Tuiphum-kik tawh Kisai By Sia Khup Khen Thang

Tuiphum-kik tawh kisai

By Sia Khup Khen Thang

Sia Khup Khen Thang

Thumasa

A masa pen in tuiphum-kikna (re-baptism) cih kammal pen manglai dictionary sungah om lo a, lai malnih ki gawm a hih manin a khiatna zong nam nih nam thum om kha thei ding hi. A hi zongin tuiphumna cih pen Lai Siangtho genna ah  mimal khensatna, mimal utna tung pan in Jesu mimal honpa gumpa in kasang tatak hi cih Pasian mai leh mipi mai ah lah khiatna a hihi.

Tuiphum-kikna

Tuiphumna tawh kisai kikupna ah mimal hoih sak leh hoih sak loh, deihna tek, deihlohna tek, I gen ziazua hi. A hi zongin kei mimal muhna ah tuikiphum kikna tawh kisai I buai pih pen tuikiphum te hilo zaw a, atuiphum te buaipih zaw ihih manin atuiphum sia te zia leh tong tawh kisai pawlpi pomzia koi ci bang hiam cih hong at nuam ingh.

Hih tawh kisai I telsiang loh manin I pawlpi hizah in a buai hi ci-in ka mu hi. Leitungbup pawlpi makai Pastor Ted Wilson ii genna  ah “I pawlpi in  kimakaihzia, ngeina, pomzia, sandan, updan I neisitset a, midang te aa etteh ding hilo hi” ci in gen hi. Tua bangin tuiphum-kikna vai ah a kituiphum kik te hi ta leh atuiphum sia te hi ta leh koi ci bang hiam cih en suk ni.

Hih atung aa thu i telsiam na dingin dotna khat leh nih tawh hong behlap ingh.

1.          Tuiphumza (Ordination) pen khantawn a ding maw?
2.          Tuiphumza (Ordination) pen khantawn a ding hilo maw?

Tuiphumza(Ordination) pen Pasian nasepna dingin khutngak thungetsakna hi a, tua in khantawn ki mang hi. A hizongin pawlpi sungah tuiphum theihna (ahih kei leh) siampi nasep vai te tawh kisai in hunciang tan nei ahihi. Tuiphumza (ordination) ngah te pen siampi’na, septheihna (credential) letmat kipia hi. Tua letmat (credential) pen a sau vei pen kum nga sung ki zang thei hi. Kum nga sungin mawhna khialhna pauban na, a om kei leh Union EC in vote la in letmat kum nga kipia to hi. Kum nga ciangin ahun bei in khum nga teh khat veita I kip sak to beh den cih ahihi.

Tuiphumza kilakhia (Ordination Withdrawal)

A hizongin numei vai, nupa kal lemlohna, sumpi vai leh khutkhialhna cih te a kipan, tungsiah nuai-siah tawh nasem khawm theilo, thu mang lo, pawlpi kilemna susia cih a ki pan mawhna hong kidawk leh tua ordained pastor pa ii septheihna letmat (credential) ki lakhiatsak(withdraw) kik thei hi.

Nasep khawl Ordained Pastor te

Bek tham lo in  ordained pastor khat in ama nasepna pan akhawl (resigned) leh aseptheihna (credential) pen zumpi ah ap kik ding hi. Pawlpi sung nasep na pan a khawl te hi ta leh septheihna kilakkhiatsak te hi ta leh pawlpi sungah siampi na sep a hi, nekkhawm piak, tuiphumna, nupa kitengsak cih te a kipan bang mah septheihna neinawn lo uh hi cih pen mipi khempeuh in I telsiang ding kisam mah mah hi( Church Manual p. 33-35). Ordained ngahsa pastor khat, pawlpi sung pan nasep tawp in a septheihna letmat zumpi ah a ap kik te in, a nasep na sa ah na sep lut kik (a hih kei leh) azenzen in mundang gamdang pai in pawlpi sungah Pasian’ na sem kik in a Ordination a hin kik na ding tungsiah ah a nget leh tua a ngetna tungsiah te in asepnasa union te kiangah hih sia pa thu dongin asepna sa union EC in piak kik huai mah hi ci-in thukimna lai a piak uh leh bek ordained pastor te naseptheihna na letmat(credential) kipia kik thei bek hi. Tua letmat a ap kik hun leh a ngah kik masiah ordained pastor te I sep theih teng khempeuh bang mah sem thei lo hi. A sep zen zen leh pawlpi thu khun a palsat hi a, pawlpi thunei te in akisam bangin thukhenna a bawl ding a hihi.

Ordained Pastor Pension la te

Tuiphumza ngahsa Pastor te pension a lak khit uh ciangin a mau ii tuiphumza or siampiza tawh kisai in Union EC in pawlpi khantohna dingin nasep hong huh zo lai in teh, sawm ah khat mah a ne a hih ciangin ci in a mau ii septheihna letmat (credential) pen honorary or merit ci in kipia a, tua zong pen hunciang tan nei hi. Hih pension la pastor te ii sep theihna pen nasem laitak ordained pastor te tawh ki bang lo in kiciang tan deuh a, tungsiah phalna lo tawh bang mah sem theilo uh a, nasem ding in huhna ki ngen in phalna aki piak leh bek siampi nasep, sem thei bek uh hi. Upa kitel thak te a hi a, ordination khut ngakna ngah thak te a hizongin amau thu tawm tawh midang te lutung ah khut nga thei lo uh a, nasem laitak pastor te in hong sep pih in ci in sam in phalna apiak leh bek sem thei uh hi  (Church Manual p. 35).

Pension tawh Kisai

Bek thamlo in theih beh huai athupi khat in, sia tampi te ii gen na vuah, “nasep ka khawl phial zongin ka pension pen kei piaksa, kei khol sa hi a, lawki/dawibia ka suak kik phial zong in pension ka ngah ding hi” ci in a ngaihsun, mi tampi tak ki om hi. Pawlpi nasem te khasum pan in a pension hun ciang aa ding ci in pek khat or pya khat zong kidok ngeilo hi cih I tel ding kisam hi. Pawlpi thukhun hoih a hih manin pawlpi in atuam in a piaksak hi a, ei ma khasum tawh ki khol hi lo hi cih pen I telding kisam hi. Pension khasum te zong, tulaitak sawm ah khat kikhia teng mah tawh kipia kik a hih na, itel ding thupi mah mah hi. Tua hang mah in sawm ah khat ne mah hi in pawpi khantohna hong huh thei lai ding uh a hih manin ci in tuiphum theihna honorary or merit license kipia bek a hihna I tel ding thupi mahmah hi.

Thukhupna

Hih a tunga thu teng I et tak ciangin I buaipih zel zul a hi, tuiphu-kikna cih tawh kisai in:

1.        Tuiphum sia te ii din mun I tel ding thupi mah mah hi. Pawlpi din mun tawh ki tuak lo in a tung a, tuiphumza (ordination) kilak khiatsak sa pastor lui khat peuh ii tuiphum ka hi kha hiam? Neek khawm piak ka hi kha hiam? Pawlpi din mun tawh kituak lo in kikhawl sak, tuiphumza or siampi za kilak khiatsak pastor lui te tung pan ordination khut ngakna ngah sawn te ii tuiphum, nekkhawm piak, letthat ka hi kha hiam? Ei le ei I kisit tel ding kisam hi. Pawlpi paizia tawh kituak lo a, kikhawl sak/akhawl, septheihna letmat nei nawn lo, khat in hong ki teensak, hong tuiphum, hong khut ngak, nek khawm hong piak, na hih khak leh lung ton lo tak in tui kiphum kik lua lel in I pawlpi paizia hi in zumhuai lo lua hi
2.         Pension lasa pastor khat in tungsiah pan phalna ngah lo pi leh  nasem laitak pastor te in  sam in huhna ngen lo pi in ama thu tawh hong tuiphum, hong letthat, khut hong ngak sawn I hih khak leh zong tui kiphum kik ding lunghiang kei in. Siampi Eli tate bang, Saul kumpi pa bang in seploh ding asem kha te kha lam leh taksa din mun ah lau huai mah mah hi. I pawlpi in hi te bulphuh in khutngakna, tuiphumza, siampi nasep tawh kisai in zek-sak(thupi ngaihsut)mah mah a hih na, mipi in tel ciat ni.
3.         Hih a tungah thukhupna numbat khat leh nih sung ah ki hel lo, ei leh ei mawh ki sa khial kisa (a hih kei leh ) ka kituiphum in Pasian thu tel nai keng, ka lungkim zo kei, kei leh kei tu a ki pan piangthak ning,  tuikiphum kik nuam ingh ci in mimal khensat na, mimal utna leh kizawhna ngiat, a om leh kiphum kik thei lua hi. Ki khamm theih om lo hi cih zong mipi in I telsiam ding kisam leh thupi mahmmah hi.

Ih pawlpi dinmun tel in kipum khat zawkna in I neih theihna ding deihna tawh hong at khia ka hihi. Tuiphum-kikna tawh kisai ah a phum pa, hoih lo leh hoih hi cihna hi lo zaw a, pawlpi paizia leh I din mun, thugui let te a ki hilh I hihi. I pawlpi paizia I deihna tawh kituaksa lo in I lunghiang kha ngei hiam? Pasian in Kamsangnu tungtawn in a lah hih a nuai a kammal ten a sim inla lunghianglo takin Pasian pawlpi ah kip in.

 “Hih pawlpi pen Kha Siangtho sawl na tung tawn leh Lai Siangtho bulphuh in Pasian nasep na dingin kiphut hi a, hih lo adang pawlpi leitungah Pasian in phutnawn lo ding hi”1T 224, 2T452, LHU 357

“Nasep  lawh cin loh ding tawh ki sai lungsim ling lawn na leh patauh na ding om lo hi. Na sep na ah a mapang pi pen Pasian ahih man in Amah in na khempeuh amun mun ah gual dim diam hi.  Vai te pen lep-phat ding leh puahphat ding a om phial leh zongh, pawlpi lutang pi a hi Pasian in sem lel ding a, khialh na khempeuh pen dikna lam ah a sem ding hi. Pasian in a tawp dong bit tak in hong tonpih ding hi cih thu upna leh muan na nei ding hi hang.” 2SM 390 (1892). LDE 52.1

“Seventh-day Adventist te pen leitung ah khuavak puak ding leh tua khuavak a kem cing ding in Pasian in a tuam vil vel in hong sehna, phatak in I phawk ding ahi hi. A kisia leitung ah vauhilhna neih ding, I mawhpuak ahi hi. SDA te tung ah alamdang Pasian khuavak om ahih man in, a thu pi mah mah vantung mi thum te thupuak, pulaak dingin vaipuak hong ki pia ahi hi. Tua sangin na sep pha zaw a om kei hi. Lungsim la thei ding na dang tuamtuam te sep ding ki phal lo hi.” EV 119

Khazih Sungah,

Sia Thangneu

Nasum: Thupha hisak ding maw? Samsiatna hi sak ding? Khensat! By Sia Khup Khen Thang

 Sia Khup Khen Thang

Leitung nuntakna a haksatna hangin mikhempeuh in sumlut hoih kei deih tek, ki hau nuam tek in sum lut hoih nei te, nasep hoih nei te ki eng in ki pi muh a, kizahtak pha deuh hi. A hizongin I ngaihsut ding dotna pawl khat a nuai ah kong koih hi. Sumlut hoih khempeuh ei a dingin a hoih hiam? Sumlut hoih neihna in thupha hiam? A hih kei leh samsiatna maw? Satan ze-etn maw cih te I ngaihsut kak ding kisam hi.

Pasian tungah I innkuan in i kingak loh tak ciangin Sumlut ahoihna pen thupha hi thei a, (Thuhilhkikna 8:18) , samsiatna zong hi thei hi. Thu khat leu leu pan in Topa tungah  kinga lo in a hau te pen Satan in ngimna khat nei a, a zat nop man in a hausak hi thei hi. Leitung nate deih luatna ah makaih in sum zatnop luatna, Pasian kiang pan suahtak nop na, Pasian kul isak nawn loh ciangin (Mtt. 13:22) isumlut pen samsiatna hong suakhi. Pasian I masak loha, I innkuan te I masak lohna in Satan thangzak hi. Tua a hih leh Pasian thupha pen galpa’n bang hangin samsiatna suaksak nuam hiam? ( 1 John 2:15-17).

Sumlut hoih pen bang hun ciang thupha hi zaw  hiam cih leh:

1.     Sumlut hoihna pen thudik in  I ngah ciang, Pasian khun tawh ki tuak ciang, a tha nem te a ci mawh zaw te tung pan zawhthawhna pan ngahna sum lut a hih loh ciang!

2.     Pasian masak in  ngimna leh geelna nei a,  I sep I bawl na tung pan  sum I ngah ciang ( Mtt.6:33)

3.     Leitung nate sangin innkuan zing le nitak biakpiakna te I masak ciang!

4.     Lai Siangtho simna, Pasian na sepna te ei mimal nasep sangin I thupit ngaihsut zawk ciang

5.     Pasian nipi ni, limtak tawlnga in innkuan in Nipi ni I zat ciang

6.     Leitung nate sangin Pasian leh I innkuan te I masak ciang!

7.     Sawm ah khat piak ding I masak ngiat ciang

8.     Sawm ah khat leh sumpi, kamciam te piak khit a, sum ikhol ciang!

9.     Ih mut cim, exercise lim bawl, an limtak I nek ciang!

10.  Tate bek inn ah nusiat loh ciang!

Hih thusawm teng I neih ciangin I sumlut pen thupha hong hi ding hi.

Sumlut hoih zawk na pen samsiatna hi zaw thei hiam cih leh

1.     Thumaan loh na pan ngahna, mi zawh thawhna pan I ngah ciang

2.     Pasian tawh hunzat khop ding pen utna tawh hilo a, zawhthawhna bangin I ngaihsut ciang

3.     Innkuan hun bawlna ah ki hel man nawn kei ning na cih ciang

4.     Lai Siangtho simna, Pasian nasep na ah ki hel man nawn kei ning na cih ciang

5.     Innkuan te tawh an ne man nawn lo, hun bawl man nawn lo, kituah man nawn loh ciang

6.     Inn ah tate bek I nusiat det ciang

7.     Ih mut hun, exercise bawl hun, an limtak nek loh ciang

8.     Pasian pen sumlutna nak hi cih I mang ngilh ciang

9.     Hehpihna neih mel lo, sumpi khiat thusim lo, upna kamciam I neih loh ciang

10. Geelna kician neilo in sumzat I zat ciang

Hih hoih lo thusawm teng tung pan in sum I ngah ciangin I sumlut pen samsiatna hong suak ding hi. Tua a hih manin singlamteh tungah siktukhilh tawh kei aa dingin khaina a thuak Pa khutsung ah ka neih khempeuh ka koih ciang lau ding om lo hi. “Ama misiangtho te aw, Topa zahtak un, bang hang hiam cih leh Amah a zahtakte in kisapna neilo hi” (Late 34:9) Tua a hih man in Amah muang ni.

Khazih Sungah

Khup Khen Thang

November 28, 2019

Thudapphah lakna https://stewardship.adventist.org/more-income-a-blessing-or-a-curse

Ukna Thukhun leh Adventist Pawlpi by Pastor Kap Lian Thang

Pr. Kap Lian Thang
(President, UMM of SDAs)

Tu hun i tenna leitungah thutanna tawh ki-uk gam in akhangto gam hi a, thutang omlohna gam in akhangto lo gam a hihna i mitmuh tek a hihi. Bang hang hiam cih leh ukna thukhun in thunei te ii zatkhialh thuneihna te hong lakin mimal khat ciat ii suahtakna hong kepsak a, mimal khat ciat ii septheihna pen thukhun ii daisung pan-in suakta takin septheihna tha hatsak hi. Ukna thu-khun in mikim dinmun kibangsak in kideidanna te hong hepkhiatsak hi. Ukna thukhun ii tungah kua mah om thei lo a, gam khat ii ki makaih zia pen ki-ukna thukhun in hong kem hi. Tua manin ki-ukna thukhun pen upadi siamten “gam i nuntakna sihui” ci uh hi.  

Kawlgam pen 1948 kum in Mikang te ukna pan suahtakna ngah in ki-ukna thukhun bawlin gam uk uh hi. Ahih hangin 1962 kum ciangin gam ii nuntakna sihui ahi ki-ukna thukhun hemkhia in hong ki-uk hi. Biakna tawh kisai neih le lam inn le lo te, kumpi neihsa a hilo, mipi neih zato, setzung, inn mun logamte leh sang inn tuamtuam te khempeuh kumpi in hong sut in kong kikhak sumlei sumzuakna thukhun hong zang uh a, kawlgam hong khangto lo zawin kum sawm lom sungin leitungah a zawng pen gam suaksak uh hi. Mihing nuntak khuasakna ah khat le khat buaina a omloh na dingin ukna thukhun ii dalna, i kisap bangin neih le lam te zong ukna thukhun mah in hong kepsak hi. Ukna thukhun om kei leh leitungah guta, bu-luh, migilo sa gilo te hong laang in mi neihsa inn le lo te sutgawp in  laaksakna tam mahmah ding hi. 

I tenna leitung mihingte gamtatna kisia mahmah hi. Leitungah thugen siam, a minthang mahah Billy Graham in “Hauhna i sup leh bangmah a kisum nailo a, cidamna i sup leh na khat a sum i hi ta hi. Zia le tong a kisiat teh na khempeuh a sum i hihi” ci-in gen hi. Tua Billy Graham i paunak tawh ki tuakin Kawlgam mite gamtat zong sia mahmah hi.  Gammi te’ sang inn te biakinn neih le lam, inn mun lo gam, zato te kumpi in hong sut in I supna sangin zia le tong kisia in I nuntakna pen kisum zaw tham le sia zaw tham lai hi. Gentehna khat hong gen leng, laisin na sang khat ah lai ki vuan a, thu man lo in lai etteh ding hong keng uh hi. Laivuan na a cing siamah nu in lai etteh ding a kipua te hong laksak tak teh tua sangnaupang te in “siamah nu hoih kei” ci uh a, gal bawl in siamah nu inn halsak ding zah dongin hua uh hi. Tua sangnau pang te nu le pa te in a tate hong gup beh laitak uh teh tua siamah nu in sang a laih hong kul  hi.  Tuhun ah zong mihoih khat, hoihlo hi ci in, mihoih lo khat, hoih hi cih hun; a tuh(အတု) in a sit(အစစ္) sangin a manphat zawk hun hong hi mawk hi. Ukna thukhun zui, sia, siamah te milakah mi hoih lo a kiciap teh hun hi mawk hi. A hoih te sangin a hoih lo te a kimasak na lak ah i ki hel loh ding thupi mahmah hi.

Kawlgam ki-ukna thukhun pen 1962 kum in a kihepkhiat bangin vantung le leitung tawh kisai ukna thukhun  sawm lakah a lina ukna thukhun pen AD 321 kumin kihemkhia hi. Tua akihemkhia ukna thukhun azui, a kemcing mite pen AD 538 kum pan 1798 ciang kum 1260 bang, bawlsiatna leh thahna thuak uh hi. Ukna thukhun sawm lak pan lina a hi, Pasian’ Nipi thukhun hepkhiatna in Pasian lang dona a hihi. A lipkhap huai khalam paikhialhna khat in Pasian ngiat in a khut mee tawh a at, thukham sawm pen hehpihna hun ci’n phuak tawm in hemkhia uh hi. Kum zalom 21 hun hong tun teh, bil tawh zak ngam loh zah ding a thu khat hong om a, tua in 2007 kum September kha ni 14 ni in America gam Nebraska ah Lotdaw kusale Emie Chambers in mihing te kisia sak, nasak cih thu tawh gam thukhen zum ah Pasian khia/heek hi. 

Ukna thukhun om lohna kiim le paam leh Kha tawh kisai Pasian thukham (Rom 14:7) a nial, thu ummi te tawh ki helzau in nungta i hih manin ei te I kha lam nuntakna pen thu maan lampi pan kipial kha pah pah hi. I huaihamna  le angsung khualna te I masak khak leh thuman loh na I sep hong kul pah ding hi. I mawhna leh I kicin lohna te I sel nop leh, khalam khualzin na ah a kisam mun pawl khat I hep khiat hong kul ding hi. Gentehna in Thukham sawm lakah a lina Nipi thukhun I zuih loh takciangin thukham sawm kisam nawn lo hi ci a, sel a kul bang mahin, a hang tuamtuam tawh pawlpi pan apua lam ah i om khak tak teh, pawlpi in gupna hong pia kei cih upna tawh mite i meng hi. Thu man thutak thukham sawm zuihna tawh gupna ki ngah lo mah hi. A hizongin gupna ngah mite in thukham bang aa a nungta mite a hi uh hi. Tua bang mah in pawlpi in gupna pia thei lo mah hi. A hizongin gup ngah mite Pasian tuu huangsungah bittak in a om uh a hihi.

Tua a hih manin a tom in gen le hang, ukna thukhun i zui lohna leh Khalam Pasian ukna thukhun a nial te ii thuhilhna khial te in abeibang Pasian pawlpi a hi, Adventist pawlpi sungah tuihual bangin thahat mawk hi. Dawimangpa in  thu um mi, thukham zui te khat le khat hong zangin vanthak le leithak I luah khak loh na dingin lampi tuam tuam zanghin ih mu lo, tawl nga lo liangin nasem hi. Hih a khial thuhilhna te pen dawi mangpa hong khah khiat thaltang hi a, kigingin I pelh theih na dingin hong thapia le hong thei sak nuam ka hihi. I biak Topa Pasian in Adventist pawlpi mimal khempeuh hih thuhilhna maan lo pan a kikem thei ciat dingin thupha hong pia tek tahen!Amen

Khazih Sungah

Pastor Kap Lian Thang

President, UMM of SDAs

Pyin Oo Lwin

Kamlet: Sia Thangneu