” Hih in Khris’ nuntakna sunga hong kilangkhia ki-itna leh citna-i gah ahi hi. I lung sunga om Pasian’ thukham in eima lawpnate a sang leh a tawntung ngaihsutna lamah hong hei sak ding hi. (318)

KHAWKPI 49

CIMAWH GENTHEITE KHUALNA

            Mite in a vengte uh a it uh leh a it loh uh a lahna ding hun pha tu ni-in Pasian in mite pia hi. Pasian leh a mihing pihte a it taktak mi in, a cimawh, a genthei, a liam, a si dekdekte’ tungah hehpihna a lak mi ahi hi. Sep loha om nasep a sem ding, mihing’ sungah Piangsakpa’ lim-le-lai a guan dinga a hanciam dingin Pasian in mi khempeuh sawl hi. WM. Laimai 49.

            Midangte’a ding na sepna ah hanciamna, angsung nialna, kipumpiakna, kisam hi. Pasian in A Tapa khat neihsun a hong piakna tawh saikak lehang ei’ kipiakna pen bang zahta-in neu hiam? 6 T, laimai 283.

            Tawntung nuntakna i luah theihna ding thu pen Honpa in siangtak teltakin hong gen zo hi. Kisuama a liam mi-pa in (Luka 10:30-37), eite in i kin, i khual, i it ding mi kua hiam cih hong lak hi. Kuakua a hi uh zongin ei’ theihkhaka a om a cimawh a kamsiate i don kei leh, ei’a dingin tawntung nuntakna lungmuan om lo hi; bang hang hiam cih leh Pasian in eite a hong sawl a sem lo i hi hi. I hiang, i meltheih khat hi lo a hih manin mite i khual i hehpih kei kha thei hi. Thupiak lian nihna a hi thupiak nunung gukte a palsat na hi ta hi. Khat ah a khial peuhmah a vekpi mah a khial hi pah lel hi. Mite’ cihmawhna leh gentheina a don lo mite in Thupiak Sawm sunga a masa li teng zong don lo pah ding hi. Milimte mah kin leh pahtakin nei-in, Pasian a thupi belin pahtawi nawn lo hi. 3 T, laimai 524.

            Hehpihna, khualna leh diktatna a thusim lote, mizawngte a don lote, cimawh gentheite a awlmawh lote leh a migi lo, a thusiam lote in zia-le-tong puah toh-na ah amah tawh Pasian in a sep khop theih lohna ding mun ah amah leh amah a kikoih a hih lam a theina dingin a lung sungah suang tunga sik zum tawh kuih bangin a kigelh ding kisam hi. Amaute’ noptuamna dinga i huh theih bangbang tawh huha midangte i khual ciangin i lungsim leh i lungtang puahna ding baih tuam mahmah hi. Ei’a ding beka ngahna leh kholna (319) in khalam zawnna piangsak hi. Pasian in amaute a sawl nasep pen mah sem nuama, Khris tawh a mapang khawm nuamte in a saan theih dingin Khris’ lungsim puakzia a baihsa-in om hi. 6 T, laimai 262.

            Honpa in min-le-za, phung-le-nam, hauh-le-phat-te thu-in sim lo hi. Ama’n manpha a sak pen zia-le-tong leh tupna kician ahi hi. Leitunga a thahat leh a kipaktate’ lamah Amah pang lo hi. A puuksa mite a dom to dingin a nungta Pasian’ Tapa hong kuun suk hi. Kamciamte leh khapnate tawh, a mangthang, a kisia ding khate Ama lamah a ngahna dingin hanciam hi. Ama nungzuite kua in hehpihna leh khualna zangkhia ding hiam cih Pasian’ vantungmite in en uh hi. Pasian’ mite lak pan kua in Jesu’ itna lakkhia ding hiam cih amaute in en uh hi.   6 T, laimai 268.

            Pasian in piak khiatna bek hong sawl lo hi; maitaina, lamet-huai kampauna leh lungsim tak tawh khut letnate zong hong sawl hi. Mi-gentheite kiangah na pai ciangin, lamet bei-a omte zong na mu ding hi; amaute’ kiang ah nitang puak in. Nuntakna an a kiphamawh zong om ding hi; Pasian’ Thu amaute simpih in. Leitung zatuite in a zawh loh, zato mangte in zong a dam sak zawh loh kha cinate zong na tuak ding hi; amaute thungetsak in la, Jesu kiang puak in. 6 T, laimai 277.

Pawlpi Sunga Mizawngte

            I pawlpi sungah mizawng nam nih om den hi. Amau’ thuthu-a a gamtatna uh tawh a sia suaka, a thu palna sung mah uah a om suakte leh, thumaan a zuihna uh hanga haksatna a thuakte ahi hi. Ei leh ei i ki-it mah bangin i vengte zong i it ding ahi hi. Tua a hih mah bangin hi mi nam nihte’ tungah, Pasian’ hong makaihna leh hong hilhna bangin a maanin na i sem ding hi.

            Topa’ mizawngte tawh kisai-in kam tamna ding om lo hi. Amaute’ phattuamna ding a hih nak leh na khempeuh ah i huh ding ahi hi.

            Amaute a kisia mang dingin Pasian in nusia lo a hihna mawhna tawh a kidim leitung mite’ kiangah a (320) mite in a gen ding Pasian in deih hi. Thumaan thutak hanga inn pana kinotkhia-a gentheina a thuakte a huh dingin i hanciam phat diak ding ahi hi. A cingh, a siam a thukhual lungtangte, angsung niala Topa in zong a it tua mi-gentheite a don ding mite a tam zawsem hong kisam ding hi. Pasian’ mite’ laka a zawngte amau’ kitangsapna huh lo in mawk koih lo ding hi. Nuntak kivaakna a ngah theihna ding uh lampi zong zon sak hamtang ding hi. Nasepdan hilh a kul zong hong om ding hi. Nakpi-in na sema innkuan kivaakna ding a hih thei zah mah uha a hanciamte zong a tuama huhna kisam ding hi. Amaute lung himawh pihin nasep hoih a ngahna dingun zong huh ding hi. Pasian ita Ama thupiakte a zui a cimawh innkuante huhna ding taangsum zong neih kul hi.

            Pasian ita a thumang kimkhatte thu tuamtuam tawh a cimawh zong om hi. Kimkhatte kidawm lo uha, sum zeek siam lo uh hi. Dammawhna leh kamsiatna tawh a cimawh zong om hi. Bangbang hi ta leh amaute a cimawh hi khina, amaute i huh ding pen Pasian’ nasepna ah a thupi khat hi veve hi.

            Pawlpi a kiphuhna munmun ah thu-um a cimawhte’a dingin pawlpi mite in hoih taka na a sep ding uh ahi hi. Thu-umte bek huh ding hi lo hi. A upna uh bangbang hi ta leh midangte zong a huh ding uh hi lai hi. Tua banga a hanciamna uh tawh kimkhatte in tulai thumaan hong sang thei ding uh hi. 6 T, laimai 269-271.

Cimawhte Bangci Huh Ding

            A cimawhte huhna piakdante lim takin thungetna tawh ngaihsut ding ahi hi. Ama bawlsa mite bangci don ding cih muhna a toi a si thei mihingte sangin Amah in thei zaw a hih manin Pasian’ kiangah ciimna i nget ding ahi hi. Kimkhatte in khen tel lopi-in a ngen khempeuh huhna pia uh hi. Tua mun ah khial uh hi. A cimawhte i huhna ah huhna a kituak ding i piak theina dingin i kidop ding kisam hi. Huhna a ngah uh ciang-in amau leh amau tangsapna a nei ngitnget a hi dinga kibawl mi pawl khat om hi. Belhna ding a om laiteng amaute in belhbawl den ding uh hi. A hun lopi-in amaute (320,321) i piak i don khak leh, thadahna, cimawhna, noptatna leh kidek kidam lohna tha a pia i suak ding hi.

            Mizawngte i huh ciangin, “Noptatna tha a pia ka hiam? A huh ka suak diam? A susia zaw ka suak diam?” cihte ngaihsut ding ahi hi. A kivaak zo ding mi peuhmah in kuamah a belh ding uh hi lo hi.

            Khen tel siamna leh ciimna a nei Pasian mi numei leh pasalte, upna sungah innkuanpih hi-a a zawng a cimawhte a en dingin i seh ding ahi hi. Amaute in pawlpi ah za sak ding uha, bang kicih leh hoih ding cih zong gen ding uh hi. 6 T, laimai 277, 278.

            Thumaan hong sang ding a zawng innkuan khempeuh i sanggamte in tavuan a laak dingin Pasian in sawl lo hi. Tua bang a hih uh leh sumpi-teng bei ding a hih manin mun thak ah siate a kuan ding uh a khawl uh kul ding hi. Amau’ cihtak lohna leh ciiltat lohna hanga a zawng mi tampi om hi. A neihsa (sum) uh bangci zat ding cih thei lo uh hi. Tua bang mite huhna kipia leh amaute in siat lawh zaw ding uh hi. Kimkhatte zawng den ding uh hi. Hamphatna a ngah ding uh amau’a dinga a hoih bel in, huhna hi lo ding hi. Seh siamna nei lo uh a hih manin amaute in a ngah zahzah uh tawm ta leh tam ta leh zang mang pahpah ding uh hi.

            Tua bang mite in thumaan hong sang mah leh zong sanggam a haute’ kiang panin huhna lamen den ding uh hi. A lamet bangun a ngah loh uh ciangin pawlpi phun-sanin, a upna bangun gamta kei ci-in mawh sak uh hi. Hih thu ah a thuak ding kua hiam? Mizawng honpi khat a kidonna tawh Pasian’ nasepna thakiamin, mun tuamtuama i pawlpi sum beisak ding i hiam? Beisak lo ding hi hang. A thuak dingte pen nute pate ahi hi. A huampi-in gen lehang amaute in Sabbath hong tan ma uh sangin hong tan khit uh ciangin cimawh zaw thei lo ding uh hi. 1 T, laimai 272, 273.

            Pawlpi khempeuh sungah Pasian in A mizawngte omsak hi. I lakah amaute om tawntung ding hi. Pawlpi khempeuh pawlpi mite’ tungah amaute don ding tavuan i niil (suat sawn) (321,322) ding hi lo hi. I pawlpi sungah a om mizawngte’ tungah, ei’ mun ah Khris om hi leh Amah in a lah khiat ding  hehpihna leh itna mah eite in zong i kilat khiat sak ding ahi hi. Khris tawh mapang khawma na i sep theina dingin tua bangin eite a kipantah ding i hi hi. 6 T, laimai 272.

Tagahte Kepna

           

            I don ding a kisam mi khempeuh lakah eite in meigongte leh tagahte i khual phat diak ding ahi hi. Topa in a don tuam mahmah amaute ahi hi. Khristian-te’ khut sungah Pasian in amaute ap hi. “Pasian leh Pa’ mai ah a siangtho a nin lo biakna in, pa nei lote leh meigongte a cihmawh hun uh ciangin donna, amahmah zong leitung tawh a kisawh lo dinga kikepna ahi hi.”James 1:27.

            Pasian’ tawntung kamciamte muanga, upna sungah a si pasal tampi in, Pasian’ kep ding muangin a zi a tate uh nusia uh hi. Topa in tua a dah a kapte bangci huh hiam? Vantung panin manna puakin na lamdang bawl lo hi. An a puak dingin va-akte zong sawl lo hi. Mihingte’ lungsim sungah Amah in na lamdang bawl hi.

            A lung sung panun huaihamnate paih khiat sakin, piakkhiat nopna tuinakte honsak hi. Mi-gentheite leh a dah a kapte amaute’ hehpihna khut sungah a apna tawh Pasian in Ama thuzui hi’ng a kicite’ itna zia-et hi.

            Pasian’ itna a neite in a lungsim uh leh a inn kongkhak uh hongin tua tanote la ta uh hen. Innpi khat sunga tagahte tuam kepna pen vaihawmna a hoih pen hi lo hi. Amaute in a don ding beh-le-phung a neih kei uh leh i pawlpi mite in amau’ innkuanpih dingin la hen la, a lak zawh kei uh leh zong a om theih nading innkuan dang zon sak ta uh hen.

            Khris in a tuam mahmaha a don phat diak tua bang tanote hi-a, tuate awlmawh lohna in Ama tunga khialhna ahi hi. Jesu’ min tawh amaute’ tunga kibawl khempeuh Jesu in Ama tunga kibawl bang mahin ngaihsun hi. 6 T, laimai 281. (322)

KHAWKPI 50

KHRISITANTE KHRIS’ SUNGAH PUMKHAT SUAK

            (Hih a nuai-a thute a tam zaw, gam tuamtuam, pau tuamtuam leh ngeina tuamtuam pana hong pai nasemte’ kikhopna khata Mrs. White in a gen ahi hi. White Trustees)

            Tano khat a pa’ kiangah a pai bang lel mahin eite zong Khris’ kiangah pai-in, Ama hong kamciamte ngen-in, ngah ding ci-a i up leh, eite in i ngah ding hi. Eite khempeuh in i neih dinga kilawm zah upna nei hi lehang, i kikhopnate ah i ngah ngei zah sanga a tam zaw tham Pasian’ Kha i ngah ding hi. I kikhop ding hun tawm khat nei lai i hih manin ka lungdam hi. Tu mahmahin tuinak ah pai-in tui dawn lo ding i hiam? Thumaan a hilh siate in lim na lak ding uh hiam? Eite in upna tawh Ama thu banga i gamtat leh Pasian in eite’a ding na lian pipi hong sem ding hi. Hi lai mahmah ah Pasian’ mai-a kiniamkhiatna lungsim hong kimu thei pah leh pawh!

            Hih kikhopna a kipat phetin, ki-itna leh upna thu nakpi-a gen ding ka lungsim ah hong phul hi. Hih thu kiphamawh na hih man uh ahi hi. Thupha puak nasepna-a a kuan kimkhatte in, “Note in French mite’ thu na thei kei uh hi; German mite’ thu zong na thei kei uh hi. Amaute a tuam khata i bawl kul ding hi,” ci uh hi.

            Ke’n kong dong nuam hi; Pasian in amaute thei lo hiam? Mite’ tunga thupuak ding A nasemte a guan Amah hi lo hiam? Amau’ kisapnate Ama’n thei hi; mite’a ding thupuak Ama kiang pan Ama nasemte’ tung tawn-in hong pai a hih leh a kipuakna munmun ah a kisem ding ahi hi; tua in mi khempeuh Khris’ sungah pumkhat suaksak ding hi. Kimkhatte French mi, kimkhatte German mi, kimkhatte American mi a hih hangin, amaute Khris bang hi ding uh hi.

            Mual tung pana kito khia suangte tawh Judah mite’ biakinnpi kilam hi; Jerusalem khua hong kitut ma-in suang khempeuh biakinn lamna ah a kizatna ding mun tawh kituak dingin kisui, kitatin kisin khol khin hi. A phual hong kitut tak ciangin hei ging bangmah (323) om lo in kiciang ziau lel hi. Tua innpi in Pasian’ khalam innpi lim hong lak hi. Nam khempeuh, pau khempeuh, mi khempeuh, seiniam seisang, mizawng mihau, mipil, mipil lo cih khempeuhte sung pana kigawm khawm ahi hi. Hihte pen hei khawng sekkhu khawng tawh sui a kul nuntakna nei lo nate hi lo hi. Thumaan tawh leitung pana a kitokhia a nungta suangte a hi uh hi. Biakinn Topa a hi Inn lam Siampa in khalam innpi-a amau’ kizat theihna mun ciat ding tawh kituaka amaute a nawtsa, a suihsa ahi hi. Tua biakinnpi a kizawh ciangin mun khempeuh genbaanna om lo dinga, vantungmite leh mihingte in phat kim ding uh hi. Bang hang hiam cih leh a Lampa leh a Bawlpa pen Pasian ahi hi. Suih a kul nawn lo ding bangin kuamah kingaihsun kei ta hen.

            Gamtatna leh ngaihsutna khempeuh ah a kicing kim kua minam mah, kua mihing mah om lo hi. Mi khat thu pen mi dang khat in a theih kul hi. Tua a hih manin Pasian in minam a tuamtuamte gawm khawma, vaihawmna khat, ngimna khata a luang dingin deih hi. Tua hi leh Khris’ sunga om kipumkhatna hong kilangkhia thei ding hi.

            Europe gama om minam tuamtuamte tumdang diak uha lam tuam khat tawh amaute phak kul hi a ci mi tampi om a hih manin, hih gama kong pai ding zong ka lau phial hi. A kitangsap uh thei-a a ngen mite piak ding kamciam Pasian in pia zo hi. Amaute in thumaan a saan theihna ding mun ah Pasian in amaute puak ding hi. Na lungsim uh Topa nei sak un la, beel seekpa in a khut sunga buan a meek mah bangin meek sak un tua hi leh kideidannate hong bei ding hi. Ute naute aw, Jesu en un; Ama zia leh Ama lungsim zil un, tua hi leh tua mi tuamtuamten a phakna ding uh haksa nawn lo ding hi.

            Eite in etteh dingin guk i nei kei hi, nga zong i nei kei hi; khat bek i nei-a, tua in Jesu Khris ahi hi. I sanggam Italy mite, i sanggam French mite leh i sanggam German mite in Amah hong sun peuh le-uh, amaute in thumaan bulpi khat tungah a khe uh hong nga ciat ding uh hi. Vanglian lametna a hi Khris, (324) amaute’ sungah om a hih manin, khat sunga om lungsim pen a dang khat sungah zong hong om ding hi. Ute naute aw, minam tuamtuamte kikal ah kideina kawm na khun lohna dingun kong hilh nuam hi. A om khitna a om leh zong phel khiat ding hanciam un. Jesu’ sunga a om kithutuahna mi khempeuh tunpih ding hanciamin, i mihingpihte in hotkhiatna a ngahna ding ngimna khat bek i sem ding hi.

            Nasem ute naute aw, Pasian’ kamciamte na len ding uh hiam? Angsung paaikhia-in Jesu na kidawk sak ding uh hiam? Note tung tawnin Pasian in na hong sep theina dingin angsung a sih phot kul hi. Hi lai ah khat, hua lai ah a dang khat cih bangin angsung hong dawk kiaukiau kawikawi a hih manin ka patau hi. Nazareth mi Jesu’ min tawh kong ci hi: no’ deihna a sih kul hi; Pasian’ deihna bang hisak un. Amah in note hong hal tui-in nin neng khempeuh panin hong siang sak nuam hi. Pasian’ vangliatna tawh na kidim theihna dingun na sep ding uh a thupi khat om hi. Hih kikhoppi a manma-in Ama thupha tampi na saan theihna dingun Ama kiang na neh ding uh kong thuum hi. 9 T, laimai 179-182.

Khris Leh Minam Kizopna

            Khris in minam, za, ngeina cih khawng a kilamdanna omsak lo hi. Laitheite leh Pharisaite in vantung thupha khempeuh amau’ minam bek bum sak nuam uha, leitunga Pasian’ innkuanpih dangdangte taan sak nuam uh hi. Kideina kawm khempeuh a phel khia dingin Khris hong pai hi. Ama hehpihna leh itna thupha pen huihte, nitangte leh leitung teng a niim sak guahtuite bangin kuam dei tuam nei lo a hih lam a lak dingin Amah hong pai hi.

            Khris’ nuntakna in minam a om lo biakna khat, Pasian’ mai ah Judah mi leh Namdangte, sila leh topengte, laigui zawng khawm unau khat banga a kizakim biakna khat hong phut hi. Ama nasepnate bang ngeina mah in uk lo hi. Amah in vengte leh mikhualte, lawmte leh galte kilamdang sak lo hi. Ama lungsim a sukha pen nuntakna tui a duh kha (mite) ahi hi. (324,325)

            Amah in kimanna a nei lo bangin kuamah paisan lo-a, kha khempeuh a dam sakna ding hanciam hi. Ama om khakna a bangci mihon lak hi ta se leh, a hun leh a thu tawh kituak ding thuhilhna Ama’n nei zel hi. Mihing leh mihing a ki-awlmawh lohna, a kisimmawhnate in, Ama khasiatpihna kiphamawh uh a hih lam Amah phawk zawsem sak hi. A kamsia bel leh lamet a bei kikeuh mite, lametna Ama’n guana, Pasian’ tate a suah theihna ding uh zia-le-tong nei thei-a, kawk bang lo leh gen bang lo-a om thei ding a hihnate uh zong amaute lak hi.      9 T, laimai 190, 191.

            Pasian’ tate Khris’ sungah pumkhat hi uh ci lehang, mel-le-sa, phung-le-nam, panmun, pianna leh tung-nunnate’ hanga phung-le-nam, pawl-le-gual, mi-le-mi kideidannate Jesu in bangci a sa diam? Kipumkhatna bulpipen Khris’ sungah thu-umte a kizakimna ahi hi. RH, Dec. 22, 1891.

Kipumkhatna A Piangsak Thu Khat

            Tu ma kum tampi lai, Khris hong kum kikna ding thu a um a tawm mahmah lai-in, Maine bial Topsham khua-a Sabbath-tangte, Brother Stockbride Howland’ inn-a anbuk sungah kikhawm uh hi. Sabbath zingsang khat Brother Howlang om lo hi. Hun man mahmah khat a hih manin amah hong tun loh teh lamdang ka sa uh hi. Tua khit a sawt lo in Pasian’ vaang tawh a taang bangin maitai takin amah hong tung hi. Amah in, “Ute naute aw, ka thei ta hi. ‘Na puuk ngei kei ding uh hi,’ ci-a Pasian’ Thu in a hong khapna bangin gamta thei i hih lam ka thei ta hi. Tua thu kong gen ding hi,” ci hi.

            I sanggam a zawng ngabeng khat in, a kilawm zahin amah kibawl lo-a, Brother Howland leh a dangte amah sanga a tungnung zawin kingaihsun hi, cih bangin ngaihsutna nei hi. Hih thu a maan a hih loh hangin, ama a dingin a maan bang ahi hi; tua a hih manin hong kikhop loh sawt mahmah ta hi. Tua ciangin Brother Howland tua pa’ inn ah pai-in, ama mai ah khukdinin, “Sanggam aw, ka mawhna hong mai sak in, bang teng hong cih kha ka hiam?” ci hi. Tua pa in Brother Howland (325,326) a baan pan kai-in din toh sak sawm hi. Brother Howland in, “Ding to kei ning. Ka tunga na lungkim lohna hong gen phot in,” ci hi. “Lungkim lohna bangmah nei ke’ng,” ci-in dawng hi. Brother Howland in, “Nei mah ni teh. Bang hang hiam cih leh ni dangin khat-le-khat kiho thei napi hang in, tu-in nong hopih nuam nawn kei hi, bang thu hi peuhmah hiam, thei nuam ing,” ci hi.

            Tua pa in, “Ding to phot in, Brother Howland aw,” ci hi. Brother Howland in, “Ding to kei ning,” ci hi. Tua pa in, “Tua a hih leh kei hong khukdin suk ning,” ci-in khukdin suka, naupang vai lua a hihna leh mite a sia lam vive-a a muh khaknate pulaakin, “Tu-in tuate khempeuh ka paaikhia ta ding hi,” ci hi.

            Brother Howland in, hih thu hong gen kik laitakin Topa’ vaang tawh a mai taang hi. Tua thu hong gen khit lian laitakin, tua ngabengpate’ innkuan hong tung uha, kikhop nuam mahmah khat ka nei uh hi.

            Brother howland’ hih bang zuih ding a kisam mi pawl khat om thei ding hi hang. I sanggamte in a sialam hong ngaihsut uh leh amaute’ kiangah pai-in, “Nang’ tunga kong khialhna a om leh hong mai sak in,” i ci ding hi. Tua hi leh Satan’ kol panin i sang-gam a suutkhia; mawhzolna panin a khahkhia i suak ding hi. Nang leh na sanggamte’ kikal ah bangmah lut sak kei in. Kimuanmawhna nin neng khat peuh lak khiatna dingin sup lawh zawk phial ding khat peuh a om leh zong sumh ngam zaw in. Unau banga khat-le-khat i ki-it ding Pasian in deih hi. Hehpihna leh thusiamna i neih ding zong deih hi. I sanggamte in ei hong it hi cih i up ding, Khris in zong ei hong it hi cih i up ding Khris in zong ei hong it hi cih i up ding  i kisin ding Ama’n deih hi. Ki-itna in ki-itna mah piang sak hi.

            I sanggamte vantung ah i muh ding i lamen hiam? Hi leitung ah amaute tawh kilem kithutuak taka i om theih leh tua lai ah zong amaute tawh tua bang mahin i om thei ding hi. Kitotna leh kiseelna om lo-a hih leitung ah amaute tawh i om khop theih kei leh vantung ah amaute tawh bangci om khop theih ding i (326) hiam? Ute naute tawh a kikhen sak, kilem lohna leh kithutuah lohna a piangsak gamtatna a nei mite, pianthakna taktak kisam uh hi. I lungtangte tuisuaksaka Khris’ itna tawh i ki-uk sak kul hi. Kalvari singlamteh tunga sihna tawh Amah in a hong lah khiat ki-itna namte eite’n zong i neih kul hi. Honpa tawh kinai zaw semsema i om ding kisam hi. Thungetna tampi i nei dinga, upna zong i zangkhia ding hi. Lungduai zaw, migi zaw, thusiam zawin i om ding hi. Hi leitung khat vei bek a kantan ding i hi hi. I kikholhpihte’ tungah Khris’ zia-le-tong a belhna dingin i nusiat zawh ding hanciam lo ding i hiam?

            A sak i lungtangte a kitapkhap ding kisam hi. Kipumkhat taktakna sung i tun ding kisam hi. Nazareth mi Jesu Khris’ sisan tawh hong kileite i hih lam i theih ding zong kisam hi. “Amah in kei’a dingin a nuntakna hong pia hi. Hih leitung kantana ka pai laitakin, kei’a dinga Amah hong kipiakna tawh a hong lah ki-itna ke’n zong ka lah khiat ding Ama’n deih hi,” ci ciat ni. Pasian a thutang leh Amah a umte a thutang sakpa a hih theina dingin Khris in Ama pumpi mahmah tawh singlamteh tungah i mawhnate pua hi. Khris’ tungah a kipumpiak mi khempeuh’a dingin tawntung nuntakna a hi nuntakna om hi. 9 T,laimai 191-193.

           

Kipumkhatna Ah Thahatna Om

            Kipumkhat theihna ding nakpi-in hanciam un. Tua’a ding thu ngen un la, sem un. Tua in khalam cidamna, ngaihsutna siangtho, zia-le-tong hoih leh vantung lungsim hong tun dinga, huaihamna leh siat-muhnate hong zo zo sak dinga, nang hong ita nang’a dinga Amahmah hong kipiapa’ tung tawnin gual zo pente hong suaksak ding hi. Angsung khai lum un. No sangin midangte a hoih zawin ngaihsun un. Tua hi leh Khris tawh pumkhatna suak ding uh hi. Vantung buppi mai, pawlpi leh leitung mite’ mai ah, Pasian’ tanute leh tapate na hihna uh a kitheikhial thei lo teci na hi ding uh hi. Tua bang lim hoih na lahna uh tawh Pasian’ min thang ding hi.

            Na lamdang bangmaha Khristian ki-itna tawh Pasian’ mite’ lungsim a kikhih khawm pen leitung mite in a muh ding uh kisam hi. Khris tawh vantung ah Topa’ mite a tut khopna uh a muh ding uh kisam hi. Pasian ita a bia mite’a dingin Ama thumaan in bang sem thei cih na nuntakna tawh lak lo ding na hiam? Na hih theih zah ciang ding Pasian in thei hi. Pasian’ pianzia a vom na hih nak leh nang’a dingin Ama hehpihna in bang ciang sem thei cih Ama’n thei hi. 9 T, laimai 181.

            “Ute naute aw, note khempeuh in thu a kibang gena note’ lakah kikhenna a om lohna dingin Topa Jesu Khris’ min tawh kong thuum hi. Lungsim kikhat, vaihawmna kikhatin kipawl khawm un.” 1 Korintu 1:10.

            Kipawlna in hatna hi-a, kikhenna in thazawmna hi. Tulai thumaan a umte a kipumkhat uh ciangin, amaute in mainawt thei ding uh hi. Tua thu Satan in thei pha mahmah hi. Pasian’ mite lakah kilem lohna leh kithutuah lohna a piansakna tawh Pasian’ thumaan in mai a nawt lohna dingin tu-a zahin Satan hanciam ngei nai lo hi. 5 T, laimai 236. (327)

KHAWKPI 51

THUNGET KIKHOP

            Thunget kikhopte kikhop khempeuh lakah a lawphuai bel ding hi napi-in, lim takin kibawl lo pahpah hi. Mi tampi thuhilhna ah kikhawm napi uh, thunget kikhopna ah pai lo uh hi. Hi mun ah ngaihsutna kisam hi. Pasian’ kiang pan ciimna nget ding kisam hi. Thunget kikhopte a lawphuai theithei-a bawl ding geel ding kisam hi. Mite in nuntakna an duh uh hi. Thunget kikhopna ah tua an om a hih lam mu le-uh a ne ding-in amaute hong pai ding uh hi.

            Koimah peuh ah thungetna a sau pen a kimanna om lo hi. A diakdiakin biak kikhopna a hi lo munte ah hoih lo hi. Maizum lo-a gen ding a haute in a maizum thei leh a meidawite thugen hun ngahsak ngei lo uh hi. Puatham lel a hite in gen ding hau deuh uh hi. A thungetnate uh zong sau-in kizom datdat mah hi. Amaute in amaute’ thugenna leh thungetnate a ngai vantungmite leh mihingte gim sak uh hi. I thungetnate tom dinga a thu gil ding hi. Thunget ding saupi a cimtak-huai a nei a om leh inn dei sungah amah guak in a nget dingin nusia ta hen. Na lung sung uah Pasian’ Kha lut sak un, amah in a thadahhuai paizia khempeuh hong nil siang sak ding hi. 4 T, laimai 70, 71.

Mihon Laka Thugetna Sausak Lo Ding

            Nungzuite’ thungetnate tom dinga, a deihna lian bek mah uh pulaak dinga, a val gen lo ding a hihna uh Khris in amaute thei sak hi. Thungetna bang tan sau dinga, bang thute ngen ding cih zong hilh hi. Pumpi lam leh khalam thupha a deihte uh zong pulaak dinga, lungdam kohna zong tua bang mah hi ding hi ci-in hilh hi. Thungetdan ding hong hilhna pen theih nop mahmah hi. Mi khempeuhte’ kitangsapna taktak teng huam kim hi. Minit khat bang, minit nih bang kicing mahmah lel hi. Pasian’ Kha in a tuam mahmaha a mop thungetna hun, Kha sunga thuumna a kibawl hunte zong om thei kha ding hi. Deihgil a nei mi in Pasian’ kiangah khuisa liang tau liang mahin ngen ding hi. Pasian’ vangliatna hong kilat tuam mahmah khat a om masiah tawlnga lo ( 328) in Jakob mah bangin a lungsim in lai den ding hi. Tua bang hun zong i neih ding Pasian in deih hi.

            Mi kimkhat in thuhilhna bang danin a cimtaak huaiin thungen thei uh hi. Tua mite in Pasian’ kiangah a ngen hi lo in mihingte’ kiangah a ngen ahi hi. Pasian’ tungah thungetna kinei hi napi-in, bang a hih uh a hih lam amaute kithei le-uh, tua banga amaute’ hih ngamna hangin hong patau ding uh hi; bang hang hiam cih leh amaute in, van leh lei a Piangsakpa in leitunga thupiangte tawh kisai-a a theihhuai thute a zak ding a kisam bang keeka thungetna dan tawh Topa a thuhilh suak uh hi. Tua bang thungetna khempeuh dak leh dal tuah ging bang hi lel hi. Tuate vantung ah kiciamteh lo hi. Tua bang thungetnate vantungmite in cimtak uha, a ngaih loh uha a phawmawh a si thei mite in zong cimtaak uh hi.

            Jesu in thu ngen zelzel hi. A Pa’ kiangah a deihnate a ngetna dingin Amah in gamdaihna sing nuai khawng mual pang khawng zuan zel hi. Suna nasep silbawlte kikhawl ta-a, a gimte a tawlngak uh ciangin, Jesu in thungetna hun zang zel hi. Thungena ngakna tawm lua mahmah a hih manin, thungetna a kithadah ding bel ka deih kei hi. Kha leh thutheihna tawh thungetna bang tawm phadiak lai hi. Lungsim takpi tawh mui a bun thungetna in kimanna nei-a, kicimtaak ngei lo hi. Tua bang thungetnate in ki-ap nopna a nei mite lawpsakin tha ngahsak hi.

            A simthama thungetna ki-awlmawh lo hi. Tua a hih manin mi tampi in Pasian bia dinga a kikhop uh cingin a cimtak-huai thu sau pipi a ngen diatduat uh ahi hi. Nipi kaal khat tawntung a nget loh teng uh hong ngen uha, a nget sasa mah uh lumlet den uh hi. A lungsim uh kisuangtaakin, tua in amaute gawt a hih manin, kikhakhupna bang khata amaute in a lamen uh ahi hi. Amaute in thungetna tawh Pasian’ maipha a ngah ding a kisa uh ahi hi. A hi zongin tua bang thungetnate in lungsim dangte amau’ dinmun niam khalam khuamialna sungah tunpih suk thei zaw uh hi. Ngak kawma thungetna tawh kisai Khris’ thuhilhnate Khristiante in zui (328,329) nuam hi le-uh, Pasian a biakna uah amaute navak zaw ding uh hi. 2 T, laimai 581, 582.

Thungetna Ah Phatna Tam Sak Zaw Ding

            “Husanna a nei khempeuh in Topa Phat un.” I lungdamna ding bang zahta om hiam cih a ngaihsun i om hiam? Zingsang simin Topa’ hehpihna a thak hong tunga, Ama cihtakna zong kiam lo a hih lam i phawk hiam? Amah i belh i muan a hih lam genin, Ama hong angvannate lungdamna i ko hiam? Tua bang cih thadah eite in, “a hoih a kicing thupha khempeuh tunglam pan hi-a, khuavakte’ Pa kiang pan hong pai suk ahi hi,” cih thu i mangngilh pahpah hi.

            Cidamte in ni khat khit ni khat, kum khat khit kum khat a ngah uh a lamdang hehpihna thupha mangngilh zelzel uh hi. Amaute in Pasian’ kiang pana a ngah uh nop tuamnate hangin Amah phat lo uh hi. Natna hong tun ciangin Pasian kiphawk hi. Damna kideih a hih manin thu kingen hi, a hi ding mah hi. Pasian pen natna hun leh damna hun ah i bukna ahi hi. A hi zongin mi tampite in a vai uh Amah ap lo uh hi; amau leh amau kilungkham sak uha natna leh zawngkhalna thuak semsem uh hi. Amaute in lungkim lohnate khawlsanin, lungkhamna leh dahna pan khuadak le-uh, amaute dam takpi zaw ding uh hi. Amaute in bang tan vei cidamna thupha ngah cih lungdamna tawh a phawk ding uh kisam hi; tua a manpha cidamna a ngah kik uh leh zong, Piangsakpa’ tungah tavuan a thak nei uh a hih lam a mangngilh loh ding uh zong kisam hi. Miphak sawmte a kidam sak ciangin, Jesu’ tungah lungdam ko-a a pahtawi dingin khat bek hong kileh kik hi. Eite, Pasian’ hehpihna in a lungsim uh a suk zawh loh tua miphak kuate bangin om kei ni. 5 T, laimai 315.

            Hong tung thei ding siatnate lungkhampih kholhna pen hai vai-a Khristian vai lo hi. Tua banga hihna in  i ngah thuphate lungdampih lohna leh i hamphatnate khantoh sak nop lohna ahi hi. Tu ni-a i sep dingte sema, i tuah ding haksatnate zong i thuak zawh ding Topa in deih hi. I kam leh i tak tawh i khialh lohna dingin tu ni-in i kikep ding ahi hi. Tu ni-in Pasian phatin i pahtawi ding hi. A nungta upna tawh tu ni-in (329,330) eite in gal i zo ding hi. Tu ni-in Pasian i zong dinga, Ama ompihna lo tawh a lungkim mawk lo dingin i lungsim i khensat ding hi. Tu ni pen ei’a dinga hong kipia ni nunung a hi ding bangin ngaihsunin eite in pilvangin, na semin, thu i ngen ding hi. Tua hi leh i nuntakna ah hanciamna hong om ding hi. I kampauna leh i gamtatna khempeuh ah Jesu’ nung i zui cinten thei zaw ding hi.

Thuneu Nono Zong Pasian In Kin

            Thungetna hun manpha maan takin zanga a hanciam mi tawm khat bek om hi. Jesu’ kiangah pai-a i kisapna khempeuh i gen ding ahi hi. I lungkhamna a lian te mah tawh kibangin a nengnengte zong Ama kiang i tut ding ahi hi. Eite hong buai sak, hong lung gim sak khempeuh thungetna tawh Topa’ kiangah i puak ding ahi hi. I kalsuanna khempeuh ah Khris kisam i kisak leh, Satan in hong khemna ding hun tawm ngah zaw pah ding hi. I lawm hoih bel leh hong hehpih bel pa’ kiang pana hong kaih khiat ding pen ama hanciamna lian bel ahi hi. Jesu lo ngal muan dang i neih ding hi lo hi. I lungsim sungah a om khempeuh Amah tawh nuam takin i kikum khawm thei hi.

            Ute naute aw, kikhopna tuamtuam na bawl uh ciangin, note tawh Jesu hong om a hih lam um un; note thupha hong pia nuam a hih lam zong um un. No’ angsung en kei un; Jesu en un la, Ama hong itna thu gen  un. Amah na etna uh tawh Amah tawh kibang dingin kikhelna na ngah ding uh hi. Thu na nget uh ciangin tomsak un la, na deihpen uh gen lian un. Thu saupi ngetna tawh Topa thuhilh se kei un. A gil kial naupangin a pa’ kiangah an a nget bangin nuntakna an ngen un. Eite in upna tawh i nget nak leh i kisap khempeuh Pasian in hong pia ding hi.

            Thungetna in a siangtho bel kha thasaanna ahi hi. Thungetna in a siangtho Pasian mai ah lungsim thak, lungsim tak, kiniamkhiatna leh cihtakna tawh husanna hi ding hi. Thungente in Pasian’ mai ah a om a hih lam uh a kiphawk uh ciangin angsung hong mangngilh ding (330) uh hi. Mihing’ siamnate lah khiat nopna hong nei nawn lo ding hi; mite’ bila a zak nop ding bek hi lo in, kha in a lunggulh thuphate a ngahna dingin hanciam ding hi. 5 T, laimai 200, 201.

            Mihon kikhopna leh khat guak biakpiakna ah, thu i nget ciangin Topa’ mai ah i khukdin ding pen i hamphatna ahi hi. I etteh ding Jesu in, “khukdinin thu ngen hi.” (Luka 22:41). A nungzuite tawh kisai-in amaute zong, “khukdinin thu ngen uh hi,” ci-in kiciamteh hi (Sawltak 9:40; 20:36, 21:5). Paul in, “I Topa Jesu Khris-i mai ah ka khukdin hi,” ci hi. Ephesi 3:14. Pasian’ mai ah Israel mite’ mawhna a pulaak lai-in Ezra khukdin hi. (Ezra 9:5). Ni khatin thum veita Daniel khukdinin thu ngenin, a Pasian’ tungah lungdamna ko hi. (Daneil 6:10) GW, laimai 178. (331)

KHAWKPI 52

TUIPHUMNA

            Tuiphumna leh Nekkhawm bawlnate in pawlpi sungah khat pawlpi pua ah khat a kiphut mual suang nih bang ahi hi. Hih ngeina nihte’ tungah Khris in Pasian’ min gelh hi.

            Tuiphumna pen Ama khalam gam sung lutna lim dinga Khris in a bawl ahi hi. Pa, Tapa leh Kha Siangtho’ thuneihna nuai ah om a hih lam uh a kipulaak nuam mi khempeuh in a zuih ding uha a bawl ahi hi. Mihing in pawlpi sung a lut ma, Pasian’ Khalam gam sung a sik ma-in, “TOPA i Dikna” cih Pasian’ min gelhna a ngah masak phot ding ahi hi. (Jeremiah 23:6)

            Tuiphumna in a ciliap huai bel leitung nusiatna ahi hi. Khristian nuntakna sungah a tum phet uha Pa, Tapa leh Kha Siangtho min thum kihual tawh tui a kiphumte in, Satan’ nasepna nusia uh a hihna leh, vantung Kumpipa’ tate a hi kumpi innkuan mi a suak uh a hihna a genkhia uh ahi hi. Amaute in, “Amaute lak pan hong paikhia un la a tuamin hong om un, …. A siang lo nate lawng kei un,” cih thupiak a zui uh ahi hi. Amaute’ tungah, “Note kong sang dinga, note’a dingin Pa hi-in, note Ka tanu ka tapate na hi ding uh hi, Vanglian Topa in ci hi,” cih kamciam a tangtun ahi hi. 2 Korintu 6:17,18.

            Tuiphumna ah i bawl kiciamna in thu tampi huam hi. Pa, Tapa leh Kha Siangtho min tawh Khris’ sihna mah banga a kiphum, Ama thawhkikna mah banga a tho kik i hi a, nuntak thak a nungta ding i hi hi. Khris’ nuntakna tawh eite’ nuntakna a kihen khawm ding ahi hi. Tua huna kipanin thu-um mi in, Pasian’ tung, Khris’ tung leh Kha Siangtho’ tungah a ki-ap a hih lam a phawk den ding hi ta hi. Amah in leitung ngaihsutnate hi thu banah a thu nihna ah a koih ding hi ta hi. Kiphatsakna leh noptatna sungah a nungta nawn lo ding a hih lam mipi mai-a a tangko hi ta hi. Kidawm lo, thukhual lo-a a nungta nawn lo ding hi ta hi. Pasian tawh kiciamna bawl khin ta hi. Leitung’a dingin si khin ta hi. Topa’a dinga a nungta ding hi ta hi. Pasian’ melcikna (332) a pua, Khris’ gam sung mi, Pasian’ pianzia a vom a hih lam mangngilh lo in, ama siamna khempeuh Ama a dinga a zang ding hi ta hi. Ama pumpi buppi leh ama neihsa khempueh Pasian’ tungah pia-a, Ama minthanna dinga a siamna khempueh a zat ding hi ta hi.

           

Kician Takin Kiging Khol Ding

            Tui kiphum dingte kicain taka a kigin kholh ding kisam hi. Thu a kihilhna ngei zah sangin lim taka a kihilh zawk lai ding kisam ta hi. Thumaan a hong sang tungte’ tungah Khristian nuntak thu guipite siang taka hilh ding ahi hi. Khris tawh kizom takpi a hihna a lahna-in kuamah in a upna pulaakna lel pen muan ding hi lo hi. “Ka um hi” “i cih ding bek hi lo-a, thumaan banga i gamtat ding ahi hi. Amah tawh kizom takpi i hihna pen i kampau, i gamtat leh i zia i tong tawh Ama deihna i zuihna in hong lak ding hi. Mi khat in thukham palsatna a hi mawhna a nusiat ciangin, ama nuntakna thukham tawh hong kituak dinga, thu hong mang ding hi. Tua in Kha Siangtho’ nasepna ahi hi. Lim taka kisim thumaan khuavak, lungsim ngaihsutna awging leh Kha’ zolnate in, lungsim sungah, pumpi, kha leh lungsim a hi pumpi bup hong tatna dinga Amahmah a buppi-a hong kipiakhia Pa, Khris itna taktak hong nei sak hi. Thumanna panin itna hong kilangkhia hi. Pasian ita Ama thupiakte a zuite leh, Amah it lo-a Ama thukhamte a awlmawh lo mite’ kikal ah kicain takin kigi kikhung ding hi.

            Pasian’ tunga kibup piakna a kisaplam kuamah in a theih ding Satan in deih lo hi. Tua bang kipumpiakna a om loh ciangin mawhna zong kinusia lo pah hi; duhna leh lunggulhnate in zong gual zawh hong sawm pah hi; mawh zolna in ngaihsutna buai sak hi, tua a hih manin pianthakna taktak om thei lo hi. Mi khempeuh in, hong bum, hong zol, hong khem Satan’ sawltakte tawh gal kidona thu phawk thei hi leh, upna lama a moi laite’a dingin nakpi-a nasepna kinei zaw ding hi.

Naupangte Kigin Kholh Sakna

            A tate uh tui a kiphum nuam, nute pate in nasep (332,333) ding khat nei hi. Amau mahmah lim takin kisit tel dinga a tate uh zong hoih takin hilh ding hi. Tui kiphumna pen siangtho-in thupi mahmah hi. Tua a hih manin a deihna lim taka theihtel ding kisam hi. Tuiphumna in mawhna kisikna leh Khris Jesu sungah nuntakna thak lutna ahi hi. A hun lopi-a nawh hih luat ding zong hi lo hi. Nute pate leh tate in a man zah ding seh uh hen. A tate uh tui a kiphum sakna ah nute pate in tua tanote lim taka a kep ding leh zia-le-tong lam tohna ah amaute a makaih dingin a kiciam uh ahi hi. Amaute in a up thu uh a min siat khak sak lohna dingin tuuhon laka tua tuunote a tuam mahmah a kem dinga kiciam uh ahi hi.

            Tanote a neutung pan mahun biakna lamah pattah ding ahi hi. Mawh sakna lungsim tawh hi lo in, maitaina leh lungdamna tawh hilh ding ahi hi. Tate in phawk khak loh zia-etnate amau’ tungah a tun lohna dingin nute in a vil tawntung ding uh kisam hi. Nute pate in a tate uh ciimna leh a deihhuai thuhilhna tawh a kep ding uh ahi hi. Theihna a nei nai lo tanote’a dingin lawm hoih bel hi dinga, nasep a zawhna dingun huh le-uh, na khempeuh zawh theih a hi dingin hong ngaihsun thei ding uh hi. A maana gamtat ding a hancaim a tanote uh Topa’ innkuan sunga khangnote a hih lam nute pate in phawkin, Kumpipa’ lam lian a hi thumaan lampi a totna dingun amaute a huh ding uh a kin (lawp) mahmah ding uh ahi hi. Pasian’ tate hihna in bang hi-a, Ama thu man nopna in bang hi hiam cih itna tawh nisima amaute a hilh ding uh ahi hi. Pasian’ thu manna ah nute pate’ thu manna zong kihel a hih lam zong hilh un. Tua pen nisim, naisima sep ding ahi hi. Nute pate aw, pilvang un la thu ngen un; na tate uh na kikholhpih na lawm uh hi sak un.

            A khan sung uha a lungdamhuai bel hun hong tunga, a lung sung uah Jesu itna nei-in, tui hong kiphum nop uh leh hoih takin hih un. Tui a kiphum ma-un, a nuntak sung uha a tup masak pen uh Pasian’ na sep ding a hi hiam, ci-in dong un. Tua ciangin bangci kipat ding cih amaute hilh un. Phattuamna a nei mahmah pen a (333,334) masa lama thusinnate ahi hi. Pasian’a dingin a masa penin bangci sep ding cih a ol theithei-in hilh un. Tua nasep pen a theih baih theithei dingin hilh un. Khristian nute pate’ hilhna banga Topa’ tunga kipumpiakna, Ama gen banga gamtatna cihte bang hiam cih siang takin gen un.

            Lim taka na hih khit uh ciangin, na tate un pian thakna leh tuiphumna a khiatna tela, piang thak takpi hi ci-a na lung uh a kim leh tui kiphum sak un. A hi zongin thumanna lampi ah theih khak a hau nai lo khe-te na makaihna uah a muanhuai tuucingte bang na hihna dingun no mahmah a masa bela na kigin kholhna ding uh kong gen phapha nuam hi. Nute pate in ki-itna, thusiamna, Khristian kiniamkhiatna leh Khris’ tunga kipumpiakna cihte ah etteh thamcing, a tate uh a lah theihna dingun Pasian in amaute sungah na sem ding hi. Na tate uh tui a kiphum ding thukima, tua khit cianga amau’ ut banga a ta dinga na koih khong uh leh, lammaan na tot suaksak ding uh tavuan na neih lam uh na don kei uh leh, amaute upna, hatna leh thumaan lawpna ah a thakiam uh leh nomau mah-i tavuan ahi hi.

            Nupi papi a hi khanghamsa tui kiphum nuamte in a khangno laite sangin a tavuan uh a thieh zawk ding uh kisam hi; a hi zongin pawlpi siapa in a amaute’a ding tavuan nei veve hi. Amaute in zongsatna hoih lo a nei uh hiam? Siapa amaute tawh a tuamin kimu ding uh hi. Lai Siangtho simpih un, amaute tawh thu ngen un la, amaute tunga Topa’ deihnate siang takin lak un. Pianthakna tawh kisai Lai Siangtho’ hilhnate simpih un. Pianthakna-i gah, Pasian a itna uh teci bang hiam cih amaute hilh un. Pianthakna taktak in lungsim, ngaihsutna leh tupnate kikheelna a hih lam lak tel un. Zongsatna hoih lote nusiat ding ahi hi. Gensiatnate, hazatnate leh thuman lohnate a hi mawhnate paih khiat ding ahi hi. Zia-le-tong a hoih lo khempeuh gal banga do ding ahi hi. Tua hi leh thu-um mi in, “Ngen un, hong kipia ding hi,” cih kamciam zang thei ta ding hi. Matthai 7:7, 6 T, laimai 91-99.

           

KHAWKPI 53

NEKKHAWM BAWLNA

            Topa’ innpi gentehnate baihlamin tel nopa, tuate tawh a kigenteh thute zong eite’a dingin khiatna thukpi nei uh hi. Ev, laimai 273.

            Judah mite’ khang kikhelna nih leh a pawlpi nihte’ kikal ah Khris hong ding hi. Mawh phelna kithoihna dingin kawk bang lo Pasian’ Tuuno hong kigo ding hi ta hi. Kum tulli tawntung Ama sihna ding a kawk khol lim leh zehtannate tua bangin a beisak ding ahi hi. A nungzuite tawh Pasian pawi a nek khop uh ciangin, Ama hong kipumpiakna phawkna dingin, paisan pawi tang ding pawi khat hong phuang hi. Judah mite’ minam pawi a bei ding hong hi ta hi. Khris in a phuh thak pawi pen gam khempeuh leh khang khempeuh ah a kizang ding hi ta hi.

            Paisan pawi pen Egypt gam sal suahna pana Israel mite a suahtakna uh phawkna pawi ahi hi. Kum khat khit kum khat tua pawi bawla, naupangte in a khiatna a dot uh leh a tangthu a gen dingin Pasian in amaute sawl hi. Tua bangin mi khempeuh lungsim ah a lamdang suahtakna phawk den ding uh hi. Nekkhawm bawlna zong Khris’ sihna hanga a piang suahtakna lianpi phawkna ding ahi hi. Vangliatna leh minthanna tawh Amah hong pai kik masiah tua pawi a kibawl den ding ahi hi. Eite’a dinga Ama nasep lianpi i lung sungah i phawk denna ding deihna ahi hi.

            Nekkhawm pawi sunga kihel loh ding Khris in a deih lohna hong lak hi. A kilangtaak mawhna in a mawhte tua sungah kihel sak lo hi. Kha Siangtho in tel takin hong hilh hi. (1 Korintu 5:11) Tua kana kuamah thu kikhen ding hi lo hi. Tua pawite ah kuate bek kihel thei ding cih a gen dingin Pasian in mite sawl lo hi. Kua in lungsim sung theithei a hiam? Kua in taang leh tahum khen thei hiam? “Amah leh amah a kisit tel khit ciangin khomun ne-in hai zong dawn ta hen,” “Kilawm lopi-a hih khomun ne-a, Topa’ hai a dawn mi in Topa’ pumpi leh sisan tungah a khial ahi hi.” “Kilawm lopi-a (336) a ne  a dawnte in Topa’ pumpi khen tel lopi-in, amah leh amah mawh sakna a dawn ahi hi.” 1 Korintu 11:28, 27,29.

            A kilawm lo khat peuh hong kihel thei kha ding cihna tawh nekkhawm pawi panin kuamah kidaithah kei hen. Nungzui a hi khempeuh a kihel ding kisam hi, tua banga a kihelna tawh ama aituam Honpa dinga Khris a saanna a lak ding ahi hi.

            A nungzuite tawh khomun leh lenggahzu a nek khopna panun Khris in amaute’a ding Tanpa a hihna a lak ahi hi. Amaute thuciamna thak pia hi. Amah a sang khempeuh in tua thuciamna thak panin Khris tawh gamh luah khawm ding Pasian’ tate a suak uh ahi hi. Tua thuciamna hangin tu leh nung cianga ding vantung in a piak theih thupha khempeuh amau’a ding hi ta hi. Khris’ sisan tawh tua thuciamna kikip sak ding hi. A puksa mihing buppi leh amaute khat ciat’a dinga kibawl kithoihna lianpi, nungzuite in a phawk den theina dingin tua Nekkhawm (Sacrament) a kibawl ahi hi.

Nasemte’ Nasem

            Nungzuite nitak an nekna ding mun hong tun uh ciangin, a lungsim uh ki-elna tawh kidim hi. Jesu’ veilam neh pen ah Judah tu hi; John pen a tak lamah tu hi. Panmun sang bel a om leh Judah a tu dingin kingaihsun pah hi, tua mun pen Khris’ ban zom hi pah dingin um hi. Judah pen mi-zuau ahi hi.

            Kithutuah lohna thu dang khat hong piang hi. Pawi ciangin silate in lenglate’ khe sil sak ding ngeina om hi; tua mun ah tua ding a baihsa-in om hi. Khe silna dingin tuibeel, tuikuang leh dialte a baihsa-in om hi; sila khat zong om lo hi, tua sem ding pen nungzuite hi pah hi. Kiphatsakna lungsim nei ciat uh a hih manin tua na sep a sawm nungzuite khat beek om lo hi. A vekpi-un thangpaih pan tek uha, a sep ding uh bangmah a om lo bang keekin om phiauphuah geuh uh hi. Tua banga a omna uh tawh amaute a kiniamkhiat nuam lo suak uh hi. (336,337)

            Khat-le-khat na kisepsak dingin nungzuite taangkhia lo uh hi. Bang hong ci uh hiam ci-in Jesu in tawl khat ngak phot hi. Tua ciangin a Siapa uh a hi Amah mah tutna panin hong dingkhia hi. A gamtatna a nok sak ding a puantualpi suahkhia-in, dial khat la-in a kawng ah vet hi. Nungzuite in lamdang sakna tawh en uh hi; bang teng hong hih lai tam ci-in pau lo ham loin en uh hi. “Tua khit ciangin kuang sungah tui sunga, nungzuite’ khe sil sakin, a kawnga a veh dial tawh a nul sak hi.” Tua in nungzuite’ mit kihong sak hi. A lung sung uah maizumna leh kiniamkhiatna hong dim hi. Pau lo ham lo-a taaina a thuak uh a hih lam hong kithei uha, amaute in khuavak thak khat hong mu ta uh hi.

            Tua bangin Khris in a nungzuite a itna lak hi. Amaute’angsung lungsim in Amah dah sak mahmah a hih hangin, amaute haksatna tawh kisai-in amaute tawh kitotna bawl lo hi. Tua sangsikin amaute in a mangngilh theih nawn loh ding uh lim khat lak hi. Amah in amaute a itna kiam pakpak, bei pakpak lo hi. Pa in na khempeuh Ama khut sungah pia a hihna, Pasian’ kiang pana Amah hong pai hi-a, Pasian’ kiangah a ciah kik ding a hihnate Ama’n thei hi. Amahmah Pasian a hihna zong kithei a hih hangin, a kumpi lukhu leh a kumpi puante suahkhia-in, Amah in sila lim hong la hi. Leitunga Ama nasep nunung khat pen sila bangin Ama kawng gaka, sila nasep a hong sepna ahi hi.

            Amaute’ khe a sil sak hangin, Ama thupina themkha zong kiam tuan lo a hihna A nungzuite in a theih ding Khris in deih hi. “Siapa leh Topa nong ci uh hi; maan hi, na cih bangun Ka hi hi.” Amah milian mi-thupi a hih mah bangin, tua bangin khesilna pen a thupi suaksakin thupha pia hi. Khris zaha pahtawina a ngah kuamah om lo hi, a hi zongin Amah in a niam bel nasep hong sem hi. Mihing’ pianpih lungsim sunga a teeng huaihamna leh, angsung khualna pana tha a ngah huaihamna tawh A nungzuite lam a pial loh na dingin, Khris mahmah in kiniamkhiatna lim hong lak hi. Hih thu lianpi mihing’ khut sungah Ama’n ap nuam lo hi. A phattuamna ding lian a hih manin Pasian tawh a kizakim (337,338) Amah mah-in A nungzuite’ sila bangin na hong sem hi. Amaute panmun sang bel a kituh laitakun, khuk khempeuh a khuk dinna ding Pa, vangliantna tawh kituam vantungmite in na a sepsak Pa uh, Amah, Topa a cihte’ khe a sil dingin hong om suk hi. Amah a lehheekpa’ khe zong sil sak hi.

            A nungzuite’ khe a sil sak khit ciangin Jesu in, “Note’ tunga kong bawl mah bangin note khat-le-khat na kibawlna dingun lim kong lak zo hi,” ci hi. John 13:15. Hih thu ah Khris in zin do siamna bek a gen hi lo hi. Leivuite a sianna dinga lenglate’ khe sil sakna bek a gen nuam hi lo hi. Khris in biakna tawh kisai nasep a hilh ahi hi. I Topa mahmah in hong sepna hangin tua khesilna pen biakna nasepna khat hong suak hi. Kiniamkhiatna leh midangte’a ding sepsakna thu amaute in a phawk denna dingun nungzuite in tua pen a zuih ding uh ahi hi.

Kigin Kholhna Pawi

            Nekkhawm pawi’a ding kigin kholhna a hi dingin khe silna pen Khris in a seh ahi hi. Kiphatsakna, ki-elna leh kitotna a om laiteng, Khris tawh kikholhna sungah lungsim lut thei lo hi. Ama pumpi leh Ama sisan tawh kizopna a ngah dinga a kiging lo i suak hi. Tua a hih manin Khris in Ama kiniamkhiatna phawkna pen bawl masak dingin a seh ahi hi.

            Khe kisil ding a hong pai uh ciangin Pasian’ tate in, nuntakna leh vangliantna-i Topa’ kammalte a phawk ding uh kisam hi: “Note’ tunga kong bawlna na thei uh hiam? Note in Kei, Siapa leh Topa nong ci uh hi; maan hi, nong cih bangun Ka hi hi. Kei, na Topa uh leh na Siapa un na khe uh hong sil sak ka hih leh note khat-le-khat na kisil sak ding uh kilawm hi. Note’ tunga kong bawl mah bangin, note khat-le-khat na kibawlna dingun lim kong lak zo hi. A maan taka kong cihin ah, sila in a pu sangin a lian zaw kei hi. Hih thute thei-a, tua banga na hih uh leh thupha na ngah ding uh hi.” John 13:12-17. (338,339)

            Mihing’ lungsim sungah midangte sanga kiliat sak zawkna, angsung’a ding nasepna, panmun sang zaw kituhna cihte oma, tuate panin kisiat muhna leh ki-elnate piang hi. Topa’ Nitak An nekkhop pawi ma-a khe kisil sakna in tua kitel khialhnate a siang sak ding, huaihamna pana mihing a dokkhia ding, kiphatsakna pana a kaikhia suk ding leh, midangte’ na  a sem nuam sak dinga lungsim kiniamkhiat sakna ahi hi.

            Tua khe silna ah van pana a siangtho Pasian hong om hi. Mite’ lungsim sung sittel hi. Mawhna kisik kiksak hi. Mawh maina khamuanna zong guan hi. Angsung khualna tuizawl sunga a luang ngaihsutnate a hei khia dingin hehpihna a dim tawh Khris tua mun ah om hi. Topa’ lim lahsa a zui mite’ phawk theinate Kha Siangtho in khanglo sak hi. Honpa’ kiniamkhiatna a kiphawk ciangin ngaihsutna khat-le-khat hong kizom khawm hi; Pasian hoih mahmahna leh, i lawmte’ migitna leh hoihnate phawk kikna a banbanin hong pai hi.

            Tua khe silna maan taka a kibawl ciangin, Pasian’ tate in a siangtho kizopna hong nei uha, khat-le-khat kihuhin thupha kipia uh hi. Angsung khual lo-a na a sem dingin kiciamna zong hong bawl uh hi. Tua pen khat-le-khat’a ding bek hi lo hi. Amau’ nasepna mun zong Topa’a zah mahin hong zai ta hi. Leitung ah i nasep ding a kisapna mun a dimin om hi. Mun khempeuh ah mizawng, mi cimawh leh thu thei lote om kawikawi hi. Inn deitungnunga Khris tawh a kikhawl khawmte, Ama sep banga sem dingin hong kuankhia ding uh hi.

            Mi khenmpeuhte’ biak Jesu pen mi khempeuhte’ sila dingin hong pai hi. Mi khempeuh’a ding Ama’n na hong sep mah bangin mi khempeuh in Amah bia-in hong pahtawi kik ding uh hi. Ama lungsim siangtho bang lungsim nei nuama, hotkhiatna a ngah a om cianga Amah tawh a lungdam khawm nuamte in, Ama’n angsung khual lo-a a sep bangin na hong sem ding uh hi.

Khris Hong Kum Kik Ding Phawkna

            Ankuang kiima a tut khop lai takun Amah in dahna awging tawh, “Thahna ka thuak ma-in hih Paisan (339) pawi note tawh ka nek khop ding ka ut mahmah hi. Bang hang hiam cih leh Pasian’ gam sungah nek khop ni matengin, ka ne nawn kei ding hi, a ci hi. Hai la-in lungdam a koh khit ciangin, la un la note’ lakah hawm un. Bang hang hiam cih leh Pasian’ gam hong pian matengin lenggah tui ka dawn kha nawn kei ding hi, a ci hi.” Luka 22:15-18.

            A hi zongin Nekkhop pawi pen dahna hun ding hi lo hi. A deihna tua bang hi lo hi. Topa’ nungzuite in an kuang a um khop lai takun, amaute in a tuahsiatna dingte uh phawka a thuum ding uh hi lo hi. A beisa huna a omziate uh hoihin hoih ta kei leh amaute in tuate a ngaisutsut ding uh hi lo hi. Amau leh midangte’ kikala kithutuah lohnate amaute in a suutsuut ding uh hi lo hi. Nekkhop pawi’a dinga kigin kholhna khe kisil sakna in tuateng huam hi. Ei leh ei kisittelna, mawhna pulaakna leh kithutuah lohnate sian khit sakna i neih ding ahi hi.

            Tua ciangin Khris tawh kimu dingin hong pai ding uh hi. Amaute singlamteh liim ah a ding ding hi lo in, singlamteh hotkhiatna khuavak sungah a ding ding uh ahi hi. Dikna Nitang sungah amaute a om ding uh ahi hi. Khris’ sisan manpha bel tawh a lungsimte uh a sian sak khit uh ciangin, a kimuh theih loh hangin Ama’n hong ompih hi cih phawkin, amaute in, “Lungnopna note kong nusiat hi; Ka lungnopna note kong pia hi. Leitung mite in a hong piak bang hi lo hi,” cih kammal za ding uh hi. John 14:27.

            Khris pumpi kitam kham leh sisan luangkhia lim la anlum leh lenggahzu i nek ciangin, i lungsim in inn deitungnung ah Amah tawh a kikhawlin i kingaihsun ding hi. Leitung mite’ mawhna a puakhia Jesu’ khakham veina tawh a kisiang sak huan sungah i pai ding hi. Pasian tawh i kilem kik theihna dinga Ama gentheih thuakna i mu ding hi. Khris singlamteh ah kikhai lum a hihna eite’ lakah hong kilang ding hi.

            A kikhai lum Tanpa i et ciangin, vantung Vanglianpa’ hong kipumpiakna a deihna leh a nasiatna i phawk zawsem ding hi. Hotkhiatna nasep i mai ah hong kilang (339,340) hi. Kalvari i phawkna in i lung sungah a hing leh a siangtho lawpna hong piangsak hi. I lung sung leh i kam panin Pasian leh Tuuno kiphat den ding hi. A mitkha-a Kalvari a mu dente’ lung sungah kiphatsakna leh kisaktheihna om thei lo ding hi.

            Upna in i Topa’ kipumpiakna a lungngaih ciangin, a mi in Khris’ khalam nuntakna hong sun ding hi. Tua bang mi in nekkhawm bawlna khempeuh panin khalam thahatna ngah ding hi. Nekkhawm bawlna in thu-um mi Khris tawh kien khawm saka, tua panin Pa tawh zong hen khawm hi. A taktakin ci lehang mihingte leh Pasian a kizom khawm sak ahi hi.

            Nekkhawm bawlna in Khris hong kum kikna ding hong lak hi. Nungzuite’ lungsim sungah tua lametna a hing den sak dinga kigeel ahi hi. Ama sihna phawk kikna a bawl dinga amaute a kikhop uh ciangin, amaute in, “Hai la-a lungdam a koh khit ciangin, amaute pia-in, Na vekpi-un dawn un; bang hang hiam cih leh hih in mi tampite’ mawhna a maina dinga a kibua, thuciamna thak a kip sak Ka sisan ahi hi, a ci hi. A hi zongin Ka Pa’ gam sungah note tawh a thak ka dawn ni matengin, tu-a kipanin hih lenggah tui ka dawn nawn kei ding hi, a ci hi,” cih thu phawk uh hi (Mathai 26:27-29). Bawlsiatna a thuak uh ciangin amaute in Topa hong pai kikna ding thu tawh hehnepna ngah uh hi. “Hih khomun ne-a, hih hai na dawn sialun Ama hong pai donga Topa’ sihna a lak na hi uh hi,” cih thu amaute’a ding gen zawh lohin manpha hi (1 Korintu 11:26).

            Eite in zong hih thute i mangngilh ngei loh ding ahi hi. Jesu’ hong itna, tua itna in a hong zol zawhna, cihte eite in i mangngilh loh ding ahi hi. Eite’a dinga hong kilangkhia Pasian’ hong itna a hong phawk sak dingin Khris in hi pawi hong phuang ahi hi. Khris lo in Pasian leh eite’ kikal ah kipawlna om thei lo hi. Unau (Khris sunga) khat-le-khat ki-itna leh kipawlna pen Jesu’ hong itna tawh a tawntunga a kimat khawm ding ahi hi. Khris’ hong itna pen Ama hong sihna lo ngal a dangin i lungsim hong bun zo lo ding hi. Ama (340,341) hong sihna hang bek mahin Ama hong kum kikna ding lungdam takin eite in i ngak thei hi. Ama hong kipum-piakna in eite’ lametna mungpi ahi hi. Tua tung bek mah ah eite in i upna i ngak ding ahi hi. DA, laimai 643-661. (341)

KHAWKPI 54
CINATE THUNGETSAKNA

            Lai Siangtho in, “Mite in thasial lo-a thu a nget tawntungna dingun,” ci hi (Luka 18:1). Mite in thunget kisam a kisak hun uh a om ngei leh tua hun pen a thakiam hun uh, a nuntakna uh a bei ding tawh a kibat hun ahi hi. Cidamte in ni khat khit ni khat, kum khat khit kum khat a ngah uh a lamdang hehpihnate phawk lo in, Pasian’ thuphate hangin Ama tungah phatna zong pia lo uh hi. A ci uh hong nat ciangin Pasian hong phawk pan uh hi. Mihing’ hatna teng a bei ciangin, Pasian’ huhna a kisaplam uh hong phawk pan uh hi. Lungsim takpi tawh Ama kiangah huhna a ngente’ kiang panin hong hehpih Pasian lehngat ngei lo hi. Cinat hun leh cidam hun ciangin Amah i bukna ahi hi.

            Leitung ah a om lai mah bangin tu-in zong Khris, hong hehpih thei Zatomang mah hi lai hi. Ama sungah natna khempeuh a damna ding zatui, zawngkhalna khempeuh tha a dim kiksak ding hatna om hi. Tanglai-a nungzuite mah bangin tu huna nungzuite in zong cinate thu a nget sak ding uh ahi hi. “Upna tawh thungetna in cinate dam sak ding” a hih manin, damna in zui ding hi. Pasian’ kamciamte hong ngahsak thei ding, upna-i khamuanna a hi Kha Siangtho vangliatna eite in i nei hi. “Cinate’ tungah amaute in a khut uh nga dinga, amaute in damna ngah ding uh hi,” (Marku 16:18) cih Topa’ kamciam pen Sawltakte’ hun lai mah bangin tu hunin zong muanhuai lai hi. Tua in Pasian’ tate’ hamphatna hi-a, tua tawh kisai khempeuh i upna in a let ding ahi hi. Khris’ nasemte pen Ama na sepna dinga a khutzat hi-a, amaute tung tawnin Amah in A vangliatna zangkhia nuam hi. I upna khut tawh Pasian’ kiangah cina lunate i puak ding pen i nasep ahi hi. Damsakpa a upna ding uh zong i hilh ding ahi hi. Cinate, lamet beite leh gentheite in Ama tha a muan ding uh i hansuah ding Honpa in deih hi.

Thungetna A Kingah Na’ng

            Ama thu i man ciang bek mahin Ama kamciamte i ngah thei ding hi. La phuakpa in, “Ka lung sungah (342) mawh nopna ka neih laiteng Topa in ka thu hong za lo ding hi,” ci hi. Psalm 66:18. Lungsim khen khat, phel khat bek tawh Ama thu i man leh zong, Ama kamciamte i ngah kei ding hi.

            Lai Siangtho sungah, cinate’ damna ding thungetna tuam mahmah tawh kisai hong kihilh hi. A hi zongin tua bang thungetna nei ding pen thupi mahmaha, lim taka ngaihsut photna lo tawh mawk hih ding hi lo hi. Cinate a damna ding thungetna tampite ah upna a kici pen, upna hi lo in upmawhna peuh hi zaw hi.

            Mi tampi in amau’ noptatna hangin natna ngah uh hi. Pianpih thukhamte, sianthona thu guipite tawh kituakin amaute nungta lo uh hi. Kimkhatte in a nekna, a dawnna, a kizepna uh leh a nasepna uah cidamna thukham zui lo uh hi. Lungsim leh pumpi a zawngkhalsak pen tatkhialh(siat)na hang hi den pen hi. Tua bang mite in cidamna thupha ngah mah le-uh zong, amaute tampi mah in leitung leh khalam thukhamte don lo in palsat veve ding uha, Pasian in a thungetnate uh za-in damna pia mah leh zong cidamna tawh kituak lo-a a gamtatnate uh a zom thei ding, kidekna om lo in a duh peuh uh a ne thei dingin hong kigen lai ding uh hi. Tua bang mite a damna dingin Pasian in na lamdang bawl mawk leh mawhna lam tha a pia suak ding hi.

            Cidamna tawh kituak lo a gamtatnate uh a paih khiat ding hilh lo-a, amaute a dammawhna uh a dam sak dingin Pasian a muang dinga mite hilhna in a mawkna nasep ahi hi. Amaute in thungetna pana Ama thupha a ngahna dingun a sia bawl nawn lo-a a pha bawl dingin a kisin ding uh ahi hi. A kiim a paam uh zong siangtho dinga, a gamtatna uh zong maan ding hi. Leitunglam leh khalam tawh kisai Pasian’ thukamte tawh kituaka a nuntak ding uh ahi hi.

            A cidamna ding uha thunget sakna a deihte’ kiangah, leitunglam a hi-a khalam a hi zongin Pasian’ thukhamte palsatna in mawhna a hihna leh, Ama thuphate a ngah theihna dingun tua mawhnate pulaakin nusiat kul a hihnate siang taka gen ding ahi hi. (342,343)

            Lai Siangtho in, “Khat-le-khat na khialhna uh kipulaak un la, na ci uh a damna dingin khat-le-khat’a ding thu kinget sak un,” ci-in hong sawl hi. James 5:16.

            Thungetna a deihte in a ngaihsut dingin hih bangin pau un; “Na lungsim leh na nuntakna sunga thusimte kong theihpih kei uh hi. Tuate nang leh Pasian bek in na thei uh hi. Na mawhnate na kisik leh, tuate na pulaak ding ahi hi.” Aituam (kuama theihpih loh) mawhnate pen Pasian leh mihing kikala palai khat bek a hi Khris kiangah pulaak ding ahi hi. “Mi khat peuh in mawhna a bawl khak leh, midik Jesu Khris a hi palai khat Pa’ kiangah, i nei hi.” 1 John 2:1. Mawhna a kici khempeuh Pasian’ tunga khialhna hi-a, Khris tungtawna Ama kianga pulaaka thuum ding ahi hi. A kilang mawhna khempeuh a kilang maha pulaak ding ahi hi. Mi tungah i khialh leh zong amau tawh kilemna i bawl ding ahi hi. Cidamna a deihmite in mi-gensiatna a neih uh leh, inn sung, khua sung, pawlpi sungah kilem lohna piangsakin, kipawl neihna, kithu tuah lohna a piansak uh leh, gamtat hoih lo khat peuh tawh mawhna sung midangte a tun sak uh leh, Pasian’ tung leh a khialh khaknate’ tung uah pulaaka a thuum ding uh ahi hi. “Eite in i mawhnate pulaakin i thuum leh i mawhnate hong mai saka, i dik lohna khempeuh pan hong siang sak dingin, Amah muanhuai-in thutang hi,” 1 John 1:9.

            Khialhnate a kibawl phat khit ciangin, cinate’ kisapnate, Ama Kha in hong makaihna bangin Topa’ tungah i gen ding hi. Amah in mi khempeuh a min ciat uh tawh thei hi. Leitung ah mi dang khat zong a om lo ding bang phialin mimal khat ciat Ama’n hong don hi. Amaute ciat’a dingin Amah in a it a Tapa hong pia hi. Pasian’ hong itna  lian mahmaha, kiam ngei lo a hih mah bangin, cinate in zong Amah muanga a lungkimna dingun hanthot ding ahi hi. Amau leh amau kilung hihmawh sakna in thazawmna leh natna piangsak hi. Lungkhamna leh dahna panin amaute hong thokhia le-uh, amaute cidam baih zaw ding hi; bang hang hiam cih leh “Ama hehpihna a lamen mite Topa’ mit in en hi.” Psalm 33:18. (343,344)

            Cinate’a ding thunget sakna ah “a kilawm bang thu i nget ding eite in i thei kei hi,” a cih pen i phawk ding kisam hi. Rom 8:26. I deih thupha pen ei’a dingin a hoih bel hi ding maw hi lo ding cih eite in i thei kei hi. Tua a hih manin i thungetna ah, “Topa aw, mihing sunga thusim khempeuh Nangma’n na thei hi. Hi mite’ thu Nangmah a thei pen na hi hi. Palai Jesu in amaute’a dingin a nuntakna pia hi. Kote’ it theih zah sangin Amah in amaute a itna lian zaw hi. Tua a hih ciangin nangma min thanna ding leh cinate’ noptuamna dingin, amaute a damna ding uh Jesu’ min tawh kong ngen uh hi. A dam ding uh Nangma deihna a hih kei mah leh zong, Na hehpihna in amaute hehnema, Na ompihna in amaute’ gimnate a noptuam sakna dingin kong thuum uh hi,” cih thute a kihel ding kilawm hi.

            Pasian in a kipatna pan a tawpna dong thei hi. Mi khempeuhte’ lungsim zong Ama’n thei hi. Mihing’ thusim khempeuh zong ama’n phawk hi. Cinate dam kik mah leh zong amaute’ tunga a tung thei ding haksatnate amaute in thuak zo ding maw thuak zo lo ding cih zong Ama’n thei hi. Nungta lai le-uh amaute leitung’a dingin thupha hi zaw maw samsiatna hi zaw cih zong Ama’n thei hi. Tua a hih manin lungsim takpi tawh thu i nget ciangin, “A hi zongin kei’ deihna bang hi lo in, Nangma deihna bang hi zaw ta hen,” i cih ding ahi hi. Luka 22;42. Gethsemane huan ah Jesu in zong, “Pa aw, a hih thei liai leh hi hai kei tawh hong kipelh sak in,” (Matthai 26:39) ci-a thu a nget lai-in hih kammalte mah tawh Pasian’ khut sungah na ki-ap hi. Pasian’ Tapa’a dingin hih kammalte kilawm a hih leh a khial thei leh a si thei mihingte’ zat dingin kilawm zawkan lai lo ding hiam!

            A hoih belin ci lehang na khempeuh a thei Pa Pasian tungah i deihna khempeuh i ap ding ahi hi. Tua ciangin muan takpina tawh na khempeuh ah Amah i muan ding ahi hi. Ama deihna tawh kituaka i nget leh i ngetnate Pasian in hong za cih i thei hi. A hi zongin ki-apna lungsim om lopi-a i deihna mawk nget teltal (344) pen maan lo hi; i thungetnate in paizia khat nei dinga, thupiakna (sawlna) bang hi lo in, thuumnadan hi zaw ding hi.

            Natna a damna dingin Pasian in Ama vangliatna mahmah tawh a sepna mun om thei hi. Cina khempeuh tua bang a kidam sak hi khin sam lo hi. Mi tampi mah Jesu’ sungah ki-ihmusak hi. “tu-a kipanin Topa’ sunga a si misite a hampha ahi hi. Hi hi, amaute a gimna uh pan a tawlnga thei ding uh hi-a, a gamtatnate un amau’ nung zui ding hi ci-in Kha Siangtho in gen hi,” (Mang 14:13) ci-a a gelh ding Patmos tuikulha John kisawl hi. Cinate in damna a ngah kei uh leh zong, upna a neih loh man uh hi ci-a i mawh sak ding a hih lohna hi thu panin i mu thei hi.

            I thungetnate hong kipia pah lianlian leh i deihtek hi. Hong kipiak pak loh ciang a hi-a, i lamet bang lopi-a hong pian ciang a hi zongin eite i lungkia thei hi. I thungetna a hun lian leh i deihna bang liana a hong pia dingin Pasian pen pil lua-in dik lua hi. Ei’ deih bang vive sangin ei’a dinga a hoih pen dingin Ama’n hong pia ding hi. Ama ciimna leh itnate muanhuai a hih manin, ei’ deihna hong zui dingin Amah i sawl ding hi lo-a, Ama deihna banga a hong sep khiat dingin i nget ding hi zaw hi. Ei’ deihna leh ei’ kinnate pen Ama deihna bangbang i hih sak ding kisam hi. I upna hong kizia-etnate pen ei’ phattuamna ding hi zaw hi. I upna pen Pasian’ Thu tung bek ah a kinga, a kip a kho mah hiam, a hih kei leh thupiang khat peuh tawh kizui-a a kikhel suk a kikhel to hiam cih tuate in kilangkhia sak hi. Upna pen zat khiatna tawh thahat hi. Topa a ngakte’a dingin Lai Siangtho sungah kamciam manpha om a hih lam phawkin, thuak zawhna (lunduaina) i nei ding hi.

            Hi thute mi khempeuh in thei lo uh hi. Topa’ dam sakna a ngen mi tampi in, a thungetnate uh kipia pah lianlian dinga, tua bang a hih kei leh upna a gina lo hi ding hi ci-in ngaihsun uh hi. Hi thu hangin natna tawh a zawngkhal mite, khen tel siamna tawh a gamtat theihna dingun, hoih taka hilh ding kisam hi. Amaute a huh nuam a lawmte uh’ tunga a tavuan uh amaute in awlmawh (344,345) lo-a a om loh ding uh ahi hi. A dam kik theihna dingun Pasian’ zatuite zong zang lo-a a om ding uh hi lo hi.

            Hih mun ah a kikhial thei a lauhuai khat om hi. Thungetna tawh dam ding ci-in um uh a hih manin, upna nei lo hi cih a kilangsak thei ding na khat peuhpeuh a hih ding uh lau uh hi. Sihna tawh mual a khum thei dinga a kilamet uh leh amaute in a hih ding banga a deihna uh bangin a vaite uh hawmsa dimdiama a neih ding uh a awlmawh loh ding uh hi lo hi. Kikhen hun cianga a it a ngaihte uh’ tunga a gen nop teng uh, hilhna a hi-a hansuahna a hi zongin a gen khiat ding uh lau kei uh hen.

            Thungetna tawh cidamna ding a hanciamte in zatuizaha a ngah theih bangbang uh a zat ding uh a awlmawh loh ding uh hi lo hi. A na valval a damna ding leh dam sak kikna a huh dingin Pasian’ bawlsa dam theinate zatna in upna lang panna hi lo hi. Pasian tawh sep khopna, amau mahmah zong dam kikna ding a hoih bel muna kikoihna in upna langpanna hi lo hi. Nuntakna thukhamte i theihtheihna ding ciangah Pasian in tuate koih hi. Tua theihthiehnate i zat ding mahin ei’ bat phak dingin kikoih hi. Eite in cidam kikna dingin zat theih khempeuh zanga, hamphatna khempeuh la-a, pianpih thukhamte tawh kituaka i sep ding ahi hi. Cinate a damna dingin thu i nget ciangin, i hanciam theih zahin hanciama, Amah tawh semkhawm thei i hih manin Pasian’ tungah lungdamna ko-in, Ama bawlsa zatuite tungah Ama thupha i nget ding ahi hi.           

            Dam theihna zatuite zat ding a hihna Pasian’ Thu in hong lak hi. Israel kumpipa Hezekiah a ci na-a, Pasian’ kamsang khat in amah si ding a hihna thu va gen hi. Amah in Topa’ tungah thu ngen hi. Topa in Ama nasempa’ thungetna sang hi. A nuntakna kum sawm leh kum nga khan sak ding a hihna thu za sak hi. Pasian’ kiang pana kammal khat in Hezekiah dam pah sak thei hi. A hih hangin, “Thei gah gawi zansa lom khat la-in, a meima a tuam a leh amah dam ding hi.” (Isiah 38:21) ci-in kihilh hi. (345,346)

            Cinate a damna ding thu i nget ciangin, bangbang hong piang ta leh Pasian i upna i kiamsak ding hi lo hi. Dahna a hong tun mah leh zong Pa Pasian in i kama a hong tulh a hih lam phawkin, tua hai khaa i dawn ding ahi hi. A hih kei-a damna hong pian mah leh zong hehpihna tawh dam sakna a ngah mi in Piangsakpa tawh kiciamna thak nuai ah a om a hih lam a mangngilh loh ding kisam hi. Miphak sawm a kidam sak ciangin, khat hong ciah kikin Jesu hong pahtawi hi. Pasian’ hehpihna in a lungsim uh a suk khak loh ngaihsutna nei lo miphak kuate bangin eite khat zong om kei ni. “A hoih a kicing thupha khempeuh kilamdanna a nei lo, a liim zong a kihei lo khuavakte’ Pa’ kiang pana hong pai ahi hi.” James 1:17. MH, laimai 225-233. (346)

KHAWKPI 55
ZATUI LAM TAWH NASEPNA

            Zatui lam tawh thupha puak nasepna in a madawk gospel nasepna hi-a, tua in inn tampite ah tulai’a ding thumaan a lut theihna ding kongvang ahi hi. Pasian’ mite pen zatui lam tawh thupha-puakte hi ding hi; kha leh pumpi’ kisapnate a huh thei dingin kisin ding uh hi. Sep khiatna pana a ngah uh pilna leh theihna tawh cinate a bawl dam dinga amaute a pai uh ciangin, i nasemte in huaiham lohna taktak a lah khiat ding uh ahi hi. Tua banga inn khat khit inn khat a pai uh ciangin, lungsim tampi zawh zawhna ngah ding uh hi. Lampi dang tawh gospel thupuak a za ngei lo ding mi tampite tua bangin kiphazo ding hi. Cidamnalam kipuahphatna thu guipite in gospel nasepna a hong khaktan tampite hemkhia thei ding hi. Tulai’a ding thumaan tua banga a kizel sak nuam mi khempeuhte, zatui lam tawh thuphapuak nasepna a phuangkhia pa, Zato Mangpa in thupha pia ding hi.

            Pumpi dam sakna pen gospel cialpi tawh kizom hi. A nungzuite thupha-puak dinga a kuan khiat sak masak penna ah Khris in, “Na pai uh ciangin, Vantung Gam hong nai zo hi, ci-in hilh un. Cinate dam sak un, miphakte siang sak un, misite tho sak un, dawite hawlkhia un; a khonga na ngah uh a khong mahin pia un,” ci-in sawl hi. Matthai 10:7,8.

            Pasian’ hong cialna pen puahphat ding om lo hi. Thumaan genkhiatna ah Khris’ sepdan kibawl pha thei tuan lo hi. Honpa in a nungzuite, sep khiatna tawh thu hilhna, thumaan sungah mite a lungdamna dingin bangci sep ding cih zong hilh hi. Amah in a gim a tawlte, vangik a lelte leh, bawlsiatna a thuakte hehpih hi. Gilkialte an vaakin, cinate dam sak hi. A pha bawlin vak kawikawi hi. A pha nate a sepna tawh, itna kammalte leh migi-gamtatnate tawh, mite’ kiangah Amah in gospel thu hilh hi.

            Mihing’a ding Khris’ nasepna kizo nai lo hi. Tua mah bangin Ama sawltak palaite in zong gospel thu a hilh ding uh, a mangthang a kisia ding mite’ kiangah (347) Ama itna a lah khiat ding uh ahi hi. Huhna a kisam mite angsung khual lo-a a donna uh tawh amaute in gospel thumaan a lakkhia ding uh ahi hi. Hi nasepna ah thuhilhna bek sanga a tam zaw kihel hi. Leitung buppi ah thupha-puak ding pen Ama min tawh a kuankhia mite’ nasep dinga Pasian in a piak ahi hi. Amaute Khris tawh nasem-khawm hi ding, a sia ding mite’ kiangah Ama hehpih-itna a lak ding ahi hi. Pasian in Ama na a seem dingin mi tul tampi hong cial hi. Tu hun’a ding thumaan a theite’ kiangah thu a hilh dingin hong cial lo hi. Hehpihna thupuak nunung a za nai lote a thuhilh dingin hong cial hi. Khate ngah nopna lungsim taktak tawh nasem un. Zatui lam tawh thupha-puak nasep sem un. Tua hi leh mite’ lungsim na la zo ding uha, thumaan tangkona dingin lampi hong kihong zaw ding hi. CH, laimai 497-499.

Dammawh Khoina Innte Lam Ding

            Zatui lam tawh gospel thupha-puakna sep ding a kisapna mun tampi om hi. Tua munte ah innte lam un. I dammawh khoina innte pen seiniam seisang, a zawng a hau a kiphak theihna dinga Pasian’ geel ahi hi. Leitung mite’a ding Pasian’ thupuak a kilung hihmawh theina dingin tua bang dammawh khoina munte ah sepna tawh lah khiat ding ahi hi. CH, laimai 501.

            Pumpi’a ding leh kha’a ding nasepna pen a kizom ahi hi. Vantung Zato-mangpa’ vangliatna a muan theihna dingun gimna a thuak mite i makai ding ahi hi. Natna a bawl dam ding mite in Khris’ hehpihna zong ngen ding uh hi. Tua in cinate’ lungsim sungah upna guan ding hi. Lamet bei banga om mite in zong amau’ thuakna hangin khanlawhna hong ngah ding uh hi.

            Tua ding maha i dammawh khoina innte a kilam ahi hi. Tua munte panin, lamet bei-a omte in, a natna uh a damna ding a kibawlsak kawmun upna tawh thu-nget-sakna panin tha hong ngah kik ding uh hi. Pumpi leh khalam a maana nuntakdan ding zong tua munte panin hilh ding ahi hi. Tua banga nasepna tawh mi tampite hong piang thak ding uh hi. I dammawh khoina (347,348) innte-a a sem zatote in kha damsakna gospel thu zong siang takin a hilh ding uh ahi hi. MM, laimai 248.

           

Gospel Madawk Nasepna

            Gam khat peuh ah a pai dingin hong kisawla, tua gam ah gamtat hoihna i tawisan nop leh, a zongsatnate uh i puahphat masak ding ahi hi. CH, laimai 505.

            Zatui lam tawh thupha-puakna in natna pana suahtakna thupha (gospel) mite’ kiangah tung sak hi. Tua in gospel madawk nasepna ahi hi. Tua in sepkhiat gospel ahi hi. Khris’ hehpihna a kilatkhiatna zong hi lai hi. Tua banga sep ding phamawh mahmaha, leitung zong tua nasepna dingin kihongsa-in om hi. Zatui lam tawh thupha-puak nasepna a thupina i theih ding Pasian in deih hi. Tua nasepna tawh mun thak ah na kisem thei pah ding hi. Tua hi leh Pasian’ nasepna zong Topa’ sepdan bang mah hong hi ding hi; cinate in damna ngah dinga, mizawng mi-gentheite in noptuamna ngah ding uh hi. MM, laimai 329.

            Langpanna tampi na tuak ding hi. A maan lopi-a lawpna leh a maan lo biakna kinna zong na tuak ding hi. A hi zongin khual-le-tual ah na upmawh zah sanga thumaan hong sang thei ding mi a tam zaw Pasian in a bawl kholhna na mu ding hi. Amaute in Pasian’ thumaan a zak uh ciangin lungdam takin hong sang ding uh hi. CH, laimai 502.

            Pumpi leh khut a kizop mah bangin, zatui lam tawh thupha puakna in Pasian’ nasepna buppi tawh a kizom a hihna, gentehna dang tawh kei hong kilak ngei lo hi. Gospel nasepna in thumaan tangkona hi-a, cidamna leh cinate’a dinga nasepna ahi hi. Tua in pumpi hi-a, zatui lam tawh thupha-puakna in khut hi-in, Khris in a lutang ahi hi. Hi bangin ka kiangah hong kilak hi.

            Na khut sunga a om bangbang tawh zatui lam tawh thupha-puakna a sem dingin kipan pah in. Tua banga na hihna tawh Lai Siangtho sin khop theihna ding lampi hong kihong ding hi. A dammawhte uh a bawldan ding a thei nuam mite tawh na kizop theihna ding mun (348,349) ah Pasian in hong koih ding hi. Natna a damna ding na theih sunsun zangkhia pah in. Tua bangin natna hong nuam tuam dinga, a gilkial mite’a dingin nuntakna khomun hawm theihna ding hunpha na ngah ding hi. MM, laimai 237, 239.

Vekpi-in Kipawlin Sem Ding

            Gospel nasemte zong zatui lam tawh thupha-puak nasepna ah kihel ding uh hi. Tua pen thumaan langpanna dinga leitunga a om kideidanna kawm a phelkhia ding nasepna a hih lam kei hong kilak ngei hi.

            Gospel nasemte in natna bawl damna dingdan thei hi le-uh a nasepna uh a zah nihin zawhna ngah ding uh hi.

            Mite a panmun uh, a omzia uh bangbang hi ta se leh huh theihna lamlama amaute huhna in gospel nasepna ahi hi. Cinate’ inn ah thuhilhsiate va pai-a, “Hong huh dinga hong pai hi’ng, ka hih thei zahin hong huh ding hi’ng. Zato bel hi ke’ng. Thuhilhsia hi’ng. Cinate leh dammawhte a huh nuam hi’ng,” cih ding kisam kha ding hi. Pumpi cinate pen kha cina zong hi thei dena, kha a cinat ciangin pumpi zong cina hi.

            Thuhilh nasep leh zatui lam nasepte khen ding hi lo hi. Zatote in thuhilhsiate tawh a kibangin na sem ding hi. Pumpi cidamna ding a hanciam zah mahun, kha in hotkhiatna a ngahna ding zong a hanciam thei zah uha a hancaim ding uh ahi hi. Lungsim leh pumpi’ zato dinga khangnote pattah ding a hoihna a thei lo mite in, cina bawla a hun uh a beisak zatui lam tawh thuphapuakte panpihna dingin kaih zat ding hi lo hi, ci uh hi. Tua bang a ci-te’ kiangah, thumaan a omzia a thei thei lo ding zahin lungsim toi sak luat ding hi lo hi, a ci dingin kei hong kihilh hi. Pumpi natnate a bawl dam thei, zatui lam tawh thupha a puak gospel nasemte in, tua banga a sem thei lote sangin kimanna nei zaw tham ding uh hi. Gospel nasem a hihna tawh ama nasepna picing zaw tham ding hi. (349,350)

            Midangte a lut theih lohna khuapite ah pilna nei zatote lut thei ding a hihna Topa in gen hi. Cidamnalam kipuahphatna thu hilh un. Tua in mite’ tungah huzap nei ding hi.

            A navak zatote in Lai Siangtho thu guipite a gen uh pen mi tampi in sang thei zaw pah uh hi. Zato nasepna leh gospel nasepna a thuah khawm theite in a nasepna uah nakpi-in mainawt ding uh hi. Ama nasepna a hoih a hihna ama sepna mah in lak a hih lam mite in hong khen tel thei uh hi.

            I zatote in tua banga a sep ding uh ahi hi. Amaute in thuhilhsia sema, Topa Jesu in kha bangci dam sak cih thu a hilh uh ciangin Topa’ nasep a sem uh ahi hi. Zato khempeuh in, cinate’a ding upna tawh thunget sakdan ding, zatui piakdan ding cihte a theih ding uh kisam hi. Tua kawm mahin thuhilhsiate bangin na sem dinga, kisikna leh pianthakna, kha leh pumpi hotkhiatna thu hilh ding hi. Tua banga a sepna in asiamna khangsak dinga, a min zong thang sak ding hi. MM, laimai 237-247.

Thumaan Lutna Ding Kongkhakte Hong

            Natkhoite (nurse) in a sep ding uh nasep nam tampi om hi. Innte ah va hawha thumaan zak nopna a piansak theina dingin kongte kihong hi. Biaknalam kikhopna khat beek ah a pai ngei lo mi tampi khua khempeuh ah om hi. Amaute in gospel thu za le-uh a lung sung uah lut thei ding hi. Pumpi cidamsakna pen amaute a kiphak theihna ding lampi khat bek zong hi thei hi. Natkhoite in cinate dona, mizawngte’ lungkhamna a nop tuam sak uh ciangin, amaute in tuate tawh thunget khop ding, Pasian’ thu sim piha Honpa’ thu genpih ding hun pha tampi ngah thei ding uh hi. Zia-le-tong a susia lunggulhnate uk nuam napi-a a uk zo lo a cimawh mite tawh amau’a ding thu ngen khawm thei ding uh hi. A guallel, a lungkia mite’ nuntakna ah lametna ni tang sak thei ding uh hi. Amaute in angsung khual lo itna, migit gamtatna tawh a kilat khiat sak uh leh, dammawhte in Khris itna a up ding uh tua in baih sak tuam ding hi. (350)

            Lungsim navaka, siamna zong nei ngel hi napi-in, zia-le-tong siatna thukpi sungah a kia mite amau’ om mun panin hoih takin na kisem leh a kihonkhia kik thei ding mite, zatui lam nasepna tawh kimukhia ding a hihna kei hong kilak ngei hi. Hehpih taka amaute kidon-a, amau’ kitangsapnate a kihuh khit ciangin, thumaan thutak Jesu’ sunga a om bangbang pen mihing’ lungsim sungah a kiguang thei ding ahi hi. Tua bang mite’a dinga na a sem mite tawh Kha Siangtho in na semkhawm hi. Suangpi tunga biakna lam thu-upna a kingak ding hoih a sa mahmah zong hong om ding hi.

            I pumpi a lut theina dingin i taklam khut in kongte hong hi. Zatui lam tawh Pasian’ nasepna pen tua ding ahi hi. Tu hun’a ding thumaan a kisaan theihna dingin tua in lampi golpi-in na ziik ding hi. Khut om lo pumpi a kimanna om lo hi. Pumpi a kipahtawi ciangin khut zong pahtawi ding ahi hi. Bang hang hiam cih leh khut om lo pumpi a kimanna a om lo zaha a thupi nate ahi hi. Tua a hih manin a taklam khut sim-mawh-bawla a zang lo pumpi in bangmah zong sem lo pah ding hi.

            Gospel bang nuntakna, gospel thu guipite tawh kituaka omna in, nuntakna a limna ahi hi. Gospel bek a hilh mi’a dinga a kikhak kongte pen zatui lam tawh thupha puakte’a dingin kihong ding hi. Pumpi gimnate noptuam sakna panin Pasian in lungsimte lawng hi. Lungsim sunga thumaan khaici tang khat a kia pen Pasian in tui buak hi. Tua khaici hong po khiat masiah lungduai taka ngak kul kha ding hi. A hi zongin hong po khiat ngawngaw ciangin tawntung nuntakna ding dong gah hong gahkhia hi. MM, laimai 238-247. (350,351)

KHAWKPI 56

PAWL DANGTE TAWH KIZOPNA

            Leitung tawh kipawlna nei peuhmah lo ding i hiam cih dotna om thei hi. Topa’ Thu i zuih ding ahi hi. Thu-um lote tawh a kibangin hong kimu ding a hih manin amaute tawh kizopna khat peuh i neih ding thu in hong kham hi. Amaute’ lak pan paikhia-a a tuama i om ding ahi hi. Amaute’ nasepna ah zong eite i va kihel ding hi lo hi. A hi zongin mun danga tuamteen ding cihna hi lo hi. I hih theih ding a hoih khempeuh bel i hih ding mah ahi hi.             

            Hih thu tawh kisai-in Khris in lim khat hong lak hi. Siahdongte leh mawhneite tawh an nekhawm dinga a kisap ciangin Ama’n nial lo hi. Amaute’ laka kihelna lo ngal tawh tua bang mite kipha thei lo ding hi. A hih theih nak leh amaute’ lungsim a lawpsak ding a tawntung tawh kisai thute genpih den hi. Eite’ tungah zong, “Mite in na gamtatna hoihte uh mu-a vana a om na Pa uh a phat theihna dingun, mite’ mai ah na khuavak uh tang sak un,” hong ci hi. Matthai 5:16. GW, laimai 394.

            Pasiang tawh amaute a kizop theihna ding uh ngaimna i neiha, amau’ huzap a nang zo dingin khalam hatna i neih nak leh thu-um lote tawh kikholhna in eite’ tungah siatna hong tung lo ding hi.

            Leitung a honkhia ding leh a puksa mite Pasian tawh hong kizom kiksak dingin Khris hong pai hi. Khris’ nungzuite in khua a vak sak meivakte hi ding hi. Pasian tawh kiho denin, khuamialna leh khialhna sunga a om mite tungah vantung pana a ngah uh thuphate puak sawn ding uh hi. Ama hun lai-a a om mawhnate tawh Enok buah baang lo hi. Ei zong tu-in bang buahbaang tuan ding i hiam? A hi zongin eite in i Topa mah bangin a genthei mihingte hehpihin, a kamsiate khualin, a cimawh, a lungkham a lungkia mite’ kitangsapnate i huh ding ahi hi. 5 T, laimai 113.

            Thumna vantungmi’ thupuak ei’a dingin thupi mahmah a hihna leh, Sabbath tanna in Pasian a biate leh (352) a bia lote a kilamdang sak lim khat a hihna thute, ute naute in na telna dingun thu ka ngen hi. A lusute leh khuaphawk lote khanglo ta uh hen.

            A siangtho dingin eite hong kisam hi. I upna a tumdangte i let leh i let loh a thupi khol lo bang khata i dawk khak sak ding i kidop mahmah ding ahi hi. A beisa hun sangin tu-in thumaan leh diktatna ah kician taka i din ding a thupi mahmah tavuan ei’ tungah hong kinga hi. Pasian’ thupiakte a zuite leh a zui lote kikal ah kikhenna kigi kician takin kikhung ding hi. Lungsim takpi tawh Pasian i pahtawi ding hi. Nakpi-a zia-etna a thuak ding mite’a dinga a phamawh mahmah thupha a hi Ama thuphate i ngah theina dingin, Amah tawh thuciamna i kip sak theihna ding i hanciam thei zahin i hanciam ding hi.

            I upna, i biakna in i nuntakna sungah thu a nei zo lo bang khata i dawk sakna in Pasian simmawhna lian mahmah khat ahi hi. Tua bangin eite in i nuntakna a hi Ama thupiakte pan-a lam a pial i hi-a, Amah ei’ Pasian hi kei, eite Ama mi hikhang, cih a nial, i hi hi. 7 T, laimai 108.

Pawl Dangte’ Kianga Thugenna

            Pawl dangte’ kiangah thugen hun na ngahkha thei ding hi. Tua bang hunte na zat siamna dingin Honpa in, “Note gul bangin pil un la, vakhu bangin migi un,” hong cih kammalte phawk un. Gensiatna kamte pau-in galpa’ hehna phawng kha kei in. Tua bangin hihkha lecin thumaan a lutna ding kong a khak na hi ding hi. A kician sinsen thute gen in. Lang panna a piangsak ding thute gen kei in. Hot khiat ding kha (mi) tampi om hi. Kam khauh pipi pau kei in. Kampauna leh gamtatna ah hotkhiatna thu kidawk sak in la, na kihopih mi khempeuh tungah Khris lak in. Mi khempeuh tungah nopna leh kilemna gospel a hilh dinga kigin kholhna khedap a bulh na hih lam mi khempeuh musak in. Khris’ Kha tawh kituama na sem dinga i kuan nak leh a lamdang pipi hong piang i mu ding hi. Diktatna, hehpihna leh itna tawh na sema i kuan nak leh i kitangsapnate ah (352,353) huhna hong pai ding hi. Thumaan gual zo dinga, zawhna ngah suak ding hi. Ev, laimai 563,564.

            Pawl dang siate’a ding nasep ding i nei hi. Amaute’n zong hotkhiatna a ngah ding uh Pasian in deih hi. Eite mah bangin amaute in zong upna leh thumanna pan bekin sih theih lohna a ngah ding uh ahi hi. Tua pen a ngahna dingun amaute’a ding nakpi-in i sep kul hi. Tu hun’a ding nasep thupi sungah amaute a kihel ding uh Pasian in deih hi. Ama innkuan sungah a hunhuna an a pia ding mite’ lakah amaute a kihel ding uh deih hi. Bang hangin hih nasepna sungah amaute kihel lo ding hiam? Pawl dang siate’ kiang nai ah ei’ siate a pai dingin a hanciam ding uh ahi hi. Tua mite tawh amaute’a ding thu ngen khawm un. Amaute’a ding Khris in palai sem hi. Sep ding thupi mahmah amaute in nei uh hi. Khris’ kamtaite i hih mah bangin hih tuucingte deihsakna taktak i lah khiat ding ahi hi. 6 T, laimai 77, 78.

            I siate in pawl dang siate’a ding na sepna pen amau’ nasep tuam mahmah a hih sak ding uh ahi hi. Amaute tawh thu a kisel ding uh hi lo hi. Lai Siangtho bu tawi-in Pasian’ Thu a sim dingin amaute hanthawn uh hen. Tua bangin kihih leh tu-a thukhial a hilh sia tampite in tu hun’a ding thumaan hong hilh ding uh hi. Ev, laimai 562. (353)

KHAWKPI 57

GAM UKTE LEH THUKHAM TAWH I KIZOPNA

            Thu-umte in gam ukte’ thu bangci saan ding cih sawltakpa in tel takin hong hilh hi: “Topa’ min tawh mihing’ thuneihna khempeuh na mang un. A lian bel kumpipa’ thu a hi zongin, mangte’ thu a hi zongin, siatna a bawlte a gawt ding leh a pha-a gamtate a pahtawi dinga a kisawlte’ thu a hi zongin na mang un. Tua in Pasian’ deihna ahi hi. A pha-a gamtatna tawh mihaite’ haina na daai sak thei ding uh hi. Suahtakna a ngahte na hih uh hangin, a hoih lote seelna dingin na suahtakna uh zang kei un la, Pasian’ nasemte bangin gamta un. Mi khempeuh pahtawi un. Ute naute it un. Pasian zahtak un. Kumpipa pahtawi un.” 1 Peter 2:13-17. AA, laimai 522.

            Hong uk dingin i tungah mi kikoih hi. Mite ukna ding thukhamte zong om hi. Tua thukhamte om hi kei leh leitung mite pen tu-a sangin sia zaw ding hi. Tua thukhamte kim khat a hoih hangin kim khat hoih lo hi. A hoih lo lam hong tam semsem a hih manin haksatna sung i tung lai ding hi. A hi zongin Pasian in A mite a kip ding leh Ama Thu banga a nungta dingin tha pia ding hi. 1 T, laimai 201.

            Pasian in a awpi tawh Sinai mual pana a gen khiat, a nung cianga A khutme tawh suang tunga a gelh a sang zaw thukham tawh a kido kei nak leh i gama thukham khempeuh i zuih ding a hihna kei hong kilak hi. “Amaute’ lungsim sungah Ka thukhamte ka guang dinga, a lungtang uah Ka gelh ding hi. Amau’a dingin Pasian Ka hi dinga, amaute Kei’a dingin mipawl khat hi ding hi.” A lung sung uha Pasian’ thukham a kigelhte in mihing’ thu sangin Pasian’ thu hong mang zaw ding uh hi. Pasian’ thupiakna pana thu neuno khat peuh ah lam a pial sangin mi khempeuhte’ thu hong mang lo zaw pah ding hi. Thumaan tawh a kithuhilh, Pasian’ kammal banga a nungta dinga a kimakaih Pasian’ mite in, a lung sung uha a kigelh Pasian’ thukham pen mah a zuih a man ding uh thu bulpi hi ci-in len ding uh hi. Pasian’ thukham’ thuneihna leh ciimna a tungnung bel ahi hi. 1 T, laimai 361. (354)

            Jesu’ khan lai-a kumpipen hoih lo in gilo hi. Mun khempeuh ah kizawhthawh bawlna, kikhelbawlna leh ngongtatnate hanga kahna om kawikawi hi. A hi zongin Honpa in ki-ukna puahphat ding hanciam lo hi. Minam kigawinate do lo-in, minam galte zong mawh sak tuak lo hi. Thuneite’ vaihawmna leh nasepnate va subuai se lo hi. I etteh ding Pa pen leitung kumpite’ kiang panin kaang takin om hi. Amah in mite’ gimna a awlmawh lo hi lo hi. Tuate mihing lellel in a puathama bawlphatna tawh piang zo lo hi. Tuate bawl phatna ding pen mihing’ sung pan, lungtang thak suahna pan piang thei bek hi. DA, laimai 509.

            Thukham vai leh gam vaite a khen sat dingin Jesu kidong thei zel hi. A hih hangin Jesu in leitung thute buaipih nawn lo hi. Hi leitung ah khalam kumpi gam a phut dingin Khris hong ding hi. Diktatna kumpi gam a phut dinga hih leitung ah Amah hong pai ahi hi. Ama thuhilhnate in Ama gam ki-ukna a hoih sak leh a siangthosak thu guipite hong lak hi. Yahweh’ gam sunga ki-ukna pen thutang, hehpihna leh ki-itna a hih lam Ama’n hong lak hi. 9 T, laimai 218.

            Thukante Ama kiang pai hi. A citak kineihin a sep ding uh a thei nuam takpi bang keekin, “Siapa aw, Nangmah in kuama maitang zahtak lo in maan takin thu genin, Pasian’ thute tang takin hilh na hih lam ka thei uh hi. Kaisar tungah siah ka piak ding uh hoih hiam hoih lo hiam? ci uh hi.

            Khris in a hi nemnum khawngin na dawng lo hi. Siang tak mahin na dawng hi. Roma dangka tang a khut sungah tawi hi. Tua dangka tang tungah Kaisar’ lim leh minte tuang hi. Roma kumpi khut nuai ah a om uh a hih mah bangin, a sang zaw thuneipa’ thu tawh a kilehbulh loh laiteng, amau a ukte in a nget peuhpeuh a piak ding uh a hihna Jesu in gen hi.

            Pharisaite in Khris’ dawn kikna a zak uh ciangin, “lamdangsa-in, Amah nusia-in a paikhia uh hi.” Amaute’ simtatna leh upmawh geelnate Ama’n taai hi. Gam uk kumpite’ tunga a tavuan ciang uh leh Pasian’ (354,355) tunga a tavuan uh kician taka a khen thu guipi amaute a lak ahi hi. DA, laimai 601-603.

Kiciamna

            Kiciamna  tawh kisai-in Pasian’ mi kimkhatte khial uh a hih lam ka mu hi. Satan in tua pen noptaksa-in amaute bawlsia paha, amaute’ tung panin Topa’ sumte lak khiat sak hi. Topa in, “Na kiciam peuhmah kei un,” a cih ciangin zuma kiciamna a gen a hih loh lam ka mu hi. “Note na kihona uh, a hi lote, hi lo; a hite, hi, cih hi sak un. Tua sanga a kaan zawk leh gilopa’ kiang pana hong pai ahi hi.” Matthai 5:34, 37. Hih in pauna khempeuh kawk hi. Kimkhatte a pau uh ciangin uang thei hi. Kimkhatte a nungta takpi bang keekin a nuntakna uh tawh kiciam uha, kimkhatte lutang a nei takpi bang keekin a lutang uh tawh kiciam uh hi. Kimkhatte in a thugen uh a panpih dingin van leh lei cial uh hi. Kimkhatte in a thugen uh a maan kei leh amaute a that dingin Pasian lamen uh hi. Jesu in a nungzuite a khaam pen hih kiciamna mawkmawkte (tom-lawhnate) ahi hi.

            Topa in gam thukhamte zong zatin nei a hih lam ka mu hi. Mun siangtho sungah Jesu a om lai takin, Pasian’ Kha in gam ukte leh mite len cip hi. A hi zongin Satan in leitung mi a tam zawtham mah nauk zo-a, gam thukham om hi kei leh eite in gimna i thuak mahmah ding hi. A phamawh takpi a hia, amaute a maan lama teci pang dinga a kisam a hih leh, amaute’ thugen-in zuau kihel peuhmah lo-a a maan a hih lam teci dingin zahtak takin Pasian’ tate in Pasian a laak uh leh, tua in Pasian’ Thu palsatna hi lo hi.

            Kiciamna tawh kip taka teci pang thei leitung ah mi khat peuh a om leh, tua mi in Khristian hi cih ka mu hi. Amah Pasian’ vaangtaang sungah a nungta ahi hi. Pasian’ thahatna sungah amah khang to hi. Thukham tawh khen sat ding a thupi thute hong om ciangin, Khristain zaha Pasian’ tungah a thuum thei kuamah dang om lo hi. Pasian zong Amah leh Amah kiciamna-in kizang a hih lam ka phawk ding  vantungmi in hong sawl hi. 1 T, laimai 201-203. (355,356)

Politik Vai Lung Hihmawhna

            I pawlpi sung leh i sangte ah Lai Siangtho a hilhte in politik nasemte panpihna a hi-a langpanna a hi zongin a kilangtakin a kihel theihna ding thu om lo hi. Tua banga a hihna uh tawh amaute in midangte’ lungsim a hansuah uh suaka, mi khempeuh amau’ hoih sak bang ciat a gen dinga a makai suak hi. Tulai thumaan ka um hi a ci mite lakah amau’ hoih sak politik vaite a gengen hong om dinga, tuate in pawlpi sungah kikhenna hong piangsak ding uh hi.

            Politik vai khempeuh A mite in a phum cip ding Topa in deih hi. Hih thute ah paupau loh ding a hoih pen ahi hi. Pasian’ thu sunga siang taka hong kilak gospel thu guipi ah A nungzuite kipumkhata a om ding uh Khris in deih hi. Politik party-te lung muang taka me (vote) piak theih om lo hi; bang hang hiam cih leh me i piak kua hiam cih eite in i thei kei hi. Politik vaihawmna khat peuh ah lungmuang takin i kihel thei kei ding hi.

            Khritian taktak a hite, lenggui hiang hi ding uha, lenggui mah bangin a gah gah ding uh hi. Amaute in kituak takin, Khristian kipawlna sungah gamta ding uh hi. Amaute in politik awmsuante suang lo dinga, Khris’ awmsuan bek suang ding uh hi.

            Tua a hih leh bang cih ding i hiam? Politik vaite tua ci’n om sak un.

            Hahsiang ding lenggah lo zapi tak khat om hi. Khristiante in thu-um lote’ lakah na a sep lai takun, leitung mite banga amaute a om ding uh hi lo hi. Amaute in a  hunte uh politik thugenna, politik nasepna khawnga a zat ding uh hi lo hi. Tua banga a hihna uh tawh amaute in ki-elna leh kithutuah lohna a bawl dinga galpa hunpha a pia uh ahi hi.

            Pasian’ tate politik pana a tuam om ding uh ahi hi. Politik kidemna ah kihel kei un. Leitung panin tuam om un. Kitotna leh buaina a piangsak thei ding thute pawlpi sung leh sang sungah tumpih kei un. Ki-elna in gu (356) khapi hi-a, angsung khual mite in pumpi sunga a thun uh gu ahi hi. GW, laimai 391-395.

           

Tuak Peuh Pauna Lauhaui

            Pasian’ thukham tawh kilehbulh lo-a a hih theih laiteng na khempueh ah kumpi thukham tawh kituaka a gamtat ding uh mite hilh un. 9 T, laimai 238.

            I sanggam kimkhatte in gam ukna leh thukham dona a kilangsak thu tampi tak gelhin genkhia uh hi. Tua banga ei leh ei kitel khialh theihna ding muna i om pen khialhna ahi hi. Gam ukte’ nasepna mawh zon den keei pen a hoih hi lo hi. Mimal khat peuh kipawlna khat peuh do ding ei’ nasep hi lo hi. Gam ukte a do den keei-a hong kimuh lohna dingin i kidop mahmah ding kisam hi. I nasep pen gal dona takpi hi mah hi, a hi zongin i galvante pen “Topa in a ci hi” cih ahi hi. Ei’ nasep pen Pasian’ ni lianpi ni ciang’a dinga mite kigin kholh sakna ahi hi. Upna i kibatpih lohte tawh kidona leh kimuhdahna a piangsak thei ding mun ah eite i kihel loh ding kisam hi.

            I sanggamte in kidawm lo-a a pau khiat a gelh khiat uh mawh zonna kammalte, eite hong mawh sakna dingin i galte in hong zat hun uh hong om ding hi. A pau khiate bek mawh sakna-in hong kizang lo dinga, Adventist pawlpi bup hong kingawh ding hi. Hong mawh sakte in, tua ni tua kha-in na makaite un, hi kumpi thukhamte tawh kizui-a ki-ukna, hi bang hua bangin do uh hi, hong ci ding uh hi. I galte in hong mawh sak theihna ding thu bang zahta kigenkhia cih a muh uh ciangin mi tampi in lamdangsa ding uh hi. A kampaunate uh amau’ cih nop banga kikhia lo zaw a hih lam a zak kik uh ciangin mi tampi in lamdangsa ding uh hi. Mite’ khate sittelna ding hun haksapi hong tun main lungkhamna hun hong tun lohna dingin mi khempeuh a kampau uh kidawm ta uh hen.

            Eimau’ kilat khiatna bang tawh leitung mite in thu hong khen ding a hih lam i phawk ding hi. Khris’ lim a lak dinga a hanciam mite in zia-le-tong a kikhel themthum a lah khiat lohna dingun kidawm ta uh hen. (356,357) Kilahna mai gual taktak i tun ma-in, tunglam panin eite’ tungah Kha Saingtho hong kibua a hih lam mu ciat ni. Tua bang hun hong tun ciangin, eite in thupuak kician i gen ding hi. Kimkhatte in a gen ngeisa uh mawh sakna a dim thute hi lo ding hi. Hong dote in hotkhiatna a ngah ding uh thu-um khempeuh in deihsakna takpi nei ding uh hi. Thuneite leh gam ukte mawh sakna pen Pasian’ khut sungah koih lel un. Lungnemna leh itna tawh Jesu’ sunga a om thumaan thutakte, a citak galvilte bangin hu ciat ni. 6 T, laimai 394-397.

Sunday Thukhamte

            Vantung tawh a kipawl ka hi uh ci-a, tuuno’ zia-le-tong nei-a a kigen biaknalam thuneite in, gulpi lungsim nei-a, amaute Satan’ uksa leh hanthotsa a hih lam uh, a gamtatna uh tawh hong lak ding uh hi. Pasian’ mite in ni sagihni siangthosak uh a hih manin bawlsiatna thuak hun uh hong tung ding hi. Sabbath a kilaihna pen Satan’ nasep ahi hi. Tua banga a sep khiatna tawh amah in Pasian’ vaihawmnate a kipelh ding sa hi. Leitung ah mihing’ thukham sangin Pasian’ thukhamte a thupi lo zaw a suah sakna dingin amah hanciam hi. Hunte leh thukhamte laih sawma, Pasian’ mite a bawlsia den mawhna-mipa in, ni sagih lakah ni masa ni tanna ding a phamawh sak thukhamte bawlsak ding hi. A hi zongin Pasian’ mite Ama lamah kip takin pang ding hi. Topa in amaute’ tangin na sem dinga, pasiante’ Pasian Amah a hihna lak ding hi.

            Ni sagih lakah ni masa ni tanna ding thukham pen Khristian lam pial khat-i nasep ahi hi. Sunday pen lang-pangpa’ ta ahi hi. Pasian’ tawlngak ni’ taangin Khristian vannuai in pahtawi uh hi. Bangbang hi ta leh Pasian’ mite in tua ni pibawl ding hi lo hi. Amaute in tua ni a pibawl loh ding lel uh hi-a, hang taka a langpan ding uh pen Pasian’ deihna hi tuan lo a hih lam a theih ding uh ka deih hi. Tua bangin hih le-uh ki-elna nasia dinga, thumaan kitangko thei lo ding hi. Sunday ni-in thukham lang panna kilangkhia sak kei un. Mun khat peuh ah kihih kha hen la note hong kikhelbawl leh mun (357,358)  dang ah zong tua bang mahin hong kibawl ding hi. Sunday (zum khak ni leh biakna ni dangte zong) ni pen Khris’ thu a gen ding nasep khat peuh sepna dingin i zang thei ding hi. Lungnemna leh kiniamkhiatna tawh i siam tawpin i sem ding hi.

            Sunday ni pen Pasian’ nasepna-in zang lehang, Seventh-day Adventist-te a khelbawl nuam mi gilote’ khutlum tawh i kipelh ding hi. Sunday ni pen mite’ inn ah hawha Lai Saingtho kikuppihna hunin zang lehang, Sunday thukham a bawlna uh tawh i nasepna hong nawngkai sak thei tuan lo a hih lam uh hong thei ding uh hi.

            Sunday ni pen nasep a tuamtuam sepna ni-in kizang thei hi. Tua in Topa’a ding na tampi sem zo ding hi. Tua ni-in mipi khawma thugennate kibawl thei hi. Inn khat khit inn khat ah na kisem thei hi. Lai gelh siamte in lai gelhna ni-in kizang thei hi. A hih theihna mun khempeuh ah Sunday ni-in biakna kikhopna hun zang ta un. A lawphuai theithei dingin bawl un. Khanlawhna lapi taktakte sa un. Honpa’ hong itna leh tua itna sunga khamuanna thu nakpi-in gen un. Kidek kidamna leh biakna nuntakna thu taktakte gen un. Tua banga na sep uh leh nasepdan zong tampi na theihbeh ding uha, kha tampite na pha zo ding uh hi.

            I sangte-a siate in Sunday ni pen Pasian’ thupha puak khiatna hunin zang uh hen. Tua bangin zang le-uh galpa’ sawmnate zo thei ding uh a hih lam kei hong kihilh hi. Siate in sangnaupangte tonpih hen la, thumaan a thei nai lote’a dingin kikhopna bawlpih uh hen. Tua bangin hih le-uh lampi dang tawh sangin nasepna tampi zo thei zaw ding uh hi.

            Mite’ kiangah thumaan thutak a hi bangin kigen ding hi. A hi zongin Khris’ lungsim tawh gen kul hi. Ngia honlaka om tuute tawh kibang hi hang. Khris’ hong thuhilhnate Amah khualna tawh mang nuam lo-a, lungduaina leh lungsim ki-ukna a nei lote in, Topa’a ding nasep theihna hunpha tampi taan ding uh hi. Ama thukham a palsatte taai-a han gawp ding nasep, Topa (358,359) in A mite pia lo hi. Bangbang hi ta leh pawl dangte i do ding hi lo hi.

            Mi tampite’ lungsim sunga om, i nasepna leh Lai Saingtho Sabbath langpanna i hep khiat zawhna dingin i hih theih zahin i sem ding hi. 9 T, laimai 229-238. ( 359)

KHAWKPI 58

SATAN’ HONG KHEMNA

            Dawite in mite sim dena, Pasian’ vantungmite in na do sak den a hihna ka mu hi. Kidona nasia mahmah hi. Dawite in siatna a dim huzap tawh mun khempeuh susia uh a, mite’ lungsim a hai sak dingin umcih palpal uh hi. Satan’ galkapte a not khia dingin vantungmite in vil-in ngak gige uh hi. A hi zongin vantungmite in mite’ utna tawh kilehbulhin amaute’ lungsim uk cip lo hi. Mite in galpa’ thu manga, do ding a hanciam kei uh leh, amaute in huhna deihna vantunglam a daak to sak ding khuavak a kipiak masiah, Satan’ galkapte in amaute a suksiat lohna dingin a dal ding zah val uh vantungmite in a sep theih uh om lo hi. Amau mahmah a kihu ding a a hanciam lo mite a honkhia dingin Jesu in vantungmite sawl lo ding hi.

            Satan in mi khat tai suah thei ding a hih lam a kitheih leh, tua mi a let cip zawhna dingin a mahmah hanciam ding hi. Mi khat in a lauhuaina mun tung a hih lam hong kiphawka, hatna a ngahna dingin lungkhamna leh deihtakpina tawh Jesu a et ciangin, Satan zong a sal khat a tai suah ding lau a hih manin, a nungzuite  sam thuahin tua mi umcih saka, vantung khuavak in amah a tat zawh lohna dingin ama kimkot ah kawmpi bangin khuamial kikhung sak hi. A hi zongin tua mi cimawh pen hanciamteitei-a a cihmawhna teng mah tawh Khris’ sisan’ hehpihna a belh ciangin, upna takpi tawh a thungetna Honpa in za-in, amah a honkhia dingin a hat mahmah vantungmite kuan beh sak hi.

            Khris’ hatna leh thupina mai ah Satan lau-in liing a hih manin, huhna ngena hatna a ngah mi’ lang ah Satan pang zo lo hi. Lungsim tak tawh thungetna a zak uh ciangin Satan’ galkap honpite liing uh hi. A ngimna a matut zawhna dingin dawi honpite sap behbeh lai hi. Hatna tawh kidim vantungmite, vantung galvante tawh tua a cimawh mi a huh dinga hong kuan uh ciangin, lel  takpi ding cih thei uh a hih manin Satan leh a galkapte nung kik uh hi. Satan’ pawlte tupna khat sungah citakin, hanciamin, kipumkhat uh hi. Amaute khat-le-khat (360) kimudahin kido uh a hih hangin, a vekpi uha a phattuamna ding uh pen a mainawtna dingin a hih theih zah un hanciam uh hi. A hi zongin van leh lei a uk Mang-pipa in Satan’ hihzawhna pen ciangtan sak hi. 1 T, laimai 345, 346.

           

Vantung’ Kepna Pan Pua Pial Ding Lauhuai

            Pasian’ mite in lam maan a tot laiteng uh vantungmite in amaute kem ding a hih hangin, Satan’ leitang tunga a pai teiteite tua banga a kepna ding kamcaim om lo hi. Mi-khempipa’ sawltakte in amau’ mi a ngahna dingin bang khat peuhpeuh genin sem ding uh hi. Amau leh amau, kha-mi khawng, “khuaphia zato” khawng, “sikhup banga dam sak thei” khawng a kicih uh hangin bang mah phamawh lo hi. A kilawm dinga bawl tawm thute tawh a tei khol lote khem zo uh hi. Amau a va beelte’ piandan leh haksatna leh gentheihna khawng a thei sak kineih uh hi. Khuavak  vantungmi bangin kibawl napi-in, a lung sung uah khuamial dumpi oma, amau’ kianga thu donga hong pai numeite bang kinbawl phadiak uh hi. Pasal gina a tuah loh man uha haksatna a thuak a hi dingin amaute gen hi. Maan theikha mah ding hi, a hi zongin amaute in a hoih zaw dingin bawlsak thei tuan lo uh hi. Ki-itna leh kikhualna kisam uh a hih lam gen uh hi. Amau’ hoihna ding a deihsak kineihin, gul in lau-a a liing kelkel vasa a khim mah bangin, a kiging lo mite’ tungah amaute in phuisam uh hi. A sawt lo in tua mite amau’ khut sung tung takpi hi; mawhna, maizumna leh kisiatna in zui pah hi.

            Mawhna tawh kipawl nasemte tawm lo hi. Amaute’ lampipen innkuan kitapnate, min dainate leh lungsim dahnate tawh hong kilangkhia hi. Hi bang teng hi napi leitung mite in thei mel lo uh hi; amaute in a khem zawh ding uh zongzong lai uha, tua banga siatna a piansak zawh uh ciangin Satan kipaak mahmah hi. 2 T, laimai 198.

            “Samaria khua-a inn dawl tungnung tawlet panin Ahaziah kia-in gim mahmaha, ‘Pai un la hi natna pan ka dam ding leh ka dam loh ding Ekron khua-a a biak (360,361) uh Baalzebul va dong un,’ ci-in kamtai a pai sak hi. A hi zongin Topa’ vantungmi in Tishbi khua mi Elijah kiangah, dingkhia-in la, Samaria kumpipa’ kamtaite tawh kimu dingin pai in. Ekron khua-biak Baalzebul thudong dinga na pai uh Israel gam ah Pasian om lo a hiam? Topa in hi bangin a ci hi. Na lupna tung panin na kumkhia kei dinga, na si takpi ding hi, Topa in a ci hi, ci in, a ci hi.” 2 Kumpite 1:2-4.

            Kumpipa Ahaziah’ mawhna leh a thuakna in, kuamah in dan thuakna a awlmawh loh khak lohna dinga hilhna ahi hi. Eite in lawki pasiante i zahtak loh hangin, Isarel kumpipa mah bangin tul tampi in Satan’ biakinn ah biakna pia uh hi. Lawki milim biakna lungsim, mun khempeuh ah om hi. Pilna leh siamna huzap in tuate a kilawm zaw leh a lawphuai zaw dingin bawl sawnsawn hi. Hilhkholhna thu kician upna kiam hiaihiai a hihna a dahhuai thute ni simin kibehlap hi. Dawi thu upna leh Satan’ bum-aite in mite’ lungsim man cip khin hi. Lai Siangtho lim tak sim lo-a, a deihna uh leh a tupna khempeuh uh a khial thei lo sittelna ah a ap lote, Ama deihna a theihna ding uha thungetna tawh Pasian a zong lote, lam maan pan pialin Satan’ khemna sungah tuuk takpi ding uh hi.

            Hebrai mite bek mah Pasian maan theihtheihna kipia hi. Israel kumpipa in lawki kamsangte’ kiangah thudong ding a pai sak ciangin, van leh lei a piangsak, ama mipawlte’ Pasian sanga milimte a muan zawkna lawkite’ kiangah a tangko ahi hi. Tua mah bangin Pasian’ thu ka thei a cite in, hatna leh ciimna bulpi nungngata khuamial a ukte’ kiangah huhna leh hilhna a nget uh ciangin Pasian a min sia sak uh ahi hi. A gi lo, milim bia nuam kumpipa in tua banga a hihna tawh Pasian’ sin so sak a hih leh Ama nasemte hi ung a cihte tua bang danmaha a gamtat uh Ama’n bangci a sa ding hiam? 5 T, laimai 191,192,196.

To Nih’ Na A Sem Zo Om Lo

            Khris in i mai ah to nih hong lak hi. Pasian leh leitung ahi hi. A nihin kibia khawm thei lo ding a hihna (361,362) zong tel takin hong lak hi. Hi leitung i kinna, i itna a liat zawk leh, na dang khempeuh sanga i kin dinga a kilawm zaw khat pen i kin zo kei ding hi. Leitung i itna in Pasian i itna hawlkhia dinga, leitung vaite ngaihsutna mah a sang penin hong koih sak ding hi. Leitung nate zahin Pasian pahtakna leh ki-apna i nei zo kei ding hi.

            Gamlaka Khris a zia etna ah Satan cimawh khin a hih lam kithei a hih manin, tua huna Khris a bawldan sangin tu-in mite a bawlna ah kidawm zaw mahmah hi. Amah pen a kizo khinsa gal ahi hi. Mihingte’ kiangah hong pai-in a kilangtaka biak ding hong ngen lo hi. Hi leitunga na hoihte a paakta zaw dingin mite sawl hi. Mite’ lungsim leh lawpna a zawh khit nak leh vantung tawh kisai lawpnate a bei ding hi pah hi. Mihingte ama khemna sungah a tuuk ding, leitung a iplah ding, zaliatna leh panmun a iplah ding, sum-le-paai a iplah ding leh leitung hauhnate a enlah dingin ama’n deih hi. Hi banga a hih zawh nak leh amah in Khris’ kianga a nget khempeuh a ngah suak ding hi. 3 T, laimai 478,480. (362)

KHAWKPI 59

SATAN’ KHUAVAK PUANTUAL

            Pilna maan lo pen vantung zumpi-a Satan’ khutzat khat hi-a, tu ni-in zong ama’n zang lai hi. Vantungmite’ kianga a gen thu maan lote, ngian kawipi tawh a gen thute in cihtakna panin amaute tampi tak mah khemkhia zo hi.

            Vantung ah a omna a taan ciangin Satan in i nu i pa masate na khem hi. Adam leh Evua-te in galpa’ thu na mang uh hi. Amaute’ thuman lohna hangin mihing pen Pasian tawh kikhenin, leitung pen vantung tawh kikaak hi.

            Adam leh Evua-te in a kikham singkung na khoih kha het lo uh hi leh, Topa in amaute, mawhna-i samsiatna a om lopilna, tawntung lungdamna a tun ding pilna a hi, pilna pia ding hi. Thuman lohna tawh amaute in a ngah uh pilna pen mawhna leh a thaman teng theih khakna hi lel hi.

            I nu i pa masate Satan in a makaihna mun pen tu ni-a amah in mite a makaihna mun mah ahi hi. Amah in phuahtawm thu zak nop nono tawh hi leitung tuam hi. Hotkhiatna a hi Pasian theihtelna pilna mite in a ngahkhak lohna dingin amah in a siamna khempeuh zang khia hi. 8 T, laimai 290.

A Khial Pen A Maan Banga Hong Kidawk Ciang

            Khuavak lian hun sungah eite i nungta hi; a hi zongin khuavak a kici tampi in Satan’ pilna leh siamna’a ding lampi honsak hi. A maan ding tawh a kibang na tampi hong kilak dinga, thungetna tawh lim taka ngaihsut hong kul ding hi; bang hang hiam cih leh tuate in galpa’ zuau seelna hi thei hi. Khialhna lampipen thumaan lampi gei mahmaha om bangin hong kidawk thei zel hi. Sianthona leh vantung hong tun ding lampi tawh khen tel ding haksa thei hi. A hi zongin Kha Siangtho in khuavak a piak lungsim in lam maan pana a pialkhia lampipen hong theithei ding hi. Tawl khat khit ciangin tualampi nihte gamlapi-a a kikaak a hih lam hong mu ding hi. (363)

            Na khempeuhte’ sunga a laigil in Pasian hi cih thu pen Satan’ zuau siamna lian bel khat ahi hi. Tua in a hi lo lama Pasian a lak suaka, Pasian’ liatna leh thupinate a min sia sak suak hi.

            Na khempeuh sungah Pasian om hi cih thu pen Pasian’ kammal in gen ngei lo hi. Mihing a susia nate tuate mah hi ci-in Pasian’ thumaan in hong lak hi. Khuamial in amau’ lungsim hi-a, noptatna in amaute’ nasep ahi hi. Amaute in ci-le-sa’ lungsim deihna zui uha, lungsim’ paina peuh a pumpi uh zui sak uh hi. Tuate zuihna hangin Pasian tawh kikhenna piang hi.

            Mawhna hanga i omzia pen pianpih ngeina bang hi nawn lo hi. Tua a hih manin ei hong puahpha vangliatna pen khalam tawh kisai a hih kul hi, tua lo in a kimanna om lo hi. Mite’ lungtang a lencip siatna a sutat zo vangliatna khat bek oma, tua in Jesu Khris sunga om Pasian’ vangliatna ahi hi. A kikhai lumpa’ sisan pan bekin mawhna pan kisil siang theihna om hi. Ama hong hehpihna bek in a puuksa i pianzia zawhzawhna, nial zawhna hong neisak zo bek hi. Na khempeuh sung leh mun khempeuha om a hoih na khempeuh in Pasian hi, cih kha-mite’ thuhilhna pen hih vangliatna in a mawkna suaksak hi. Na kehmpeuh sungah a laigilin Pasian a om hi mawk leh, mi khempeuh sungah Pasian a om hi ding a hih manin, mihing in sianthona a ngahna dingin ama sunga om vangliatna mah tawh amah a kipuah ding bek hong hi ta ding hi.

            Hi thute a tawpna dong hong kikhum leh Khristian upna buppi bei mang sak hiau hi. Mawh maisakna zong a kisapna omsak nawn lo-a, mihing pen amah leh amah a kihonkhia thei ding hong suak hi. Pasian tawh kisai-a hi bang ngaihsutnate in Pasian’ Kammal a mawkna suaksak hi. Tua thute a um mite in Lai Siangtho pen phuahtawm thu banga a saan khak ding uh lauhuai mahmah hi. Amaute in gamtat siatna sangin hoihna mah thupi hong sa kha ding uh hi; a hi zongin Pasian pen Ama vangliatna mun ah koih nawn lo uh a hih manin, gamtat hoih pen mihing’ hanciam zawh thu hong suaksak ta uh hi. Tua pen Pasian lo in a mawkna ahi hi. Mihing’ (364) utna a panpih a om kei leh siatna do zawhna ding vanliatna taktak nei lo hi. Mihing’ kidalna teng kiphelkhia khin hi. Mihing in mawhna pana a dal ding nei lo hi. Pasian’ Kammal leh Pasian’ Kha in hong zolnate khat vei nial kha phot lehang, bang tan a thuk mawhna sung kitum suk ding cih i thei kei hi.

            Tua banga kha-mite’ thuhilhnate a lenlente in a Khristian nuntakna uh kisia sak takpi ding uha, Pasian tawh a kizopna uh kitatin, tawntung nuntakna taan ding uh hi. 8 T, laimai 290-292.

Teelsate Khem Ding Hanciamna

            Up khialhna tawh leitung bup a tuam Pasian leh nate’ thu a maan lopi-a genna in a puuksa galpa’ humop thu ahi hi. Amahmah Lai Saingtho siam khat hi-a, mite in thumaan a saan ding uh a kisaplam a thei pa zong ahi hi. A hi zongin amah in tua thumaan panin mite’ lungsim hei khiat ding hanciam hi. Tua thumaante pen leitunga hong piang ding thu khat peuh’a dinga mite a kiging khol sak dinga kipia ahi hi.

            1844 kuma thu a hong pian khit ciangin, thu phengphitna a tuamtuam kituak hi. Kha-mite’ thuhilhna a um mite’a dingin thuhilhna kei hong kipia hi.

            Pasian’ thu tawh kituak lo thute a kihilh ciangin mawh bawlna in zui pah hi. Tua pen zuau theite’ pa-i thaang antah hi-a, tua thu a umte in kisikna nei nawn lo in, siangtho lopi mahin ngaihmuang uh hi.

            A beisa huna thupiang pen hong piang kik zel ding hi. Mailamah Satan’ nasep dante hong kilaih ding hi. Thukhial pipi mite lungkimna dingin hong kigen ding hi. Pasian’ mite’ kiangah khuavak puan tawh a kituam zuau thute hong kigen ding hi. Tua bangin Satan in teelsate nangawn a hih theih leh a khem dingin hong kipan ding hi. A uphuai nono hong kigen ding hi; lungsimte hong khim ding hi.

            Tuiciin tun ma-a a om siatnate tawh a kibang siatna namkimte hong piang kikin lungsimte hong la ding hi. Nate pen Pasian zaha pahtawina, mihing’ ut banga (364,365) gamtatna, Pasian a zahtak lo te’ thuhilhna …. cihte pen ama ngimna a taangtunna dingin Satan in a zat ahi hi. Ama geelnate a sep khiatna dingin lungsim’ tungah lungsim’ hatna hong zang ding hi. Ama khem zawhna tawh mite pen Pasian a zahtak bangin hong om ding uha, a hi zongin Pasian tawh kizopna taktak nei lo ding uh a hihna pen a dahhuai bel thu ahi hi. Sia leh pha theihna singkung pana singgah a ne Adam leh Evua mah bangin, tu mahmahin zong mi tampite khialh khemna an kam khat tawh kivak uh hi.

            Satan in Eden huan ah gulpi tung tawna kam a pauna tawh i nu i pa masate’  mai ah ama hihna taktak pen seel hi. Tua mah bangin Satan’ sawltakte in a zuau thute uh pen a deihhuai puante tawh tuam uh hi. Tua sawltakte in mihing’ lungsim sungah a taktaka sihna donga a lauhuai a thun ahi hi. Pasian’ thumaan pana phuahtawm thu zaknop nono lama a kiheite Satan in khim zo pha mahmah ding hi.

            Khuavak tam a nei belte mah Satan in a tuun nop belte mah na hi pah hi. Amaute khem zo-a a uk cip zawh nak leh amaute in mawhna pen dikna puan tawh tuamin mi tampi lam pialpih zo ding a hih lam Satan in thei hi.

            Mi khempeuh kiang ah kong ci hi; kikem un; bang hang hiam cih leh Khristian nesemte’ kikhopna khempeuh leh biakinn khempeuh ah pawlpi mite ama lamah a ngahna dingin hanciamin khuavak  vantungmi bangin Satan vak kawikawi hi. “Khem zawhin om kei un; Pasian pen ciamnuih bawl ding hi lo hi,” (Galatia 6:7) ci-a Pasian’ mite a hilh dingin kei hong kisawl hi. 8 T, laimai 292-294.

Nate Pen Pasian Banga Ngaihsutna

            A sing a suangte’ thu bek a ngaihsun mite in Pasian’ nasepna teekteek a nial loh uh hangin, tua Pasian’ nasepna teekteek pen hong mu thei lo zaw hamtang uh hi. A sing a suangte pen Pasian tawh kisai lo in amau thu-a om, amau’ thu-a gamtang, amau’ thu-a nasem (365) bangin amaute in ngaihsun uh hi. Amau’ lungsim ah leitung nate leh khalam nate kilamdang mahmah hi. Leitung nate pen Pasian tawh kisai kha vet lo-a amau’ thu-a om bangin gen uh hi. Tua a hih manin a sing a suangte pen vanliatna a nei bang khatin ngaihsun uha, Pasian bangin bawl uh hi. Nuntakna nei lo nate pen Pasian in zong a sukkhak thei loh thukham tawh a ki-omsak hi-a, nuntakna a nei pen a thupi zaw thukham nuai ah kikoi a, tua thukham banga ama thu-a gamtang lel dinga a kikoih hi, cih upmawhna om hi.

            Hih pen a maan lo pilna ahi hi; tua thu a panpih ding Pasian’ Kammal om lo hi. Pasian in Ama thukhamte phiat lo hi, tuate tung tawnin na sem dena, tuate khut zatin nei hi. Nate’ thukhamte in amau’aituamin na sem lo hi. Nate’ sungah Pasian in na sem den hi. Nate pen Pasian’ nasem hi zawa, Ama deihbanga a pei hi zaw hi. Ama deihna banga Ama nate a sem den Khat om hi cih nate’ omzia in hong kilangsak hi. Leitung in ni kimkotin kum khat khit kum khat a pai kawmkawmin, ama thu-in singkung lopa a po sak hi lo hi. Vanglianpa’ khut in hih leitung makai-in na sem tawntung hi. Ama paina lampi zui-a ama muna a omsak den zong Pasian’ vangliatna mah ahi hi.

            Mihing pumpi sung omzia khempeuh kithei kim khin lo hi; a pil pente in zong a theih zawh loh uh thuthuk om hi. Lungtang kisai dente, hunk khat khit hun khat husannate pen khat vei a kitaangkhia sak set (kol) bupi banga a taang pai suak hi lo hi. Pasian’ hangin eite nungta-in, gamtaangin, mihingin i piang hi. Husanna khempeuh, lungtang kisai khempeuh in a om tawntung Pasian’ vangliatna hong lak hi.

            Nate’ sung pana hong kilang Yahweh Pasian’ thuthukte mi pil pente in zong theikhia zo lo uh hi. Lai siam pente in zong a dawn theih loh thu tampi Lai Saingtho in hong dong hi. Tua thudotnate eite’ dawn theih dinga hong kidong hi lo hi; Pasian’ thuthuk mahmahte lungngai thei-a, ei’ pilna pen ciangtan om a hih lam hong hilh ding bek ahi hi. Mihing’ lungsim in a theih khit zawh loh na tampi i nisim nuntakna kiim-le-paam (366) ah zong om hi. Pasian’ ngimna leh vaihawmnate theih phak ding hi lo hi. Ama pilna zong kan khiat khit zawh ding hi lo hi. 8 T, laimai 295-261.

            Hih leitunga pil-sinna pen i nuntak sungin kizo zo lo ding hi; a tawntungin kisin toto dinga, zawh hun cih om lo ding hi. Nisimin Pasian’ nasepna a lamdangte, vannuai buppi a piansakna leh a khoina a lamdang Ama vangliatna a hong kilangsakte, i lungsim mai ah a thak a hoih zawsemin kimu ding hi. Tokhom pana hong taangkhia khuavak sungah thuthuk khempeuh beimang dinga, ni danga a kithei zo lo nate olno taka a kitheih ciangin lamdang kisa mahmah ding hi. 8 T, laimai 328.

Hong Phawng Gawp Thei Biaknate

            Tu hun lai takin Pasian’ nasepna ah upna ah a kip a kho, thumaan siang taka a tel, kha lungsim a nei mite i kisam hi.

            Mite’ kitangsap pen upmawha kigeel tawm thuhilhna thakte hi lo a hih lam kei hong kihilh hi. Mihing’ upmawh thute a kitangsam uh hi lo hi. Amaute in thumaan thei-a a zui, Timothy’ tunga kipia thu thei-a a mang mite’ teci panna kisam uh hi: “Pasian’ thu hilh in. A hun a hi-a a hi kei zongin kiging in. Lungduaina leh thuhilhna tawh hilhin, taai-in, hansuah in. Amaute in a maan thuhilhna a ngaih nop nawn loh hun hong tung ding hi. Amaute in bil thak nei-in, amau’ lunggulhna zui-in amau’a ding sia tampi a koih ding uh hi. Amaute in thumaan panin a bil uh heikhia-in, phuahtawm thute a ngai sak ding uh hi. A hi zongin nangmah in na khempeuh ah navak in la, gentheihnate thuak keeikaai-in, thuhilhsia nasep semin, na nasepna a hoihna kilangsak in.” 2 Timothy 4:2-5.

            Kilemna gospel thu a hilh dinga kigin kholhna khedap bulh in la, kip tak kho takin kal suan in. A siangtho a nin lo biakna in hong phawng gawp thei biaknate a hih loh lam na tel thei ding hi. Upmawh thuhilhnate leh thusuutnate a lawpsak dinga hansuahna a pia dingin Pasian in kuamah sawl lo hi. Ute naute aw, na thuhilhna (366,367) uah tua bang thute kihel sak kei un. Na gamtatna sung uah tuate lut kha sak kei un. Tuate tawh na nuntak nasepna kisia sak kei in. 8 T, laimai 294,295.

Khalam Khanlawhna Kisam

            Khris’ nung zui ni. Na khempeuh ah Amah i etteh ding a hih lam mangngilh kei un, ci-a i mite a hilh dingin kei hong kihilh hi. Jesu’ thuhilhna sunga a om lo tua geel tawm thute i paih khiat ding hoih zaw hi. Tawntung thumaan tau tungah i nasemte in a khe uh a ngak takpi ding uh ka deih hi. Nangma lungsima thusuak pen Kha Siangtho nasepna hi ci-a na zuih khak lohna ding kidawm in. Hi thu ah mi kimkhatte patauh huai hi. Upna ah a kip ding uh, amau’ sunga a om lametna thu a dong khempeuh a gen kik thei ding uh amaute ka cial nuam hi.

            Hih hun nununga a om mite kigin kholh sakna ding nasepna pan i u i naute’ lungsim a hei khia dingin galpa hanciam hi. Galpa’ thugente in a hun zui-a lauhuainate leh nasep dingte pana mite’ lungsim a hei khiat sakna ding ngimna ahi hi. Ama mipawlte’a dinga Khris in van pana John’ kianga a hong puak khuavak pen amaute in bangmahin sim lo uh hi. I mai-a hong piang ding thute pen tua zaha lunghihmawh pih dingin thupi lo hi ci-in amaute in hilh uh hi. Amaute in van pana hong pai thumaan awlmawh lo uh hi. Pasian’ mite’ theih khitsa thute amaute in suh khiat sakin, a taangin pilna maan lo guan uh hi.

            “Topa in hih bangin a ci hi: Lam gei ah ding in la khuadak in. Lam maan koi ah om hiam ci-in lam lui kan in la, tua lampi zui in.” Jeremiah 6:16.

            Hun paisa-a kigen thumaan teci panna a gen kik dingin Topa in hong cial hi. Khalam nuntakna a thaksuah sak dingin hong cial hi. A mipawlte’ khalam hatna tha a kisaan loh sawt lua khin ta hi. Sihna panin thawhkikna a om ding ahi hi.

            Thungetna leh mawhna pulaakna tawh Kumpipa’ lam lian i sial ding hi. Tua banga i sep ciangin eite’ tung-ah (367,368) Kha vangliatna hong tung ding hi. Pentekos tawh kisai thahatna i kisam hi. Tua thahatna hong tung ding hi. Na khempeuh a zo vangliatna a hi A Kha Siangtho hong pai sak dingin Topa in kamciam hong pia zo hi.

            I mai ah a lauhuai hunte om hi. Thumaan a thei khempeuh khanglo-a, a pumpi, a kha uh leh a lungsim uh Pasian’ hilhna nuai ah a koih ding uh kisam hi. Galpa in i sul hong zui hi. Eite khanglo-a, galpa i vil gige ding kisam hi. Pasian’ galhiam khempeuh i silh ding hi. Kamsanna Kha pana hong kimakaihnate i zui ding hi. Tu hun’a ding thumaan itin i zui ding hi. Khemna khauh pipite i saan khak lohna dingin tua in hong kem ding hi. Pasian in Ama Kammal panin hong gen khin zo hi. Pawlpi tunga thuhilhnate leh, tu huna i sep ding leh eite’ luah ding panmunte a hong theithei sak laibute panin Ama’n thu hong gen hi. Gual khat tungah gual khat, thu khat tungah thu khat a hong kihilhnate i mang ding hi. Tuate awlmawh kei lehang eite in bang paulap zong thei ding i hiam?

            Pasian’a dinga na a semte in, a taktak taanga a zuau na saan lohna dingun kong thuum hi. A siangtho thumaan a omna ding mun ah mihing’ paulap zonna khawng koih kha kei un. Khris in A mite’ lung sungah upna leh ki-itna tawh kuang nuam hi. Tawntung thumaan tau tungah kho taka a ding dinga kilawm mite in a maan lo thugennate pahtak bawl kha kei un. Muan lah ding a om lo thuneihna tungah a kinga upna thu guipite, eite in kip taka i let ding Pasian in hong cial hi. 8 T, laimai 296-298.

           

Pasian’ Thu Theihna Leh Kinna In Ngaihmuanna Hi

            Thumaan sungah sau vei a om khin mi tampite’ lungsim sungah thu kitheisak gawp ngeingeina lungsim lut hi. Amaute pau ngalin, gensiat nop hau-in, mawh zon nop hau uh hi. Amau’ ngaihsutna bangbang a pawm nuam lote’ tungah thu a khen dingin thukhenna tokhom tungah amaute tu to uh hi. Hong kum suka, a mawhnate uh kisika Ama mai ah kuuna a thuum dingin Pasian in amaute sam hi. Amah in, “Nang’ tungah gen ding (368) khat ka nei hi, bang hang hiam cih leh a masa-a na neih itna na nusia khin hi. Koi panin puuk na hiam cih phawk kik in la, kisikin, a masa-a na septe sem in. Tua a hih kei leh na kiangah a manlangin kong pai dinga, na kisik kei leh na meivak a omna mun panin ka lakhia ding hi,” ci hi. Mangmuhna 2:4,5. Amaute nambat khatna ding kituh uha, a kampauna uh leh a gamtatna uh tawh mi tampite’ lungsim na sak uh hi.

            Ama Thu uma a zui dingin Khris in A mite hong cial hi. Tua Thu uma a zuite, gamtatna khempeuh leh zia-le-tong khempeuh a kilangsakte Pasian’ sungah thahat ding uh hi. A upna uh vantung pana hong pai a hih lam kimu khia ding hi. Amaute lam tuam dang ah vakthap lo ding uh hi. Khuasik mul tang sak lianga a phawng gawp thei biakna lamah amaute’ lungsim kihei lo ding hi. Vantungmite’ mai leh mihingte’ mai ah, Khristian zia-le-tong a kip a kho a nei mite mah bangin amaute om ding uh hi.

            Khris’ thuhilhna sungah a om mah bangin, thumaan kham kuang sungah eite in, mite um saka a kikhel sak ding thute i nei hi. Hih leitung ah Khris hong pai-a a gen khait thumaante, Ama gen khiat bangin gen khia in. Tua hi leh na thugente in muibun ding hi. Khris in zong a gen ngei loh, Lai Saingtho sungah lah a om lo geeltawm thute gen kei in. Eite in thupi-a a hoih mahmah thute gen ding i nei hi. Mi khempeuh’ lungsim sungah “Ci-in kigelh hi,” cih thu i guan ding ahi hi.

            Hong makai dingin Pasian’ Kammal beel ni. “Topa in hih bangin a ci hi,” cih thute kan ni. Mihing’ geelnate kicing khin hi. Leitung pilna sung beka a kipantah lungsim in Pasian’ thute thei lo hi; a hi zongin tua lungsim mah in kikhelna leh sianthona hong ngah leh Pasian’ Thu sung panin vangliatna hong mu ding hi. Kha-i siangthosakna tawh a kihah siang lungsim leh lungtang bek in vantung thute khen tel thei ding hi. 8 T, laimai 298-301.

           

Kipumpiakna Taktak Kisam

            Ute naute aw, na hih ding pen uh na phawkna dingun Topa’ min tawh kong cial hi. Na lungsimte uh (368,369) Kha Siangtho’ makaihna zui sak un, tua hi leh Lai Saingtho thute hong theithei ding hi. Tua ciangin Pasian’ thu-thukpite zong na khen tel thei ding uh hi.

            A thupi mahmah teci panna a hi, Khris’ teci panna leitung mite’ kiangah i puak ding ahi hi. Mangmuhna bu sung khempeuh ah a manpha mahmah kamciamte om hi. A lauhuai a thupi mahmah hilhnate zong om hi. Thumaan theihna a nei-a a kigen mite in John’ kianga Jesu’ teci panna sim lo ding uh hiam? Tua sungah upmawh thu leh phuahtawm thu om lo hi. Tu leh nung cianga i phattuamna ding tawh kisai thumaante om hi. Buhvai in buhtang’a dingin bang kimanna nei hiam?

            Topa hong pai baih ding hi. Zion kulh tunga galvilte, Pasian in amaute a piak nasepte a sem dingin khanglo ta uh hen. Kha Siangtho vangliatna tawh a nunung thuhilhna a tangko ding, zan khuamial hun a tangko ding galvilte Pasian in cial hi. Numeite leh pasalte a lusukna uh panin a phong ding galvilte Pasian in cial hi, tua hi kei leh amaute ihmut sihna tawh ihmu ding uh hi. 8 T, laimai 301,302,304. (369)

KHAWKPI 60

SATAN’ ZUAU SEELNA

            Khang thak kha thu-upna tawh a kisai phadiak hih Lai Saingtho mun kei hong kilak hi. Kolosa 2:8. “Khris thu zui lo-a, leitung thungekte leh mite’ thuciinte zui-a, leitung pilna leh a mawkna zuau thute tawh kuamah in note hong siat sak lohna dingin kikem un.” Luguh ena thugen theihna pilna leh ganhing aisaannate in mi tul tampite susia khina, thu-um lo suaksak a hihna kei hong kilak hi. Hih lampi a tawn dinga lungsim hong kipat nak leh tua lungsim pen kileekkim nawn lo a hih manin dawi’ ukna sung tung takpi ding hi. A hehpihhuai a si thei mihingte’ lungsim sungah “a mawkna zuau thute” kidim hi. Na lian pipi sep zawhna a nei-in kingaihsun uh a hih manin amaute in a sang zaw vanliatna kisam kisa lo uh hi. Amau’ upna leh thu guipite pen “Khris’ thu hi lo in, leitung thungekte leh mite’ thuciinte” ahi hi.

            Jesu in amaute tua bang pilna hilh lo hi. Ama thuhilhna ah tua bang thu peuhmah kimu lo hi. A hehpihhhuai a si thei mite’ lungsim, amau leh amau a kipum-muan dingin Jesu in makaih lo hi. Vannuai buppi a piangsak Pa Pasian pen amaute’a dingin hatna leh ciimna a hih lam Jesu in na lak den zaw hi. Taang 18 na  ah hong kilim hilh zaw lai hi: “Ci-le-sa lungsim tawh kiphasaka, a muh loh pipi nate’ thu kanin, kiniam khiatna leh vantungmite biakna tawh na thaman uh kuamah kiluhkhia sak kei un.”

            Kha thu upna a hilh siate, nang hong khem dingin a deihhuai, hong khim thei omdan tawh hong pai ding hi. Amaute’ thugente na ngaih leh dikna galpa in nang hong khem khin hi-a, na thaman ding a taan takpi ding na hi hi. Khimpipa in khat vei hong khim khin zo peuh leh a gulau khin na hi ta hi. Tua gu in Pasian’ Tapa Khris na upna hong susia khin a hih manin, Ama sisan manpha zong na muang nawn kei hi. Hih pilna in a khemzawh mite in Satan’ khemna hanga a thaman uh suhna a thuak ahi hi. Amaute in a thusiamnate uh muangin, kiniam khiatna zong nei-in, kipumpiak ding zong ut uha, amau mahmah kisuniam uh hi. A lungsimte uh bangmah lopi khawng um sak uha, a sisa a lawmte uh a hi (370) dinga a upmawhte uh kiang panin a hai vai thute sang uh hi. Satan in amaute’ mit humsakin, a ngaihsut theinate uh mialsak a hih manin amaute in a sia zong mu thei nawn lo uh hi. A sang zaw muna  vantungmi a suak a sisa a lawmte uh’ kiangpana hong pai hi ci-a a upmawh uh thuhilhnate amaute in zui uh hi. 1 T, laimai 297, 298.

            Na khempeuh ah eite kikema, Satan’ hong zolnate leh khemnate i do cinten kul a hihna kei hong kilak hi. Khuavak vantungmi bangin amah kizeema, mi tul tampite khemin salin man khin hi. Mihing’ lungsim pilna pana amah in a meet a dawh pen nasia mahmah hi. Luguh ena thugenna, lungsim puak et siamna, bum theihna cihte in, Satan in tu lai khang mite a zuatna lampi hi-a, tua siamnate tawh amah in na semin, hun bei kuana ama hanciamnate tua bangin kilangkhia sak hi. 1 T, laimai 290.

Na Lungsim Kuamah Uk Sak Ke’n

            Kuamah in mi dang khat’ lungsim uk sak kei hen. Tua banga a uk sakna tawh phat tuamna a ngahsak dingin ki-ummawh kei hen. Mi khat peuh tunga a kihih thei a lauhuai bel khemna in lungsim dam sakna ahi hi. Tawm vei bang nuam tuamthei ding a hih hangin, tua banga a ki-uk lungsim pan kimuang nawn lo in zong hat kik zo nawn lo hi. Khris’ puan mongteep a lawng numei bangin thanem mahmah kha ding hi hang; a hi zongin eite in Pasian’ hong piak hamphatna zangin upna tawh Ama kiang zuan lehang, tua upna tawh a lawng nu a hehpih mah bangin ei zong hong hehpih pah ding hi.

            Mihing khat in ama lungsim mihing dang khat a uk sak ding pen Pasian’ geelna hi lo hi. Tu-a Pasian’ ziat lama a tu, a tho kik Khris in a vanglian Damsakpa ahi hi. Hong dam sak dingin Amah mit suan in. Mawhneite a hihna bang ciat uh tawh Khris bek tungtawnin Pasian’ kiang pai thei hi. Mi dang khat, lungsim muangin kuamah pai thei lo hi. Vantungmite leh genthei thuak mite’ kikal ah kua mihing mah a kikham ding hi lo hi. (370,371)

            Pasian in mi dangte’ lungsim Ama lama a heina ah mi khempueh in i panpih ding ahi hi. Leitung in a zak ngei a siam bel hong dam sak thei Pa Pasian’ vangliatna leh hehpihna amaute gen un.

            Mi khat peuh’ lungsim ukna nuai ah a lut dingin nang kong sawl kei uh hi. Lungsim damsakna in  a kizang ngei khempeuh lakah a lauhuai bel pilna ahi hi. Amau’ gitlohna lungsim tawh a gi lo khempeuh in tua pen zang thei hi. Tua bang pilna tawh eite in i sep ding om lo hi. I kihtak ding hi zaw hi. I munpite khat peuh ah tua thu a mong dawn zong i lut sak ding hi lo hi. MM, laimai 115,116.

            Thunget thadahna in mite amau tha kimuang saka, mawh zolna kongkhak hong sak hi. Mun tampi ah thuzung kalh ding hanciamna oma, mite in a amau’ hihzawhnate kisak theihpih uh hi. Mihing’ lungsim a khoih thei pilna pen kipahtakbawl mahmah hi. A hoihna mun a om tei hangin Satan in mite a khemna ding leh a suksiatna dingin tuate zat pipenin nei hi. Ama siamna pen Vantung pana bangin kingaihsuna, ama deihna bang lianin amah in biakna ngah pah hi.

            Tua pilnate panin gamtat hoih kisia-a, kha thu upna bulpi hong kiphah hi. ST, Nov. 6, 1884.

Dawi Thu Leh Dawi Thu Upna

            Ephesus khua-a piang thakte in khat vei lai-a a pahtak ngeite uh tu-in kihhuai sa ta uh a hihna a dawi thubute uh a halna uh tawh lak uh hi. Pasian’ tunga a khialhnapi uh leh a nuntakna uh a sia suaksak pen a dawi thu siamna uh ahi hi. Dawi thu tunga a hehna uh amaute in tua banga a lakkhia uh ahi hi. Piang thak takpi uh a hihna zong kilang pah hi.

            Kum zabit sawm nihna hun ma-in lawki dawi thu upnate bei ta hi ci-in kingaihsun hi. A hi zongin tanglai huna dawi thute mah bangin tu hun ciangin ai-siam-na a tuamtuam kizang a hihna Pasian’ Thu leh thu dangte in hong lak hi. Tanglai-a dawi siamna pen a taktakin, tu hun khang thak kha thu upna a kici pen mah ahi hi. (371,372) A sisa lawmte a kineihna tawh Satan in mi tul tampite’ lungsim hei zo khin hi. Lai Siangtho in, “Misite in bangmah thei lo hi,” ci hi. Thuhilhsia 9:5. Amaute’ ngaihsutnate, itnate, muhdahnate kisia khin hi. A hing laite tawh misite kiho thei lo hi. A hi zongin Satan pen a cil a pata a ngian siamsa a hih mah bangin, mite’ lungsim a uk zawhna dingin hi zuau thu mah hong zang hi.

            Kha thu upna panin cina tampite, a dah a kapte, a leisante, kha gi lote tawh kiho uh hi. Hi bang a hih ngam khempeuh a lauhuai mun ah a om ahi hi. Amaute Pasian in bangci ngaihsut cih Lai Saingtho in hong lak hi. Tanglai-a lawki kamsang khat kianga thudong dingte a pai sak kumpipa’ tungah Amah in hih bangin thu khen hi: “Ekron khua-biak Baalzebul thu a dong dinga na pai uh, Israel gam ah Pasian a om loh man a hiam? Tu-in Topa in hi bangin ci hi, Na kisialna lupna tung panin na kum suk kei ding hi, na si takpi ding hi.” 2 Kum Pite 1:3,4.

            Lawkite’ hun lai-a dawi siamnate pen tu huna sikha hopih theihna, a lungsim tawh mun danga thupiang khat theihtheihna, mailam thupiang ding genna cihte a kibang ahi hi. Endor khua leh Ephesus khua-a kam lamdang te     mah in a zuau thute mah uh tawh mi tampite lam pialpih lai hi. I mai panin kidalna kihawkkhia thei hi leh, a khem ding leh a susia dingin dawite in a siamna khempeuh uh zang a hihna i mu ding hi. Pasian a mangngilh sak dinga mite a kikhimna mun khempeuh ah Satan in a ai a zang ahi hi. Mite in Satan’ deihna a zuih uh ciangin, amaute a kiphawk theih ma-in, a lungsim uh buai khina a nuntakna uh kisia khin hi. Sawltak Paul in Ephesus pawlpi a hanthotna, tu huna Pasian’ mite in a ngaih ding uh ahi hi. “Phat tuamna a nei lo khuamial nasepnate tawh kisawh kha kei un la, tuate a siatna gen zaw un.” Ephesus 5:11. AA, laimai 288-290.

Upna Tawh Thungetna

            Amau leh amau muanhuai kisa-a ngaihmuanga a om mite, a puuksa vantungmite in a bawldan a mu tel thei (372,373) dingin i mitte kihong thei hi leh, eite zong i khuamuang lua ngam kei ding hi. Dawite in i sul hong zui ngitnget uh hi. Satan’ sawl bangin mi gi lote a gamta ding hi ci-in eite in i lamen hi; a hi zongin muh theih loh ama sawltakte panin i lungsim i kep loh lai takin, amaute in siamna a thak zangin, i muhna ah a lamdang nate hong bawl uh hi. Tuate i dona dingin i zat theih ding galhiam khat bek a hi Pasian’ Kammal tawh eite i kigalging khin hiam?

            Kimkhatte in tua na lamdangte Pasian’ kiang pana hong pai salai ding uh hi. I mai ah cina hong kidam sak ding hi. I muhna ah na lamdang hong kibawl ding hi. Satan’ zuau seelnate a tam zawsema hong kisep ciangin i thuak ding sittelna’a ding i kiging khol khin hiam? Mi tampite awkin kiman ding hi lo hiam? Pasian’ thupiak kician mahmahte pana lam piala, phuahtawm thute ngaihna tawh, tua zuau thute a sang dingin mi tampite’ lungsim kiging khol khin uh hi. A sawt lo in kidona hong om ding hi. I vekpi-in galhiam khempeuh i silh ding kisam hi. Pasian’ Kammal upna, thungetna tawh tua Thu sima, zat khiatna in Satan’ vangliatna pana i kidalna ding lum hi-a, Khris’ sisan tawh gualzawhna dong eite hong tunpih ding hi. 1 T, laimai 301. (373)

KHAWKPI 61

HONG TUNG DING HAKSATNA HUN

            Pasian’ thukham zahtak lohna hong uat semsem ciangin, tua thukham a zuite leh leitung mite’ kikal ah kikhenna kigi hong kician semsem hi. Pawl khat in Pasian’ thukhamte a itna uh a khan semsem mah bangin, pawl khat in a muhdahna uh khang semsem hi.

            Haksatna hun hong nai hanhan hi. Pasian hong kuanna ding hun hong nai mahmah ta a hihna thupiang hehute in hong lak hi. Gawtna a thuak sak nuam a hih loh hangin, a thuak sak veve kula, manlang takin hong hih ding hi.

            Pasian’ thuh kikna ni hong tung ta hi. Gam sunga a kibawl kihhuainate’ hanga khuisa-a a kapte’ taltang tung bek ah Pasian’ ciamtehna kikhen ding hi. Leitung tawh a kipawl mite in zuhaite tawh nekhawm dawn khawm uha, mawhna a bawlte tawh amaute kisia takpi ding uh hi. “Topa mit in midikte ena, A bil in amaute’ thungetna ngai hi. A hi zongin siatna a bawl mite Topa in nungngat hi.” 1 Peter 3:12.

            Eima gamtatna in, a nungta Pasian’ ciamtehna ngah zaw ding maw, suksiatna galhiamte tawh kivaatmai ding maw cih hong khensat ding hi. Leitung ah Pasian’ hehna mal khatkhat hong kia khin hi. Ama hehna hai sungah helpih om lo in a nunung gimna sagihte hong kibuak ciangin, tua hun cianga kisika bukna ding zon phing ding pen ziakai lua ta ding hi. Tua hun ciangin mawh mai sak sisan in mawhna neng baangte silkhia nawn lo ding hi.

            Sabbath tang hi’ng a ci khempeuh in ciaptehna ngah lo ding hi. Midangte’ kianga thumaan a hilhte nangawn, a taltang tung uah Pasian’ ciaptehna a ngah lo ding mi tampi om hi. Amaute in thumaan khuavak nei uh hi, a Topa uh’ deihna zong thei uh hi, i upna thu khempeuh zongtel uh hi, a hi zongin amaute in zui lo uh hi. Hilh kholhna leh Pasian’ ciimna thugilte a theite in a upna bangun a gamtat ding uh ahi hi. Amau’ zuih banga a zui dingin a innkuanpihte uh zong a sawl ding uh ahi hi. Hoih taka kimakai innkuan in thumaan tawh mi-hing’ (374) lungsim kizo thei a hihna leitung mite’ mai ah lak thei ding uh hi.

            Amaute Pasian a ki-ap zawh lohna, Pasian a zahtakbawl lohna uh leh biaknalam dinmun sang a tun zawh lohna un, midangte zong amau’ om bang ciat lel mah tawh lungkim sak uh hi. Pasian’ thute amaute a hilh zelzel mite’ omzia a zuihna uh tawh amaute a lauhuai mun tung takpi ding uh a hih lam lungsim kicing lo mite in mu kha lo uh hi. Jesu bek etteh thamcing ahi hi. Topa in amah bangci leh deih cih a thei nuam mi khempeuh in, kiniam khiata a hilh nop naupangte bangin Pasian’ mai ah khuk dinin, Lai Saingtho a sim ding uh ahi hi. Thuhilhsia khat peuh in Pasian’ mai ah bang zah-ta-in maipha a ngah hangin, Pasian in amah a piak khuavak banga gamtat ding a awlmawh kei-a, naupangno banga hilh ding a ut kei leh, amah khuamial leh Satan’ khemna sung tung dinga, midangte zong tualampi mah tunpih ding hi.

            I zia i tongte in kawk banna, nin banna a neih laiteng Pasian’ ciamtehna a ngahkhat zong i om kei ding hi. Eite in i zia i tong a poina teng i puahphat ding, i kha innpi a nitna teng i sil siang ding ahi hi. Tua ciangin pentekost ni-a nungzuite’ tungah guah masa a zuk mah bangin, eite’ tungah guah nunung hong zu ding hi.

            Khristian nuntak nungta zo kei ning, lamet a bei hi’ng, kuamah in a cih ding hi lo hi. Khris sihna tawh mi khempeuh’a ding a kicing vaihawmna om zo hi. Huhna i kisap hunhuna hong huh dingin Jesu a baihsa-in om hi. Upna tawh Amah na cial ding hi bek hi. Na thuumnate hong za-a hong dawng dingin Ama’n hong kamciam zo hi.

            A nungta a gamtang upna hi eite’n i kisap! Tua bang upna i neih kul hi, i neih kei leh haksatna hun ciangin i cimawh ding hi. Tua bang upna i neih nak leh i lampi hong liah ding khuamial in eite hong lungkia sak hong lungkham sak zo lo ding hi. Tua khuamial in thupha tampi hong pia dinga Topa hong pai cianga Ama vangliatna a liah hi lel hi. I phut khaksa thute (374,375) panin hi thu i thei ding hi. A mipawlte tawh Pasian thu a kiseel ni ciangin tua i phut khak thu in hehnepna leh lametna hong guan ding hi.

            Ei mahmah leh i tate leitung tawh kisawh kha lo dinga i kikep ding hun hi ta hi. I zia i tong puantualpi sawp sianga, Tuuno’ sisan sungah i paak sak ding hun hi ta hi. Kiphatsakna, lunggulhnate leh khalam thadahnate i zawh ding hun hi ta hi. Eite khanglo-a i zia i tong a kikhaikim dinga i hanciam ding hun hi ta hi. “Tu ni-in Ama aw na zak uh leh na lungtang uh khauh sak kei un.” Hebrai 3:7,8,15.

            Kigin kholh ding hun hi ta hi. A siang lo numei pasalte’ tal tungah Pasian’ ciamtehna kikhen ngei lo ding hi. Leitung a khenglah numei pasalte’ tal tungah zong kikhen ngei lo ding hi. Zuau a gen lei, a khem hat lungtang a nei numei pasalte’ tal tungah zong kikhen ngei lo ding hi. Tua ciaptehna a ngahte pen Pasian’ mai ah kawk banna a om lote hi a, vantung a tung dingte ahi hi. Ute naute aw, mainawt un. Kigin kholh ding a kisapna naphawk theihna ding ciang lel uh hih thu tawh kisai tu-in tomno khat bek kong gelh hi. Tulai hun a lauhuaina na theihna dingun no mahmah in Lai Siangtho kan tel un. 5 T, laimai 209,212-216.

Buaina Pipen Sabbath Hi

            A nunung kidona lianpi a piangsak pen Sabbath thu hi dinga, leitung mi khempeuh kihel kim ding hi. Mite in vantung ki-ukna thu guipite sangin Satan’ thute pahtawi zaw uh hi. Satan in ama thuneihna ciaptehna lim dinga a pahtawi sabbath maan lo pen amaute in sang uh hi. A hi zongin Pasian in Ama thupiakna tungah Ama ciaptehna koih zo hi. Tua Sabbath tegel in a phuang khiate’ min tuak pua-a, tua in a neite tuak a lak a kiphiat thei lo ciaptehna ahi hi. Hih thu mite in a theina dingin i hilh ding ahi hi. Pasian’ gam ciamtehna pua zaw ding maw, langpanna gam ciamtehna pua zaw ding cih a thupi mahmah a hihna amaute i lak ding hi. Amaute in ciaptehna a puak zawkzawk pen uh’ gam mi (375,376) hi pah hi. A kituancilsa Ama Sabbath dial a sang khai dingin Pasian in eite hong cial hi. 6 T, laiami 352.

            Hun beisa-a mi siangthote a phial mang den a ngian siam lungsim mah in tu-in zong Pasian zahtaka Ama thukhamte a zui mite leitung panin nilmang ding hanciam lai hi. Mi tampi in a zuih ngeinate leh thuciinte a nial ciilteel mi tawmno khatte’ tungah Satan in a hehna hong lak ding hi. Pasian’ mite lang khat ah a pang dingin mi gi lote leh mi gina lote tawh mi minthang dinmun sang pipite kipawl ding uh hi. Pasian’ mite a zahko dingin mihau, miliante leh mipilte hong kikop ding uh hi. A bawlsia nuam ukpite, thuhilhsiate leh pawlpi mite in amaute sawm sim ding uh hi. Kampauna leh laikung tawh a hi-a, kisialhna, tawnna leh zahpihna tawh a hi zongin, amaute in Pasian’ mite’ upna suksiat sak ding hanciam ding uh hi. Amaute in a hi lo lamin thu genin, hehna tawh kam pau ding uha, mite’ hehna so sak ding uh hi. Amaute in Lai Saingtho Sabbath a nialna ding uh “Lai Siangtho in hi bangin ci hi” a cih ding uh om lo a hih manin, tua awng hukna dingin bawlsiat theihna ding thukham hong bawl ding uh hi. Mipi’ pahtak leh panpihna a ngahna dingun gam ukte in Sunday thukham bawl ding ngetna hong thukim ding uh hi. Pasian a zahtakte in Thupiak Sawm sunga thukham khat palsatna ding vaihawmna mang zo lo ding uh hi. Hih thu tungtang ah thutak leh thukhial kidona galpi nunung hong piang ding hi. Hih thu tawh kisai uplahna a nei dingin eite hong kimawk nusiat lo hi. Mordekai’ hun lai mah bangin Pasian in A thutak leh A mite hong gual zo sak ding hi. 5 T, laimai 450,451.

Huihpi Nung Ding Kiging In

            Langpanna leh hehna huihpi a nang zo dinga A mite a kigin kholh theina dingin, hun nunung ciangin bang piang ding cih Pasian in hong lak zo hi. Hong piang ding thu a thei kholte in, gimna hun ciangin Topa in Ama mite hong kem nading hi ci-in kihehnema, hong tung ding huihpi ngaka a tut hithiat ding uh hi lo hi. Thadah lo in nasep hanciama, upna a kip a kho tawh (376) a Topa uh a ngak mite banga eite i om ding ahi hi. A thupi khol lo nate tawh i lungsim i buai sak ding hun hi lo hi. Mite a ihmut kalin, Topa’ mite in hehpihna leh gupna a ngah lohna dingin, Satan a geelin manlah mahmah hi. Khuamial sungah Sunday dianna hong kipan ta hi. Makaite in a thu taktak pen seel uh hi. Tua dianna sunga a kihel mi tampi in bang pen a kisem hi hiam cih mu lo uh hi. Kineih khemdan siamin Khristian taktak bang mah a hih hangin, hong pau khiat tak ciangin gulpi lungsim hong kilang ding hi.

            La phuakpa in, “Mihing” hehna in Nang hong phat ding uha, a om lai hehna teng a hih leh Nangmah in na len ding hi,” ci hi. Psalm 76:10. Zia-etna thutak mipi mai ah hong kikoih dinga, zahkona a tuamtuam a thuak hangin tua thute pen kisittelna leh kikuppi pen hong suak ding hi, cih na ahi hi. Mite’ lungsim om khong thei lo ding hi. Kiseelna khempeuh, zahkona khempeuh, gensiatna khempeuh pen mite lung hihmawhsaka, a lusu ding lungsimte a photna ahi hi. 5 T, laimai 452,453.

            Mipawl khat i hihna tawh Pasian in i sep dinga hong piak nasep i sem khin nai kei hi. Sungday thukham hong kikhauh zat cianga hong piang ding thu ah i kiging khol nai kei hi. Lauhuaina hong naina limte i muh ciangin i dian khiat ding hi ta hi. Genkhohna in a gensa hi-a a piang ding mah hi, Topa in A mite hong kem nading hi, ci-in upna tawh eite kihehnemin, hong tung ding siatna kuamah in galet hithiat bek kei ni. Lungsim suahtakna kepna ding bangmah hi lo-a i om hithiat mawk leh eite Pasian’ deihna a sem i hi kei ding hi. Sauveipi a ki-awlmawh losa nasep i zawh khit matengin hih gimna hong tun lohna dingin lungsim takpi tawh deihtaka thungetna vantung ah i puak toh ding ahi hi. Deihtakpi-in thu ngen ni. I thungetnate tawh kituakin semkhia ni. Satan pen a gual zo, thutak pen zuau thu leh thukhial tawh akikhelbawl gawp bangin hong kimu kha ding hi. Hun beisa-a  Pasian in galte’ khut sung pana A mite a hotkhiatna i phawk kik ding Pasian in deih hi. Satan’ khut sung pana suahtak ding a piang zo lo ding tawh a kibat ciangin, Pasian in Ama (377) vangliatna a kilat khiat sakna dingin, a khengval a nasia lua hunte teel tawntung hi. Mihing’ dongtuahna pen Pasian’ hamphatna ahi hi.

            Ute naute aw, nomau’ suahtakna ding leh midangte’ mailam ding i mai-a haksatna’a dinga kiginkholhna tawh kisai a hih lam na phawk uh hiam? Note’ lang khat ah langpanna hong om ciangin na nan zawhna dingun, Pasian ki-apna leh Pasian zahtakna taktak na nei uh hiam? Pasian in kei’ tung tawnin thu hong gen hi. Gam ukte’ mai hong kitut hun hong tung ding hi. Thumaan na let khempeuh nakpi in hong kigensiatsak ding hi. Mi tampi in tu-a a mawk beisak uh hunte, hong tung ding haksatna hun’a dinga Pasian in hong sawl kigin kholhna-a zat dingin hoih mahmah hi. 5 T, laimai 713-717.

           

Pasian’ Thukhennate

            Hun khakna i naih ta hi. Gam sung tengah Pasian’ thuhkikna tung ta a hih lam kei hong kilak hi. Hong piang baih ding thute tawh kisai-in Topa in hong hilh hi. Lai Siangtho panin khuavak hong taang hi. Hi napi khuamial in leitung teng tuama, khuamial sahpi in mite tuam hi. “Amaute in kilemna leh lungmuanna om hi, a cih lai takun, amaute’ tungah thakhatin siatna hong tung dinga, amaute suakta lo ding uh hi.” 5 T, laimai 99.

            Pasian in leitung a kepna teng lakhia ta ding hi. Sihna leh kisuksiatna hong piang baih ding hi. Gitlohna leh tatsiatna-a kipan mizawngte’ tunga a kiphasak mahmah mihaute’ tungah siatnate hong khang ding hi. Koi mun koi mun ah om ta leh Pasian’ kepna sungah a om lote in bukna mu lo ding uh hi. Mihingte kipantah uh hi, a nasia theithei galhiamte tawh mite a liam sakna ding uh leh a thahna dingun a siamna teng uh zangkhia ding uh hi. 8 T, laimai 50.

            Gam sung tengah Pasian’ thukhenna hong tung hi. Kidona leh kidona ding thute, meikang leh tuileet tawh kisuksiatnate in, hun bei donga a nasia semsem ding gimna hun hong nai mahmah ta a hihna hong gen hi. (377,378)

            Gam tuamtuam ah gimna lian pipi hong piang baih ding hi. Jesu hong pai masiah tua gimnate bei lo ding hi. Mun khempeuh uka, vantung ah Ama tokhom a koih Pa’ na semin, ni dang sangin eite i kipawl khop zawk ding kisam hi. Pasian in A mite hong nusia lo hi. Ei zong Amah taisan kei peuh lehang i tha hat ding hi. 3 TT, laimai 286. (378)

KHAWKPI 62

HAIH KHIATNA HUN

            Sawltak Paul in ute naute hong hansuah hi: “A tawp khakna ah ute naute aw, Topa’ sung leh Ama vangliatna sungah thahat un. Gitlohna ni hong tunga, note in na khempeuh hih zo-a na din zawhna dingun, Pasian’ galhiam khempeuh na silh un,” ci hi. I mai-a hong tung ding ni aw ei! Pasian’ tate hi ung a cite lakah kihaih khiatna hong tung ding maw! Midikte lakah midik lote hong kimu ding hi. Khuavak lianpi nei napi-a tua khuavak sunga a gamta lo mite in, amau’ simmawh khuavak zah tawh kizui-in khuamial nei ding uh hi. Paul’ kammal sunga om thute i ngaihsut dingin hoih hi: “Keimah in midangte thu hilhin, thu khat peuh ah kei mahmah a cimawh ka hih lohna dingin, keima pumpi kemin, thu ka mang sak hi.” Langpang pawl ah kua behlap thei ding cih galpa in a muhna dingin lim takin zong hi. Topa hong pai baih ta ding hi. Tua hun ma-in thu khempeuh khen satsa-in om ding hi. Hehpihna tawh amaute a kipia khuavak banga agamta mite, Topa’ lama a pangin kisim ding hi. TM, laimai 163.

            Pawlpi siansuahna hun hong tung hanhan hi. Pasian in a siangtho a thumaan mipawl nei hi. Hong tung baih ding kihaih khiatna hunpi sungah eite in Isarel mi phazah i theithei ding hi. Topa in a lawhpi tawi-a A buh phual a zap siang silsel ding hun hong nai hi cih limte in hong lak hi. 5 T, laimai 80.

Suahtakna A Zongte’ Gualzawhna

            Pasian’ mipawlte kei hong kilak hi. Amaute nakpi-a a kisinna ka mu hi. Kimkhatte upna tawh nakpi-in kiko uha, Pasian’ kiangah thuum uh hi.

            Kimkhatte tua nakpi-a thuumna ah kihel lo uh a hihna ka mu hi. Amute in lung hihmawhna leh kidopna mel nei lo uh hi. Amaute in a kiim uha om khuamial nilkhia lo uha, tua in meii lompi bangin amaute tuam hi. Vantungmite in amaute nusia uh hi. A tha neih zah uh tawh dawite do-a, amaute a huh dinga lung kia lo-a Pasian a cialte a huh dingin tua vantungmite pai vingveng a hihna ka mu hi. A suahtakna ding uha a na (379) hanciam lote vantungmite in nusia uha, amaute ka mu nawn kei hi. Thu a ngente a hih leh nakpi-in kiko-in thu a ngetnget uh cianin, Jesu’ kiang pan khuavak khat veivei amau kiangah hong taangin, amaute tha ngahsakin, a mai uh zong taang sak hi.

            Kisinna bang hiam ci-in ka dong hi. Tua pen Laodikia mite’ kianga Thumaan Teci in a gen khiat tang taka teci-panna in a piansak kisinna a hih lam kei hong kilak ka mu hi. Tua in a sang mite’ lungsim sungah na sem dinga, dinmun sang sakin thumaan thutak genkhia sak ding hi. Kimkhatte in tua tang taka teci-panna sang nuam lo ding uh hi. Amaute in tua thu hong langpan ding uha, tua in Pasian’ mite’ lakah kisinna hong piangsak ding hi.

            Thumaan Teci-i teci panna a lang zong kingai lo hi. Pawlpi’ mailam ding tawh kisai teci panna a buppi-in a kinial sam loh hangin, kizaangkhai ngaihsut mahmah hi. Tuateci panna in kisikna taktak piangsak dinga, tua thu a sang khempeuh in thu mangin sianthona a ngah ding uh hi.

            Vantungmi in, “Ngai in,” hong ci hi. A sawt lo in tum theih tampi, ngaih mahmah, kituak mahmah banga a ging khat ka za hi. Ka zak ngei la aw khempeuh sangin ngaih zaw hi. Hehpihna, khualna, pahtawina leh a siangtho lungdamna tawh kidim bang ahi hi. Tua in ka pum ka tak hong lungdamsak hi.  Vantungmi in, “En in,” hong ci hi. A kising zuahzuah mi hon khat ka mu-a, ka en gige hi. Lungsim takpi tawh nakpi-in thu ngena a kap ka muh ngeite hong kilak hi. Amaute’ kimkota a cing vantungmite thuap nih pha uh hi. Amaute a lu pan a khe dong uh galhiam vive tawh kituam hi. Galkap honkhat bangin amaute kituak diamdiamin kiin uh hi. Amaute’ maitang ah a thuak uh galdona leh, nakpi-a kitomnate hong kilang hi. Amau’ omdan lunggim mahmah tuak a hih hangin, tu-in amaute vantung vangliatna khuavak tawh taang uh hi. Amaute in gual zawhna ngah uh hi. Tua a hih manin amaute’ sung panin gen zawh loh lungdamna, sianthona leh kipahnate a gingkhia ahi hi. (379,380)

            Tua mihonte a pha zah kiam hi. Kimkhatte kisingkhia-a, lam kalah kinusia hi. (Mangmuhna 3:15-17 en in.) Lung himawh lo-a a kidawm lote, gual zawhna leh hotkhiatna manphasa-a, tua ngahna dinga nakpi-a a thuumthuumte’ laka a kihel lote, khuamial sungah kinusia hi. A hi zongin mihonte pen thumaan lena amaute tawh hong kipawl mite in hong behlap uh hi. Dawite in amaute umcih lai uh a hih hangin, amaute’ tungah hihzawh nei nawn lo uh hi. (Ephesi 6:12-18)

            Galhiam a thuah mite in vangliatna tawh thumaan a gen khiat uh ka za hi. Tua in muibun hi. A kihen mite ka mu hi; numei kimkhatte a pasalte un hena, naupang kimkhatte a nute a pate un hen hi. Thumaan a zak lohna ding uha khamna a thuak a citak mite in tu-in khauh takin thumaan hong len uh hi. A beh a phung uh a kihtakna bei ta hi. Thumaan bek mah amaute in thupi hongsa ta uh hi. Nuntakna sangin zong manpha zaw deih huai zaw sa uh hi. Amaute in an duh tui duh bangin thumaan duh uh hi. Tua zaha kikhelna a piangsak bang hiam ci-in ka dong hi.  Vantungmi khat in, “Tua in guah nunung, Topa’ kiang pana tha thak, thumna vantungmi’ tangkona ahi hi,” ci-in hong dawn hi.

            Tua teeltuamte in vangliatna nei uh hi.  Vantungmi in, “En in,” hong ci hi. Tua mi gi lo a hi thu-um lote’ lam ka en hi. Amaute phia kheukho uh hi. Pasian’ mite’ lawpna leh vangliatna in amaute thangpai sak hi. Mun khempeuh ah buaina, buaina vive om hi. Pasian’ khuavak leh vangliatna a nei mihonte dona ding vai kihawm hi. Khuamial in amaute tuam cip a hih hangin, amaute in Pasian muangin, Ama lamah kip takin ding uh hi. Amaute lung manga om ka mu hi. Tua ciangin deihtaka amaute Pasian’ kiangah akikona ka za hi. Sun tawh zan tawh amaute kiko uh hi. (Luka 18:7,8; Mangmuhna 14:14,15.)

            Hih kammalte ka za hi: “Pasian aw, Nangma deih bangin piang ta hen, Na min a thanna ding a hih leh Na mite a suahtakna ding lampi bawl in. Ka kimkot uha lawkite’ khutlum panin kote hong honkhia in. Amaute (380,381) in thah hong sawm uh hi; a hi zongin Nangma khut in hotkhiatna hong pia thei hi.” Hih kammal teng khawng ka ciamteh thei hi. Amaute in a kilawm zawh lohna uh nakpi-in kiphawk uha, Pasian’ deihna bangbanga a piang dingin ki-ap uh hi. Jakob mah bangin, a vekpi-un, a peng om lo in, a suahtakna dingun kitomin deihtak-in thuum uh hi.

            Amaute nakpi-a kiko ding a kipat lai takun, amaute a hehpih vantungmite, amaute a honkhia dingin kuan nuam uh hi. A hi zongin amaute a uk a tun sang  vantungmi khat in phal lo hi. “Pasian’ deihna kicing khin nai lo hi. Amaute in hai dawn lai ding uh hi. Tuiphumna tawh amaute tui a kiphum lai kul hi,” ci hi.

            Van leh lei a lok gawp Pasian awging ka za hi. (Joel 3:16: Hebrai 12:26; Mangmuhna 16:17 en in.) Zin nakpi-in liing hi. Innte kicimin mun khempeuh ah kitheh hi. A ngaih mahmah la aw ging bangin gual zo-a kikona kician mahmah khat ka za hi. Tua mihonte ka en hi. Tua madeuha gentheihna leh mat leh hen thuak mite ahi hi. Amaute kikhahkhia ta hi. Khuavak lianpi amaute’ tungah taang hi. Amaute etlawm buang sam ei! Gimna leh lungkhamna khempeuh bei ta hi. A mai suah khempeuh uah cidamna leh mel hoihna kimu hi. A galte uh, a kiimkot uha lawkite, misi bangin tuuk uh hi. Hotkhiatna a ngah mi siangthote’ tunga a taang khuavak amaute in thuak zo lo uh hi. Van panin meii lakah Jesu hong pai-a, a citak, haksatna a thuak mihonte, mit phiat kal khat sungin vangliatna khat pan vanliatna khat ah a kikhel Matengin, amaute’ tungah a tang vangliatna om den hi. Hankhukte kihongin, sih theih lohna silhin mi siangthote hong thokhia uha, “Sihna leh han khuk kizota!” ci-in kiko uh hi. A hing lai mi siangthote tawh van kimlai ah Topa a dawn dingin amaute kila to-a, a si thei lo kam khempeuh panin vangliatna leh gualzawhna late kisakhia ziahziah hi. 1 T, laimai 179-184.

           

Galkap Hon Nih

            Ka mangmuhna ah nakpi-a kido galkap hon nih ka mu hi. Hon khat pen leitung ciamtehna a tuang dial (381,382) khat in makaia, hon khat pen sisan a bang Mangpa’ dial in makai hi. Topa’ galkap lak panin hon khat khit hon khat in galpa’ lam pawma, galpa’ lam panin minam khat khit minam khat in thupiak a zui Pasian’ mite tawh a kipawl uh ciangin dial khat khit dial khat leivui lakah kinusia hi. Van kimlai ah a leng  vantungmi khat in khut tampi sungah Immanuel’ dial a piak lai takin, a thahat galkap mang khat nakpi-in kiko-a, “Hong kigual un. Pasian’ thupiakte leh Khris’ teci-panna tunga a citakte in a panmun uh la ta hen. Amaute lak pan hong paikhia un la a tuamin hong om un. A siangtho lote lawng kei un. Tua hi leh note Kong ngai dinga, no’a dingin Pa hi-in, note Ka tanu leh ka tapa na hi ding uh hi. Topa’ huhna a deihte, thahatpa dona dinga Topa’ huhna a deihte khempeuh hong paikhia ta hen,” ci hi.

            Tu-in pawlpi in gal do hi. Tu-in zankim khualmial sungah eite i oma, leitung buppi milim bia i suak khin dek hi. A hi zongin gal kidona khit ciangin gual zawhna ni hong tung ding hi. Vantung ah Pasian’ deihna a pian mah bangin leitung ah zong piang ding hi. Tu hun ciangin vantung thukham lo buang thukham dang khat zong om lo hi. Mi khempeuh lungdamin innkuan khat hi ding hi. Khris’ dikna puan a hi – phatna leh lungdam kohna puante kisilh ding hi. Na khempeuh in ithuai thei mahmahin, Pasian’ tungah phatna leh pahtawina pia den ding uh hi. Leitung buppi vantung khuavak in tuam ding hi. Lungdamna tawh kumte hong kivei ding hi. Kha tang zong ni tang bang hi ta dinga, ni tang zong tu-a a tanna zah sangin tang ding hi. Tuate mu-in zingsang aksite in la sakhawm ding uha, Pasian’ tate lungdamin kiko ding uh hi. “Mawhna om nawn lo ding hi. Sihna zong om nawn lo ding hi,” ci-in Pasian leh Khris zong kiko khawm ding uh hi.

            Hi bangin kei hong kilak hi. A hi zongin pawlpi in muh theih muh mawh galte a do kul veve ding hi. Mihing meel pua Satan’ sawltakte leitung ah om hi. Mipite’ Topa a langpan dingin mite kipawl khawm uh hi. Khris’ in hehpihna tokhom mai-a thuumna a bawlna mun (382,383) nusia-a thuh kikna puantual a silh masiah tua kipawlnate om suak ding hi. Satan’ sawltakte khuapi khempeuh ah oma, Pasian’ thukham a langpante party tuamtuam ah kilom khawm sakin manlah mahmah hi. Mi siangtho hi ung a cite leh thu-um lote hi ung a cite tua party-te tawh pang khawm ding uh hi. Pasian’ mite’a dingin a thanemte’ i hih ding hun om lo hi. Tawm vei cik zong kikem lo-a i om khak ngam ding hi lo hi. 8 T, laimai 41,42. (383)

KHAWKPI 63

PHAWK DING THU PAWL KHAT

            Honpa in Anungzuite a hilh thute, a khang a khanga Ama thuzuite’ phattuamna ding ahi hi. Amah in, “No leh no kikem un,” a cih ciangin hun bei kuana a nungtate zong a hong ci ahi hi. Kha Siangtho’ hong huhnate eite in lungsim takpi tawh eimah ciat in i pahtak ding ahi hi. 5 T, laimai 102.

            Haksatna lianpi i mai mahmah ah om hi. Zia-etna leh mawhzolnate a do ding leh sep dingte a sem dingin a sikdo upna kisam hi. A hi zongin eite lungdam takin i gual zo ding hi; navaka, thu ngena, upna tawh a om mi khat beek galpa in tuun zo lo ding hi.

            Lai Siangtho sunga Pasian’ thumaan a mu ute naute aw, hih leitung khang bei kuanin note in bang hih ding na hi uh hiam? Hih thute thupi-in a taktak a hih lam zong na phawk uh hiam? Van leh lei a kibawl kigin kholhna a thupi lam na thei uh hiam? Khuavak a ngah khempeuh, hilhkholhna thu sim thei-a a za thei khempeuh in a sunga a kigelh thute ngai uh hen; bang hang hiam cih leh a hun hong tung ta hi. Leitunga lungkhamna khempeuh a pianna bulpi a hi mawhna tawh kuamah kisawh kha kei uh hen. Lusu-in khua don lo in kuamah omom nawn kei uh hen. Na masuan ding uh a kician lopi-in omsak kei un. Topa’ lamah om takpi na hih lam uh kician sak un. “Kua in thuak zo ding hiam?” cih dotna lungsim taktak leh lau-a a liing muk panin gingkhia sak un. Hih a manpha mahmah a nunung bel hun hoih sungin na zia na tong uh na lam tohna uah na a hoih pente na zang uh hiam? Khuavak nung na zui uh hiam? Na upna uh na pulaakna uh tawh kizui-in na gamta uh hiam?

            Ngeina banga thu-um in, zuih kawmkawm zong nei hi napi-in, kicing zo lo a hih manin tawntung nuntakna kitaan thei hi. Lai Siangtho’ deihnate zong kim khat zui-in, Khristian khatin zong kingaihsun sam hi napi-in, Khristian zia-le-tong a kisam zah kicin lo hih manin kisiatna sung kitung thei hi. Pasian’ hong hilhnate (384) awlmawh lo-a don lo-a na om leh, mawhna khenglahin panghangin na om leh, na masuan ding a kician sak na hi ta hi. Tawikhaina tawh hong kikhai dinga na leek zo kei ding hi. Hehpihna, lungnopna leh mawh maisaknate hong kilak khiat sak ding hi; Jesu in hong pai san dinga, na thungetnate leh na thuumnate’ bat phakna mun hong pai kik nawn lo ding hi. Hehpihna a om lai-in, Honpa in hong thuum sak lai in, a tawntung’a ding kician sak ni. 6 T, laimai 404,405.

            Satan ihmu lo hi; hilh kholhna thu-kician in mui a but lohna dingin amah pilvang kiukiau mahmah hi. Siamna leh khem theihna tawh Ama Thu sunga hong kilang khia Pasian’ deihnate Satan in a lehlamin hei hi. Thumaan thutak laihna dinga a geel zuau thute tawh Satan in mihing’ lungsim kum tampi uk zo khin hi. Hih a lauhuai hun sungah a maana gamtate in, Pasian zahtakna tawh, “Topa aw, Na nasep ding hunta hi; bang hang hiam cih leh amaute in Na thukham a mawkna suaksak uh hi,” cih David’ kammalte tawh Pasian’ min phat ding uh hi. Psalm 119: 126. 9 T, laimai 92.

            Leitunga om mi dang khempeuh sangin thumaan a thei masa zaw-a kineite i hi hi. Tua a hih ciangin i nuntakna leh i zia i tongte i upna tawh a kituak a hih ding kisam hi. Vantung ansaal sunga sen dingin buhlom bangin midikte a kilom hen ding hun leh, a nunung ni lian ni cianga meiphual sungah khul dingin tahumte a kikhop ding hun a hong tung hi ta hi. A hi zongin taang leh tahum pen “an laak hun dongin khang khawm” ding hi.

            Leitung nuntak hun sung teng mi dik lote tawh midikte om khawm ding uh hi. Khuamial’ tate lakah khuavak’ tate kithehthang dinga, a kilamdanna uh mi khempeuh in mu ding hi. Tua a hih ciangin Pasian’ tate in, “khuamial sung pana a lamdang Ama khuavak sungah a hong samkhia Pa’ phatna na lah khiat” ding uh ahi hi. Lung sung pana hong pokhia ki-itna maan, nuntakna sunga a kilangkhia Khris tawh kibatnate in, leitung mite’ tunga kipia vantung khuavak hi-a, amaute in a hoihna a muh uh ciangin pakta mahmah ding uh hi. 5 T, laimai 100. (384,385)

            Mi gi lote leh dawite tawh a kikhen kei leh kuamah in Pasian bia zo lo ding hi. Khris lamah pang dinga a hanciam mi khempeuhte’ suul ah kha gi lote om ding hi, bang hang hiam cih leh Satan in a matsa mite khahsuah nuam peuhmah lo hi. Mi gi lote in mawh sakna a thuak theihna dingun khemna sungah amau leh amau ki-ap ding uh hi. Tua mite in cihtakna puantual silh ding uha, a hih theih liai uh leh teelsate nangawn khem ding uh hi. 4 T, laimai 595.

           

Hun Bei Dek Ta

            Hi leitung ah Khris hong pai kik ding ziakai nawn lo ding hi. Hih thu thupuak bulpi hisak un.

            Hong liah hong dal Pasian’ Kha, tu nangawnin zong hih leitung panin kilakhia ta hi. Huih sia, guah sia, pingpei, kangmei, tuiciin leh leitung tuitunga gimnate, khat khit khat hong kizui hi. Leitung pilna in tuate gen nuam hi. Pasian’ Tapa hong naina a hong hilh, i kimkota a dima om limte, a hi lo lamin kigen hi. Pasian’ nasemte a kiciapteh khit matenga huih lite a nun lohna dinga a len vantungmite, mite in mu tel thei lo uh hi. Tua huihte a khah dingin Pasian in A vantungmite a sawl ciangin a hih leh, laikung in zong a gelh theih loh kidona nasiapi tak hong piang ding hi.

            Kiliahna puan kihawkkhia thei hen la, leitunga hong tung ta ding Pasian’ deihna leh thukhennate mu thei-in, nomau’ omzia kimu thei hi le-uh cin, nomau’ kha leh na mihing-pihte uh’ kha’a dingin lau-in na liing ding uh hi. Lungtang kitam kham ding zahin deihtakin thungetnate vantunglam na kah to sak ding uh hi. Biakinn mai leh biakna tau kikal lah na kap ding uha, khalama na mittawtna uh leh na nungtolhnate uh pulaakin na thuum ding uh hi. 6 T, laimai 406-408.

Khris Hong Kum Hak Ding Ci-a Upna Lauhuai

            A lung sunga, “Ka Topa hong pai hak ding hi,” (Mat-Thai 24:48) a ci gi lo nasempa in, Khris a ngaka kinei ahi hi. A puathama Pasian’ nasem dinga kipia “nasem” khat hi-a, a lungsima Satan’ thu a zui ahi hi. (385,386)

            Mi-zahko theite bangin amah in thumaan langpan lo hi, a hi zongin a lung sunga a vom – Topa hong pai hak ding hi, cih pen a nuntakna ah kilangkhia hi. Upmawh thu in a tawntung thute amah awlmawh sak lo hi. Amah in leitung thuciinte umin, leitung ngeina leh gamtatnate zui hi. Angsung khualna, kiphatsakna leh duhhopnate tawh hong kidim hi. A u a naute amah sanga a saan zawk ding lau-in, amaute’ hanciamnate gensia-in, amau’ vaihawmnate langpan hi. Tua bangin ama nasepphite vatvat hi.

            Pasian’ mite’ kiang panin amah leh amah kidaithahin, Pasian a zahtak lote tawh kipawl semsem hi. “Zuhaite tawh” an ne tui dawnin hong omin, amau’ lungsim mah pua-in amau’ gamtat bangin hong gamta hi. Tua bangin ci-le-sa’ lungsim in amah khima, lung-ap-na, awlmawh lohna leh thadahna in zo gawp hi. 5 T; laimai 101,102.

           

Khuavak Thak Kici In Mi Tampi Khem Ding

            Leitung hong tung ding siatnapi sungah Pasian’ mite a kihel dingin Satan in lamen hi. Khris’ hong pai ding a nai mah bangin, amaute a siat sak zawhna dingin Satan hanciam zawkan lai ding hi. Numei pasal hong diang ding hi. Khuavak thak, mangmuhna thak kim khat ka nei uh hi hong ci ding uh hi. Amaute in upna gi-suang a khin nop man uh ahi hi. Amau’ thuhilhnate Lai Saingtho tawh kituak lo ding a hih hangin mite in um ding uh hi.

            Zuau thu hong thang ding hi. Tua thaang sungah mi kim khat awk ding uh hi. Amaute in tua thuthangte um ding uha, gengen ding uh hi. Tua bangin khemhatpa tawh amaute a kizom hong suak ding uh hi. Tua in Pasian’ thupuakte a kilang tangin hong nial den khol lo ding hi, a hi zongin up lohna kitawphah a hih lam, lam tampi tawh hong kilang ding hi. Gen khialhna khempeuh in thu up lohna tha khauh sak dinga, tua mun panin mi tampi a khial lam tung ding uh hi.

            Thumaan panin mite kaih khiat ding Satan hanciam den a hih manin, khialhna a hi ding tawha kibang (386,387) khempeuh eite in encik tinten lua liang kisak-huai lo ding hi. 5 T, laimai 295,296.

Aituam Ki-apna Thupi

            Tu ni-in simtham thungetna leh Lai Saingtho simna i neih kei leh, zing ciangin ki-awlmawh lo zawsem lai ding hi. Awlmawh lohna hong kizom suak ding hi, bang hang hiam cih leh lungtang sungah awlmawh lohna khaici tang khat kituh khin hi. Tua bang hi lo in khuavak khempeuh na khol lehang khuavak tampi i ngah ding hi. Mawh zolna khat vei nan zawhna in a nihna zong nan zawhna tha hong guan hi. Angsung deihna nusiat zawhna khempeuh i gual zawhna a tung nung zaw ah hong kha ding hi. Zawhna khempeuh in tawntung nuntakna dinga kituh khaici ahi hi. 5 T, laimai 120.

            Lungsim takpi tawh Pasian’ kiang a zuan mi siangtho kempeuh in, upna tawh Pasian’ kiangah thungen le-uh, amaute’ thungetna kipia ding hi. Na thungetnate hong kisang pah lo hi ci-a na ngaihsut leh zong, na upna in Pasian’ kamciamte a khahsuah loh ding ahi hi. Pasian muang ngam lah kei in. “Ngen un, na ngah ding uh hi,” cih Ama kamciam muang in. John 16:24.

            A khial thei dingin Pasian ciim lua-a, hoih taka a gamta Ama mi siangthote’ tungah na hoih khat peuh a pia lo dingin Amah dik lua hi. Mihing in khial thei hi. Lungsim takpi tawh thu a ngen phial zongin, ama a dinga a hoih nate, Pasian’ min a thang sak dingte ngen kha den khol lo hi. Tua bang a hi mah zongin a ciim a dik i Pa in i thungetna hong za-in hong piak pah hun zong om veve hi. A hi zongin Amah in ei’a dinga a hoih bel leh Ama min thanna ding nate hong pia hi. Pasian in thupha hong pia hi; eite in Ama vaihawmna mu thei hi lehang, ei’a dinga a hoih pen Amah in thei a, i thungetnate hong dawng hi cih eite in i mu thei ding hi. Hong sia sak ding khat beek hong kipia lo hi, eite’a dinga a hoih lo, hong sia sak thei ding khat peuh i nget pen taangin, thupha i kisap pen Ama’n hong pia hi.

            I thungetnate hong kidawng pah lo hi ci-a i ngaihsut ciangin, i upna kho takin i len dinga, muan lahna (387) them zong i lut sak kei ding hi. Bang hang hiam cih leh tua in Pasian tawh hong khen ding hi. I upna a kaat leh Topa’ kiang panin bangmah i ngah kei ding hi. Pasian i muanna a khauh ding kisam hi; i kisap pen lai takin, guah mal bangin eite’ tungah thupha hong kia ding hi. 1 T, laimai 120,121.

Khristiante In Vantung Thute Gengen Nuam

            Vantung ah Pasian pen a phungpi ahi hi. Tua lai ah sianthona a thupi bel ahi hi. Pasian tawh kithu-tuahna a susia bangmah om lo hi. Eite tua lai va zin thei hi lehang, vantung lungsim pen hih leitunga i lung sungah hong om ding hi. A hi zongin eite in, tu-in zong vantung thute ngaihsutna ah nopsakna i neih kei leh, Pasian theihtel ding i hanciam nop kei leh, Khris’ zia-le-tong i et nop kei leh, sianthona in i lungsim a hong laak kei leh, -- vantung i lametna pen a mawkna taktak hi ding hi.

            Pasian’ deihna bang zuih ding pen Khristiante’ ngimna sang bel hi den ding hi. Amaute in Pasian’ thu-a kipan Jesu’ thu, Khris in Amah a itte’a dinga a bawl kholh a nuam a saingtho innpi thu, gengen nuam ding uh hi. Hih thute ngaihsuna, Pasian’ kamciamte tawh kha a kivaak ciangin, “hong tung ding leitung-i vangliatna” a ciam khol bangin sawltakpa in na gen hi.

            I mai ah a nunung bel kidona lianpi om hi. Teelsate nangawn a khem zawh leh a khem dingin, a hih theih zahin zuau na lamdangte leh limte leh khem theihna thumaan lo khempeuh tawh Pasian’ zia-le-tong a lehlama a lah theina dingin Satan hong hanciam ding hi. Vantung pana khuavak a tam zaw a kisam den mi a om ngei leh, tua mite pen hih a lauhuai hun sunga, Ama thukham siangtho a kem ding leh, leitung mite’ mai ah Ama zia-le-tong a lak dinga Pasian in a cial mipawlte ahi hi. A siangtho mahmah tavuan apna a ngah mite in um ung a cih uh thumaan tawh khalam khan tohna, thahatna nei ding uh. 5 T, laimai 745,746. (387,388)

Pasian’ Mite In Mainawt Ding

            Tulai thumaan a um A mite tawh Topa in na sem hi. Amah in a thupi mahmah thute hong pian khiatna dingin geel hi. Ama vaihawmna tawh tu dongin Amah in na sem hi. A mite kiangah, “Mai nawt un,” ci hi. Lampipen kihong nai lo mah hi. A hi zongin amaute in upna leh hanna tawh a kalsuan uh ciangin, Pasian in amaute’ muhna ah lampi kician sak ding hi. Tanglai-a Israel mite mah bangin a phunphun zong om mah ding hi. Pasian in ama nasepna a mainawtna dinga ngimna tuam tawh a phot toh mite’ haksatnate ngawh ding uh hi. Haksatna sung a tun sakna tawh Pasian in amaute a sittel a hih lam amaute in mu thei lo uh hi.

            Khristian nuntak haksa-a, nasep ding zong a haksa diak tawh a kibat hun om thei hi. I mai ah siatna hong tunga, i nungah sihna leh kol bulhna a om tawh kibang hi. Hi napi a lungkiat-huai khempeuh lakah Pasian’aw in, “Mai nawt un,” hong ci sensen hi. I mitte in khuamial pailetin a muh theih loh hang, i khete a vot tuihualte in hong nawk hangin, bangbang hong piang ta leh eite in hih thupiak i man ding ahi hi. 4 T, laimai 26.

            Lungsim phel nih a pha nuntakna sungah uplahna leh khuamial na mu ding hi. Biakna hanga hehnepna a hi-a, leitung in a hong piak lungnopna a hi zongin na ngah tuan kei ding hi. Na tawm bek a kisepna Satan’ thadah tutphah tungah tu kei in. Dingkhia in la nang zong na ngah theih ding a hi dinmun a sanglam ngim in. Khris’a dinga na khempeuh nusiat ding pen hamphatna lianpi ahi hi. Midangte’ nuntakzia en ke’n la, amaute ettehin a sang zaw kah to lo in om kei in. A khial thei lo a maan etteh ding khat bek na nei hi. Jesu’ nung bek zuihna in muanhuai hi. Midangte khalamah thadah tuantualin a om uh leh amaute nusia-a Khristian zia-le-tong a sang zaw ah a kal suan dingin khensat in Vantung zia-le-tong kisin in. Na panmun ah ihmu kei in. Na kha’a ding maan tak leh hanciam takin sem in. 1 T, laimai 241. (388,389)

KHAWKPI 64

KHRIS I SIAMPI LIAN

            Vantunga mun siangtho sunga na sepna theihtelna in i upna bulpi ahi hi. Ev, laimai 221.

            Mual tunga amah a kilak lim bangin Moses in leitunga mun siangtho na lam hi. Tua in “tu lai tak hun’a ding lim ahi hi; tua mun ah silpiakte leh kithoihnate kipia hi.” “Mihing’ lam a hi lo, Topa’ lam a hi biakbuk taktak a hi mun siangtho-a nasem” pen eite’ siampi lian Khris ahi hi. Sawltak John in a mangmuhna sungah vantunga Pasian’ biakinnpi na mu hi. Tua lai ah “tokhom mai-a a kuang meivak sagihte” zong na mu hi.

            Kamsangpa in vantunga mun siangtho a dei masa pen na mu thei hi. Tua lai-a a om “meivakna sagihte” leh “kham biakna tau” te zong na mu hi. Tuate pen leitung mun siangtho sunga kham meivak khuam sagih leh namtui halna taute in hong lak hi. Tua ciangin “Pasian’ biak innpi kihong” kidalna puan sunglama siangtho bel mun zong John in mu hi. Tua lai ah “Pasian’ thuciamna singkuang” mu hi. Tua pen Pasian’ thukham koihna dinga Moses in a bawl singkuang siangtho tawh hong kilak hi.

            John in, vantunga mun siangtho ka mu hi, ci hi. Tua mun siangtho pen Jesu in eite’a ding na a sepna mun hi-a, a taktak pen ahi hi. Moses in a lam mun siangtho pen a lim bek ahi hi.

            Kumpite’ Kumpipa a omna mun, “a tultulte in Ama na sema, a thenthente Ama mai ah a dinna” mun, tawntung tokhom vanglianpi tawh a kidim biakinnpi, Topa a phat uh ciang uha a mai uh a liah a taang sera-phim-te’ omna vantunga biak innpi pen a liatna leh a thupina leitunga innpi khat beek in tuk zo lo hi. A hi zongin vantunga mun siangtho leh mihing tatkhiatna dinga tua lai-a a kisem nate tawh kisai a thupi thumaante pen leitunga mun siangtho leh biakpiaknate tawh a hong kihilh ding ahi hi.

            Van a kah tak ciangin eite’ Honpa in Ama siampi nasep kipan pah hi. Paul in, “A taktak-i lim bek a hi (390) khut tawh a kibawl mun siangtho sungah Khris tum lo hi; eite’ taanga Pasian’ mai ah a kilaak dingin vantung teekteek ah a tum hi,” ci hi. Khris’ nasepna pen khenpi nih pha-a, a hun a tuam tuak hi-in, a mun zong a tuam tuak a hih mah bangin, a limciing nasepna zong khen nih pha-a, nisim leh kumsim biakpiakna kici-in, biakbuk sungah a dei tuam tuakin om hi.

            Van a kah ciangin a kisik thu-umte’ taangin Ama sisan paulamin Pasian’ mai ah Khris a kilaak ding a hih mah bangin, nisim biakpiakna ah zong mawhneite’ taangin siampipa in siangtho mun ah kithoihna gan si a theh ahi hi.

            Khirs’ sisan in, thukham’ mawh sakna panin a kisik mawh nei mi a khah khiat hangin, a mawhna phiat sak lo hi. A nunung siansuahna hun mateng mun siangtho sungah tua mawhna om ding hi. Tua mah bangin a lim ciing pen ah zong mawh phelna gan si in a kisik mitung panin mawhna a lak khiat hangin, siansuahna ni dongin mun siangtho sungah bang lai hi.

            A nunung bel thaman piakna ni ciangin, misite “amau’ gamtatna bangbang laibu sunga a kigelhte panin thu kikhen” ding hi. Tua ni ciangin mawh phelna Khris’ sisan hangin a kisik taktak mi khempeuhte’ mawhnate vantung laibu sung panin kiphiat ta ding hi. Tua bangin mawhna a kiciaptehna panin mun siangtho kihah siang ding hi. A limciing pen ah hih siansuahna naseppi a hi mawhnate phiat siangna pen siansuahna ni-a nasepnate in hong lak hi. Leitunga mun siangtho hahsiangna pen tua mun a nin sak mawhnate, mawh phelna gan sisan tawh kisiak siangin kiman sak hi. PP, laimai 356-358.

            I theih mahmah dinga a hoih hih nasepnate i ngaihsut theih lohna dingin Satan in sim zawh loh thute tawh i lungsim hong meng hi. Mawh phel na’ng kithoihna leh vangliatna khempeuh a nei Tamsipa hong musak ding thumaante, khemhatpa in hua mahmah hi. Ama a dingin mite’ lungsim Jesu’ thumaan tawh a kikhen sak zawh ding a thupipen a hih lam ama’n thei hi. (390,391)

            Jesu in mawhneite’ taang ding Ama khut liamsa leh Ama pumpi kikeeksa paulamin thuum sak hi. Ama thu a zui nuam mi khempeuhte’ kiangah, “Ka hehpihna nang’a dingin kicing hi.” “Keima hakkol kisuan un la, Ka thu hong sin un; bang hang hiam cih leh Keimah in lungsim neema kiniamkhiat mi ka hi hi. Na kha un tawldamna a mu ding hi. Bang hang hiam cih leh Ka hakkol nuama, Ka van zong zang hi,” ci hi. Tua a hih ciangin kuamah in ama ginat lohna a kibawl pha thei lo dingin tuat kei hen. Tuate bawl phat zawhna ding Pasian in upna leh hehpihna hong pia ding hi.

            Siansuahna ni lianpi sungah i om ta hi. A limciing pen ah siampi lianpi in Isareal mite’a ding siansuahna a bawl lai takin, mipawl lak pan amaute a kinawh mang lohna dingin Topa’ mai ah mawhna kisikna leh kiniamkhiatna tawh mi khempeuh in a kha uh a gawt ding uh ahi hi. Tua mah bangin, nuntakna laibu sungah a min uh a tham sak nuam khempeuh in tu-in, amau’a ding hun hoih a om liai lai-in, mawhna hanga dahna leh kisikna taktak tawh Pasian’ mai ah a kha uh a gawt ding uh ahi hi. Lungsim sung nakpi-a, lim taka sittel ding kisam hi. Khristian hi’ng a ci mi tampi takte in a neih uh lunsim hawmpi-teng a paih khiat uh kul hi. Gual zo nuama kitomtom gamtat hoih lote a nuaisiah nuam mi khempeuh mai ah nakpi-a kidona om hi. Kigin kholhna nasep pen mimal nasep ahi hi. A honpi-a hotkhiatna a kingah ding hi lo hi. Mi khat’ sianthona leh ki-apna in mi dang khat-i kisapna dip sak thei lo hi. Minam khempeuh Pasian’ thukhenna mai tung khin ding a hih hangin, leitung ah mi dang khat zong a om lo bang phialin mimal khat ciat ngentel takin Pasian in sit ding hi. Mi khempeuh kisittel ding a hih manin, nin banna, sa tonna leh tua bang khat peuh hong kimuh khak loh ding thupi hi.

            Siansuahna nasep mahialna ding pen ciliaphuai mahmah hi. Tua sungah vai thupi mahmah kihel hi. Vantung mun siangtho ah thukhenna a kisep lai tak ahi hi. Kum tampi kisem khin zo hi. A sawt lo in, -- bang zahin manlang ding cih kuama’n thei lo---a nungta laite’ thu (391,392) kisit ding hi. A kihtak-huai Pasian’ mai ah i nuntaknate ki-en kik ding hi. Hun dang khempeuh sangin tu lai takin mi khempeuh in, “Thu ngen un la, ngak un; bang hang hiam cih leh bang hun hi ding cih na thei kei uh hi,” ci-a Honpa’ hong hanthotna i ngaih ding thupi hi.

            Sittel thukhenna a kizawh ciangin, sihna ding a hi-a nuntakna ding a hi zongin mi khempeuhte’ masuan ding khensatsa hi ta ding hi. Van-a meii lakah Topa’ hong kilat madeuhin hun hoih bei ta ding hi. Tua hun ding mu kholin Mangmuhna sungah Khris in, “A dik lote, a dik lo mahin om lai hen; a kihhuaite a kihhuai mahin om lai hen; a dikte a dik mahin om lai hen; a siangthote a siangtho mahin om ta hen. En in, a manlangin Kong pai ding hi; mi khempeuh a gamtatna bang ciata piak dingin thaman Kong keng ding hi,” ci hi.

            A si thei pumpi mah tawh midikte leh mi gi lote hi leitung ah nungta lai ding uh hi. Mite in ankung suanin, inn lamin, an ne-in, tui dawnin om ding uha, vantunga mun siangtho ah a kidokkik thei lo thukhenna nunung kitangko ta a hih lam phawk lo ding uh hi.

            Zan kim lai-a a kiphawk lo guta bangin, mi khempeuh’ masuan ding khensatna hun, mimawhte’a dinga kipia hehpihna a kilak khiatna hun hong tung khian ding hi. GC, laimai 488-491. (392)

KHAWKPI 65
JOSHUA LEH VANTUNGMI

            Muh theih leitung leh muh theih loh leitung a khen kidalna kihawkkhia thei-in, mihing tatkhiatna ding tawh kisai-a Khris leh  vantungmi siangthote leh, Satan leh dawite’ kikala kidona lianpi Pasian’ mite in mu thei hen la; mawhna kol pana mite a suahtakna dinga Pasian’ nasep na lamdang leh gilopa’ khelbawl nopna pana amaute’ a huutna dinga a zat tawntung, A vangliatna amaute in thei thei uh hi leh, Satan’ khemnate a nan zawhna dingun amaute kiging khol nuam zaw ding uh hi. Amaute’ lungsim in tatkhiatna nasep a thupina leh a zaina, Khris tawh nasem-khawm a hihna uh tawh a mai uha a nasep ding uh a liatna, cihte a thupina hong mu ding hi. Amaute kiniamkhiat nuam ding uha, a hi zongin amaute in hotkhiatna a ngahna dingin vantung buppi in a kinna hong thei-in tha hong ngah ding uh hi.

            Satan’ nasepna leh Khris’ nasepna, i Tamsipa in Ama mite a mawhsakpa a zawhna cihte a hong lak a muibun bel leh a lawphuai bel thu Zekhariah’ genkholhna sungah om hi. Kamsangpa in a mangmuhna ah, Topa’ mai ah “puan a ninpi silha” a ding, gentheihna lianpi a thuak a mite’a dinga Paisan’ hehpihna a ngen, siampi lianpa Joshua mu hi. Amah a langpan dingin ama ziat lamah Satan ding hi. Satan’ mawhsakna panin siampi lianpa in a mah leh a mite  hu zo lo hi. Amaute’ taanga a ding a hihna tawh kipelh hi ci lo hi. Amaute’ taanga a ding a hihna tawh amaute’ mawhna lim a lak puan ninpi silhin Vantungmi’ mai ah amah dingin, a mawhnate uh pulaakin, a hi zongin a kisikna uh leh a kiniam khiatna uh lakin, mawhna a mai sak Tankhiapa’ hehpihna muangin, Pasian’ kamciamte upna tawh ngenin om hi.

            Tua ciangin mawhneite a Honkhiapa, Khris mahmah a hi tua  Vantungmi in, Ama mite a mawhsakpa pau sak lo in, “Satan aw, Topa in nang hong taai hen. Jerusalem a teel Topa teekteek in nang hong taai hen. Hih in meikuaung sung pana kiteenkhia singkhuah hi lo hiam? ci hi. Zekhariah 3:2. (393)

            Joshua’ thuumna kisanga, “Ama tung panin a puan ninpisuah khiat sak un,” cih thupiakna om hi. Joshua’ kiangah  Vantungmi in, “En in, na tung panin na mawhna ka lakhia zo hi; puan hoih kong silh sak ding hi,” ci hi. “Tua ciangin amaute in a lu tungah lukhu hoih khat khu sak uha, puan a silh sak hi.” Zekhariah 3:4,5. Ama mawhna leh a mipawlte’ mawhna kimai sak hi. Israel mite puan hoih kisilh sak hi. Tua in amaute a kiguan Khris’ dikna ahi hi.

            Satan in Joshua leh a mipawlte a mawh sak mah bangin, a khang a khangin Pasian’ hehpihna leh maipha a zong mite Satan in mawh sak hi. Mangmuhna sungah Satan pen, “i u i naute a mawhsakpa,” “ a sun a zana i Pasian’ mai ah amaute a mawh sak pa,” kici hi. Mangmuhna 12:10. Gilopa’ khut sung panin kihonkhia-a Tuuno’ nuntakna laibu sungah a min uh a kikhum mi khempeuhte kido den keei hi. Gilopa’ thalnialna om lo-a Satan’ innkuan sung pana Pasian’ innkuan lamah a kingah mi khat zong om lo hi. Topa a zong mite Satan in a mawh sak pen amaute’ mawhna a muhdah sak man hi lo hi. Amaute’ ginat lohna a selpho hi lel hi. Amaute in Pasian’ thukham a palsat uh ciang bekin Satan in amaute a ngah zo hi pan hi. Ama mawh zonna pen Khris a muhdah man hi pipen hi. Hotkhiatna sepna panin Jesu in, Satan in mihingte a hencipna kol sutata, Satan’ vangliatna pana amaute a honkhia ahi hi. Khris a tungnun zawkna thute Satan in a muh ciangin a hehna leh a thangpiahna kiso suah semsem hi. Ama hotkhiatna a sang mihing tate Ama khut sung pan a suhkhiat zawhna dingin a hatna leh a siamna khempeuh Satan in zang hi.

            Up khialhna lamah Satan in mite paipih hi. Pasian muang lah sakin Pasian’ itna tawh amaute kikhen sak hi. Pasian’ thukham a palsat dingin amaute khem hi. Tua ciangin amaute ama a bangin genin, ama khut sung pan amaute Khris in a laak khiat ding panpi-in pang hi. Mawh maisakna leh hehpihna deiha lungsim takpi tawh Pasian a zongte in ngah ding uh a hih lam ama’n thei hi. Tua a hih manin amah in amaute’ lungkhiatna dinga a mawhna uh a mai uah a lak ahi hi. Pasian’ thu a (393,394) mang dinga a hanciam mite amah in a suk theih na’ng hun zong tawntung hi. Amaute’ nasep a hoih bel leh a deihhuai belte nangawn amah in a sia suaksak nuam hi. Khelpilna, gitlohna leh ngian kawi sim zawh loh tawh mite a mawh sakna ding a muh theihtheihna ding hanciam tawntung hi.

            Tua mawhsaknate mihing in nial zo lo hi. Mawhna a bang puan tawh amawhna pulakin Pasian’ mai ah ding hi. Kisikna leh upna tawh amau’ nuntakna Amah a kem sak mi khempeuhte’ taangin hong panpih Jesu in hong thuum sawnsak hi. Jesu in amaute’a ding thuum sakin, Kalvari-a siksan muanhuai tak tawh amaute a mawhsakpa hawlkhia hi. Singlamteh tungah sihna donga Pasian’ thukham kicing taka a zuihna in van leh lei-a a om vangliatna khempeuh Amah ngahsaka, Amah in A Pa’ kiang pana mawhneite’a ding hehpihna leh kilemna nget sak hi. Ama mite a mawhsakpa’ kiangah Jesu in, “Satan aw, Topa in nang hong taai hen,’ Hih mite in Ka sisan tawh a kileisa, meikuang sung pana kiteen khia singkhuah hi,” ci hi. Upna tawh Amah a beelte in, “En in, na tung panin na mawhna ka lakhia zo hi; puan hoih Kong silh sak ding hi,” cih khamuanna ngah uh hi.

            Khris’ dikna puan a silh mi khempeuh, teelna a ngah, a citak, a thumaan mi-in Ama mai ah ding ding hi. Khris khut sung panin Satan in amaute sutkhia zo lo ding hi. Kisikna leh upna tawh Ama kepna a ngen mi khat beek Khris in galpa’ khut sung tung sak lo ding hi. “Amah in Kei tawh kilemna a bawl theihna dingin Ka thahatna amah len sak un; amah in Kei tawh kilemna bawl ding hi,” (Isaiah 27:5) cih Ama kammal pen kamciam ahi hi. “Kong sawlna banga na tat leh, …. hih a ding mite’ lakah omna ding mun nang Kong pia ding hi,” (Zekhariah 3:7) cih Joshua tunga kipia kamciam pen mi khempeuh’a ding ahi hi. Hih leitung mahmah ah zong amaute’ lang tuak ah Pasian’ vantungmite om dinga, nung ciangin Pasian’ tokhom kima a ding vantungmite lakah amaute ding ding uh hi.

            Pasian’ mi a kicite, Topa’ mai-a puan ninpi tawh a ding banga hong kilahna in, Ama min a lo khempeuh (394,395) in kiniam khiatna leh lungsim sung kisittelna hong nei sak ding hi. Thumaan zuihna tawh amau’ nuntakna a siangthosak takpite in kiniam khiatna takpi nei ding uh hi. Amaute in nin bang lo Khris zia-le-tong a nai muh semsem uh ciangin, Ama lim a sun dingin ut semsemna nei ding uha, amau’ sungah sianthona mu lo semsem ding uh hi. Eite in mawhna tawh kidim i hih lam i phawk ciangin, i dikna, i sianthona leh i suahtakna a hi dingin Khris i belh ding ahi hi. Khris bek mah in eite’ taangin thuumna hong bawlsak thei hi. Ei’ dikna siksan ding a om loh hangin Ama dikna siksanin Khris in ei hong mawhsakpa pau thei sak lo ding hi.

A Beibaang Pawlpi

            Zekhariah in a muh Joshua leh Vantungmi’ thu in, siansuahna ni lianpi a bei kuana Pasian’ mite omzia ding hong lak hi. A beibaang pawlpi in zia-etna leh haksatna thuak ding uh hi. Pasian’ thupiakte leh Jesu’ upna a lente in gulpi leh a pawlte’ hehna thuak ding uh hi. Satan in leitung pen ama a-in tuata, lampial pawlpite zong uk khin hi. A hi zongin Satan’ thuneihna a nial mihon khat om hi. Satan in tua mite leitung panin phiat mang zo leh a gual zo takpi ding ahi hi. Israel mite a susia dingin lawki gamte a thuzawh mah bangin, mailam a sawt lo in Pasian’ mite a susia dingin leitunga mi gilote amah in hansuah ding hi. Pasian’ thukham palsata mihing’ thupiakte a mang dingin mi khempeuh kisawl ding hi. Pasian’ lamah thumaan taka a pangte in totna, kosiatna, nawhkhiatna thuak ding uh hi. Amaute, “a nute a pate uh, a u a naute uh, a beh a phungte uh leh a lawm a gualte un nial ding uh hi.”

            Pasian’ hehpihna bek mah amaute’ lametna hi-a, amaute’ kidalna in thungetna bek mah ahi hi. Vantungmi’ mai ah Joshua a thuum mah bangin, a beibaang pawlpi in lungsim kitamkham leh upna takpi tawh amaute a Panpihpa Jesu’ tungtawnin mawh maisakna leh hotkhiatna ngen ding uh hi. Amaute in a nuntakna uh mawhna a dimlam phawka, a thanemnate uh leh a kilawm zawh lohnate uh zong kimu uh hi. Amau bek mah a ki-et uh ciangin amaute lungkia uh hi. Joshua a mawh (395,396) sak dinna a din mah bangin, amaute a mawh sak dingin khemhatpa amaute’ kiangah ding hi. A puan ninte uh leh a ginat lohnate uh kawk hi. A thanemnate uh leh a hainate uh, lungdam thei mel lo-a a omnate uh, Khris a sut zawh lohnate uh, tuate in a Tanpa uh minsia sak hi ci-in gen hi. A mawhnate uh kisawpkhia zo ngei lo ding, lamet a bei hi ta ci-a a maute a patau sak dingin amah hanciam hi. Tua bangin amaute’ upna suksiat sak leh ama khemnate amaute in um dinga, Pasian tawh kipawl nawn lo in, sapi’ ciaptehna hong sang ding hi ci-in Satan in lamen hi.

            Satan in Pasian’ mai ah amaute mawh sakin, amaute in a mawhna uh hangin Pasian’ kepna zong taan khin hi, amaute mawh nei a hih ciangin suksiat ding mah hi, ci hi. Amaute zong amahmah bangin Pasian’ maipha a ngah lo ding lian maha kilawmte hi, ci hi. “Vantunga keima mun leh kei tawh hong kipawl vantungmite’ mun a luah ding mite hite hiam? Pasian’ thukham a zuite hi ung ci uh a hih teh, amaute in zui takpi mah uh a hiam? Pasian a it uh sangin angsung a it zawte hi lo uh hiam? Pasian’na sep ding sangin amau’ phattuamna ding a kin zawte hi lo hiam? Amaute in leitung nate enlah uh hi lo uh hiam? A nuntakna uh a gial sak a mawhnate uh en in. A huaihamnate uh, a ki-etsatnate uh, khat-le-khat a kimuhdahnate uh ngaihsun in,” ci hi.

            Pasian’ mite thu tampi ah khial mah uh hi. Mawhna a bawl dinga ama khemsa mite’ mawhna Satan in tel theih peuhmaha, tuate amah in a uang theithei-in genin, “Pasian in kei leh ka nungzuite phiatmang dinga, ko’ mawhna bang mah mawhna a nei mite khawi ding na hiam? Tua banga na hih leh Topa aw, a thutang na hi thei kei ding hi. Na tokhom zong dikna leh thutang tawh a kip hi thei lo ding hi. Thutang in amaute na mawh sak ding hong ngen hi,” ci hi.

            Khris’ thuzuite in mawhna a bawl khak uh ciangin, gilopa’ khut sungah amau leh amau kipia lo uh hi. Amaute in a mawhnate uh nusia-in kiniam khiatna leh kisikna tawh Topa zong uha, Panpihpa in amaute’ taangin thuum sak hi. Amaute’ lungdam theih lohna hanga (396-397) mindaina a thuak pa, amaute’ mawhna leh a kisikna uh a thei pa in, “Topa in hong taai hen, Satan aw; Hi mite’a dingin Ka nuntakna Ka pia zo hi. Amaute Ka khutpeek sungah kigelh khin hi,” ci hi.

           

Khris’ Dikna Puan Tawh Kituam

            Pasian’ mite in Ama mai ah a kha uh gawt bawla lungsim siangtho a nget uh ciangin, amaute’ tung panin “puan ninte laak khiat sak un,” cih thupiakna omin, “En in, na tung panin na mawhna ka lakhia zo hi, puan hoih Kong silh sak ding hi,” ci-in hanthotna kamte kipau hi. Kizia-etin, kikhem napi a citak veve Pasian’ tate’ tungah kawk bang lo Khris’ dikna puan kisilh sak hi. Simmawhna a thuak a beibaang mite vanglian puanpaak kisilh sak hi. Leitung siatnate tawh amaute buahbaang  nawn lo ding uh hi. A minte uh Tuuno’ nuntakna laibu sungah kip suaka, a khang a khanga a citak mite tawh amaute kisim khawm hi. Amaute in khemhatpa’ khemnate nial uha, gulpi’n a hawksan hangin a cihtakna uh panin kiam tuan lo uh hi. Tu-in khemhatpa’ khemnate panin amaute lau nawn lo uh hi. A mawhnate uh mawhna a phuang khiapa’ tungah kisuan khin ta hi.

            A beibaangte a mawhna uh kimai sakin kisang bek lo in kipahtawi lai hi. A lu tung uah “lukhu hoih” kikhu sak lai hi. Amaute Pasian’a dingin kumpite leh siampite hi ding uh hi. Hi mihonte Satan in mawh sakin suksiat ding a hanciam lai takin, vantungmite a kimu lo in vak kawikawi uha, amaute’ tungah a nungta Pasian’ ciamtehna khen uh hi. Zion mual tungah Tuuno tawh a ding amaute hi uha, amaute a tal tung uah Pa’ min zong kigelh lai hi. Amaute in tokhom mai ah la thak sa uh hi. Leitung pana kitankhia mi, sang khat then li leh tul lite lo ngal in tua la sa thei lo uh hi. “Hih mite in Tuuno’ paina khempeuh a zuite ahi hi. Hih mite in mite’ lak pana kitankhia, Pasian leh Tuuno’a dinga gah masate a hi uh hi. Amaute’ kam sungah zuauna kimu lo hi; bang hang hiam cih leh Pasian’ tokhom mai ah mawh nei lo in amaute om uh hi.” Mangmuhna 14:4,5. 5 T, laimai 467-476. (397)

KHAWKPI 66

“EN IN, A MANLANGIN KONG PAI DING HI”

            Amah hong pai baih ding ci-a i up mah bangin Topa hong pai ding a hih leh, mite’ mai ah thumaan i puakna ah a beisa kumte sangin i hanciam zawk tham ding kilawm hi cih ngaihsutna, zanlam diak zan khat ka lungsim ah Kha Siangtho in hong guan hi.

            Hih thu tawh kizomin 1843 leh 1844 kum sunga kumkikna thu-umte’ hanciamnate ka phawk kik hi. Tua hun lai-in inn khat khit inn khat kipai ngiatngiatin, Pasian’ Thu sunga kigen thute mite’ kiangah hilhin, gim ing cih om lo in kihanciam hi. Khatna vantungmi’ thupuak taktai taka a na tangko mite’ hanciamna zah sangin a nasia zaw eite in i neih ding ahi hi. Hih leitung tangthu a beina ding i naih hanhan hi. Jesu hong pai baih takpi ding cih i up mah bangin, ni dang sangin nasep i hanciam zaw tham ding hi. Mite’ kiangah patau a ko dingin eite hong kisawl hi, I nuntakna ah thumaan leh dikna-i hihzawhna i lahkhiat ding ahi hi. A kipalsat thukham tawh kisai-in leitung in Thukham-piapa tuak baih ta ding hi. Thu-palsatna panin thumaan lamah a kiheite bek mah in mawh maisakna leh lungnopna ngah ding uh hi.

            Nuntakna thu a hi thumaan a nei khempeuh in, a nei nai lote’ kiangah puak sawn nuam uh hi leh, nasep a hoih khop khat kizo khin mah ding hi ven maw! Samaria numei’ sapna tawh Samaria mite Khris kiang hong tun uh ciangin, Khris in amaute’ thu A nungzuite’ kiangah, an laak ding beka a om lote tawh kibangin na gen hi. “Tu zawh kha li ciangin an laak hun hong tung ding ci hi lo na hi uh hiam? Khuadak un la lote en un; an laak huna paak phiaphua ta hi,” ci hi. John 4:35. Samaria mite in thumaan za nuam lua uh a hih manin amaute’ kiangah Khris ni nih taam hi. Manlah ngel ding a hi veh! Tua ni nih sung nasepna panin, “Ama thugenna hangin mi a tam zaw in Amah um uh hi.” “Ei mahmah in Ama thugenna i za hi. Amah leitung Honpa, Khris taktak a hih lam i thei hi,” ci uh hi. Taang 41,42. 3 TT, laimai 435,436. (398)

Laak Tohna Hun Nai Ta

            Kaal khat khit kaal khat kihtak-huai gimna a piangte ka zak ciangin, bang deihna hi ding hiam, ci-in ka ngaihsun hi. A kihtak-huai mahmah gimnate hong kizom datdat hi. Zinling leh huihpite, kangmei leh tuileet tawh suksiatnate, nuntakna leh neihsa lamsa tampipi a beinate i zaza hi. Tua gimnate a ngeina bang lo, a kilem lo nate’ hanga hong piangkhia a hi dingin kingaihsun a hih hangin, tuate sungah Pasian’ deihna kimu thei hi. Numei pasalte in a tuah ding uh lauhuaina a phawk theihna ding uha Pasian in amaute a phawnna ahi hi.

            I up cil lai sangin Khris hong pai ding hun nai zaw ta hi. Kidona lianpi a beina ding nai ta hi. Gam sungah Pasian’ thukhennate hong tung ta hi. Tuate in, “Note zong kiging khol un. Bang hang hiam cih leh na upmawh loh lai takun mihing’ Tapa hong pai ding hi,” cih thu hong hilh hi. Matthai 24:44.

            Tu hun’a ding thumaan a deihna taktak a thei khin lo mi tampi tak i pawlpi sungah om lai hi. Beina hun hong nai ta hi ci-a tel taka hong lak hun zui limte hong pianna amaute in a awlmawh loh loh ding uh ka hansuah hi. “An laak hun in hong khenga, khuakhal hun lah be ta-a, ei’n lah hotkhitna i ngah kei hi,” ci-in hotkhiatna a ngahna ding uha a hanciam lo mi bang zahta a sawt lo in a kap zen tam!

            Hih leitung tangthu tawpna lamah i om ta hi. Genkholhna manlang takin tangtung hi. Sittelna hun zong hong bei hanhan hi. I mawk beisak ding hun tawm cik zong i nei kei hi. Galvilna ah ihmu kha kei ni. I lungsim leh i gamtatna ahi “Ka Topa hong pai hak ding hi,” ci kei ni. Khris hong pai baih ding cih thu, hilhna kam ciikte tawh gingkhia sak un. Mawhna kisika hong tung ding hehna pan a suahtakna dingun mun khempeuha om numeite leh pasalte i zol ding hi. I mai ah bang om hiam cih thei taktak lo i hih manin, a kiging khol pah lian dingin amaute hansuah ni. Khuadon lote leh awlmawh nei lo-a omte in Topa a kimuh theih lai-in a zon ding uh a gen dingin (398,399)lo sungah, nasemte leh pawlpi mite kuankhia ni. A kimangngilhsa Lai Siangtho thumaante a tangkona mun khempeuh uah nasemte in an laak ding mu ding uh hi. Tumaan a sang ding, Khris lama kha a ngahna dinga a nuntakna uh a kipia ding mite amaute in mu ding uh hi.

            Topa hong paibaih ding hi. Lung nuam taka Amah tawh i kimuh theina dingin i kigin kholh kul ding hi. I kim i pama om mite’ kiangah khuavak a hawm dingin i hih theih zahin i hanciam ding hi. Eite i dah ding hi lo in i lungdam ding hi zaw hi. I masuan ah Topa Jesu i omsak den ding hi. Amah hong pai baih ding a hih ciangin kigingsa-in ngakin i om ding hi. Amah mu-a Ama laak tohte sungah i kihel ding nuam zen si’n teh! I ngak zawh a sawt khit hangin i lametna i mualh sak ding hi lo hi. Kumpipa Ama mel hoihna tawh mu thei peuh lehang a tawntungin nuam i sa ding hi. “Ciah ta ni,” ci-in ka awng khia nuam hi. Ama tatsate tawntung inn ah A ciahpih dingin vangliatna leh thupina tawh Khris hong pai ding hun hong nai ta hi.

            Nasep matut kuanin, i cihna ding i theih loh lungkhamnate i tuak ding hi. A hi zongin vana vanglian thumte in na sema, Pasian’ khut in lengpei lenin Pasian in A kamciamte hong tangtung sak ding a hihna mangngilh kei ni. Diktatna tawh Ama na a sem ding mite leitung panin Ama’n hong kaikhawm ding hi. 8 T, laimai 252-254.

Gualzo Dinga Khapna

            Lungtang, lungsim leh kha ah tu lai taka i nasep a teen theihna dingin nakpi-in thu ka ngen hi. Lungkhamna ding hong tam ding hi. A hi zongin Pasian a umte i hih mah bangin khat-le-khat kihansuah ni. Dinmun niam sak lo in, i upna hong mapat sakpa leh hong mahial sakpa i Topa mit suanin i dinmun i sang sak ding hi. Zan-a ka ihmut theih loh ciangin, Pasian’ kiangah thu ngenin ka lungtang ka laam to hi. Ama’n kei hong thakhauh sakin, khual leh tual ah Ama nasemte tawh Amah om a hihna muanna hong guan hi. (399,400) Israelte’ Pasian in Ama mite makaih lai-a, hun bei dongin amaute tawh Amah om suak ding a hihna ka theih ciangin, nuamin tha ka ngah hi.

            Thumna vantungmi’ thupuak tangkona a nasia zawsema mai a nawt ding Topa in deih hi. A khang a khangin A mite in gualzawhna a ngahna dingin Amah in na a sep mah bangin, tu-in zong pawlpi’a ding Ama ngimnate picing taka a kisep ding Ama’n deih hi. Ama thumaan leh dikna nasepna ah hatna khat pan a nasia zaw hatna ah, upna pan a kicing zaw muanna leh suanna ah A mi siangthote a mainawt ding uh Ama’n cial hi.

            Pasian in hong om pihin, phut khak i neih khempeuh ah tha hong guan ding a hih lam phawkin, Lai Siangtho thu guipite lenin suangpi bangin kip takin i ding ding hi. Topa’ min tawh thahatna pan thahatna ah i mainawt theihna dingin dikna thu guipite i nuntakna sungah teng sak ni. A tunga kipan tu hun dong Pasian’ Kha in hong hilha hong thukim pihna tawh a kikip sak i upna thu, siangtho taka i let ding ahi hi. Ama thupiak a zuite’ tungtawna Topa in mai a nawt sak Ama nasep manpha pen, eite’n i sep ding ahi hi. Tua nasep pen Ama hehpihna-i vangliatna tawh a hun zui-in hong thahat zawin hong kicing zaw ding hi. Galpa in Pasian’ mite’ theihsiamna mial saka, a hatnate uh kiamsak ding hanciam hi. A hi zongin Pasian’ Kha in a makaihna bangin amaute in a sep uh leh, a kisiasa mun luite puahphat kikna ding nasep theihna kongte Ama’n honsak ding hi. Ama mi-citakte’ tungah Ama gualzawhna nunung ciaptehna a khen dingin ukzawhna vangliatna leh minthanna tawh Topa van pana hong kum suk mateng amaute’ omzia pen a khangtolam hi den ding hi.

            I mai-a om nasep pen mihing’ hatna a om khempeuh tawh sep a kul ding ahi hi. Upna a hat zat khiat kul dinga, pilvang taka om denna zong kisam ding hi. Khat veivei i tuah khak haksatnate lungkiat-huaipipi zong hi thei ding hi. Nasep ding nasia lua a hih manin zong i lau kha ding hi. A hi zongin Pasian’ huhna (400,401) tawh Ama nasemte a tawpna ah gualzo ding hi. “Tua a hih ciangin,” ute naute aw, na mai uha om haksatnate hangin “na lungkiat loh ding uh ka deih hi” (Ephesi 3:13), Jesu in note hong ompih ding hi; A Kha Siangtho tawh note’ mai ah pai-in lampi hong honsak ding hi; a kisap hunhunin note hong huh ding hi.

            Eite’ sunga na a sem vangliatna tawh kizui-in, eite’ nget zah leh ngaihsut zah sanga a nasia zawthama a sem thei Pasian’ tungah Khris Jesu hangin bei hun nei lo khang tawntungin thupina om ta hen.” Ephesi 3:20,21. 3 TT, laimai 439-441.

            Zanlam diaka zan hun sunga ka mai-a hong kilak thute in ka lungsim hong bun mahmah hi. Mun tampi tak ah –khanlawhna nasep– ci-in dian khiatna nakpi-in a om tawh kibang hi. Pasian’ sapna mangin i mite hong kigual uh hi. Ute naute aw, Topa in thu hong gen hi. Ama thu mang lo ding i hiam? I meivakte taang sakin a Topa uh a pai ding a ngak mite bangin gamta lo ding i hiam? Tu hun in khuavak pua-a i kuan khiat ding hun ahi hi.

            Ute naute aw, “hong sapna thupha na ngahna uh tawh kizui-in gamtatna dingun, note kong cial hi. Na khempeuh ah kiniam khiatna, lungnemna leh lungduaina tawh khat-le-khat ki-itin kithuak un. Kilemna tawh kihen khawmin, lungsim pumkhatin na omna dingun hahkat un.” Ephesi 4:1-3. 3 TT, laimai 441,442.

Thumaan Mite’ Thaman

            Ute naute aw, van-a meii laka hong pai ding Khris’a dingin a kiging khol dingin note kong hanthawn hi. Ni simin na lung sung panun leitung etlahnate paaikhia un. Khris tawh kikholhna in a bangci hiam cih na theihna dingun kisin un. Khris hong pai ciangin thu-um mite’ laka pahtaakna ngaha lung nuam taka Amah a dawn mite lakah na kihel theihna dingun, thukhenna hun’a ding kiging khol un. Tua ni ciangin Pa Pasian leh Tapa’ vangliatna sungah tatkhiatte taangkhia ding uh hi. Vantungmite in kham gawsemte tumin, Kumpipa leh Ama gualzawhna tukpaakte a hi – Tuuno’ sisan sunga kisila (401) a kipaak sak mite dawn ding uh hi. Gualzawhna lapi kisakhia-in vantung buppi thawn ding hi. Khris in zawhna ngah ta hi. Vantung zumpi ah, Ama thuaksiatna leh kipumpiakna a mawkna a hih loh lam a lak teci-te a hi-Ama tatsa mite tawh Amah hong tum hi.

            I Topa a thawhkikna leh van a kahna in, Pasian’ mi siangthote in zong sihna leh hankhuk tungah zawhna ngah ding uh a hihna teci ahi hi. A zia a tong puantual uh Tuuno’ sisan sungah sawp sianga a paak sak mite’a dingin vantung kong kihong a hihna lim zong ahi hi. Mihing’ai-awhin Pa Pasian’ kiangah Jesu a kah to ahi hi. Pasian in Ama lim leh mel a suunte zong Ama thupina sungah a tum dingin hong paipih ding hi.

            Leitunga khualzinte’a dingin inn om hi. Midikte’a dingin puantual, minthanna lukhu leh gual zawhna nisuh hiangte om hi. Pasian’ vaihawmna bangin eite hong nopkhak sak khempeuh hong tung ding leitung ah om nawn lo ding hi. Theih dinga a haksa nate tua hun ciangin siang takin i thei ding hi. Hehpihna thuthuk zong i mai ah hong kipholaak ding hi. I leitung lungsim in buaina leh kamciam kipelhna bang beka a muhte pen kicinga a hoih mahmah a hih lam i mu ding hi. Haksa mahmah i sak tuah khaknate, a kicing itna in a geel a hih lam i thei ding hi. Eite’ hoihna dinga na khempeuh na a semkhawm sak pa’ hong donna i tel ciangin gen zawh loh lungdamna tawh lungdamin, i kipaak ding hi.

            Vantung buppi ah natna om lo ding hi. Tatsate’ inn sungah khitui luanna, misi vuina, dahna dial khipna cihte om lo ding hi. “Gam mite in ka cina, ci lo ding uh hi. Tua lai-a a teeng mite a mawhna uh kimai sak ding hi.” Isaiah 33:24. Lungdamna tuihual hong luang dinga a kumkumin hong thuk semsem ding hi.

            Nuntak tawntung i lametna mungpipa i muh ding hun hong sawt nawn lo ding hi. Ama kiangah hih leitunga i thuak haksatnate khempeuh bangmah tham hi lo ding hi. “Tua a hih ciangin thaman lianpi a hong ngahsak ding na muanna uh beisak kei un. Pasian’ (401,402) deihna na sep khit uh ciangin, hong khapsa na ngah theihna dingun, thuakzawhna na kisam uh hi. A sawt lo in, hong pai ding Pa hong pai dinga, hong ziakai nawn lo ding hi.” Hebrai 10:35-37. Khawdak un, khawdak un la na upna uh khangsak den un. Tua upna in tatsate’a ding a hi a zai zaw vangliatna sung hong tunpih dongin, Pasian’ khawpi kongpi dong a kawcik lampi ah note hong kha ta hen. “Tua a hih ciangin ute naute aw, Topa hong pai dongin thuak tentan un. Lokhopa in leitung gah manphate a ngahna dingin lung duai takin guah masa leh guah nunung a ngak hi. Note zong lungduai un. Na lungsim uh kip sak un. Topa hong pai ding hun nai ta hi.” James 5:7,8. 9 T, laimai 285-288.

            “Eite bangci ding cih hong kilang nai kei hi. A hi zongin Amah hong kilat ciangin, Amah tawh i kibang ding hi, cih i thei hi. Bang hang hiam cih leh eite in Amah a hi bangin i mu ding hi.”

            Tua ni ciangin Khris in Ama nasep a meetna hong mu ding hi. Kuamah in a sim zawh loh tua mihonpipen “lungdamna lianpi tawh Ama thupina mai-a mawhna nei lote” kici hi. Ama sisan tawh eite hong tana, Ama nuntakna tawh eite hong thuhilhpa in, “Amah in a gim thuakna thaman mu kik dinga, a lungkim ding hi.” Ed. Laimai 309.

           

Hansuahna Kam Vaikhakna

            Sau vei nungta dingin ka kilamen nawn kei hi. Ka nasep kizo dek ta hi…. I mite’a ding teci-panna a nei lai dingin ka kingaihsun kei hi. Lungsim kho a nei i mite in hih nasep tawisangna ding leh lamtohna ding a hoih thei uh hi. A hi zongin a lung sung uah Pasian a itna uh tawh, Pasian’ thute a thuk zawsema a kan ding uh kisam lai hi. 3 TT, laimai 443. (402,403)

            Hun paisa-a i tangthu en kikin, tu-a i dinmun dong mainawta i kalsuanna khempeuh ka muh ciangin, Pasian phat un! ka ci thei hi. Topa’ sep khiatna teng ka muh ciangin, lamdang sakna leh hong Makaipa Khris muanna tawh ka kidim hi. Topa in eite hong makaihnadan leh, hun paisa-a hong thuhilhnate i mangngilh kei ngal leh, mailam’a ding a lauhuai bangmah om lo hi. LS, laimai 196. (403)