Kiptak in hong len-in PaPa

Numei no khat leh a pa in leikhat kan-tan ding in hongpai laitak un a pa in a tanu kiangah "kong it ka tanu aw, gun sungah na kiat loh na dingin ka khut kiptak in honglen in" ci hi.

Tua leh a tanu in hilo hi pa pa aw, nang ka khut hong len in" ci hi. Tua leh a pa in bang ki lamdan na om hia? ci in dong hi. tua ciangin a tanu in ki lamdang mahmah hi pa aw, ken na khut hong len leng, kei tungah bang lo khat hong tung thei a, tua ciangin ken na khut hong khah suah kha ding hing. 

A hih hang in nang ka khut hong len lecin bang bnag hong piang zong in nang ka khut hong khah suah ngeilo ding cih ka thei hi ci-in dawng kik hi.

Hih pa tate mah bangin Topa Zeisu tawh i ki zopna ah en AMAH i letsang, i To Zeisu ki lensak zaw in ki pum ap ngiat zaw leng bang bang hong piang zongin haksatna te, ze-etna te in ei hong su kha lo ding a, i nawk zo ding hi.

Tua manin nang leh kei, ih nuntakna ah i Topa Zeisu ki lensak ni. I nuntakna Zeisu kiangah ap ngiat leng leitung haksatna, ze-etna te ki nawkzo ding hi.

Laisim mimal a kua maciat in i nuntak na ah a zang kim thei dingin thupha hong pia ciat tahen!Amen

Khazih Sungah,
Khup Khen Thang

NGAIHSUT HUAI THU by Khup Khen Thang

Kumpi pa khat in gam ui gilo sawm nei in a na sem thu manglo te tua gam ui lakah koih in tua gam ui te ne gai sak pah2 hi. Tua leh a na sem pa khat in kumpipa aw hi dan a, na hih pen khial teh ci in a ma hoih sakna a gen le kumpipa heh in gam ui gilkial gilo te an dingin pia un ci in sawl hi.

Tua le a na sem pa in, kumpipa aw nong thah ma in nisawm sung hun hong pia in ci in ngen hi. Kumpipa in zong tua a ngetna sang hi Tua hun a ki pan thah thuak ding na sem pa in zong, gam ui gilo kempa kiangah a thu teng gen a,na gam ui te nisawm sung ong cing sak in ci in ngen hi. Gam ui cing pa zong thukim in cing sak hi. Thah a thuak ding na sem pa in zong gam ui te an lim thei2 vak, zut2, silsiang in hopih2 hi.

Tua bang in gam ui gilo te in a ngaih theihna dingin ni sawm sung hanciam hi. Ni sawm khitciangin kumpi pa in tua na sem pa gam ui gilo te piak dingin thupia ta hi. Kumpipa sawltak te in zong gam ui gilo gilkial te kiangah a khiat suk uh le gam ui gilo te in bang mah cihlo in a khe te liah sak sak uh hi. Kumpi pa in zong ka gam ui gilo te bang ci hiam ci in lamdang sa mah2 hi. Tua le nasem pa in a thu teng gen a, kumpipa aw, hih ui te ken ni sawm sung bek, a mau a dingin na sem in an le tui pia a ki sap bang2 uh hih sak in ka om pen mangngilh lo uh hi.
 
Nang na hih le kum sawm sung, na na kong sepsak khempeuh na mangngilh hi. A hi zongin kei khialhna hi ci hi. Tua le kumpi pa in a kialhna ngaih su kik in khial kisa a hih manin suak ta sak un ci in khah khia kik hi.

Hih in nang le kei a dingin bang theih thakna hong guan hiam? Makai na sepna ah, sia na sepna ah, na innkuan sung ah, na u nau sungah, a diak2 in na nupa kal ah na na seppih na tung siah or na nuai siah te tung ......Ngaihsun in.......

Idol tawh kisai by Pastor Nangpi

Idol tawh kisai a thupi zaw in, hih kammal pen koi mun ah kizang hiam cih I tel ding thupi ka sa hi. A masa in, Laisiangtho in bang ci zat (Biblical Usage) I gen masa ding hi. (Laisiangtho munte Mangkam tawh hong sim sak un). 1.Siampi Laibu 19: 4 "Milimte lamah kihei kei un la, note in a kisungtawm pasian-te nomau-a' dingin bawl kei un; kei pen Topa na Pasian uh ka hi hi. 2. Gamlakvaakna 29: 17 A muhdahhuai amau' na, singlesuang a kibawl, ngunlekham a kibawl, amaute' lakah a om a milimte uh na mu khin uh hi. 3. Paikhiatna 20: 4 Thukham sawm sungah, "A kiseek milim hita leh, tunga vantung hita leh, nuai-a leisung hita leh, leinuai-a om tui sungah hita leh a om na khat peuhpeuh a sun khat peuhpeuh note-a' dingin na bawl kei ding uh hi. Tua a hih man in, Idol I cih in, A kisung tawm milim limlim, Sing leh suang leh a kibawl tawm ngun leh kham milim leh, na khat peuhpeuh tawh a kisun a kibawl a kiseek milim cihna ahi hi. Idolatry I cih ciangin zong tua a tunga milim te Pasian ai-awh in biakpiakna, Pasian dinmun ah tua milim te koihna pen, milim biakna a hi hi. Laisiangtho sungah, Idol min pua tampi om a, tua Idol milim te sangin Pasian in a huat zawk pen, tua Idol a bia te tungah hi zaw hi. (Paikhiatna 32: 1- 14) Gentehna in: 1. Sapi Ciaptehna (666) lipkhapna hangin, mawtaw, vanleng, motor cycle numbat 666 a omte khawng kihtak ding hi pah lo hi. Laisiangtho in a gen tua 666 in bang sem hiam cih I kan ding thupi zaw hi. 2. Jacob in, (mikhempa) cih min a puak hangin, Isreal te pianna pa na suak veve hi. 3. Na tapa min dingin, Juda Iskariot na vuah hangin, Topa Zeisu lehhek pah ding cihna om tuanlo hi. 4. Tu hun ciangin mi minthangte, misiam te pen, ka “idol” ki ci thei hi. Tua “idol” I cih ciangin, Amau mai-ah, va kun pah ding, va bia pah ding, cihna hi lo a, a khiatna dangah paakta (admire) cihna hi lel hi. Tu hun ciangin Tanglai Isrealte’ buaipih “Idol” sangin, I buaipih zawk “idol” tam mahmah hi. Tua te pen, Pasian sangin thupi a i koih zawk, Pasian kiang pan in hong kigamla sak thei thu leh la te hi zaw hi. 1. Leitung lunggulhna, Sum leh paai te (Matthew 6: 19-21) 2. Leitunga om nate’ ( Kolose 3: 1, 2) 3. Idol I cih te pen, Mang Laisiangtho sungah sim le hang “Leitung lungsim a hi, a kilawmlo gamtatna, hukna lanna, a hoihlo lunggulhna, huaihamna” (Kolose 3: 5 KJV) na ci hi. 4. Pasian sangin ei leh ei kihoih sakna, kidik sakna te zong “Idol” namkhat mah ahi hi. (Isaiah 14: 12-15) Thukhupna: I John 5: 21 sungah, “Ka itte aw, milim (idol) na biakkhak lohna dingun na kidawm un”, ci a hih leh, “Zomi Idol” a gen nuam hi zaw ding hiam? Laisiangtho gennop zawk in, Na nuntakna ah nang hong huzaap, na lungsim hong zo, na hun khempeuh hong luah leitung vai, leitung lungsim te a gen nuam hi zaw hi. Idol (milim) a suak thei te: 1. Sum in na nuntakna hong control leh, tua sum in na idol hi pah hi. 2. Lunggulhna, heh theihna, huaihamna te in, na nuntakna a hong luah leh na idol hi pah hi. Tua ahih manin, Zomi SDA te sungah “Zomi Idol” zat ding lau se dah ni. "Idol" i cih pen, a khiatna dang tawh, pawhtawina kici a hih teh, A pahtawi huai te pahtawi ni, a lapsang huaite lamsang ni, Hih Zomi Idol sangin a lauhuai zaw tam mahmah a hihna I phawk ciatna ding deihna tawh hong gelh ka hi hi. Pastor Nangpi Principal of AAS Tedim

Buaina Hong Om Ciang by Pastor Nangpi

Leitungmi i hih manin, Lai Siangtho sunga om thu leh la, kammal zat dan, sanzia kibatlohna pan in Buaina a tuamtuam, Biakna a tuamtuam, Upna a tuamtuam, Teldan a tuamtuam a hong piang khia a hi hi. 

Buaina khat a pian ciangin, eima sandan tek mah a maan pen dingin ih tuatkha pahpah a, Khat veive a tam zaw (majority) thukimna tawh khensatna ih bawl hangin na dikkhin tuan lo thei hi, tua mah bangin a tam zaw thukimna zong na maan zaw thei ahih man in, ih lung a kimthei mahmah kei zongin ih pom a kul hun zong hong om thei hi. 

A thupi mahmah zaw kasak ah, ei Kristiante pen, Zeisu i neih ni a kipan, ih siamna ih theihna, i nuntakna limlim, eima pumpi a dingin a ki nungta hi nawnlo in, mite a dingin khuavaak (Mat.5:14) mite a makaih dingin Topa Zeisu in hong hanthawn hi. Tua in, midangte lungdamna ding, noptuam theihna ding, etteh theiding a i om a kul hong hi hi. 

Ih kampau, ih gamtatna khat hangin mikhat tungah siatna, thaneem lawhna a tun loh na ding thupi hi. Paul in bel “midangte in a puklawh theihna ah ih kikep ding” (Rom 14:21) Upna neu mi te a dingin ih dongkholh lohna ding (Rom 18:2)hong hilh hi.

Leitung a buaina a tam zaw thukhen ding pen Pasian ahih lam phawk ni. Kua dik zaw, kua a maan pen cih sangin, "Note ka hong thei ngei kei hi"(Mat. 7:23) hong cih khak ding lauhuai mahmah hi.

A tawpna dingin, Peter masa sunga kammal tawh tha la ni. 

"Na lungsim sung uhah Khrih zahtak bawl unla, amah Topa-in nei un. Note lametna thu a hong dong a om khak leh hoihtakin a genthei dingin kiging tawntung unla, ahi zongin lungnemna le zahtakna lim tawh gen un."(1Pet. 3:15)

By Pastor Nangpi,

AAS, Tedim