CHIRSTMAS KHEMNA By Mangpi Miami

                                         CHIRSTMAS KHEMNA

Tu hun sung teng leitungbup in Christmas pawi bawl ding in ki sa henhan keei uh hi. Pawlpi kim ciat ah pawi bawl na ding kiging in buaiciat uh hi. Christian lo te naleng  in zong Christmas hun pen kum khat sung ah anuam pen hun ci in la bang phuak liang uh hi. Ko omna Florida, USA ah kawlgam mi zaw diak te ading  in kum khat sungbup ah sai kikhak ni 3/1 ahihman in nasep na pan tawlnga thei ding cin ki lawp phadiak se lai hi.

Ni dang kibang nawnlo in Christian sung ah Dec 25 ni pen Topa zeisu suahni hi lo hi cih mitampi in ki thei ta , ki sang thei ta hi. Tua ahih leh Topa Zeisu suahni lopi bang ci bang in Christian te pawipi in nei aa Zeisu suah lungdam na pawi nasiatak bawl mawk  uh hiam?

Tom dawn mahmah leng hong khem ten hong khemzo mahmah hi cin ka dawn nuam hi. Adan pen hi bang hi.

Christmas kibawl ma Roman te hun sung in ( 4thB.C)  hih pawihun pen Ni pasian, Mithras ( honor sun god of Mitrhras) pahtawi na pawipi ahihi. Tua ban ah Roman te in Roman galkap te honkhia pa ki ci Saturn pasian (savior of Roman soldiers) khat nei uh hi. Azi pen Ops hi aa khaila sak nusian ( goddess of harvest) leh atanu  Ceres ( greek ten Demeter ci) lokhuah na tawh kisai nusian ( goddess of agriculture) cih te zong nei lai uh hi.

Hih bang pawi abawl uh ciang in hih NUSIAN te pahtawi na in singkung hing dikdek singhiang hing dikdek te inn sung ah suan uh hi. A nusian te un kumtawntung thupha pia ding aa an hau ding cihna hi. Tu lai taka a ih inn sung aa ih muh Christmas tree te hongpiankhiat zia pen hih pan ki pan hi.

Roman te te Saturn pasian a ding pawi akham uh ciang Dec 17th nipan a suah ni Dec 25 ni dong pawi kham uh hi. Tua bang pawi sung in lungnop theihna ding van ( letsong) ki pia uhhi. AD 336 kum ciang in Constantine kumpi pa in hih pawipi pen Christian te honpa suahni pawi ci in dawibia te pawipan in Christian te pawipi ah hong khek hi. AD.349 tak ciang in Pope Julius in Dec 25 ni pen Topa Zeisu suah ni hi ci in hong kipsak to leuleu hi. Tua zawh sawt lo in  mipi nunzia kikhel sung ah (phase of Cilvilization) hih pawipen Topa Zeisu suah pawi ci in ki ciamteh in pawiki bawl hi. Tua hi aa  AD. 440 ciang in Saturnalia, Saturn pasian zi mun ah Siangtho nungak Mery in mun hong ngah to ta hi.

(Dawi mangpa hongkhem dan siam taktak mah na sa hia?    
                                       
Christmas hong tun ma christmas a ding ki ginkholna ding aa antang thunget hun or zumkhak nite pen   Tours khua mi Bishop Perpetuus in Ad 490 ciang in hong puankhia leuleu hi. Tua hun lai in Nov 11 a kipan Monday, Wednesday leh Friday ni sim Dec 24 zan dong antang thugnet na nei toto uh hi. Kumzabi 15th hun lailam leh siamna tuamtuam hongkhan to hun ( renaissance) ciang in Christmas pawipi pen leitung bup ah mun hongla in Christmas tawh kisai van lei van zuak nate hong khang mahmah ta hi.Kumkhat sung aa sumlut zah lak ah ¾ ciang bang hong khangto ta hi ki ci hi. 2006 kum in America gamsung aa Christmas hun sung sum kizang khempeuh pen leitugn gamneu khat ii kumkhat budget sang tam zaw ki ci hi.

20thC tak ciang in news sung leh tangko na ( advertisement) te ah hong minthang mahmah ta hi. tua hun lai pawi in Pop music hong khang lai hi aa Christmas late ( Carlos) te zong Pop music tawh ki sata hi . tua te lak ah “ Jingle Bell” cih te pawl. TV sung ah drama in hong lut thei ta hi.21th C ciang in bel pilna khantoh na tawh ki zui in online te ah mi khat leh khat Christmas thupha ki pia ziahziah  ta hi.

Laisiangtho sung ah “ Babylon in ama lenggah zu mi khempeuh tung ah pia in khamsak aa gimna thuaksak hi “ Rev 14:8.

 Nang ee tua lakah na kihel kha hia?
Mangpi
Miami

AW...LUNGDAMBAWL

AW...LUNGDAMBAWL..( Ka tuahkhak thu).

A lungdamhuai mah mah LUNGDAMBAWL hong tun sim in, ka hih theih zah in ka inn sung , innpua leh Christmas singkung te zem in Lungdambawl phawkden na in puansilh nikten hoih te lei in ka sum tampi pi ka zangh hi.

A hih hangin 2007 kum a ka tuahkhak thu in hih banga ka Lungdambawl hun a ka hih theih zah a ka panlak nate leh ka sum beina khem peuh MAIZUMNA hong suah mawk uh hi. Ka lungsim leh ka ngaihsutna khempeuh kikhel in lungsim thak leh ngaihsutna thak, ngeina thak khat zat ka kipan ta hi. Ka tuah khak thu hong hawmsawn leng:

December 20, 2007 nitak nai 5.00 ciangin Lungdambawl phawk den na ding a ka puan khui sak ka Suit ( Coat&pant) ka lak khit ciangin ka Suit thak silh in kizem in lungkim tak in Biakinn lam Christmas lasak na lam zuan in ka mawtaw tawh ka pai hi. Ka suit thak tawh pulpit tung ah Pasian thu tangko ding cih ngaihsun kawm in ka lawp mah mah hi.Tua bangin lampi ah mawtaw dam hawl kawm in ka pai lai tak in , lam gei ah numei naupang no khat a kap kawm a khitui a nul leh a nu ding a kilawm nupi kum 60 pawl khat in a kap lo ding a khem khem lai ma mu hi. Ka muh tung in hih nupi in a tanu khua sung milak ah a vua sa ka hih man in ka mawtaw ding sak in tua nuta te kiang zuan in ka pai hi.
A maute kiang ka tun ciangin ka upmawh banglo in, tua numei no thugen leh a nu in a tanu a a hehnepna aw ka zak ciangin , khawl in ka mitpan in khitui hong luang ngelhngelh mawk hi.Numei naupang no in, ki diik kawm in " Nu aw, ka pa in hong nusiat khit a kipan , puan thak khat beek zong ka nei zo kei a, tun kum 6 bang cingta, nang lah ' Nikum ciang hong lei sak ning' hong ci tukum zong nong kamciam pel in, hong lei sak zolo..ka lawmte in puan thak tawh kikhawm ding uh a, kei ka hih leh lungsim na leh kap kawm in, innsung ah Lungdambawl zang kik ding hi tangh. Nu aw, kei a dingin leitung ah ka nuntak man bangmah om lo hi, si nuam lua ingh" na ci hi.

A nu in, " Bawi aw, na thugen teng maan mah hi. Lungdambawl sim in puan thak lei ding in hong kamciam mah ingh. A hih hang maw bawi, i nei tawm ding leh zatui man ding in sum i neihsun i zat kul mawk hi. Kei, na nu piteek pen kua mah in kitha lawh ding in hong la nuam lo uh a maw bawi.. A hih hang bawi aw.. sih ding thu gen nawn peuh mah ken aw..Na pa zong ih zawn luat man in a nuntakna honkhia zo lo hi hang a, lungsim na mah mah kawm in mual hong liamsan hi. Bawi aw, nang beek in sih ding thu ong gen nawn ken aw" ci in lungsim na kawmsa in a tanu na hehnep na kammal ka za ban hi.
Hih ka thuzak in ka lungsim hong sukha lua hi. Tua hun tomno sung in kek hong den bang in, ka nu leh ka pa te leh ka pianthak ni leh tua nutate kihona ka zak hun dong in ka lungsim ah hong dawk dat dat a, ka lungsim, ka pum leh ka kha hong zen mang in ka ki thei hi. Nu leh pate te hong deihsakna tawh Lungdambawl puan thak kum sim in ka neih lai tak in, hih numei no nu in kum 6 sung sinsen puanthak zong nei zo lo, damlo in zatui ka kisap lai a ka kisap bang bang ka hih theih lai in, hih nuta te in a hih leh a neihsun sum leh pai teng zatui man leh kibawl na ding in na zang mawk uh..A MAUTE IN NEK DING LEH PUANSILH NIKTEN DING NANGAWN A NEIH LOH LAI IN , KEI KA HIH LEH LUNGDAMBAWL PUAN SUIT THAK SIT SET LEH CHRISTMAS TREE SUM TAMPI TAWH ZEM ZIHZIAH LAI.. ci in ka kiphawk thak hi,, ka lungsim sung ah maizum na tawh kidim hi.
Tua bang in ka ki phawk kik khit cingin, Lungdambawl sung a nuam tak a ka zat ding ka sum khol RS. 5000 ka tuam koih vilvel pen lakhia in, tua nutate pau lo phun lo in ( ka lungsim hong sukha lua a hih man in pau theilo) ka pia hi.

Tua mun pan in ciah kik ving veng in, inn ka tun ciang in Christmas tree leh ka innsung ka zemna khempeuh ka phel mang hi. Ka nu leh pate in, " Bang ci na hia kata?" ci in hong dong uh a, den ciang innkuan kikhop ciang in a thu kicing hong hilh ning ci in ka lupna ah ka pai san hi. Tua zan a kipan in, Lungdambawl hong tun sim in ka inn a ka kep den Christmas tree zong pai khia in ka zem nawn kei hi. Nik leh puan thak zong lei ngei nawn lo in, ka sum mawkbei na khempeuh ka tawpsan ta hi.

Aw,,, Vantung Kumpipa tapa hong ki piak khiatna phawk dne in Lungdambawl hun pen eite mimal hamphatna leh nopsakna bek ngaihsun loin, mizawng cimawhte piakkhiat na hun...midangte lungdamna leh midangte ading a THUPHA ka hih theih na ding in ..LUNGDAMBAWL PAN.. Pasian deihdan in ka zangh ta hi..
A sim mimal kim Topa'n kiphawk thakna leh kilam thakna hong pia ta hen..
"Lungdambawl in thupha sanna hilo in, thupha piakkhiatna hizaw hi"
Dr John Hlychho

NAUPANG GUTA

NAUPANG GUTA (Topa aw.. gu mai ning aw….)
( A true story from Mizoram)

A Khua veng sung leh YMA hall leh Hausa pa in te a hoih no no tawh zem uh a hih man in, etlawm lua kisa.. vantung gam mah bang liang…a khuami khempeuh lungdam tak leh lawp tak in LUNGDAMBAWL a ngak lai tak un,,
Pasal naupang no khat pen YMA makai khat in a bil pan len in a bet kawm kawm in hong pai pih phei hi. YMA makai pa in, “ En un, naupang guta, na a guk lai tak man ingh ei”.. hong ci khia hi. Tua naupang pasal no T shirt puan lui khata silh khat pen a puan mai lam ah a na guk a selsim pen lak sak in bang hiam a guk ci in et sak uh hi. Tua naupang no guk pen.. Lungdambawl inn sung zepna AKSI lim khat leh a zep na a bem bil bel khat leh nih bang na hi mawk hi.
Tua naupang a maisuah ah maizumna leh khasiatna tawh kidim in hoih tak zong hak ngam lo pen, mi pawlkhat in “ Bang hang hibang na neu no khawng gu na hiam?” a cih kawm in, YMA officer makai khat in beng in a sat ciangin naupang zong zum lua in kun suk mah leh, a sam pan man in kai dak kawm in sat hi.
Police sam uh a, police te hong tun ciangin a mawtaw sungh ah koih uh a, pai khiat pih uh hi. Tua nupang pen Zomi khat hi a, a pa Pu Khual hi a, a zi in a nusiat zawh kum thum bag sawt khin in , zi kik zong neilo in a tapa tawh a om bang bang sem in haksa lua lo in hong nungta uh hi. Kam siatna lianpi tawh Pu Khual pen kha 3 sung cina in nasem zo lo in hong om hi. Vengte huhna teng zong hong kicing nawn sam lo a, nek leh dawn ding leh zatui man ding tawh hong haksa mah mah uh hi.. Awww.. na ka sep zawh lai a. nisim in Rs. 100 bang a thalawh lai in, ka pata un kisapna om lo in nungta zo hi mah ve ung.. ci ci hi..
A tapa guta pa pen Police te in naupang no khat a hih manin thong sung khum liang lo in a inn ah kha uh hi. Pu Khual in a tapa puan sia ning neng silh Police te tawh inn sung hong lut a muh ciang in patau mah mah hi.
A tapa in, a pa in a tai ma in, “ Pa aw, kalawmte tawh ka letsong kikhek (gift exchange) ding a ka lak hi” ci in a pa mai ah kitan khol zaw zen hi. Tua ciangin a pa in zong a tapa tuah thu theisiam in, “ Ka ta aw, tuzing in Rs. 50 ong pia khin hilo ka hiam?” ci in a dot leh,, a tapa in , “Pa aw, tua Rs. 50 pen ka sang ah letsong kikhek (gift exchange) ding ka lei na ding hi in, tu nitak ciang Sunday School sangnaupangte in Advent Christmas nei kik ding in, tua tak ah a tawm pen Rs.50 man mah tawi ding ci uh hi. Pa aw, bang mah ih neih loh leh na dam loh tawh ong ngetbeh ngam nawn lo hi veng”..a cih ciangin a pa zong a khitui hong luang ngelh ngelh hi.
A tapa in, “ Pa aw, ken ka guk ma in zong thungen in, “ TOPA AW, GU MAI NING AW ” ci in Pasian kiang ah ngen khin ingh” ci lai sawn sawn hi.
Awww.. CHRISTMAS Gift Exchange pen mi tampi a ding in, manpha mah mah in, a diak diak in naupang te a ding in a lawp huai pen pen thu khat hi. Ahi zong in, hih bang a kuamah gen khiat ngam loh a a sim thama hasa mi genthei te a ding in vangik khat na hi mawk a.mataw..
Tutung Lungdambawl ah zong tua bang a haksatna a nei naupang a om zen zen leh, hih a tunga naupang bang in Pasian deih loh a sep khak loh na ding leh, a maute a ding in Lungdambawl takpi a hih theih na ding in.. lungsim pilvang tak tawh Lungdam bawl tek ni.. Topa thupha..
- Romuanpuii zadeng

Christmas Eve Story - True Story

                         Christmas Eve Story - True Story

The brand new pastor and his wife, newly assigned to their first ministry, to reopen a church in urban Brooklyn, arrived in early October excited about their opportunities. When they saw their church, it was very run down and needed much work. They set a goal to have everything done in time to have their first service on Christmas Eve.

They worked hard, repairing pews, plastering walls, painting, etc., and on Dec. 18 were ahead of schedule and just about finished. On Dec. 19 a terrible tempest-a driving rain- storm hit the area and lasted for two days.
On the 21st, the pastor went over to the church. His heart sunk when he saw that the roof had leaked, causing a large area of plaster about 6 feet by 8 feet to fall off the front wall of the sanctuary just behind the pulpit, beginning about head high. The pastor cleaned up the mess on the floor & not knowing what else to do but postpone the Christmas Eve service, headed home.
On the way he noticed that a local business was having a flea market type sale, for charity so he stopped in. One of the items was a beautiful, handmade, ivory colored, crochet table cloth with exquisite work, fine colors & a cross embroidered right in the center. It was just the right size to cover up the hole in the front wall.

He bought it and headed back to the church. But by this time it had started to snow. An older woman running from the opposite direction was trying to catch the bus. She missed it. The pastor invited her to wait in the warm church, for the next bus, 45 minutes later. She sat in a pew and paid no attention to the pastor while he got a ladder, hangers, etc. to put up the tablecloth, as a wall tapestry.
The pastor could hardly believe how beautiful it looked and it covered up the entire problem area. Then he noticed the woman walking down the center aisle. Her face was like a white sheet. "Pastor," she asked, "where did you get that tablecloth?" The pastor explained. The woman asked him to check the lower right corner to see if the initials, EBG, were crocheted into it there. They were.
These were the initials of the woman, & she had made this tablecloth 35 years before, in Austria. The woman could hardly believe it, as the pastor told how he had just gotten the tablecloth. The woman explained that before the war she and her husband were well-to-do people in Austria. When the Nazis came, she was forced to leave. Her husband was going   to follow her the next week. She was captured, sent to prison & never saw her husband or her home again.
The pastor wanted to give her the tablecloth; but she made the pastor keep it for the church. The pastor insisted on driving her home, that was the least he could do. She lived on the other side of Staten Island & was only in Brooklyn for the day for a housecleaning job.What a wonderful service they had on Christmas Eve. The church was almost full. The music & the spirit were great. At the end of the service, the pastor & his wife greeted everyone at the door & many said that they would return. One older man, whom the pastor recognized from the neighborhood, continued to sit in one of the pews and stare, and the pastor wondered why he wasn't leaving.

The man asked him where he got the tablecloth on the front wall because it was identical to one that his wife had made years ago when they lived in Austria before the war and how could there be two tablecloths so much alike? He told the pastor how the Nazis came, how he forced his wife to flee for her safety and he was supposed to follow her, but he was arrested & put in a concentration camp. He never saw his wife or his home again for all the 35 years in between.
The pastor asked him if he would allow him to take him for a little ride. They drove to Staten Island & to the same house where the pastor had taken the woman three days earlier. He helped the man climb the three flights of stairs to the woman's apartment, knocked on the door and he saw the greatest Christmas reunion he could ever imagine.

 By Pastor Rob Reid. 

                              SABUAI PUAN (Christmas a time for Reunion)                                            Translated By Daniel Shoute


     Pasian nasem Pastor a ngah thak khat leh a zi pen Brooklyn khuapi khuanawl lam a biakinn lui khat a puah kik in a hong kik dingin mawhpuakna ki pia hi. Amaute zong lawp tak mah in October kha in tua mun ah kisuan pah uh hi. Biakinn a muh uh ciangin kisia mah mah in nakpi taka puah ding a kisapna thu mu uh hi. A hih theih zah un puah in December 18 ni in zawh pelmawh sawm uh a, zong zo takpi uh hi. Kamsiatna lianpi tawh December 19 ni in Huihpi leh guahpi kithuah in tua a biakinn zong ni nih sung bang hong nuai gawp hi.
Khua a phat kik ni Dec 21 ciangin Pastor pa pen biakinn ah hong pai a, a biakinn puah sa pen a buahban gawp ban ah, a tunglam munkhat vang in tua in a biakinn pulpit , biakna tau tung teng mun zapi khat siasak lai hi. Pastor zong lungkia mah mah in, a cihna ding theilo a hih manin Christmas Eve pawi bawl ding ni zong a ni khel in inn lam hong ciah kik ta hi. Inn lam a ciahna lampi Bazar khat ah Van lui mite piak ding zuakkhiat na khat om a tua tak ah khawl in van kisam lei ding hong kipan hi. A biakinn pulpit tung lutan khawng a sang mun awng zapi khat a khuh zo ding puan pi hong zong a, khut tawh a kigan ngiat Sabuaipuan lui a hoih lai a puang phiuhpheuh khat, tua a kisiatna mun teng khuh zo dingin lam en a hih manin hong lei hi. Tua puan tawh biakinn ah pai kik in a kisiatna mun pen hong khuh in ding in kahlei la in hong kipan hi.

Tua hun lai tak pen vuuk kiat hun hi in , nupi khat biakinn mai a bus ngak khat in a bus lap lo a, bus kik pen minute 45 sawt ding a hih man in, khuadam sa in biakinn ah tawmvei khawl dingin a sung ah hong tum hi. Hih piteek nu pen biakinn nunggual ah hong tu in pastor nasep pen en zel, a pua lam en zel in hong om hi. Pastor pa in zong Sabuai puan pen pulpit nung ah hong zaak khin in, lungkim takin a sepna sa pen hong en pha pha hi. Tua laitak in piteek nu in tua puan limtak hong et khit ciang in, lamdang sa lua in maikhing kawm in, " Pastor aw" ci in hong sam hi. " Hih Sabuai puan pen koitak pan in ngah na hiam?' ci in dong a, Pastor in zong a ngahna mun hilh hi. Piteek nu in tua Sabuai puanpi pen hoih takhong en a, a nuai lam taklam kiu khat ah lai mal "EBG" cih laimal ki-at a muh ciang in lamdang sa sawn sawn hi. Hih laimalte in a khiatna nei in, hih puan pen tuma kum 35 lai a Austria gama om lai a gat a hih lam a thei hi. Piteek nu in hih bangin Pastor in "Sabuai puan" a ngah pen up hak sa mah mah hi.

Piteek nu in a tangthu hong gen a, a mah leh a it mah mah a pasal pen Austria gam ah tuma kum 35 lai, galpi nihna madeuh in kiteng in mihau innkhuan khat pan a khangkhia tuak a hih thu gen hi. Tua bangin nupa nuamsa a om laitak un German Nazi te hong pai in, a khua uh pan in paikhia ding in amah (piteek nu) thatang hatna tawh hong sawl khia uh hi. A pasal a hih leh ama paikhiat khit nipi kaal khat ciang hong pai thei pan ding hi ci uh hi. A thuzak kik na ah a pasal pen Nazite in man uh a, thong sung ah koih in, tuni ciang dong ki mu nawn lo uh a hi hi. A pasal pen Nazite bawlsiat in thongsung ah sikhin ding in a um hi. Pastor pa zong lung nuam lo lua in, " Pi aw, tua a hih leh hih Sabuai puan pen nanga dingin manpha mah mah ding hi. Lei zong kullo in tang kik in, hong pia kik ning" a cih leh, " Phamawh kei Pastor aw, tua bangin om hen" na ci hi. Pastor pa in piteeknu pen hehpih lua a hih man in a inn dong a mawtaw tawh va kha hi. Tua pen piteeknu a ding a hih theih sun hi a, tua nu pen Brooklin gal khat a hi Staten Island a teng a hi hi. Tua bangin biakinn nikhat hong puah khit uh ciangin Christmas Eve mang ding in khuasung mi a hithei teng sam uh hi.

Pastor leh a pawlpi mite in December 24 ni Chirstmas Eve hun nuam tak in zang thei uh hi. La kisate leh music te zong nop ci mah mah hi. Hong kikhawm te zong lungdam tak in Chistmas letsongte sang in innlam zuan ciat uh hi. Tua lai tak in Puteek khat , Pastor pate veng a teng khat pen ciah lo in a tutna ngei ah tu in, a pua lam khawng dak in lunglen tuak mah mah hi. Pastor in zong lamdang sa in tua puteek pa kiang va zuan hi. Puteekpa in " Pastor aw, pulpit nung a na zaak Sabuai puan pen koi tak pan na ngah a hiam? Hih Sabuai puan pen tuma kum 35 lai a, Australia gam a ka zi tawh ka om lai un ka zi gat a hi hi. A nuai tak lam kiu a lai ki at " EBG" pen ka min leh ka zi min gawm khawm in, a tomlak na in ka zi in a at a hi hi. Kamsiatna tawh Nazi te hong lut ciangin kazi pen khuasung pan paikhia masa sak in kei hong man uh hi. Tua a kipan ka zi pen kimu nawnlo in tun ka muh loh zawh kum 35 pha ta hi. Hih bang Sabuai puan a kibang lian lian nih leitung ah lah om samlo ding a?" ci in hong dong hi. " ci hi. Pastor in zong , " Pu aw ka mawtaw tawh vakni, hong zui in, holim khawm ni " ci in sam a, tua puteek pen piteek omna a hi Staten Island ah pai pih hi. Amah in tua piteek nu inn kahlei ah hong kah to in, " Pu aw, hih kong kiu in" ci in sawl hi.
Puteek pa in zong kong hong kiu a, piteek nu zong hong pusuak in, hong kimu uh a, kum 35 tawntung kikhen khin , a si khin tuak dinga kilamen tuak "NUPA" kop te hong ki kawi in , nui khawm kap khawm in.. .. bangzah tak in lungdam ding uhhiam?.. Tua Pastor pa a ding in tua kum Christmas val a manpha a sak a om nai kei hi.

Aw.. Christmas..in Pasian leh mihing a kikhen sa kigawm kikna ding in Pasian tapa mihing bangin hong suakna hi a, Nupa kum 35 kikhen khin sa te zong, a lamdang a kigawm sak Christmas...Christmas ah nang leh Pasian a kituak kik (Reunion) ding in Thupha hong pia ta hen.. Amen..

KHA SIANGTHO GUAH MASA LE GUAH NUNUNG By Ellen G White

KHA SIANGTHO GUAH MASA LE GUAH NUNUNG

Translated By Daniel Shoute

Guah nunung le guah masa pen Palestine gam a khua-hun khenna genna ahi hi. Guah masa pen buhtuh hun lai a zu guah hi in, hih guah in buhkung hong posak hi. Guah masa a om kei leh buhkung hong po thei lo ahih manin, lo nasemte mangbang thei mahmah uh hi. Guah nunung ahih leh buh at madeuh a buh amin sak, ahoih sak guah ahi hi. Guah nunung a om kei leh buh min hoih thei loin, buh at ding na-ngawn in om lo thei hi.

Hih kammal pen Kha Siangtho nasepna dan hong kilangsak gentehna hoih mahmah ahi hi. Guah masa pen Pentecost ni pan hong kipan in, Topa Jesu hong pai kik dong huam hi. Guah nunung ahih leh, Jesu hong pai madeuh a hong tung ding genna ahi hi. Hih pen Jesu hong pai madeuh ciang dong a nungtate a dingin poimawh mahmah hi.

Kha Siangtho pen a tawntung in om den a, leitung piancil a kipan a om khin ahi hi. Ahih hangin, "Tu laitak a eite hun pen ateh nuamte a dingin Kha Siangtho hun kici thei hi" (EM 51) ci in Ellen G White in na gen hi. Kha Siangtho pen athu theih bek ding hilo in, ih nuntakna ah ih neih ding thupi pen hi. Kha Siangtho thu pen tam theih lo himah leh, thuzui mite nuntakna ah ompih den hi. Pa le Tapa, le Kha Siangtho in mimal tek gupkhiatna dingin nasep nei tek uh a, Pasian' tate nuntakna ah thahatna pia dingin, hih THUM te mapang khawm den uh hi.

Guah masa, Kha Siangtho in a nasep thupi pawlkhatte:

1. John 16:8. Mawhna hong phawk sak, pulaak sak le mawhmai sak theihna, pianthakna, eite sung a om mawhna tun-gah gualzawhna thahatna hong pia thei hi.

2. John 14:26, 16:13- Kha Siangtho pen eite hong thuhilh, thumaan thutak ah hong tonpih pa ahi hi.

3. Rom 8:26,27-Thungetna tawh eite a ding hong thumsakpa hi.

4. Rom 8:16- Tua Kha Siangtho in eite Pasian tate ih hihna hong theisak hi. Pasian tate ih hihna ih theihna in lungmuan huai mahmah hi. "Kha Siangtho pen mihing pianzia nei in, Pa-sian tate i hihna hong theihpih pa ahi hi" Ev. 616

5. Gal 8:16- Kha Siangtho gah in thu-umte' nuntakna ah kilang hi. Hih Kha gahte khat nangawn eite thahatna le hoihna tawh kigah thei lo hi. Hih pen nalamdang, Kha Siangtho' nasep thu-um mite nuntakna ah a om ahi hi. "Zeisu kiang pan hong pai, nuntakna hong pia thei, Kha Siangtho pen thu-um mite hong lamdang sak in, ih ngaihsutnate Pasian deih bangin hong hei sak in, a manpha mahmah Kha Siangtho gahte hong gah khia sak thei hi". AA 284.

Guah masa ngah nading a kisamte:

1. Sawl 2:38, I John 1:9- Kha Siangtho ngah nadingin mawhna pulaakna, mawhna nunghei san theih ding kisam hi.

2. Luke 11:13- "No migilote ngangawn in na tate uh nahoih piak ding ngaihsut thei nahih uh leh, vantung a om na Pa un a ngente kiangah Kha Siangtho hong pia pelmawh ding hi." Ni-sim in Kha Siangtho ih nget ding kisam hi. Hih banga nget theih nadingin Kha thu ah gilkial le dangkeu ding kisam hi.

3. Sawltakte 5:32 - Hih thute athei a teci te ka hi uh hi; Kha Siangtho Pasian in Ama thu azui khempeuh apiakna thu a theite ka hi uh hi" na ci hi. Ama deihna bangin ih nuntak ding kisam

a, "Kha Siangtho pen eite in i zangh thei kei a, Amah in eite hong zangh zaw ding ahi hi." GW285.

4. I nisim nuntakna ah mawhna bang le anin khempeuh nusiat ding kisam hi. Ephet 4:17-31- " Note na nuntakna lui uh, zuauthu tawh a kidim pen hawk khia unla, na lungsim uh Kha sungah thaksuah in om unla, thutak dikna le sianthona ah Pasian bang dingin bawl phat in na om un" ci hi. Tua bangin, zuau gen khawl in, ih vengte tungah thuman gen kipan ciat un. Pasian' Kha Siangtho pen khasia sak kei un, note gupkhiatna ni a dingin ciapteh in na om uh hi. Khat le khat ki hehpih unla, Pasian in Christ tungtawn in na mawhna uh hong maisak mah bangin note zong na mawhna uh kimai sak un.

5. Sawltakte 1:8- Khazih tecite ih hih ding kisam hi. "Kha Siangtho note tungah hong tun ciangin vangliatna na nei ding uh a, note Jerusalem, Judah, Samaria gam le leitung bup ah ka tecite na hiding uh hi" na ci hi.

6. Ei angsung nial ding kisam hi. Luke 16:24- "Kei hong zui nuamte in ama nopsakna ding ngaihsun lo in, a singlamteh pua in ka nung hong zui ding hi" na ci hi. "Ei-le-ei kinial in, Kha Siangtho tenna dingin lungsim hawmsak in, Pasian a ding a kipiate Pasian zat nadingin ciangtan om lo hi". Chs 254.

7. Upna neih ding kisam. Gal 3:14- Abraham tung a thupha pen Khazih tungtawn in Gentail te tungah om thei dinga, upna hangin eite in hong kiciam Kha Siangtho pen ih muthei ding hi. Mark 11:24- "Na nget peuhpeuh uh a ngah khin in ki ngaihsun un, tua hileh na ngah takpi ding uh hi. "Kha Siangtho ih ngah nadingin ih nget ding kisam a, upna tak tawh ih nget leh ih mu takpi ding hi."

Guah nunung ih ngah nadingin Kha Siangtho ih ngah nad-ing kisam masa hi. Jesu in Kha Siangtho baptize-na na ngah a, Col 139." "Pasian thu tangkote in zong zingsang sim in, Pasian tungah ki-apna tawh khukdin in a nget nak leh Kha Siangtho ki pia ding hi" AA56. Nungzui masate in Pasian thu hangsan tak a tangko theihna pen Kha Siangtho ompihna hang ahi hi. "Kha Siangtho in amaute nuntak sunga asep theih ngei loh ding vangliatna tawh na asep sak hi" AA39, 40.

GUAH NUNUNG

Guah nunung pen bang hun in hong tung ding hiam?

A masa in Patau Kohna (Loud Cry) i cih pen Vantungmi thumte thupuak pen Pasian vangliatna tawh tangko khiatna ahi hi. Hih nasepna le guah nunung pen a tonkhawm, khen theih ahi kei hi. Tua Vantungmi thum tangkona in Babylon kisiatna zong tangko khawm hi. Mangmuhna 14:8, 18:4.

Babylon pen kicim ding hi ta a, Vantungmi thumte tangko akipat hun a kipan a, a guallelhna hong kipan ta hi. Atawp dong a guallehna ding pen America gam in Sunday Law hong tangko khiat hun hiding hi. Tua khit phet in leitung khempeuh ah hong kizel ding hi. Tua hun ciangin Babylon guallehna pen hong tangcing tading hi. Guah nunung pen Vangtungmi thumte thupuak tangko ding a vangliatna apia ding ahi hi. Vantungmi thum thupuak tangko khit ding pen Babylon a kicipna thu hiding hi. Babylon in a kisiatna kicinna pen Amer-ica gam in National Sunday Law hong tangko khiat pan kipan in, International Sunday Law tawh hong kizom to ding a, lei-tung khempeuh hong kizel ding ahih manin, guah nunung pen National Sunday Law hong tun khit cianga hong tung ding cih kimu thei hi.

Tu-in Vantungmi thum thupuak eite in ih tangko a, ahih hangin hih pen Patau Kohna hi nai lo hi. Guah nunung ii hong puak vangliatna tawh ih tangko nai kei hi. Guah nunung pen Sunday Law hong kipan panin Hehpihna kong kikhak hun kikal sungah hong tung ding hi. Ahun hong tun hun lian ding ki theilo a, ahun ding pen Ellen White in zong na gen lo hi. "Guah nunung hun ah ih om ta hi," TM 512 (1897) ci in na gen ta hi. "Guah nunung hun ciangin eite tungah hehpihna hong tun theihna dingin nakpitak le kisikkikna lungsim tak tawh thungen ni" TM509 (1897).

Sunday Law ahong tunna, guah nunung hong kibuak hun ciangin leitung pen pawlpi nih in kikhen dinga, Pasian mite le Pasian milote, Sapi ciaptehna neite le Pasian ciaptehna neite in kikhen ding hi. Hih hun ciangin, khuavak mu mah leh amuh banga kalsuan lo pawlpi sunga mi tampite guah nunung in paisan ding hi. Hih hun ah hong piang thak, Kha Siangtho guah a masa ngah napi, thuman tampi tak athei nailo om ding hi. Ei SDA sungah :

1. SDA sungah pianthakna ngah in thutak khuavak amuh bangbang a kalsuante om ding hi. Ahih hangin thutak thei a piangthak lo, khuavak amuh bang a kalsuan lo zong ki om ding hi.

2. SDA a hilote lak ah zong pawl nih in kikhen ding hi. Pasian athei, Pianthakna a ngah, thutak a thei kimlo om ding uh a, ahih hangin a tampen te Pasian thei lo, pianthakna ngah lo le thutak theilo hong om ding hi.

Hih hun ciangin Adventist te lak ah pianthakna a ngah lo, guah masa a ngahlote in Adventist pawlpi a nusia ding uh hi. Tua mite in thu-ummite a bawlsiate hong suak ding hi. Khua zing lak ah amangg ding uh hi. Amaute gimna nam sagih ah zong Pasian in kem nawn lo dinga, a tawntung a mangthang ding uh hi. Adventist pawlpi mi tampite hi bangin mangthang ding uh hi. Ellen G White genkholhnate en suk dih ni.

1. Tulai tak a Thumaan thutak ngah a kisa mibup dektak te pen guah nunung ngah dingin kilawm lo uh hi. IT 466.

2. Tu hun a pawlpi mi a tamzawte pen mawhna sungah kidiah mahmah lai uh hi. 6T 426, 427.

3. Kei tungah hong kilaak bang hileh, tu laitak a thuman a sang kici mite lak ah zong tawmbek gupkhiatna ngah ding uh hi. 2T 445.

4. Pasian thu ki nengcip in, ze-etna meiipi in pawlpi hong nuai ciangin mi a tamzaw te in dawite upna lam zui zaw ding uh hi. GC bul P 257, (1891)

5. Haksatna hong tun ciangin, Vantung mi thupuak a um le azui a kinei thu-um mi a tamzaw te in, a thumaan zuihna uh tawpsan in alehdote lam ah hong pang tading hi. GC608.

6. A tam zawte in sinkhiatna sunga dingte a dingin ze-etna lianpi suak ding hi. 5T136.

7. Pasian mite ze-etna hun ciangin tulai tak a, atak mah-mah pawlkhatte zong sik ekseu bangin azat tak lo zia kilang ding hi. 5T136.

8. Pawlpi mi sawmnih ah khat (5%) nangawn in sih dong kipia ngam nai lo hi. Pasian neilo, lametna neilo leitung mite bangmah in nungta uh hi. 5T81.

9. Pasian mi, Aksi pi banga ih thupi muh mahmah pawlkhat zong khuazing sungah bei mang ding uh hi. 5T81.

10. Tu laitak a Thumaan thutak a umte lak ah zong tawm bekin siangthosakna ngah in gupkhiatna ngah takpi bek ding uhhi. 1 T608.

Adventist pawlpi mi a hilo, pawlpua lam mite bang ci om ding? Pasian thei lo, pianthakna ngah lo, thutak zong a thei lo tampi om ding hi. Tua mite pen thuak hak mahmah ding uh hi. Ahih hangin Pasian thei, pianthakna a ngah, thutak a theilo tampi tak om dinga, hih mite in guah masa a ngah uh hi. A maute in Kha Siangtho ompihna ngah dinga, Sunday Law hong kipat ciangin amaute in thuman thutak hong mukhia dinga, Kha Siangtho panpihna tawh hang takin thuman hong tangko ding uh hi. Hih bang hun ciangin a masa pen zong ki nunung pen thei a, a nunung pen zong a masa ki hi thei hi cih kammal hong tangtung taktak tading hi. Hi mite in launa om lo in thutak bek len ding uh a, amaute in thakhat thu in guah nunung a ngah ding uh hi.

"Mi tampi thutak theilo in om a, Pasian in a maute lam kihei dingin nasem ding hi. Lungduai tak in Pasian en in, a hehpihna khut eite gupkhiatna dingin a laptoh lai in, a lut nuam tuanlo te a dingin kongkhak kikhak khin ta hi." 9T97.

Hangsanna, upna le Pasian hong gupkhiatna upna kipte pen tawmvei sung a neih theih hilo a, van panin hong hehpihnate zong kum tampi a kantante bek in a ngah theih ahi hi. Thumaan thutak a dingin kiptak a ding le siangthona nun-takna neite in Pasian tate hihna kip sak hi. 5T213.

Source: Message for the Last Generations. pp 11-26

CHRISTMAS By Ellen Gold Harmon

                                   CHRISTMAS
                                   *********
Christmas zong Zumkhakni hi.

—“Christmas hongtung ding hi” ci in nitumna panin nisuahna, saklam panin khanglam leitungbup ah kitangko hi. Khangnote, akhancin leh uhamte khempeuh adingin lungdam hun ahi hi. Hihzah in phawkdingin Christimas in bang hiam?

December 25 ni pen Jesu Christ ie suahni dingin kingaihsun hi. Ngeina tawh hong kikemto a, popular mahmah hi. Ahihhangin Honpa suahni taktak azang ihhiam, cih taksanna omlo hi. Tangthu-in hong ciangenlo hi. Laisiangtho nangawnin ani ciangen lo hi. Topa in gupkhiatna adingin kisamsa hileh kamsangte leh sawltakte tungtawnin honggen khin ding hi. Hih thuah Laisiangtho’ gamdaihna in pilna thukpi akihel ngimna tawh akiselsim ahi hi.

Topa in pilna tawh Moses luang kiphumna seel hi. Pasianin thosakkikin vantungah lato hi. Tua thusim vaihawmnain milim biakna dalkholh nading ahi hi. Anuntak, anasep laitakin alangpan uh, mihing’ thuakzawhloh dongin azia-et uh, asih khit ciangin Pasian bangin bia dektak uh hi. Tuabang ngimna mahbangin Jesu’ suahni zong Pasianin seelsim hi. Asuahni in hihzahta in zahtak angah ding deihlohna ahi hi. Zahtakna angahna-in Pa in leitung Honpa, muanna tawh ihsanding, amawhpente nangawn ahonkhia zo pa hizaw hi. 478Biakna angah ding pa in Jesu Pasian’ Tapa hizaw hi.1

Tuani Awlmawhlohding Hilo.

—Christ suahni dingin December 25 ni in pawi ihbawl bangin naupangte maiah hih ni lungdamni hi, ci in akihilhna leh limlahna tawh kituakin, kin ngaihsunlo-in paisanding haksatna om hi. Hih hun zatna tawh ngimna hoih kisem theiding hi.

Khangnote kidawmtakin bawlding ahi hi. Christmas ni-in amau’ gualnopna azongding, khalam lampialna khat tawh agualnopdingin mawk nutsiahding hilo hi. Hih pawi ni tawh kisai in tate ngaihsutna zangin Pasian’ lamah ih heisakding leh gupkhiatna nasepna in ihzatding ahi hi.

Tate’ gualnopna ihlungkim sak sangin aana tawh pum khaktan ding hilo hi. Hun la in, geelna tawh nu leh pa in vaihawmsak ding hi. Letsong apiaknopna uh pen Pasianin a Tapa letsonga ahongpiakna pulak nadingin bawlsak ding hi. Kei-nialin Pasian’ nasepna ah lamkhat panin sepkhiat ding pattahna zong ahi hi. Ani lianah ihlungsim koihlo-in Jesu ih itna pulakna hun hisak ding hi. Tawntung nuntakna lametna ahong piapa in eite nuntakna laigil ahi hi.2
Letsong kikhekna-in kiitna Lim.—Christmas zumkhak hun hong naitektek hi. Letsongte kipia ding uh hi. Khangnote in ngaihna akiphawksak tawntung nadingin bang letsong piading hiam, ci in buai uh hi. Letsong ngahna in anuam huai khat hia, bangzahta in neu taseleh ihngaihte kiang pan ahihnakleh kideih hi. 479Hihin eite hong kimangngilh nailo cihna hia, anaizawin nuntak khop zawk nading ngimna zong ahi hi.

Itna limlak letsong kipiaknain Pasian hong mang ngilhsak kei peuh leh ahoih thu ahi hi. Letsong ihpiak lehzong angahte adingin phattuamna taktak apiangsak ahihding thupi hi. Tuabang adingin Pasian’ thu theihsiam zawk nading, thuhilhnate ih it theih zawk nadingin laibu kipia lengh hoih hi. Phalbi sau sung nitak sial simding laibu kipiakding hoih kasa hi.3
Naupangte ading Laibu.—Tulai thumaan laibu tam lualo hi. Sumbei sak veve amannei laibu lakah: The Sunshine Series, Golden Grain Series, Poems, Sabbath Readings te in innkuan khat simah om leh hoih hi. Muamkhum peuh leina, naupang kimawlna leinaah ihzatte asumin khol hilengh hihbang laibute kilei zo ding hi.

Tate, tute, tanaute ading khantohna apia laibu leisak asawmte in atunga naupang laibute banah, khangnote adingin Life of Joseph Bates, The Spirit of Prophecy zong hoih hi. Hih laibute in innkuan laisal ah koihding kisam hi. Pasianin vantung panin khuavak hong piaa, innkuante in tua khuavak angahding uh hoih hi. 480Napiakding laibu letsongte in vantung lampi dungah khuavak ataan ahih nadingin vaihawm in.4

Jesu kimangngilh Ngeiloding.

—Sanggam numei pasalte aw, khat leh khat nakipiakding uh letsongte navaihawm laitakun, vantung na Lawmpa uh hong phawksak nuam ing. Amah ihmangngilhloh lam phawksak hilehang Amah lungdam ding hilo ahi hiam? Jesu, Nuntakna Kumpipa, in gupna ihngah nadingin hong kipia hi. Tua hong kipiakna tawh eitein tawntung nuntakna ihngah theih nading ahi hi.

Christmas Singkung Ihnei Diam?

—Christmas hun ah pawlpi in biakinn sialah Christmas singkung khat tek nei uh henla, tuate tungah piakkhiatna sumpi atawm atam in kikhai leh Pasian lungdam ding hi. (Hih thu agen laitakin pawlpi in inn alamsawm laitak uh hia, innlam nading sumpi kisam uh hi. Tuni adingin kizang theinawnlo hi). Christmas singkung ihnei theiding hiam, cih dotna hong kidong hi. Neihding alunggulh nahihleh leitungte neihbangin na nei thei hi. Ahihtheih laitengin leitung tawh akibanglo theithei in nabawlding hi. Singkung ahinglai deihbang teel-in biakinn sungah nakoihna tawh mawhna tungpahlo hi. Tua mawhna in nangma lungsim tawnga natupna ah om zaw hi. Tua lungsim tawngin tua singkung tungah letsongte nakhaisak hi.

Christmas—Pasian Pahtawi Hun.
 —Leitungmite in zumkhakhunte gualnopna, annekna, kisialhna, uangtatna in zang uh hi. Ahong paiding Christmas hunah sum awn tampi kibua khia dinga, kumthak ciangin akisamlopi in kiza’ang ding hi. Eite adingin ngeina leh zatdante panin kiheikhia in, akisamlopi in duh leh dahin, puansilh nikteen, leh kizepnate zanglo in Pasian’ minthan nadingin ihzang ding hi.6

Hih hun ah Christ athupipen hia, Christmas hun atunciangin Ama’ minphatnate kihemkhia in, asithei mihingte kiphat hi. Amaute hemna leh poi nate adingin Amah ahong kumsuk hizaw hi. Vantung kumpipa Jesu in Ama’ kumpi puante suahkhia in, atokhom nusia in, athuneihna hemkhia in, mawhna sungah akia khin leitung mite ahonkhia dingin hong tuaksuk hi.
Naupangte nahilhna uhah nu leh pate in hih thu genpih ding ahi hi. Lai gual khat panin gual khat, thukhun panin thukhun khatah Pasian tungah amaute’ avuan neih theisak ding hi. Amau leh midangte tungah tavuan neihna ahilo, khat leh khat kipahtawi in letsong kipiakding hilo hi.7

Tate’ Ngaihsutna Thukawng Heisak.

— Akisamlo nate leeina tawh sum tampi zat kullo-in khat leh khat tung, meltheihte tungah thusiamna kilak thei a, innkuan sungah lungnopna kitumpih thei hi.

Letsong kipiakna amanphatnate kikhelthei ahihna tate nagenpih ding hi. Mihingte’ gualnopna hilo dinga, Pasian’ minthan nading hizaw ding hi. Amaute in amau’ nopsak ding bek ngaihsun uh ahihna genpih in.zatngei leh leitung ngeina tawh kituakin mihing’ lungkim nadingin letsong kipiaknate in Pasian pahtawilo hi. Tuabanga ngeina zuihna in Pasian’ nasepna mazangsaklo hi. Tanglai-a mipil thumte in naungek ading letsong hong puak mah uh hi.Tuabang mahin Leitung adinga ahong kipia Jesu adingin letsong ihpiakding hizaw hi. Tate ngaihsutna heisak inla, angsungkhuatna akihello, Pasian tungah piakkhiatna nei in, atapa khat neihsun ahong piakna lungdamna lak in.8

Christmas Singkung Ihnei Diam?

—Christmas hun ah pawlpi in biakinn sialah Christmas singkung khat tek nei uh henla, tuate tungah piakkhiatna sumpi atawm atam in kikhai leh Pasian lungdam ding hi. (Hih thu agen laitakin pawlpi in inn alamsawm laitak uh hia, innlam nading sumpi kisam uh hi. Tuni adingin kizang theinawnlo hi). Christmas singkung ihnei theiding hiam, cih dotna hong kidong hi. Neihding alunggulh nahihleh leitungte neihbangin na nei thei hi. Ahihtheih laitengin leitung tawh akibanglo theithei in nabawlding hi. Singkung ahinglai deihbang teel-in biakinn sungah nakoihna tawh mawhna tungpahlo hi. Tua mawhna in nangma lungsim tawnga natupna ah om zaw hi. Tua lungsim tawngin tua singkung tungah letsongte nakhaisak hi.
Tua singkungin sangin ahiang zong zai thei hi. Amun leh ahun tawh kituakin akivaihawm thei thu ahi hi. Ahizongin tua singhiangte ah kham leh ngun tawh akibawl piakkhiatna sumpite tawh kiluai hen. Christmas letsong dingin Amah pia un. Napiakkhiatnate uh thungetna tawh ap un.9

Christmas leh Kumthak pawite mizawngte ading ngaihsutna tawh bawlding ahhi hi. Panpih ding innkuan lian aneite huhna tawh Pasian kipahtawi hi.10
Letsong tawh adim Singkung Mawhbanglo.—Sabbath School sangnaupangte pahtawina-in akikoih Christmas singkungin mawhna hi, ci in nu leh pate in ngaihsutding hilo hi. Thupha zong hithei hi. Mite’ lungsimah piakkhiatna ngaihsut sak in. Hih kikaihkhopna in gualnop nading bek hisaklo ding hi. Hih hun pen kin omlo pawikhamna lelin ngaihsut ding hilo hi. Tuabangin angaihsunte adingin Pasian’ bilvuhna ngahlo ding uha, midangte adingin thupha sanna hiding hi. Gualnopna leh zualzanna-in akizang hih pawite pen mawhna abaanglo hunhoihin thukawng hei theihding kisam hi.11

Tuani-in Mawhna kihello Nopsakna Piain.

—Christian sanggam numei pasalte aw, khanglo in, Pasian kihta ding in nakawng uh nagak nai uh hiam? Acimtaak huai ni ahihloh nadingin vaihawmin. Mawhna aomlo gualnopni hisak un. Vantung in athukim pih ni suaksak un. Azawng pawlte in hih thu ah thukim pah ding uh hi. Pasian ahong piakna leh naneihna uh tawh kituakin ahaute in piakkhiatna nei un. Pasian’ nasepna akizop nading leh Pasian’ Gam akilamtoh nadingin hih Christmas hunin napiakkhiatnate uh vantung laibu sungah kiciamteh ta hen.12

1 Review and Herald, Dec. 9, 1884.
2 Review and Herald, Dec. 9, 1884.
3 Review and Herald, Dec. 26, 1882.
4 Review and Herald, Dec. 11, 1879.
5 Review and Herald, Dec. 26, 1882.
6 Review and Herald, Dec. 11, 1879.
7 Review and Herald, Dec. 9, 1884.
8 Review and Herald, Nov. 13, 1894.
9 Review and Herald, Dec. 11, 1879.
10 Manuscript 13, 1896.
11 Review and Herald, Dec. 9, 1884.
12 Review and Herald, Dec. 9, 1884.