LAISIN
NUAM NGAUNGAU NAUPANG
By
Sia Khup Khen Thang
India
gam Bombay khuapi pua lam, mizawng te omna veng khatah, azawng mahmah innkuan
khat bukno sungah teng uh hi. Hih innkuan sungah apa, anu leh kum 5 apha tapa
tawh thumpha uh hi. Apa in khedap khui in anu in lam gei a thawlhawm, bunghawm
te khawm in sai ah zuak kik in hi bang tawh hong kivak uh hi. Anupa uh nasep
ahanciammahmah uh hangin nekding nangawn kicing zo mahmah lo uh hi.
Atapa
un ama khangual naupang te sangkah amuh teh sangkah nop cihtak kahnuam hi. Ahizongin
anu leh pate in sangkah sak zolo ding cih theih ahihmanin anu leh pa kiangah
sangkah ding ngenngamlo hi. Ahizongin nikhat anu leh pa kiangah tanlang laibu
hong leisak tapeuh un ci-in ngen hi. Ahizongin anute’n leisak zolo bektham lo-in
hih laibu te nasim hangin sum ngahna ding lah hilo cih behlai uhhi. Napa khedap
khuina ah zui-in ci’n anu in sawl hi.
Hih
naupang in sangkah in pilsin nopna pen ngimna khat aneih man ahihi. Pilna
neileng, kanu leh kapa, tu a bangin gimlo ding, ken nuamtakin vakzo ding cih
ngimna ahihi.
Naupangpa
in laisin nuam lua ahih manin anu te’ theihloh kal in bunghawm, thawlhawm khawm
in angah sum tawh tanlang leh tankhat laibuluite honglei hi. Amah leh amah laisim lai-at
kisin, lot ngah kisin hi. Hi bang teng tawh lai-at hong at thei, hong sim thei
pian ta hi. Sang akah loh hangin tanlang, tankhat sangnaupang te mah bangin lai
hongthei hi.
Nitak
khat anu lehh pa omlohkal in mei-awi kawm in lai asim leh ihmusuak kha hi. Tua
leh apa in alaibu te mu in han-gawp a, alaibu te meikhuk ah khul sak hi.
Azingciang akipan apa khedap khuina ah zui in khedap khui kisin ding ci-in gen
hi. Apa khedap khuina ah zui in khedap khui uh a, tawmvei atawlngak ding sung
uh, vakkhia in lamgei singkuang nuaikhat ah hongkap hi. Agei lampi ah paikhat in
akah na aw azak ciangin banghang kapna hia ci in dong hi. Tua adong pa pen sang
siapi khat na hihi. Tua leh naupang pa in athu teng gen hi. Siapi pa in zong
aut takpi mah hiam ci in tanlang, tankhat lai te adot teh sangkah ngeilo himah
ta leh avek in thei hi. Siapipa in lamdangsa in ahanciamna thupi samahmah hi.
Asangah sam in sangnau in sang hi.
Naupang
pa zong nitak teh inn ciahkik in anu leh pa kiangah ken zingciang a kipan in
thawlhawm, bunghawm khawm in sum zong ning ci in honggen hi. Anu te’n zong
sangkah nuam nawnlo in sum zong ning ci ahih teh ci-in nuam mah mah uh hi.
Naupang pa nisim sangkah in siapipa in zong, sun an man ding sum tawm ta pia
den hi. Nitak sang atuah ciangin siapi pa sumpiak pen anu te hong ap in ka
bunghawm, thawlhawm zonna pan kangah sum hi ci-in nisim sumpia den ahih manin
anute lungkim mah mah uh hi.
Laihanciam
in laivuanna ah akhatna ngah to den in laipil te kipia scholarship hong ngah
toto hi. Tansawm pen mat-hoih tawh gualzawhna ngah ahih manin siapi pa in zong
college kahna ding sponsor hong zonsak in college kah ding hong hita hi. Tua
takciangin siapipa in anu te kiangah na tapa uh college kahta ding hi cih ave
gen ciangin um zolo zahdongin lamdang sa in nuam mahmah uh hi.
Atom
in gen le hang, naupangpa in computer sangkah in computer engineer hong suak
hi. Computer lam lunglut mahmah a hih manin software khat hong bawl khia hi. Amah
ahuh den siapipa in hih software amuh ciangin hoih sa ahih manin company lian
khat kiangah lak hi. Company te’n zong, hoih sa uh a, dollar tulsawm nga tawh
lei bek thamlo in company ah nasep pia in software engineer in koih uh a, khasum
hoih mahma hong sang hi. A neu tung pan angimna om mah bangin inn hoih mah mah
khat lei in anu leh pa om sak a, angimna hong tangtun takpi hi.
Mi
pawlkhat pen nulepa te in sumtampi bei in sang akah sak uh hangin laisin nuam
lo mi tampi tak om hi. Tua bang mite in hih naupang pa nuntakna en in thala
ciat ni. Topa’n khangno te pilna kuitung angah dingin thupha hong pia
tahen!Amen.
Khazih Sungah,
Sia Khup Khen Thang
Yangon.
