UMM MAKAI PIPA HOPIHNA by Pastor Kap Lian Thang

Pastor Kap Lian Thang

Kong it: Naseppih sia/siamah te leh Pawlpi mite khempeuh,

Na vekpi un December kha nuamtakin na zangh kim thei ta un ci’n thu hong ngetsak ingh. I ngah thupha te sim kawmin Topa min I phat hi. Naseppih sia/siamah te leh pawlpi mite khut kilen in itna leh deihsakna tawh Pasian na isepkhopna te Pasian in thupha hong pia in hong om pih a hihna te I muh manin lungdam mah mah hang.

Abeisa 2018 kum in khamanpha 749 I ngah hi. Tukum 2019 November 30 ciangin kha manpha 774 I ngah ta hi. Sawm ah khat goal pen Tein tulguk leh zathum kikoihna ah November kha bei ciangin Tein tulgiat val ngah ta I hih manin Topa hoih na mu in a kum kum in  hanciam semsem, cihtak semsem I hih nate agah pan in kimu a hih manin lungdamna hong pulak lo, hong hawm sawn lo in om thei lo ka hih manin hi lai tawh lungdam ko in hong thei sak ka hihi. Tua a hih manin Pasian a it sem sem, a hanciam zo semsem, a kipia zo sem sem, sia/siamah te leh pawlpi mite a hi dingin I biak Pasian in thupha hong pia tek tahen!Amen.

I ngahsa Kha Sianghto mei amit lohna dingin a nuai a bangin hong hanhawn le hong thapia beh nuam ingh.

1.         Kha Siangtho mei kuang I mihsak loh na dingin nisim thu ngen, ki-ap in Lai Siangtho sim den ni.

2.         Teci pan na leh thu gen nate zom pai suak ni.

3.         Tuiphumna tawh pawlpi sungah honglut thak pawlpi mite kiangah hawh in thu ngetsak den ni.

4.         Department director te, Circle leader te leh Church Pastor te khempeuh in maai kum aa ding geelna te tua I geelna te a dingin thu gen in hanciam ni.

5.         Pawlpi mite sumlut a hoih zawk nang in thu ngetsak in thapia in nasep dan bawl dan acian pia in hilh theih te hilh in makaih ni.

6.         Khalawh det na dingin I circle ciat ah I mun le I mual, khua hun tawh kituak thulu guan in kikhop pi(RB khawmpi dan) tuamtuam te kigawm khawm in pawi bawl tek ni.

7.         Pasian nasem sia/siamah khempeuh in a tawm pen kum khat khat vei Effort/Pasian thugenna nei hamtang ni.

8.         I pawlpi ciat in pawlpi thak  (church plant) khat I phuh zawh tekna dingin hanciam ni.

9.         Circle ciat in ngimna geelna nei in pawlpi thak khat ta I phuhbeh zawh nang (church plant) hanciam ni.

Kumkhat pawlpi khat phuatbeh zawh nang lamhilhna

1.      Pyin Oo Lwin pawlpi tawh hong genteh ning

1)      Pawlpi phuh nop na munteel ding                  – Moe Meik khua

2)      Thu gen ding sia                                             - Pastor Tient Saung

3)      Akihel ding sia bang zah                                -3

4)      Akihel ding pawlpi mite bang zah                  -9

5)      Effort bawl hun ding                                       - November 1-15, 2020 (kigin khol pah ding)

2.      Effort bawl zawh na ding geel kholhna

1)      Kiginkholhna ah sum zat ding                        -100,000/-

2)      Kizopna tuamtuam a ding                              -300,000/-

Gentehna in tua mun le mual a dingin ciin theih tuamtuam te hilh ding tentan pia ding, khaici bang leisak pah ding

3.      Effort sumbei zah ding

1)      Effort bawl ding te lamsap                              -100,000/-

2)      Mipi dawn le khak nang lamsap                     -100,000/-

3)      Mei leh setvuan tuamtuam                              -100,000/-

4)      Neek le dawn                                                  -200,000/-

5)      Phalna ngetna leh sapna lai tuamtuam           -50,000/-

6)      Cidamna lam sitna                                          -100,000/-

7)      Lai hawm tuamtuam a ding                            -50,000/-

8)      Tuikiphum thak te letsong piaknang              -100,000/-

4.      Khathak te etkik don kik nang (follow up)           -200,000/-

Sumvekpi gawm         =1,500,000/-

Zattheih takpi ding leh zatpah ding ngimna geelna te nei in sem khawm in hanciam khawm ni ci in tha hong pia in hong tawsawn nuam ingh. Hi a tung a dan pen gentehna hi bek a, no hoih sak dan in puah in maikum aa dingin nong siauh pah na dingun mit muh theih dingin hong lak ka hihi. Maikum geelna te khempeuh a manlang thei thei in hong khak pah unla, kum thak khit a ki pan nasem in ki diang khia pah ziah ziah ding hi hang.

Topa’n akipia khia mimal, a sem a bawl, a gim a tawl te khempeuh ii thaman ding abaihsa in hong koih sak hi. Topa mitsuan in Ama nasep na ah cihtakna tawh mapang khawm ciat ni!

Khazih Sungah,

Pastor Kap Lian Thang

President,

UMM of SDAs

Pyin Oo Lwin

Zomi Version: Sia Khup Khen Thang

Lungsim Zatui by Dr. Kham Khan Khai, Ed.D

Hunkhat lai in nupa kopkhat lungnuam takin kum tampi sung kiteng in om uh hi. A kiten zawh uh kum tampi khit ciangin, a zi pen nidang bangin khua za nawnlo in a bil hoih nawnlo hi ci-in a pasal lunghimawh mahmah hi. Khuazak theihna ahuh ding awngaihna (hearing aid) khat peuh kisam hi ci in ngaihsun hi. Ahi zongin bangzah ciang azi bil kisia khin cih theilo ahih manin a kuppih dan ding theilo hi.

A innkuan siavuanpa uh kuppih in ngaihsutna va ngen hi. Azi bil bangzah siakhin ta cih a theihna dingin hih bangin ahih ding siavuanpa in ngiahsutna pia hi. “Na zi kiang pan pi 40 kigamlatna ah dingin la kiho ngeina dan in awngaih pian in ho in. Hong za hiam sin inla, hong zak kei aa leh, kigamlatna pi 30 ah khiam suk in. Tua bangin hih inla hong zak kei lai leh, pi 20, tua pan in pi 10 kigamlatna ah khiamsuk in. Tua bang hih le cin awzakna dingin bang namte kisam cih na thei ding hi” ci hi.

A zingciangin a zi in anbuk ah anhuan in aom laitak, a pasal innpua ah va paikhia hi. Pi 40 kigamlatna ding a upmawhna mun ah a din kawmin awngaih pian tawh, “Ngaihno, tu nitak i meh ding bang ahia?” ci-in dong hi. A zi dawn ding tawmvei ngak aa, bangmah dawnna za lo hi.

A kinai zaw in hong pai aa pi 30 kiim kigamla pan in khatvei, “Ngaihno aw, tu nitak i meh ding bang ahia?” ci-in dong leuleu hi. Dawnna bangzah ngah tuanlo hi.

Pi 20 kigamlatna ah hong naih leuleu aa den a bangmah in dotna dong mahta leh bangmah dawnkikna ngah tuanlo hi.

A zi tawh pi 10 kigamlatna ah hong naih leuleu in den aa bangin dotna nei leuleu hi. Bangmah dawnkikna ngah tuanlo ahih manin nakpi takin a zi aa ding lunghimawh aa, ka zi bel a bil sia taktak ta aive maw ci-in dah mahmah hi.

A zi kiangah hong pai in, a bil gei ah, “Ngaihno, tu nitak i meh ding bang ahia?” ci-in a awngaih pian tawh hong dong hi.

A zi in, “John, i meh ding AKSA hi ka cih tu aa a ngavei-na hi ta” ci-in awngaih mahmah tawh hong dawngkik hi.

A tamzaw buaina ci-a i ngaihsut thute midangte hang hilo zaw in eimau khialhna leh kicinlohna hang hi zaw thei hi. Ei thanemna kimuh ding haksa mahmah aa midangte thanemna kawk ding baih mahmah se hi.

Matthew 7:3-5 [ZIV] Nang mittanga singpek ngaihsun loin bang hanga na sanggampa mita singatvui them en na hi hiam? Nang mittang ah singpek om napi na sanggampa kiangah, ‘Na mit-a ninthem hong lakkhiatsak ning,’ bangci cih thei na hi hiam? Kineihsiampa aw, nang mit-a singpek lakhia masa in, tua hileh na sanggampa mit-a na lakkhiat ding ninthem na telmuh pan ding hi.

Mangmuhna 3:17-18 [ZIV] Ka hau a, neih le lam ka cin hi, khat beek ka sam kei hi,’ na ci hi. Ahi hangin a genthei, a hehpihhuai, azawng, a mittaw le guaktang na hilam a phawk lo na hi hi. 18 Na hauh theih nadingin kei kiang panin mei-a halsiangsa kham; guaktang zumhuaina na sel nadingin na silh ding puanpak; khua na muh theih nadingin na nuh ding mitza, na lei ding kong thuhilh hi.

Dr. Kham Khan Khai, Ed.D,

Professor, Asia Pacific International University

Thailand.

Tangthu: Unknown Author
Lim: pinterest

Credit to: Kham Khan Khai Facebook page