Zeisu tawh na kithuahkha maw by Dr. Dalmang

Tunai Jesu tawh na kithuah kha hiam? Ahihkeileh mite in Jesu hongsa uh hiam?
Tu hun ciangin vanleng tawh New York ah zum akah mi honkhat om hi. Monday panin Friday dong zumna semin Friday zumtuah ciangin vanleng tawh inn ciah zel uh hi. Tuate lakah David zong nitak zum kituak ta a, Vanleng tualpi paiding taxi azuan hi. Lampi kiukawi khatah mittaw nupi khat in singgah zuakin tu hi. Mi khempeuh nawhsa tekin taxi kituh tuan uh ahihmanin nupinu’ singgah zuakte kipalkha in lampi ah kikhuk zeizai hi. David zong alawmte tawh taxi lap nuam in anawhpai kawmin tua singgah tukte enzel in alawmte nung azui hi. Nung et zel ahihmanin alawmte in zekai ni teh, taxi lap kei lecin, vanleng laplo ding hiteh, ci uh hi. Taxi kiang atun ciangin alawmte in honglut pahin, ci in sam ngeingai uh hi. Alung nuamlo lua ahihmanin alawmte kiangah, “No napai mai un, ken hong nungdelh ning,” ci in tua mittaw nupinu kiangah akileh kik hi.

Nupinu kiang atun ciangin asinggahte tawpsak saisai in tau ah acian khit ciangin, akituanzan singgahte adingin asumla in apiak khit ciangin taxi lam zuanin akileh kik hi. Tua leh nupinu awngin, “Nang Jesu na hi hiam?” aci hi. Papipa in “hikeng, banghangin hong tuaci dot na hi hiam,” aci hi. Nupinu in ka singgahte atuk laitakin thu ka ngen hi. “Jesu aw, hong huh in, kaci hi,” ka ci hi. Tua teng azak khit ciangin taxi lam zuanin apai leh taxi na om a, vangleng tual adelh hi. Atenna khua alengding vanleng laplo ahihmain vanleng tual ah zankhat ngakin alum hi. Angak kawmin nung thupiangte alungngai kik hi. Keibangin amanlah mipa khat bangci in mittaw nupinu in Jesu hong sa hiding hiam, ci in amah leh amah akidong hi.

Mihingte nuntakna ah manlah in, buai in, ih om laitak mahin Pasianin mici mawhte adingin Jesu ahidingin hong koih ahi hi. Nang zong Jesu tawh na kithuahkha ngei hiam? Ahihkeileh, mite in Jesu ahong sa ngei hiam?

Birthday Cake leizolo Pa by Dr. Dalmang

Khatvei, pa leh tanu van lei uh hi. Adeihteng uh la in sumpia dingin ading uh hi. Vanzuaknu in 14.27 ding hi, ci hi. A ip sawk leh $6:12 bek nei hi. Sum kicinglo, tua bung lakhia in, ci hi. Tua laitakin anungah akigualte in, ko sun thapai hun neilo, cihsan uh hi. Agawmkik ciangin, 12.27 kisam lai hi. Bangcih ding, ci in vanzuaknu in adong hi.

 Tua cake lakhia in, ci hi. Atanu in, pa, cake om keileh ka pu in suahni bawl theilo ding, ci hi. Cake lakhiasak in aciah uh hi. Anung a akigual pasalkhat in anungdelh hi. Lawm aw, hih naciahpih in, ci in, lai-ippi tawh aleiloh cake leh bungneu apia hi. Banghang hong pia na hiam, ci hi. Tuapa in, ka neulai un, kei zong ka nu bek tawh om in zawng hi ung. Nang bangmah in vanlei ding ka pai uhleh ka sum uh cin zolo in ka ciah uh hi. Tua leh ka nung panun mikhat in hong delh in, kadeih teng uh hong pia hi. Tua khit ciangin laidal khat hong pia hi. Tua lai sungah, Nang zong mailam ah na piakhia in, kici hi. 

Tua tawh patate aciah uh hi. Inn ah suahni tung a akibawlsak zolo apu om hi. Kongkhak alut in patate in happy birthday sa in cake apia hi. Putekpa in tua cake amuhciangin pau theilo in akahmai hi. Atapa leh atunu in, bangci na hiam, aci uh hi. Putekpa in, kum 70 sung ka nuntakna in mannei lo, kiilamen kei lua ing, aci hi. Tuaciangin atapa in, hong siang gen ning. Ken sumneilo in nasuahni adingin cake lei lo in kong ciah uhleh ka nung ah mikhat in hong delhin na cake ding hong leisak hi. Tua ciangin hih laidal hong pia hi, ci in apa alak hi. Apa in tua laidal amuh ciangin akhangno lai a, nuta nih sum neilote apiak ahihlam aphawk hi. 

Thuhilhsia 11:1 “Tui sungah an khia lecin, hunkhat ciangin na mu kik ding hi, cih aphawk hi.

Nang zong tui sung a na khiat ante na mu kik nai hiam? Alimlim in tui sungah an na khia ngei lim lim hiam? Nasepzawh, na hat lai in na khiat keileh na tek, na uham ciangin muhkik ding omlo kha ding hi.

Kimanlian by Dr. Dalmang

Zingtung, mivom naupang khat sumbuk mai ah sumbuksaipa in manlian hi. Banghangin sumpia lopi in ka zatui la na hiam, acihleh naupangpa in sumnei keng, hong khah in, ci in thum thapai hi. Kanu in hih zatui kisam hi, ka sumding omlo hi, ci hi. Sumbukpa in palikte sapsawm ta hi. Tua laitak, zatui leidingin apai numei khat in akihona uh galzak hi. Cina kineih in, sumbukpa va neh phei a, aw, ka tapa in sum hong pialo hiam, zatui in bangzah man hiam, aci hi. Saipa in $15 bek hi, ci hi. Tua numei in, a ipsawk in, $20 lai pia a, acianlai teng naupangpa pia in, ci hi. Numeinu in naupangpa kiangah laidal neu khat apia hi. Tu alai sungah “nang zong mailam ah piakhia in” ci hi. Naupangpa zong a nu zatui ding ngahin lungnuam takin ciah hi.

Hunsawtpi khit ciangin nupi khat cina in zato hong kah hi. Siavuan khat hong pai in, nang na dam nading lampi khat bek om hi. Ki-at kul hi. Asum beizah na pia zo ding hiam, hong ci hi. Nupinu gim mah mah hi. Ken sum neilo hing, ci in khitui luang nilnel in kap hi. Sum na piakzawh kei ding leh, zatopi a ukpa in hong at sak loding hi, ci in akigenkik kik laitakun, mivom siavuanpi khat honglut in, siavuanpa aw, hih nupinu kei cina hi, hong ci hi. Bangbang ahizongin zatopi ukpa phalloh in ki at lo ding hi, na ci kik hi. Mivom siavuanpa in kei zatopi ukpa hita ing, kei tavuan hi, ci kik hi.

Tua ciangin siavuanpa pusuak hi. Mivom siavuanpa in nupinu kiangah tu phei a, sumbeilo in hong ki at ding hi. Lung himawh kei in, ci hi. Nupinu in lamdang sa hi, um zolo hi. Tua ciangin siavuanpa in a ip panin laidal neu khat lakhia in nupinu pia hi. Tua lai sungah “nang zong mailam ah piakhia in” cih amuhciangin ama piak ahihlam aphawk kik hi. Tuni ihpiakkhiatte tuni mahin kingahlo thei hi. Cihmawh hun ciangin ih piakngei bangin hong kipia kik ding hi.

Itna khaici tuni in vawh hilecin hunkhat ciangin nang tungah hong kibawl kikding hi.

$1.00 tawh Pasian Leisawm by Dr. Dalmang

$1.00 tawh Pasian Leisawm

Naupangno khat sumbuk saipi khat pan khat pai in, “Pasian na zuak uh hiam,” ci kawi kawi hi. Belcing takin leiding Pasian dawp kawi kawi hi. Tua ni sai 69na atun ciangin khangham samkang kum 60 bang apha papi kiangah lut in, “Pasian nazuak hiam,” va ci hi. Naupang ie cihtakna leh alunggulhna phawkin “banghangin nang, Pasian lei nuam na hi hiam?” ci in adong hi. Naupangpa in, “kei pen ka neu lai in ka nu leh ka pa in hong sihsan a, ka pano in hong kemin hongvaak hi. Ka pano in innlam nasep asep laitakin kia ahihmanin zato ah kipuak hi. Siavuanpa tawh ka kimuh ciangin siavuanpa in,”Pasian bekin na pano damsak thei ding hi, ci in hong gen hi, hong ci hi. Tua ahihmanin leiding Pasian azong ka hi hi, aci hi.

Tua ciangin sumbuk ngak papipa in, “tua ahihleh nang Pasian na lei nading sum bangzah nei nahi hiam,” ci in adong kik hi. Naupangpa in “$1.00 nei ing,” ci in sumtang khat alak hi. Tuaciangin sumbuk ngakpa in hua laiah “Pasian” akici dawnding thawlneu khat omin na pano pia leteh damding hi,” ci in alei sak hi.
Naupangpa zong thawlneu tawi in tai zel, diangzel in aciah hi. Zato atun ciangin a pano pen khuaphawk nailo ahihmanin bangmah kidawnsak theilo hi.

Tua nitakin asiam mahmah siavuan honkhat in naupangno’ tenna khua no zuanin hong kisutuah uh hi. Amaute in azan azan in a pano khei in bawlin manlah mahmah uh hi. Asawtlo sungin a pano in damna hong ngah hi. Zato atuah ding ciangin zato sum sazian alenpa in a zato kibawlna sumbei alak hi, a pano in sum bei tam, khankhat sungin zong piak zawh ngaplo ahihmanin sibup hi. Akhanlawh ciangin sumkempa in, “Patau kei in, na sumbat khempeuh na tapa in pia khin zo hi, lungnuam in ciah in,” aci hi.

Lei dingin Pasian azong naupangpa in sumbuk 69na ah amuh lukang papipa pen mihau mahmah khat na hi hi. “Pasian” lo in apano damlo ding ahihmanin Pasian leidingin gimlo tawllo in lametna tawh azonna amuh ciangin na khempeuh na vaihawm sak hi.

Mikhat ie Manphatna by Dr. Dalmang

Mikhat ie Manphatna asilh aten tawh khensat kei in

Motor akizuakna saipi ah Mangkang tangval khat leh mivom nungak khat manager lamen in salesman hong sem uh hi. Tua in azuak uh pen Rolls Royce ahi hi.
Zingtung in mivom papi khat handbag khai in tua motor hong dawp hi. Na Rolls Royce ka hawlsin thei diam, ci hi. Mikang salesman pa in amel asa a et ciangin 350,000 aman motor lei zo buang kei in teh, ci in ngaihsun ahihmanin Rolls Royce alawnkhak amuh bek zong, akizuaklai hi, hong lawnsak ken, ci hi. Mivom sales lady in na sin nop leh a key va la ning, ciin zum sungah lut hi. 

Tua kal in mangkang papi khat suit silh in honglut hi. Rolls Royce alei ding ka hi, lai zong ka bawl sak lai tak hi, acih ciangin amel asa lah kipia, asilh aten lah branded vive, ahihmanin mikang salsman pa in azum sung lut pih pah hi. Online tawh sum leitawi nading azonsak leh kuamah in leitawi lo hi. Salesman in zong, amel asa hoih, sum aneilopi hi mawk ciai, adang khat nazuak ning, cihsan hi. Apualam hong pusuah ciangin mivom sales lady motor key hong tawi in, na sin ding hiam, ci in mivom handbag tawipa dong hi. Mikang salesman in, hih motor pen 350,000 tak man hi, leizo takpi ding na hiam, ci hi. Mivompa in lei ning, ci hi. Nang sum nei maw, acihleh nei mah ing, ci in dawng kik hi. Bangci leiding na hiam, acih kik ciang leh a handbag hongin cash hong pia ning, leitawi kei ning, ci hi.

Mikang salesman in hih sumte koi pan a na ngah hiam, bang sem na hi hiam, ci in dong kik pha pha hi. Mivom papipa in kei pen hih motor zuakna saipi aneipa hing. No motor zuakte gel lakah manager dingin hih mivom sales lady ka pia ding hi. Nang mikang salesman pen mi na muh ciangin apuatham tawh amanphatna khensat na hihmanin kong muang zo kei hi, acihsan hi.

Laibu khat amanphatna pen abutuam tawh kikhensat theilo hi. Mihing khat amanphatna pen apuatham asilh aten tawh khensat ding hilo hi.

Makai Pi te Kimuh Khopna by Sia Khup Khen Thang

December 10, 2019| Philippines

MUC makaipi teng leh Division pupi, Union u lianpi teng, UMM u lianpi  teng, Union zumpi ah kimuh khopna nei uh a, bang teng kikum uh ai hi tam? i mai lam ding hong koi ci tam? cih mipi in zanuam le theinuam tek ihih manin agei ah om lo, kihello ihita zongin tua sungah kihel, langnih tuak makai  te tungah dongin hong dawn kikna te uh, hong hawm nuam ingh. A kisam beh aom leh langnih tuak makai pi te in honghilh beh un ci'n hong ngen le thum nuam masa ingh.


Tua kimuhna sung panin mipi theih nop leh telnop phadeuh thu atom in anuai aa bangin hong at kik ingh.

Division pu in a kikup sial un agen det khat in abeisa te nusia in mailam kalsuan khop ding ngaihsun in thu gen a, kikum ni, ci den hi. Tutung zong "Phat tuamna apiangsaklo ding, abeisa thu te isutsut ding leh ikimuh thaman om lo dinga, tua bang I gen veve ding leh kimuh zong kullo ding hi" cih zong SSD pu in gen beh hi.

11-11-2017-MUAS

 Tua agen khit ciangin  MUC lam pan secretary pupi, Dr. Mungpi in "tua bang hi mawk leh kum 20 sung bang ka nasepna uh, amawkna suak ding, cih hi theilo ahih teh, din mun (status) khat hong pia le uh cin" ci in Division pupi i kampau dawn kikkawm in ngetna nei hi.

Tua khit ciangin Division pupu in dong kik a, "Conference hong pia un a ci maw" ci in dong kik hi.

MUC secretary pupi, Dr Mungpi in " hi mah" "conference hong pia un ci in hong ngen hi-ing" ci in dawng kik  hi.

Tua khit ciangin Division pupi in dawng kik a, "No pen kum 20 na sawt khin ta uh zongin pawlpi kipawlna sungah omlo na hih manun Conference piak theihna ding lampi om lo hi. Ki gawmkik unla, tua khit teh Conference siau un" ci in atung a, ulian pi teng kimuh khopna Union Meeting Hall pi sung aa, committee tuteng ii mai ah khauhtak le kician tak in pulak khia hi.

Tua ahih a, ideihna lah pulak thei bek tham lo in, ideih taktak leh ideihna ii ngah theihna ding, lampi maan zong hong hilh pah uh a hih manin mipi in izuih,iman siam ding thupi leh kisam mah mah ding hi.

Tua bek tham lo in makai pi teng zong mailam kalsuankhop dan ding, kigawm khop theih na ding hong kikum khawm to ding uh a hih manin mipi in isia te ading thu ngetsak ciat ni.

Taungoo meeting

Mipi te makaih khial lo in ipawlpi kilamzia te lampi maan tawh i hilh, ipattah, i makaih ding kisam leh thupi mahmah ding hi. I vawh bang khaici, ki at kik tek ding hi. Tua manin nang le kei in bang khai ci nam vawh leh tuh i hihiam? Pawlpi kithusim lohna ding khai ci tuh maw? Pawlpi kikhenkhapna ding khai ci maw? Pawlpi sung thanemna ding khaici maw? Pawlpi kilemna ding khantohna ding khaici maw? Mimal hong kipanpihna dingin thu maan leh thu zuau helzau a, pawlpi mite akhemkhem ihi kha hiam? I sepna te maan maw? Khial maw cih isepna ii agah pan hong kimu toto lel ding hi. Pasian in ii Lai atna, ii kampauna, akipan sepna bawlna, khempeuh ah thu hong kikhen ding hi. I sepna sa te en in ilung akim mahmah ta hiam? I ut dandan, ideihdan tu adan mah hiam? Mimal kidong ciat ni.

Topa'n Zomi SDA te kikhenkhen nawnlo in akigawm kik mengmeng thei dingin thupha hong pia tahen!Amen


Khazih Sungah,
Sia Khup Khen Thang
Yangon. Myanmar

DIVISION KA OM SUNG, KASIN KHAK THU PAWLKHAT By Sia Khup Khen Thang

DIVISION ka OM SUNG, KASIN KHAK THU PAWLKHAT

By Sia Khup Khen Thang

January 15, 2020| Saturyday | Yangon

Thupatna

Pasian’ hong hehpihna leh Division ulian te in hong muang leh hong deihsak in hong sapna tungtawn un Union ulian te ii thukimpihna leh hong muanna uh, "who is recognized and highly recomended by both SSD Treasury and local officers as one who has the potential for future leadership in a higher treasury position of the church" cih division sumkempi ten email sapna lai lamet ngam lohpi in ngah in Topa in asila pa hun manpha hong pia a, Philippines aa om ii division ahi, Southern Asia Pacific Division (SSD) ah kha thum sung nasepsin dingin sapna ngah kha ka hih manin I biak Pasian tung leh ulian te tungah lungdam ko masa ingh.

GC Vice-president Dr. Ella Brown tawh

Hih nasep sinna ah pen kei mai ah apai ngei siapi te pawl khat om uh a, ahizongin hi dan a kipai loh sawt pian ta hi. Hi nasep sinna ah bang teng sin ding, koici dan aom ding, nek le dawn vai, vanleng sap ding cih teng khempeuh, email hong khakna vuah akician in hong at sitset uh hi. Ka innkuan in kha thum sung ka nasep sinna ding ahi, Division zumpi ah pai thei ding, cih om a hih manin ko innkuan zong, ka zi ka ta tawh passport bawl in ka kithawi uh hi. Hun sau khollo ahih manin kinawh thawi piat hong kul hi.

 

GC Treasurer Dr. Juan Prestol

Ahun ding pen October 15, 2019 pan in January 15, 2020 ding ahihi. Passport laibu kazi le ka tapa aa dingin bawl in ka ngah khit uh ciangin vanleng letmat khawng ka dawp kawikawi hi. Pasian thupha hong piakna hangin nau gai kik ka hih man un, vanleng letmat zuak te in nau gai te kha sagih khit, gamdang vanleng te kituang sak nawn lo hi cih thukhun om hi ong cih tak uh ciangin kazi le ka tapa, apai thei nawn lo hong suak hi.  Kei bek aa ding vanleng letmat Yangon pan Singapore tawn in Philippines gam Manila ka lei hi.

Lunghimawhna Tuamtuam

GC Education Director Dr. Lisa Beardsley

Nasep ding sung pen khathum sung hi mawk ahih manin kei zong vanleng letmat ding pen ka ciah hun lian ding tawh kituak in ka lei hi. Ahizongin athei sa siapi te hita leh  pawlkhat in hong lunghimawhpih na uh khat pen Philippines gam in visa kha khat, ni (30) free in hong pia bek hi a, kei pen khathum tam ding hi mawk ka hih teh Philippines immigration te in hong lutsak kei kha le maw cih hong ki patauh pih mahmah hi. Kei zong Malaysia leh Thailand cih te ka pai zelzel sam hangin Philippines gam zin ngei nailo ka hih manin ka lung patau sim peuh mah hi.

 

SSD President Dr. Samuel

Ahi zongin a om nailo pan in a om ding a hong geel sak Pasian in hi ciang lel tavuan la zo lua ding hi cih tawh kilung muangsak in ka pai hi. Ka paina ding vai teng Division zumpi thusai te tawh email tawh kiho zelzel in kha thum sung ka om na ding, vanleng kuan ah hong dawn ding cih te a kipan ki dong kawikawi in tun ngei loh na ahi hangin Topa’ maipha piakna tawh hong lem mah mah suak hi.

AIIAS President Dr. Ginger 

Ka vanlengletmat ciah lam ding kha thum himawk ahih manin Singapore katun ciangin Airline te leh immigration te in nang pen hong kipai suak sak thei lo ding hi. Na ticket kha thum hi mawk a, visa kha kha bek kipia hi hong ci mawk uh hi. Ken zong hi mah hi, ahizongin Visa kisiauh beh to to thei hilo a hi hiam? lem lel ding hi, a thukhun uh na enpha dih vevua, Philippines gam pan in vai buai ding teng kei ma vai hong hisak lel unla, hong paisak un ka cih ciangin amau zong pau lah phun in hong phal uh hi. Tua khit Singapore vanleng kuan ah nai 4 sung ka khawl khit ciangin Manila leng suak in cidam in Manila airport ka tung hi. Ka tun ciangin Pasian hehpihna hang tawh Immigration te in ka lung hi mawh bang lo in Pastor na hiam? Koi ah hawh ding hong ci uh a, ka paina ding ka gen khit ciangin ka ticket zong hong etsak se lo in kalutsuak thei hi.

Philippines Airport pan kileh Kik Thei Veve

SSD Officer teng tawh

Philippines gam in kawlgam mite pen ni 30 sung Visa free  hong pia mah ta le uh, I paina vai ding tawh kisai lai tuamtuam te neih ding kisam leh  lunghi mawh huai mah mah veve hi cih pen kaphawk semmsem hi. Bang hang hiam cih leh Philippines ka om sung mah in AUP sang kah nuam Zomi khangno khat Immigration te in lutsak lo in kileh kiksak uh hi. U lian te phone call in I gen sak hangin apiak loh sa khat uh pen pia kik tuan lo uh hi. Kawlgam vanlengkuan atun teh a passport pia kik pan mawk uh hi. Tua manin sangkah ding aa, pai te in hia lam thu atelsa, sangkah sa te limtak hopih masa dong masa in kan masa un. Bek tham lo in Philippines immigration ah koi ah pai ding, bang hih ding hong kicih teh tua sang or tua mun ah ahawh pak ding hing ci zaw leng kikhial lo zaw dan hi.

Division Zumpi ah

MYUM Officer & UMM president

Division zumpi huang sung lutna ding gate ka tun ciangin security te in pistol thau akawng vuah koih litletsa in a uniform tawh gate ah thu hong dong uh a, koi ah pai ding na hiam? Hong ci uh hi, tua leh ken zong kawl gam pan in hong pai hing, hi teng ah kha thum om ding hing, ka om na ding, inn numbat zong 135 hi ka cih leh aw, ci in hong lutsak lian uh hi. October 14 ni zingsang tungin ka omna apartment ah tawl nga hithiat in ka om laitak in  AIIAS sangpi ah PhD in New Testament sangkah,MUAS sangpi pan Assistant Proferssor Sia Thang Suan Sum leh Pastor Lam Cin tanu, AIIAS ah MBA kah, lia Dim San Niangte hong hawh uh in sun lang bang tawlnga in tua khit nitak lam ciangin AIIAS ah hawh to in nitak an, sai ah ka ne khawm uh hi.

Zumkah kipan

October 15, 2019 takciangin zum kah ding, pen zingsang nai 8 worship kipan hi cih email hong khak uh a hih manin kei zong formal dress ahi, thaihbut, necktie, coat cih te tawh kithawi in zingsang nai giat lap in Division worship hall ah ka pai hi. Worship man ciangin Division Human Resource Director pa Pastor Kevin in Division staff teng tawh ki meltheih na ding, maimuakna hong nei in zum nasem teng khempeuh tawh abanban in azumkhan vuah pai in hong meihset kawikawi hi. Tua khit ciangin zum nasep ding dan, zum thukhun paizia teng, GC working policy bu, ssd working policy bu le manual tuamtuam teng ka zum tutna ding ah avek in abaihsa in na kikoih khol sitset  hi.

Nasep dan leh nasem te

Division zumpi ahih mah bangin department tuamtuam tam in director te leh alai at tek uh tawh om dim dem in zum nasem mi 60 val bang kipha hi. Nasep na ah pen computer bek mah tawh kisem a hih manin desktop computer teng hong thuahsak in ssd email hong bawl sak uh a, scanner zong pen email tawh direct in kizom ziau ahih manin lai print na, file te scan cih te pen quality hoih tak leh baih tak in ki sem thei ziau ziau a hih manin nuam mah hi. File kepna mun te hong hilh uh a, kum beisa a, zum laite koihna, tu laitak aki zangh te koih na cih te akipan abanban in honghilh uh hi. Kei pen apha diak in Treasury Department ah sem ka hih manin Accountant teng tawh ka ki thuah pah uh h. Division nuai aa om union mission leh union conference khempeuh, Publishing House khempeuh, College leh University khempeuh leh division dang te leh GC tawh kizop dan, zum lai khak dan cih te a kipan avek in hong hilh pah uh hi. I pawlpi kizop dan, tungsiah  nuai siah paidan cih te tampi tak katelbeh semsem hi. Sum sazian vai leh committee tut dan tuatuam, committee kimakaih dan cih te zong hong hilh leh hong pantah nuam uh ahih manin committee akitu bangbang ah hong sam in invittee in ka tu a, aki makaih dan, committee thukhun cih te, leh policy khat aom leh tua  ii thunung thuma, bang hangin hih kibawl cih te a ki pan anung thu dan te hong gen cian uh hi. Bek tham lo in Committee ah agenda khat leh khat thukimna, thukim lohna aki vote ciang in kammal zat te na dongin hong hilh cian ngekngek uh in theih ngei loh tampi, thei kha le sin kha bek tham lo in u lian teng tawh ki mel theih kha in ki maingap kha ka hih manin ka lungdam pha diak hi. Ka-min le ka-mel tawh hong sam thei ciangin ki-mel theih kha ungh.

Bek thamlo in Division makai pipa a kipan vice president te, director te auditor te na dongin khat khit khat in an ong nek pih in hong vak pih kawi kawi uh ahih manin bang mah lo, khua ta khat pan bawng cing cing, pasal no khat a hi, kei lel Topa in maipha hong piak manin Topa tung lungdam ka kophapha hi. Division zumpi ah tual bial khak ding gen loh, union zum pi leh section zumpi ciang na ngawn sikkha dingin ka ki lamen ngei vet kei hi. Bek tham lo in pawlpi vai tawh sai, theih huai tampi, kam kikum thei in hong hilh uh ahih manin hampha ka kisa pha deuh hi. Zum nasem te leh u lian te akipan khat le khat kimuh ciangin kinuih san in kiho in sia te khat leh khat ki hopih dan kizop dan zong thupi mah mah in zat pah huai hi cih ka mu hi. Bek tham lo in sun an nek ciangin zong avek un hall pi khat sungah ne khawm uh in khat leh khat ki mel theihna, kimai ngapna in nei uh in nasep dan nop kisa mah mah hi. Bek tham lo in HR department te in sia te khempeuh ii suahni suah kha thei sitset uh in asuah ni uh atun teh zingbiak piakna hun man teh,  Happy Birthday lasa in Birthday card pia uh a, thu ngetsak in worker teng tawh group maan kiziah pih uh in khat le khat kikin in kithupi bawl uh ahihna ka mu hi. Zat pah huai khat hong hi pah hi. Hi pen aphadiak in pawlpi sungah nasem, sia khat ciat a hi a, sang ah sem sia te khat ciat in a hizongin I zattheih pah ding leh I pawlpi ading, sang aa dingin khantoh na ding khat hi ci in ka mu hi. Committee aom loh ciangin Accountant khat in ka om a, nasep ki buai mah mah in Zingsang nai 8 pan nitak nai 5 pen hun bei baih kisa mah mah hi. Kha thum sung hi dan teng tawh hun ka bei toto hi.

Huihpi Nunna leh Zinlingna

Division zumpi ah ka tunzawh kal thum khit ciangin phone message honglut in zum teng leh sang teng kikhak ding cih message na hi a, kumpi zum pan na hihi. Ka lawm te ka dot leh zum ki khak ding hi, inn sung ah om khikhe ding hong ci mawk uh a hih manin kei zong ka pusuak ngam kei hi, huihpi nung ding acih ma un, nek le dawn ding aki pan mei mit kha leh khuaimeivak te na dong leh an nek pah theih ding moh leh singgah tui te na dong in ki leikhol kha hi. Ahizongin Pasian hehpihna tawh ko lam ah huih bel hong nak nun pian in huih pi taktak leh zinlin na in hong nawklo in Philippines gam taw lam nawk in naksiat mah mah in tua bang lau huai na pan Topa in hong kem in tua bang lau na pen ka thuah khak masak pen na hi pah in tua zong kei a dingin sin na khat mah hi pah hi.

Year-end Meeting

November kha laizang pawl in Division Year-end om ahih manin Division nuai aa om ulian khemepuh, kum bei meeting kah in hong pai uh a, Kawl gam u lian pi thum teng leh UMM makaipi Pastor Kap zong hong ki hel hi. Kum bei meeting sung tengin kawl gam ulian pi teng leh UMM makaipi pa Pastor Kap tawh zong ka ki khawl kha uh a, thu hoih thu man pha tampi, siapi teng tung pan in ka sin kha hi. Kum bei meeting ah zong gam tuam tuamm pan union tuam tuam pan in  Pasian nasepna report tuamtuam te ka ngaih zawh tantan ka ngai a, thupi thei  mahmah in gam khat leh gam khat nasep dan te zong ka muh beh toto kha in hampha ka kisa mahmah hi.

Division Got Talent Night

Division ah nasem sia te khempeuh thaksuah na dingin ci in social game tuam tuam, ei lam ah X’mas pawl khat in I zat dan in amau zong tua dan social night khat nei uh a, tua teng ah sia te khat leh khat letsong kikhek in gualnopna bawl in kumkhat sung nasepna ah gim le tawlna te damna dingin vai hawm uh hi. An nek khopna nei in thupi mah mah hi. Hi zong aki lawm ciangciang ei mun tawh akituak zahzah in zat huai ka sa hi.

X’mas Sau pen

Bek tham lo in Philippines gam pen Tapidaw gam a hih mah bangin leitung ah X’mas sau vei akizangh pen gam hi a, September pan in December kha dong, amau gam aa dingin X’mas kha hi mawk hi. Bek tham lo in RC pawlpi tam na gam ahih manin shopping mall te sung na ngawn ah RC biakinn om in lamdang kasa mah ah hi. Tham lo in Shopping Mall te ah zingsang, sai hon leh nitak sai khak ciangin Shopping Mall pi bup ah akiza dingin thu ngen tangtang uh in thupi leh lamdang kasa hi.

AIIAS President Thakmuakna

Ka om sung mah in AIIAS sang siapi hong kilaih in muakna leh mangpha khak na pawipi ki bawl hi. Tua dan President Installation zong ka muh cilna hi in thupi kasa mahmah hi. AIIAS ah sangkah gam khempeuh ii gam laan le minam puan te silh in marching bawl uh a, cihik mul tho phial hi. GC ah numei ulian sem masa pen  ahi, Vice President Dr. Ella Brown mivom te in AIIAS sangpi ah Chairman sem a hih manin tua nu leh GC Education Director nu Dr. Lisa leh Associate Director pa cih a ki pan hong ki hel uh a, AIIAS ii vice chair asem NSD president leh SSD president zong ki hel uh hi. Thamlo in proferssor khempeuh leh den a, ulian teng khempeuh in a Doctor puan vive uh tawh marching uh in thupi mah mah in ulian teng zong kim dimdem in thupi leh muhnop mahah sa ingh. Lungkim huai pha deuh sa ingh. Doctor PhD man khempeuh ulian asuah loh hangin ulian khempeuh Doctor PhD na hi zaw mawk hi cih ka mu a, pilna ii thupitna kamu beh toto hi. Pilna sangte mahin Pasian thuthuk zong makaih siamna neizaw veve hi cih a mu hi. GC president Pastor Doctor Ted Wilson in Video speech agen na zong kihong in tha kingah mahmah hi.

Division Director Khat Si

Ka om sung mah in Division Youth Director Pastor Yobbie yabut in tuap cancer tawh hong sihsan in kei zong tua teng ah limtak in kawl gam ai tang in si, ka gal hi. Friday zingsang a si hi in tua nitak aki pan amaikal Friday zingsang sihvui hun dong kal khat bit sitset, nitak sial hun ki bawl pih ngekngek in Pastor Yobbie ii hoihna le athupitna bekbek gen to ngek ngek uh in a phawk na te uh sut to ngekngek uh hi. Zomi te in misi pahtawi in it uh hi , hong kicih pen Philippines te ii siakmit na ngawn akiban nai lo hi cih ka mu thak hi. Tumging music lam thupi sak ngiat uh in music tuam tuam hau mah mah leh siam thei mah mah bek tham lo uh in lasak zong siam ah mah uh hi, aphadiak in choir sak siamngiat uh hi. Group tuamtuam om uh a, uniform tek tawh abaihsa in om sitset uh in etteh huai mah mah uh hi.

Pension La Ding Sia te lungdam kohna leh Pahtawina nei

Division zumpi ah ulian nasem, Vice-president Pr. Dr. Johnny Lubis, Division Treasurer Dr. Max Langi, Division Stewardship Director Pr. Noldy Sakul cih te leh a dang nih leh thum om lait te in 2020 bei teh pension la ta ding uh a, amau a dingin year-end om nawn lo ding a hih manin 2019 year-end ah lungdam kohna leh pahtawina pia uh hi. Pension la ding te zong kipak leh angtang tak in lungdam maitai sa in thu ngetla in lungdam koh uh a, ei lam ah zong hi dan te etteh huai kasa mahmah hi. UMM in zong etteh pah in siapi te nih pahtawina pia uh a, nidang the zong kipia toto lai dingin lamen ingh. Sang te a hi a, zum a hi a, church pastor sem khat peuh peuh, alut cil uh, nasep ki pat teh, khutnga thungetsak in nasep a tawp uh teh zong, I hoihna kizong in phatna leh pahtawina nei ciat zo leng, nuam mah mah ding hi cih ka um hi.

Meimual Puakkham

Ka om hun sung mah in gin nei lo pi mah in Taal meimual hong puak kham mawk in neu lai in sangah meimual thu le aphuah khapna te kasin kha a, tu in a hih leh ka mit in mu in ka thuak khahi. Division zum pan in tai sawm leh nga bang, kigamla hi mah ta leh meimual puakhamna avui leng to pen tai 15 val bang leng to a hih manin vut leh buan ki hel, guah bangin hong zu ngelhngelh in lampi teng, inn tung teng, sing kung teng vom mangin tua vut leh buan kigawm pen I ci tungah hong tu kha leh tak seuhseuh in sung sat mah mah a, zan khat in dam pha lo hi. Meimual puahkhapna vui leng to pen tai 15 val bang lengto a hih manin vanleng tu leh leng sak nawn lo in ni 2 sung bang, khawl ahih manin vanleng kuan ah mi dimcip in tutna ding na ngawn omlo in ki ding cip hi. Gam tuamtuam te in ami te uh atanzung tek vuah sam pah uh a, kawlgam pan sangkah AUP sang naupang te zong pawl khat kawlgam tangzungah ni nih sung ding va bu uh in anvak in huhna zong, tawm tek pia uh hi.

Singapore Hawhna

Hi bang teng khit ciangin January 16, 2020 sun in ka ciah kik ta a, Singapore transit hi in transit nai 12 sawt ahih manin Singapore ah pusuak in vak nuam ka hih manin Singapore ah meltheih Pasian thu um mahmah, Pu Santawng ka hopih leh ka vanleng tuk hun ding kician tak in hong dong a, Singapore vanlenguan ah anupa un, a nasepna pan leave la in hong dawn ngiat uh a, anlim nono hong nek pih pih bek lo in Singapore gam sung, mun thupi teng khempeuh ah hong vak pih uh a, sum le pai bei khempeuh leh nek leh dawn teng hong sik uh in, a inn vuah nitak nai 9 pawl in tungin zingsang tungin grab taxi hong sapsak bek lo in I biak Pasian a upna uh leh azahtakna uh kei tungah hong kilangh sak in sunsiah zong hong tun sawnsawn uh in Pasianin Ama nasem, asila te guaksuak sak lo in ompih ahihna mu toto ka hih manin I biak Topa min ka phat hi. Singapore pan in January 17, 2020 sun in cidam takin Yangon ka tung thei hi. Zin dawn siam in lengla do siam mahmah bek lo in Pasian nasem te thupi bawl ngiat in azak huai Pu Santawng te nupa zongh, I biak Pasian in cidamna thupha, lungnopna thupha hong piak sak den tahen!Amen.

Thukhupna leh Lugndam kohna

1.   Amasa in ka geel ngam loh ka lamet ngam loh hun manpha hong pia in taksa leh kha lam, sinna tuamtuam te hong musak, hongciam sak I biak Pasian tungah lungdam thu puak masa ingh.

2.   Anihna ah SSD ulian teng leh Union ulian te tungah lungdamna ko phapha ingh.

Zomi Innkuan Philippines-Khuado-AUP

3.   Athum na ah Philippines ka om sungin an hong nek pih, kawl gam sang naupang te leh aphadiak in sum le paai tha le ngal bei in hong vak pih kawikawi, Sia Sumbawk(AIIAS-PhD in NT) sang naupang , Sia Tung Mang leh ( MAEd-AUP) sang naupang leh Tg. Sawmlian Ngaihte (BBA-AUP) te tung leh adang kong min lawh theih loh khangno te tungah zong lungdam mah mah ingh. Nong makaihna hang un, AIIAS sangpi, Mall of Asia, AUP, Taal Volcano, People’s park cih te aki pan mun tuamtuam te mu kha ingh.

4.   Alina ah Singapore ah zin hong do in muh nop huai tuamtuam te ah hong vakpih kawikawi in lovegift hong pia Pu Santawng te innkuan tungah zong lungdam mah mah ingh.

Thumna: Katun akipan in tuni ciang phial in zato kilak kawikawi in Pasian hehpihna tawh tapa melhoih mah mah khat nei kik in manlah lua ka hih manin tu ni in hih lai hong at man pan ka hihi. Lai hong simsak, mimal kim Topa’n thupha hong piak sak tahen!Amen.

Khazih Sungah,

Sia Khup Khen Thang

Yangon, Myanmar